Nan̈ova fiain̈ananaka raha nampavozo niain̈ako in̈y, fotony komansy tio zaho nitady ny marin̈y momba Zan̈ahary. Alô tantaraiko aminaro tohiny tantara in̈y. Fa alohanizen̈y, ambesa tantaraiko aminaro antsendriky fahazazan̈anaka, fotony izio an̈isany namolavola toetsain̈inaka ndreky nahavy zaho tihahay ny marin̈y momba Zan̈ahary.

Zaho teraka taminy 1937 ta Guesnain, tanàna amy faritry avaratrany France an̈y. Misy kariaira fangadian̈a arintany na charbon de terre zay tan̈y, ke papako niasa tao. Izy nampianatra zaho hazoto hiasa ndreky tsy ho tia raha tsy rariny. Naro olo niaraka niasa taminazy navoa raha tsy rariny sady niasa tamy faritry mety hamono tan̈atiny kariaira io tao. Zen̈y nahavy izy tihan̈ampy iro, ke niditry an̈isany fikambanan̈a araiky miaro zònolo pangady arintany izy sady nan̈ano lagraivo niaraka tamindro. Neloko mare tamindro pitondra fivavahan̈a aby tamy tanànanay tao izy, fotony iro io nihatsaravelatsihy. Maro tamindro io nanandraha mare, kanefa iro mbala nitaky vola ndreky hanin̈y baka taminolo pangady arintany aby io fo. Iro pangady arintany aby io amy zen̈y masikìny mare. Nampangaroharo  i papako mare iro pitondra fivavahan̈a aby io, ke tsy nampianariny raha mikasiky fivavahan̈a foeky zaho! Tsy nikoran̈a raha momba Zan̈ahary zen̈y foeky zahay.

Nanjary halako koa raha tsy rariny zaho koa fa be. Halako nahita olo nan̈avakavaka vahiny nipetraka ta France teto. Tamy zaho mbala hely, farandraha tiako eky niaraka nisaoma laboly tamy tsaiky vahiny aby tamy tanànanay. Sady mamako lastio tsy Fransay fa Poloney. Ke tiako ho tsara fihavanan̈a ndreky hitovy zò aby olo jiaby, na ino na ino tany faviany.

Voakaiky han̈ano maramila zaho taminy 1957. Zen̈y nahavy zaho tamy bongo araiky tan Algérie, araiky nitantaraiko taloha tarỳ in̈y. Hainaro ino raha hitako, zaho koa fa nivolan̈a “A Zan̈ahary e! Avaota kony zaho ô!”? Kaiky raha io tsy maramila fahavalo fa borìkidỳ. Nahatsiaro mahivankivan̈a mare zaho tamy zen̈y! Raha nandalo in̈y ndreky lagera io ten̈a nampatontohitry. Rôso diniky zaho, ino marin̈y ma dikany fiain̈ana ty? Ino ma antony niasan̈a atsika? Zan̈ahary zen̈y ma raha mba mijery atsika? Posibla mbala hiadan̈a fo ma olombelon̈o andra araiky an̈y?

Nisy fotoan̈a zaho tsy niasa, ke loso zaho namangy ery olobeko. Tamy zen̈y zaho nifanojy tamy Vavolombelon̈o Jehovah araiky zay. Namezany Baiboly zaho, ke nanomboko namaky izio zaho koa fa nimpody tan Algérie. Nampieritreritry zaho mare raha koran̈iny Apokalypsy 21:3, 4. Karaha ty koran̈inizio ao: ‘Tran̈olainy Zan̈ahary aminolombelon̈o, avio izy hamafa ranomaso jiaby amy masondro, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.’ * Lany fan̈ahy zaho! Loso eritreritry zaho: ‘Raha mba ho posibla?’ Tamy zen̈y, raha momba Zan̈ahary ndreky Baiboly zen̈y tsy haiko foeky.

