1. Ino ma fanapahankevitry maventy tsy maintsy ataonolo tsiaraikiaraiky?

 TY SAFIDY maventy tsy maintsy ataonolo aminy andra iziô: Na iro han̈eky fa Jehovah Zan̈ahary fo manan̈a zò hitondra amy raha jiaby, na iro hanohan̈a Satana Devoly fahavalony Jehovah. Tsisy safidy hafa mety hatao eky ankoatranizen̈y. Miankiny amy safidy ataonolo tsiaraikiaraiky hahavy izy ho velon̈o tsisy farany na hofoaty mandrakizay. (Mat. 25:31-33, 46) Amy “fahorian̈a be” vo ho hay azovy ho tafitsaka velon̈o na azovy ho ripaka.​—Apok. 7:14; 14:9-11; Ezek. 9:4, 6.

2. a) Mampirisiky atsika han̈ino ma Hebreo 10:35-39? b) Man̈ampy atsika han̈ino ma bokiny Apokalypsy?

² Vakia Hebreo 10:35-39. Misy jery anao, izikoa anao nifidy han̈eky fitondrasan̈any Jehovah. Azo antoko fa tihan̈ampy olo hafa han̈ano fanapahankevitry tsara koa anao. Ke ampiasà iro hevitry hita amy bokiny Apokalypsy ao. Miavaka boky io, fotony koran̈inizio ao han̈ano akory hiafaranolo manohitry Jehovah. Kanefa, hita ao koa hatsaran̈a miambin̈y lan̈iany olo tsy mivadiky amy Jehovah. Matomboko fahamarin̈ana zen̈y, ke mila manokan̈a fotoan̈a atsika handinihan̈a iro io. Fan̈anaovanao zen̈y hahavy anao hahaiho tapakevitry hanompo Jehovah fo, ndreky han̈ampy olo hafa han̈ano karaha zen̈y koa.

3. Ino ma raha hidinihintsika amy lahatsoratra ty ato?

³ Handiniky fan̈ontanian̈a aby ty atsika amy lahatsoratra ty ato: Ino raha miambin̈y lan̈iany olo man̈eky fitondrasan̈any Zan̈ahary? Avio, han̈ano akory ndraiky lan̈iany olo mifidy han̈araka biby dy mena dà, koran̈iny bokiny Apokalypsy?

4. Azovy antokonolo hitany apostoly Jaona miaraka amy Jesosy andan̈itry an̈y?

⁴ Tamy fahitan̈a araiky, apostoly Jaona nahita antokonolo aroe. Iro io man̈eky fitondrasan̈any Jehovah sady mahazo hatsaran̈a maro, fotony iro hiain̈y mandrakizay. Iro 144 000 aby io andiany voanalohany. (Apok. 7:4) Iro io nakarin̈y andan̈itry an̈y, ke hanjary panjaka miaraka amy Jesosy. Iro io namany Jesosy hitondra tany ty. (Apok. 5:9, 10; 14:3, 4) Tamy fahitan̈a io, iro hitany Jaona mitsangana miaraka amy Jesosy, amy Bongo Ziona.​—Apok. 14:1.

5. Han̈ano akory ma iro voahosotro aby mbala ambony tany eto tsy ho ela?

⁵ Rango tamy faha apostoly firaka izioty, andrivony olo navoafidy ho an̈isandro 144 000 aby io. (Lioka 12:32; Rom. 8:17) Kanefa, Jaona efa nivolan̈a fa ho vitsy fo iro tavela ambony tany eto an̈atiny andra farany. Alohany fahorian̈a be, lan̈iany voahosotro mbala ‘tavela’ ambony tany eto hahazo “tombokase” farany man̈ambara fa ankasitrahiny Jehovah iro. (Apok. 7:2, 3; 12:17) Ke antsefatsefakany fahorian̈a be ho avy io, handeha hakarin̈y andan̈itry iro voahoasotro mbala tavela ambony tany eto, ke hiaraka amindro an̈isany 144 000 efa naty sady tsy nivadiky aby io. Hiaraka hanjaka amy Jesosy iro io, amy Fanjakan̈any Zan̈ahary.​—Mat. 24:31; Apok. 5:9, 10.

6-7. a) Azovy antokonolo faharoe hitany Jaona, avio ino raha ianarantsika baka amindro io? b) Nan̈ino ma atsika tokony hazoto handiniky raha koran̈iny Apokalypsy toko 7, na voahosotro atsika na “vahoaka marobe”?

