1-2. Ino antony araiky mahavy atsika tokony handiniky bokiny Apokalypsy?

 ASA efa navy nisy olo nampizaha anao sary tan̈atiny album-nany? Mety tsy hainao aby donko ankamaraozanolo hitanao tao. Fa tiô fo, anao namadiky in̈y, nisy sary araiky nanaitry anao. Mba an̈atiny sary io koa baka anao. Miezaka anao mangala onon̈o ombian̈a ndreky taia anaro nangala sary io. Dinihinao koa olo hafa miaraka aminaro amizio ao. Lôso misy dikany aminao mare sary io baka tiô.

² Nan̈ino ma bokiny Apokalypsy mety ampitovisin̈y amy sary io? Voanalohany, fotony mandeha amintsika hafatra an̈atinizio ao. Karaha ty koran̈iny andininy voanalohany amizio: ‘Raha nambarany Jesosy Kristy, salakady namezany Zan̈ahary izy, han̈aboahan̈a amy panomponany raha ho hisy tsy ho ela.’ (Apok. 1:1) Ke tsy olo jiaby handianany hafatra io fa atsika fo. Atsika baka panompony Zan̈ahary, ke haintsika fa atsika an̈isany man̈ano raha mahavy faminanian̈a aby io ho tanteraka. Ary raha zen̈y tsy mahagaga atsika foeky. Koa atao amy volan̈a hafa, mba ‘an̈atiny sary io ao’ koa atsika.

3-4. a) Koa zahan̈a bokiny Apokalypsy, ombian̈a ma iro faminanian̈a aby io tanteraka? b) Tokony handrisiky atsika han̈ino ma raha zen̈y?

³ Ino antony faharoe mahavy atsika tokony handiniky faminanian̈a aby amy bokiny Apokalypsy ao? Fotony apostoly Jaona nivolan̈a fa ho tanteraka ‘aminy andrany Tômpo’ faminanian̈a aby io, amy zioty zen̈y. (Apok. 1:10) Tamy fotoan̈a nanoratany Jaona volan̈a aby io, kadiriny tamy taon̈o 96 tan̈y, mbala tsy honohono ho avy foeky “andrany Tômpo.” (Mat. 25:14, 19; Lioka 19:12) Fa izikoa zahavan̈a faminanian̈any Baiboly, efa taminy  1914, tamy Jesosy nanjary Panjaka tandan̈itry, vo nanomboko ‘andrany Tômpo’ io. Kômansy tiô, nanomboko tanteraka faminanian̈a aby amy bokiny Apokalypsy ao, an̈isanizen̈y faminanian̈a mikasiky vahoakany Zan̈ahary. Ke miain̈y aminy “andrany Tômpo” ankitin̈y atsika iziô!

⁴ Miain̈y an̈atiny fotoan̈a miavaka mare atsika iziô, ke mila dinihintsika tsarabe torohevitry feno fitiavan̈a koran̈iny Apokalypsy 1:3 ty: “Sambatra lan̈iany olo mamaky mare ndreky mitandren̈y volan̈any faminanian̈a ty ke man̈araka raha avoasoratra aminizity ato, fotony fotoan̈a avoatôndro io efa marikitry.” Dikanizen̈y, mila “mamaky mare ndreky mitandren̈y volan̈any faminanian̈a” aby io atsika, avio “man̈araka” raha koran̈indro io. Ino ma sasany amindro volan̈a aby mila arehantsika io?

5. Koa zahan̈a bokiny Apokalypsy, nan̈ino atsika ten̈a mila mangala toky fa ikeny Jehovah fanompoan̈antsika?

⁵ Miaraka atsika mamaky toko voanalohany amy bokiny Apokalypsy, ianarantsika fa hainy Jesosy aby raha jiaby mandalo an̈ivony fiangonan̈a. (Apok. 1:12-16, 20; 2:1) Ahitan̈a zen̈y hafatra nalefany Jesosy tamy fiangonan̈a fito ta Azia Minora tan̈y. Voafaritry tsarabe toromariky namezany Jesosy iro fiangonan̈a aby io, ke izio ten̈a nan̈ampy iro Kristianin̈y tamy taonjato voanalohany tan̈y hangala antoko izikoa ten̈a ikeny Jehovah fanompoan̈andro. Mbala ilaintsika aminy andra iziô ma hafatra aby io? Ino ma raha ianarantsika baka amy zen̈y? Kristy Jesosy baka Pitariky atsika, ke hainy tsarabe man̈ano akory fihavanan̈antsika amy Jehovah. Hainy koa ezaka mila ataontsika beky atsika hahazo sitraka amy Jehovah fo. Ino ma toromariky namezany Jesosy ke mila arehantsika koa avahizo?

