1. Ino ma raha tsapany Panjaka Davida ke mety ho tsapantsika koa?

SAMBY tihiain̈y milamin̈y aby olo jiaby. Tsisy olo man̈iry hidirany asaloha zen̈y! Fa ndray zen̈y, mety hiasaloha mare atsika ndraikindraiky. Mety hitovy amy raha tsapany Panjaka Davida ty raha tsapany panompony Jehovah sasany. Ho izy: ‘Vahany asaloha zaho zen̈y! Masaky mamosian̈a aby fonaka!’​—Sal. 143:4.

2. Ino aby raha handeha hidinihintsika ato?

² Maro raha mampiasaloha atsika. Ino raha mety ataontsika baka atsika tsy hiasaloha loatra? Alohany hamaliantsika fan̈ontanian̈a zen̈y, alô antsendriky atsika hizaha raha sasany mety hahavy atsika hiasaloha, baka io atsika handiniky raha tsiota han̈ampy atsika tsy ho taitaitry izikoa fa misy problemo.

3. Ino aby raha manahiran̈a atsika? Vitantsika ma misakana iro io?

³ Mifen̈y atsika mitady hevitry, fa ndraikindraiky tsisy raha mety hatao foeky hialany asaloha io amintsika. Ohatra iziô, isaka taon̈o, mahaimanonga fo vangany hanin̈y, lamba ndreky fôndrontran̈o. Mety hampirisiky atsika han̈ano raha tsy marin̈y na haloto fitondranten̈a koa olo fiasan̈a araiky amintsika na lekoly araiky amintsika, fa atsika tsy afaka misakana iro tsy han̈ano zen̈y. Mety efa tsy milamin̈y mare koa amy kartie misy atsika, kanefa tsisy raha mety ataontsika foeky hanakanan̈a zen̈y. Tsy mahagaga izikoa feno raha manahiran̈a ndreky mampiasaloha fiain̈anantsika, fotony olo amy donia ty tsy mijery toro lalan̈a amy Baiboly. Satana lastio zan̈ahariny donia ty. Hainy tsarabe fa mety ho voly hanompo Jehovah olo sasany  izikoa fa ‘miasaloha’ mare.​—Mat. 13:22; 1 Jaona 5:19.

4. Mety han̈ano akory atsika koa tatrany raha sarotro?

⁴ Atsika koa fa an̈atiny raha manahiran̈a, atsika tsisy tihandiniky raha hafa izikoa tsy problemontsika fo. Mety havozo atsika: ‘Akory eky ataoko izikoa tsy ampy volanaka? Akory eky zaho koa marary ke tsy afaka miasa, tsy ho afaka asa edy zaho va?’ Mety hiasaloha koa atsika tsao hivadiky amy Zan̈ahary lera misy raha mitsapa finoan̈antsika. Tsy ho ela, Satana hampirisiky olonany hanafiky vahoakany Jehovah. Mety ho loso diniky atsika: ‘Akory eky hataoko raha zen̈y koa avy? Diso ma zaho izikoa mieritreritry raha aby zen̈y?’

5. Ino ma raha tiany Jesosy havian̈a taminizy nivolan̈a ‘aza miasaloha eky anaro’?

⁵ Ho Jesosy tamy pan̈aradia izy: ‘Aza miasaloha eky anaro.’ (Mat. 6:25) Tihivolan̈a ma Jesosy fa tsy tokony hiasaloha foeky atsika? Tsy zen̈y. Ndray iro panompony Jehovah tsy nivadiky taloha tan̈y mba niasaloha koa, fa iro mbala nankasitrahany Jehovah fo. * (1 Mpanj. 19:4; Sal. 6:3) Ny marin̈y aminany, Jesosy tio tihan̈amia toky atsika. Tsy tiany hiasaloha loatra amy raha momba fiain̈ana atsika, fotony mety tsy hazoto hanompo Jehovah atsika izikoa man̈ano zen̈y. Ke ino raha mety hataontsika baka atsika tsy hiasaloha mare loatra?​—Zahava “ Akory Han̈anaovan̈a Zen̈y?”

