1. Ino ma raha ataonolo tia mifan̈oesa?

MARO olo tia ten̈a amy donia ty, ke zen̈y mahavy iro manjary tia mifan̈oesa. Matetiky raha fohita amindro amy sehatrany varotro aby io, iro mifan̈oesa. Tsy men̈atra foeky iro man̈ano raha havoazany adversairandro raha, fotony tiandro iro fo mahômby. Karaha zen̈y koa amy resaka spaoro. Misy olo ten̈a efa von̈ono hikafiry naman̈a aminy ekipy hafa, fotony izy mila mandresy fo. Ny tsaiky mandeha a lekoly ndraiky mitrisy, baka ho tafiditry aminy iniversite na lekoly malaza araiky. Amy maha Kristianin̈y atsika, haintsika tsarabe fa ratsy raha aby zen̈y. “Asany nofotro” ivolan̈ana iro io amy Baiboly ao. (Gal. 5:19-21) Kanefa mety tsy ho tontohitry aby rahalahy na ranabavy sasany fa efa manan̈a toetsain̈y tia mifan̈oesa io izy, ary toetsain̈y io mora mifindra. Tsara atsika mandiniky zen̈y, fotony tsy hiray sain̈y fiangonan̈a izikoa misy olo tia mifan̈oesa ao.

2. Ino ma raha hidinihintsika ato?

² Hidinihintsika ato raha mety hahavy atsika ho tia mifan̈oesa. Handiniky modeliny panompony Jehovah tsy nivadiky taloha tan̈y koa atsika, misy ahaizantsika ino raha nan̈ampy iro tsy ho tia mifan̈oesa. Fa alô zahavantsika antsendriky ino antony mahavy atsika manompo Jehovah.

3. Ino aby fan̈ontanian̈a tokony hiritriretintsika?

³ Tsara dinihintsika tsindraikindraiky, ino antony mahavy atsika manompo Jehovah. Man̈ontania ten̈a karaha ty: “Mila mampiran̈a ain̈inaka aminolo fo ma zaho zay zaho vo mahay karakory marin̈y valeranaka? Ino ma antony mahavy zaho tihifen̈y mare amy fiangonan̈a ao? Tiako ho hita ma fa zaho ny ten̈a mahavita raha farany tsara? Sa zaho tihan̈amia Jehovah ny raha farany tsara baka aminaka?” Nan̈ino ma ten̈a ilain̈a  mandiniten̈a karaha zen̈y? Diniha raha koran̈iny Volan̈a Zan̈ahary momba zen̈y.

4. Izikoa Galatianina 6:3, 4 zahan̈a, nan̈ino atsika tsy tokony hampiran̈a ain̈intsika aminolo?

⁴ Koran̈iny Baiboly fa tsy tokony hampiran̈a ain̈intsika aminolo hafa foeky atsika. (Vakia Galatianina 6:3, 4.) Nan̈ino? Fotony, amy lafiny araiky, atsika koa mihevitry fa atsika ny ten̈a mahay raha mandilatra olo hafa na atsika tsaratsara tozay iro, mety han̈ambony ten̈a atsika. Kanefa mety halemy trôko ndraiky atsika izikoa mieritreritry fa olo hafa mahay na zatôvo mandilatra atsika. Ke tsy fahendrena foeky mampiran̈a ain̈intsika aminolo hafa. (Rom. 12:3) Karaha ty ho Katerina, * ranabavy mipetraka a Gresy an̈y: “Zaho taloha zatra nampiran̈a ain̈inaka taminolo niritriretiko ho tsara mandilatra zaho, na taminolo hitako mahaihay mitory tozay zaho, na taminolo mora mahazo naman̈a. Ke nanjary nahatsapaten̈a ho tsisy dikany foeky zaho baka tio.” Tsaraova fa tsy nohony atsika tsara saora, na tianolo, na mahay mikoran̈a nahavy Jehovah nitaon̈o atsika hanompo izy, fa nohony atsika tia izy ndreky von̈ono han̈araka raha volan̈iny Zanany.—Jaona 6:44; 1 Kor. 1:26-31.

