Zaho teraka ta Amioun, a Liban, taminy 19 May 1940. Taon̈o vitsivitsy tafara tatỳ, zahay jiabiniry olobeko nifindra ta Tripoli. Farandraha be fitiavan̈a eky iro ke nahatsiaro sambatra mare zahay. Zahay nahay Jehovah sady tia izy mare. Dimy mianadahy zahay vaotraka araiky, aroe lelahy avio telo viavy. Zaho faralahy. Papako ndreky mamako tsy rikian̈a tamy tady vola, fa ny raha ten̈a nataondro matomboko tamy fiain̈ananay: Fianaran̈a Baiboly, ndreky fivorian̈a, baka io fan̈ampian̈a olo hahay Zan̈ahary.

Nisy voahosotro maromaro tamy fiangonan̈anay, an̈isanizen̈y i Michel Aboud. Izy nitariky fianaran̈a boky nisy zahay. Ta New York izy nianatra fahamarin̈ana, avio nanomboko nitory ta Liban teto izy, taminy 1921. Nisy ranabavy tanora aroe nahazo diplaomy tamy Sekoliny Gileada koa tamy fiangonan̈anay tao, Anne ndreky Gwen Beavor an̈aran̈andro. Azoko onon̈o fa nan̈aja iro mare Rahalahy Aboud. Nanjary fankahazo mare tamy fiankavian̈anay iro roe mirahavavy io. Ravoravo mare zaho tandraraiky koa fa fanôjy taminy Anne, ta Etazonỳ. Nitraotro tamy Gwen koa zaho tafaranizen̈y. Gwen baka tio nanjary vadiny Rahalahy Wilfred Gooch, avio iro nanompo tamy birôny sampan̈any Londres, an Angletera.

Vitsy fo Vavolombelon̈o Jehovah ta Liban tan̈y, tamy zaho mbala hely. Fa zahay ndraiky nazoto nan̈ambara raha koran̈iny Baiboly taminolo fo, ndray nisy pitondra fivavahan̈a sasany nanohitry zahay. Zaho mahatsiaro zen̈y, misy raha sasany azoko onon̈o. Ambesa tantaraiko aminaro.

Tandraraiky, niaraka nitory tamy tran̈obe araiky zay zahay roeny Sana, anabaviko. An̈atiny zahay nikoran̈a taminolo in̈y, nisy mompera araiky navy baka tan̈y. Hay be fa tsy maintsy nisy olo fo nisin̈aly izy. Komansy nasasahainy mompera io i Sana sady rômotro mare izy, baka io narônjony tamy leskalie tan̈y anabaviko io. Naratra i Sana. Fa nakiry izy, nisy olo nikaiky polisy. Niaraka iro polisy aby io navy, direkty nirakarakaraindro i Sana. Tsara fan̈ahy mare iro. Nindesindro tamy paosty polisy tan̈y mompera io, ke iro koa fa navy tan̈y, hitandro fa kaiky nisy basy taminany. Karaha ty ho sefony polisy taminany: “Ino tsarabe asanao ty? Mampianatra olo raha momba Zan̈ahary sa mampianatra olo hamono olo?”

Azoko onon̈o nisy raha hafa koa nandalo. Nandeha nitory tamy tanàna mitokan̈a araiky zay fiangonan̈anay, ke zahay taminio namôndro bisy. Nandeha mahitsy raha jiaby. Fa izikoa fa ren̈iny mompera tamy tany io tao zahay nitory, nitaon̈o olo marobe izy hanafiky zahay. Nitaorabato zahay foeky iro, ke naratra mare papako. Navoa tamy lohany izy ke nanjary feno lio saoranany jiaby. Nimpody nalaky tan̈atiny bisy tao iro roeny mama. Direkty zahay nan̈araka iro tan̈y koa, sady navozo mare. Tsy mety nadin̈ako raha nivolan̈iny mama taminizy nan̈ano pansiman bainy papa. Ho izy: “A Jehovah e, ambilà hadisovan̈andro! Tsy haindro raha ataondro.”

