1-2. Ino ma raha nampan̈antin̈ainy Jehovah, aminy Isaia 65:16, 17? Nan̈ino raha zen̈y man̈ampy atsika tsy ho kivy?

“AZA RIVAN̈A!” Zen̈y fotokevitriny fivoriambeny vondroparitry taminy 2017. Nazavain̈a tamy kabaro aby tamy fivoriambe io akory hahavitantsika tsy hivadiky amy Jehovah ndray iô raha sarotro iaretantsika. Efa efatra taon̈o iziô nivitàny fivoriambe in̈y, kanefa mbala miaritry fo atsika ziska iziô, amy donia ratsy ty.

² Ino aby raha sarotro iaretanao tatoato? Nisy lafamìnao na kamaradinao ma naty? Sa anao iziô marary mare? Efa nahainatoe ma anao iziô, ke miaritry jaly baka amy zen̈y? Sa nisy andra ratsy nandalo tamy tany misy anaro, sa nisy olo nan̈ano asa ratsy ke tsy milamin̈y tany misy anaro? Sa anao miaritry fan̈injehan̈a? Sa anao miaritry vokatrany aretin̈y, karaha ataony COVID-19? Efa tsy din̈intsika aby andra hialàny raha jiaby zen̈y! Ke amy leranizen̈y, ho adin̈antsika raha jiaby mampijaly atsika amy zioty.​—Vakia Isaia 65:16, 17.

3. Ino ma raha tsy maintsy ataontsika, baka io nan̈ino?

³ Sarotro mare fiain̈ana amy donia ty, kanefa raha zen̈y mety hahaihandombolombo fo aminy amaray an̈y. (Mat. 24:21) Ke mila miezaka fo atsika baka hahay hiaritry tsarabe. Ino antony? Fotony Jesosy efa nivolan̈a karaha ty: “Izikoa anaro miaritry fo, ho voavonjinaro ain̈inaro.” (Lioka 21:19) Maro olo manan̈a problemo mitovy amy nintsika, kanefa iro mahavita miaritry fo. Ke izikoa atsika mandiniky modelindro io, ho moramora amintsika hiaritry.

4. Nan̈ino atsika mivolan̈a fa Jehovah ny ten̈a maharidraha ke tsara alaintsika tahaka?

⁴ Jehovah ny ten̈a maharidraha ke tsara alaintsika tahaka. Zan̈ahary ma mba misy raha iaretan̈a? Miniminia baka ty: Azovy manjaka amy donia ty? Satana, tsy zen̈y? Zen̈y mahavy problemo mahaimaro fo. Vitany Jehovah man̈adoso iô ny iô raha jiaby tsy manjary amy donia ty. Kanefa izy mbala miambin̈y fotoan̈a  mety tsara han̈anaovan̈a zen̈y. (Rom. 9:22) Ke miaritry fo izy parpavianizen̈y. Izy foeky mifidy hiaritry. Alô atsika handiniky raha sivy iaretany Jehovah.

5. Ino ivolan̈ana fa nisy nandoto an̈aran̈any Zan̈ahary? Ino vokatranizen̈y aminao?

⁵ Voaloto an̈aranany. Farandraha tiany Jehovah eky an̈aranany io, ke izio tiany hajain̈a. (Isaia 42:8) Kanefa tan̈atiny 6 000 taon̈o tato zay, tsy nasian̈a fotiny foeky izio. (Sal. 74:10, 18, 23) Tamy zaridain̈y Edena tan̈y raha zen̈y nanomboko. Devoly (na “Pan̈aratsy”) taminio nan̈amia tsin̈y Zan̈ahary, ke nivolan̈a izy fa tsy amezany Zan̈ahary raha ten̈a mampasambatra iro zen̈y i Adama ndreky Eva. (Gen. 3:1-5) Rango tamy zen̈y, Satana tsy vôly nankaratsy Zan̈ahary momba raha zen̈y. Ten̈a nampiasaloha i Jesosy raha zen̈y. Ke zen̈y nahavy izy nampianatra pianatranany hivavaka karaha ty: “Anao Babanay andan̈itry an̈y, irarian̈a an̈aranao ho masin̈y.”​—Mat. 6:9.