Tsy nan̈ano maramila eky zaho taminy 1959. Nitraotro tamy Vavolombelon̈o Jehovah araiky zay zaho taminio, François an̈aranany. Nampianariny raha maro baka tamy Baiboly zaho. Ohatra iziô, naboakany zaho fa Jehovah an̈aran̈any Zan̈ahary. (Sal. 83:18) Nazavainy François koa fa hataony Jehovah raha hisiany rariny erantany, hivoàny ho paradisa tany jiaby, baka io ho tanteraka raha koran̈iny Apokalypsy 21:3, 4.

Hitako marin̈y tsarabe raha nianarako aby io, sady tiako koa. Nanjary halako koa iro pitondra fivavahan̈a aby io, ke tiako habaribary aminolo jiaby fa tsy fan̈araka amy Baiboly foeky raha ampianarindro! Mbala nisy vokany taminaka fo toetsain̈iny Papa. Tsy naharidraha foeky zaho, ke efa tiako foan̈ana iô ny iô raha tsy rariny!

Maro Vavolombelon̈o Jehovah nanjary namako. Ke iro io ndreky i François nan̈ampy zaho tsy ho taitaitry. Nazavaindro taminaka fa olo Kristianin̈y zen̈y tsy tokony hitsara olo, fa han̈ampy olo hanan̈a fan̈antin̈ana, ke hitory momba Fanjakan̈any Zan̈ahary. Zen̈y raha nataony Jesosy, ary mbala zen̈y fo koa raha nirahiny ataonolo man̈aradia izy. (Mat. 24:14; Lioka 4:43) Ke tsy maintsy nianatra ho tsara fan̈ahy ndreky hihevitry raha mahatsara olo zaho izikoa fa hivolan̈a. Baiboly  mivolan̈a fa ‘panompony Tompo zen̈y tsy tokony hiady, fa halemy toetry aminolo jiaby.’​—2 Tim. 2:24.

Nahavita niova zaho, ke natao batisa tamy fivoriambeny faritry, taminy 1959. Taminio zaho nitraotro tamy Ranabavy Angèle. Nanaitry zaho izy. Ke zaho nikomansy nandeha nivory tsindraikindraiky tamy fiangonan̈a nisy izy. Taminy 1960 zahay nan̈ano mariazy. Vadiko baka tsy vitany viavy tsara sady tsara toetry, fa mbala vady tsara koa, ke ten̈a kadô valera mare namezany Jehovah zaho izy.​—Ohab. 19:14.

Tan̈atiny taon̈o maro, zaho nianatra raha maro baka tamy rahalahy hendry ndreky zadraharaha. Fa ty ny ten̈a maventy amy jiaby: Izikoa anten̈a tihahômby amy asa sarotro ampan̈anôvin̈y anten̈a, ilain̈a manetry ten̈a ndreky man̈araka raha koran̈iny Ohabolana 15:22 ao. Koran̈iny amizio ao: ‘Izikoa maro panolotsain̈y, tanteraka edy fikasan̈a.’

Komansy taminy 1964 nahitako fa ten̈a marin̈y ankitin̈y raha zen̈y. Tamy taon̈o io zaho nanjary piandraikitry faritry, ke zaho nandeha nitsidiky fiangonan̈a ndreky nampahery piaramanompo avio nan̈ampy iro hankatsara fihavanan̈andro amy Jehovah. Zaho tamy zen̈y 27 taon̈o sady mbala tsy maro raha hay, ke tafan̈ano raha tsy mety zaho ndraikindraiky. Hadisovan̈a aby zen̈y ndraiky ten̈a nianarako raha. Fa iro ‘panolotsain̈y’ mahay ndreky efa zadraharaha aby io ndraiky nianarako raha maro matomboko.

Azoko onon̈o tamy zaho vo nan̈ano asany faritry. Zaho tamy zen̈y vo baka nitsidiky fiangonan̈a ta Paris, nisy rahalahy matotro araiky zay nangataka nikoran̈a taminaka mitokan̈a. Ke zaho nan̈eky.