5. Ino raha ianaranao baka amy Rahalahy Hyun?

⁵ Ty koa raha mila iritriretintsika: “Akory fahaizanolo zaho, olo tia fihavanan̈a sa olo tia malo?” Zen̈y iziô raha nambarany Hyun, rahalahy mipetraka a Corée Atsimo an̈y. Nisy fotoan̈a izy nieritreritry fa mifan̈oesa taminany rahalahy sasany manan̈a andraikitry. Karaha ty ho izy: “Matetiky zaho mikritìky iro rahalahy aby io, avio zay raha volan̈indro famarako fo. Ke tsy nampiray sain̈y fiangonan̈a foeky toetsain̈inaka zen̈y.” Nisy kamaradiny Hyun sasany nan̈ampy izy ho tontohitry, ke niova izy koa fa nandeha fotoan̈a. Amy zioty i Hyun efa antipan̈ahy, sady vitany tsara koa andraikitrinany. Akory fo anao? Hitanao nanjary tia mifan̈oesa ma anao ao, ke efa tsy man̈ano raha hisiany fihavanan̈a? Izikoa zen̈y, mila miova malaky anao.

6. Izikoa Galatianina 5:26 zahan̈a, ino aby toetry ratsy mety hahavy atsika ho tia mifan̈oesa?

⁶ Vakia Galatianina 5:26. Araiky amy toetry ratsy mety hahavy atsika ho tia mifan̈oesa, poerapoera. Tia ten̈a olo poerapoera karaha zen̈y. Mety ho tia mifan̈oesa koa atsika izikoa be fô olo. Olo mafana fô naman̈a baka, tsy vitany tihahazo raha anan̈anolo io fo fa ataony koa raha hahavy olo io tsy hanan̈a izio. Ny marin̈y aminany, misy fankahalan̈a olo karaha zen̈y. Ke tsy tiantsika foeky hanan̈a toetry ratsy aby zen̈y.

7. Ino ma maharatsy poerapoera ndreky be fô olo? Hazavà aminy ohatra.

⁷ Toetry ratsy aroe tia mipoerapoera ndreky be fô olo io, mety ampitovisin̈y amy loto an̈atiny kerôzainy na soliky mampandeha avion. Mety mbala hahavita hitilin̈y fo avion io, kanefa mety ho fampin̈y tiô mitondra kerôzainy io azony loto aby ao. Ke hihen̈y angovony avion io, baka io ho latsaka izio. Han̈ano karaha zen̈y koa olo araiky izikoa izy poerapoera ndreky be fô olo. Mety mbala hahavita hanompo Jehovah fo antsendriky izy, kanefa tsy ho tody lavitry. (Ohab. 16:18) Tsy hanompo Jehovah eky izy amy farany, ke ho hisy vokany ratsy aminany ndreky aminolo hafa raha zen̈y. Ke ino raha mety ataontsika baka atsika tsy ho poerapoera ndreky tsy ho be fô olo?

8. Ino raha han̈ampy anao tsy ho poerapoera?

⁸ Ino raha han̈ampy anao tsy ho poerapoera? Mila alainao onon̈o torohevitriny apostoly Paoly tamindro Filipianin̈y aby io. Ho izy: ‘Aza man̈ano raha baka amy fitiavan̈a malo na  baka amy fan̈irian̈a tiho hita, na ino zen̈y na ino, fa irarian̈a anaro samby hanetry ten̈a, ke han̈ano olo hafa ho an̈abo mandilatra ain̈inaro.’ (Fil. 2:3) Ohatra iziô, mety misy rahalahy na ranabavy mahay raha mandilatra anao. Fa izikoa anao mihevitry izy ho an̈abo mandilatra anao, anao tsy mety hifan̈oesa aminany. Ndray izy aby, ho ravoravo anao fotony fahaizan̈anany ampiasainy hanompoan̈a Jehovah ndreky hideran̈a izy. Ary rahalahy na ranabavy io koa man̈araka torohevitriny Paoly io, ho hitany toetry tsaranao, ke zen̈y fo hifantaohany. Hihavan̈a tsara ndreky hiray sain̈y fiangonan̈a, izikoa samby mifen̈y man̈ano zen̈y aby atsika jiaby.

