1-2. a) Koa Salamo 37:3, 4 zahan̈a, nan̈ino ma olo vo nan̈ano mariazy mila matoky Jehovah? b) Ino raha hidinihintsika ato?

EFA marikitry ma mariazinaro, sa anaro vo vita mariazy? Izikoa zen̈y, hay be fa tianao ho sambatra fo anao ndreky olo tianao io. Marin̈y ndraiky fa tsy mandeha ho azy fiain̈ananolo manambady. Tsy maintsy misy fo fanapahankevitry maventy ataonaro. Miankiny amy fanapahankevitrinaro ndreky fomba handaminanaro problemo hampasambatra anaro roe, an̈atiny taon̈o maro mbala ho avy. Izikoa anaro matoky Jehovah, anaro han̈ano fanapahankevitry tsara, ho fatatra vadian̈anaro, avio anaro ho sambatra. Fa izikoa ndraiky anaro tsy man̈araka torohevitriny Zan̈ahary, ho tôjy problemo anaro. Tara hely, hiady anaro ke tsy ho sambatra.—Vakia Salamo 37:3, 4.

² Olo vo niditry amy vadian̈a ny ten̈a koran̈iny lahatsoratra ty. Fa ndray zen̈y, hikoran̈a raha sarotro fohitanolo jiaby manambady koa izity. Maro lelahy ndreky man̈angy tsy mivadiky, taloha tan̈y ndreky aminandra izioty, ke ten̈a modely tsara. Handiniky raha niain̈andro atsika, avio ho hitantsika ato lafiny sasany mety hangalantsika tahaka iro, an̈isanizen̈y raha momba tokantran̈o.

3-4. Ino aby raha mety hanahiran̈a vady vao?

³ Olo sasany mety hampirisiky olo vo vita mariazy hanan̈a fiain̈ana mitovy aminolo jiaby. Raimandreny ndreky havan̈a iziô mety hiforse iro hiteraka malakilaky. Kamarady ndreky lafamỳ koa mety hampirisiky iro hivanga tran̈o ndreky entan̈a maro, amy zen̈y iro tsy sahiran̈a.

⁴ Ke izikoa vady vao tsy mitandrin̈y, iro mety hanapakevitry hitraosa foeky. Tsy maintsy hamono ten̈a hiasa iro roe han̈ifan̈a traosa aby io. Ke ndray fotoan̈a han̈anaovandro fianaran̈a manokan̈a, fotoampivavahan̈any fianakavian̈a, avio fanompoan̈a mety efa tsy ho hisy eky. Mety hanapatapaka fivorian̈a koa iro, fotony tsy maintsy mampitombo lera iasan̈a amy zen̈y mitombo vola midriky, na amy zen̈y iro tsy ho afaka asa ke ho voaefandro volanolo. Tsy hahavita hampitombo fanompoan̈a foeky iro izikoa man̈ano zen̈y. Kanefa tsisy raha mamparavoravo mandilatra fanompoan̈a!

5. Ino raha ianaranao baka amy Klaus ndreky Marisa?

⁵ Maro tantara ahitan̈a fa tsy fanan̈ana ny raha ten̈a maventy ndreky mampasambatra. Zen̈y iziô raha tsapanolo fivadiany ty, Klaus ndreky Marisa. * Iro koa fa vita mariazy, iro roe samby niasa manôfotro andra. Nahazo volabe iro avio maro raha nanan̈andro. Kanefa ny raha nisy, tsy nahafapô iro fiain̈anandro. Ho Klaus: “Tsisy raha tsy nanan̈anay, izikoa tsy raha araiky fo: Tanjon̈o arapan̈ahy. Ny marin̈y aminany, nitombo asalohanay avio nahaisarotro fo fiainan̈anay.” Asa anao mba karaha zen̈y? Izikoa anao an̈isanolo nitady vola mare kanefa tsy sambatra, aza rivan̈a. Mila mandiniky raha tsara nataonolo hafa anao, baka anao hahavita hiova. Alô antsendriky atsika handiniky raha mety hianarany lelahy manambady baka amy raha nataony Panjaka Josafata.

