1. Ino raha nataony Jehovah tamintsika tsiaraikiaraiky?

JEHOVAH nitaon̈o atsika tsiaraikiaraiky han̈aton̈o izy. (Jaona 6:44) Diniha hely baka ino aby raha tafiditry amy zen̈y. Jehovah koa fa nandiniky olo jiaby mandeha andrivony tapitrisa ambony tany ty, hitany raha tsara tan̈atiny fônao tao ke hainy fa anao ten̈a tihanompo izy. Valera aminany mare raha zen̈y. (1 Tan. 28:9) Hainy Jehovah anao. Hainy tsarabe fihetsehampônao, ary anao tiany. Tsy hitanao mankahery raha zen̈y?

2. Ino fan̈oharan̈a nampiasainy Jesosy han̈aboahan̈a fa ten̈a valera amy Jehovah ondrikondrikinany tsiaraikiaraiky?

² Jehovah ten̈a tia anao, ary izy koa ten̈a tia iro piaramanompo aminao aby io. Baka hazava amintsika raha zen̈y, nampitovisiny Jesosy tamy piambin̈y ondrikondriky i Jehovah. Karakory ma hataony piambin̈y ondrikondriky izikoa izy misy ondrikondriky 100 kanefa very araiky? Hambelany an̈abony bongo an̈y antsendriky ondrikondrikinany 99 aby io, baka io loso izy mitady araiky very in̈y. Lera ondrikondriky io hitany, izy tsy mety hasiaka amizio. Ndray izy aby ravoravo mare! Ino ma raha ianarantsika baka amy zen̈y? Valera amy Jehovah ondrikondrikinany tsiaraikiaraiky. Jesosy nivolan̈a fa tsy tiany Babany andan̈itry an̈y hisy ho very foeky ‘iro madiniky aby io ndray araiky.’​—Mat. 18:12-14.

3. Ino raha hidinihintsika ato?

³ Tsy tiany Jehovah foeky izikoa baka amintsika hahavy piaramanompo amintsika ho kivy. Ino raha tokony hataonao baka anao tsy hanafintohin̈y olo? Akory tokony hataonao izikoa nisy olo nan̈ano raha namparary fônao? Zen̈y raha hidinihintsika ato. Fa alohanizen̈y, hizahavantsika antsendriky azovy aby ma iro ‘madiniky’ koran̈iny Matio toko faha-​18 ao.

4. Azovy ma ‘iro madiniky aby io’?

⁴ ‘Iro madiniky aby io’ ivolan̈ana lan̈iany olo man̈aradia Jesosy. Ke ndray firy taon̈o eky iro io ndray firy taon̈o, miran̈a “tsaiky” fo  fiheverany iro, fotony iro man̈eky hampianariny. (Mat. 18:3) Samby isany tany faviandro io, fombandro, fomba fandinihandro raha, ndreky toetrindro; kanefa, iro jiaby samby man̈aboaka amy fiain̈anandro fa iro mino Jesosy. Ke tiany Jesosy mare iro.​—Mat. 18:6; Jaona 1:12.

5. Man̈ano akory i Jehovah izikoa fa misy olo manafintohin̈y na mampijaly araiky amy panomponany?

⁵ Valera amy Jehovah aby ‘iro madiniky aby io.’ Akory ahaizantsika zen̈y? Diniha baka karakory fiheverantsika tsaiky. Misy valerany amintsika mare iro io. Tiantsika harovan̈a iro tsaiky aby io fotony iro tsisy angovo miran̈a olobe. Iro io koa mbala tsy maro raha hay sady tsy ampy fahendrena. Tsy tiantsika mahita olo mijaly, kanefa mbala lombolombonizen̈y hinakinakantsika ndreky helokontsika izikoa fa mahita olo mampijaly tsaiky. Karaha zen̈y koa raha tsapany Jehovah amintsika. Mahinakinaka sady meloko mare izy, izikoa fa misy olo manafintohin̈y na mampijaly araiky amy panomponany!​—Isaia 63:9; Mar. 9: 42.

6. Izikoa zahan̈a 1 Korintianina 1:26-29, akory fahitanolo amy donia ty iro pianatrany Jesosy aby io?

⁶ Ino koa ma antony hafa mahavy iro pianatrany Jesosy aby io volan̈iny fa ‘madiniky’? Fotony zen̈y fahitanolo amy donia ty iro. Amy donia ty, olo an̈abo zen̈y olo pan̈arivo, olo malaza avio manampahifan̈a. Kanefa ankamarozany pianatrany Jesosy tsy karaha zen̈y. Ke zen̈y aviany donia ty mihevitry fa iro io olo ambany, na tsisy dikany. (Vakia 1 Korintianina 1:26-29.) Kanefa, tsy zen̈y foeky fiheverany Jehovah panomponany.

