1-2. Akory mety han̈arehantsika raha koran̈iny Ohabolana 4:25 ao? Man̈ameza ohatra.

IRITRIRETA hely baka ohatra aby ty: Ranabavy araiky efa matoe mahatsiaro raha maro tsara niain̈any taloha tan̈y. Ndray nisy raha sarotro nandalovany, izy tsy rivan̈a fa mbala manompo Jehovah fo. (1 Kor. 15:58) Isanandra izy misaintsain̈y fiain̈ananany amy donia vaovao, lera hivilômin̈y ndraiky iro kamaradiny ndreky havany efa naty aby io. Ranabavy araiky ndraiky mahatsiaro fa nisy piaramanompo nan̈ano raha nampalahelo izy, fa izy nan̈ambela hadisovan̈anolo io. (Kol. 3:13) Nisy rahalahy araiky ndraiky mahatsiaro hadisovan̈anany taloha, fa izy tsy mifantoko amy zen̈y fa mifen̈y fo tsy hivadiky amy Jehovah.​—Sal. 51:10.

² Ino raha itovizandro Kristianin̈y telo io? Iro samby mahatsiaro raha efa loso, fa iro fo tsy mifantoko mare amy zen̈y. Mifanohitry amy zen̈y raha ataondro, iro mifantoko taminy hoavy fo.​—Vakia Ohabolana 4:25.

3. Nan̈ino ma atsika mila mifantoko amy raha mbala ho avy?

³ Nan̈ino ma ilaintsika mifantoko amy raha mbala ho avy? Miniminia hely baka olo araiky mandeha amy lalabe, kanefa izy mizaha afara fo. Han̈ano akory izy? Tsy hiala lalan̈a va? Karaha zen̈y koa, tsy ho vitantsika hanompo Jehovah amy fomba feno, izikoa raha efa loso fo ifantohantsika.​—Lioka 9:62.

4. Ino aby raha hidinihintsika amy lahatsoratra ty ato?

⁴ Amy lahatsoratra ty ato, atsika handiniky raha telo mety hahavy atsika hifantoko mare loatra amy raha efa loso. Tsy ino zen̈y fa: 1) Matsiarotsiaro ny taloha, 2) mitana heloko ampô, avio 3) man̈ameloten̈a dila loatra. Isaka atsika mandiniky araiky amindro io, atsika hahita toro lalan̈a han̈ampy atsika hisaintsain̈y momba ny hoavy, fa tsy hifantoko be loatra amy raha efa loso.​—Fil. 3:13.

5. Izikoa Mpitoriteny 7:10 zahan̈a, ino raha tokony tandremantsika?

⁵ Vakia Mpitoriteny 7:10. Andininy io tsy raha tihivolan̈a fa tsy mety man̈ontany: “Nan̈ino ma raha taloha tsara?” Fotony Jehovah koa fa niasa atsika, efa nataony mahavita mahatsiaro raha edy atsika. Fa karaha ty nambarany andininy io: “Aza mivolan̈a: ‘Nan̈ino ma raha taloha tsara mandilatra amy zioty?’ ” Ke mila mitandrin̈y atsika, tsao ampiran̈intsika amy raha efa loso raha iain̈antsika amy zioty. Izikoa atsika man̈ano zen̈y, mety hihevitry atsika fa tsisy raha pare fiain̈antsika amy zioty.

6. Ino ma tsy mahatsara atsika mifantoko amy fiain̈anantsika taloha? Man̈ameza ohatra.

⁶ Nan̈ino ma tsy mahatsara atsika mifantoko amy fiain̈anantsika taloha? Atsika koa fa matsiarotsiaro ny taloha, matetiky raha tsara fo azontsika onon̈o. Adin̈antsika foeky fa mba niaritry raha sarotro koa ane atsika tamy zen̈y e! Alaiva onon̈o baka iro Israelita aby io, iro koa fa niala ta Ezipty. Nadin̈andro foeky fa sarotro fiain̈anandro tan̈y. Hanin̈y maro manjary nihoanindro tan̈y fo raha nazondro onon̈o. Ho iro: “Tsy mety adin̈anay zahay nihinan̈a laoko ta Ezipty tan̈y in̈y. Izy amy zen̈y tsy nivangain̈a! Ndreky konkombra, voajabo, poarô, dongolo, baka io dongolo lay!” (Nom. 11:5) “Tsy nivangain̈a” marin̈y ma hanin̈y aby zen̈y tan̈y? Tsy honohono! Nivangaindro lafo raha zen̈y, fotony iro tan̈y andevo. (Eks. 1:13, 14; 3:6-9) Izikoa fa nandeha fotoan̈a, nadin̈andro foeky jalindro tan̈y fa tamy raha tsara hely nazondro tamy zen̈y fo nifantohandro. Iro tsy nifantoko tamy raha tsara nataony Jehovah tamindro foeky. Ke neloko tamindro mare Jehovah.​—Nom. 11:10.

