1. Izikoa dinihin̈y raha koran̈iny bokiny Apokalypsy, ataony Satana karakory ma panompony Zan̈ahary?

 KORAN̈INY bokiny Apokalypsy fa efa niôrin̈y andan̈itry an̈y Fanjakan̈any Zan̈ahary, baka io Satana efa nitoravan̈a baka tan̈y. (Apok. 12:1-9) Milamin̈y iro andan̈itry an̈y, fotony Satana efa tsy an̈y eky. Miôry mare ndraiky atsika ambony tany eto, fotony meloko angôvo jiaby i Satana. Raha miasa man̈enjiky panompony Jehovah tsy mivadiky fo raha ten̈a mahasôfy izy.​—Apok. 12:12, 15, 17.

2. Ino raha han̈ampy atsika tsy hivadiky?

² Ino raha han̈ampy atsika tsy hivadiky amy Jehovah ndray Satana tsy vôly man̈enjiky atsika? (Apok. 13:10) An̈isany raha araiky han̈ampy atsika, fahaizantsika raha mbala handalo aminy amaray an̈y. Ohatra, nazavainy apostoly Jaona aminy Apokalypsy ao fa hisy hatsaran̈a miambin̈y atsika tsy ho ela. Ty iziô araiky amindro hatsaran̈a aby zen̈y: Haripaka mandrakizay lan̈iany olo manohitry Zan̈ahary. Alô dinihintsika raha koran̈iny Apokalypsy momba iro fahavalony Zan̈ahary aby io ndreky raha handalo amindro teteky iô.

3. Ino aby famantaran̈a sasany koran̈iny Apokalypsy?

³ Apokalypsy 1:1 mivolan̈a fa misy fan̈azavan̈a tokony hivakiantsika. ‘Famantaran̈a’ ivolan̈any izio ao, fa izio fo tsy arabakiteny fa an̈ohatra. Ho hitantsika afarafara hely an̈y fa manôndro fahavalony Zan̈ahary iro biby dy maromaro koran̈iny Apokalypsy io. Apokalypsy 13:1 iziô mivolan̈a fa ‘misy biby dy araiky manan̈a tandroko folo ndreky loha fito manonga baka an̈atiny ranomasin̈y.’ Baka io misy ‘biby dy hafa koa’ man̈araka lay voanalohany io ‘miboaka baka ambany tany.’ Biby dy faharoe io koa fa mivolan̈a karaha  dragon, avio izio mahavita ‘mandatsaka môtro baka andan̈itry.’ (Apok. 13:11-13) Mikoran̈a momba biby dy hafa koa bokiny Apokalypsy, tsy ino izio fa ‘biby dy mena dà’; misy man̈angy makorely mitenginy biby dy mena dà io sady mibeko izy. Biby dy telo aby io samby manôndro olo fahavalony Zan̈ahary sady nanohitry Fanjakan̈anany, letrizay. Ke, ten̈a mila haintsika azovy iro io.​—Apok. 17:1, 3.

4-5. Nan̈ino ma raha koran̈iny Daniela 7:15-17 ao man̈ampy atsika hahay dikany famantaran̈a aby io?

⁴ Tsy ho haintsika foeky azovy iro fahavalo aby io izikoa tsy mazava amintsika antsendriky manôndro azovy biby dy aby io ndreky man̈angy makorely in̈y. Alô Baiboly fo ambelantsika mikoran̈a, fotony zen̈y zaraiky fo fomba ten̈a tsara ahaizantsika valiny fan̈ontanian̈a aby io. Ankamarozany famantaran̈a koran̈iny Apokalypsy ao efa nazavainy boky hafa amy Baiboly. Ohatra iziô, paminan̈y Daniela efa navy nan̈inôfy momba ‘biby dy efatra maro maventy manonga baka an̈atiny ranomasin̈y.’ (Dan. 7:1-3) Nazavainy Daniela fa iro biby dy aby io mifan̈itsy amy ‘panjaka’ efatra, na fitondrasan̈a efatra mifandimby. (Vakia Daniela 7:15-17.) Baka amy fan̈azavan̈a mazava namezany Daniela io ahaizantsika fa manôndro fitondrasan̈a arapôlitìky iro biby dy koran̈iny bokiny Apokalypsy.