7. Tiany Jehovah ho karakory ma fiheverantsika iro piaramanompo aby io?

⁷ Tiany Jehovah aby panomponany jiaby, na efa maromaro taon̈o nanompoandro Jehovah na vo tsy ela. Valera aminany aby iro piaramanompo amintsika aby io, ke tokony ho karaha zen̈y koa fiheverantsika iro. Tokony hitiavintsika aby iro “rahalahy jiaby amy finoan̈a”, fa tsy sasany fo. (1 Pet. 2:17) Tokony hifen̈y mare atsika tsy han̈ano raha hampalahelo iro. Tokony hataontsika raha hahavy iro hahatsapa tian̈a. Akory fo basy izikoa atsika nan̈ano raha namparary fônolo araiky na nampaneloko izy? Hibanjaintsika karaha io fo raha zen̈y? Tsy mety zen̈y. Atsika tsy tokony hieritreritry fa sarôtindraha loatra izy matoa meloko, ke izy fo ny tokony han̈ambela hadisovan̈a ndreky han̈adin̈a izio. Ino marin̈y ma mahavy piaramanompo sasany mora meloko? Mety baka tamy raha niain̈any mahavy izy karaha zen̈y. Misy piaramanompo koa mihevitry ain̈inany tsy dia misy dikany loatra. Sasany ndraiky vo tsy ela fo tamy fahamarin̈ana, ke mbala tsy hainy raha tokony hatao izikoa fa misy olo nan̈ano raha halandro. Kanefa, ndray ino ndray ino raha nampameloko atsika, na nampameloko olo amintsika, atsika mila man̈ano raha hisiany fihavanan̈a fo. Akory fo basy tokony hataonolo araiky izikoa izy meloko matetiky nohony raha nataonolo taminany? Tokony hikeny fa toetry ratsy raha zen̈y, ke tokony hialan̈a. Izikoa izy miova, hilamin̈y jerinany avio ho tsara fihavanan̈a aminolo izy.

8. Nan̈ano karakory ma toetsain̈inolo maro taminandrany Jesosy, ke nifindra tamindro pianatranany aby io?

⁸ Nikoran̈a momba iro ‘madiniky’ aby io i Jesosy, fotony pianatranany nan̈ontany izy karaha ty: ‘Azovy marin̈y ma farany be amy Fanjakan̈any lan̈itry?’ (Mat. 18:1) Maro baka Jiosy tamy fotoan̈anizen̈y nihevitry fa zay olo manan̈a plasy an̈abo amy fiarahamonin̈y fo ny ten̈a olo. Karaha ty raha nambarany manampahaizan̈a araiky momba zen̈y: “Nisy olo nantrentreky atỳ arỳ sady nirisiky fahin̈ana baka hahazo laza ndreky voninahitry, baka io ho tianolo ndreky hajainolo.”

9. Ino ma raha tsy maintsy nataony pianatrany Jesosy?

⁹ Efa fombany Jiosy tamy zen̈y tia mifan̈oesa. Ke hainy Jesosy fa mila mifen̈y mare pianatranany han̈adoso toetsain̈y tia mifan̈oesa io  an̈atiny fondro: “Lan̈iany farany be aminaro ho mira farany zandry, lan̈iany mitariky ho mira panompo.” (Lioka 22:26) Mihevitry ain̈intsika ho “farany zandry” atsika, izikoa ‘man̈ano olo hafa an̈abon̈abo’ tozay atsika. (Fil. 2:3) Tsy dia hanatafintohin̈y olo loatra atsika izikoa manan̈a toetsain̈y karaha zen̈y.

10. Ino ma torohevitry namezany Paoly ke tokony harehantsika?

¹⁰ Tsy maintsy misy raha fo koa mahavy piaramanompo ho an̈abon̈abo tozay atsika. Tsy ho sarotro amintsika hahita zen̈y izikoa atsika mifantoko amy toetry tsarandro. Atsika tokony han̈araka torohevitriny apostoly Paoly tamindro Kristianin̈y ta Korinto ty: “Ino ma tsy itovizanao aminolo? Ino ma raha anan̈anao ke tsy namian̈a anao? Avio izikoa namezan̈a anao raha zen̈y, nan̈ino anao mipoerapoera ke man̈ano karaha tsisy olo nan̈amia zen̈y anao?” (1 Kor. 4:7) Ke mila mitandrin̈y atsika tsy hisariky sain̈inolo amintsika. Atsika tsy tokony hiheviten̈a ho raha mandilatra olo hafa. Mety misy iziô ohatra rahalahy ten̈a mahay man̈ano kabaro, na koa ranabavy mora mahita pianatra Baiboly. Kanefa tokony han̈amia voninahitry Jehovah fo iro amy zay raha vitandro.

