1-2. Ino aby raha mavoa Vavolombelon̈o Jehovah maro?

AMY 2 Timoty 4:5 ao, apostoly Paoly nampirisiky i Timoty han̈ano tsara fanompoan̈anany. Mihatra amintsika koa torohevitry zen̈y. Ke mifen̈y atsika man̈ano erakany farany tsara vitantsika amy fanompoan̈a. Fa ndraikindraiky raha zen̈y tsy mora. Maro rahalahy ndreky ranabavy mila misikiny korazy mare koa fa handeha hitory, fotony iro mavozo. (2 Tim. 4:2) Misy piaramanompo ndraiky mipetraka amy tany tsy han̈omboan̈a asa fitorian̈a. Mitady hevitry hitorian̈a fo iro ndray efa haindro fa mety hampigadra iro raha zen̈y.

² Maro problemo mety hampakivy olo manompo Jehovah. Ohatra, maro amintsika io tsy maintsy miasa an̈atiny lera maro isanandra, kanefa zisty vola hazahoan̈a raha ten̈a ilainy fianakavian̈a fo azo. Mety mba tihanompo mare iro io izikoa fa sabotsy dimansy, kanefa iro efa lonjany asa. Sasany ndraiky kalikaly tsy afaka manompo foeky, fotony iro matetiky marary na efa matoe. Sasany baka tsy mahavita miboaka antran̈o foeky. Misy ndraiky mijaly fotony iro mieritreritry fa tsisy raha ilavan̈a iro foeky. Karaha ty ho Ranabavy Mary: * “Zaho koa fa kivy, ten̈a sarotro aminaka mifehy fihetsehampônaka. Kajo mare zaho baka io, ke efa tsisy fotoan̈a ndreky angovo hanompoan̈a eky. Ke man̈ameloten̈a mare zaho avio.”

3. Ino raha hidinihintsika ato?

³ Na ino na ino raha mahazo atsika, ho vitantsika fo hiaritry zen̈y fotony Jehovah han̈amia atsika angovo. Karaha in̈y, hahavita hanompo izy fo atsika eraka ny mety ho vitantsika. Nahavita nan̈atanteraka fanompoan̈andro i Paoly ndreky Timoty, ndray tio problemo, fotony iro namezany Jehovah angovo. Zen̈y raha hidinihintsika ato. Afaranizen̈y, hizahavantsika akory koa fomba han̈ampiany Jehovah atsika.

4. Ino aby ma raha niaretany Paoly?

⁴ Maro raha nanahiran̈a i Paoly. Nila fan̈ampiany Jehovah mare izy, taminizy niponopokondro fahavalo aby io, ndreky nitorahandro vato avio nampidirindro ta prizon in̈y. (2 Kor. 11:23-25) Tsy nen̈atra foeky i Paoly nivolan̈a fa kivy izy ndraikindraiky, ke sarotro taminany niatriky zen̈y. (Rom. 7:18, 19, 24) Nivolan̈a koa izy fa nisy ‘fatsiky amy nofotro.’ Nampijaly izy mare raha zen̈y ke nangataka tamy Zan̈ahary izy han̈adoso izio.​—2 Kor. 12:7, 8.