6. a) Koa zahan̈a volan̈any Jesosy aminy Apokalypsy 2:3, 4 io, ino problemo maventy tamy fiangonan̈a ta Efesosy? b) Ino raha ianarantsika baka amy zen̈y?

⁶ Vakia Apokalypsy 2:3, 4. Tsy mila ambelantsika hihen̈y foeky fitiavantsika Jehovah tamy voanalohany. Hita taminy hafatra nalefany Jesosy tamy fiangonan̈a ta Efesosy fa ten̈a niaritry ankitin̈y iro tao, salakady nanohy nanompo Jehovah fo ndray maro raha nitsapa finoan̈andro. Fa izy fo, nambelandro nihen̈y fitiavandro Jehovah, ke efa tsy karaha tamy voanalohany in̈y eky. Ke nila nampitombosindro fitiavandro Jehovah, fa izikoa tsy zen̈y, tsy ikeny Jehovah edy fanompoan̈andro. Karaha zen̈y koa avahizo, atsika tsy vitany mila miaritry fo fa, mila tsara koa antony mahavy atsika miaritry. Zan̈aharintsika koa fa mizaha fanompoan̈antsika, tsy raha ataontsika fo dinihiny, fa antony mahavy atsika man̈ano izio koa. Nan̈ino ma zen̈y ny ten̈a misy kôntiny aminany? Fotony tiany izikoa baka amy fitiavan̈a ndreky fankasitrahantsika izy mahavy atsika manompo izy.​—Ohab. 16:2; Mar. 12:29, 30.

7. a) Izikoa Apokalypsy 3:1-3 zahan̈a, ino problemo hitany Jesosy tamy fiangonan̈a ta Sardisy? b) Ino raha mila ataontsika?

⁷ Vakia Apokalypsy 3:1-3. Mila manohy miambin̈y ndreky mitandrin̈y fo atsika. Diniha ty: Nisy problemo hafa koa iro tamy fiangonan̈a ta Sardisy. Taloha, iro mbala nanompo Jehovah; fa koa fa nandeha fotoan̈a, iro vôly. Zen̈y nahavy Jesosy nivolan̈a tamindro: ‘Mifohaza anaro.’ Ino fampitandreman̈a azontsika baka amy zen̈y? Haintsika fa Jehovah tsy mety han̈adin̈a raha nataontsika. (Heb. 6:10) Kanefa, atsika tsy tokony hihevitry fa efa tsy mila manompo Jehovah eky atsika iziô, fotony efa nanompo izy atsika taloha. Marin̈y ndraiky fa mety efa tsy be karaha taloha eky raha vitantsika zioty. Kanefa mila mifen̈y fo atsika baka ho be atao aminy ‘asany Tômpo’, ke hanohy hiambin̈y ndreky hitandrin̈y fo atsika ziska  amy farany.​—1 Kor. 15:58; Mat. 24:13; Mar. 13:33.

8. Ino raha ianarantsika baka amy volan̈any Jesosy tamy fiangonan̈a ta Laodikia? (Apokalypsy 3:15-17.)

⁸ Vakia Apokalypsy 3:15-17. Atsika mila mafana fô ndreky manompo amy fô jiaby. Nan̈ino ma? Miniminia hely baka raha nandalo tamy fiangonan̈a ta Laodikia. Nampitovisiny Jesosy tamy rano “matimaty” iro, fotony iro kamo nanompo. Nohony akamoan̈andro zen̈y nahavy Jesosy nivolan̈a tamindro fa iro io ten̈a ‘nampahinakinaka salakady nampalahelo.’ Nila niezaka iro baka iro hafana fô sady hazoto hanompo Jehovah ndraiky. (Apok. 3:19) Ino raha ianarantsika baka amy zen̈y? Izikoa tsapanao fa efa tsy mazoto karaha taloha eky anao amy fanompoan̈a, diniha ino raha efa ataony Jehovah ndreky fandaminan̈anany han̈ampian̈a anao, avio miezaha hankasitraka raha aby zen̈y. (Apok. 3:18) Tsy iziô fotoan̈a hitsakarahantsika volabe na fiain̈ana mampiadan̈a, ke han̈anaovan̈a tsirambin̈y fanompoan̈a Jehovah.

