1. Ino modely nambelany Jesosy tamy pan̈aradia izy, avio ino raha nataondro? (Zahava sary amy fon̈ony gazety ty.)

TAMY Jesosy tambony tany teto, izy nitory fo sady nan̈anten̈a fa hitandren̈y izy fo olo. Ke tiany izikoa pianatranany manan̈a toetsain̈y karaha zen̈y. (Jaona 4:35, 36) Nazoto nitory mare pianatrany Jesosy, taminizy mbala tankilandro. (Lioka 10:1, 5-11, 17) Fa izy koa fa nisambôrin̈y ndreky nivonen̈a, niova rano. Nisy fotoan̈a iro tsy tihitory foeky. (Jaona 16:32) Lera Jesosy natsangana tamy maty, nampirisihiny hifantoko tamy fanompoan̈a ndraiky iro. Ke Jesosy koa fa nanonga tandan̈itry, nanjary nafana fô mare iro nitory. Ndray iro fahavalo aby io nitretre karaha ty: ‘Zahava! Nifinoanaro fampianaran̈anaro Jerosalema.’​—Asa. 5:28.

2. Akory nahitan̈a fa Jehovah nitahy asa fitorian̈a io?

² Jesosy nitariky asa fitorian̈a nataondro Kristianin̈y tamy taonjato voanalohany. Jehovah ten̈a nan̈ampy iro, ke maro olo nan̈eky hafatra nitoriandro. Tamy Pantekoty taon̈o 33, kadiriny 3 000 olo natao batisa. (Asa. 2:41) Nahainaro fo pianatrany Jesosy. (Asa. 6:7) Jesosy efa nan̈ambara fa, aminandra farany, mbala ho hisy olo maro mare han̈eky vaovao tsara.​—Jaona 14:12; Asa. 1:8.

3-4. Nan̈ino tsy mora mitory amy tany sasany, baka io ino raha hidinihintsika ato?

³ Mifen̈y hazoto hanompo aby atsika jiaby sady man̈anten̈a fa hitandren̈y atsika olo itoriantsika. Mora man̈ano zen̈y amy tany sasany, fotony maro olo tihianatra Baiboly. Ndray sasany amindro aby irahin̈y miambin̈y latoro, fotony tsy arakany pitory mampianatra iro! Sarotro ndraiky manompo amy tany sasany, fotony mahalan̈a pitory vo mahatakatra olo antran̈o. Tampoko iro olo aby io takatra antran̈o, iro tsy lian̈a amy raha momba Baiboly foeky!

 ⁴ Man̈anten̈a zahay fa han̈ampy anao mare sosokevitry aby ato, izikoa tsy mora mitory amy faritaninaro. Hikoran̈intsika ato raha nataony pitory sasany ke nahavy iro nahita olo maro koa fa nanompo. Hidinihintsika koa nan̈ino atsika tokony ho ravoravo fo koa fa manompo, na raesinolo hafatra toriantsika na tsy jirendro.

5. Ino ma raha manahiran̈a pitory maro?

⁵ Maro Vavolombelon̈o Jehovah mahita fa mahaisarotro fo mahatakatra olo antran̈o. Misy pitory mipetraka amy kartie feno tran̈o maro maventy, fa sarotro fidiran̈a amy tran̈o aby io. Ndraikindraiky, misy gardiain miambin̈y iro io, ke izikoa tsy olo nahazo lalan̈a baka tamy tompintran̈o, tsy tafiditry ao. Amy tany sasany ndraiky, tsy sahiran̈a foeky pitory mitory isaka tran̈o. Fa ny raha misy, vitsy fo olo takatra antran̈o. Pitory hafa ndraiky mitory ambanivolo na amy tany mitokana, kanefa vitsy fo olo mipetraka an̈y. Mandeha lavitry iro, kanefa tran̈o araiky fo hitandro an̈y, ary ndraikindraiky tsy ao aby tompintran̈o io. Asa mba karaha zen̈y faritaninaro? Izikoa zen̈y, aza rivan̈a. Ino raha mety hataonao? Ino raha han̈ampy anao hitory aminolo farany maro?