⁶ Apostoly Jaona koa fa baka nahita iro antokonolo handeha andan̈itry aby io, izy nahita “vahoaka marobe.” Tsy koran̈iny Baiboly firy iro io. (Apok. 7:9, 10) Ino raha koran̈iny Baiboly momba iro io? Karaha ty nambarany Jaona: “Iro io baka tamy fahorian̈a be, lambandro nisasandro ndreky nifotsiandro tamy liony Zanaka ondrikondriky.” (Apok. 7:14) “Vahoaka marobe” io koa fa tafitsaka amy fahorian̈a be, iro hiain̈y tsisy farany ambony tany eto, sady ho ravoravo mare fotony maro ankitin̈y hatsaran̈a ho azondro.​—Sal. 37:9-11, 27-29; Ohab. 2:21, 22; Apok. 7:16, 17.

⁷ Na voafidy handeha andan̈itry atsika na hiain̈y ambony tany eto, tokony hatoky amy fô jiaby atsika fa ho tanteraka amintsika raha koran̈iny Apokalypsy toko 7 io. Ten̈a hamparavoravo fotoan̈a io! Tsy hanen̈iny foeky atsika fotony nan̈eky fitondrasan̈any Jehovah. Ino koa raha koran̈iny bokiny Apokalypsy momba fahorian̈a be?​—Mat. 24:21.

8. Ino raha hiboaka izikoa fa manomboko fahorian̈a be, avio han̈ano akory fihetsikinolo maro?

⁸ Efa hitantsika tamy lahatsoratra talohany araiky ty, fa fikambanan̈a arapôlitìky amy donia ty hanafiky Babylony Be na fitambarany fivavahan̈a diso jiaby erantany. (Apok. 17:16, 17) Izikoa fa miboaka raha zen̈y, manomboko fahorian̈a be. Dikanizen̈y ma ho hisy olo marobe hanomboko hanompo Jehovah? Tsy zen̈y. Koran̈iny Apokalypsy toko 6 fa iro olo tsy manompo Jehovah aby io hitady fiarovan̈a amy fikambanan̈a arapôlitìky ndreky arabarotrony donia ty. Ampitovisiny Baiboly amy bongo iro fikambanan̈a aby io. Fotony iro io tsy manohan̈a Fanjakan̈any Zan̈ahary, ke panohitry fo fiheverany Jehovah iro jiaby io.​—Lioka 11:23; Apok. 6:15-17.

9. Ino ivolan̈ana fa, amy fahorian̈a be ho avy io, panompony Jehovah tsy hitovy aminolo amy donia ty, avio han̈ano akory iro vokatranizen̈y?

⁹ Panompony Jehovah tsy mivadiky ndraiky hiavaka, amy fotoan̈a farany sarotro amy fahorian̈a  be io. Iro zaraiky fo ambony tany eto manompo Jehovah Zan̈ahary sady tsy man̈eky fiheziny “biby dy” io. (Apok. 13:14-17) Mifen̈y tsy hivadiky amy Jehovah fo iro, ke ho meloko mare lan̈iany olo manohitry Jehovah mahita zen̈y. Ke hitambatra iro firenena aby io hanafiky vahoakany Jehovah jiaby erantany. Fanafihan̈any Goga baka Magoga ikahiany Baiboly izio.​—Ezek. 38:14-16.

10. Ino raha handeha hataony Jehovah izikoa fa hanafiky vahoakanany i Goga baka Magoga? (Apokalypsy 19:19-21)

¹⁰ Han̈ano akory i Jehovah izikoa fa mikomansy fanafihan̈a io? Karaha ty ho izy: “Ho meloko farany mare zaho.” (Ezek. 38:18, 21-23) Koran̈iny Apokalypsy toko 19 raha handalo afaranizen̈y. Jehovah han̈iraka Zanany hiaro panomponany ndreky hiady amy fahavalonany. Azovy fanamany Jesosy hiady amy Goga baka Magoga? Iro “tafikiny lan̈itry” aby io, tsy azovy zen̈y fa iro anjely tsy mivadiky ndreky iro 144 000 aby io. (Apok. 17:14; 19:11-15) Akory hiafarany ady io? Ho ripaka lan̈iany olo na fikambanan̈a manohitry Jehovah.​—Vakia Apokalypsy 19:19-21.

11. Ino ma raha ten̈a maventy sady faramparany koran̈iny bokiny Apokalypsy?

¹¹ Miniminia hely baka raha tsapanolo hiain̈y ambony tany eto, lera fahavalony Zan̈ahary aby io ho ripaka tanteraka! Haravoan̈a tsisy ambaka izy amy leranizen̈y! Marin̈y ndraiky fa ho ravoravo mare iro andan̈itry an̈y lera Babylony Be ho ravan̈a, kanefa misy raha hafa mbala mamparavoravo mandilatra zen̈y. (Apok. 19:1-3) Ino izio? “Mariaziny Zanaka Ondrikondriky.” Io raha ten̈a maventy sady faramparany koran̈iny bokiny Apokalypsy.​—Apok. 19:6-9.

