1-2. Nan̈ino ma toro lalan̈a sasany amy Baiboly ao manjary misy dikany maventy amintsika, izikoa fa miova fiain̈anantsika?

 IZIKOA fa misy olo aroe man̈ano mariazy, matetiky misy antipan̈ahy araiky man̈ano kabaro momba vadian̈a. Tsy vaovao amindro vady vao io foeky toro lalan̈a koran̈iny rahalahy io amy kabaro. Ndray izy aby, manjary misy dikany maventy amindro fan̈azavan̈a atao amizio. Ino antony? Komansy iô baka iro fivadiany, ke hahita fomba han̈arehan̈a iro toro lalan̈a aby io amy zay iro.

² Karaha zen̈y koa raha misy lera iro mananjanaka. Tan̈atiny taon̈otaon̈o, iro mety naharen̈y kabaro isankarazany man̈azava fomba fitarimian̈a tsaiky. Fa iziô, iro foeky handeha han̈araka iro toro lalan̈a aby io, fotony iro iziô misy tsaiky mila karakarain̈a. Tsy zanazanaka andraikitry izio. Izikoa fa miova fiain̈anantsika, manjary misy dikany maventy amintsika raha sasany koran̈iny Baiboly. Zen̈y antony araiky mahavy panompony Jehovah taloha tan̈y namaky Baiboly. Jehovah nan̈iraka panjakany Israely jiaby nifandimby hamaky Baiboly ndreky hangala onon̈o raha nivakiandro, isanandra, izikoa iro mbala velon̈o.​—Deot. 17:19.

3. Ino ma raha hidinihintsika ato?

³ Izikoa raimandreny anao, aleva onon̈o fa manan̈a andraikitry araiky maventy anao amy maha Kristianin̈y anao, tsy ino zen̈y fa mampianatra zanakanao raha momba Jehovah. Kanefa, tanjon̈onao tsy raha hampita fan̈azavan̈a momba Zan̈aharintsika fo, fa han̈ampy zanakanao ho tia izy amy fô jiaby. Ino raha mety hataonao beky ho latsaka an̈atiny fôny zanakanao fitiavan̈a Jehovah? Amy lahatsoratra ty, atsika handiniky toro lalan̈any Baiboly efatra mety han̈ampy anao han̈ano andraikitrinao, amy maha raimandreny anao. (2 Tim. 3:16) Hizahavantsika  ato koa fomba nan̈arehany raimandreny sasantsasany toro lalan̈a aby zen̈y.

4. Ino toro lalan̈a araiky man̈ampy raimandreny hampiditry fitiavan̈a Jehovah an̈atiny fôny zanakandro? (Jakoba 1:5)

⁴ Toro lalan̈a 1: Tadiava taridalan̈any Jehovah. Iangavia Jehovah han̈amia anao fahendrena ilainao, beky ho vitanao han̈ampy zanakanao ho tia Jehovah. (Vakia Jakoba 1:5.) Jehovah ny ten̈a mahay man̈amia torohevitry. Maro antony mahavy atsika mivolan̈a zen̈y fa aroe fo hidinihintsika. Voanalohany, tsisy raimandreny mahay mitarimy zanaka mandilatra Jehovah. (Sal. 36:9) Faharoe, mahatsara atsika fo torohevitrinany, fotony feno fahendrena.​—Isaia 48:17.

5. a) Ino aby raha efa namezany fandaminan̈any Jehovah han̈ampian̈a raimandreny? b) Izikoa dinihin̈y video momba Rahalahy ndreky Ranabavy Amorim, ino raha nianaranao baka tamy fomba nitarimiandro zanakandro?

⁵ Jehovah mampiasa Baiboly ndreky fandaminan̈anany han̈amezan̈a hanin̈y arapan̈ahy isankarazany, beky raimandreny hahavita han̈ampy zanakandro ho tia Jehovah. (Mat. 24:45) Ohatra iziô, maro fan̈azavan̈a mety ho hitanao aminy andiandahatsoratra “Raha Mahatsara Fianakavian̈a.” Maro amy lahatsoratra amizio ao efa niboaka tamy gazety Mifohaza!, ndreky amy jw.org. Ao misy video maro natao han̈ampian̈a raimandreny han̈araka toro lalan̈any Jehovah, lera iro mitaiza zanakandro. *​—Ohab. 2:4-6.