6. Ino ma raha itovizany pitory ndreky pan̈arato?

⁶ Asa fitorian̈a io nampitovisiny Jesosy tamy fan̈arataovan̈a. (Mar. 1:17) Misy pan̈arato mamango man̈arato an̈atin̈y andra maromaro, fa tsisy raha azo nata araiky. Ndray zen̈y, iro tsy kivy foeky fa mitady hevitry fo. Miezaka iro man̈ovaova lera fandianandro andrano. Ivoavoàndro koa plasy ndreky fomba fan̈arataovandro. Atsika koa mety man̈ano karaha zen̈y lera mitory. Hizaha sosokevitry vitsivitsy mety han̈anaovan̈a zen̈y atsika iziô.

7. Ino mahatsara atsika man̈ovaova lera itorian̈a?

⁷ Ivoavoà lera itorianao. Diniha lera karakory mety hatakaran̈a olo antran̈o, ke amy zen̈y anao mandeha mitory. Aia ma tsy hodiandro antran̈o! Maro pitory mahita fa tsara mitory folakandra na harivariva, fotony aminin̈y olo takatra antran̈o. Ary matetiky amy fotoan̈a io olo mazoto mikoran̈a. Na mety han̈ampy anao koa sosokevitry namezany antipan̈ahy araiky, David an̈arany. Nivolan̈a izy fa iro roeny fanàmany koa fa baka nitory tamy faritany araiky, nimpodianandro ndraiky lan̈iany tran̈o tsy nahitandro olo. Volan̈iny: “Tsy nampoiziko foeky fa naro olo takatranay tantran̈o zahay koa fa nimpody tan̈y.” *

8. Akory mety han̈arehantsika raha koran̈iny Mpitoriteny 11:6?

⁸ Andininteny ioren̈any lahatsoratra ty mampirisiky atsika tsy ho kivy foeky fa hitady fomba fo hahitan̈a olo izikoa fa mitory. (Vakia Mpitoriteny 11:6.) Zen̈y raha nataony David, araiky nikoran̈intsika in̈y. Nitory tamy tran̈o araiky zay izy fa tsy mety nahita olo. Nimpody matetiky tamy tran̈o io fo izy, ke farany, fanôjy lelahy lian̈a be zay izy. Ho lelahy io: “Efa kadiriny valo taon̈o nipitrahako teto, fa zaho mbala tsiary nitraotro tamy Vavolombelon̈o Jehovah.” Karaha ty ho David: “Mety tsy ho tojy olo atsika koa fa mitory amy tran̈o araiky. Atsika ndraiky koa tsy vôly mimpody an̈y, ho fanôjy olo fo. Ary matetiky, lian̈a mare olo mipetraka ao.”

9. Akory nataony Vavolombelon̈o Jehovah sasany baka iro hahavita hitory aminolo tsy takatra antran̈o?

⁹ Ivoavoà tany itorianao. Akory ataony Vavolombelon̈o Jehovah sasany baka iro hahavita hitory aminolo tsy takatra antran̈o? Ivoavoàndro tany itoriandro. Ohatra iziô, maro  olo mipetraka amy tran̈o maventy aby io tsy takatra lera mitory isaka tran̈o. Kanefa lera iro mitory andalan̈a na man̈ano fampirantian̈a, iro fanôjy olo aby io. Maro koa pitory mahita fa iro koa fa mitory amy zaridain̈impanjakan̈a na a bazary na amy tany misy fivarotan̈a, olo aby io mazoto mitandren̈y hafatra toriantsika sady mangala boky ndreky gazety. Karaha ty ho Florian, piandraikitry faritry a Bolivie: “Mitory a bazary ndreky amy magazain zahay an̈elan̈elan̈a 1h firaka 3h folakandra. Tsy maro klian baka iro amy leranizen̈y, ke iro mazoto mikoran̈a. Misy lera zahay mahavita manomboko fampianaran̈a Baiboly foeky.”

