1. Ino raha mety ho nahalany fan̈ahy anao taminy anao sambany nikoran̈a hafatra amy Baiboly ao taminolo?

ASA azonao onon̈o taminy anao tontohitry fa nahita fahamarin̈ana? Nazava taminao mare raha ampianariny Baiboly. Ke nieritreritry anao fa tsisy olo tsy han̈eky izio. Resy lahatra anao fa izikoa olo araiky mahay ny marin̈y amy Baiboly ao, ho sambatra izy avio han̈anten̈a raha tsara mare aminy amaray. (Sal. 119:105) Ke nafana fô mare anao nan̈ambara ny marin̈y amy Baiboly ao tamy namanao ndreky havanao. Lany fan̈ahy anao fotony tsy arakarakany raha nantin̈ainao raha nandalo. Maro tamindro tsy nitandren̈y anao foeky.

2-3. Taloha tan̈y, karakory ma fiheveranolo maro i Jesosy ndreky hafatra nitoriany?

² Tsy tokony ho lany fan̈ahy foeky atsika izikoa misy olo tsy man̈eky hafatra toriantsika. Miniminia hely baka ty: Maro fahagagan̈a nataony Jesosy nahitan̈a fa Zan̈ahary nan̈ampy izy. Kanefa, tsy nitandren̈y izy foeky ankamarozanolo. Ohatra, tamy Jesosy nanangana Lazarosy, maro taminolo nanohitry izy aby io tsy nahavita nifamatra fotony masondro lastio nahita raha zen̈y. Kanefa malaka ny maty, tsy nan̈eky foeky iro sefosefo tamy Jiosy aby io fa Jesosy ankitin̈y Mesia. Ndray iro aby tihamono Jesosy ndreky Lazarosy ke!​—Jaona 11:47, 48, 53; 12:9-11.

³ Efa hainy Jesosy fa ho maro olo tsy hino fa izy Mesia. (Jaona 5:39-44) Karaha ty ho izy tamy pianatrany Jaona Pan̈ano Batisa: “Sambatra lan̈iany olo tsy tafintohin̈y baka aminaka.” (Mat. 11:2, 3, 6) Ino ma nahavy olo marobe tsy nino Jesosy?

4. Ino ma raha hidinihintsika ato?

⁴ Misy antony maromaro nahavy olo tamy zen̈y tsy nino Jesosy. Zen̈y raha hidinihintsika amy lahatsoratra ty ndreky lay man̈araka. Hizahavantsika koa antony mahavy ankamarozanolo avahizo tsy mitandren̈y hafatra toriantsika. Fa ny raha ten̈a maventy,  hianarantsika ato akory hahavy atsika hahaihino Jesosy fo, ke tsy ho vôly han̈aradia izy.

5. Ino nahavy olo sasany nieritreritry fa Jesosy tsy Mesia nampan̈antinain̈y?

⁵ Baka amy tany faviany Jesosy fo nahavy olo maro nanjary tsy nino izy. Iro koa fa nitandren̈y fampianaran̈anany, resy lahatra iro fa tsisy papianatra mahay mandilatra Jesosy, sady izy lastio nahavita nan̈ano fahagagan̈a. Kanefa, zanaka pandrafitry araiky masikiny fo fihiverandro izy. Fan̈ampinizen̈y, izy baka a Nazareta. Tanàna hely tsisy dikany fahitanolo izio. Ndray i Natanaela fo tamy voanalohany nivolan̈a karaha ty: ‘Mba misy raha manjary ma baka a Nazareta an̈y?’ (Jaona 1:46) Ndray zen̈y, nanjary pianatrany Jesosy fo izy tafara tatỳ. Mety tsy hitany Natanaela donko raha nampiavaka tanàna faviany Jesosy io. Na koa, mety azony onon̈o donko faminanian̈a amy Mika 5:2 mivolan̈a fa Mesia io ho teraka a Betlehema fa tsy a Nazareta.

6. Akory tokony nahaizanolo tamy zen̈y fa Jesosy ankitin̈y Mesia?

⁶ Ino ma raha koran̈iny Soratra Masin̈y? Nivolan̈a paminan̈y Isaia fa tsy ‘handiniky tsipiriany momba taranaka niboahany’ Mesia io foeky iro fahavalony Jesosy aby io. (Isaia 53:8) Efa nambarany faminanian̈a aby io tsipiriany maro momba izy. Kanefa iro koa nangala fotoan̈a hely handinihan̈a faminanian̈a aby io, ho hitandro fa ta Betlehema ankitin̈y i Jesosy teraka, eraka raha nambarany Mika 5:2, avio izy taranakany Panjaka Davida. (Lioka 2:4-7) Fa iro nalaky nitsara loatra, kanefa tsy haindro aby ino ny raha ten̈a nisy. Zen̈y nahavy iro tsy nan̈eky Jesosy.

