1. Ino aby raha mety hahavy atsika ho jenjerin̈y ndraikindraiky?

MARO amintsika io mahatsiaro latsatokan̈a ndraikindraiky. Zisty mielan̈a fo raha zen̈y aminolo sasany, fa aminolo hafa ndraiky izio farandraha mahadin̈y ela eky. Mety hahatsiaro latsatokan̈a fo atsika ndray an̈ivonolo maro. Sarotro aminolo sasany iziô mahita naman̈a izikoa fa nifindra fiangonan̈a. Misy ndraiky olo zatra man̈ano raha miaraka amy lafamìndro, ke mahatsiaro latsatokan̈a mare iro izikoa fa lavitry lafamỳ. Misy koa naty vady ke ngoma fiarahan̈andro mare izy. Kristianin̈y sasany ndraiky mbala vo tsy ela nahita fahamarin̈ana, ke mety hahatsiaro latsatokan̈a mare izy izikoa fa misy kamaradiny na havany man̈enjiky izy.

2. Ino aby fan̈ontanian̈a handeha hivaliantsika ato?

² Hainy Jehovah raha jiaby momba atsika. Atsika koa fa mahatsiaro latsatokan̈a, hainy raha an̈aty fôntsika, avio izy tihan̈ampy atsika. Akory fomba han̈ampiany atsika? Ino raha mety hataontsika baka atsika tsy hahatsiaro ho very? Akory mety han̈ampiantsika piaramanompo amintsika baka iro tsy hahatsiaro jenjerin̈y? Hizahavantsika valiny fan̈ontanian̈a aby zen̈y.

3. Akory fomba nan̈ampiany Jehovah i Elia?

³ Tiany Jehovah ho sambatra aby olo jiaby manompo izy. Tsy lavitry atsika tsiaraikiaraiky izy. Mahinakinaka izy mahita atsika miasaloha amy problemo mahazo atsika. (Sal. 145:18, 19) Ahitan̈a zen̈y fomba nan̈ampiany Jehovah paminan̈y Elia. Farandraha sarotro eky fiain̈ana tan Israely tan̈y tamy zen̈y. Ninjehin̈y mare panompony Jehovah, ary Elia an̈isany olo ten̈a tiany fahavalony Jehovah hivonen̈a. (1 Mpanj. 19:1, 2) Ny raha ten̈a nampakivy i Elia, nieritreritry izy fa efa izy zaraiky fo paminan̈iny  Jehovah tavela. (1 Mpanj. 19:10) Hitany Jehovah raha zen̈y, ke direkty izy nan̈ano raha han̈ampian̈a i Elia. Nandefa anjely izy han̈amia toky paminan̈y ten̈a tiany io fa izy tsy latsatokan̈a, avio mbala marobe Israelita tsy nivadiky tamy Jehovah!—1 Mpanj. 19:5, 18.

4. Maro panompony Jehovah iatakatahanolo. Fa izikoa Marka 10:29, 30 zahan̈a, akory ahitan̈a fa ten̈a tiany Jehovah iro sady jireny?

⁴ Hainy Jehovah fa misy amintsika io tsy maintsy mahafoe raha marobe koa fa hifidy hanompo izy. Mety tsy han̈ampy atsika eky iziô kamaradintsika ndreky lafamìntsika tsy panompony Jehovah. Mety zen̈y donko raha tan̈atiny jeriny Petera, taminizy nan̈ontany Jesosy karaha ty: ‘Zahay io efa nahafoe raha jiaby sady nan̈araka anao. Ke asa ino raha ho azonay?’ (Mat. 19:27) Nampiasaloha Petera raha zen̈y. Ke Jesosy nan̈amia toky iro pan̈aradia izy aby io fa iro piaramanompo amindro aby io hanjary miran̈a havandro marikitry. (Vakia Marka 10:29, 30.) Mampan̈anten̈a koa Jehovah, Babantsika andan̈itry an̈y, fa von̈ono izy han̈ampy lan̈iany olo tihanompo izy. (Sal. 9:10) Alô atsika handiniky sosokevitry vitsivitsy mety ataonao, lera anao mahatsiaro latsatokan̈a ke tihahazo fan̈ampian̈a baka amy Jehovah.

