Tiany Jehovah ho sambatra ndreky ho fankahazo tsara fo olo fivadiany. (Mat. 19:4-6) Izikoa anao mieritreritry hanambady, akory mety ahitanao vady tsara? Jehovah niasa raha jiaby, ke hainy ino aby raha mila ataonolo aroe beky ho sambatra fo vadian̈andro. Ho hitanao tsarabe fahamarin̈any raha zen̈y, izikoa arehanao toro lalan̈anany. Alô hizahavantsika sasany amy toro lalan̈a aby zen̈y.

Voanalohany, mila ikentsika fa “fô io mamitaka mandilatra raha hafa jiaby, sady sarotro fihezin̈y koa.” (Jer. 17:9) Ohatra iziô, misy lelahy ndreky man̈angy samby mitady vady, ke iro baka io fanôjy. Mety hanomboko hiaraka iro izikoa fa miady koran̈andro. Kanefa amy fotoan̈any iro mampiaraka io, betibetiky fo mety efa tafiditry mare fitiavan̈a, ke tsy hisain̈y tsara eky iro. Fa ny raha misy, izikoa fihetsehampô fo mibeko iro, ke mahavy iro hanapakevitry hiditry amy vadian̈a, ho diso fan̈antinan̈a edy iro. (Ohab. 28:26) Ke tsy tsara izikoa somilany iro vo miaraka in̈y, efa mifampikoran̈a fihetsehampôndro lalin̈y. Tsy tokony hifan̈amia toky koa iro, izikoa iro mbala tsendriky fankahay tsarabe.

Ohabolana 22:3 mivolan̈a: “Olo misain̈y koa fa mahita raha mety hamono, izy miary. Fa olo matify jery ndraiky man̈aton̈o fo ke azondraha.” Ino ma ifandraisanizen̈y aminolo mitady vady aminy Internet? Ino problemo? Sasany aminolo nan̈ano zen̈y navoafitaka fotony iro nanjary tia olo hitandro tao, kanefa tsendriky haindro aby ten̈a toetrinolo io. Mampalahelo fa efa voa iro zay vo tontohitry. Misy olo tsy manjary koa mamôron̈o kaonty amy Site Internet na applications fitadiavan̈a vady, kanefa vandy areriky raha momba izy ampidiriny an̈aty ao. Kaonty in̈y amy zay avio hindesiny hangalàn̈a vola aminolo matifitify jery. Sasany taminolo tsy manjary aby io niaboko ho Vavolombelon̈o Jehovah foeky.

Ty koa problemo hafa mety hiboaka. Misy amindro Site Internet fitadiavan̈a vady aby io mampiasa kalkìly, misy hahaizan̈a olo man̈eva miaraka. Kanefa tsiary nisy porofo nahitan̈a fa mahômby kalkìly aby zen̈y. Fanapahankevitry hanambady zen̈y tsy raha atao saoma; izio raha matomboko. Ke tsy fahendrena foeky izikoa baka amy kalkìly ataony programo aminy ordinatera mahavy olo araiky hanapakevitry hanambady olo araiky. Tsy miran̈a amy toro lalan̈any Baiboly foeky iro kalkìly aby io, fotony toro lalan̈any Baiboly zaraiky fo ny ten̈a atokisan̈a.​—Ohab. 1:7; 3:5-7.

Misy toro lalan̈a araiky aminy Ohabolana 14:15. Karaha ty ho izy ao: “Olo mbala tsy nandia fiain̈ana mino zay raha volan̈inolo, fa olo misy jery ndraiky mandiniky dianany tsiaraikiaraiky.” Ino ma dikanizen̈y?  Alohany anao hanapakevitry hanambady olo araiky, mila hainao tsarabe antsendriky izy. Kanefa, ho sarotro aminao hahay tsara olo io, izikoa baka aminy Internet anao mifandray aminany. Marin̈y ndraiky fa mety ho hitanao aminy Internet ao raha mombamomba izy, ary izy koa mahita raha mombamomba anao. Fa, sakinao mivolan̈a fa ten̈a hainao tsarabe i olo io? Misy olo sasany nieritreritry fa nahita olo mety tamindro zen̈y. Kanefa iro koa fa nitraotro taminolo io, diso fan̈antinan̈a iro. Tsy erakany niritriretandro izy foeky i olo io.