5. Nahavita nan̈ino i Paoly ndray nisy problemo?

⁵ Namezany Jehovah angovo i Paoly, ke vitany fo fanompoan̈anany ndray nisy problemo. Diniha hely baka raha vitany. Nahavita nitory vaovao tsara taminolo marobe i Paoly ndray nigadra tamy tran̈o araiky ta Roma. An̈isanizen̈y maramila piambin̈y Kaisara, ndreky olo jiaby namangy izy. (Asa. 28:30, 31; Fil. 1:13) Vitany koa niaro vaovao tsara io nan̈oloan̈a iro sefosefo tamindro Jiosy aby io ndreky tamy pitondra fanjakan̈a. (Asa. 28:17; Fil. 4:21, 22) Nampiasa Paoly koa i Jehovah taminio, hanoratra taratasy han̈ampian̈a Kristianin̈y aby tamy zen̈y. Mbala mahatsara atsika firaka iziô taratasy nisoratany aby io. Tsy zen̈y fo fa, modeliny Paoly io nampatanjaka finoan̈any piaramanompo tamy fiangonan̈a ta Roma, ke nanjary nisy korazy mare iro nan̈ambara volan̈any Zan̈ahary, sady tsy navozo foeky! (Fil. 1:14) Marin̈y fa Paoly tsy nahavita nanompo erakany itiavany izy, kanefa nifen̈y izy nan̈ano erakany farany tsara vitany. Ke ‘raha navoa izy io nahainampandroso vaovao tsara’ fo.​—Fil. 1:12.

6. Izikoa 2 Korintianina 12:9, 10 zahan̈a, akory navitany Paoly fanompoan̈anany tsarabe?

⁶ Hainy Paoly fa baka taminy angovo namezany Zan̈ahary izy nahavitany fanompoan̈a jiaby nataony aby io. Nivolan̈a izy fa ‘amy lerany izy malemy in̈y, aminin̈y edy angovony Zan̈ahary miasa aminany amy fomba feno.’ (Vakia 2 Korintianina 12:9, 10.) Namezany Jehovah fan̈ahy masin̈y i Paoly, ke vitany tsarabe fanompoan̈anany, ndray tio fan̈injehan̈a, gadra, ndreky problemo hafa.

7. Ino raha nanahiran̈a i Timoty ke mety nan̈elingelin̈y fanompoan̈anany?

⁷ Nila nitavandra angovo baka tamy Jehovah koa i Timoty, karamadiny Paoly, baka izy hahavita fanompoan̈anany. Mbala tanora izy tamy zen̈y. Niaraka tamy Paoly izy tamy dia  misionera nataony Paoly. Mbala nan̈iraka izy han̈ano dia hafa koa i Paoly, sady nandefa izy hitsidiky ndreky hampahery fiangonan̈a. (1 Kor. 4:17) Nahatsapa ten̈a tsy ampy fahaizan̈a i Timoty. Ke mety zen̈y donko nahavy i Paoly nampirisiky izy karaha ty: “Aza ambela hisy olo foeky han̈ambany anao baka amy fahatanoran̈anao.” (1 Tim. 4:12) Nisy ‘fatsiky tamy nofotro’ koa i Timoty. Koran̈iny Baiboly fa ‘matetiky izy tsy salama.’ (1 Tim. 5:23) Kanefa hainy Timoty fa Jehovah han̈amia angovo izy, baka ho vitany tsara hitory vaovao tsara io ndreky han̈ampy piaramanompo.​—2 Tim. 1:7.

8. Akory hataony Jehovah mampahery panomponany amy zioty?

⁸ Amy zioty koa, amezany Jehovah “angovo fan̈ampiny” panomponany, baka hahavita hanompo izy fo ndreky tsy hivadiky. (2 Kor. 4:7) Akory hataony Jehovah mampahery ndreky man̈ampy atsika tsy hivadiky? Ty misy fomba efatra han̈anaovany zen̈y: Vavaka, Baiboly, piaramanompo, avio fanompoan̈a.