5. Ino mahatsara atsika mandiniky fomba nan̈ampiany Jehovah atsika?

⁵ Aleva onon̈o fomba nan̈ampiany Jehovah anao. (Sal. 55:22) Tsy hahatsiaro ho latsatokan̈a anao izikoa mieritreritry zen̈y. Tsy manambady Ranabavy Carol, * avio izy zaraiky fo an̈atiny fahamarin̈ana. Ho izy: “Zaho koa fa mandiniky fiain̈ananaka taloha, ndreky fomba nan̈ampiany Jehovah zaho tamy zaho niaritry raha sarotro, zaho tsy mahatsiaro latsatokan̈a foeky. Ke matoky zaho fa Jehovah tsy hiala zaho foeky aminy hoavy.”

6. Amy karakory 1 Petera 5:9, 10 io mankahery lan̈iany olo mahatsiaro latsatokan̈a?

⁶ Diniha fomba an̈ampiany Jehovah piaramanompo mahatsiaro latsatokan̈a. (Vakia 1 Petera 5:9, 10.) Tan̈atiny taon̈o maro, Rahalahy Hiroshi zaraiky fo Vavolombelon̈o Jehovah tamy fianakavian̈anany. Akory nan̈ampiany Jehovah izy? Karaha ty ho izy: “Olo jiaby  an̈ivony fiangonan̈a samby amy problemonany; ndray iro manan̈a havan̈a Vavolombelon̈o, mba manan̈a raha manahiran̈a iro fo koa. Kanefa, iro miezaka fo man̈ano ny farany tsara vitandro amy fanompoan̈a Jehovah. Ke raha zen̈y ten̈a mampahery piaramanompo tsy manan̈a havan̈a Vavolombelon̈o karaha ataonay ty.”

7. Hazavà, amy karakory vavaka io ten̈a man̈ampy anao.

⁷ Tanà fo fahazaranao mivavaka, mamaky Baiboly ndreky mivory. Mila koran̈inao mazava tsarabe amy Jehovah raha tsapanao an̈atiny fônao ao. (1 Pet. 5:7) Zen̈y raha nataony Massiel, ranabavy tanora araiky. Nahatsiaro latsatokan̈a izy koa fa nanapakevitry hanompo Jehovah, fotony amindro jiaby lafamỳ, izy zaraiky fo panompony Jehovah. Karaha ty ho izy: “Nivavaka tamy Jehovah fo zaho, ke zen̈y an̈isany raha ten̈a nan̈ampy zaho tsy hahatsiaro latsatokan̈a. Ten̈a Babako fahitako izy! Mikoran̈a aminany fo zaho isanandra, ary matetiky zaho mivavaka an̈atiny andra araiky. Koran̈iko aminany aby raha tsapako.”

8. Hazavà, nan̈ino fahazaranao mamaky ndreky misaintsain̈y Volan̈a Zan̈ahary ten̈a man̈ampy anao.

⁸ Ataova fahazaran̈a mamaky Baiboly isanandra, ke aleva sary antsain̈y lan̈iany tantara man̈aboaka tsarabe fitiavany Jehovah anao. Zen̈y raha nataony Ranabavy Bianca. Miaritry ny mafy ranabavintsika io fotony lafamìnany raha miasa man̈aboaka volan̈a mampakivy izy fo. Volan̈iny: “Zaho efa zatra mamaky Baiboly ndreky misaintsain̈y tantara aby ao. Tiako koa mamaky tantarany panompony Jehovah nanan̈a problemo miran̈a amy ninaka. Ke raha aby zen̈y hitako ten̈a nan̈ampy zaho.” Piaramanompo sasany zatra mangala onon̈o andininteny ten̈a mampahery, karaha ataony Salamo 27:10 ndreky Isaia 41:10. Sasany ndraiky koa fa man̈oman̈a fivorian̈a na mamaky Baiboly, iro zatra mitandren̈y raha oman̈indro io efa nalain̈a feo. Raha zen̈y man̈ampy iro tsy hahatsiaro latsatokan̈a loatra.

