MARO piaramanompo nipetraka tamy tany manankarian̈a taloha, kanefa nanapakevitry nifindra tantanindrazan̈andro. Nan̈ino iro nan̈ano zen̈y? Baka amy fitiavandro Jehovah ndreky fitiavandro olo jiaby nahavy iro nifindra amy tany mbala mila pitory maro. (Mat. 22:37-39) Maro raha tsy maintsy nafoendro, kanefa maro koa hatsaran̈a nazondro. Alô zahavantsika raha nataony pitory sasany nimpody ta Cameroun.

Taminy 1998 Rahalahy Onésime niala ta Cameroun, nandeha nipetraka tandafy. Tan̈y fo izy tan̈atiny 14 taon̈o. Tandraraiky, izy koa fa nandeha nivory, naharen̈y fan̈oharan̈a araiky momba asa fitorian̈a. Koran̈iny pan̈ano kabaro tamy zen̈y: “Misy olo aroe kamarady niaraka namintan̈a, fa araiky tamindro tsy dia nahazo laoko. Akory hataony izikoa hitany fa mihina mare laoko amy faritry amintan̈any kamaradiny io? Tsy handeha han̈aton̈o kamaradiny arỳ koa izy hamintan̈a va?”

Rôso diniky mare Onésime tamy fan̈oharan̈a in̈y, ke komansy nieritreritry fomba han̈ampian̈a iro pitory aby ta Cameroun tan̈y izy. Kanefa niasaloha koa izy hody tan̈y. Navozo baka izy tsao tsy ho zatra fiain̈ana a Cameroun eky, fotony efa taon̈o taon̈o izy nipetraka tandafy. Ke tamy voanalohany, nan̈ano vakansy ta Cameroun antsendriky izy tan̈atiny tsiota fanjava. Taminy 2012 amy zay izy vo ten̈a tapakevitry nifindra tan̈y.

Ho Onésime: “Sahiran̈a hely zaho tamy voanalohany, fotony atỳ mafana avio zaho efa tsy zatra fiain̈ana atỳ. Amy Tran̈o Fivorian̈a koa, sezy kakazo ampiasain̈a, ke sahiran̈a hely zaho nifantoko tamy fivorian̈a.” Nimoe hely izy, sady nivolan̈a: “Fa niezaka fo zaho nifantoko, ke nadin̈adin̈ako sezy tsara sady malemilemy nahazatra zaho tandafy tan̈y.”

Nanambady i Onésime taminy 2013. Géraldine an̈arany vadiny. Nipetraka ta France kadiriny sivy taon̈o i Géraldine talohanizy nimpody ta Cameroun. Ino hatsaran̈a nazondro roe fivadiany, iro koa fa nifen̈y nifantoko tamy fanompoan̈a? Ho Onésime: “Nan̈ano Sekolin’ny Mpitory Ilay Fanjakana zahay, avio navoakaiky hanompo amy Betela. Tamy taon̈o loso in̈y, 20 pianatra Baiboly tamy fiangonan̈a misy zahay nandroso ndreky natao batisa. Tsapako fa amy tany ten̈a ‘azahoan̈a laoko’ ankitin̈y zahay iziô.” (Mar. 1:17, 18) Karaha ty koa nambarany Géraldine: “Mandilatra ny raha niritriretiko hatsaran̈a nazoko.”

Judith ndraiky nipetraka ta Etazonỳ, fa izy tihampitombo fanompoan̈anany. Ho izy: “Isaka zaho baka vakansy namangy fianakavian̈anaka ta Cameroun tatỳ, zaho nitomoan̈y fo fotony tsy tindriko hiala iro olo marobe nampianariko Baiboly.” Fa nisy raha nampisalasala Judith himpody ta Cameroun.  Tsara baka karamanany taminizy ta Etazonỳ, ke afaka nikarakara fitahan̈a babany ta Cameroun tan̈y izy. Nifindra ta Cameroun fo Judith fotony izy natoky Jehovah. Izy ndraiky tsy nora taminany niala fiain̈ana mampiadan̈a nahazatra izy tandafy tan̈y. Fa nivavaka fo izy baka Jehovah han̈ampy izy hanan̈a toetsain̈y tsara. Ten̈a nampahery izy koa piandraikitry faritry ndreky vadiny.”