9. Ino raha mila ataonao baka anao tsy ho be fô olo?

⁹ Tsy ho be fô olo anao izikoa man̈eky fa tsy raha jiaby zay ho hainao na ho vitanao aby. Izikoa anao manetry ten̈a, anao tsy handany lera han̈aboaka aminolo jiaby fa anao mahay mandilatra iro. Mifanohitry amy zen̈y, hifen̈y fo anao hianatra baka aminolo mahay raha mandilatra anao. Ohatra iziô misy rahalahy araiky mahay man̈ano kabaro mare; anao mety man̈ontany izy fomba fan̈oman̈any kabaro. Akory fo basy izikoa misy ranabavy araiky mahay mandoky mare? Anao mety man̈ontany izy karakory ataony, na mangataka sosokevitry han̈ampy anao hankatsara fahaizanao mandoky. Izikoa ndraiky anao tanora fa sarotro aminao mahazo naman̈a, anao mety mangataka torohevitry baka amy piaramanompo hitanao fa mora mahazo naman̈a. Tsy hafana fô naman̈a anao izikoa man̈ano raha aby zen̈y sady hahaihitombo fo fahaizan̈anao.

10. Ino ma raha nanahiran̈a Gideona?

¹⁰ Diniha baka raha navoa i Gideona. Baka amy fokony Manase i Gideona io. Izy ndreky maramilanany 300 lahy koa fa niady tamy fahavalondro, iro nandresy fotony Jehovah nan̈ampy iro. Nahavita nirehareha iro tamy zen̈y koa tihan̈ano, fa tsy zen̈y raha nataondro. Izikoa fa nandeha fotoan̈a, ren̈indro lelahy aby tamy fokony Efraima raha zen̈y, ke iro nan̈aton̈o Gideona. Fa ny raha nisy, iro  tsy nidera Gideona fa nitady malo taminany. Tamy Gideona nandeha niady tamy fahavalony Zan̈ahary, izy tsy nikaiky iro, ke raha zen̈y nan̈etsiky ambompôndro. Iro nifantoko be loatra tamy fomba hiarovan̈a voninahitriny fokondro ke nadin̈andro foeky fa ty ny raha ten̈a maventy: Gideona vo baka nan̈amia voninahitry an̈aran̈any Jehovah sady niaro vahoakanany.​—Mpits. 8:1.

11. Ino ma raha nambarany Gideona tamindro lelahy aby baka amy fokony Efraima?

¹¹ Nanetry ten̈a i Gideona, ke ho izy tamindro lelahy baka tamy fokony Efraima aby io: ‘Ino ma raha vitako izikoa ampiran̈iny amy raha vitanaro?’ Gideona baka tio nampatsiaro iro fa, ndray iro koa mba nampiany Jehovah, ke nahavita raha niavaka. Nanjary ‘kalma iro ke tsy neloko’ taminany eky. (Mpits. 8:2, 3) Von̈ono fo i Gideona hanetry ten̈a, baka ho tsara fihavanan̈a fo vahoakany Jehovah.

12. Ino raha ianarantsika baka amindro Efraimita aby io ndreky baka amy Gideona?

¹² Ino raha ianarantsika baka amy tantara io? Atsika tsy tokony hitady voninahitry niny ten̈antsika karaha nataondro Efraimita aby io, fa tokony hitady fomba han̈amezan̈a voninahitry Jehovah fo. Mety mangala tahaka raha nataony Gideona koa lohampianakavian̈a ndreky antipan̈ahy. Izikoa misy olo meloko baka tamy raha nataonao, diniha antsendriky ino raha nahavy izy ho meloko. Deray izy amy raha tsara vitany. Ho vitanao han̈ano zen̈y izikoa anao manetry ten̈a, intsaka eky izikoa olo io diso hevitry. Sitrany man̈ano raha hisiany fihavanan̈a amy piaramanompo, tozay hiezaka han̈aporofo aminany fa atsika manan̈a ny marin̈y.