6. Izikoa Filipianina 4:6, 7 zahan̈a, ino raha han̈ampy anao izikoa fa misy raha mampijaly jerinao?

⁶ 1) Mivavaha matetiky. Izikoa fa misy raha manahiran̈a jerinao, mivavaha baka Jehovah han̈ampy anao. (1 Pet. 5:7) Hamaly vavakanao izy, ke anao hahazo ‘fiadanan̈any Zan̈ahary, bebeny eritreritry jiaby.’ (Vakia Filipianina 4:6, 7.) Hampiasa fan̈ahy masin̈inany izy, ke ataony raha hahavy asalohanao ho kirikiry.​—Gal. 5:22.

7. Ino raha tsy tokony hadin̈antsika lera mivavaka?

⁷ Anao koa fa mivavaka amy Jehovah, koràn̈a aminany zay raha an̈aty fonao. Koràn̈a aminazy mazava tsarabe ino problemonao, ndreky raha tsapanao. Izikoa anao mieritreritry fa mety misy vahaolan̈a fo problemo io, mangataha fahendrena amy Jehovah misy ahitanao izio. Iangavia koa izy han̈amia anao angovo han̈ampy anao han̈ano raha mifan̈araka amy zen̈y. Fa izikoa ndraiky anao efa namango nitady vahaolan̈a fa tsy nety nahita, iangavia izy han̈ampy anao tsy hiasaloha loatra. Izikoa fa hazavainao mazava tsarabe amy Jehovah problemonao, ho moramora aminao hahita fomba namaliany vavakanao. Akory ndraiky basy izikoa hitanao karaha tsisy valiny foeky vavakanao? Anao aza rivan̈a. Alaiva onon̈o fa tsy vavaka voafaritry fo tadiaviny Jehovah, fa anao mivavaka aminany matetiky in̈y koa.​—Lioka 11:8-10.

8. Ino koa raha tokony hivolan̈intsika izikoa fa mivavaka?

⁸ Anao koa fa mikoran̈a amy Jehovah raha mahazo anao, aza adin̈a man̈ano mersy izy. Marin̈y fa mandalo raha sarotro atsika, fa mila alaintsika onon̈o fo hatsaran̈a efa namiany atsika. Mety ho sarotro aminao ndraikindraiky hivolan̈a raha tsapanao. Kanefa alaiva onon̈o fa ndray vavaka tsotra karaha ataony: ‘Ampia zaho Jehovah e!’, efa valiany edy.​—2 Tan. 18:31; Rom. 8:26.

9. Ino raha tokony hataontsika lera atsika mavozo?

⁹ 2) Aza matoky ten̈a fa mitadiava taridalan̈a amy Jehovah. Taminandrany paminan̈y Isaia, navozo mare iro olo ta Joda tsao  hitafihindro Asyrianin̈y aby io. Namango iro nitady hevitry fa iro tsy nahita foeky. Ke loso iro nangataka fan̈ampian̈a tamindro Ezipsianin̈y aby io kanefa iro io olo panompo sampy. (Isaia 30:1, 2) Jehovah nampitandrin̈y iro ta Joda tao fa ho hisy vokany ratsy amindro raha nataondro zen̈y. (Isaia 30:7, 12, 13) Nan̈iraka paminan̈y Isaia i Jehovah han̈ambara tamindro raha tokony hataondro baka iro ho voaro. Ho izy: ‘Hahazo angovo anaro izikoa tsy taitaitry foeky sady matoky fo.’​—Isaia 30:15b.

10. Lera karakory aby ahitan̈a fa anao matoky Jehovah?

¹⁰ Akory ahitan̈a fa atsika matoky Jehovah? Diniha baka ohatra aby ty. Akory hataonao izikoa anao amezanolo asa tsara karama mare, kanefa asa io mitana fotoan̈anao ke mety handrobaka fahazaran̈a tsaranao amy fanompoan̈a Jehovah? Akory ndraiky izikoa misy olo ampiasan̈anaro an̈y mikatsikatsiky anao na mivolan̈a foeky izy fa anao tiany, kanefa olo io tsy panompony Jehovah vita batisa? Ary akory izikoa misy havanao marikitry mimenasy anao karaha ty: ‘Fidiana ny tianao, zaho sa Jehovah?’ Matokisa fa, na ino na ino raha mahazo anao, Jehovah tsy han̈ambela anao hiady manokan̈a. Ambarany anao raha tokony hataonao baka anao han̈ano safidy tsara. (Mat. 6:33; 10:37; 1 Kor. 7:39) Fa karaha ty, hatoky izy ma anao ke han̈araka raha hambarany anao?