7. Ino ma mahavy olo marobe amy zioty tsy tia panompony Jehovah?

⁷ Misy raha karaha zen̈y koa ma iziô? Zen̈y ke! Ankamarozany panompony Jehovah amy zioty tsy pan̈arivo na olo an̈abo, ke maro olo mieritreritry fa iro io ‘tsy dia nandeha lekoly’ na ‘olo ambany.’ (Asa. 4:13) Misy koa olo mihevitry fa tsy tokony hampianatra Baiboly zen̈y atsika, fotony atsika tsy nianatra teôlôzỳ. Sasany ndraiky mieritreritry fa Vavolombelon̈o Jehovah io fivavahan̈a amerikain. Kanefa ny raha misy, ankamarozantsika tsy mipetraka an Etazonỳ aby. Misy koa olo mivolan̈a fa Vavolombelon̈o Jehovah zen̈y tsy mino Jesosy. Tan̈atiny taon̈otaon̈o atsika nataondro fa fivavahan̈a satanìky na sekty mampavozo. Ke maro amindro io koa fa maharen̈y fankaratsian̈a jiaby zen̈y, iro tsy tihitandren̈y hafatra toriantsika foeky sady tsy tihanjary Vavolombelon̈o Jehovah. Kanefa, tsy haindro aby ny ten̈a marin̈y, na iro foeky efa tsy nahefa.

8. Izikoa zahan̈a Asan’ny Apostoly 17:11, ino ma raha tokony hataonolo araiky izikoa izy tihahay ny marin̈y momba panompony Jehovah?

⁸ Ino raha tokony hataonolo araiky baka tsy hihen̈y finoan̈anany? Mila dinihiny tsarabe ino ny ten̈a marin̈y. Zen̈y raha nataony Lioka, panoratra Filazantsara. Nataony hevitry jiaby hahaizany ny marin̈y. Izy tsy raha nikaroko ndreky nandiniky raha jiaby rango tamy voanalohany fo fa, namarin̈iny tsara koa izio. Ino antony? Fotony tiany ho hainolo hamaky Filazantsara nisoratiny io fa ‘azo antoko tsarabe’ raha ren̈indro momba Jesosy. (Lioka 1:1-4) Karaha zen̈y koa nataondro Jiosy ta Beria. Iro koa fa naharen̈y vaovao tsara momba Jesosy, nidinihindro tsarabe raha koran̈iny Soratra Hebreo momba izy, baka io nalaindro antoko tsarabe fa marin̈y raha volan̈inizio ao. (Vakia Asan’ny Apostoly 17:11.) Karaha zen̈y koa raha tokony hataonolo avahizo. Tokony hikaroko tsarabe iro misy ahaizandro ny ten̈a marin̈y. Tsy maintsy zahandro izikoa ten̈a mifan̈araka amy raha koran̈iny Soratra Masin̈y ankitin̈y raha ampianariny Vavolombelon̈o Jehovah sa karakory. Mila mianatra tantarany Vavolombelon̈o  Jehovah koa iro. Iro koa man̈ano zen̈y, ho hitandro fo ny ten̈a marin̈y ke iro tsy ho voafitakany raha volan̈inolo mankaratsy atsika.

9. Ino raha nandalo, Jesosy koa fa tsy nan̈eky han̈ano famantaran̈a baka andan̈itry?

⁹ Nahay nampianatra ankitin̈y i Jesosy, fa iro olo aby io tsy afapô fa mbala nitady raha hafa koa. Iro nivolan̈a fa Jesosy koa man̈ano ‘famantaran̈a baka andan̈itry’, iro zen̈y hino fa Jesosy ankitin̈y Mesia. (Mat. 16:1) Tiandro han̈ano zen̈y donko Jesosy fotony tsy nazava tamindro foeky faminanian̈a koran̈iny Daniela 7:13, 14. Kanefa ny raha nisy, tsendriky taminio fotoan̈a tiany Jehovah han̈atantirahan̈a faminanian̈a io. Iro koa fa naharen̈y fampianaran̈any Jesosy, iro tokony ho efa resy lahatra edy fa izy marin̈y Mesia. Jesosy koa fa tsy nan̈eky nan̈ano famantaran̈a nitadiavindro in̈y, iro neloko mare ke nialandro foeky izy.​—Mat. 16:4.