6. Akory nan̈arehany Josafata toro lalan̈a aminy Ohabolana 3:5, 6, izy koa fa tôjy problemo maventy?

⁶ Lelahy manambady ma anao? Hitanao sarotro mare ma man̈ano andraikitrinao aby io ndraikindraiky? Izikoa zen̈y, mety hahatsara anao mandiniky tantarany Panjaka Josafata. Panjaka izy, ke andraikitrinazy niaro vahoakanany. Akory nahavitany andraikitry be zen̈y? Nan̈ano zay vitany izy niaro vahoakanany. Nankafatariny tanànany Joda avio namory maramila mandilatra 1 160 000 koa izy. (2 Tan. 17:12-19) Izikoa fa nandeha fotoan̈a, nisy raha nanahiran̈a i Josafata mare. Nisy maramila marobe navy hanafiky izy ndreky ry havany avio vahoakanany aby io. Tsy azovy zen̈y fa Amonita, Moabita avio iro lelahy baka amy faritry feno bongo ta Seira. (2 Tan. 20:1, 2) Ino raha nataony Josafata? Nangataka fan̈ampian̈a ndreky angovo tamy Jehovah izy. Mifan̈araka tsara amy torohevitry feno fahendrena aminy Ohabolana 3:5, 6  raha nataony zen̈y. (Vakia.) Hita tamy vavaka nataony Josafata amy 2 Tantara 20:5-12 ao fa nanetry ten̈a izy, sady ten̈a natoky Babany be fitiavan̈a andan̈itry an̈y. Akory nataony Jehovah namaly vavakany Josafata?

7. Akory nataony Jehovah namaly vavakany Josafata?

⁷ Jehovah nan̈iraka Jahaziela hitondra volan̈anany tamy Josafata. Levita i Jahaziela io. Karaha ty nambarany Jehovah: “Anaro tsy mila miady. Samia anaro mangala toeran̈a ke mitsangana tsara fo, baka io zahava famonjiany Jehovah anaro.” (2 Tan. 20:13-17) Karaha hafahafa toromariky zen̈y aminolo handeha lagera! Ndray zen̈y, tsy olombelon̈o nan̈amia toromariky io fa Jehovah. Natoky Jehovah Zan̈aharinany i Josafata, ke nataony aby raha jiaby nan̈irahan̈a izy. Josafata ndreky olonany koa fa handeha hiady tamindro fahavalo aby io, tsy maramila efa ten̈a zatra ady nalefany farany aloha tamy tafikinany fa lelahy pihira ndraiky! Ndray raha findesin̈y miady fo tsisy tamindro pihira aby io! Kanefa, resy tsarabe iro fahavalo aby io, eraka raha efa nambarany Jehovah tamy Josafata.—2 Tan. 20:18-23.

8. Ino raha ianarany lelahy manambady baka amy raha nataony Josafata?

⁸ Ino raha ianarany lelahy manambady baka amy raha nataony Josafata? Mety efa miezaka mare anao miaro ndreky man̈ampy fianakavian̈anao fotony zen̈y andraikitrinao. Mety efa zatra mamaha problemo koa anao. Ndray zen̈y, aza matoky ten̈a. Anao mila mivavaka manokan̈a amy Jehovah. Iangavia izy han̈ampy anao. Sôsoko zen̈y koa, miaraha mivavaka amy vadinao. Mitadiava taridalan̈a baka amy Jehovah, ke ianara Baiboly ndreky boky naboakany fandaminan̈a. Areha torohevitry hitanao ao, baka io man̈anaova fanapahankevitry mifan̈araka amy Soratra Masin̈y. Mety tsy ho tianolo fanapahankevitrinao, avio mety hivolan̈a foeky iro fa anao very jery. Mety hivolan̈a koa iro fa ho sambatra anao ndreky fianakavian̈anao izikoa manambola ndreky manandraha. Kanefa tsaraova raha nataony Josafata. Naboakany Josafata tamy raha nataony fa natoky Jehovah izy. Tsy hiala anao koa Jehovah, karaha nataony tsy nan̈ary lelahy tsy mivadiky io. (Sal. 37:28; Heb. 13:5) Ino raha mila ataonolo fivadiany baka iro ho sambatra?