6. Nan̈ino Jehovah nan̈ambela fotoan̈a lava be handaminan̈a problemo mikasiky zonany hitondra?

⁶ Maro olo manohitry zonany hitondra. Jehovah zaraiky fo manan̈a zò hanjaka amy lan̈itry ndreky tany, avio fitondrasan̈anany fo ny ten̈a tsara. (Apok. 4:11) Kanefa, vitany Satana nandresy lahatra anjely ndreky olombelon̈o marobe, tsy han̈eky zony Jehovah hitondra zen̈y. Raha zen̈y tsy avoalamin̈y mekimeky. Jehovah lastio ten̈a hendry, ke nasiany fotoan̈a lava be nandeha, misy ahitan̈a tsarabe fa izikoa mbala olombelon̈o fo manjaka fa tsy Zan̈ahary, tsisy andra hampanjary fiain̈ana ambony tany eto. (Jer. 10:23) Nohony Jehovah miaritry, ho voalamin̈y indraiky mipàka tsy man̈indroe raha momba zonany hitondra io. Ho hainolo jiaby koa fa fitondrasan̈anany zaraiky fo ny ten̈a tsara. Izio zaraiky fo mahavita hampiadan̈a atsika ndreky hampilamin̈y tany ty.

7. Azovy ma nanohitry Jehovah? Han̈ano akory iafarandro jiaby manohitry izy aby io?

⁷ Nisy zanany sasany nanohitry izy. Jehovah koa fa niasa anjely ndreky olombelon̈o, nataony lavorary iro. Fa araiky tamindro anjely aby io nanohitry Jehovah. Satana (na “Panohitry”) an̈arany. Tsy zen̈y fo fa, nitahôminy Satana han̈araka izy koa i Adama ndreky Eva, ke iro nanjary nanohitry Jehovah koa. Nisy anjely hafa ndreky olo hafa koa nan̈araka raha nataondro io. (Joda 6) Izikoa fa nandeha fotoan̈a, Jehovah nifidy iro Israelita aby io hanjary vahoaka mitondra an̈aranany. Kanefa, sasany tamindro io nanjary nanohitry izy, ke nanomboko nanompo zan̈ahary diso. (Isaia 63:8, 10) Jehovah ten̈a nahatsiaro ho voafitaka. Kanefa izy miaritry fo, parpaviany fotoan̈a han̈adosoany iro jiaby manohitry izy aby io. Ho ravoravo mare Jehovah ndreky iro panomponany tsy mivadiky aby io amy leranizen̈y, fotony tsy ho hisy eky raha ratsy amy donia ty!

8-9. Ino aby vandy aparitakany Satana momba Jehovah? Akory han̈aporofoantsika fa vandy areriky raha aby zen̈y?

⁸ Devoly tsy vôly man̈aratsy Jehovah ndreky panomponany. Satana nan̈aratsy Joba ndreky panompony Jehovah tsy mivadiky jiaby. Nivolan̈a izy fa matoa iro manompo Jehovah, misy raha tadiavindro ao. (Joba 1:8-11; 2:3-5) Mbala zen̈y fo raha ataony Devoly ziska iziô. (Apok. 12:10) Akory han̈aboahantsika fa vandy areriky volan̈any Devoly zen̈y? Izikoa fa misy problemo, atsika mila miaritry ndreky mifen̈y tsy hivadiky amy Jehovah, fotony izy tiantsika. Izikoa atsika man̈ano zen̈y, hitahy atsika Jehovah, karaha nataony nitahy i Joba.​—Jak. 5:11.