Nisy fotoan̈a koa zahay namangy lafamìnay, tamy tany favianay tan̈y. Nisy pitondra fivavahan̈a zay hitanay tamy dadilahinay tan̈y. Manan̈a plasy an̈abo pitondra fivavahan̈a io fotony izy eveky. Efa hainy eveky io baka fa Vavolombelon̈o Jehovah iry olobeko. Zaho ndraiky nikoran̈any fa tsy iry olobeko. Kanefa zaho tamy zen̈y mbala tsiota taon̈o! Ho izy taminaka: “E manafo! Nan̈ino anao mbala tsy vita batisa?” Ho zaho taminany: “Zaho mbala hely. Batisa zen̈y raha natao ninolo efa mahay tsarabe raha koran̈iny Baiboly ndreky manan̈a finoan̈a matanjaka.” Halany eveky io raha nivolan̈iko, ke ho izy tamy dadilahiko: “Zafinao io tsy man̈aja olo!”

Mahalan̈a ndraiky zahay tojy raha karaha zen̈y, fa aminy ankapobeny, tsara fan̈ahy sady tia mandray vahiny aby olo baka a Liban. Nahavita nitory taminolo marobe zahay, ary maro tamindro von̈ono nianatra Baiboly.

Nisy rahalahy tanora baka a Venezoelà zay nan̈ano vakansy ta Liban. Zaho tamy zen̈y kadiriny tsaiky mbala mandeha lekoly. Nivory tamy fiangonan̈anay izy, baka io nanjary nifankatia iro roeny Wafa anabaviko. Nan̈ano mariazy iro tafara tatỳ, baka io nipetraka ta Venezoelà teto. Wafa koa fa nanoratra tamy papa, nivolan̈a izy: ‘Anaro mifindrà a Venezoelà atỳ.’ Ngoma zahay mare zen̈y baka izy. Isaka teteky izy nandresy lahatra zahay, ke farany zahay nifindra teto.

 Taminy 1953 zahay navy ta Venezoelà teto. Ta Caracas tan̈y zahay nipetraka, tankilany tran̈o nipitrahany prezidan. Mbo hely zaho tamy zen̈y, ke ravoravo mare zaho koa fa nahatazan̈a prezidany Venezoelà tan̈atiny tomôbily tsara be. Somary sahiran̈a hely ndraiky iry olobeko zay vo zatra fiain̈ana ta Venezoelà teto, fotony vaovao aby raha jiaby: Tany, fivolan̈ana, fomba, hanin̈y, baka io toetrandra. Kanefa, egy iro mba zatrazatra hely, nisy raha nampalahelo mare nandalo.

Nanomboko narary i Papa. Tsy nampoizinay raha zen̈y fotony izy olo natanjaka avio salama fo. Zahay tsiary naharen̈y izy narary. Kanefa, hita fa navoany kansera izy, ke izy baka tio nididian̈a. Nampalahelo fa, naty izy herin̈iandra tafaranizen̈y.

Tsy haiko foeky fomba mety hivolan̈ana alahelonay. Zaho tamy zen̈y mbala vo 13 taon̈o fo. Tampoko taminay raha nandalo io. Nahiziky taminay mare andra tamy zen̈y! Elaela kony vo nikeny sain̈iny mamanay oe naty vadiny! Kanefa ny raha tsy maintsy nianaranay, fiain̈ana tsy maintsy mitohy. Vitanay fo niatriky alahelonay in̈y fotony Jehovah nan̈ampy zahay. Tihan̈ampy iry havako mare zaho koa fa vita fianarako tamy lycée ta Caracas. Zaho tamy zen̈y 16 taon̈o.

Sana tamy zen̈y efa nanambady. Rubén Araujo an̈aran̈any vadiny. Nan̈ano Sekoliny Gileada i Rubén, fa izy koa fa nahazo diplaomy, nimpody ta Venezoelà ndraiky. Nanapakevitry nifindra ta New York iro tafara tatỳ. Tiany lafamìko hianatra taminy iniversite zaho, ke nandeha ta New York zaho nianatra fotony iry Rubén efa tan̈y. Tamindro zaho nipetraka. Nan̈ampy zaho handroso arapan̈ahy mare iro roe fivadiany. An̈isany fiangonan̈a miteny espan̈ioly zaho tan̈y. Maro koa rahalahy matotro tao, an̈isanizen̈y i Milton Henschel ndreky Frederick Franz. Samby an̈isany Betelany Brooklyn aby iro. Ravoravo mare zaho nahay iro.