7. Ino raha nan̈ampy ranabavy araiky tsy hifantoko be loatra amy raha niain̈any taloha?

⁷ Akory mety hiarivantsika fandriky io? Misy ranabavy zay nanompo tamy Betelany Brooklyn taminy 1945. Taon̈o vitsivitsy tafaranizen̈y, izy nan̈ano mariazy tamy rahalahy betelita araiky, ke iro niaraka nanompo tao tan̈atiny taon̈o taon̈o. Fa taminy 1976,  narary mare vadiny. Ke talohanizy naty ho ranabavy io, nisy torohevitry tsara namiany vadiny izy, ke raha zen̈y ten̈a nan̈ampy izy. Ho vadiny taminany: “Nahatsiaro sambatra mare atsika tamy vadian̈antsika. Maro olo tsy nahita hasambaran̈a karaha zen̈y tamy vadian̈andro. Zaho matoky fa tsy ho hadin̈anao foeky raha tsara niarahantsika, fa aza mifantoko be loatra amy raha efa loso aby zen̈y. Izikoa fa mandeha fotoan̈a, hihen̈y alahelonao. Aza rivan̈a na malahelo amy raha mahazo anao. Tsaraova fo haravoan̈antsika niaraka nanompo Jehovah, ... fotony fahatsiarovan̈a io kadô baka amy Zan̈ahary.” Tsara torohevitry zen̈y! Sa akory hevitrinao?

8. Ino vokany, ranabavy araiky koa fa tsy nifantoko tamy raha efa loso?

⁸ Narehany ranabavintsika io torohevitriny vadiny in̈y. Nanompo Jehovah fo izy firaka izy naty, taminizy 92 taon̈o. Taon̈o vitsivitsy talohany nifatesany, izy nivolan̈a: “Zaho koa fa mandiniky 63 taon̈o nanompoako Jehovah manontolo andra, zaho masaky mivolan̈a fa ten̈a afapô zaho tamy fiain̈ananaka.” Nan̈ino ma? Ho izy: “Ny raha ten̈a mamparavoravo zaho, atsika an̈isany fianakaviambeny pirahalahy, avio atsika koa man̈anten̈a hiain̈y amy tany paradisa ke hanompo Jehovah, Zan̈ahary niasa raha jiaby, araiky ten̈a Zan̈ahary, mandrakizay.” * Nifen̈y fo ranabavy io nifantoko tamy raha tsara ampan̈antin̈ainy Zan̈ahary, ke tsara alaintsika tahaka raha nataony zen̈y.

9. Lera karakory ma ten̈a sarotro amintsika man̈araka raha koran̈iny Levitikosy 19:18 io?

⁹ Vakia Levitikosy 19:18. Tsy mora matetiky man̈ambela hadisovan̈a zen̈y, intsaka eky izikoa olo nampaneloko atsika io piaramanompo, naman̈a marikitry, na havan̈a. Zen̈y raha nahazo ranabavy araiky ty. Tandraraiky, nisy ranabavy fiangonan̈a araiky taminany nan̈odihody izy nangalatra volanany. Izikoa fa nandefa  fotoan̈a, tontohitry ranabavy io fa diso hevitry ke loso izy niala tsin̈y taminany. Tsy nety nafaka tamy fonany raha nataony piaramanompo io. Asa anao efa navy navoa raha karaha zen̈y na raha mitovitovy amy zen̈y? Ndray tsendriky tojy raha karaha zen̈y atsika, maro amintsika mety efa navy neloko na nanan̈a kisasy taminolo. Mety nieritreritry foeky atsika fa tsy ho vitantsika han̈ambela hadisovan̈anany.

10. Ino raha han̈ampy atsika tsy hitana heloko ampô?

¹⁰ Ino raha han̈ampy atsika tsy hitana heloko ampô izikoa fa misy olo man̈ano raha tsy tiantsika? Voanalohany, tsaraova fa Jehovah mahita raha jiaby. (Heb. 4:13) Hitany raha mahazo atsika, an̈atinizen̈y raha tsy rariny avoa atsika io. (Isaia 63:9) Ke mampan̈anten̈a izy fa hadosony raha jiaby mampiory atsika, an̈isanizen̈y raha tsy rariny.​—Apok. 21:3, 4.