⁹ Mampiasa pitondra fivavahan̈a koa Satana hampianaran̈a raha diso momba Zan̈ahary. Mivolan̈a iro io fa Jehovah zen̈y ratsy fan̈ahy, avio baka aminany fo mahavy olo mijaly. Sasany mivolan̈a foeky fa, koa fa misy tsaiky maty, nalainy Zan̈ahary zen̈y izio, fotony izy zen̈y  mila anjely hafa koa andan̈itry an̈y. Ten̈a tsy man̈isy fotiny Zan̈ahary raha zen̈y! Haintsika fa Jehovah tsy mety han̈ano raha karaha zen̈y. Ke lera atsika marary na lera misy havantsika maty, atsika tsy mety hivolan̈a fa lahatrany Zan̈ahary raha zen̈y. Haintsika fa andra araiky an̈y, Jehovah mbala han̈afoan̈a aretin̈y ndreky hamelon̈o olo maty. Koran̈intsika aminolo jiaby von̈ono hitandren̈y atsika fa Zan̈ahary io fitiavan̈a. Amy zen̈y Jehovah hahavita hamaly Satana, araiky tsy voly mankaratsy izy io.​—Ohab. 27:11.

10. Ino raha ianaranao momba Jehovah, baka amy Salamo 22:23, 24?

¹⁰ Mafy aminany mahita panomponany ten̈a tiany aby io mijaly. Jehovah Zan̈ahary mahay mahinakinaka olo. Malahelo fônany mahita atsika mitarain̈y amy jaly mavoa atsika, na baka amy fan̈injehan̈a zen̈y, na aretin̈y, na baka aminy hadisovan̈antsika. (Vakia Salamo 22:23, 24.) Tsapany Jehovah raha mampiôry atsika ke izio tiany hadoso, sady zen̈y ankitin̈y raha handeha hataony. (Ampiràn̈a aminy Eksodosy 3:7, 8; Isaia 63:9.) Mbala ho avy fotoan̈a ‘hamafany ranomaso jiaby amy masontsika, ke tsy ho hisy eky fahafatesan̈a, alahelo, tarain̈y, avio tehotehoko.’​—Apok. 21:4.

11. Ino raha tsapany Jehovah momba panomponany tsy mivadiky efa maty?

¹¹ Tsy mora aminany mahita panomponany tsy mivadiky aby io maty. Efa tsy din̈iny Jehovah hahita iro io. (Joba 14:15) Miniminia hely baka karakory angoman̈any Jehovah tihahita Abrahama kamaradiny! (Jak. 2:23) Karaha zen̈y koa Mosesy, araiky nikoran̈any ‘nivantan̈a’ in̈y! (Eks. 33:11) Efa tsy din̈iny koa hahita i Davida ndreky panoratra salamo hafa, avio haharen̈y iro hihira ndreky hidera izy! (Sal. 104:33) Tsy adin̈any foeky iro kamaradiny aby io ndray efa naty. (Isaia 49:15) Azony onon̈o aby raha jiaby mombamomba iro. Koran̈iny Baiboly fa  amy Jehovah, iro io ‘mbala velon̈o fo.’ (Lioka 20:38) Mbala hivilôminy iro io, andra araiky an̈y. Amy fotoan̈anizen̈y, ho ravoravo ndraiky izy hitandren̈y vavakandro, ndreky hahita iro ho ravoravo manompo izy. Ke hay be fa hankahery atsika fahaizantsika raha aby zen̈y, fotony atsika jiaby io samby efa naty havan̈a aby.

12. Ino ma raha ten̈a mampalahelo Jehovah aminandra izioty?

¹² Maro olo ratsy fan̈ahy mampijaly olo. Adama ndreky Eva koa fa nanota, efa hainy Jehovah edy fa hahaiho ratsy fo fiain̈ana, alohanizity hisy fihatsaràny. Halany Jehovah mahita raha tsy manjary, ndreky raha tsy rariny avio olo kafiry amy zioty. Malahelo Jehovah mahita olo mijaly, intsaka eky olo tsisy piaro, karaha ataonolo kamboty ndreky man̈angy maty vady. (Zak. 7:9, 10) Tsy mora aminany koa mahita panomponany tsy mivadiky aby io ampijalian̈a ndreky gadrain̈a. Matokisa fa Jehovah ten̈a tia atsika, fotony atsika miaritry karaha izy koa.