Koa fa ho tapitry taon̈o voanalohany nianarako taminy iniversite, komansy nisalasala momba raha handeha hataoko amy fiain̈ana zaho. Nisy lahatsoratra tamy Tilikambo Fiambesan̈a zay nivakiako, ke izio mikoran̈a momba Kristianin̈y nanan̈a tanjon̈o tamy fanompoan̈a Jehovah. Nidinihiko tsara lahatsoratra io. Hitako fa sambatra mare iro pisava lalan̈a ndreky Betelita tamy fiangonan̈anay aby tao, ke zaho mba tiho karaha zen̈y. Kanefa zaho taminio mbala tsendriky vita batisa. Ke tontohitry zaho fa zaho mila manokanten̈a amy Jehovah. Zen̈y ankitin̈y raha nataoko, ke tamy 30 Marsy 1957 zaho vita batisa.

Nanomboko nieritreritry han̈ano fanompoan̈a manontolo andra zaho koa fa vita batisa. Tihan̈ano pisava lalan̈a zaho, kanefa hitako sarotro taminaka raha zen̈y, fotony zaho mbala nianatra taminy iniversite. Nikoran̈iko tamindry havako, an̈isanizen̈y mamako, fa zaho tsy tihianatra aminy iniversite eky fa himpody a Venezoelà han̈ano pisava lalan̈a. Matetiky zahay nifanoratra momba raha zen̈y.

Nimpody ta Caracas zaho tamy Ziain 1957. Zaho koa fa navy tan̈y, hitako sahiran̈a mare iry havako, ke nanjary niasa koa zaho han̈ampian̈a  iro. Loso eritreritry zaho: ‘Ino eky raha ataoko?’ Nahita asa tamy banky zaho. Fa zaho fo tihan̈ano pisava lalan̈a mare. Ary fa zen̈y edy antony nimpodianako ta Caracas. Tapakevitry zaho han̈ano iro roe. Safe, salakady niasa zaho nan̈ano pisava lalan̈a. Zen̈y fo nataoko tan̈atiny taon̈otaon̈o. Maro raha tsy maintsy nian̈iko fa zaho ravoravo fo.

Nahainitombo fo haravoan̈anaka, zaho koa fa nitraotro tamy ranabavy tanora baka an Allemagne zay. Sylvia an̈arany. Nifindra ta Venezoelà iro jiabindry olobeny. Zatôvo izy sady ten̈a tia Jehovah. Nan̈ano mariazy zahay. Koa fa nandeha fotoan̈a, zahay niteraka aroe mianadahy: Michel ndreky Samira. Zaho tamy zen̈y mbala nikarakara mamanay. Nipetraka niaraka taminay foeky izy tamy farany. Tsy maintsy niala pisava lalan̈a zaho baka hahavita hikarakara fianakavian̈anaka. Kanefa mbala taminaka tao fo toetsain̈iny pisava lalan̈a. Nan̈ano pisava lalan̈a pan̈ampy fo zahay roe fivadiany, isaka afaka nan̈ano zen̈y, lera fotoan̈any vakansy.

Mbala nandeha lekoly zanakay tamy raha nitantaraiko tan̈abo tarỳ in̈y nandalo. Azo koran̈iny nilamin̈y mare fiain̈ananaka tamy zen̈y. Nan̈aja zaho aby koa iro piasany banky aby io. Kanefa, panompony Jehovah zaho ke zen̈y ny tiako hahaizanolo zaho. Tsy nafaka tamy jerinaka foeky raha zen̈y taminandra io. Ke nidinihinay fivadiany vola tampelantan̈anay. Efa hainay fa zaho koa hiala aminy asanaka tamy banky io, tsy maintsy hamezany banky vola be. Zahay tamy zen̈y koa tsisy trosa. Ke izikoa zahay man̈atsotra fiain̈ananay, ho ampy zahay an̈atiny fotoan̈a elaela vola ho azonay io.

Tsy mora taminaka nan̈ano fanapahankevitry in̈y. Fa nahatsara izy, vadiko ndreky mamako samby nan̈eky fanapahankevitry io. Haravoan̈a ma ninaka tamy zen̈y! Ho afaka han̈ano pisava lalan̈a ndraiky zaho. Karaha nandeha mahitsy raha jiaby. Fa tafara helinizen̈y, nisy vaovao tsy nampoizin̈y niboaka.