11. Tantaranjovy amy Baiboly ao mety han̈ampy anao tsy ho taitaitry izikoa fa miatriky fan̈injehan̈a?

¹¹ 3) Mangalà fianaran̈a baka aminolo tantarainy Baiboly ao. Maro tantara amy Baiboly ao ahitan̈a fa ten̈a ilain̈a tsy taitaitry ndreky matoky Jehovah zen̈y. Lera anao mianatra tantara aby zen̈y, diniha ino raha nan̈ampy iro panompony Zan̈ahary aby io tsy nialamboetry foeky ndray iro ninjehinolo. Karaha zen̈y iziô nataondro apostoly aby io, izikoa fa nisakana iro tsy hitory, iro tamy Fitsaran̈a Avo Jiosy. Iro tsy navozo foeky nivolan̈a karaha ty: “Zan̈ahary fo tsy maintsy arehanay volan̈a fa tsy olo.” (Asa. 5:29) Ndray iro fa niaritry popòko, iro tsy navozo. Fotony nan̈ino? Fotony haindro fa Jehovah nan̈ampy iro. Jehovah koa ravoravo nahita raha nataondro io. Ke zen̈y nahavy iro tsy voly nitory vaovao tsara. (Asa. 5:40-42) Karaha zen̈y koa tamy Stefana handeha hivonen̈a. Tsy navozo foeky izy, ke lan̈iany olo nahita izy tamy zen̈y nivolan̈a fa ‘mira saorany anjely saoranany.’ (Asa. 6:12-15) Nan̈ino izy tsy navozo? Fotony hainy fa nankasitrahiny Jehovah izy.

12. Izikoa 1 Petera 3:14 ndreky 4:14 dinihin̈y, nan̈ino ma atsika mety ho ravoravo fo ndray hinjehin̈y?

¹² Tsapandro apostoly aby io fa Jehovah ten̈a nan̈ampy iro. Namezany angovo iro ke nahavita nan̈ano fahagagan̈a. (Asa. 5:12-16; 6:8) Efa tsy karaha zen̈y ndraiky avahizo. Ndray zen̈y, man̈amia toky atsika Jehovah, fa hamezany fan̈ahy masin̈y atsika izikoa miaritry fan̈injehan̈a nohony fitiavantsika fahamarin̈ana. Man̈amia toky atsika koa izy fa ankasitrahiny fanompoan̈a ataontsika. (Vakia 1 Petera 3:14; 4:14.) Ke atsika tsy tokony hiasaloha amy fan̈injehan̈a mbala ho avy. Tokony hifen̈y atsika han̈ano raha hahavy atsika hatoky tsarabe fa Jehovah ten̈a afaka man̈ampy atsika ndreky man̈avotro atsika. Karaha nataondro Kristianin̈y tamy taonjato voanalohany tan̈y, atsika mila matoky raha nivolan̈iny Jesosy ty: “Ambarako anaro raha tokony hivolan̈inaro avio amezako fahendrena anaro, ke ndray hitambatra araiky iro fahavalonaro aby io, iro tsy hahavita handresy na hanohitry raha zen̈y foeky.” Ke matoky atsika fa ‘izikoa atsika miaritry fo, ho voavonjintsika ain̈intsika.’ (Lioka 21:12-19) Alaiva onon̈o fa Jehovah tsy mety han̈adin̈a panomponany  tsy mivadiky foeky. Firaka amy raha farany madiniky momba iro tsy adin̈any Jehovah. Ke izikoa san̈atria iro maty, iro mbala hivilominy Jehovah fo.