Karaha ty ho Davida panoratra salamo: “Zaho tsy minaman̈a aminolo pamitaka, baka io zaho tsy mifanerasera aminolo manitriky ny ten̈a maha izy izy.” (Sal. 26:4) Maro olo mihevitry fa tsy mampan̈ino aby mavandy koa fa mameno raha mombamomba anten̈a amy Site Internet fitadiavan̈a vady, amy zen̈y maro olo ho taitry amindro. Asitrikindro foeky ny ten̈a toetrindro, avio misy amindro io koa miaboko ho Vavolombelon̈o Jehovah. Fa diniha ty: Azonao antoko tsarabe fa ten̈a Kristianin̈y vita batisa i olo io? Ten̈a matotro ma izy? Mifandray tsara amy Jehovah ma izy? Hajainy piaramanompo amy fiangonan̈a misy izy ma izy? Sa izy tsy ten̈a ohatra tsara na tsy naman̈a tsara foeky? (1 Kor. 15:33; 2 Tim. 2:20, 21) Izikoa toro lalan̈a amy Baiboly zahavan̈a, ten̈a afaka manambady ma izy? Mila hainao tsarabe valiny fan̈ontanian̈a aby io. Kanefa ho sarotro aminao hahay raha aby zen̈y, izikoa anao tsy mahay Vavolombelon̈o Jehovah hafa ten̈a mahay i olo io sady mety an̈ontanianao raha momba izy. (Ohab. 15:22) Hay be fa Kristianin̈y araiky koa ten̈a tsy mivadiky amy Jehovah, izy tsy mety hieritreritry hanambady olo tsy panompony Jehovah. Man̈ano lazioga araiky aminolo tsy pino izy koa man̈ano zen̈y.​—2 Kor. 6:14; 1 Kor. 7:39.

Hitantsika baka amy zen̈y fa ten̈a mety hampiditry problemo fampiasan̈a iro Site Internet fitadiavan̈a vady aby io. Fa nakiry izy, misy fomba hafa mety hahitanao olo mety hataonao vady. Afaka mitraotro amy Vavolombelon̈o Jehovah hafa koa anao, lera atsika afaka mivory amy Tran̈o Fivorian̈a na amy Tran̈o Fan̈anaovan̈a Fivoriambe an̈y, na amy fotoan̈a hafa.

Akory ndraiky izikoa atsika mbala tsy mety miaraka mivory, karaha ataony amy fotoan̈a isiany valan̈aretin̈y COVID-19? Mampiasa programo elektroniky atsika izikoa fa mivory, ke mety hararaotinao raha zen̈y hifankahaizan̈a amy piaramanompo hafa mbala tsy manambady. Ho hitanao koa karakory ataony izy koa fa mahazo anjara. Ho hitanao amy valinteninazy koa man̈ano akory finoan̈anany. (1 Tim. 6:11, 12) Sasany amy programo elektroniky fan̈anaovan̈a fivorian̈a aby io, mety han̈anaovan̈a karazan̈a gropy maromaro. Ke isaka gropy, misy olo vitsivitsy afaka mikorkoran̈a izikoa fa ravan̈a fivorian̈a. Ke izikoa misy fandaharan̈a karaha zen̈y amy fiangonan̈anaro, araraota raha zen̈y. Misy piaramanompo koa man̈ano karaha zen̈y izikoa fa mandamin̈y fiarahan̈a mikoran̈a. Ke izikoa samby ainvite amy fiarahan̈a karaha zen̈y anao ndreky olo iritriretinao io, araraota raha zen̈y handinihan̈a karakory ma ten̈a toetrinany ndreky fomba fitondrasany olo hafa. (1 Pet. 3:4) Izikoa fa mandeha fotoan̈a, hifankahay tsarabe anaro ke ho hitanao izikoa mitovy tanjon̈onaro ndreky raha matomboko aminaro. Ho hainao koa izikoa fanaoko tsarabe anaro.

Atokisan̈a hahazo vady tsara olo araiky, izikoa izy man̈araka toro lalan̈any Baiboly, lera izy mitady vady. Ho hitany tsarabe fahamarin̈any ohabolan̈a ty amy fotoan̈anizen̈y: ‘Olo nahita vady tsara zen̈y nahazo valera, sady mahazo rady amy Jehovah.’​—Ohab. 18:22.