12. Izikoa Apokalypsy 21:1, 2 zahan̈a, ombian̈a ma mariaziny Zanaka Ondrikondriky io?

¹² Ombian̈a mariazy io? Efa andan̈itry an̈y iro 144 000 jiaby aloha heliny ady Aramagedona. Kanefa, mbala tsendriky amy zen̈y mariaziny Zanaka Ondrikondriky io. (Vakia Apokalypsy 21:1, 2.) Hatao mariaziny Zanaka Ondrikondriky io afarany ady Aramagedona, izikoa fa ripaka fahavalony Zan̈ahary jiaby.​—Sal. 45:3, 4, 13-17.

13. Ino ma raha handalo amy mariaziny Zanaka Ondrikondriky?

¹³ Ino ma dikany mariaziny Zanaka Ondrikondriky io amindro olo an̈isanizio? Lelahy araiky ndreky man̈angy araiky koa fa man̈ano mariazy, iro mitambatra araiky. Karaha zen̈y koa mariaziny Zanaka Ondrikondriky io; izio mampitambatra Jesosy Kristy Panjaka ndreky man̈angy handeha “hingain̈y” io, tsy azovy zen̈y fa iro 144 000 aby io. Ke amy fotoan̈a io hanomboko hitondra tany ty Jesosy ndreky iro 144 000 aby io, an̈atiny 1 000 taon̈o.​—Apok. 20:6.

14-15. Ampiran̈iny Apokalypsy toko 21 aminino ma iro 144 000 aby io? (Zahava sary amy fon̈ony gazety ty.)

¹⁴ Ampitovisiny Apokalypsy toko 21 amy tanàna araiky tsara mare iro 144 000 aby io. “Jerosalema Vaovao” an̈aran̈any tanàna io. (Apok. 21:2, 9) Vato 12 fôtotrony tanàna io, avio tamy vato aby io nisy “an̈aran̈a aroe ambiny folony apostoly 12, tsy azovy zen̈y fa iro apostolony Zanaka Ondrikondriky.” Nan̈ino ma raha zen̈y nanaitry i Jaona? Fotony hitany taminy araiky tamy vato aby io an̈aran̈anany. Tombontsoa tsisy ambaka izy raha zen̈y!​—Apok. 21:10-14; Efes. 2:20.

¹⁵ Tsiary nisy tanàna mety ampitovisin̈y amy tanàna an̈ohatra io. Volamena tsisy raha  miaro lalan̈a maventy fidiran̈a amy tanàna io. Avio varavaran̈a 12 amy tanàna io vita baka tamy perly. Riba be mikodidin̈y tanàna io ndreky fôtotrony riba aby io ndraiky vita baka amy vatosoa isankarazany. Tsy nataotao fo iro vatosoa aby io fa ten̈a voadiniky tsarabe firaka amy meziranany. (Apok. 21:15-21) Fa misy raha araiky hitany apostoly Jaona manky aminany io! Karaha ty ho izy: “Zaho tsy nahita tempoly foeky tan̈aty tao, fotony Jehovah Zan̈ahary, lay Farany Mahery, ndreky Zanaka Ondrikondriky tempoliny tanàna io. Ke tsy nila masoandra na fanjava hampazava izy foeky tanàna io, fotony voninahitriny Zan̈ahary nampazava izio, avio Zanaka Ondrikondry jironizio.” (Apok. 21:22, 23) Hifandray mivantan̈a amy Jehovah iro 144 000 aby io. (Heb. 7:27; Apok. 22:3, 4) Zen̈y mahavy Baiboly mivolan̈a fa Jehovah ndreky Jesosy tempoliny tanàna io.

16. Han̈ano akory ma olombelon̈o amy Fanjakan̈a Arivo Taon̈ony Fanjakan̈any Zan̈ahary?

¹⁶ Efa tsy din̈indro voahosotro aby io hahita tanàna io. Ndray izy man̈ano zen̈y, zay olo man̈anten̈a hiain̈y ambony tany eto koa tokony hisan̈andra izio. Amy Fanjakan̈a Arivo Taon̈ony Fanjakan̈any Zan̈ahary, Jerosalema Vaovao io hitondra hatsaran̈a maro ambony tany eto. Nivolan̈a i Jaona fa iro hatsaran̈a aby io, ho izy, hisasasàka mira “ten̈aranony ranony fahin̈ana.” Andafore an̈ila an̈ila amy ten̈arano io misy “kakazony fahin̈ana”; van̈ono mare kakazo aby io avio raviny kakazo aby io ‘hampajanga firenena.’ (Apok. 22:1, 2) Hahazo hatsaran̈a baka amy fandaharan̈a feno fitiavan̈a aby io lan̈iany olo velon̈o amy leranizen̈y. Izikoa fa mandeha fotoan̈a, hanjary lavorary lan̈iany olo man̈araka volan̈any Jehovah. Tsy ho hisy eky aretin̈y, tehotehoko, avio tsy ho hisy koa ranomasony alahelo.​—Apok. 21:3-5.