10. Ino raha nambarany paminan̈y Isaia momba Mesia? Akory nampatanteraka raha zen̈y tamy Jesosy?

¹⁰ Ino ma raha koran̈iny Soratra Masin̈y? Karaha ty ho paminan̈y Isaia momba Mesia io: “Izy tsy handronton̈o na hiafatrafatra, baka io feonany tsy hataony ho ren̈inolo andalan̈a foeky.” (Isaia 42:1, 2.) Hitantsika baka amy zen̈y fa ten̈a nanetry ten̈a i Jesosy, taminizy nan̈ano fanompoan̈anany. Izy tsy nisariky sain̈inolo taminany foeky. Izy tsy niasa tempoly maventibe na nisikiny lamba miavaka karaha nindro pitondra fivavahan̈a aby io. Izy tsy nan̈eky nikahian̈a taminy an̈aramboninahitry fampiasaindro amy fivavahan̈a aby io. Taminizy nitsarain̈a man̈oloan̈a Panjaka Heroda, malaka ny maty fa izy tsy nan̈eky han̈ano famantaran̈a zisty hamparavoravoan̈a i Heroda fo. (Lioka 23:8-11) Jesosy nan̈ano fahagagan̈a. Fa ndray zen̈y, fitorian̈a vaovao tsara ny raha ten̈a maventy nifantaohany, fotony ‘zen̈y antony naviany’ tambony tany teto.​—Mar. 1:38.

11. Ino hevitry diso anan̈anolo sasany aminandra iziô?

¹¹ Misy raha karaha zen̈y koa ma iziô? Zen̈y ke! Aminandra izioty, maro olo voasariky koa fa mahita katedraly maventibe feno sanjisanjiny maro lafo aby io. Tiandro mare koa mahita iro pitondra fivavahan̈a kahian̈a aminy an̈aramboninahitry miavaka mare. Iô koa fety sasany ankalazain̈a ao, kanefa maro amindro tsy mahay  baka aia naviany fety aby zen̈y ndreky antony an̈anaovan̈a izio. An̈arany fo iro mandeha a leglizy, fa tsy be aby raha haindro momba Zan̈ahary ndreky fikasan̈anany! Tsy karaha zen̈y ndraiky raha tsapanolo man̈aton̈o fivorian̈antsika. Ianarantsika an̈y ino raha takiny Jehovah amintsika ndreky akory hatao man̈ano sitraponany. Tran̈o Fivorian̈antsika tsotra, kanefa madio sady mety tsara amy raha ilàn̈a izy. Tsy miavaka koa fisikinan̈andro piandraikitry an̈ivony fiangonan̈a misy atsika, avio iro tsy kahian̈a aminy an̈aramboninahitry. Miôrin̈y amy Volan̈a Zan̈ahary aby raha jiaby ampianarin̈y atsika ndreky inoantsika. Ndray iô raha jiaby zen̈y, mbala maro fo olo tsy man̈eky hafatra toriantsika, fotony iro mieritreritra fa tsotra loatra fomba anompoantsika Zan̈ahary. Tsy mifan̈araka amy raha tiandro ho ren̈y foeky raha ampianarintsika.

12. Izikoa Hebreo 11:1, 6 io zahan̈a, tokony hiorin̈y aminino ma finoan̈antsika?

¹² Ino raha tokony hataontsika baka tsy hihen̈y finoan̈antsika? Karaha ty ho apostoly Paoly tamindro Kristianin̈y ta Roma tan̈y: ‘Finoan̈a io baka amy raha ren̈y, ke matoa atsika naharen̈y, dikanizen̈y nisy olo nikoran̈a momba Kristy.’ (Rom. 10:17) Tsy fan̈anaovan̈a fety tsy mifan̈araka amy Soratra Masin̈y ny raha hampafatatra finoan̈antsika, ndray tsarabe karakory fahitanolo iro io, fa amy fazotoan̈a mianatra Baiboly. Nan̈ino ma atsika tsy maintsy miezaka mare baka hanan̈a finoan̈a matanjaka? Fotony Baiboly mivolan̈a fa ‘izikoa tsy baka amy finoan̈a, tsisy raha mety atao hazahoan̈a rady amy Zan̈ahary.’ (Vakia Hebreo 11:1, 6.) Ke hitantsika baka amy zen̈y fa tsy voatery hahita famantaran̈a mahagaga baka andan̈itry atsika vo ho resy lahatra fa nahita fahamarin̈ana. Finoan̈antsika io tokony hiorin̈y amy fahaizantsika ny marin̈y. Izikoa atsika mazoto mianatra raha koran̈iny Baiboly, tokony ho efa resy lahatra edy atsika fa nahita ny marin̈y. Han̈ampy atsika koa raha zen̈y izikoa fa misy raha mampisalasala atsika.