⁵ Alô dinihintsika sasany amy famantaran̈a koran̈iny bokiny Apokalypsy, fotony han̈ampy atsika hahay dikany famantaran̈a aby io raha koran̈iny Baiboly momba zen̈y. Iro biby dy aby in̈y antsendriky hanampaonantsika izy. Ke hizahavantsika: 1) Azovy mifan̈itsy amindro biby dy aby io? 2) Han̈ano akory hiafarandro? 3) Ino vokatrany raha handalo aby zen̈y amintsika?

6. Manôndro ino ma biby dy manan̈a loha fito koran̈iny Apokalypsy 13:1-4?

⁶ Mifan̈itsy aminjovy biby dy manan̈a loha fito in̈y? (Vakia Apokalypsy 13:1-4.) Biby dy io miran̈a leôpara, fa vitinany ndraiky karaha vitiny orsy, baka io vavanany miran̈a vavany lion, avio izy manan̈a tandroko folo. Samby anan̈any biby efatra koran̈iny Daniela toko 7 ao aby toetoetry mampiavaka biby dy io, fa izy fo natambany araiky aminy Apokalypsy io. Izikoa zahavan̈a bokiny Apokalypsy, biby dy io tsy raha manan̈a fahifan̈a amy firenena araiky na maromaro fo fa, amy ‘foko ndreky vahoaka, baka io olo samby isany fivolan̈ana baka amy firenena jiaby.’ Dikanizen̈y, izio mbala maventy mandilatra tsiaraikiaraiky amy fitondrasan̈a jiaby misy ambony tany eto. (Apok. 13:7) Ke mifan̈itsy aminjovy basy biby dy koran̈iny Apokalypsy io? Izio manôndro fanjakan̈a jiaby nisy tambony tany teto rango nisiany tantaranolombelon̈o. *​—Mpito. 8:9.

7. Mifan̈itsy aminino ma loha fito tsiaraikiaraiky amy biby dy io?

⁷ Mifan̈itsy aminino ma tsiaraikiaraiky amy loha fito aby io? Man̈ampy atsika hahay valinizen̈y raha koran̈iny Apokalypsy toko 17 ao, fotony toko io man̈azava raha momba biby dy koran̈iny Apokalypsy toko 13 in̈y. Apokalypsy 17:10 iziô mivolan̈a karaha ty: “Misy panjaka fito: Dimy efa lavo, fa araiky ndraiky mbala iô, avio araiky mbala tsy navy fa lera izy avy, izy tsy hahadin̈y ela aby.” Tamy fitondrasan̈a arapôlitìky jiaby nampiasainy Satana, fito fo ny ten̈a niavaka ke nety nampitovisin̈y amy ‘loha fito’ aby io. Iro io fanjakan̈a ten̈a natanjaka nisy tambony tany teto, avio raha nataondro nisy vokany maventy tamy vahoakany Zan̈ahary. Taminy apostoly Jaona mbala velon̈o, dimy tamindro fanjakan̈a aby io efa namehy donia ty. Tsy azovy iro io fa Ezipty, Asyria, Babylony, Media-Persy, ndreky Gresy. Mbala nanjaka araiky fahatsiota tamy Jaona nahazo fan̈ambaran̈a io; tsy azovy  zen̈y fa i Roma. Azovy fitondrasan̈a matanjaka fahafito farany mifan̈itsy amy loha fahafito?

8. Azovy mifan̈itsy amy loha fahafitony biby dy in̈y?

⁸ Man̈ampy atsika hahay loha fahafito sady farany faminanian̈a koran̈iny bokiny Daniela. Azovy fitondrasan̈a ten̈a matanjaka erantany aminy ‘andrany Tômpo’, na aminy fotoan̈any farany iziô? (Apok. 1:10) Izio fitambarany firenena aroe ten̈a matanjaka: Royaume-Uni ndreky Etazonỳ. Fanjakan̈a Farany Matanjaka Erantany Angiley-Amerikain. Io loha fahafitony biby dy koran̈iny Apokalypsy 13:1-4 in̈y.

