1. Mila man̈ino ma iro vahoaka aby io, volan̈iny pianatrany Jesosy?

NISY lelahy ndreky viavy marobe baka tamy firenena isankarazany ndreky samby isany fivolan̈ana vory ta Jerosalema, tamy taonjato voanalohany. Tio fo nisy Jiosy sasany nanjary nahay volan̈andro vahiny aby io! Lany fan̈ahy iro vahiny aby io. Kanefa mbala niavaka mandilatra zen̈y raha nivolan̈indro Jiosy aby io tamindro, ndreky raha nivolan̈iny apostoly Petera taminolo jiaby vory tio. Nambarany Petera tamindro fa ho voavonjy lan̈iany olo mino Jesosy Kristy ndreky man̈aboaka raha zen̈y amy fiain̈ananany. Ten̈a nidriky lalin̈y tan̈atiny fôny vahoaka aby io raha zen̈y, ke ho iro taminany: “Ino raha tokony hataonay?” Volan̈iny Petera: ‘Anaro tsiaraikiaraiky mila hatao batisa.’​—Asa. 2:37, 38.

2. Ino raha hikoran̈intsika ato? (Zahava sary amy fon̈ony gazety ty.)

² Tsy nampoizin̈y foeky raha nandalo tafaranizen̈y. Kadiriny 3 000 olo natao batisa taminy andra io, ke nanjary pianatrany Kristy. Taminio nanomboko asa maventy nirahiny Kristy nataony pan̈aradia izy, ary raha zen̈y mbala mitohy ziska iziô. Atsika amy zioty tsy mahavita man̈ampy olo handroso ndreky hatao batisa an̈atiny lera vitsivitsy karaha tamy zen̈y. Mety ho fanjava maromaro na taon̈o araiky na mandilatra zen̈y foeky olo araiky ampianarintsika vo mety hahafeno fepetra hatao batisa. Tsy mora man̈ampy olo hanjary pianatrany Kristy zen̈y. Mety ho tsapanao raha zen̈y, izikoa anao manan̈a pianatra Baiboly. Hikoran̈intsika ato ino raha mety hataonao han̈ampian̈a pianatranao ho vita batisa.

3. Izikoa Matio 28:19, 20 zahan̈a, ino raha mila ataony pianatra Baiboly araiky izikoa izy tihandroso ke hatao batisa?

³ Alohany pianatra Baiboly araiky hatao batisa, tsy maintsy ampihariny antsendriky raha nianarany tamy Baiboly tao. (Vakia Matio 28:19, 20.) Mitovy amy ‘lelahy araiky misy jery’ tamy fan̈oharan̈a nataony Jesosy in̈y izy izikoa man̈ano zen̈y. Alohany lelahy io niasa tran̈o, nangady lalin̈y izy avio naôriny tamy lampimbato fototrony tran̈onany. (Mat. 7:24, 25; Lioka 6:47, 48) Akory mety han̈ampian̈a pianatra araiky hampihatra raha nianarany? Handiniky raha telo atsika.

4. Akory mety han̈ampian̈a pianatra araiky hahafeno fepetra amy batisa? (Zahava “ Ampia Pianatranao Hanan̈a Tanjon̈o Ndreky Hanakatra Zen̈y.”)

⁴ Ampia pianatranao hanan̈a tanjon̈o. Nan̈ino ma anao tokony han̈ano zen̈y? Izio karaha ataony anao man̈ano dia lavitry in̈y. Isaka anao mahita tany tsara mare, anao mety hidôkodôko hely, hangala hafizanizio. Ke tsy hitanao aby halavirantany. Karaha zen̈y koa, tsara izikoa olo ampianarinao Baiboly mba manan̈a tanjon̈o madinidiniky. Izikoa takany tanjon̈o aby zen̈y, tsy ho sarotro aminany foeky han̈ano tanjon̈o hatao batisa zen̈y. Amy boky Mankafiza Fiain̈ana Tsisy Farany! ao misy efajoro misoratra “Ataova Ty.” Izio mety ampiasainao han̈ampian̈a pianatra io handroso. Isaka anaro mahavita fianaran̈a araiky, diniha miaraka aminany ino ifandraisany tanjon̈o voasoratra ao amy raha nianarany, avio nan̈ino izio han̈ampy izy hampihatra raha nianarany. Izikoa ndraiky misy tanjon̈o hafa tianao takariny, diniha miaraka aminany tanjon̈o zen̈y, baka io iraha soratiny ambaniny soratra “Raha Hafa” izio. Ampiasà matetitetiky efajoro io han̈ampian̈a izy hahita ino aby tanjon̈o mety takariny atoato ndreky afarafara an̈y.