11. Ino raha ianarantsika baka amy fan̈oharan̈a nataony Jesosy momba panompo ratsy fan̈ahy in̈y?

¹¹ Jesosy koa fa baka nampitandrin̈y pianatranany baka iro tsy han̈ano raha hanafintohin̈y olo, izy nan̈ano fan̈oharan̈a momba panompo araiky ndreky panjaka araiky. Panompo io nanan̈any panjaka io vola tsy saomasaoma, ke tsy navoahefany foeky trosa be zen̈y. Fa ndray zen̈y, nifoan̈any panjaka io trosanany jiaby. Panompo io ndraiky nanan̈a vola tamy panompo hafa koa. Hely vola nanan̈any tamy panompo hafa io, kanefa tsy nan̈eky foeky izy izikoa fa tsy voahefany panompo faharoe io volanany. Izikoa fa ren̈iny panjaka io raha nataony panompo voanalohany io, neloko mare izy ke nigadrainy panjaka io panompo ratsy fan̈ahy io. Ino raha ianarantsika baka amy zen̈y? Karaha ty ho Jesosy: ‘Karaha zen̈y koa hataony Babako andan̈itry an̈y aminaro, izikoa anaro tsy mifan̈ambela hadisovan̈a amy fô jiaby.’​—Mat. 18:21-35.

12. Mety ino aby raha ho hisy izikoa atsika tsy man̈eky han̈ambela hadisovan̈anolo?

¹² Tsy panompo ratsy jery io fo nazondraha tamy raha nataony fa olo hafa koa. Voanalohany, tsy nitepô foeky izy ‘nampidriky panompo araiky tsy navoahefa trosanany in̈y ta prizon.’ Faharoe, nisy vokany tamy panompo hafa nahita raha nandalo io koa raha zen̈y, ke ‘nahinakinaka mare’ iro. Misy vokany aminolo hafa koa raha ataontsika. Akory iziô izikoa tsy mety hambelantsika hadisovan̈anolo nan̈ano raha ratsy tamintsika? Voanalohany, halahelo mare izy mahita atsika mitana heloko ampô aminany. Mety harary koa fônany izikoa tsy ahoantsika foeky izy na tsy an̈aboahantsika fitiavan̈a. Faharoe, tsy ho alaizy tsarabe koa olo hafa an̈ivony fiangonan̈a mahita atsika tsy mifankahazo amy piaramanompo hafa.

13. Ino raha ianaranao baka amy Crystal?

¹³ Atsika koa man̈ambela hadisovan̈any piaramanompo, tsy atsika fo ny hahazo hatsaran̈a fa olo hafa koa. Zen̈y tsarabe raha tsapany Crystal. * Ranabavy io pisava lalan̈a. Ho izy: “Tandraraiky zay, namiamiany rahavavy araiky zay volandratsy zaho. Miran̈a nitombohin̈y meso in̈y fônaka tamy zen̈y! Ndray hiaraka hanompo taminany fo tsy tiako. Ke nanjary kamo zaho nandeha nanompo. Tsisy haravoan̈a foeky zaho.” Nihevitry i Crystal tamy zen̈y fa rariny izy meloko. Kanefa nifen̈y izy tsy nitana heloko ampô, ndreky tsy nifantoko tamy raha navoa izy. Nanetry ten̈a izy ke narehany torohevitriny Baiboly voakoran̈a amy Ny Tilikambo Fiambenana 15 Oktobra 1999. Titrany lahatsoratra io: “Mamelà Heloka Amin’ny Fonao.” Ke nambelany hadisovan̈any rahavaviny io.  Karaha ty ho izy: “Tontohitry zaho fa mila miezaka mare atsika tsiaraikiaraiky zay vo hahavita hisikiny toetry vaovao. Jehovah lastio von̈ono han̈ambela hadisovan̈antsika fo isanandra. Miran̈a nisy entan̈a mavesatra be in̈y nadoso tamy sôrokonaka, ke nahivankivan̈a oe zaho. Nimpody ravoravo ndraiky zaho zioty!”

14. Koa Matio 18:21, 22 zahan̈a, ino raha mety tsy nora taminy apostoly Petera? Ino raha ianaranao baka amy raha nivolan̈iny Jesosy?