9. Nan̈ino mahatsara anao mivory tsy tapaka?

⁹ Mifen̈a hivory tsy tapaka. Mahatsara anao raha zen̈y fotony raha jiaby atao an̈y hampahery anao, sady han̈ampy anao hifankazatra amy piaramanompo. (Heb. 10:24, 25) Karaha ty nambarany Massiel, araiky navoakoran̈a taloha tarỳ in̈y: “Zaho ndraiky bihen̈amaso marin̈y, fa mifen̈y fo zaho tsy hanapatapaka fivorian̈a. Miezaka koa zaho man̈amia valinteny. Nan̈ampy zaho hahatsapa ho an̈isany fiangonan̈a raha zen̈y.”

10. Nan̈ino ma ten̈a ilain̈a minaman̈a amy rahalahy ndreky ranabavy an̈ivony fiangonan̈a?

¹⁰ Mikamaradiana amy piaramanompo. Mitadiava naman̈a tsy mivadiky an̈ivony fiangonan̈a, ke aleva tahaka finoan̈andro. Tsy problemo ndray tsy miran̈a taon̈onaro, karazan̈anaro,  ndreky kolotsain̈inaro. Sady Baiboly mampatsiaro atsika fa ‘aminolo matoe misy fahendrena.’ (Joba 12:12) Fa ndray zen̈y, olobe koa mba mety mangala fianaran̈a baka amy tanora tsy mivadiky. Mbala zandriny Jonatana lavitry i Davida, fa iro nanjary kamarady mare. (1 Sam. 18:1) Ndray naro raha sarotro niaretandro, nahavita nanompo Jehovah fo iro, fotony iro nifan̈ampy. (1 Sam. 23:16-18) Ranabavy Irina zaraiky fo Vavolombelon̈o Jehovah amindro jiaby fehiny, fa ho izy karaha ty: “Iro ranadahy ndreky rahavavy aby io mety hanjary miran̈a raimandrenintsika na olo kibo araiky amintsika. Iro io ampiasainy Jehovah han̈amezan̈a atsika raha ilaintsika.”

11. Ino raha mila ataonao izikoa anao tihinaman̈a mare amy piaramanompo?

¹¹ Mety tsy ho mora mahazo kamarady, intsaka eky izikoa anten̈a bihen̈amaso. Karaha zen̈y Ranabavy Ratna. Nianatra fahamarin̈ana fo izy ndray nisy nanohitry. Karaha ty ho izy: “Tsy maintsy nikeko fa mila fan̈ampian̈a baka amy ranadahy ndreky rahavavy an̈ivony fiangonan̈a zaho.” Mety tsy ho mora aminao hikoran̈a raha an̈atiny fônao aminolo araiky, kanefa izikoa anao mikoran̈a, mety hanjary kamarady mare anaro. Tsaraova fa iro namanao aby io tihan̈ampy anao ndreky tihankahery anao. Ke ambarà iro ino raha mety han̈ampian̈andro anao.

12. Ino mahatsara anao miaraka manompo amy rahalahy ndreky ranabavy?

¹² An̈isany fomba araiky ten̈a tsara hazahoantsika kamarady: Miaraka manompo amindro rahalahy ndreky ranabavy aby io. Karaha ty ho Carol, araiky nikoran̈intsika in̈y: “Niaraka nanompo tamy rahavavy isankarazany zaho. Misy lera zaho niaraka tamindro nan̈ano raha hafa nisy ifandraisany tamy fanompoan̈a Jehovah. Ke nahazo kamarady tsara maro zaho. Tan̈atiny taon̈o taon̈o, iro io nampiasainy Jehovah han̈ampy zaho?” Tsy perty foeky anao minaman̈a amy Kristianin̈y tsy mivadiky. Iro io ampisainy Jehovah man̈ampy anao, lera anao malemy trôko mare, karaha ataony lera anao mahatsiaro latsatokan̈a in̈y.​—Ohab. 17:17.