5. Koa zahan̈a Marka 10:17-22, nirahiny Jesosy han̈ino ma lelahy pan̈arivo io? Ino antony?

 ⁵ Ampia pianatranao baka izy hahavita han̈itsy fomba fiain̈ananany. (Vakia Marka 10:17-22.) Nisy lelahy pan̈arivo zay nirahiny Jesosy nandafo fanan̈ananany jiaby. (Mar. 10:23) Efa hainy Jesosy fa tsy ho mora amy lelahy io han̈ano fan̈ovoan̈a be zen̈y. Ke nan̈ino basy izy mbala nirahiny nan̈ano zen̈y fo? Fotony tiany Jesosy i lelahy io. Ino raha ianarantsika baka amy zen̈y? Mety hitantsika donko fa misy fan̈ovoan̈a sasany mila ataony pianatrantsika. Kanefa mety hisalasala atsika hivolan̈a izy, fotony karaha mbala tsy von̈ono amy zen̈y fahitantsika izy. Marin̈y fa mety ho elaela olo araiky vo hahavita hisikiny toetry vaovao ndreky ho afaka amy raha ratsy nahazatra izy. (Kol. 3:9, 10) Kanefa, izikoa aloha be anao efa mikoran̈a aminany fan̈ovoan̈a mila ataony, tsy ela izy efa hanomboko hiova edy. Zen̈y koa ahitan̈a fa tianao ankitin̈y izy.​—Sal. 141:5; Ohab. 27:17.

6. Nan̈ino atsika mila man̈ontany hevitriny pianatrantsika momba raha ianarany?

⁶ An̈ontania hevitriny pianatranao momba raha ianarany. Ten̈a mila man̈ano zen̈y anao, baka ho hainao asa mazava aminany marin̈y raha ianarany va karakory. Ho hainao koa raha inoany. Izikoa anao zatra man̈ano zen̈y, ho moramora aminao hikoran̈a aminany momba raha sasany mety tsy hikeny jerinany. Misy fan̈ontanian̈a maro karaha zen̈y amy boky Mankafiza Fiain̈ana Tsisy Farany! Ohatra iziô, karaha ty fan̈ontanian̈a amy leson faha-4: “Akory koa fahitany Jehovah anao, izikoa anao mampiasa an̈aranany?” Misy karaha ty koa amy leson faha-9: “Ino raha sasany tianao koran̈iny lera mivavaka?” Amy voanalohany, mety hieritreritry elaela hely pianatra io vo hahavita hamaly fan̈ontanian̈a karaha zen̈y. Ke ampia izy ho zatra misaintsain̈y raha amy boky io ao, an̈isanizen̈y andininteny ndreky sary.

7. Akory mety hampiasantsika tantaranolo, han̈ampian̈a pianatra Baiboly?

⁷ Koa fa mazava amy pianatra io tsarabe raha tokony hataony, tadiava tantaranolo mety handrisiky izy han̈ano raha zen̈y, ke izin̈y ampiasà. Ohatra, izikoa izy mbala mahalan̈a mivory, mety aboakanao izy video Nikarakara Zaho Jehovah amy boky Mankafiza Fiain̈ana Tsisy Farany!, amy leson faha-14, amy tany misy soratra “Zahava.” Presky misy fitantaran̈a karaha io aby leson amy boky io, amy sokajy “Aleva Onon̈o” na amy “Zahava.” * Fadiana mampiran̈a olo ampianarinao aminolo hafa, ke hivolan̈a karaha ty: “Ndray i rahiano nahavita, ke anao tsy hahavita!” Ambilà izy tompiny fo ho tontohitry amy raha tokony hataony. Mety koran̈inao aminany raha nan̈ampy olo tamy video nizahavanaro io han̈araka raha koran̈iny Baiboly. Mety ho andininteny donko izio, na raha hafa. Amafisa fo koa fomba nan̈ampiany Jehovah olo tamy video io, isaka anao afaka man̈ano zen̈y.

