1. Ino ma raha tsapanolo manan̈a havan̈a voaroaka?

MISY havanao na kamaradinao ma voaroaka? Ten̈a mampalahelo zen̈y! Karaha ty ho Ranabavy Hilda: * “Vadiko koa fa naty, nihevitry zaho fa tsisy raha mafimafinizen̈y eky. Efa 41 taon̈o baka vadian̈anay. Tsy nivadiky foeky izy firaka izy naty. Kanefa, zanako lelahy koa fa voaroaka sady niala vady amanjanakanany, mbala lombolombony tamy zaho naty vady alahelonaka.”

2-3. Izikoa Salamo 78:40, 41 dinihin̈y, ino raha tsapany Jehovah izikoa fa misy panomponany miala izy?

² Miniminia hely baka karakory alahelony Jehovah izikoa fa nisy anjely, an̈isany fianakavian̈anany, niala izy! (Joda 6) Tiany Jehovah mare koa iro Israelita aby io, kanefa impirimpiry iro tsy nan̈araka volan̈anany. Misaora nalahelo mare Jehovah! (Vakia Salamo 78:40, 41.) Ke izikoa misy havanao na namanao vôly manompo Jehovah, matokisa fa tsapany Babantsika andan̈itry an̈y raha mahazo anao, sady ten̈a malahelo koa izy. Mahinakinaka izy aminao, ke mitady fomba fo izy baka anao hahazo fampahirezan̈a ndreky fan̈ampian̈a ilainao.

³ Izikoa misy havanao voaroaka, ino raha mila ataonao baka Jehovah han̈ampy anao? Zen̈y raha hidinihintsika ato. Ho hitantsika ato koa ino raha mety hataontsika han̈ampian̈a fianakavian̈a misy havan̈a voaroaka. Fa alohanizen̈y, hizahavantsika antsendriky toetsain̈y ratsy mila iarivantsika.

4. Ino ma raha tsapany raimandreny misy zanaka voaroaka?

⁴ Matetiky raimandreny misy zanaka voaroaka midaon̈o fo tsao tsy ampy fomba nan̈ampiandro zanakandro, ke zen̈y nahavy izy niala fahamarin̈ana. Karaha zen̈y raha tsapany Luke, zanany lelahy koa fa voaroaka. Ho izy: “Nan̈ameloten̈a mare zaho. Matetiky zaho nan̈inôfy ratsy. Nitomoan̈y koa zaho ndraikindraiky,  ke narary mare fônaka.” Karaha zen̈y koa raha tsapany Elizabeth, tamy zanany lelahy voaroaka. Matetiky izy lôso eritreritry: “Ino loatra ma raha tsy nety nataoko Zan̈ahary e? Zaho foeky donko tsy nahay nitarimy zanako tamy fahamarin̈ana ay!”

5. Baka aminjovy ma mahavy olo araiky miala Jehovah?

⁵ Mila alaintsika onon̈o fa samby namezany Jehovah safidy aby olo tsiaraikiaraiky. Anjarantsika tômpiny fo mifidy na atsika han̈araka volan̈anany na atsika tsy han̈araka. Misy raimandreny iziô tsy modely tsara, kanefa zanakandro nifidy hanompo Jehovah ndreky tsy mivadiky aminany foeky. Misy ndraiky raimandreny nifen̈y nan̈ampy zanakandro hiain̈y mifan̈araka amy fitsipikiny Jehovah, kanefa iro tsaiky aby io koa fa bebe, iro niala Jehovah. Ke dikanizen̈y, anjaranolo tsiaraikiaraiky mifidy, hanompo Jehovah izy va tsy hanompo. (Josoa 24:15) Izikoa anao malahelo fotony zanakanao niala Jehovah, tsaraova fa tsy baka aminao foeky nahavy izy nan̈ano zen̈y!

6. Ino raha tsapany tanora araiky, babany koa fa voaroaka?

⁶ Misy fotoan̈a, lay baba na lay reny miala Jehovah. Tsy basinizen̈y fo fa, nialàny koa fianakavian̈anany. (Sal. 27:10) Tsy mora amy tsaiky raha zen̈y fotony raimandrenindro ataondro modely. Karaha ty nambarany Esther, tanora araiky manan̈a baba voaroaka: “Matetiky zaho nitomoan̈y fotony izy tsy raha voataon̈o tsihelihely niala tamy fahamarin̈ana, fa izy foeky nifidy tsy hanompo Jehovah eky. Tiako mare papako, ke lera izy voaroaka, nanjary niasaloha taminany fo zaho. Iô fo zaho mavozo sady mitsapopa mare.”