9. Ino ma raha mila hiarivantsika, izikoa zahan̈a hafatra nalefany Jesosy tamy Kristianin̈y ta Pergamosy ndreky ta Tyatira?

⁹ Aza man̈ohatra mizaha na mitandren̈y fampianaran̈any pivadipinoan̈a foeky. Jesosy nan̈ady olo sasany tamy fiangonan̈a ta Pergamosy, fotony iro nan̈ano raha nahavy piaramanompo tao tsy hifankahazo ndreky namôron̈o sekty. (Apok. 2:14-16) Nidera iro Kristianin̈y ta Tyatira ndraiky izy, fotony iro tsy nan̈eky han̈araka ‘hevitry lalin̈y baka amy Satana’, avio izy nampirisiky iro ‘tsy hiala’ amy fahamarin̈ana. (Apok. 2:24-26) Nila nibebaka lan̈iany Kristianin̈y tsy niôrin̈y tsarabe, ke navoantsory nan̈araka fampianaran̈a diso. Akory ndraiky avahizo? Tsy maintsy mifen̈y atsika hanohitry fampianaran̈a jiaby tsy mifan̈araka amy fomba fihevitriny Jehovah. Iro olo pivadipinoan̈a aby io zahan̈a karaha pivavaka, kanefa ‘tsy hita amy raha ataondro aby iro pivavaka.’ (2 Tim. 3:5) Izikoa atsika mazoto mianatra Volan̈a Zan̈ahary, ho moramora amintsika hahay ino aby fampianaran̈a tsy marin̈y ndreky akory hatao hanohitry iro io.​—2 Tim. 3:14-17; Joda 3, 4.

10. Ino koa raha ianarantsika baka tamy raha nivolan̈iny Jesosy tamy fiangonan̈a ta Pergamosy ndreky ta Tyatira?

¹⁰ Aza man̈ano fitondranten̈a maloto na milefitry amy zen̈y foeky. Nisy problemo hafa koa tamy fiangonan̈a ta Pergamosy ndreky ta Tyatira tan̈y. Jesosy nan̈amia tsin̈y olo sasany tan̈ivony fiangonan̈a aby io, fotony iro nilefitry taminolo ratsy fitondranten̈a. (Apok. 2:14, 20) Ino raha ianarantsika baka amy zen̈y? Mety efa taon̈o maro nanompoantsika Jehovah,  na koa mety manan̈a tombontsoampanompoan̈a atsika iziô. Kanefa, izikoa atsika maloto fitondranten̈a, izy tsy mety hilefitry amy zen̈y. (1 Sam. 15:22; 1 Pet. 2:16) Tiany Jehovah hadio fitondranten̈a sady takiany han̈ano zen̈y fo atsika, ndray mahairatsy be karakory fitondranten̈anolo amy donia ty.​—Efes. 6:11-13.

11. Ino raha nianarantsika ziska iziô? (Zahava koa “ Fianaran̈a Azontsika amy Zioty.”)

¹¹ Fehiny raha jiaby zen̈y, mila alaintsika antoko fa ikeny Jehovah fanompoan̈antsika. Izikoa atsika man̈ano raha mety hahavy fanompoan̈antsika tsy ikeny, mila man̈ano raha malaky atsika han̈areman̈a ny tsy mety nataontsika. (Apok. 2:5, 16; 3:3, 16) Misy raha hafa koa namafisiny Jesosy tan̈atiny hafatra nalefany tamindro fiangonan̈a aby io. Zen̈y raha hidinihintsika iziô.

12. Ino ma raha ianarantsika baka amy raha nivolan̈iny Jesosy tamy Kristianin̈y ta Smyrna ndreky ta Filadelfia? (Apokalypsy 2:10)

¹² Atsika iziô handiniky hafatra nalefany Jesosy tamy fiangonan̈a ta Smyrna ndreky ta Filadelfia. Nivolan̈a tamindro Kristianin̈y aby tamy zen̈y izy fa iro tsy tokony havozo fan̈injehan̈a, fotony ho maro hatsaran̈a ho azondro baka amy Jehovah izikoa iro tsy mivadiky. (Vakia Apokalypsy 2:10; 3:10) Ino leson azontsika baka amy zen̈y? Efa ampoizintsika fa tsy maintsy ho hisy fan̈injehan̈a, ke mila vôn̈ono atsika hiaritry zen̈y. (Mat. 24:9, 13; 2 Kor. 12:10) Nan̈ino ma ten̈a matomboko fampahatsiarovan̈a zen̈y?

