MISY musée araiky zay a Jerosalema an̈y manan̈a takelabato misy soratra nisoratanolo taloha be tan̈y, kadiriny tan̈elan̈elan̈a taon̈o 700 ndreky 600 T.K. Vato io baka tamy lavabato natao fasan̈a marikitry tanànany Hebrona, an Israely an̈y. Karaha ty raha misoratra amizio: “Anò ho voaozon̈ony Iaveh Sabaot i Hagaf, zanakany Hagav.” Nan̈ino ma soratra io mankamarin̈y raha koran̈iny Baiboly? Fotony hita baka amizio fa hainolo taminandrany Baiboly an̈aran̈any Zan̈ahary Iaveh na Jehovah zen̈y, sady efa fampiasaindro tamy fiain̈anandro andavanandra. Karaha ty fomba nanoratandro izio taminy alfabe hebreo taloha: YHWH. Nisy soratra hafa koa hita tan̈atiny lavabato aby io, ke olo nivory tao na olo nisitriky tao nanoratra iro io. Matetiky nisoratindro tamy riba an̈aran̈any Zan̈ahary io ndreky an̈aran̈anolo hafa misy an̈aran̈any Zan̈ahary.

Nikoran̈a momba soratra aby io i Rachel Nabulsi, manampahaizan̈a mampianatra aminy Iniversiteny Géorgie an̈y. Ho izy: “Matetiky mimpodimpody amy soratra aby io an̈aran̈a YHWH io. Ke misy raha maventy ianarantsika baka amy zen̈y. ... Hita amindro io fa raha matomboko taminolo tan Israely ndreky ta Joda tan̈y an̈aran̈a YHWH io ndreky araiky tompiny an̈aran̈a io.” Nan̈ino ma raha zen̈y mankamarin̈y raha koran̈iny Baiboly? Fotony mimpodimpody andrivony amy Baiboly ao an̈aran̈any Zan̈ahary YHWH io, aminy alfabe hebreo. Matetiky misy an̈aran̈any Zan̈ahary koa an̈aran̈anolo koran̈iny ao.

Amy takelabato in̈y misy soratra “Iaveh Sabaot.” Dikanizio, “Jehovah Tompiny Tafiky.” Hita baka amy zen̈y fa tsy an̈aran̈any Zan̈ahary fo fampiasainolo taminandrany Baiboly, fa mboàny soratra “Jehovah Tompiny Tafiky” io koa. Ke tsy gaga atsika izikoa matetiky mimpodimpody amy Baiboly ao koa soratra “Jehovah Tompiny Tafiky” io; mandilatra 260 izio amy Soratra Hebreo ao, intsaka eky fa amy bokiny Isaia, Jeremia, ndreky Zakaria ao.