9. Nan̈ino ma vavaka io ten̈a man̈ampy atsika?

⁹ Vavaka io man̈amia angovo. Paoly nampirisiky atsika hivavaka ‘amy fotoan̈a jiaby.’ (Efes. 6:18) Hivaliany Zan̈ahary vavaka ataontsika zen̈y, ke izy han̈amia atsika angovo ilaintsika. Zen̈y raha tsapany Rahalahy Jonnie, mipetraka a Bolivie an̈y. Nisesisesy problemo navoa izy. Niaraka narary madamonany ndreky iry olobeny. Naty mamany, avio efa ela be tafara tatỳ vadiny ndreky babany vo nahivan̈a. Karaha ty ho Rahalahy Jonnie: “Azoko onon̈o, niasaloha be zaho tamy fotoan̈anizen̈y, fa vavaka ny raha ten̈a nan̈ampy zaho. Nataoko voafaritry tsarabe vavakanaka.” Namezany Jehovah angovo nilainy i Jonnie, ke zen̈y nahavitany niaritry. Karaha zen̈y koa i Ronald, antipan̈ahy araiky a Bolivie an̈y. Nan̈ampy izy mare vavaka. Nivolan̈iny dokotera tamindro fa avoany kansera mamany. Naty mamany io, fanjava araiky tafara. Ino raha nan̈ampy izy hiaritry? Karaha ty ho izy: “Zaho koa fa nivavaka tamy Jehovah, koran̈iko taminany raha jiaby tan̈aty fonaka. Haiko fa izy ten̈a mahay zaho mandilatra olo hafa ndreky mandilatra zaho tomponain̈y.” Ndraikindraiky karaha efa mare loatra problemontsika, ke ndray raha hikoran̈antsika amy Jehovah fo tsy hay. Kanefa, Jehovah mampirisiky atsika hivavaka aminany fo, ndray tsy haintsika fomba ivolan̈ana raha an̈atiny fôntsika ndreky sain̈intsika.​—Rom. 8:26, 27.

10. Koa Hebreo 4:12 zahan̈a, nan̈ino atsika ten̈a tokony hamaky Baiboly ndreky hisaintsain̈y raha vakiantsika ao?

¹⁰ Baiboly io man̈amia angovo. Nahazo angovo ndreky fampahirezan̈a i Paoly izikoa fa namaky Soratra Masin̈y. Mety man̈ano karaha zen̈y koa atsika. (Rom. 15:4) Hahazo angovo baka amy Jehovah koa atsika, izikoa mamaky ndreky mitsaintsain̈y Soratra Masiny. Fan̈ahy masin̈iny Jehovah han̈ampy atsika hahazo tsarabe fomba mety hampiharantsika raha koran̈iny Baiboly. Han̈ampy atsika hiatriky problemontsika raha zen̈y. (Vakia Hebreo 4:12.) Karaha ty ho Ronald, araiky nikoran̈intsika taloha in̈y: “Tsy nanen̈iny foeky zaho niezaka ho zatra namaky Baiboly isaka harivariva. Nidinihiko tsarabe toetriny Jehovah ndreky fomba an̈aboahany aminolo manompo izy fa iro io ten̈a tiany. Ke raha zen̈y ten̈a nazahoako angovo.”

11. Ino ivolan̈ana fa ten̈a nan̈ampy ranabavy araiky maty vady fisaintsain̈ana raha koran̈iny Baiboly?

¹¹ Ten̈a mila misaintsain̈y Volan̈a Zan̈ahary atsika, fotony izio han̈ampy atsika hanan̈a toetsain̈y tsara izikoa fa miatriky raha manahiran̈a. Karaha zen̈y iziô ranabavy araiky maty vady zay. Nisy antipan̈ahy araiky nampirisiky izy hamaky bokiny Joba, fotony mety han̈ampy izy izio. Tamy voanalohany, ranabavy io koa fa namaky tantarany Joba, direkty  izy nan̈amia tsin̈y Joba fotony tsapany fa tsy nanan̈a toetsain̈y tsara i Joba. Baka tio izy nieritreritry: “Anao zen̈y Joba mifantoko loatra amy raha mahazo anao! Tsy mety foeky zen̈y!” Tontohitry izy fa kaiky nitovy tamy toetsain̈iny Joba fo toetsain̈inany. Ke fisaintsain̈any raha zen̈y nan̈ampy izy han̈ova fomba fisain̈ananany. Nahazo angovo ndraiky izy, ke vitany niaritry ndray nafy taminany fahafatesany vadiny.

