Ty raha nisoratiny Paoly: ‘Baka tamy fan̈arehako lalàn̈a nahavy zaho naty, izikoa lalàn̈a zahavan̈a, amy zen̈y zaho ho velon̈o niny Zan̈ahary.’​—Gal. 2:19.

Raha nisoratiny aby io misy ifandraisany aminy hevitry maventy araiky nambarany tamy fiangonan̈a ta Galatia, faritany romanin̈y. Sasany tamindro Kristianin̈y aby tan̈y baka nanjary nino raha nampianarindro papianatra sandoko aby io. Papianatra aby io nivolan̈a fa tsy ho avotro zen̈y olo araiky izikoa tsy man̈araka Lalàn̈any Mosesy, intsaka eky lalàn̈a momba famosiran̈a. Paoly ndraiky efa nahay fa efa tsy an̈isany raha takiany Zan̈ahary aminolo manompo izy eky raha zen̈y. Ke nan̈amia porofo matomboko i Paoly han̈ambaran̈a fa tsy marin̈y raha nampianarindro papianatra aby io. Nampiany koa iro Kristianin̈y aby io, baka ho fatatra tsarabe finoan̈andro momba vidipan̈avotan̈a nataony Jesosy Kristy.​—Gal. 2:4; 5:2.

Koran̈iny Baiboly mazava tsara fa olo maty zen̈y tsy mahatsiaro ten̈a foeky. Tsisy vokany aminolo maty koa raha mandalo man̈odidin̈y izy. (Mpito. 9:5) Ke Paoly koa fa nivolan̈a fa ‘naty izy izikoa lalàn̈a zahavan̈a’, tihivolan̈a izy fa tsisy vokany taminany eky Lalàn̈any Mosesy. Efa tsy fiheziny Lalàn̈a io eky baka izy. Natoky baka izy fa ‘ho velon̈o niny Zan̈ahary’ izy, fotony izy nino vidipan̈avotan̈a nataony Jesosy.

Baka tamy fan̈arehany Paoly lalàn̈a nahavy fan̈ovoan̈a zen̈y. Nan̈ino ma? Izy tamy zen̈y vo navy nan̈azava fa ‘baka amy finoan̈a Kristy Jesosy fo han̈ambaran̈a olo araiky ho marin̈y, fa tsy baka aminy asany lalàn̈a.’ (Gal. 2:16) Nisy raha nilàn̈a izy ndraiky Lalàn̈any Mosesy io. Zen̈y nahavy Paoly nivolan̈a tamy Kristianin̈y ta Galatia: ‘Antony nan̈amezan̈a Lalàn̈a io natao han̈aboahan̈a tsarabe fandikandalàn̈a, parpaviany taranaka araiky nan̈anaovan̈a fampan̈antinan̈a io.’ (Gal. 3:19) Lalàn̈a io nan̈aboaka tsarabe fa tsy vitanolombelon̈o tsy lavorary han̈araka raha jiaby koran̈iny Lalàn̈a io. Hita baka amy volan̈a io tsarabe koa fa nila soron̈o lavorary iro. Ke Lalàn̈a io nan̈ampy olo hahay fa i Jesosy “taranaka” io. Konteny Zan̈ahary ho marin̈y olo araiky izikoa mino Jesosy Kristy. (Gal. 3:24) Karaha ataony Paoly iziô, izy nikonteny Zan̈ahary ho an̈isany olo marin̈y, fotony baka tamy fan̈arehany Lalàn̈a io nahavy izy nan̈eky ndreky nino Jesosy. Zen̈y nahavy izy nanjary ‘velon̈o niny Zan̈ahary’, fa ‘maty izikoa lalàn̈a zahavan̈a.’ Zan̈ahary nanjary nibeko izy fa tsy Lalàn̈a.

Nikoran̈a hevitry miran̈a zen̈y koa i Paoly taminizy nanoratra taratasy nandeha tamindro Kristianin̈y ta Roma tan̈y. Ho izy: ‘Rahalahiko aby, baka tamy vatan̈any Kristy, nanjary miran̈a maty anaro izikoa Lalàn̈a zahavan̈a. Afaka amy Lalàn̈a atsika, fotony atsika efa maty amy raha namihezan̈a atsika mare.’ (Rom. 7:4, 6) Voaheloko hofoaty aby lan̈iany olo tambaniny Lalàn̈a io, fotony panota. Tsy zen̈y ndraiky raha tiany Paoly koran̈iny aminy andininy io ndreky amy Galatianina 2:19, fa momba fan̈afahan̈a. Tihivolan̈a izy fa tsy nanankery taminany ndreky taminolo hafa eky Lalàn̈any Mosesy io. Ke nanjary olo afaka iro fotony iro nino soron̈o nataony Kristy.