13. Ino andraikitrinolo jiaby an̈ivony fiangonan̈a?

¹³ Andraikitrintsika jiaby an̈ivony fiangonan̈a man̈ano raha hahavy olo jiaby ao hihavan̈a tsarabe ndreky hifankatia, amy zen̈y tsisy olo hahatsiaro ho latsatokan̈a. (Jaona 13:35) Mety hankahery piaramanompo amintsika raha ataontsika ndreky raha volan̈intsika. Karaha ty nambarany ranabavy araiky: “Tamy zaho vo nianatra fahamarin̈ana, naboakandro piaramanompo aby io taminaka tsarabe fa iro mankatia zaho. Izikoa tsy zen̈y, tsy nanjary Vavolombelon̈o Jehovah foeky donko zaho ôtrizay.” Ino raha mety hataonao han̈ampian̈a piaramanompo tsy manan̈a havan̈a Vavolombelon̈o, baka iro hahatsapa fa iro tiany piaramanompo?

14. Ino raha mety ataonao baka anao hifankazatra aminolo vaovao?

¹⁴ Mifen̈a hikamarady aminolo vaovao an̈ivony fiangonan̈a. Anao koa fa mahita olo vaovao vo sambany mivory, raìsa tsarabe izy. (Rom. 15:7) Ataova mbalatsara aminkatsarampan̈ahy izy, avio aza adin̈a fa tanjon̈onao, hanjary kamaradiny marikitry. Ke mifen̈a fo ho tsara fan̈ahy aminany, avio aboaha fa anao mitady raha mahatsara izy. Diniha ino raha sarotro andalovany, kanefa mitandrema tsao midikiditry amy fiain̈ananany. Ndraikindraiky mety tsy ho mora aminolo sasany hikoran̈a raha tsapany. Fa aza forsen̈a izy hivolan̈a. Fadiana man̈apetraka fan̈ontanian̈a mampavôty. Mifen̈a haharidraha, baka io tandrin̈esa tsara izy koa fa mivolan̈a. Mety han̈ontanianao izy iziô, akory fomba nahitany fahamarin̈ana.

15. Akory mety han̈ampiany Kristianin̈y matotro olo hafa?

 ¹⁵ Hanan̈a finoan̈a matanjaka olo an̈ivony fiangonan̈a, izikoa misy Kristianin̈y matotro, intsaka eky antipan̈ahy, mifen̈y man̈aboaka fitiavan̈a aminolo tsiaraikiaraiky. Zen̈y raha tsapany Melissa. Mamany nan̈ampy izy hianatra fahamarin̈ana, fa nisy rahalahy maromaro koa nan̈ampy izy tan̈atiny taon̈o maro zay. Ho izy: “Zaho ten̈a mankasitraka raha nataondro ranadahy aby io. Efa miran̈a babako iro io, avio iro von̈ono fo nitandren̈y zaho isaka zaho tihikoran̈a tamindro.” Karaha zen̈y koa raha tsapany rahalahy tanora araiky, Mauricio an̈arany. Nan̈ampy izy mare iro Kristianin̈y matotro an̈ivony fiangonan̈a. Nahalelo mare izy fotony olo nampianatra izy Baiboly niala fahamarin̈ana. Karaha ty ho izy: “Ten̈a nikarakara zaho iro antipan̈ahy aby io sady ten̈a nan̈ampy zaho. Nikoran̈indro taminaka zay hevitry nanohin̈y fondro tamy fianaran̈a manokan̈a nataondro. Niaraka nan̈ano spaoro taminaka foeky iro.” Izikoa fa nandeha fotoan̈a, nanjary panompo manontolo andra i Melissa ndreky Mauricio.

16-17. Ino koa raha mety ataontsika han̈ampian̈a olo?

¹⁶ Man̈anaova raha han̈ampian̈a olo. (Gal. 6:10) Misionera amy tany lavitry fianakavian̈anany i Léo. Karaha ty ho izy: “Hatsarampan̈ahy hely atao amy fotoan̈a ten̈a ilavan̈a izy fo matetiky efa ampy edy. Zaho tandraraiky zay tatrany aksidany tomôbily, ke niasaloha mare zaho koa fa navy tantran̈o. Nisy olo fivadiany zay ndraiky niainvite zaho taminio. Efa tsy azoko onon̈o eky ino raha nihoaninay taminio, fa tsy adin̈ako foeky hatsarampan̈ahy naboakandro taminaka; nitandrin̈esandro tsarabe zaho. Ke nahatsiaro nahivankivan̈a zaho baka tio!”