13. Ino raha tsy manjary mare hitany Jehovah hataonolo, avio ino raha handeha hataony tsy ho ela?

¹³ Mahairatsy fitondranten̈a fo olombelon̈o. Jehovah koa fa niasa olombelon̈o, iro nataony mahavita mangala tahaka toetrinany. Fa ny raha misy amy zay, hataony Satana raha hahavy olombelon̈o han̈ano zaka tsy manjary. Taminandrany Noa, izikoa fa ‘hitany Jehovah fa nahairatsy fo olombelon̈o, nanen̈iny izy nan̈amboatra olo tambony tany. Nalahelo fônany.’ (Gen. 6:5, 6) Nahairatsy fo fiain̈ana rango tamy zen̈y. Ravoravo Satana mahita zen̈y, fotony efa tsisy raha pare fomba fiain̈ananolo. Efa mahazatra olo mahita na maharen̈y lelahy manambady lelahy ndreky man̈angy manambady man̈angy zen̈y. (Efes. 4:18, 19) Mahairavoravo fo Satana koa fa mahita panompony Jehovah man̈ano fahotan̈a maventy. Marin̈y ndraiky fa Jehovah maharidraha, kanefa misy limitiny fotoan̈a iaretany raha aby io. Ke izikoa fa tapitry fotoan̈a io, handeha haboakany tsarabe fa halany ankitin̈y raha ratsy ataonolo amy zioty io.

14. Ataonolombelon̈o karakory raha niasainy Zan̈ahary?

¹⁴ Robaka tontolo iain̈ana. Olombelon̈o tsy vitany manjikiziky aminolombelon̈o karaha izy fo fa, mbala mandrobaka tany ndreky mampijaly biby koa! Kanefa olombelon̈o nirahiny Jehovah hikarakara tany ndreky biby. (Mpito. 8:9; Gen. 1:28) Sasany amindro manampahaizan̈a aby io nivolan̈a fa, afaka taon̈o vitsivitsy, mety ho 1 000 000 karazan̈a biby ho ripaka. Mampiasaloha marin̈y raha mahazo tontolo iain̈ana! Nakiry izy fo, Jehovah efa nampan̈anten̈a fa ‘ho avy fotoan̈a handripahany lan̈iany olo mandrobaka tany’, ke hataony Paradisa ndraiky tany jiaby.​—Apok. 11:18; Isaia 35:1.

15-16. Nan̈ino ma atsika von̈ono hiaritry karaha Jehovah? Hazavà aminy ohatra.

¹⁵ Diniha baka problemo maro maventy iaretany Babantsika andan̈itry an̈y, tan̈atiny andrivony taon̈o maro! (Zahava “ Ino aby Raha Iaretany Jehovah?”) Vitany Jehovah man̈adoso raha ratsy jiaby amy donia ty, na iniany kiniany. Nakiry izy mbala tsy nandravan̈a donia ty, fotony faharetan̈anany io ten̈a mahatsara atsika. Hangala ohatra baka atsika hampazavazava izy. Ohatra iziô, nisy man̈angy araiky mavesatra, ke niaraka tamy ramosenany izy nandeha nitsapa. Iro koa fa navy ta lopitaly, dokotera nitsapa man̈angy io nivolan̈a fa marary mare tsaiky an̈aty kibo io, ke hijaly mare izy avio hofoaty bonera. Ndray fa ren̈indro raha jiaby zeny, von̈ono fo iro fivadiany hitarimy tsaiky io lera izy teraka. Ravoravo fo iro ndray tsy ho mora amindro hitarimy zaza io. Mety hiaritry raha sarotro iro, kanefa von̈ono fo iro han̈ano erakany vitandro hampatsaratsara fiain̈anany zanakandro, fotony tiandro mare zanakandro io.