17. Azovy aby hahazo hatsaran̈a, amy Fanjakan̈a Arivo Taon̈o? (Apokalypsy 20:11-13)

¹⁷ Azovy aby hahazo hatsaran̈a ke hahita raha tsara handeha hataony Jehovah zen̈y? Voanalohany amy zen̈y, iro vahoaka marobe tafitsaka baka taminy Aramagedona, avio mety ho an̈isany koa iro tsaiky jiaby teraka amy donia vaovao. Mampan̈anten̈a koa Apokalypsy toko 20 fa olo maty ho velon̈o ndraiky. (Vakia Apokalypsy 20:11-13.) Handeha hivilôminy Jehovah koa panomponany tsy nivadiky marobe taloha tan̈y. ‘Olo marin̈y’ ikahiany Baiboly iro io. Maro koa ‘olo tsy marin̈y’  na olo tsy nahay raha momba Jehovah foeky hivilômin̈y ambony tany eto ndraiky. (Asa. 24:15; Jaona 5:28, 29) Dikanizen̈y ma olo jiaby naty zay himpody hivilômin̈y aby, amy Fanjakan̈a Arivo Taon̈o? Aha. Misy olo efa naharen̈y raha momba Jehovah talohanizy naty, kanefa izy kinia nifidy tsy hanompo Jehovah. Olo karaha zen̈y tsy vain̈y hiain̈y amy Paradisa, fotony iro efa namezany Jehovah fahafahan̈a hanompo izy fa iro tsy naefa. Zen̈y mahavy Jehovah tsy hanangana iro.​—Mat. 25:46; 2 Tes. 1:9; Apok. 17:8; 20:15.

18. Han̈ano akory olombelon̈o amy farany 1 000 taon̈o?

¹⁸ Amy farany 1 000 taon̈o, ho lavorary olo jiaby miain̈y ambony tany. Amy leranizen̈y, tsisy olo hilanja vokadratsiny fahotan̈a nilovain̈a baka taminy Adama eky. (Rom. 5:12) Atsika ho afaka tanteraka aminy ozon̈o nazontsika baka tamy fahotan̈any Adama. Dikanizen̈y, olo jiaby ambony tany eto ‘ho velon̈o ankitin̈y’ fotony iro hanjary olombelon̈o lavorary amy farany 1 000 taon̈o.​—Apok. 20:5.

19. Ino ma antony nilàn̈a fitsapan̈a farany io?

¹⁹ Haintsika fa nahavita tsy nivadiky tamy Zan̈ahary i Jesosy, ndray mafy fitsapan̈a nalefany Satana taminany. Karaha ty: Amy leranizen̈y baka efa lavorary aby olo jiaby, ke asa ho vitandro tsy hivadiky amy Jehovah lera Satana hitsapa iro? Anjaranolo tsiaraikiaraiky mamaly fan̈ontanian̈a zen̈y lera Satana hivotsaoran̈a baka amy lavaka tsy hita farany, amy farany 1 000 taon̈o. (Apok. 20:7) Lan̈iany olo tsy mivadiky amy fitsapan̈a farany io ho velon̈o tsisy farany, ke ho ravoravo hahazo ten̈a fahafahan̈a. (Rom. 8:21) Fa zay olo manohitry Jehovah, ho ripaka mandrakizay miaraka amy Devoly ndreky iro demony aby io.​—Apok. 20:8-10.

20. Ino raha tsapanao izikoa fa nandiniky faminanian̈a miavaka koran̈iny bokiny Apokalypsy?

²⁰ Asa ino raha tsapanao izikoa fa nandiniky hevitry vitsivitsy tamy bokiny Apokalypsy? Efa tsy din̈inao ma hahita faminanian̈a miavaka aby io ho tanteraka? Hitantsika tato ino aby raha handalo aminy hoavy. Ke fahaizantsika zen̈y mandrisiky atsika hitaon̈o olo hafa hanompo Jehovah miaraka amintsika. Sa akory hevitrinao? (Apok. 22:17) Mitovy amy raha tsapany apostoly Jaona raha tsapantsika. Ho izy: “Ameny! Mavia anao Jesosy Tômpo.”​—Apok. 22:20.