9. Mifan̈itsy aminino ma biby dy misy ‘tandroko aroe miran̈a tandrokony zanaka ondrikondriky’ io?

⁹ Samby manôndro Fanjakan̈a Farany Matanjaka Erantany Angiley-Amerikain, na loha fahafitony biby dy io na biby dy manan̈a ‘tandroko aroe mirana tandrokony zanaka ondrikondriky’, koran̈iny Apokalypsy toko 13 ao. Koran̈iny Baiboly fa mivolan̈a ‘karaha dragon’ biby dy manan̈a tandroko aroe io. (Apok. 13:11-15) ‘Paminan̈y sandoko’ ikahian̈a biby dy io aminy Apokalypsy toko 16 ndreky 19 ao. (Apok. 16:13; 19:20) Mitovitovy amy zen̈y koa raha nambarany Daniela paminan̈y. Nivolan̈a izy fa ‘tsy saomasaoma fandravan̈ana’ handeha hataony Fanjakan̈a Farany Matanjaka Erantany Angiley-Amerikain io. (Dan. 8:19, 23, 24) Zen̈y tsarabe raha nisy taminy Ady Lehibe II. Niaraka niasa siantifìky baka Grande-Bretagne ndreky Etazonỳ, ke nahavita nan̈amboatra baomby atômìky aroe iro nalatsakandro ta Japon, tany nifiheziny fahavalondro. Zen̈y koa raha namaran̈a Ady Lehibe II in̈y. Mira ‘nandatsaka môtro baka andan̈itry’ Fanjakan̈a Farany Matanjaka Erantany Angiley-Amerikain io, iro koa fa nahavita niasa baomby aby io.

10. Manôndro azovy ma ‘sariny biby dy’ io? (Apokalypsy 13:14, 15; 17:8, 11)

¹⁰ Hizaha biby dy hafa koa atsika. Presky miran̈a amy biby dy manan̈a loha fito in̈y fo biby dy araiky ty, fa ny raha hely tsy mampitovy iro, kolerany araiky ty mena dà. ‘Sariny biby dy’ ikahiany bokiny Apokalypsy izio, ke izio manôndro ‘panjaka fahavalo.’ * (Vakia Apokalypsy 13:14, 15; 17:8, 11.) Nivolan̈a apostoly Jaona fa ‘panjaka’ io efa tiô, baka io izy tsy tiô hely, avio niboaka ndraiky koa izy tafara tatỳ. Karaha zen̈y tsarabe raha nahazo Firenena Mikamban̈a (na ONU). Tanjon̈onany io hampandroso tombontsoany fitondrasan̈a arapôlitìky jiaby misy erantany. Tamy somilany izio vo nifôron̈o, Fikambanampirenena nikahian̈a izio. Baka io tsy hita foeky izio taminy Ady Lehibe II. Niboaka ndraiky izio tafara, ke ONU ahaizan̈a izy firaka iziô.

11. Ino raha ataondro biby dy aby io, kanefa nan̈ino atsika tsy tokony havozo iro?

¹¹ Miran̈a man̈ano propagandy iro biby dy na fitondrasan̈a aby io, fotony iro mampirisiky olo hanohitry Jehovah ndreky vahoakanany. Ke eraka fikoran̈any Jaona izy, iro io miran̈a mamory ‘panjaka jiaby erantany’ aminy ady Aramagedona, ‘andra maventiny Zan̈ahary Farany Mahery.’ (Apok. 16:13, 14, 16) Ndray izy man̈ano zen̈y, tsisy raha tokony havozoantsika. Nan̈ino? Fotony Jehovah Zan̈aharintsika han̈ano raha malaky han̈avotan̈a lan̈iany olo man̈eky fitondrasan̈anany.​—Ezek. 38:21-23.

12. Han̈ano akory hiafarany biby dy jiaby io?

¹² Akory hiafarany biby dy jiaby io? Karaha ty volan̈iny Apokalypsy 19:20: “Ke biby dy io nisambôrin̈y, karaha zen̈y koa paminan̈y sandoko nan̈ano famantaran̈a nan̈oloan̈a izy in̈y; baka tamy famantaran̈a io baka namandrihany paminan̈y sandoko in̈y lan̈iany olo nan̈eky nasian̈a markiny biby dy io ndreky nan̈eky nivavaka  tamy sarinizio. Iro roe io baka tiô samby natsipy velon̈o tan̈atiny matsabory môtro misy solifara.” Dikanizen̈y, mbala an̈atiniro fahavalony Zan̈ahary aby io mitondra tsarabe, Zan̈ahary ho avy handripaka fitondrasan̈a aby io mandrakizay.