9. Ino raha mety koran̈intsika momba paminan̈y Isaia ndreky vadiny?

⁹ Niodikodin̈y tamy fanompoan̈a Jehovah fo fiain̈anany Isaia ndreky vadiny. Isaia lastio paminan̈y, avio madamonany koa koran̈iny Baiboly fa ‘paminan̈ivavy.’ Mety nirahiny Jehovah nan̈ambara hafatranany koa donko vadiny Isaia. (Isaia 8:1-4) Nataondro voalohantoeran̈a tamy fiain̈anandro fo fanompoan̈a Jehovah. Ino raha mety hianaranolo fivadiany baka amy zen̈y?

10. a) Ino raha mila ataonolo fivadiany? b) Nan̈ino raha zen̈y han̈ampy iro han̈ano voalohantoeran̈a fanompoan̈a Jehovah?

¹⁰ Olo fivadiany aminandra izioty tokony hangala tahaka Isaia ndreky vadiny, ke han̈ano zay vitandro amy fanompoan̈a Jehovah. Mila ankafatarindro fatokisandro Jehovah. Dikanizen̈y, olo fivadiany mila mazoto miaraka mianatra faminanian̈a amy Baiboly, avio mila dinihindro akory mampatanteraka faminanian̈a aby io amy zioty. (Tit. 1:2) Tsara iritriretindro koa raha mety hataondro han̈atantirahan̈a faminanian̈a sasany amy Baiboly ao. Azondro atao, ohatra, man̈atanteraka faminanian̈a nambarany Jesosy momba fitorian̈a vaovao tsara amy tany jiaby, alohany  haviany farany. (Mat. 24:14) Arakarakany mamparesy lahatra iro fivadiany fa tanteraka ankitin̈y faminanian̈a aby io, hahavy iro ho tapakevitry han̈ano ny farany be vitandro amy fanompoan̈a Jehovah.

11. Ndray niova tampoko fiain̈anany Prisila ndreky Akoila, mbala nahavita nan̈ino fo iro? Ino antony?

¹¹ Ino raha ianarany vady vao baka amy Prisila ndreky Akoila? Jiosy iro, fa iro fo nipetraka ta Roma. Iro koa fa naharen̈y vaovao tsara mikasiky Jesosy, iro nanjary kristianin̈y. Hay be fa nahafapô iro fiain̈anandro. Niroasiny Panjaka Klaodio niala ta Roma Jiosy jiaby nipetraka tan̈y, ke niova tampoko fiain̈anany Prisila ndreky Akoila. Miniminia baka! Iro tsy maintsy niala tany nahazatra iro, avio nifindra tantany hafa. Tsy maintsy nitady tran̈o nipitrahan̈a iro, avio nitady asa ndraiky. Nanjary tsy nazoto nanompo Jehovah ma iro fotony tiô raha sarotro aby zen̈y? Mety efa haihainao fo valiny. Iro koa fa navy ta Korinto, tany nifindrandro io, iro direky nan̈ampy fiangonan̈a tao avio iro niaraka niasa taminy apostoly Paoly nankafatatra finoan̈any piaramanompo tao. Tafara tatỳ, nifindra tantany hafa mbala nila pitory maro koa iro. (Asa 18:18-21; Rom. 16:3-5) Maro fitahian̈a nazondro, ke nahatsiaro sambatra mare iro roe fivadiany!