¹⁷ Farandraha tiantsika eky man̈aton̈o fivoriambe ndreky fotoan̈a maventy hafa. Ravoravo atsika miaraka amy piaramanompo, ndreky mikoran̈a hevitry mampahery mifandray amy fivoriambe io. Karaha zen̈y tsarabe i Carol, araiky nikoran̈intsika taloha in̈y. Ho izy: “Marin̈y ndraiky fa mandeha anjatony na andrivony aby piaramanompo man̈odidin̈y zaho amy fotoan̈a aby io, kanefa matetiky iro efa samby miaraka amy lafamìndro, ke mahatsiaro latsatokan̈a zaho koa fa mahita zen̈y.” Tsy mora aminolo sasany koa man̈aton̈o fivoriambe voanalohany tafarany nifatesany vadindro. Ke izikoa anao mahay olo karaha zen̈y, nan̈ino izikoa mba tahôminao hiaraka mipetraka aminao  ndreky amy lafamìnao izy amy fivoriambe na fotoan̈a maventy hafa amy man̈araka?

18. Akory mety hampiharantsika 2 Korintianina 6:11-13, lera atsika mikaiky olo antran̈ontsika?

¹⁸ Miaraha man̈ano raha amy piaramanompo. Anao koa miainvite olo amy fiarahan̈a, kahia rahalahy ndreky ranabavy isankarazany, avio aza adin̈a foeky mikaiky olo mety hahatsiaro latsatokana. ‘Ataova raha hampalalaka fônao’, intsaka eky aminolo karaha zen̈y. (Vakia 2 Korintianina 6:11-13.) Karaha ty nambarany Melissa, araiky navoakoran̈a taloha tarỳ in̈y: “Ravoravo mare zahay izikoa fa nisy naman̈a niainvite zahay tantran̈ondro. Ndraikindraiky iro mikaiky zahay hiaraka han̈ano vakansy amindro.” Ke azovy piaramanompo iritriretinao ainviten̈a hely antran̈o?

19. Lera karakory ma piaramanompo sasany ten̈a mila atsika?

¹⁹ Misaora ravoravo koa piaramanompo sasany izikoa anao miaraka amindro amy fotoan̈a sasany, karaha ataony aminandra fety. Mety ho sarotro amindro hiaraka aminy havandro tsy Vavolombelon̈o amy fotoan̈a karaha zen̈y. Sasany ndraiky mba mila naman̈a lera mierin̈y andra nifatesany vadindro na havandro. Malahelo mare baka iro amy fotoan̈anizen̈y. Ke izikoa anao mahatindry fotoan̈a hiarahan̈a amindro amy fotoan̈a karaha zen̈y, ho tsapandro fa anao ten̈a tihan̈ampy iro.​—Fil. 2:20.

20. Nan̈ino Matio 12:48-50 io ten̈a mankahery atsika lera atsika mahatsiaro latsatokan̈a in̈y?

²⁰ Maro antony mety hahavy atsika hahatsiaro ho latsatokan̈a. Fa ndray ino ndray ino antony, mila alaintsika onon̈o fa hainy Jehovah tsarabe fihetsehampôntsika, avio hitany raha mahazo atsika. Matetiky izy mampiasa piaramanompo han̈amezan̈a atsika raha ilaintsika. (Vakia Matio 12:48-50.) Ravoravo mare atsika namezany Jehovah fiangonan̈a. Akory han̈aboahantsika fa mankasitraka raha ataony zen̈y atsika? Mifen̈y atsika man̈ano zay raha vitantsika han̈ampian̈a piaramanompo. Na ino na ino raha tsapantsika ndraikindraiky, tsy mila adin̈antsika foeky fa tsy latsatokan̈a foeky atsika fotony Jehovah miaraka amintsika.