Nan̈ano akory izy koa fa nimpody ta Cameroun? Ho Judith: “Tan̈atiny telo taon̈o, ravoravo zaho nahazo zanaka arapan̈ahy efatra.” Nanompo tamy maha pisava lalan̈a manokan̈a izy baka tio. Amy zioty, iro roeny vadiny, Sam-Castel, man̈ano asany faritry. Nan̈ano akory fo babany narary in̈y? Nifampidiniky tamy lafamìnany Judith, ke iro nahita lopitaly von̈ono hikarakara fandidian̈a papany. Namparavoravo fa vita tsara fandidian̈a io.

Rahalahy Victor ndraiky nipetraka ta Kanada. Izy koa fa baka namaky lahatsotra tamy Tilikambo Fiambesan̈a momba fianaran̈a ambony, izy loso eritreritry. Nialany fianaran̈anany taminy Iniversite, ke loso izy nan̈ano fiofanan̈a momba varotro. Izio tsy mahadin̈y ela. Ho izy: “Zaho koa fa baka nan̈ano fiofanan̈a io, nalaky nahita asa zaho avio vitako koa nan̈ano pisava lalan̈a. Efa ela nan̈iriako han̈ano izio.” Tafara tatỳ, nan̈ano mariazy tamy Caroline izy. Tafarany mariazindro, iro nan̈ano vakansy ta Cameroun. Nan̈araraotro nitsidiky birôny sampan̈a iro, ke nisy rahalahy tao nampirisiky iro hifindra a Cameroun. Ho Victor: “Tsy nisalasala foeky zahay nifindra, fotony zahay efa zatra nanan̈a fiain̈ana tsotra.” Nisy fotoan̈a Caroline tsy salama hely, fa tsy nataondro tamban̈a foeky raha zen̈y.

Niaraka nan̈ano asany pisava lalan̈a i Victor ndreky Caroline, fotony iro tihan̈ampy olo maro hahay raha koran̈iny Baiboly. Tamy voanalohany, ankibandro fo nivilaomandro. Fa izikoa fa ho lany ankibandro, tsy maintsy nimpody ta Kanada ndraiky iro niasa fanjava vitsivitsy, avio iro nimpody ta Cameroun, nanohy fanompoan̈andro. Ino aby hatsaran̈a nazondro? Nan̈ano Sekolin’ny Mpitory Ilay Fanjakana iro, baka io navoatendry pisava lalan̈a manokan̈a. Iro iziô an̈isany pan̈ano fan̈oren̈ana. Ho Victor: “Zahay koa fa niala fiain̈ana mampiadan̈a nahazatra zahay in̈y, tsapanay fa Jehovah ten̈a nan̈ampy zahay.”

Alain ndraiky taminy 2002, nianatra taminy Iniversite araiky tan Allemagne. Nisy fotoan̈a izy namaky trakty Ry Tanora—Inona ny Tanjonareo eo Amin’ny Fiainana? Nandrisiky izy hanan̈a tanjon̈o arapan̈ahy fan̈azavan̈a hitany tao. Taminy 2006 izy nan̈ano Sekoly Fampiofanana ho Amin’ny Fanompoana, avio izy navoatendry hanompo a Cameroun.

Niasa tapapotoan̈a i Alain koa fa navy ta Cameroun. Tafara izy nahita asa tsara karama, fa niasaloha hely izy tsao hahavy izy tsy hifantoko tamy fanompoan̈a asa nataony io. Ke izy koa fa voatendry pisava lalan̈a manokan̈a, tsy nisalasala foeky izy niala asanazy io. Sefonany efa von̈ono hampanonga karamanany, fa Alain tsy niova hevitry. Izikoa fa nandeha fotoan̈a, izy nan̈ainga. Stéphanie an̈arany vadiny. Ranabavy io efa nipetraka ta France tan̈atiny taon̈o taon̈o. Ino aby raha nanahiran̈a izy koa fa nifindra ta Cameroun?