12. Nan̈ino ma olo fivadiany mila manan̈a tanjon̈o arapan̈ahy?

¹² Mangala tahaka Prisila ndreky Akoila koa olo fivadiany izikoa Fanjakan̈any Zan̈ahary fo ataondro voalohantoeran̈a amy fiain̈anandro. Alohany mariazy, an̈atiny iro mbala mifampizaha toetry in̈y, iro efa mila mikoran̈a momba tanjon̈ondro amy fanompoan̈a edy. Karaha io, lera iro vita mariazy, iro samby miezaka hanakatra tanjon̈o aby io, ke tsy ho sarotro amindro hahita fomba an̈ampiany Jehovah iro. (Mpito. 4:9, 12) Zen̈y raha nataony Russell ndreky Elizabeth. Ho Russell: “Rango zahay mbala nifampizaha toetry, efa nikoran̈a momba tanjon̈onay amy fanompoan̈a edy zahay.” Volan̈iny Elizabeth: “Efa nidinihinay tsialohaloha raha tianay hatao amy fiain̈ananay, amy zen̈y zahay koa fa manapakevitry afarafara an̈y, ataonay mifan̈araka amy  tanjon̈onay fo safidinay.” Baka tamy zen̈y nahavy iro nahavita nifindra ta Micronésie, tany mbala nila pitory maro.

13. Izikoa dinihin̈y raha koran̈iny Salamo 28:7, ino raha ho hisy izikoa atsika matoky Jehovah?

¹³ Karaha Russell ndreky Elizabeth in̈y, maro koa olo fivadiany nanapakevitry hanan̈a fiain̈ana tsotra, beky iro afaka mandany fotoan̈a be aminy asa fitorian̈a ndreky fampianaran̈a. Izikoa olo fivadiany manan̈a tanjon̈o amy fanompoan̈a, avio iro samby mifen̈y manakatra tanjon̈ondro, ho maro hatsaran̈a ho azondro. Ho hitandro fomba ikarakarany Jehovah iro, ke hitombo fatokisandro izy, avio ho sambatra ankitin̈y iro.​—Vakia Salamo 28:7.

14. Akory nahitan̈a fa natoky fampan̈antinan̈any Jehovah i apostoly Petera ndreky vadiny? (Matio 6:25, 31-34)

¹⁴ Misy raha koa ianaranolo fivadiany baka aminy apostoly Petera ndreky vadiny. Kadiriny tsiota fanjava na taon̈o araiky tafarany nifanojoany voanalohany tamy Jesosy, nisy fanapahankevitry maventy tsy maintsy nataony apostoly Petera. Pan̈arato asany Petera. Ke Jesosy koa fa nitaon̈o Petera han̈araka izy amy fotoan̈a jiaby, tsy maintsy nidinihiny Petera akory fomba amilaomany fianakavian̈anany. (Lioka 5:1-11) Petera nifidy han̈ano asa fitorian̈a niaraka tamy Jesosy. Tsara fanapahankevitrinany zen̈y! Ary hay be fa nikeny vadiny fanapahankevitrinany. Koran̈iny Baiboly fa tafarany Jesosy nivilôminy Jehovah in̈y, mety niaraka tsindraikindraiky tamy Petera donko vadiny io tamy dia misionera nataony. (1 Kor. 9:5) Ary matoa Petera nasaky nan̈amia torohevitry lelahy manambady ndreky viavy manambady, dikanizen̈y, ten̈a modely tsara vadiny. (1 Pet. 3:1-7) Hitantsika baka amy zen̈y fa na Petera na vadiny, samby natoky fampan̈antinan̈any Jehovah. Ino ma zen̈y? Han̈amia raha ilaindro fo Jehovah izikoa Fanjakan̈anany ny raha ataondro amy plasy voanalohany.​—Vakia Matio 6:25, 31-34.

15. Ino raha ianaranao baka amy Tiago ndreky Esther?

¹⁵ Mety efa refindrefin̈y donko vadian̈anaro. Kanefa, ino raha han̈ampy anaro han̈iry hampitombo fanompoan̈a fo? Voanalohany, aleva tahaka raha nataonolo hafa manambady. Karakory ma zen̈y? Vakia tantaranolo fivadiany nahavita nampitombo fanompoan̈a. Hahita sasany amy zen̈y anao izikoa fa mamaky andiandahatsoratra karaha ataony “Nahafoy Tena Izy Ireo”, amy Ny Tilikambo Fiambenana. Nahita hatsaran̈a baka taminy andiandahatsoratra aby io Tiago ndreky Esther, fivadiany mipetraka a Brezily. Lahatsoratra aby io nan̈ampy iro han̈iry hanompo amy tany mbala mila pitory. Karaha ty ho Tiago: “Zahay koa fa namaky tantara aby io, hitanay fomba nan̈ampiany Jehovah panomponany tsy mivadiky aminandra izioty, ke nanjary tianay ho hita koa tan̈any Jehovah mitariky zahay ndreky mikarakara zahay.” Nanomboko tamy 2014, iro nifindra ta Paragoay tamy fiangonan̈a miteny portigey. Karaha ty koa ho Esther: “Ty andininteny araiky ten̈a tianay: Efesianina 3:20. Tanteraka taminay volan̈a aby ao, ary matetiky koa.” Amy taratasy nisoratiny Paoly tamindro Kristianin̈y ta Efesosy, nan̈amia toky izy fa mandilatrany raha angatahintsika raha hamiany Jehovah atsika. Ary zen̈y ankitin̈y ny raha misy!