10. Ino koa raha mety hataontsika koa fa mitory?

¹⁰ Ivoavoà fomba fitorianao. Asa anao efa tojy raha karaha ty: Anao nandeha nitory isaka tran̈o in̈y, tsy nahita olo tamy tran̈o araiky. Niezaka anao nimpodimpody tan̈y fa anao tsy mety fanôjy olo. Nimpody tan̈y tamy lera hafa anao fa mbala tsy tao fo tompintran̈o. Akory ataonao? Karaha ty ho Katarína: “Zaho koa fa tsy mahatakatra olo antran̈o, anoratako taratasy iro. Soratiko aby lan̈iany raha tiako hikoran̈iny amindro.” Ino raha ianarantsika baka amy zen̈y? Mitadiava hevitry fo baka anao hahavita hitory aminolo jiaby amy faritaninaro.

11. Nan̈ino olo sasany tsy man̈ahoa hafatra toriantsika?

¹¹ Olo sasany ndraiky tsy mijery hafatra toriantsika foeky. Amindro, tsisy raha ilàn̈a Zan̈ahary ndreky Baiboly zen̈y. Iro tsy mino Zan̈ahary fotony maro loatra raha tsy manjary hitandro ambony tany. Manjary tsy mino Baiboly koa iro izikoa fa mahita raha ataondro  pitondra fivavahan̈a mihatsaravelatsihy aby io. Man̈ano sary man̈araka raha volan̈iny Baiboly iro pitondra fivavahan̈a aby io, kanefa mifanohitry tanteraka amy zen̈y raha ataondro. Misy ndraiky olo rikian̈a aminy asanandro, amy lafamìndro, ndreky amy problemondro, ke iro mieritreritry fa Baiboly io tsy afaka man̈ampy iro. Izikoa hitantsika fa tsy jirenolo hafatra toriantsika, ino raha mety hataontsika baka atsika ho ravoravo fo?

12. Nan̈ino Filipianina 2:4 mety han̈ampy atsika amy fanompoan̈a?

¹² Ataova hitandro fo fa anao mitady raha mahatsara iro. Maro olo tsy nan̈ahoa hafatra toriantsika taloha, kanefa iro niova. Ino antony? Fotony tsapandro fa ten̈a mitady raha mahatsara iro ankitin̈y atsika. (Vakia Filipianina 2:4.) Karaha ty iziô nivolan̈iny David, araiky nikoran̈intsika taloha in̈y: “Zahay koa fa sendra olo mivolan̈a fa izy tsy lian̈a, ampidirinay an̈aty saka antsendriky Baibolinay ndreky boky ndreky gazetinay, baka io izy an̈ontanianay: ‘Azafady, asa mety ambaranao zahay ino antony?’ ” Tsapanolo itoriantsika fo izikoa atsika ten̈a mitady raha mahatsara iro. Raha nivolan̈intsika tamindro mety tsy ho azondro onon̈o, fa hatsarampan̈ahy naboakantsika ndraiky tsy hadin̈andro foeky. Ndray tsy ambelandro hivolan̈a atsika, mety aboakantsika iro fo fa mitady raha mahatsara iro atsika, na amy fihetsikintsika zen̈y na amy saorantsika.

13. Ino ma raha tokony hataonao baka hifan̈araka tsarabe aminolo ikoran̈anao hafatra torianao?

¹³ Akory han̈aboahantsika fa mitady raha mahatsara olo atsika? Lera atsika mitory, koran̈antsika mila ampifan̈arahantsika amy raha ilainolo io ndreky raha tiany. Ke alaiva onon̈o, tompintran̈o io ma mananjanaka sa karakory. Izikoa zen̈y baka, mety ho tiany haharen̈y torohevitriny Baiboly momba fitarimian̈a tsaiky, na fomba hanan̈ana tokantran̈o sambatra. Izikoa ndraiky tany itorianao io migadragadra amy gadanà, dikanizen̈y, raha momba vaky tran̈o na fangalaran̈a ny mety koran̈iny aminany. Mety hamparavoravo izy maharen̈y fa Zan̈ahary han̈afoan̈a problemo aby io. Ke isaka anao fanôjy olo von̈ono hitandren̈y karaha zen̈y, aboaha izy fo fa afaka man̈ampy izy Baiboly. Karaha ty ho Katarína, araiky nivolan̈intsika taloha in̈y: “Alaiko onon̈o fo fa nahaitsara fiain̈ananaka, zaho koa fa nahay ny marin̈y amy Baiboly.” Hita amy koran̈any Katarína io fa ten̈a inoany raha volan̈iny, ke azo antoko fa tsapanolo ikoran̈any koa raha zen̈y.