Ho izy: “A Louis, azovy ma olo mila dokotera, olo marary sa olo salama?”

Ho zaho taminany: “Olo marary.”

Ho izy amy zay: “Marin̈y zen̈y. Fa ny raha hitako, karaha olo salama arapan̈ahy karaha ataony piandraikitry fiangonan̈a fo ten̈a anokan̈anao fotoan̈a. Kanefa, maro rahalahy ndreky ranabavy amy fiangonan̈anay kivy, sasany vaovao sady bihen̈amaso. Mety ho ravoravo iro izikoa anao mba manokan̈a fotoan̈a hiarahan̈a amindro, na miaraka mihina amindro antran̈ondro an̈y.”

Marin̈y ankitin̈y torohevitriny rahalahy io sady ten̈a nilaiko. Nanohin̈y fônaka nahita fitiavany ondrikondrikiny Jehovah. Ke ndray tsy mora taminaka  nan̈eky fa zaho koa mba mahay diso, niaraka tamizin̈y efa narehako edy raha nivolan̈iny io. Man̈ano mersy Jehovah zaho nan̈amia rahalahy karaha izy io.

Nisy fivoriambe iraisampirenena aroe natao ta Colombes, a Paris, taminy 1969 ndreky 1973. Zaho tamy zen̈y nirahin̈y niandraikitry Sampandraharaha Mikarakara Hanin̈y. Tamy fivoriambe taminy 1973, kadiriny olo 60 000 tsy maintsy namian̈a hanin̈y. Rôso diniky hely zaho tamy zen̈y: ‘Raha mba posibla?’ Ten̈a nan̈ampy zaho raha koran̈iny Ohabolana 15:22, man̈iraka atsika hitady torohevitry baka amy panolotsain̈y hendry. Ke zaho amy zay nangataka hevitry tamy rahalahy matotro sady efa zadraharaha tamy fandrasan̈a hanin̈y, karaha ataondro rahalahy pivarotro hena, pambôly legimo, pandoky, ndreky pivanga entan̈a. Niaraka niasa zahay, ke vitanay fo asa sarotro be in̈y.

Nirahin̈y nanompo tamy Betelany France zahay roeny vadiko taminy 1973. Sarotro mare koa asa voanalohany nampan̈anôvin̈y zaho. Nila nitady hevitry zaho handifasan̈a raha vita pirinty amindrô piaramanompo aby a Cameroun, an Afriky an̈y. Nisakanany fanjakan̈a asa fitorian̈a ataontsika tan̈y, nanomboko taminy 1970 firaka taminy 1993. Navozo mare zaho tamy zen̈y, tsao tsy ho vitako asa io. Mety azony rahalahy piandraikitriny sampan̈any France tamy zen̈y onon̈o donko raha zen̈y, ke izy nampahery zaho. Karaha ty ho izy: “Mila hanin̈y arapan̈ahy mare iro piaramanompo amintsika a Cameroun an̈y. Ke alô atsika hikarakara raha ilaindro.” Ke zen̈y ankitin̈y raha nataonay!

Nivezivezy matetiky tamy firenena nan̈odidin̈y Cameroun zaho, izikoa fa hitraotro tamindro antipan̈ahy aby ta Cameroun tan̈y. Ten̈a nisy korazy sady misain̈y iro rahalahy aby io. Iro nan̈ampy zaho hahita hevitry baka tsy ho tapaka fandifasan̈a hanin̈y arapan̈ahy ta Cameroun. Nitahiany Jehovah ezakanay. Tan̈atiny 20 taon̈o tio, nahazo Tilikambo Fiambesan̈a fo iro piaramanompo tan̈y, avio nahazo Ny Fanompoantsika Ilay Fanjakana fo koa iro isaka fanjava.