8. Akory mety han̈ampian̈a pianatra Baiboly araiky ho tia Jehovah?

⁸ Ampia izy ho tia Jehovah. Akory han̈anaovan̈a zen̈y? Mitadiava fomba han̈ampian̈a pianatra io hahay toetriny Jehovah. Ataova tsapany fa Jehovah io Zan̈ahary ravoravo avio izy man̈ampy lan̈iany olo tia izy. (1 Tim. 1:11; Heb. 11:6) Koràn̈a aminany fa ho maro hatsaran̈a ho azony, izikoa izy mampihatra raha ianarany. Hatsaran̈a aby zen̈y man̈aporofo fa Jehovah ten̈a tia izy ankitin̈y. (Isaia 48:17, 18) Izikoa fa mitombo fitiavany pianatra io Jehovah, ho moramora aminany han̈ano fan̈ovoan̈a tokony hataony.—1 Jaona 5:3.

9. Ino aby raha tsy maintsy hafoenolo araiky, izikoa izy tihanjary pan̈aradia Jesosy? Ino raha han̈ampy izy han̈ano zen̈y izikoa Marka 10:29, 30 io dinihin̈y?

⁹ Tsy maintsy mahafoe raha pianatra Baiboly araiky, zay vo hahavita handroso ke hatao batisa. Karaha ataony lelahy pan̈arivo nikoran̈intsika taloha tio in̈y, sasany amindro io mety voatery hahafoe vola na fanan̈ana. Mety voatery hiova asa koa donko izy, izikoa tsy mifan̈araka amy toro lalan̈any Baiboly asanany. Maro koa taloha nikamarady taminolo tsy tia Jehovah, ke iro tsy maintsy niova naman̈a. Misy ndraiky niroasiny lafamỳ fotony lafamìndro tsy tia Vavolombelon̈o Jehovah. Mety tsy ho mora aminolo sasany raha zen̈y, kanefa Jesosy efa nampan̈anten̈a fa tsy ho diso fan̈antinan̈a foeky lan̈iany olo man̈aradia izy. Jehovah han̈amia hatsaran̈a iro, fotony hamezany fianakavian̈a be fitiavan̈a marobe iro. Tsisy raha bebenizen̈y! (Vakia Marka 10:29, 30.) Akory mety han̈ampianao pianatranao baka izy hahazo hatsaran̈a be zen̈y?

10. Ino raha ianaranao baka amy raha volan̈iny Manuel?

¹⁰ Ataova raha hampakamarady anaro. Ataova tsapanolo ampianarinao fa anao ten̈a tia izy ankitin̈y. Nan̈ino ma raha zen̈y ten̈a ilain̈a? Diniha baka raha nivolan̈iny Manuel, rahalahy mipetraka a Meksiky an̈y. Ty raha azony onon̈o taminizy mbala pianatra Baiboly: “Isaka zahay hianatra Baiboly, papianatranaka tsy maintsy man̈ontany fahasalaman̈anaka fo. Nataony raha hampalaizy zaho, ke nambelany zaho hikoran̈a raha tiako koran̈iny. Tsapako fa izy ten̈a tia zaho.”