12. Akory ataony Jehovah mampiasa iro piaramanompo aby io hankahirezan̈a atsika?

¹² Hahazo angovo atsika koa miaraka amy piaramanompo. An̈isany fomba hafa han̈amezany Jehovah atsika angovo koa iro piaramanompo aby io. Nanoratra i Paoly fa efa tsy din̈iny hitraotro tamy piaramanompo ndreky ‘hifampahery’ tamindro. (Rom. 1:11, 12) Karaha zen̈y koa i Mary, araiky nikoran̈intsika taloha tio in̈y. Tiany mare miaraka amy piaramanompo. Ho izy: “Tsy haindro ranadahy ndreky rahavavy aby io raha nanahiran̈a zaho, kanefa zaho matoky fa iro io nampiasainy Jehovah han̈ampian̈a zaho. Iro nan̈ano volan̈a mankahery, avio nandefa karty hely, ary raha aby zen̈y ten̈a nilaiko. Nikoran̈a tamy rahavavy aby efa niatriky problemo mitovy amy ninaka koa zaho, ke ten̈a nan̈ampy zaho nangala tahaka modely nambelandro. Iro antipan̈ahy aby io koa tsy voly nitady hevitry baka ho tsapako fo fa tianolo amy fiangonan̈a zaho.”

13. Lera atsika avy ampivorian̈a, karakory mety hataontsika hampahirezan̈a olo?

¹³ An̈isany fotoan̈a farany tsara azahoan̈a fampahirezan̈a iro fivorian̈antsika aby io. Ke lera anao avy ampivorian̈a, mifen̈a fo hampahery olo. Zen̈y iziô nataony antipan̈ahy araiky, Peter an̈arany. Talohany fivorian̈a hanomboko, karaha ty nambarany antipan̈ahy io tamy ranabavy araiky manan̈a vady tsy Vavolombelon̈o: “Mamparavoravo mahita anaro fito mianaka avy mivory. Miezaka mare anaro man̈amia valinteny, ke ten̈a mampahery zahay raha zen̈y.” Niran̈aran̈a ranomasony ranabavy io izikoa fa naharen̈y zen̈y. Ho izy: “Koa mba hainao! Ten̈a navy amy fotoan̈a nilàko izy volan̈anao zen̈y ranadahy ay!”

14. Ino mahatsara atsika mitory?

¹⁴ Mampahery atsika koa fanompoan̈a. Atsika koa fa mikoran̈a fahamarin̈ana amy Baiboly ao aminolo, manjary velombelon̈o salakady mahazo angovo mare atsika, na nitandren̈y atsika olo io na tsy nitandren̈y. (Ohab. 11:25) Zen̈y tsarabe raha tsapany ranabavy Stacy. Nalahelo mare izy fotony nisy havany voaroaka. Nieritreritry izy: ‘Tsao mba nisy raha nety nataoko fo nan̈ampian̈a izy!’ Tsy nety nafaka tamy jerinany raha zen̈y! Ino raha nan̈ampy izy hiaritry, ndray tio problemo nampakivy izy io? Fanompoan̈a. Izy koa fa nandeha nitory, izy nanjary nifantoko tamy raha nilainolo tamy faritanindro. Ho Stacy: “Tan̈atiny fotoan̈a jiaby zen̈y, zaho namezany Jehovah fampianaran̈a Baiboly mandroso, ary malaky koa. Ten̈a nampahery zaho raha zen̈y! Fanompoan̈a ny raha ten̈a nan̈ampy zaho tsy halemy trôko!”