6. Ino raha nivolan̈iny lohany fianakavian̈a araiky momba taridalan̈a nazondro baka tamy fandaminan̈any Jehovah?

⁶ Maro raimandreny mivolan̈a fa iro ten̈a mankasitraka fan̈ampiany Jehovah iro, fotony izy nampiasa fandaminan̈anany. Manambady amanjanaka i Joe. Karaha ty ho izy: “Tsy mora mitarimy tsaiky telo amy fahamarin̈ana zen̈y. Ke zahay roeny vadiko mivavaka fo beky Jehovah han̈ampy zahay. Izikoa fa misy problemo, iô fo misy lahatsoratra na video miboaka amy fotoan̈a ilanay izy. Mitady taridalan̈any Jehovah zen̈y efa fomba fiain̈ananay.” Tsapany Joe ndreky vadiny fa iro lahatsoratra ndreky video aby io ten̈a man̈ampy zanakandro hinaman̈a amy Jehovah.

7. Nan̈ino ma raimandreny ten̈a mila miezaka ho modely tsara? (Romanina 2:21)

 ⁷ Toro lalan̈a 2: Mifen̈a ho modely arehany zanakanao. Iro tsaiky aby io mandiniky raha ataony olobendro, ary matetiky raha hitandro ataony olobendro fo alaindro tahaka. Marin̈y ndraiky fa tsisy raimandreny lavorary zen̈y. (Rom. 3:23) Kanefa, raimandreny mila man̈ano zay vitandro beky iro hanjary modely tsara arehany zanakandro. (Vakia Romanina 2:21.) Karaha ty raha nambarany baba araiky momba iro tsaiky aby io: “Iro io miran̈a eponzy. Zay raha man̈odidin̈y izy tsitsefiny.” Karaha ty koa ho izy: “Tsy maintsy hivolan̈indro amintsika fo izikoa atsika tsy man̈araka raha nampianarintsika iro.” Izikoa tiantsika ho tia Jehovah iro zanakantsika aby io, mila hita amy raha ataontsika fa ten̈a tia Jehovah ankitin̈y atsika.

8-9. Ino raha nianaranao baka tamy raha nivolan̈iny Andrew ndreky Emma?

⁸ Ino aby raha mety hataony raimandreny han̈ampian̈a zanakandro ho tia Jehovah? Maro fomba mety han̈anaovan̈a zen̈y. Diniha baka raha nivolan̈iny Andrew, rahalahy kadiriny 17 taon̈o ty: “Ampodimpodiniry olobeko aminaka fa ten̈a ilain̈a mivavaka amy Jehovah isanandra. Isaka alin̈y, papako mivavaka miaraka aminaka, ndray efa baka nivavaka manokan̈a zaho. Matetiky iry olobeko mampatsiaro zahay roeny anabaviko karaha ty: ‘Anaro mety mikoran̈a amy Jehovah amy fotoan̈a jiaby tianaro.’ Nanjary raha ten̈a maventy aminaka vavaka. Ke tsy sarotro aminaka foeky mikoran̈a amy Jehovah. Izioty, tsy Baba fo fahitako Jehovah fa ten̈a tsapako fitiavany zaho.” Raimandreny, aleva onon̈o fo fa, fitiavanao Jehovah han̈ampy zanakanao ho tia izy koa.

⁹ Karaha ty koa tantarany Emma. Aroe mirahavavy iro zanakany babandro ndreky mamandro. Fa iro baka tiô nialàny babandro. Tsy vitanizen̈y fo fa nisy trosa be koa nambelany babandro ke tsy maintsy nifainy mamandro. Karaha ty nambarany Emma: “Misy fotoan̈a mamanay ten̈a tsisy vola, fa namezany toky fo zahay fa Jehovah mikarakara panomponany. Hitako tamy fomba fiain̈ananany fa ten̈a ninoany raha zen̈y. Ampihariny aby zay raha ampianariny.” Ino fianaran̈a azontsika baka amy zen̈y? Raimandreny ndray mandalo raha sarotro, mbala afaka mampianatra zanany fo, amy raha ataony.​—Gal. 6:9.

10. Lera karakory aby iro raimandreny israelita aby io nahavita nikoran̈a raha momba Jehovah tamy zanakandro? (Deoteronomia 6:6, 7)

¹⁰ Toro lalan̈a 3: Mikoràn̈a matetiky amy zanakanao. Jehovah nan̈iraka iro Israelita aby io hampianatra zanakandro raha momba izy, sady han̈ano zen̈y matetiky. (Vakia Deoteronomia 6:6, 7.) Iro raimandreny tamy zen̈y nahita fomba maro mety nikoran̈ana tamy zanakandro, ndreky nampianaran̈a zanakandro ho tia Jehovah. Karaha ataony tsaiky lelahy iziô mety niaraka tamy babany nitsabo na nitatitry vokatra izikoa fa lera fijinjan̈a. Ny tsaiky man̈angy ndraiky mety nandany lera maro nan̈ampian̈a mamandro nanjaitry, nanasa ndreky nanapy lamba, avio taminy asa hafa amy fiain̈ana andavanandra. Miaraka miasa fo raimandreny ndreky zanaka, ke iro afaka mikoran̈a raha isankarazany. Azony raimandreny tamy zen̈y natao iziô nikoran̈a tamy zanakandro fa tsara i Jehovah, avio izy ten̈a mikarakara fianakavian̈andro.