11. Ino mahatsara atsika manokan̈a fotoan̈a iarahan̈a amy pianatrantsika?

¹¹ Manokàna fotoan̈a iarahan̈a amy pianatranao, karaha nataony Jesosy tamy pianatranany. (Jaona 3:22) Pianatranao koa fa hitanao man̈ano fandrosoan̈a, mety ainvitenao antran̈onao izy. Ohatra iziô, anaro mety miaraka migiaka kafe na miaraka mihina na miaraka  mizaha raha miboaka isaka fanjava amy Tele JW. Mety ho ravoravo izy izikoa lera andra fety in̈y anao mikaiky izy antran̈onao an̈y, fotony mety hahatsiaro jenjerin̈y baka izy amy fotoan̈a io. Karaha ty ho Kazibwe, rahalahy a Ogandà an̈y: “Maro raha haiko momba Jehovah, zaho koa fa nianatra Baiboly. Fa mbala mandilatra zen̈y raha haiko momba Jehovah, papianatranaka koa fa nanokan̈a fotoan̈a niarahan̈a taminaka. Tsapako fa Jehovah ten̈a tia vahoakanany, avio iro io ten̈a sambatra. Teky koa, efa zen̈y edy raha niriko.”

12. Nan̈ino ma atsika tokony hitondra olo isankarazany koa fa mampianatra Baiboly?

¹² Ivoavoà namanao mandeha mampianatra izy. Ny raha misy, ndraikindraiky mety mandeha manokan̈a atsika koa fa mampianatra izy, na koa atsika tsy miovaova naman̈a. Ndray zen̈y ny metimety amintsika, tsara fo atsika mba mitondra olo isankarazany koa fa mampianatra Baiboly. Karaha ty ho Dmitrii, baka a Moldavie: “Nitondra olo isankarazany papianatranaka izikoa fa nampianatra zaho. Iro io samby tamy fomba nan̈azavandro raha. Ten̈a nan̈ampy zaho hahita fomba maro mety han̈arehako raha nianarako raha zen̈y. Tamy somilany zaho nan̈aton̈o fivorian̈a, zaho tsy nen̈atra foeky, fotony efa presky haiko aby ankamarozandro rahalahy ndreky ranabavy aby tao.”

13. Nan̈ino atsika mila mampirisiky pianatrantsika hivory?

¹³ Ampirisiha pianatranao hivory. Ino antony? Fotony Jehovah man̈iraka panomponany hiaraka hivory; izio mbala an̈isany fanompoan̈a izy. (Heb. 10:24, 25) Sôsoko zen̈y koa, efa nanjary lafamìntsika iro rahalahy ndreky ranabavy aby io. Ke lera atsika miaraka mivory amindro, efa miran̈a miaraka mihinan̈a hanin̈y masiro antran̈ontsika an̈y in̈y. Man̈ampy pianatranao han̈ano dingana maventy hahafinoany fepetra amy batisa anao, izikoa mampirisiky izy hivory sady man̈ampy izy han̈ano zen̈y. Mety tsy ho mora aminany hikomansy hivory zen̈y. Kanefa, boky Mankafiza Fiain̈ana Tsisy Farany! io afaka man̈ampy izy handresy problemo jiaby mety hanamban̈a izy tsy hivory. Amy fomba akory?

14. Ino raha mety hataontsika hitahaoman̈a pianatra hivory?

¹⁴ Ampiasà leson faha-10 amy boky Mankafiza Fiain̈ana Tsisy Farany! han̈ampian̈a pianatranao hazoto hivory. Nisy pitory zadraharaha nirahin̈y nan̈ohatra nampiasa boky io talohany nan̈aboahan̈a izio. Iro nivolan̈a fa, farandraha mahômby eky izio han̈ampian̈a pianatra handeha hivory. Fa ndray zen̈y, tsy voatery ambesanao avy amy leson faha-10 fianaran̈anaro, anao vo hitaon̈o izy hivory. Izikoa mety, ataova farany malaky raha zen̈y sady ataova fahazaran̈a foeky mitaon̈o izy han̈an̈y. Tsy miran̈a problemondro pianatra Baiboly aby io. Ke diniha tsarabe ino raha ilainy pianatranao, baka io zahava ino fomba ten̈a mahômby mety han̈ampianao izy. Anao aza kivy izikoa elaela izy vo mandeha mivory. Anao mila maharidraha. Tahaoma handeha hivory fo izy.