13. Ino ma nahavy olo maro tsy nan̈eky Jesosy?

¹³ Pianatrany Jaona Pan̈ano Batisa koa fa nahita iro pianatrany Jesosy aby io tsy nan̈ano fifadiankanin̈y, iro lany fan̈ahy. Nazavainy  Jesosy tamindro fa tsisy antony tokony hifadianandro hanin̈y fotony izy mbala velon̈o. (Mat. 9:14-17) Ndray zen̈y, mbala tsy nan̈eky Jesosy fo iro Fariseo aby io ndreky olo hafa nanohitry izy, fotony izy tsy nan̈araka fombafomba fataondro. Jesosy koa fa nampahivan̈a olo taminy andra Sabata, iro neloko taminany. (Mar. 3:1-6; Jaona 9:16) Iro nitôron̈o nan̈araka lalàn̈a momba Sabata, kanefa tsy nampan̈ino iro aby nivarotro tamy tempoly. Iro koa fa niroasiny Jesosy, iro neloko mare. (Mat. 21:12, 13, 15) Mbala neloko tamy Jesosy fo koa iro olo nitoriany aby io, izy koa fa navy tamy synagogany Nazareta. Jesosy baka nangala ohatra baka tamy tantarany Israely, fotony tiany haboaka fa iro io tia ten̈a sady tsy nanan̈a finoan̈a. (Lioka 4:16, 25-30) Tsy nampoizindro foeky raha nataony Jesosy taminio, ke zen̈y nahavy iro tafintohin̈y taminany.​—Mat. 11:16-19.

14. Ino nahavy Jesosy tsy nankasitraka fombafomba tsy mifan̈araka amy Soratra Masin̈y?

¹⁴ Ino ma raha koran̈iny Soratra Masin̈y? Ty raha nirahiny Jehovah nisoratiny paminan̈y Isaia: ‘Vahoaka ty man̈aton̈o zaho amy vava fo, avio iro man̈amia voninahitry zaho amy son̈y fo, kanefa fôndro lavitry zaho. Iro man̈ano mavozo zaho kanefa fatahaorandro zaho zen̈y miorin̈y amy didinolombelon̈o fo.’ (Isaia 29:13) Normaly Jesosy koa nan̈amia tsin̈y iro, fotony tsy raha ampianariny Soratra Masin̈y ny ten̈a raha maventy tamindro fa fitsipiky ndreky fombafomba nianarandro baka taminolombelon̈o. Ny marin̈y aminany, tsy Mesia fo tsy nikendro fa Jehovah foeky!

15. Ino mahavy olo maro amy zioty tsy tia Vavolombelon̈o Jehovah?

¹⁵ Misy raha karaha zen̈y koa ma iziô? Zen̈y ke. Maro koa olo mankalaza fety tsy mifan̈araka amy Soratra Masin̈y aminandra iziô. Ke meloko mare iro mahita atsika Vavolombelon̈o Jehovah tsy mankalaza fety aby zen̈y miaraka amindro. An̈isanizen̈y aniversera ndreky Noely. Meloko koa iro fotony atsika tsy mety man̈ano fety misy ifandraisany amy fitiavan̈a tanindrazan̈a ndreky fombafomba fandiven̈ana mifanohitry amy raha ampianariny Baiboly. An̈atiny menimenindro, ikeny Zan̈ahary fo fomba anompoandro izy. Kanefa tsy marin̈y zen̈y, fotony fombafombanolo amy donia ty tiandro mandilatra fampianaran̈a mazava tsara amy Baiboly ao.​—Mar. 7:7-9.

16. Koa zahan̈a Salamo 119:97, 113, 163-165, ino raha tsy maintsy ataontsika ndreky tsy tokony hataontsika?

¹⁶ Ino raha tokony hataontsika baka tsy hihen̈y finoan̈antsika? Mila miezaka atsika baka ho ten̈a tia lalàn̈any Jehovah ndreky toro lalan̈anany. (Vakia Salamo 119:97, 113, 163-165.) Izikoa atsika tia Jehovah, atsika tsy han̈ano fety na fombafomba halany Jehovah. Tsisy raha tokony ho tiantsika mandilatra izy.