7. Ino raha tsapany Jehovah, izy koa fa mahita tanora manan̈a baba na reny voaroaka?

⁷ Izikoa araiky aminolobenao voaroaka, tianay ho hainao fa zahay ten̈a malahelo amy raha mahazo anao. Matokisa fa hainy Jehovah fa mafy aminao raha zen̈y. Anao tiany Jehovah, avio ravoravo izy mahita anao miezaka tsy mivadiky aminany. Ravoravo karaha zen̈y koa zahay rahalahinao ndreky ranabavinao an̈ivony fiangonan̈a. Tsaraova fa tsy baka aminao nahavy olobenao io niala tamy fahamarin̈ana. Fanapahankevitrinany tômpiny raha zen̈y. Hitantsika tio fa namezany Jehovah safidy aby atsika tsiaraikiaraiky. Ke ‘kila olo hitondra entan̈anany’, izikoa izy efa nanokanten̈a ndreky vita batisa.​—Gal. 6:5.

8. Ino raha mety hataony fianakavian̈a tsy mivadiky, parpipodianany havandro amy Jehovah? (Zahava koa “ Mimpodiana amy Jehovah.”)

⁸ Izikoa misy havanao voaroaka, rariny anao izikoa man̈anten̈a izy mbala himpody amy Jehovah fo andra araiky an̈y. Fa ino raha mety ataonao parpavianizen̈y? Ankafatara fo finoan̈anao. Ho modely tsara amy fianakavian̈anao anao izikoa man̈ano zen̈y. Hahazo angovo koa anao hindesinao miatriky alahelonao. Mety ho hisy vokany aminy havanao voaroaka io koa raha zen̈y. Atsika iziô hizaha fomba mety hankafataranao finoan̈anao.

9. Akory aby mety hankafataranao finoan̈anao? (Zahava koa “ Andininteny Hankahery Anao Izikoa Misy Havanao Voaroaka.”)

⁹ Manàn̈a fahazaran̈a tsara aminy arapan̈ahy. Ten̈a mila man̈ano zen̈y anao, izikoa tianao  ho fatatra fo finoan̈anao ndreky niny fianakavian̈anao. Akory han̈anaovanao zen̈y? Hahazo angovo baka amy Jehovah anao izikoa zatra mamaky Baiboly ndreky misaintsain̈y izio isanandra, baka io mivory tsy tapaka. Voaroaka papany Joanna ndreky rahavaviny, fa karaha ty ho izy: “Nanjary tsy niasaloha be eky zaho izikoa fa namaky tantaranolo koran̈iny Baiboly ao, karaha ataony Abigaila, Estera, Joba, Josefa, ndreky Jesosy. Ohatra tsarandro io nampisy korazy zaho ndreky nan̈ampy zaho hifantoko amy raha tsara fo, ke nanjary kirikiry alahelonaka. Nankahery zaho mare koa iro hirantsika aby io.”

10. Izikoa Salamo 32:6-8 zahan̈a, ino raha mety ataonao izikoa anao kivy?

¹⁰ Koràn̈a amy Jehovah raha jiaby mampiasaloha anao. Mivavaha fo izikoa anao kivy. Iangavia Babantsika be fitiavan̈a io han̈ampy anao hanan̈a fomba fisain̈ana mitovy amy ninany. Iangavia izy ‘han̈ampy anao hahay handiniky tsarabe ndreky han̈ambara anao lalan̈a tokony himboànao.’ (Vakia Salamo 32:6-8.) Marin̈y ndraiky fa mety tsy ho mora aminao hikoran̈a amy Jehovah raha tsapanao zen̈y. Kanefa, hainy anao malahelo. Tiany Jehovah anao, ke mampirisiky anao izy hikoran̈a aminany raha jiaby an̈aty fônao.​—Eks. 34:6; Sal. 62:7, 8.

11. Koa Hebreo 12:11 zahan̈a, nan̈ino atsika mila matoky fa fandroasan̈a io porofony fitiavan̈any Jehovah? (Zahava koa “ Fandroasan̈a io Porofony Fitiavan̈any Jehovah.”)

¹¹ Ikia fanapahankevitriny antipan̈ahy. Fandroasan̈a io an̈isany fandaharan̈a nataony Jehovah. Izio fomba ten̈a tsara han̈ampian̈a olo niala tamy Jehovah himpody aminany ndraiky. Mahatsara olo hafa koa izio. (Vakia Hebreo 12:11.) Akory fo basy izikoa misy olo an̈ivony fiangonan̈a mivolan̈a, fa tsy aminany fomba nandaminandro antipan̈ahy aby io problemo io? Matetiky misy tsipiriany sasany tsy tantarainolo karaha zen̈y aminao foeky, tsao raha zen̈y hankaratsy olo voaroaka io. Tsy haintsika koa  raha jiaby tafiditry amizio. Fa ny raha azo antoko, niezaka mare iro antipan̈ahy an̈isany komity pitsara io nan̈araka toro lalan̈any Soratra Masin̈y mifandray amizio, fotony iro mitsara ‘amy plasiny Jehovah.’ Misy jery atsika izikoa matoky iro antipan̈ahy aby io.​—2 Tan. 19:6.