¹⁴ Haintsika fa mila man̈ambela hadisovan̈anolo atsika, ary raha zen̈y zaka tsara. Kanefa, tsy mora amintsika man̈ano zen̈y ndraikindraiky! Ndray apostoly Petera donko mba mety efa nahatsapa zen̈y. (Vakia Matio 18:21, 22.) Ke ino raha han̈ampy atsika amy zen̈y? Voanalohany, diniha ino aby hadisovan̈anao efa nambelany Jehovah. (Mat. 18:32, 33) Tsy vain̈y atsika foeky raha zen̈y. Kanefa ino raha nataony Jehovah? Nambelany tamy fô jiaby hadisovan̈antsika. (Sal. 103:8-10) Aza adin̈a koa fa atsika ‘tsy maintsy mifankatia.’ (1 Jaona 4:11) Ke fifankatiavan̈a zen̈y amintsika tsy safidy, fa adidy tsy maintsy ataontsika amy piaramanompo. Faharoe, diniha ino mety ho vokany izikoa anao mifidy han̈ambela hadisovan̈a. Mety han̈ampy olo nan̈ano raha ratsy taminao io anao izikoa man̈ano zen̈y. Hampiray sain̈y fiangonan̈a koa raha zen̈y sady hiaro fifandraisan̈anao amy Jehovah. Hahatsiaro hahivankivan̈a mare anao. (2 Kor. 2:7; Kol. 3:14) Farany, mivavaha amy Jehovah, fotony izy man̈iraka atsika han̈ambela hadisovan̈a io. Aza ambela handrobaka fihavanan̈anao amy piaramanompo foeky i Satana. (Efes. 4:26, 27) Mila fan̈ampian̈a baka amy Jehovah atsika izikoa tsy tiho voafandrikiny Satana.

15. Eraka raha koran̈iny Kolosianina 3:13, ino raha mety ataonao izikoa misy piaramanompo nandratra fônao?

¹⁵ Akory izikoa namparary fônao mare raha nataony rahalahy na ranabavy araiky? Koa zen̈y raha misy, ataova zay raha azonao atao,  hampatsara fihavanan̈anaro. Koràn̈a amy Jehovah raha tsapanao, avio iangavia izy han̈ampy anao ndreky hitahy olo namparary fônao io. Iangavia koa Jehovah han̈ampy anao hahita toetry tsarany piaramanompo io, ke nahavy Jehovah ho tia izy. (Lioka 6:28) Izikoa ndraiky tsy mety miala amy jerinao foeky raha ratsy nataony taminao io, diniha akory fomba ten̈a tsara mety hikoran̈anao aminany. Sitrany fo anten̈a mieritreritry fa tsy kiniany nan̈ano raha namparary fônten̈a in̈y. (Mat. 5:23, 24; 1 Kor. 13:7) Ke aleva onon̈o raha zen̈y lera anao mikoran̈a aminany. Akory ndraiky izikoa izy tsy man̈eky hihavan̈a aminao? Aza rivan̈a fa mandifera fo, avio manàn̈a faharetan̈a. (Vakia Kolosianina 3:13.) Ty ny raha ten̈a maventy: Aza mitana heloko ampô foeky. Mety ho robaka fihavanan̈anao amy Jehovah izikoa anao mitana heloko ampô. Aza ambela hisy raha foeky hanafintohin̈y anao, amy zen̈y ho hita tsarabe fa tsisy raha tianao mandilatra Jehovah.​—Sal. 119:165.

16. Ino ma andraikitrintsika tsiaraikiaraiky?

¹⁶ Ravoravo atsika miaraka manompo Jehovah karaha “andiany araiky”, sady amy zen̈y ‘piambin̈y araiky fo’ mikarakara atsika. (Jaona 10:16) Karaha ty koran̈iny boky Voalamina mba Hanao ny Sitrapon’i Jehovah, amy pazy faha-165: ‘Tombontsoa tsisy ambaka izy an̈isany olo miray sain̈y karaha zen̈y, kanefa andraikitry koa raha zen̈y.’ Ino andraikitry io? Tokony hiezaka fo atsika han̈ano raha hampisy fihavanan̈a. Mila mifen̈y atsika baka hitovy amy niny Jehovah fomba fahitantsika iro rahalahy ndreky ranabavy aby io. Amy Jehovah, atsika jiaby io “madiniky” aby, kanefa samby valera aminany. Tokony ho karaha zen̈y koa fahitanao iro piaramanompo aby io. Hitany Jehovah sady azony onon̈o raha jiaby ataonao han̈ampian̈a iro ndreky hankahirezan̈a iro. Ke ten̈a ankasitrahiny raha zen̈y.​—Mat. 10:42.

17. Tokony ho tapakevitry han̈ino ma atsika?

¹⁷ Ten̈a tiantsika iro rahalahy ndreky ranabavintsika aby io. Zen̈y mahavy atsika ho tapakevitry ‘tsy han̈ano raha manafintohin̈y’ iro. (Rom. 14:13) Atsika tsy hihevitry fa atsika an̈abon̈abo tozay iro. Mifen̈y fo koa atsika han̈ambela hadisovan̈andro, amy fô jiaby. Ke irarian̈a atsika tsy han̈ano raha hanafintohin̈y olo, fa han̈ano raha ‘hisiany fihavanan̈a ndreky hifampahery’ fo.​—Rom. 14:19.