13. Ino ma raha niaretany Hana, baka io karakory nataony niatriky zen̈y?

¹³ Atsika iziô ndraiky handiniky tantarany Hana. Levita i Elkana vadiny, ary tiany mare i Hana. Fa problemo fo, nisy vady hafa i Elkana, Penina an̈arany. Marin̈y ndraiky fa i Hana ten̈a tiany Elkana mandilatra Penina, fa i Hana tsy niteraka. Penina ndraiky nananjanaka maro. Penina ‘tsy voly nan̈adroadro ndreky nangala baraka i Hana.’ Raha zen̈y ten̈a nampalahelo i Hana, ke ‘nitomoan̈y fo izy sady tsy nahalany hanin̈y’ foeky. (1 Sam. 1:2, 6, 7) Ndray zen̈y, Baiboly tsy mivolan̈a foeky fa i Hana namaly faty. Nikoran̈iny tamy Jehovah raha jiaby tamy fônany tao, avio izy natoky fa Jehovah han̈ampy izy. Ke niova ma Penina tafara tatỳ? Tsy koran̈iny Baiboly raha zen̈y. Fa ny raha haintsika, nanjary nilamin̈y fo fôny Hana ndreky sain̈inany, tafara tatỳ. “Hita tamy saoranany koa fa izy tsy niasaloha eky.”​—1 Sam. 1:10, 18.

14. Ino ma raha ianarantsika baka aminy Hana?

¹⁴ Ino ma raha ianarantsika baka aminy Hana? Izikoa misy olo tihifan̈oesa aminao, tsaraova fa tsy voatery han̈ano karaha zen̈y  anao, ke hifan̈oesa aminany koa. Aza mamaly faty fa ataova fo raha hihavanan̈a. (Rom. 12:17-21) Ndray izy tsy miova, hilamin̈y jerinao avio anao ho ravoravo.

15. Ino aby raha nampitovy i Paoly ndreky Apolosy?

¹⁵ Farany, hidinihintsika ino raha mety ianarantsika baka amy pianatrany Jesosy aroe ty: Apolosy ndreky Paoly. Samby nahay Soratra Masin̈y iro roe lahy. Iro hainolo avio iro samby nahay nampianatra mare. Tsy zen̈y fo fa samby nahavita nan̈ampy olo maro nanjary pianatrany Kristy koa iro. Kanefa fankahazo tsara iro roe mirahalahy. I Paoly tsy be fô i Apolosy, ary Apolosy koa karaha zen̈y.

16. Olo karakory ma i Apolosy?

¹⁶ ‘Olo baka a Aleksandria’ i Apolosy. Nalaza mare tanàna io tamy taonjato voanalohany fotony maro olo nandeha nianatra tan̈y. “Nahay nan̈ano kabaro” koa Apolosy, “sady nahay Soratra Masin̈y tsarabe.” (Asa. 18:24) Taminy Apolosy ta Korinto, nisy piaramanompo sasany nan̈aboaka tsarabe fa izy ny ten̈a tiandro mandilatra rahalahy hafa, an̈isanizen̈y Paoly. (1 Kor. 1:12, 13) Mampisaratsaraka toetsain̈y karaha zen̈y. Apolosy ma nankasitraka raha zen̈y? Tsy honohono! Akory ahaizantsika zen̈y? Fotony Paoly tafara tatỳ nampirisiky izy nimpody ta Korinto tan̈y ndraiky. (1 Kor. 16:12) Ke tsy ho nan̈iraka izy himpody tan̈y foeky i Paoly izikoa izy nihevitry fa nampisaratsaraka fiangonan̈a i Apolosy. Hita baka amy zen̈y fa nampiasainy Apolosy tamy fomba tsara fahaizan̈anany, fotony izio nampiasainy hitorian̈a vaovao tsara ndreky ampahirezan̈a piaramanompo. Nanetry ten̈a koa izy. Ohatra iziô, tantarainy Baiboly fa Apolosy tsy neloko foeky, Akoila ndreky Prisila koa fa ‘nan̈azava taminany tamy fomba marin̈y tsarabe lalan̈any Zan̈ahary.’​—Asa. 18:24-28.