12. Ino aby hatsaran̈a nazonolo sasany, iro koa fa nan̈eky fanapahankevitriny antipan̈ahy?

¹² Mety han̈ampy olo voaroaka io himpody amy Jehovah anao, izikoa ikenao fanapahankevitriny antipan̈ahy. Karaha ty nivolan̈iny Elizabeth, araiky nikoran̈intsika taloha in̈y: “Tsy mora taminaka tsy nifandray tamy zanako, taminizy voaroaka. Lera zanako io tafimpody, nivolan̈a izy fa ten̈a nahatsara izy zen̈y fandroasan̈a in̈y. Izikoa fa nandeha fotoan̈a, nikoran̈iny taminaka raha nianarany baka tamizio. Hitako baka amy zen̈y fa Jehovah koa fa man̈itsy, izy man̈ano ny rariny fo.” Karaha ty koa ho Mark, vadiny Elizabeth: “Nivolan̈a zanako io tafara tatỳ fa an̈isany antony araiky nahavy izy tihimpody ho izy, lay zahay tsy nifandray taminany foeky. Ravoravo mare zahay fotony zahay nampiany Jehovah, ke vitanay fo nan̈araka Volan̈anany.”

13. Ino raha han̈ampy anao tsy ho resiny alahelo?

¹³ Mikoràn̈a amy naman̈a mahatakatra fihetsehampônao. Miaraha amy Kristianin̈y matotro afaka man̈ampy anao tsy ho kivy. (Ohab. 12:25; 17:17) Karaha ty ho Joanna, araiky nikoran̈intsika taloha in̈y: “Nisy fotoan̈a zaho nahatsiaro latsatokan̈a mare. Nanjary nahivankivan̈a be zay zaho koa fa nikoran̈a taminolo natokisako.” Akory ndraiky izikoa nisy piaramanompo nivolan̈a raha nahainamparary fônao fo? Ino raha mety ataonao?

14. Nan̈ino ma atsika tokony hiezaka ‘hifandefitry fo ndreky hifan̈ambela hadisovan̈a amy fô jiaby’?

¹⁴ Manàn̈a faharetan̈a amy piaramanompo. Atsika tsy tokony han̈anten̈a fa ho mety fo raha volan̈inolo jiaby. (Jak. 3:2) Atsika lastio tsy lavorary, ke aza gaga foeky izikoa tsy mahay mivolan̈a olo sasany, na izikoa iro nivolan̈a raha nampalahelo anao. Mety tsy kiniandro aby raha zen̈y. Aleva onon̈o raha nivolan̈iny Paoly ty: “Mifandifera fo baka io mahaiza mifan̈ambela hadisovan̈a amy fô jiaby, ndray misy manan̈a antony tokony hitretrezan̈a momba olo sasany.” (Kol. 3:13) Karaha ty raha nambarany ranabavy araiky nanan̈a havan̈a voaroaka: “Niezaka piaramanompo sasany nampahery zaho, fa ny raha nisy, nahainamparary fônaka fo raha nivolan̈indro. Nampiany Jehovah fo zaho, ke vitako nan̈ambela hadisovan̈andro.” Ino raha mety hataonolo jiaby an̈ivony fiangonan̈a, han̈ampian̈a fianakavian̈a manan̈a havan̈a voaroaka?

15. Ino raha mety han̈ampiantsika olo manan̈a havan̈a vo voaroaka tsy ela?

¹⁵ Mifen̈a fo ho tsara fan̈ahy aminolo manan̈a havan̈a voaroaka, avio aboaha fa anao ten̈a naman̈a ankitin̈y. Nisalasala hely i Miriam handeha hivory, tafarany anadahiny voaroaka. Ho izy: “Navozo zaho oe ino raha hikoran̈inolo. Fa nisy naman̈a be fitiavan̈a tamy fiangonan̈a. Iro  niaraka nalahelo taminaka, avio iro tsy neloko na nankaratsy anadahiko voaroaka io foeky. Mankasitraka iro zaho, fotony tsapako fa tsy zaho zaraiky nalahelo.” Nivolan̈a karaha ty koa ranabavy araiky hafa: “Tafarany zanako lelahy voaroaka, nisy naman̈a be fitiavan̈a maromaro navy nankahery zahay. Sasany tamindro nivolan̈a fa tsy haindro foeky raha hikoran̈iny. Iro niaraka nitomoan̈y taminaka, avio iro nanoratra taratasy mankahery taminaka. Ten̈a nan̈ampy zaho raha nataondro zen̈y.”

16. Mila man̈ano raha fo fiangonan̈a an̈ampian̈a ndreky ankahirezan̈a olo manan̈a havan̈a voaroaka. Akory mety an̈anaovan̈a zen̈y?