16. Mety mangataka torohevitry aminjovy aby ma tanora manambady, izikoa iro tihanakatra tanjon̈o amy fanompoan̈a?

¹⁶ Maro panompony Jehovah nianatra nilampy tamy Jehovah. Ke hahita hatsaran̈a tanora manambady izikoa mandiniky modelindro. Sasany amindro io nanompo manontolo  andra tan̈atiny taon̈o maro. Izikoa misy tanjon̈o tianaro takarin̈y, mangataha torohevitry amindro. Zen̈y koa fomba mety han̈aboahanaro fa anaro ten̈a matoky Jehovah. (Ohab. 22:17, 19) Antipan̈ahy koa afaka man̈ampy tanora manambady hanan̈a tanjon̈o arapan̈ahy.

17. Nan̈ano akory ma i Klaus ndreky Marisa, baka io ino raha ianarantsika baka amy tantarandro?

¹⁷ Ndraikindraiky, mety efa misy tanjon̈o tiantsika takarin̈y, kanefa mety ho hafa tanteraka raha tiany Jehovah hampan̈anôvin̈y atsika. Zen̈y iziô raha niain̈any Klaus ndreky Marisa, nikoran̈intsika tamy voanalohany tarỳ in̈y. Telo taon̈o tafarany mariazindro, nialandro tran̈ondro baka io iro nan̈ano asa antsitrapô tamy tetikasa fan̈oren̈ana sampan̈any Failandy. Haindro tafara tatỳ fa tsy afaka nidôko tan̈y mandilatrany tsiota fanjava iro. Diso fan̈antinan̈a hely iro tamy voanalohany. Kanefa tsy ela tafaranizen̈y, iro navoakaiky hianatra teny arabo, ke iro iziô ravoravo manompo antany hafa mampiasa volan̈a arabo. Marisa koa fa mahatsiaro raha aby zen̈y, karaha ty ho izy: “Navozo hely zaho tamy voanalohany nan̈ohatra raha mbala tsiary nataoko, ke ten̈a nila natoky Jehovah zaho. Kanefa, hitako fa nan̈ampy zahay tamy fomba tsy nampoizinay i Jehovah.” Ino raha ianarantsika baka amy tantara io? Mety matoky atsika fa tsy maintsy han̈amia hatsaran̈a atsika fo Jehovah, izikoa atsika matoky izy amy fô jiaby.

18. Ino raha mila ataonolo fivadiany baka iro hatoky Jehovah fo?

¹⁸ Vadian̈a io kadô baka amy Jehovah. (Mat. 19:5, 6) Tiany Jehovah ho ravoravo amy kadô namezany io olo manambady. (Ohab. 5:18) Mbala tanora ma anaro fivadiany? Diniha akory fomba ampiasanaro fiainan̈anaro. Man̈ano zay vitanaro ma anaro han̈aboahan̈a amy Jehovah fa ankasitrahanaro aby raha jiaby namezany anaro? Izikoa anaro ten̈a mankasitraka Jehovah, koràn̈a aminany raha zen̈y lera anaro mivavaka. Mitadiava torolalan̈a amy Baiboly mety arehanaro amy fiain̈ananaro. Avio areha torohevitry amezany Jehovah anaro. Matokisa fa ho sambatra anaro avio ho maro hatsaran̈a ho azonaro izikoa miodikodin̈y amy fanompoan̈a Jehovah fo fiain̈ananaro!