13. Handeha hiforseny fanjakan̈a han̈ino ma Kristianin̈y jiaby tsy ho ela?

¹³ Ino ma dikany raha zen̈y amintsika? Mila tsy mivadiky amy Zan̈ahary ndreky amy Fanjakan̈anany foeky atsika, fotony atsika Kristianin̈y. (Jaona 18:36) Dikanizen̈y, atsika tsy mila mibidabida raha momba pôlitìky foeky, nata pitiny! Tsy mora ndraiky man̈ano zen̈y, fotony iro pitondra aby amy donia ty hiforse atsika hanohan̈a iro, na amy raha volan̈intsika zen̈y na amy raha ataontsika. Ke zay olo man̈eky tahômindro, miran̈a man̈eky asian̈a markiny biby dy in̈y. (Apok. 13:16, 17) Kanefa, tsy hahazo rady amy Jehovah foeky lan̈iany olo misy marky io, salakady tsy hahazo fiain̈ana mandrakizay amy Paradisa koa. (Apok. 14:9, 10; 20:4) Ke zen̈y mahavy atsika tsy mila mibidabida amy raha momba pôlitìky foeky, ndray iro pitondra aby io miforse atsika hanohan̈a iro!

14. Ino koa raha nampalany fan̈ahy apostoly Jaona baka tiô, izikoa Apokalypsy 17:3-5 zahan̈a?

¹⁴ Nivolan̈a apostoly Jaona fa nisy raha hafa koa ho izy ‘nampalany fan̈ahy izy mare.’ Ino izio? Nisy man̈angy araiky, ho izy, mitenginy aminy araiky amindro biby dy maro kafiry aby io, sady mikomandy izio. (Apok. 17:1, 2, 6) “Babylony Be” ikahian̈a man̈angy ‘makorely be’ io. ‘Nijangajanga’ tamindro ‘panjakany tany’ aby io izy.​—Vakia Apokalypsy 17:3-5.

15-16. a) “Babylony Be” io ma azovy? b) Akory ahaizantsika zen̈y?

¹⁵ Azovy ma “Babylony Be” io? Man̈angy io tsy fandaminan̈a arapôlitìky, fotony bokiny Apokalypsy mivolan̈a fa izio mijangajanga amindro pitondra aby amy donia ty. (Apok. 18:9) Man̈angy io mitenginy biby dy in̈y sady mikomandy izy. Ino ma dikanizen̈y? Tihivolan̈a andininy io fa man̈angy io tihifehy iro pitondra aby io. Ke dikanizen̈y ma “Babylony Be” io tapany arabarotro amy doniany Satana? Tsy zen̈y, fotony ‘pivarotro ambony tany eto’ ikahiany Apokalypsy iro amy resaka varotro.​—Apok. 18:11, 15, 16.

¹⁶ Izikoa Soratra Masin̈y zahavan̈a, matetiky, ‘makorely’ ivolan̈ana lan̈iany olo miaboko manompo Zan̈ahary kanefa man̈ano karazan̈a fanompoantsampy na man̈ano raha hafa han̈aboahan̈a fa iro kamaradiny donia ty. (1 Tan. 5:25; Jak. 4:4) Mifanohitry amy zen̈y ndraiky, ‘virjiny madio’ ikahiany Baiboly lan̈iany olo tsy mivadiky fa manompo Zan̈ahary fo. (2 Kor. 11:2; Apok. 14:4) Taloha, ta Babylony foibeny fanompoantsampy. Safe, Babylony Be io fitambarany fivavahan̈a diso jiaby erantany.​—Apok. 17:5, 18; zahava amy jw.org/mg ao lahatsoratra ty: “Iza moa i Babylona Lehibe?”