¹⁶ Ampia fianakavian̈a manan̈a havan̈a voaroaka, fotony iro miezaka tsy mivadiky. Iziô iro ten̈a mila ampahirezinao ndreky an̈aboahanao fitiavan̈a. (Heb. 10:24, 25) Misy amindro olo manan̈a havan̈a voaroaka aby io mahatsapa ten̈a karaha voaroaka koa, fotony misy olo sasany amy fiangonan̈a ao tsy mivolan̈a amindro. Tsy tiantsika hahatsapa raha karaha zen̈y foeky iro io! Aza adin̈a midera ndreky mankahery tanora manan̈a raimandreny voaroaka, fotony zen̈y raha ilaindro. Voaroaka ramoseny Maria, baka io nialàny foeky iry Maria. Karaha ty ho ranabavy io: “Nisy kamaradiko sasany navy taminay tao nandoky ndreky nitahitahy zaho nampianatra iry zanako. Tsapandro alahelonaka, ke iro niaraka nitomoan̈y taminaka. Naraovandro zaho izikoa fa nisy olo nikoran̈a raha tsy marin̈y momba zaho. Ten̈a nankahery zaho mare iro!”​—Rom. 12:13, 15.

17. Ino raha mety ataony antipan̈ahy ankahirezan̈a piaramanompo kivy?

¹⁷ Anaro antipan̈ahy, ankahireza fo fianakavian̈anolo voaroaka io isaka anaro mahita fomba han̈anaovan̈a zen̈y. Andraikitry manokan̈a nankin̈iny Jehovah taminaro raha zen̈y. (1 Tes. 5:14) Manokàn̈a fotoan̈a hankahirezan̈a iro, aloha na afarany fivorian̈a. Vangianaro antran̈o iro, baka io miaraha mivavaka amindro. Miaraha manompo amindro. Tahaoma koa iro hiaraka han̈ano fotoampivavahan̈any fianakavian̈a aminaro. Anaro koa mila mikarakara ondrikondrikiny Jehovah lera iro rivan̈a. Aboaha fa anaro ten̈a tia iro sady mahinakinaka amy raha mahazo iro, fotony zen̈y raha ilaindro.​—1 Tes. 2:7, 8.

18. Izikoa 2 Petera 3:9 zahan̈a, tiany Jehovah han̈ino ma olo niala izy?

¹⁸ ‘Tsisy olo tiany Jehovah ho ripaka fa tiany ho avy amy fibebahan̈a aby olo jiaby.’ (Vakia 2 Petera 3:9.) Ndray nan̈ano fahotan̈a maventy olo araiky, mbala valera amy Jehovah fo fahin̈ananany. Miniminia hely baka! Lafo mare raha nifainy Jehovah han̈avotan̈a atsika tsiaraikiaraiky: Fahin̈anany Zanany ten̈a tiany. Hita baka amy zen̈y fa Jehovah ten̈a tia atsika, ke mitady fomba fo izy han̈ampian̈a olo voaroaka himpody aminany. Man̈anten̈a izy fa han̈ano zen̈y iro. Ahaizantsika zen̈y fan̈oharan̈a nataony Jesosy momba zanaka adala. (Lioka 15:11-32) Maro tamindro niala fahamarin̈ana aby io nimpody tamy Babandro be fitiavan̈a io, izikoa fa nandeha fotoan̈a. Ke ravoravo fiangonan̈a nandray iro ndraiky. An̈isanizen̈y, Elizabeth, ranabavy nikoran̈intsika taloha tarỳ in̈y. Ravoravo izy koa fa voaray ndraiky zanany in̈y. Karaha ty raha tsaroany: “Ravoravo zaho fotony maro olo nan̈amia korazy zahay baka zahay tsy han̈ary toky.”

19. Nan̈ino ma atsika afaka matoky Jehovah fo?

¹⁹ Atsika mety matoky Jehovah fo. Mahatsara atsika fo zay torohevitry amezany atsika. Jehovah tsy matity sady mitepô olo. Tiany mare lan̈iany olo tia izy sady manompo izy. Ke matokisa anao fa Jehovah tsy mety hiala anao, intsaka eky anao koa fa mandalo raha sarotro. (Heb. 13:5, 6) Zen̈y raha nambarany Mark, araiky nikoran̈intsika taloha in̈y. Ho izy: “Jehovah tsy niala zahay foeky. Izy nan̈ampy zahay fo tan̈atiny fotoan̈a sarotro nidiavinay in̈y.” Ary marin̈y zen̈y, fotony Jehovah han̈amia atsika “angovo fan̈ampiny.” (2 Kor. 4:7) Ke ndray nisy havanao niala Jehovah, korazy fo fa ho vitanao fo tsy hivadiky amy Jehovah.