17. Ino raha nataony Paoly baka hihavan̈a tsara olo jiaby?

 ¹⁷ Maro olo nivolan̈a fa i Apolosy mahay mandilatra Paoly. Ary hainy Paoly tsarabe raha tsara vitany Apolosy tamy fanompoan̈a. Kanefa Paoly tsy nan̈ohatra nifan̈oesa taminany foeky. Nanetry ten̈a ndreky nahay nandanjalanja fo i Paoly, baka io nikeny fa misy erany raha mety ho vitany. Hita tsarabe raha zen̈y tamy torohevitry namezany tamy fiangonan̈a ta Korinto. Marin̈y fa nisy olo nivolan̈a karaha ty: ‘Zaho niny Paoly’; fa raha zen̈y tsy nambelany hampirehareha izy. Nirahiny nan̈amia voninahitry Jehovah Zan̈ahary ndreky Jesosy Kristy fo iro.​—1 Kor. 3:3-6.

18. Izikoa 1 Korintianina 4:6, 7 zahan̈a, ino raha ianaransika baka aminy Apolosy ndreky Paoly?

¹⁸ Ino raha ianarantsika baka aminy Apolosy ndreky Paoly? Mety efa miezaka mare atsika man̈ano erakany vitantsika amy fanompoan̈a Jehovah. Mety efa maro koa donko olo nampiantsika nandroso ke vita batisa. Ndray zen̈y, haintsika fa tsy ho vitantsika foeky raha aby zen̈y izikoa atsika tsy nampiany Jehovah. Ino koa raha hafa ianarantsika baka amindro? Izikoa anao manan̈a andraikitry an̈ivony fiangonan̈a, araraota raha zen̈y han̈anaovan̈a raha hisiany fihavanan̈a. Ravoravo atsika izikoa iro antipan̈ahy ndreky pan̈ampy amy fanompoan̈a aby io man̈ampy atsika hiray sain̈y. Man̈ano zen̈y iro, koa fa man̈amia torohevitry baka amy Baiboly. Iro tsy misariky sain̈inolo amindro, fa man̈ampy olo jiaby an̈ivony fiangonan̈a han̈araka raha nivolan̈iny Jesosy ndreky hangala tahaka modely nambelany.​—Vakia 1 Korintianina 4:6, 7.

19. Ino ma raha mila ataontsika tsiaraikiaraiky? (Zahava koa “ Aza Mifan̈oesa.”)

¹⁹ Samby isany fahaizan̈a namezany Jehovah atsika tsiaraikiaraiky. Ke raha zen̈y tokony hampiasaintsika ‘hifanompoan̈a.’ (1 Pet. 4:10) Anao mety hivolan̈a fa hely fo raha vitanao. Mety ampitovisin̈y amy zaitry raha zen̈y. Zaitry madinidiniky mitambatambatra mahavita lamba araiky. Ke ndray karaha hely fahitan̈a raha vitanao, man̈ampy fiangonan̈a hiray sain̈y fo raha ataonao zen̈y. Ke irarian̈a atsika samby hiezaka mare baka tsy hifan̈oesa foeky. Tokony ho tapakevitry koa atsika han̈ano zay vitantsika, hampisy fihavanan̈a ndreky firaisantsain̈y an̈ivony fiangonan̈a.​—Efes. 4:3.