11. Ino mahatsara man̈ambela hadisovan̈a?

¹¹ Aza adin̈a fa atsika koa mifidy han̈ambela hadisovan̈a, atsika fo mahazo hatsaran̈a. Zen̈y raha tsapany ranabavy nataonolo nangalatra in̈y. Vitany fo nan̈ambela hadisovan̈olo nan̈ano raha nampalahelo izy in̈y. Tontohitry izy fa izikoa atsika von̈ono han̈ambela hadisovan̈anolo, Jehovah koa han̈ambela hadisovan̈antsika. (Mat. 6:14) Hainy fa tsy nety raha nataony piaramanompo in̈y, fa izy nifidy han̈ambela hadisovan̈a. Ravoravo izy fotony nahavita nifantoko tamy fanompoan̈a Jehovah.

12. Ino raha ianarantsika baka amy 1 Jaona 3:19, 20?

¹² Vakia 1 Jaona 3:19, 20. Mety han̈ameloten̈a aby atsika jiaby io. Sasany, ohatra, man̈amia tsin̈y ain̈inany tamy raha ratsy vitany talohany nahaizany fahamarin̈ana. Misy ndraiky mbala injehiny eritreritrinazy nohony hadisovan̈a vitany tafarany batisanany. (Rom. 3:23) Marin̈y ndraiky fa tihan̈ano raha manjary aby atsika io. Kanefa, mety ‘han̈ano hadisovan̈a aby atsika jiaby io, ary matetiky koa.’ (Jak. 3:2; Rom. 7:21-23) Ndray izy man̈ano zen̈y, misy mahatsara izy fo man̈amia tsin̈y ain̈inten̈a zen̈y ndraikindraiky. Fotony atsika koa fa man̈ameloten̈a, atsika manjary tsy tihan̈ampody hadisovan̈a in̈y eky sady tapakevitry hiova.​—Heb. 12:12, 13.

13. Nan̈ino ma atsika tsy tokony han̈ameloten̈a mare loatra?

¹³ Misy fotoan̈a ndraiky atsika mety han̈ameloten̈a dila loatra. Karakory ma zen̈y? Ndray atsika efa nibebaka ndreky nambelany Jehovah taminy hadisovan̈a vitantsika in̈y, mbala mety han̈ameloten̈a fo atsika. Mety handrobaka atsika raha zen̈y. (Sal. 31:10; 38:3, 4) Diniha baka ranabavy araiky ty. Mbala nan̈amia tsin̈y ain̈inany fo izy taminy hadisovan̈a vitany taloha, ke ho izy: “Zaho nieritreritry, tsisy varany zaho miezaka manompo Jehovah, fotony zaho mety efa tsy avotro eky!” Mety ho zen̈y koa raha tsapany maro amintsika. Mila mitandrin̈y atsika izikoa zen̈y raha tsapantsika, fotony ho ravoravo Satana izikoa atsika voly manompo Jehovah. Tsaraova fa Jehovah ten̈a tia atsika!​—Ampiràn̈a amy 2 Korintianina 2:5-7, 11.

14. Akory ahaizantsika fa Jehovah ten̈a von̈ono han̈ambela hadisovan̈antsika?

¹⁴ Mety mbala hieritreritry fo anao: ‘Akory ahaizako fa mbala tia zaho mare Jehovah?’ Ndray fan̈apitrahanao fan̈ontanian̈a zen̈y fo efa tihivolan̈a fa Jehovah nan̈ambela hadisovan̈anao. Taon̈o maro loso zay, nisy Tilikambo Fiambesan̈a nikoran̈a karaha ty: Mety nisy raha ratsy donko nahazatra anao talohany nanompoanao Jehovah. Mety efa nieritreritry foeky anao fa efa resinao amy zay izio. Kanefa izikoa fa nandefa fotoana, nimpody tafan̈ano izio ndraiky anao, ary mety  tsy indraiky fa matetiky. Fa anao aza rivan̈a. Adosoa amy jerinao foeky firitriretan̈a fa tsy han̈ambela hadisovan̈anao Jehovah. Zen̈y raha tiany Satana hiditry amy jerinao. Fa matoa anao malahelo salakady injehiny eritreritry amy raha nataonao, dikanizen̈y Jehovah mbala von̈ono han̈ambela hadisovan̈anao. Ke manàn̈a fanetrenten̈a ke iangavia Jehovah han̈ambela hadisovan̈anao ndreky han̈ampy anao tsy han̈ampody izio eky. Mivavaha baka izy han̈ampy anao hanan̈a feony fieritreretan̈a madio. Man̈anaova karaha tsaiky. Tsaiky koa fa misy raha manahiran̈a izy, izy tsy maintsy man̈aton̈o babany fo ndray impiry ndray impiry izy tatrany problemo io. Man̈anaova karaha zen̈y koa. Aza mavozo man̈aton̈o Jehovah, fotony tsisy olo tsara fan̈ahy mandilatra izy ke izy tsy maintsy han̈ampy anao.” *

15-16. Ino raha tsapany Kristianin̈y sasany, iro koa fa namezan̈a toky fa Jehovah ten̈a tia iro?