17. Ino ma raha nantin̈ainolo taminy andrany Jesosy fa handeha hataony Mesia?

¹⁷ Nisy olo taminy andrany Jesosy nitady han̈ova fitondrasan̈a. Nampijaly iro mare fitondrasan̈a romanin̈y, ke nan̈anten̈a iro fa Mesia ho avy io hankafaka iro amy zen̈y. Fa iro koa fa nitady han̈ano Jesosy ho panjaka, Jesosy tsy nan̈eky. (Jaona 6:14, 15) Olo sasany ndraiky, karaha ataondro pisoron̈o aby io, navozo tsao Jesosy navy io handeha han̈ova fitondrasan̈a. Iro baka nahazo ranondranony tamindro Romanin̈y aby io. Nanohitry Jesosy koa iro fotony baka tamindro Romanin̈y aby io nazahoandro fahifan̈a.

18. Ino ma faminanian̈a momba Mesia tsy nijirendro Jiosy marobe taminy andrany Jesosy?

¹⁸ Ino ma raha koran̈iny Soratra Masin̈y? Maro faminanian̈a mivolan̈a fa Mesia io Piady matanjaka sady pandresy. Ndray zen̈y, mivolan̈a koa faminanian̈a hafa fa tsy maintsy hofoaty antsendriky  izy, izikoa tsy zen̈y atsika tsy ho afaka amy fahotan̈a. (Isaia 53:9, 12) Ke nan̈ino iro Jiosy aby io diso hevitry momba Mesia? Fotony faminanian̈a araiky koa fa tsy nampan̈anten̈a han̈adoso problemondro iô ny iô, efa tsy nahoandro edy.​—Jaona 6:26, 27.

19. Ino ma hevitry diso anan̈anolo maro, ke mahavy iro tsy mitandren̈y hafatra toriantsika?

¹⁹ Misy raha karaha zen̈y koa ma iziô? Zen̈y ke. Maro koa olo amy zioty tsy mijery hafatra toriantsika fotony atsika tsy mibidabida amy raha momba politìky. Iro baka man̈anten̈a fa atsika handeha handatsabato izikoa fa misy fifidianan̈a. Kanefa, haintsika tsarabe fa atsika koa mifidy olombelon̈o ho pitondra atsika, manohitry Jehovah edy atsika. (1 Sam. 8:4-7) Misy koa olo mihevitry fa tokony han̈ano asa soa zen̈y atsika, karaha ataony man̈ôrin̈y lekoly ndreky lôpitaly. Meloko amintsika iro fotony atsika tsy mandany lera mamaha problemony donia ty fa mifantoko aminy asa fitorian̈a.

20. Izikoa zahan̈a Matio 7:21-23, ino ma raha ten̈a maventy tokony hifantaohantsika?

²⁰ Ino raha tokony hataontsika baka tsy hihen̈y finoan̈antsika? (Vakia Matio 7:21-23.) Atsika mila mifantoko aminy asa nan̈irahany Jesosy atsika fo. (Mat. 28:19, 20) Atsika tsy tokony ho rikian̈a handamin̈y problemony donia ty. Atsika tia olo sady tihan̈ampy iro amy raha mahazo iro. Fa ndray zen̈y, mifen̈y fo atsika mampianatra iro raha momba Fanjakan̈any Zan̈ahary. Ampiantsika koa iro hikamarady amy Jehovah, fotony efa zen̈y zaraiky fo fomba ten̈a tsara han̈ampian̈a iro.

21. Tokony ho tapakevitry han̈ino ma atsika?

²¹ Nandiniky antony efatra nahavy olo taloha tan̈y tsy nan̈eky Jesosy atsika tamy lahatsoratra ty tato. Mety ho mbala antony aby zen̈y fo koa mahavy olo amy zioty tsy hitandren̈y hafatra toriantsika pan̈aradia Jesosy. Ke mila mitandrin̈y atsika amy raha mety hahavy atsika ho voly han̈aradia Jesosy. Amy lahatsoratra man̈araka, atsika handiniky antony efatra hafa. Irarian̈a atsika ho tapakevitry fo han̈ano raha hahavy atsika tsy ho tafintohin̈y foeky, ndreky hanan̈a finoan̈a matanjaka fo.