11. Amy zioty, lera karakory raimandreny afaka mikoran̈a amy zanakandro?

¹¹ Efa tsy karaha zen̈y eky fiain̈ana amy zioty. Amy tany maro, an̈atiny andra araiky, hely fo fotoan̈a hiarahany raimandreny ndreky zanaka. Raimandreny mandeha miasa, fa tsaiky ndraiky mandeha a lekaoly. Ke raimandreny tsy maintsy mitady hevitry beky iro hahita fotoan̈a  hikoran̈ana amy zanakandro. (Efes. 5:15, 16; Fil. 1:10) Fomba araiky mety han̈anaovan̈a zen̈y iziô lera fianakavian̈a man̈ano fotoampivavahan̈a. Karaha ty nambarany Alexander, rahalahy tanora araiky: “Papako tsy maintsy mitariky fotoampivavahan̈any fianakavian̈a fo. Tsisy raha ambelany hisakan̈a zahay tsy han̈ano izio. Koa fa vita izio, zahay miaraka mikoran̈a.”

12. Ino raha mila alainy lohany fianakavian̈a onon̈o, lera izy mitariky fotoampivavahan̈any fianakavian̈a?

¹² Izikoa anao lohany fianakavian̈a, ino raha mety hataonao beky ho ravoravo fo zanakanao isaka anaro man̈ano fotoampivavahan̈any fianakavian̈a? Anaro mety mampiasa boky vaovao Mankafiza Fiain̈ana Tsisy Farany! in̈y. Tsara boky io fotony koran̈a fo ten̈a be amizio ao. Izikoa tianao zanakanao hikoran̈a raha an̈atiny fônany ndreky raha mampiasaloha izy, tsy amy lera fan̈anaovan̈a fotoampivavahan̈a anao mikritìky na man̈itsy izy. Izikoa zanakanao nitantara raha kanefa tsy mifan̈araka amy toro lalan̈any Baiboly raha volan̈iny, aza direkty siahan̈a izy. Ankasitraha izy nivolan̈a raha tan̈atiny fônany, avio ameza toky zanakanao fa afaka mikoran̈a zay raha tiany koran̈iny izy. Ho moramora aminao han̈ampy zanakanao izikoa hainao raha an̈atiny jerinany.

13. Lera karakory koa raimandreny mety mampianatra zanakandro han̈aton̈o Jehovah?

¹³ Raimandreny, mitadiava hevitry han̈ampianao zanakanao han̈aton̈o Jehovah. Aza miambin̈y lera fampianaranao izy Baiboly fo vo hampianatra izy raha momba Jehovah Zan̈aharintsika be fitiavan̈a io. Karaha ty nambarany renimpianakavian̈a araiky, Lisa an̈arany: “Ampiasainay aby zay raha hitanay man̈odidin̈y zahay hampianaran̈a zanakanay raha momba Jehovah. Ohatra, zahay koa fa mahita amboa mikidikidy amy zanany, direkty koran̈inay amindro fa Jehovah io Zan̈ahary ravoravo, ke man̈ano raha izy beky atsika ho sambatra ndreky ho ravoravo koa fa mahita raha mampitokiky aby io.”

14. Nan̈ino ma raimandreny ten̈a mila man̈ampy zanakandro hahay hifidy naman̈a? (Ohabolana 13:20)

¹⁴ Toro lalan̈a 4: Ampia zanakanao hahay hifidy naman̈a. Mazava raha koran̈iny Volan̈a Zan̈ahary. Misy vokany amintsika  kamaradintsika. Mety ho tsara vokany na ho ratsy. (Vakia Ohabolana 13:20.) Raimandreny, asa mba hainao azovy aby kamaradiny zanakanao? Asa anao mba efa nifanôjy tamindro na niaraka tamy sasany tamindro? Ino raha mety hataonao beky olo tia Jehovah fo kamaradiny zanakanao? (1 Kor. 15:33) Izikoa zanakanao tianao hahazo kamarady tsara, tahaoma han̈ano raha miaraka amy fianakavian̈anao olo manan̈a fifandraisan̈a tsara amy Jehovah.​—Sal. 119:63.