Zahay roeny Angèle koa fa komansy nifankahay tsarabe, hitako fa ten̈a tia Jehovah izy. Nahaihitako fo raha zen̈y, zahay koa fa nanjary fivadiany. Azoko onon̈o taminy harivany mariazinay, nirahiny nivavaka zaho, hivolan̈a amy Jehovah fa ten̈a tihanompo izy mare zahay. Nivaliany Jehovah vavakanay io.

Angèle nan̈ampy zaho hampitombo fatokisako Jehovah. Ohatra iziô zahay koa fa navoakaiky hanompo amy Betela taminy 1973. Nisalasala zaho, fotony tiako mare asany faritry. Fa i Angèle ndraiky nampatsiaro zaho fa zahay efa nanokanten̈a tamy Jehovah, ke tokony hataonay aby raha jiaby an̈irahany fandaminan̈a zahay. (Heb. 13:17) Efa tsisy raha koran̈iny eky zaho baka tio! Ke zahay nandeha nanompo tamy Betela. Vadiko io farandraha misy jery eky sady mahay mandanjalanja ndreky tia Jehovah mare. Raha zen̈y nan̈ampy zahay hahaihifankatia fo ndreky han̈ano fanapahankevitry tsara, tan̈atiny taon̈o maro niarahanay.

Efa matoe zahay iziô, fa mbala man̈ampy zaho mare madamonaka. Zahay baka mba nan̈iry han̈ano sekoly arabaiboly, kanefa sekoly aby io tamy teny angiley. Ke nifen̈y zahay nianatra teny angiley. Nifindra tamy fiangonan̈a mampiasa teny angiley zahay tamy zahay 70 taon̈o manan̈ambiny. Tsy mora taminaka nianatra volan̈a hafa. Maro loatra andraikitrinaka fotony zaho an̈isany Komitiny Sampan̈any France. Kanefa nifan̈ampy fo zahay. Zahay iziô efa 80 taon̈o mandilatra, fa miezaka fo zaho man̈oman̈a fivorian̈a amy teny angiley ndreky amy teny fransay. Miezaka koa zaho mandray anjara matetiky amy fivorian̈a ndreky amy fanompoan̈a iarahan̈a amy fiangonan̈a. Tsapako fa ten̈a nitahy zahay i Jehovah tamy fianaranay teny angiley io!

Miavaka hatsaran̈a nazonay taminy 2017, fotony zahay navoakaiky han̈aton̈o Fiofan̈ana Ataony Komitiny Sampan̈a Ndreky Vadiny. Natao tamy Foibeny Fampianaran̈any Vavolombelon̈o Jehovah ta Patterson, a New York an̈y izio.

Jehovah ten̈a Papianatra miavaka. (Isaia 30:20) Ke tsy mahalany fan̈ahy izikoa panomponany mahazo fampianaran̈a farany tsara, na tanora zen̈y na matoe. (Deot. 4:5-8) Ny raha hitako, olo araiky ndray tanora, izikoa izy mitandren̈y Jehovah ndreky mitandren̈y iro rahalahy ndreky ranabavy matotro, ho tsara fo fanapahankevitrinany avio ho vitany fo koa tsy hivadiky amy Jehovah. Marin̈y tsarabe raha volan̈iny Ohabolana 9:9 ty: “Ampianara olo misy jery baka izy hahaiho hisy jery fo. Ampianara olo marin̈y, baka hitombo raha hainy.”

Refin̈y zaho mandiniky raha nandalo taminy alin̈y nampavozo be tamy bongo tan Algérie in̈y. Efa kadiriny ho 60 taon̈o loso baka zay. Tsy nampoiziko foeky fa ho tsara be karaha ty fiain̈ananaka. Maro raha nianarako baka taminolo! Nampiany Jehovah koa zahay roeny Angèle, ke nahatsiaro afapô zahay tamy fiain̈ananay. Tapakevitry zahay fa hianatra raha momba Babanay andan̈itry an̈y io fo, ndreky hianatra baka amindro piaramanompo hendry ndreky zadraharaha sady ten̈a tia izy aby io.