13-14. Ino vokatrany raha nandalo tantarainy Apokalypsy toko 12 tamy panompony Zan̈ahary?

¹³ Koran̈iny bokiny Apokalypsy fa tsy maintsy hiaritry fan̈injehan̈a panompony Zan̈ahary aminy ‘andrany Tômpo’; aminy andrantsika iziô zen̈y. Mivolan̈a Apokalypsy toko 12 fa niaraka Fanjakan̈any Zan̈ahary nifôron̈o tandan̈itry tan̈y, nisy lagera tan̈y. Mikaela ndreky tafikinany niady tamy Satana ndreky iro demony aby io. Tsy azovy Mikaela io fa Jesosy Kristy efa nahazo voninahitry. (Apok. 12:7, 8) Resy fahavalony Zan̈ahary aby io, ke iro io natsipy man̈odidin̈y faritry misy tany ty. Zen̈y mahavy olo jiaby ambony tany mijaly. (Apok. 12:9, 12) Ke ino ma vokatranizen̈y amy panompony Zan̈ahary?

¹⁴ Koran̈iny Apokalypsy koa baka tiô nan̈ano akory Satana izikoa fa natsipy tatỳ. Efa tsy afaka mengo andan̈itry eky izy, ke nampariny amy voahosotro mbala ambony tany eto helokonany, fotony iro io solonten̈any Fanjakan̈any Zan̈ahary sady ‘nirahin̈y hitory momba Jesosy.’ (Apok. 12:17; 2 Kor. 5:20; Efes. 6:19, 20) Akory nampatanteraka faminanian̈a io?

15. a) Azovy ma tiany Apokalypsy toko 11 koran̈iny amy ‘vavolombelon̈o aroe’ io? b) Ino raha nandalo tamindro?

¹⁵ Satana tsy vôly manafiky voahosotro rahalahiny Kristy. Fotony nan̈ino? Iro baka  mitariky asa fitorian̈a momba Fanjakan̈any Zan̈ahary. Iro izy koran̈iny bokiny Apokalypsy fa ‘vavolombelon̈o aroe’ nivonen̈a in̈y. * (Apok. 11:3, 7-11) Taminy 1918, valo tamy rahalahy nitariky fandaminan̈a tamy fotoan̈anizen̈y navoakaiky tamy tribinaly, fotony iro nan̈odianolo nan̈ano raha ratsy. Navoasazy tsy aradrariny higadra elabe iro. Ke maro olo nihevitry fa ‘naty’ na efa tsy hitohy eky asandro voahosotro aby io.

16. Ino raha tsy nampoizin̈y nandalo taminy 1919, kanefa ino raha mbala ataony Satana rango tamy zen̈y firaka zioty?

¹⁶ Mivolan̈a koa faminanian̈a aminy Apokalypsy toko 11 io fa hivilômin̈y ndraiky ‘vavolombelon̈o aroe’ io afaka fotoan̈a fôhiky. Tanteraka ma faminanian̈a io? Zen̈y ke, fotony ny raha tsy nampoizin̈y, taon̈o araiky tafara, nafaka gadra iro rahalahy voahosotro aby io. Tamy fanombohany taon̈o 1919 iro niboaka prizon, avio tafaranizen̈y nifoan̈ana aby raha jiaby nan̈odian̈a iro. Niaraka iro rahalahy aby io nafaka gadra, efa nanohy asa fitorian̈a ndreky fampianaran̈a edy iro. Fa Satana mbala tsy vôly manafiky vahoakany Zan̈ahary. Rango tamy zen̈y, nisesisesy fan̈injehan̈a ndreky fanoheran̈a alefany Satana amy panompony Jehovah, ke ampitovisiny Baiboly amy “ten̈arano” raha zen̈y. (Apok. 12:15) Zen̈y mahavy atsika tsiaraikiaraiky samby mila mifen̈y ‘haharidraha ndreky ho fatatra finoan̈a’ aby.​—Apok. 13:10.