15. Ino raha mety hataony raimandreny baka zanakandro hahay hifidy kamarady?

¹⁵ Iritrireta hely baka tantarany baba araiky ty, Tony an̈arany. Nifen̈y iro fivadiany nan̈ampy zanakandro hahay hifidy kamarady. Karaha ty ho izy: “Tan̈atiny taon̈o maro, isankarazany rahalahy ndreky ranabavy, na tanora zen̈y na matoe, niainvitenay tantran̈onay. Ndraiky zahay miaraka mihinan̈a, fa misy fotoan̈a koa iro kahianay miaraka man̈ano fotoampivavahan̈a aminay. Zen̈y fomba ten̈a tsara ahaizan̈a iro olo tia Jehovah sady ravoravo manompo izy aby io. Maro hatsaran̈a nazonay, zahay koa fa nan̈ano karibo antran̈o piandraikitry faritry, misionera avio olo hafa. Ten̈a nisy vokany tsara tamy zanakanay sady nan̈ampy iro ho tia Jehovah tantarandro io, ndreky hafanampôndro amy fanompoan̈a avio lay iro mahafoe ten̈a.” Irarian̈a anaro raimandreny ho tapakevitry han̈ampy zanakanaro hahay hifidy kamarady.

16. Ino raha tsy tokony hadin̈any raimandreny izikoa zanakanany mivolan̈a fa tsy tihanompo Jehovah?

¹⁶ Akory ndraiky izikoa efa nifen̈y mare anao nan̈ampy zanakanao aby io ho tia Jehovah, kanefa araiky amindro mivolan̈a fa izy tsy tihanompo Jehovah? Izikoa zen̈y raha misy, aza mieritreritry foeky anao fa anao tsy mahay mitarimy. Atsika jiaby io, an̈isanizen̈y iro zanakantsika aby io, samby namezany Jehovah safidy malalaka: Na atsika hanompo izy na tsy hanompo. Ke izikoa zanakanao mifidy tsy hanompo Jehovah, aza rivan̈a fa mbala mety himpody amy Jehovah fo izy andra araiky an̈y. Aleva onon̈o baka fan̈oharan̈a momba zanaka adala in̈y. (Lioka 15:11-19, 22-24) Nan̈ano raha farany ratsy manafolahy io, kanefa tamy farany,  izy mbala nimpody fo. Mety hisy olo hivolan̈a: “Raha fan̈oharan̈a io. Raha mba pôsibla ho hisy edy zen̈y?” Zen̈y ke! Karaha zen̈y iziô tsaiky lelahy araiky, Elie an̈arany.

17. Nan̈ino ma tantarany Elie io ten̈a mankahery anao?

¹⁷ Karaha ty nambarany Elie momba iry olobeny: “Nifen̈y iro nan̈ampy zaho ho tia Jehovah ndreky Volan̈anany. Fa zaho koa fa kadiriny 15 taon̈o, zaho nanomboko tsy nan̈araka malondro.” Nanomboko naditry izy fa nasitriny iry olobeny fo raha zen̈y. Avio iry olobeny koa fa nifen̈y nan̈ampy izy han̈araka fahamarin̈ana, tsy nahoany foeky. Koa fa nandeha fotoan̈a, izy niala tantran̈o avio izy nanjary ratsy fitondranten̈a. Nisy lera i Elie mba nikoran̈a raha amy Baiboly taminiry kamaradiny. Fa ho izy karaha ty: “Arakarakany nikoran̈ako raha momba Jehovah tamindry namako, nanjary nieritreritry momba Jehovah fo zaho. Nanomboko naniry tan̈atiny fônaka tao voany fahamarin̈ana natsabondry olobeko ela jiaby zay. Namandraha nifoha zaho, fotony nitombo tan̈atiny fônaka tao izio.” Tantsefatsefaka zen̈y, nimpody tamy fahamarin̈ana ndraiky i Elie. * Haravoan̈a ma niniry olobeny! Tsy nanen̈iny foeky iro nifen̈y nampianatra zanakandro raha momba Jehovah, rango iro tsaiky aby io mbala hely.​—2 Tim. 3:14, 15.

18. Ino raha tsapanao izikoa fa mahita raimandreny mifen̈y mare man̈ampy zanakandro ho tia Jehovah?

¹⁸ Raimandreny, manan̈a tombontsoa miavaka anaro, tsy ino zen̈y fa man̈ampy zanakanaro hanjary panompony Jehovah. (Sal. 78:4-6) Tsy mora izio, ke ten̈a midera anaro zahay fotony tsy kajo foeky anaro man̈ampy zanakanaro! Izikoa anaro man̈ano erakany vitanaro han̈ampian̈a zanakanaro ho tia Jehovah ndreky han̈araka volan̈anany, matokisa anaro fa ho ravoravo i Jehovah, Babantsika be fitiavan̈a io.​—Efes. 6:4.