14. Akory mety han̈arehany pitory raha koran̈iny Ohabolana 27:17?

¹⁴ Mitadiava fan̈ampian̈a. Naboakany Paoly i Timoty raha tokony hatao koa fa mitory  ndreky mampianatra. Nampirisiky Timoty foeky izy hampiasa fomba aby zen̈y lera man̈ampy olo. (1 Kor. 4:17) Karaha nataony Timoty, atsika koa mety mangataka fan̈ampian̈a baka aminolo zadraharaha an̈ivony fiangonan̈a. (Vakia Ohabolana 27:17.) Karaha zen̈y iziô rahalahy Shawn. Nisy fotoan̈a izy nan̈ano pisava lalan̈a ke nanompo tambanivolo. Ankamarozanolo tan̈y efa afapô tamy fivavahan̈a nisy tao. Fa i Shawn ndraiky ravoravo fo. Ino raha nataony? Karaha ty ho izy: “Zaho tsy mitory manokan̈a foeky, izikoa mbala mety. Zahay koa fa baka nitory tamy tran̈o araiky, nifampikoran̈a antsendriky zahay. Zahanay akory fomba hankatsarainay fomba fitorianay. Dinihinay miaraka koa akory mety hataonay izikoa mbala tôjy raha karaha in̈y.”

15. Nan̈ino ma atsika ten̈a mila mivavaka izikoa fa manompo?

¹⁵ Iangavia i Jehovah han̈ampy anao. Isaka anao hanompo, mivavaha baka Jehovah hitaridalan̈a anao. Sady tsisy raha ho vitantsika izikoa tsy iô fan̈ahy masin̈inany mahery. (Sal. 127:1; Lioka 11:13) Ataova mazava tsara raha angatahinao lera anao mivavaka. Ohatra, iangavia Jehovah han̈ampy anao hahita olo tihahay izy sady von̈ono hitandren̈y. Baka io man̈anaova raha mifan̈araka amy vavaka nataonao, ke mifen̈a fo hitory aminolo jiaby hitanao.

16. Ino raha mila ataontsika izikoa tihahita vokatra tsara amy fanompoan̈a? Nan̈ino?

¹⁶ Manokàn̈a fotoan̈a hianaran̈a manokan̈a. Karaha ty koran̈iny Baiboly: ‘Ataova raha hahaizanao sitrapony Zan̈ahary. Izio tsara, ankasitrahin̈y, baka io tsisy tsin̈iny.’ (Rom. 12:2) Mitombo fahaizantsika ny marin̈y momba Jehovah, atsika koa fa mianatra manokan̈a. Ke ho hitanolo fo fa inoantsika ankitin̈y raha volan̈intsika lera atsika mikoran̈a raha momba Zan̈ahary aminolo. Karaha ty ho Katarína, araiky nikoran̈intsika taloha in̈y: “Tontohitry zaho indraiky andra zay fa mila miezaka zaho baka hahaiho resy lahatra fo fa marin̈y fampianaran̈a fototro aby amy Baiboly ao. Ohatra iziô, nidinihiko tsara porofo mankamarin̈y fa Zan̈ahary niasa raha jiaby, Baiboly io ten̈a Volan̈anany ankitin̈y, baka io amy zioty Zan̈ahary mbala manan̈a fandaminan̈a ambony tany eto misolo ten̈a izy.” Katarína nivolan̈a fa nanjary natanjaka mare finoan̈anany izy koa fa nan̈ano fianaran̈a manokan̈a. Mampitombo haravoan̈anany koa izio ho izy, lera izy manompo.