¹⁵ Maro panompony Jehovah nahazo angovo izikoa fa nahay fa Jehovah man̈ambela hadisovan̈andro. Taon̈o vitsivitsy loso zay, nisy lahatsoratra mifampitohy zay niboaka tamy Tilikambo Fiambesan̈a. Ten̈a nanohin̈y fôny rahalahy araiky zay izio. Titrany lahatsoratra io “Man̈ova Olo Baiboly.” Lahatsoratra io mikoran̈a tantarany ranabavy araiky nieritreritry fa tsy mety ho Jehovah koa ho tia izy, fotony naro loatra raha tsy manjary nandalo tamy fiain̈ananany. Mbala nan̈enjiky izy fo eritreritrinany ndray efa taon̈o maro tafarany batisanany. Izy koa fa nisaintsain̈y momba vidipan̈avotan̈a, nanjary resy lahatra izy fa Jehovah ten̈a tia izy. *

¹⁶ Ten̈a nan̈ampy rahalahy io tantarany ranabavy in̈y. Karaha ty raha nisoratiny: ‘Tamy zaho mbala tanora, zaho ten̈a nandivôziny fizahan̈a sary vetaveta; tsy nora taminaka foeky niala izio. Fa vo tsy ela, tafizaha izio ndraiky zaho. Nitady fan̈ampian̈a taminy antipan̈ahy zaho, ke zaho iziô efa tsy mizaha izio eky. Nan̈amia toky zaho antipan̈ahy io fa Jehovah mbala tia zaho sady von̈ono han̈ambela hadisovan̈anaka. Ndraikindraiky, zaho  mbala man̈ameloten̈a, fa tantara in̈y ten̈a nan̈ampy zaho. Iziô zaho tontohitry fa, isaka zaho mieritreritry fa mety tsy hambelany Jehovah hadisovan̈anaka, karaha tihivolan̈a in̈y zaho fa tsy maharakotro fahotan̈anaka soron̈o nataony Jesosy in̈y. Nitapàko lahatsoratra io, baka io nataoko amy tany mora hita. Zaho koa fa mahatsapa ten̈a tsisy dikany in̈y, mimpody vakiako ndreky saintsain̈iko ndraiky raha koran̈inizio.’

17. Ino raha nan̈ampy apostoly Paoly tsy han̈ameloten̈a dila loatra?

¹⁷ Tantara aby zen̈y mampatsiaro apostoly Paoly. Taminizy mbala tsy Kristianin̈y, maro fahotan̈a vitany. Azony Paoly onon̈o raha ratsy aby zen̈y, fa izy tsy nifantoko tamy zen̈y. (1 Tim. 1:12-15) Natoky izy fa nambelany Jehovah hadisovan̈anany, fotony Jehovah efa nan̈amia vidipan̈avotan̈a. Fahitany izio mira kadô namezany Zan̈ahary izy. (Gal. 2:20) Paoly tsy nifantoko taminy hadisovan̈anany taloha, fa nifen̈y fo izy nanompo Jehovah taminy angovonany jiaby.

18. Ino aby raha nianarantsika tamy lahatsoratra ty ato?

¹⁸ Ino aby raha nianarantsika tato? 1) Fahatsiarovan̈a raha tsara io kadô baka amy Jehovah. Fa ndray tsarabe karakory fiain̈anantsika taloha, izio tsy mandilatra donia vaovao ho avy io. 2) Mety han̈ano raha mampameloko atsika olo hafa; kanefa atsika koa mifidy han̈ambela hadisovan̈a, ho vitantsika hifantoko amy fanompoan̈a Jehovah. 3) Izikoa atsika mifantoko be loatra aminy hadisovan̈antsika taloha, atsika tsy hahita haravoan̈a amy fanompoan̈a Jehovah. Jehovah nan̈ambela hadisovan̈any Paoly, ke han̈ano karaha zen̈y koa izy amintsika.

19. Ino aviantsika mivolan̈a fa amy donia vaovao, tsy ho hisy eky raha mampalahelo?

¹⁹ Man̈anten̈a hiain̈y tsisy farany atsika. Koran̈iny Baiboly fa lera atsika miain̈y amy donia vaovao, hifafa an̈atiny jerintsika foeky raha jiaby nampalahelo atsika. (Isaia 65:17) Miniminia hely baka: Sasany amintsika natoe tamy fanompoan̈a Jehovah; fa amy donia vaovao, iro himpody tanora ndraiky. (Joba 33:25) Ke irarian̈a atsika samby ho tapakevitry tsy hifantoko amy raha efa loso fa hifantoko amy raha mbala ho avy, ke han̈ano erakany vitantsika baka ho tody amy donia vaovao!