Tandraraiky zay dokoteranay nivolan̈a fa i Sylvia mavesatra. Haravoan̈a ma ninay tamy zen̈y. Tsy nampoizinay foeky! Han̈ano akory fo programo han̈ano pisava lalan̈a in̈y? Somary niasaloha hely ndraiky zahay, fa tsy nahadin̈y ela. Ndray izy aby nanjary efa tsy din̈inay andra haviany zaza vao io. Fa ty raha tsy mety niala tamy jerinaka: ‘Asa raha mbala hahavita han̈ano pisava lalan̈a edy zaho andra araiky an̈y?’

Nifampikoran̈a tsara zahay roe fivadiany momba tanjon̈onay io. Zahay koa fa nandiniky  tsarabe, tapakevitry han̈ano pisava lalan̈a fo zahay. Lelahy zanakanay io koa fa teraka, tamy fanjava Avrily 1985. Niala niasa tamy banky fo zaho ke nimpody nan̈ano pisava lalan̈a ndraiky, tamy Ziain 1985. Nanjary an̈isany Komitiny Sampan̈a zaho tafara tatỳ. Tsy ta Caracas tany nisy birôny sampan̈a io, ke tsy maintsy nandeha tamy lalan̈a kadiriny 80 km zaho vo navy tan̈y. Indroe na intelo isaka herin̈iandra zaho nan̈ano dia zen̈y.

Ta La Victoria tan̈y nisy Betela io. Tihipetraka marikidrikitry Betela io zahay jiaby fehiny, ke nanapakevitry zahay fa hifindra tan̈y. Fiovan̈a maventy taminay jiaby raha zen̈y. Ten̈a mankasitraka fianakavian̈anaka zaho fotony iro nan̈eky fanapahankevitrinaka. Iro koa nanan̈a toetsain̈y tsara, ke ten̈a nan̈ampy zahay raha zen̈y. Von̈ono hikarakara mama koa i Baha anabaviko. I Samira ndreky Gabriel koa nan̈eky hiala namandro ta Caracas. Iro roe mianadahy baka mbala nipetraka taminay, fa i Michel ndraiky efa nanambady. I Sylvia ndraiky efa zatra fiain̈ana amy tanàn̈a maventy, kanefa tany nipitrahanay io tanàna hely. Zahay jiaby foeky tsy maintsy nianatra nipetraka tamy tran̈o helihely. Maro fan̈ovoan̈a tsy maintsy nataonay, zahay koa fa nifindra ta La Victoria.

Mbala nisy fiovan̈a hafa koa tafaranizen̈y. Nanambady i Gabriel. I Samira ndraiky nanjary nitokantran̈o. Zahay roeny Sylvia ndraiky nanjary navoakaiky hanompo tamy Betela taminy 2007. Mbala ato fo zahay firaka iziô. Antipan̈ahy i Michel zanakanay talan̈olo, avio iro roeny Monica vadiny miaraka man̈ano pisava lalan̈a. Antipan̈ahy koa i Gabriel. Mipetraka an Italie iro roeny Ambra vadiny. I Samira ndraiky pisava lalan̈a sady man̈ano asa antsitrapô amy Betela. Baka amy tran̈onany fo izy miasa.

Ten̈a maro fanapahankevitry maventy tsy maintsy nataoko, fa zaho ndraiky tsy nanen̈iny foeky. Ary mbala ho miran̈a fanapahankevitry efa nataoko aby in̈y fo raha hataoko, izikoa zaho mbala mandalo raha karaha in̈y. Maro fanendren̈a ndreky tombontsoa nazoko tamy fanompoan̈a Jehovah, ary namparavoravo zaho aby jiaby. Hitako tan̈atiny taon̈o maro jiaby zen̈y fa ten̈a mila mifandray marikitry amy Jehovah fo atsika. Jehovah afaka man̈amia atsika fiadanan̈anany, na be na hely fanapahankevitry mila ataontsika. Fiadanan̈anany io lastio ‘mbala bebeny eritreritry jiaby.’ (Fil. 4:6, 7) Tianay roeny Sylvia mare fanompoan̈a masin̈y ataonay amy Betela. Tsapanay fa nitahiany Jehovah mare zahay, fotony tsy nadin̈anay foeky izy tamy fanapahankevitry jiaby nataonay.