17. Ino raha miambin̈y Babylony Be io?

¹⁷ Ino raha miambin̈y Babylony Be? Mamaly fan̈ontanian̈a io Apokalypsy 17:16, 17. Karaha ty ho izy ao: “Ho halany tandroko folo hitanao in̈y ndreky biby dy in̈y mare makorely io, ke hiravaindro raha jiaby anan̈any avio hampibonginindro izy, baka io hihoanindro nôfotronany jiaby avio hiroandro izy ziska izy ravan̈any môtro. Efa nataony Zan̈ahary tan̈atiny fôndro tao baka hevitrinany.” Ia, hataony Jehovah raha hahavy iro firenena aby io hampiasa biby dy mena dà in̈y, tsy ino zen̈y fa ONU, hivadiky amy fivavahan̈a diso jiaby erantany ndreky handravan̈a izio tanteraka.​—Apok. 18:21-24.

18. Akory an̈aboahantsika fa tsy manohan̈a Babylony Be foeky atsika?

¹⁸ Akory atsika? Mila mifen̈y fo atsika mitana ‘fivavahan̈antsika ho madio ndreky tsisy  loto amasony Zan̈aharintsika.’ (Jak. 1:27) Tsy tokony hambelantsika ho hisy vokany amy toetsain̈intsika foeky fampianaran̈a diso aparitakany Babylony Be; atsika koa tsy tokony han̈ano fety misy ifandraisany amy fanompoantsampy foeky. Atsika tsy tokony hilefitry amy fitondranten̈a malotonolo amy donia ty, avio atsika koa tsy tokony hifandray amy demony, karaha fataony Babylony Be. Tsy vôly foeky koa atsika mitaon̈o olo ‘hiboaka na hiala aminany ao’, amy zen̈y iro tsy haripakany Zan̈ahary miaraka amy Babylony Be io.​—Apok. 18:4.

19. Azovy ma ‘dragon araiky maventy sady mena karaha môtro’ io?

¹⁹ Mikoran̈a momba ‘dragon araiky maventy sady mena miran̈a môtro’ koa bokiny Apokalypsy. (Apok. 12:3) Dragon io miady amy Jesosy ndreky aminy anjelinany. (Apok. 12:7-9) Manafiky vahoakany Zan̈ahary koa izio, salakady man̈amia angôvo iro biby dy aby in̈y, tsy azovy zen̈y fa fitondrasan̈anolombelon̈o. (Apok. 12:17; 13:4) Azovy ma dragon io? Izio ‘Devoly ndreky Satana, bibilava araiky tamy voanalohany tan̈y in̈y.’ (Apok. 12:9; 20:2) Fahavalony Jehovah jiaby io ambany fahifan̈anany aby.

20. Han̈ano akory hiafarany dragon io?

²⁰ Hatao akory dragon io? Hazavainy Apokalypsy 20:1-3 fa misy anjely araiky han̈atsipy Satana an̈atiny lavaka lalin̈y mare sady tsy hita farany. Higadra an̈atiny lavaka io i Satana, ke ‘tsy hahavita hamitaka olo foeky izy parpitaperany 1 000 taon̈o.’ Farany, Satana ndreky iro demoninany aby io hatsipy an̈atiny ‘matsabory môtro ndreky solifara.’ Dikanizen̈y, haripaka mandrakizay iro. (Apok. 20:10) Miniminia hely baka han̈ano akory fiain̈ana izikoa fa tsy ho hisy eky Satana ndreky iro demony aby io. Zay zaka tsara marin̈y!

21. Nan̈ino ma atsika ravoravo izikoa fa namaky bokiny Apokalypsy?

²¹ Ten̈a mankahery mahay dikany famantaran̈a aby koran̈iny bokiny Apokalypsy in̈y! Atsika tsy vitany nahay azovy iro fahavalony Jehovah aby io, fa haintsika koa han̈ano akory hiafarandro io. Ke marin̈y ankitin̈y raha koran̈iny Apokalypsy 1:3, mivolan̈a karaha ty: “Sambatra lan̈iany olo mamaky mare ndreky mitandren̈y volan̈any faminanian̈a ty”! Lera fahavalony Zan̈ahary aby io tsy iô eky, ino aby hatsaran̈a miambin̈y olo tsy mivadiky? Zen̈y raha ho hitantsika amy lahatsoratra farany aminy andiandahatsoratra ty.