17. Ino ma raha nan̈ampy Jesosy hitory fo fa tsy ho rivan̈a?

¹⁷ Jesosy tsy rivan̈a foeky. Nitory fo izy, ndray nisy olo tsy von̈ono nitandren̈y hafatra nindesin̈y. Nan̈ino? Fotony hainy fa ilainolo aby io mahay ny marin̈y, ke zen̈y nahavy izy tihan̈ampy olo maro, erakany mety ho vitany, haharen̈y vaovao tsara. Hainy koa fa ndray iro olo aby io tsy nitandren̈y izy tamy voanalohany, iro io mbala mety hitandren̈y fo koa fa mandeha fotoan̈a. Karaha zen̈y iziô iro zandriny Jesosy kibo araiky taminany. Nahadin̈y telo taon̈o sy tapany faharetany fotoan̈a nan̈anaovany Jesosy fanompoan̈anany, kanefa tan̈atiny fotoan̈a jiaby zen̈y, iro rahalahiny aby io tsisy nanjary pan̈aradia izy. (Jaona 7:5) Lera izy natsangana tamy maty iro vo nanjary Kristianin̈y.​—Asa. 1:14.

18. Nan̈ino ma atsika tsy tokony ho vôly hitory?

¹⁸ Atsika tsy mahay azovy aby olo hanjary panompony Jehovah koa fa mandeha fotoan̈a. Mety ho ela be olo sasany vo han̈eky fahamarin̈ana. Izikoa atsika tsy rivan̈a foeky fa mitory fo ndreky mifen̈y ho tsara fitondranten̈a, ndray iro olo tsy mitandren̈y atsika aby  io, mbala mety hiova fo ke ‘han̈amia voninahitry Zan̈ahary’!​—1 Pet. 2:12.

19. Izikoa 1 Korintianina 3:6, 7 zahan̈a, ino raha mila ikentsika?

¹⁹ Marin̈y fa anjarantsika mambôly ndreky mandrôzy, kanefa mila ikentsika fa Zan̈ahary ny mampitombo. (Vakia 1 Korintianina 3:6, 7.) Karaha ty ho Getahun, rahalahy araiky a Éthiopie an̈y: “Zaho zaraiky fo Vavolombelon̈o Jehovah tamy faritry nisy zaho tatỳ tan̈atiny 20 taon̈o mandilatra. Fa zioty, efa 14 pitory atỳ ke 13 amindro io efa vita batisa, an̈isanizen̈y vadiko ndreky zanako telo mianadahy. Kadiriny 32 ndraiky iziô olo man̈aton̈o fivorian̈a.” Ravoravo i Getahun fotony nitory fo izy sady naharidraha. Nambesany i Jehovah nitaon̈o olo manan̈a fô tsara hanjary an̈isany Fandaminan̈anany!​—Jaona 6:44.

20. Nan̈ino atsika mety ampitovisin̈y aminolo pan̈avotro fahin̈ana?

²⁰ Valera amy Jehovah aby fahin̈ananolo tsiaraikiaraiky. Namezany tombontsoa maventy atsika, miaraka miasa amy Zanany hamory olo baka amy firenena jiaby, alohany farany donia ty. (Hag. 2:7) Man̈avotro fahin̈ana asa fitorian̈a ataontsika io. Miniminia hely baka iziô misy piasa vitsivitsy, tavela an̈atiny kariaira araiky, ke misy ekipy araiky amy zay nirahin̈y han̈avotro iro baka ao. Marin̈y ndraiky fa tsy iro piasa jiaby totro tao ho avotrony ekipy pan̈avotro fahin̈ana io, kanefa ten̈a ilain̈a asandro. Tsisy ny hafa amy zen̈y fanompoan̈a ataontsika. Tsy haintsika firy olo ho avotro lera doniany Satana ty ho ravan̈a. Fa ny raha haintsika fo, azony Jehovah ampiasain̈a aby atsika tsiaraikiaraiky han̈avotan̈a iro io. Karaha ty ho Andreas, rahalahy araiky mipetraka a Bolivie an̈y: “Hitako fa, baka aminy ezakanolo maro an̈ivony fiangonan̈a mahavy olo araiky mahay ny marin̈y amy Baiboly ao ndreky atao batisa.” Ke irarian̈a atsika tsy ho rivan̈a fa hitory fo! Izikoa atsika man̈ano zen̈y, Jehovah hitahy atsika, ke hamparavoravo atsika mare fanompoan̈a ataontsika.