15. Ino raha ianaranao baka amy raha nivolan̈iny Mary?

¹⁵ Misy piaramanompo mieritreritry fa tsy mahavita be amy fanompoan̈a eky izy, nohony raha mahazo izy. Asa zen̈y koa raha tsapanao? Alaiva onon̈o fa, anao koa man̈ano erakany farany tsara vitanao, efa ravoravo mare Jehovah. Miniminia hely baka i Mary, araiky nikoran̈intsika taloha tan̈y in̈y. Izy koa fa nifindra tamy faritany mampiasa volan̈a hafa, nahatsiaro ten̈a tsisy dikany foeky izy. Karaha ty ho izy: “Nisy fotoan̈a, kaihany raha vitako izikoa fa nanompo: Nikoran̈a raha tsotra hely, na soà namaky andininteny, na nan̈amia trakty.” Nahatsiaro ten̈a tsy nahay foeky ranabavy io izikoa fa nampitovy raha vitany tamy raha vitanolo nahay volan̈a io tsarabe. Kanefa, niezaka  izy nan̈ova fomba fisain̈ananany. Tontohitry i Mary fa vitany Jehovah fo man̈ampy izy, ndray tsy hainy Mary volan̈a fampiasainolo tan̈y. Ho izy: “Tsotra raha ampianariny Baiboly, ke izio mahavita man̈ova fiain̈ananolo.”

16. Ino raha mety han̈ampy anao hahazo angovo, izikoa anao tihitory kanefa tsy afaka miboaka tran̈o?

¹⁶ Sasany amintsika io tihandeha hitory mare, fa tsy afaka miboaka antran̈o fo. Ndray zen̈y, hitany Jehovah fan̈irian̈antsika zen̈y. Jehovah afaka man̈ampy atsika hitory aminolo mikarakara atsika, na dokotera io na iro ainfirmie aby io. Mety nahavita be tamy fanompoan̈a atsika taloha, kanefa efa tsy karaha zen̈y eky izioty. Mety hampakivy raha zen̈y. Kanefa, atsika tsy tokony hampiran̈a raha vitantsika taloha amy raha vitantsika zioty. Fomba an̈ampiany Jehovah atsika amy zioty fo tokony hifantohantsika! Hahazo angovo atsika izikoa man̈ano zen̈y. Ho vitantsika koa hiaritry raha mahazo atsika ndreky ho ravoravo fo.

17. Koa Mpitoriteny 11:6 zahan̈a, nan̈ino atsika mila mitory fo, ndray karaha tsisy vokany ezaka ataontsika?

¹⁷ Tsy haintsika foeky aia amy voany fahamarin̈ana nafafintsika aby in̈y ny ten̈a haniry. (Vakia Mpitoriteny 11:6.) Ranabavy kadiriny 80 taon̈o iô i Barbara. Miezaka izy mitory tsy tapaka amy telefaony ndreky amy taratasy. Tandraraiky, nampiarasiny tamy taratasy nisoratiny zay gazety Tilikambo Fiambesan̈a 1 Marsy 2014. Nisy lahatsoratra zay tan̈atinizio tao. Titrananizio: “Nahavita Be Taminao Andriamanitra.” Tsy nampoiziny foeky fa olo fivadiany efa voaroaka zay nahazo taratasy io. Nivakindro matetitetiky gazety io. Tsapany araiky lelahy fa, efa karaha i Jehovah in̈y nikoran̈a taminany mivantan̈a. Nanomboko nivory iro roe fivadiany, avio nimpody nanompo Jehovah ndraiky. Kanefa efa 27 taon̈o nampa voaroaka iro io. Misaora nampahery i Barbara nahay fa nisy vokany tsara karaha zen̈y taratasy nalefany in̈y!

18. Ino raha mila ataontsika izikoa atsika tihahazo angovo baka amy Zan̈ahary?

¹⁸ Maro fomba ataony Jehovah han̈ampian̈a ndreky han̈amezan̈a angovo atsika. An̈isanizen̈y vavaka, Baiboly, piaramanompo, avio fanompoan̈a. Ke araraota fan̈ampian̈a amezany aby io! Aboaha fa matoky izy anao sady matoky fa vitany man̈ampy anao. Jehovah von̈ono han̈ampy anao. Tokony hitavandra Babantsika andan̈itry an̈y io fo atsika. Jehovah lastio man̈iry ‘han̈aboaka angovonany han̈avotan̈a olo tsy miala aminany, amy fô jiaby.’​—2 Tan. 16:9.