17. Ino fan̈ampian̈a tsy nampoizin̈y nazony panompony Jehovah, ndray tiô fan̈injehan̈a nalefany Satana?

¹⁷ Koran̈iny Apokalypsy toko 12 fa hahazo fan̈ampian̈a iro olony Zan̈ahary aby io. Azovy han̈avotro iro? Tsy nampoizin̈y foeky fa tiô fo ‘nibian̈a tany sady nanelin̈y ten̈arano [na fan̈injehan̈a]’ in̈y. (Apok. 12:16) Ary zen̈y ankitin̈y raha nisy! Nanjary niaro vahoakany Zan̈ahary tapany sasany tamy doniany Satana, an̈isanizen̈y iro tamy fitsaran̈a. Matetiky vahoakany Jehovah nandresy tamy fitsaran̈a, ke nanjary libra ndraiky iro nanompo Jehovah. Nararaotindro fotoan̈a nampalibra iro zen̈y, ke nifen̈y angôvo jiaby iro nan̈ano asa nampan̈anôviny Jehovah iro. (1 Kor. 16:9) Ino aby raha tafiditry aminy asa zen̈y?

18. Ino ma asa maventy ataontsika aminy andra farany zioty?

¹⁸ Jesosy efa naminan̈y fa han̈ambara “vaovao tsara mikasiky Fanjakan̈any [Zan̈ahary]”  erantany antsendriky vahoakany Jehovah, zay vo avy farany donia ty. (Mat. 24:14) Azovy man̈ampy iro aminy asa fitorian̈a io? Anjely. Koran̈iny bokiny Apokalypsy fa iro anjely aby io mitondra “vaovao tsara mandrakizay hambara aminolo jiaby ambony tany, amy firenena jiaby, ndreky amy foko jiaby, ndreky amy karazan̈a fivolan̈ana jiaby, baka io amy vahoaka jiaby.”​—Apok. 14:6.

19. Ino koa hafatra hafa mila toriany lan̈ianolo tia Jehovah?

¹⁹ Tsy vaovao tsara momba Fanjakan̈any Zan̈ahary fo hafatra tsy maintsy hambarany panompony Jehovah. Koran̈iny Apokalypsy toko 8 firaka faha-​10 fa iro mila mitahitahy anjely aby io aminy asa fitorian̈a ataondro. Iro anjely aby io baka man̈ambara antambo handeha hahazo lan̈iany olo manohitry Fanjakan̈any Zan̈ahary. Zen̈y koa raha ataontsika Vavolombelon̈o Jehovah, fotony atsika man̈ambara didipitsaran̈any Jehovah amy raha jiaby mahafôron̈o doniany Satana. Ampitovisiny bokiny Apokalypsy aminy ‘havandra ndreky môtro’ hafatra momba didipitsaran̈a io. (Apok. 8:7, 13) Mila hainolo fa efa marikitry, ten̈a marikitry farany donia ty. Ke tsy maintsy man̈aova fomba fiain̈anandro iro, izikoa iro tiho avotro aminy andra han̈amparany Jehovah helokonany io. (Zef. 2:2, 3) Fa hafatra io halanolo. Ke tsy ho vitantsika foeky han̈ambara izio, izikoa atsika tsisy korazy. Hahaiho halanolo fo hafatra momba didipitsaran̈a io amy fahorian̈a be, ke ho meloko mifaotafaota iro.​—Apok. 16:21.

20. Ino raha hidinihintsika amy lahatsoratra aroe man̈araka?

²⁰ Ten̈a mila arehantsika ‘raha volan̈iny faminanian̈a’ aby amy bokiny Apokalypsy ao, fotony an̈isany man̈atanteraka izio atsika. (Apok. 1:3) Kanefa, akory havitantsika tsy hivadiky ndreky hasaky han̈ambara hafatra aby io fo ndray iô fan̈injehan̈a? Ty raha aroe han̈amia angôvo atsika: Voanalohany, haintsika akory hiafarandro fahavalony Zan̈ahary aby io, eraka raha koran̈iny bokiny Apokalypsy. Faharoe, haintsika koa fa, hisy raha tsara miambin̈y atsika izikoa atsika tsy mivadiky amy Zan̈ahary. Zen̈y raha hidinihintsika amy lahatsoratra aroe fan̈araka ty.