15. Ino aby raha mety havozoanolo ampianarinao Baiboly?

¹⁵ Asa anao mba navozo hanjary Vavolombelon̈o Jehovah? Mety mbala tsaroanao fo donko. Mety nieritreritry donko anao tamy zen̈y fa tsisy karaha anao foeky hahavita hitory isaka tran̈o zen̈y. Navozo koa donko anao tsao hanohitry anao lafamìnao na iry namanao. Izikoa zen̈y raha niain̈anao, tsapanao tsara raha mahazo pianatranao. Efa hainy Jesosy fa tsy olo jiaby hasaky hitory. Kanefa, nampirisihiny iro pianatranany aby io tsy han̈ambela favozoan̈andro hanjary tamban̈a tsy hahavitandro manompo Jehovah. (Mat. 10:16, 17, 27, 28) Akory  nan̈ampiany Jesosy iro han̈ano zen̈y? Baka io akory mety angalànao tahaka izy?

16. Akory mety han̈ampianao pianatranao baka izy ho zatra mikoran̈a raha inoany?

¹⁶ Ampia tsihelihely pianatranao ho zatra mikoran̈a raha inoany. Evandraha navozo hely iro pianatrany Jesosy aby io koa fa nirahiny Jesosy hitory. Fa akory nan̈ampiany Jesosy iro? Nambarany iro tany tokony hitoriandro ndreky hafatra mila toriandro. (Mat. 10:5-7) Akory hangalantsika tahaka raha nataony Jesosy io? Ampia pianatranao hahita aia aby tany mety hitoriany. An̈ontania izy azovy aby mety hahita hatsaran̈a izikoa hikoran̈any hevitry araiky baka amy Baiboly. Man̈anaova fan̈azaranten̈a miaraka aminany ke ampiasà iro fan̈ontanian̈a amy boky Mankafiza Fiain̈ana Tsisy Farany! ao, amy sokajy “Misy Olo Mivolan̈a” ndreky “Izikoa Misy Olo Man̈ontany Anao.” Ke lera anao mampiofan̈a pianatranao, ampia izy hahay hampiasa Baiboly, amy zen̈y izikoa misy olo man̈ontany raha izy, ho vitany han̈amia valinteny tsotra sady voadiniky tsara.

17. Akory mety ampiasàntsika Matio 10:19, 20, 29-31 han̈ampian̈a pianatra hatoky Jehovah?

¹⁷ Ampia pianatranao hatoky Jehovah. Jesosy efa nan̈amia toky pianatranany fa Jehovah tsy maintsy han̈ampy iro fotony Jehovah ten̈a tia iro. (Vakia Matio 10:19, 20, 29-31.) Ampatsiaraova pianatranao fa Jehovah koa han̈ampy izy. Ampia izy hitavandra Jehovah ke ampirisiha izy hivavaka momba tanjon̈o tiany takarin̈y. Ho Franciszek, mipetraka a Pologne: “Olo nampianatra zaho Baiboly koa fa nivavaka, matetiky izy nivolan̈a tanjon̈onaka tan̈atiny vavaka nataony. Izikoa fa hitako fomba namaliany Jehovah vavakany papianatranaka io, nanjary nazoto nivavaka koa zaho. Nisy fotoan̈a zaho nila nangataka lera tsy hiasan̈a baka zaho hahavita han̈aton̈o fivorian̈a ndreky fivoriambe, kanefa vo tsy ela fo nazahoako asa io. Tsapako fa nivaliany Jehovah vavakanaka.”

18. Ino raha tsapany Jehovah koa fa mahita ezaka mare ataontsika ampianaran̈a Baiboly olo?

¹⁸ Misy valerany amy Jehovah iro olo ampianarintsika Baiboly aby io. Hainy fa miezaka mare atsika man̈ampy iro io han̈aton̈o izy ndreky ho tsara fihavanan̈a aminany, ke zen̈y mahavy atsika ten̈a tiany mare. (Isaia 52:7) Izikoa anao efa pitory fa mbala tsisy pianatra Baiboly, miaraha mampianatra aminolo efa manan̈a pianatra Baiboly, amy zen̈y anao hahavita han̈ampy pianatrany namanao io hahafeno fepetra amy batisa.