 ¹⁶ Tantara hely zen̈y mampatsiaro atsika raha mahazo taranakany Adama ndreky Eva. Rango atsika vo teraka, atsika efa panota edy. Kanefa, Jehovah mankatia atsika fo sady mikarakara atsika. (1 Jaona 4:19) Fa ny raha tsy mampiran̈a Jehovah amy raimandreny tamy fan̈oharan̈a tio in̈y, Jehovah mahavita man̈adoso raha jiaby mampijaly atsika. Efa nifidy fotoan̈a han̈anaovany zen̈y izy. (Mat. 24:36) Ke izikoa karaha zen̈y fitiavany Jehovah atsika, tokony ho von̈ono hiaritry koa atsika, ndray somary miambin̈y elaela.

17. Nan̈ino ma raha koran̈iny Hebreo 12:2, 3 momba Jesosy, man̈ampy atsika hiaritry fo?

¹⁷ Jehovah ten̈a ohatra tsara arehantsika amy resaka fiaretan̈a. Jesosy nahavita nangala tahaka toetriny Babany io. Taminizy tambony tany teto, Jesosy niaritry volandratsy ndreky fangalan̈a baraka. Nivonen̈a taminy hazofijalian̈a koa izy. (Vakia Hebreo 12:2, 3.) Nahavita niaritry i Jesosy, fotony hainy fa Jehovah koa mba misy raha iaretany. Han̈ampy atsika hiaritry koa fahaizan̈a zen̈y.

18. Izikoa 2 Petera 3:9 zahan̈a, nanjary nahavita nan̈ino olo marobe nohony Jehovah maharidraha?

¹⁸ Vakia 2 Petera 3:9. Hainy Jehovah ombian̈a fotoan̈a ten̈a tsara handripahan̈a donia ratsy ty. Nohony Jehovah maharidraha, nanjary maro olo mahay izy, avio misy vahoaka be mandeha antapitrisany erantany koa miaraka manompo izy. Ke ten̈a mankasitraka Jehovah mare iro, fotony ôtrizay tsisy nata araiky tamindro io teraka, ndreky nianatra ho tia izy, baka io nanokanten̈a taminany. Izikoa iro miaritry firaka amy farany, iro hahazo hatsaran̈a. Ke ho hita tsarabe fa tsara ankitin̈y fanapahankevitriny Jehovah nifidy hiaritry in̈y.

19. Tokony ho tapakevitry han̈ino ma atsika, baka io ino hatsaran̈a ho azontsika izikoa atsika man̈ano zen̈y?

¹⁹ Ianarantsika baka amy Jehovah fa, ndray atsika miaritry raha sarotro, atsika mety ho ravoravo fo. Ndray iô raha jiaby mampalahelo ndreky mamparary fô nataony Satana, koran̈iny Baiboly fa Jehovah mbala “Zan̈ahary ravoravo” fo. (1 Tim. 1:11) Tsy ho ela Jehovah han̈amasin̈y an̈aranany, han̈amarin̈y zonany hitondra, han̈adoso raha ratsy jiaby ndreky problemo jiaby mavoa atsika. Fa parpavianizen̈y, tsy maintsy miaritry antsendriky atsika. Kanefa, ho vitantsika fo hitana haravoan̈antsika. Irarian̈a atsika ho tapakevitry hiaritry ndreky tsy han̈adin̈a foeky fa, Babantsika andan̈itry an̈y koa mba miaritry. Izikoa atsika man̈ano zen̈y, ho tanteraka amintsika volan̈a aby ty: “Sambatra lan̈iany olo miaritry fo izikoa fa mandalo fitsapan̈a, fotony afaranizen̈y, izy hanjary olo ankasitrahin̈y sady hahazo satroboninahitriny fiain̈ana. Zen̈y raha nampan̈antin̈ainy Jehovah hamezan̈a lan̈iany olo tia izy fo.”​—Jak. 1:12.