Ho Stéphanie: “Nanjary nararirary fo zaho koa fa navy tatỳ. Izy ndraiky tsy gravy. Nizaha fahasalaman̈a matetiky fo zaho, ke zaho iziô efa salama amy zay.” Ten̈a nitahiany Jehovah iro roe fivadiany fotony iro niaritry. Ho Alain: “Nitory ta Katé zahay. Mitokan̈a salakady lavitry tany io, kanefa nahita  olo maro von̈ono hianatra Baiboly zahay tan̈y. Tafara, nahavita nitariky fampianaran̈a Baiboly tamy telefaony zahay.” Ho Stéphanie: “Tsisy raha mamparavoravo mandilatra man̈ampy olo hanonkanten̈a ndreky hatao batisa. Zahay koa fa manompo atỳ, mahita raha maro mamparavoravo.” Amy zioty, Alain ndreky Stéphanie man̈ano asany faritry.

Nianatra dokotera tan Italie i Gisèle, ke tan̈y izy natao batisa. Pisava lalan̈a olo fivadiany nampianatra izy Baiboly. Nanan̈a fiain̈ana tsotra iro io, ke ten̈a nampiafatra Gisèle raha zen̈y. Nan̈iry hampitombo fanompoan̈anany koa izy, ke nanomboko nan̈ano pisava lalan̈a izy izikoa fa ho vita fianaran̈anany.

Nan̈iry hifindra ta Cameroun i Gisèle, kanefa nisy raha nampiasaloha izy. Ho izy: “Navozo zaho fotony tsy ho afaka hipetraka an Italie eky, salakady tsy tindriko hiala iry namako ndreky iry havako atỳ.” Fa ndray zen̈y, nifindra ta Cameroun fo Gisèle tamy May 2016. Tsy ela tafarinizen̈y, nan̈ano mariazy tamy Léonce izy. Nirahiny birôny sampan̈any Cameroun nifindra ta Ayos iro roe fivadiany, fotony mbala nila pitory maro tan̈y.

Nan̈ano akory fiain̈anandro koa fa navy ta Ayos? Ho Gisèle: “Matimaty fo jiro tan̈y; ndraiky mahadin̈y herin̈iandra maromaro, ke sahiran̈a zahay nisarzy telefaony. Nianatra nandoky taminy hazomaty zaho, avio zahay nampiasa borvety koa fa nantsaka rano tamy vôvo. Alin̈y fo zahay mantsaka amy zen̈y mba tsy milahatra ela, avio nampiasa torsy zahay hitsilovan̈a lalan̈a.” Akory nahavitandro niaritry? Ho Gisèle: “Ten̈a nan̈ampy zaho fan̈ahiny Jehovah. Nifan̈ampy koa zahay roe fivadiany. Nisy namanay ndreky havanay sasany nan̈amia korazy zahay; saoko iro nandefa vola foeky.”

Tsy nanen̈iny ma Gisèle nimpody ta Cameroun? Ho izy:“Tsisy karaha! Somary sahiran̈a hely ndraiky zahay tamy voanalohany sady kivy, fa zahay niaritry fo. Izikoa fa nilamin̈y problemonay aby io, nanjary tsapanay fa pare tsarabe fanapahankevitrinay nifindra tatỳ in̈y. Zahay natoky Jehovah, ke nahainarikitry izy fo zahay.” Nan̈ano Sekolin’ny Mpitory Ilay Fanjakana iro roeny Léonce, baka io iro navoatendry ho pisava lalan̈a manokan̈a tsy maharitry.

Izikoa iro pamintan̈a ndreky pan̈arato aby io tihahazo laoko marobe, iro mila von̈ono hiatriky raha sarotro. Karaha zen̈y koa iro olo mimpody antanindrazan̈andro aby io. Tsy maintsy mahafoe raha iro han̈ampian̈a olo marobe tihaharen̈y vaovao tsara momba Fanjakan̈a io. Fa Jehovah tsy mety han̈adin̈a asa mafy ndreky fitiavan̈a naboakandro nohony an̈aran̈anany zen̈y. (Neh. 5:19; Heb. 6:10) Mipetraka lavitry tany favianao ma anao izioty? Mbala mila pitory marobe ma amy tany favianao an̈y? Asa anao mba von̈ono hifindra an̈y? Izikoa zen̈y, maro hatsaran̈a ho azonao.​—Ohab. 10:22.