13. Nan̈ino ma atsika mila mandiniky tantaranolo navozo sady tsy natoky Jehovah, koran̈iny Baiboly ao?

¹³ Mila ianarantsika koa tantaranolo tsy natoky Jehovah koran̈iny Baiboly ao. Tsy han̈ampody hadisovan̈andro atsika izikoa man̈ano zen̈y. Araiky amindro io i Asa, panjakany Joda. Nilampy tamy Jehovah izy, izikoa fa nisy maramila etiopianin̈y marobe nandeha nanafiky iro. Nitahiany Jehovah izy, ke resindro iro Etiopianin̈y aby io. (2 Tan. 14:9-12) Kanefa, karakory nataony tafara tatỳ, iro koa fa nitafihiny Basa panjakany Israely? Maramilany Basa taminio vitsivitsy tozay maramilandro fahavalo nanafiky Joda taloha aby in̈y. I Asa taminio tsy nitavandra Jehovah karaha taloha in̈y, fa loso izy nikarama iro Syrianin̈y aby io han̈ampy izy hiady tamy panjakany Israely. (2 Tan. 16:1-3) Narary mare koa i Asa tafara tatỳ, fa izy mbala tsy nilampy tamy Jehovah fo! Ndraiky naty fo izy fa izy tsy nilampy tamy Jehovah eky.—2 Tan. 16:12.

14. Ino raha ianarantsika baka aminy hadisovan̈any Panjaka Asa?

¹⁴ Tamy voanalohany, i Asa koa fa nisy problemo, izy nitavandra Jehovah. Izikoa fa nandeha fotoan̈a, izy efa tsy nan̈ano zen̈y eky. Izy tompiny fo nitady hevitry handaminan̈a problemonany, ke izy nitavandra iro Syrianin̈y aby io. Karaha nahômby fahitan̈a hevitrinany io, kanefa raha zen̈y tsy nahadin̈y ela. Zen̈y nahavy Jehovah nan̈iraka paminan̈y araiky nivolan̈a taminy Asa karaha ty: “Fotony anao nitavandra panjakany Syria fa tsy i Jehovah Zan̈aharinao, ho vôsotro tsy ho azony tan̈ananao tafikiny panjakany Syria.” (2 Tan. 16:7) Ino raha ianarantsika baka amy zen̈y? Mila mitandrin̈y atsika tsao manjary mitôron̈o fahaizan̈antsika na angovontsika, ke tsy hitavandra Jehovah na tsy hitady taridalan̈anany amy Baiboly ao. Mety hisy fotoan̈a atsika mila manapakevitry meky, fa atsika tsy tokony ho taitaitry foeky fa hitavandra Jehovah fo, amy zen̈y izy han̈ampy atsika han̈ano fanapahankevitry tsara.

15. Ino raha tokony hataontsika izikoa tihahazo onon̈o andininteny maro?

¹⁵ 4) Mifen̈a hangala onon̈o andininteny. Ndraikindraiky anao mety hahita andininteny man̈aboaka fa hahazo angovo anao izikoa tsy taitaitry fa matoky Jehovah fo. Ke vakia mare, na sorata izio avio zahava matetiky, amy zen̈y ho azonao onon̈o. Jehovah iziô nan̈iraka Josoa hamaky ndreky hisaintsain̈y tsy tapaka boky misy Lalàn̈a, amy zen̈y izy mba hahay handiniky tsarabe alohany han̈ano raha. Raha nivakiany aby zen̈y koa han̈ampy izy tsy havozo fa hanan̈a korazy fo lera izy mitariky vahoakany Zan̈ahary. (Jos. 1:8, 9) Karaha zen̈y koa, maro andininteny amy Baiboly ao afaka man̈ampy atsika tsy ho taitaitry foeky, lera misy raha mampiasaloha na mampavozo atsika mare.​—Sal. 27:1-3; Ohab. 3:25, 26.

16. Akory ampiasàny Jehovah olo amy fiangonan̈a han̈ampian̈a atsika tsy ho taitaitry ndreky hatoky izy fo?

¹⁶ 5) Miaraha amy vahoakany Jehovah. Mampiasa iro rahalahy ndreky ranabavy aby io i Jehovah han̈ampian̈a atsika tsy ho taitaitry ndreky hatoky izy fo. Ohatra iziô atsika koa fa mandeha mivory, atsika mahazo hatsaran̈a baka amy kabaro ndreky valinteny ndreky koran̈a mampahery ataony piaramanompo aby io. (Heb. 10:24, 25) Hahazo hatsaran̈a koa atsika izikoa mitantara raha mampiasaloha atsika amy naman̈a mafatoky an̈ivony fiangonan̈a, fotony hampahery atsika raha zen̈y.  Sady ‘volan̈a tsara’ ataondro kamaradintsika aby io han̈ampy atsika tsy hiasaloha mare loatra.​—Ohab. 12:25.

17. Izikoa zahan̈a Hebreo 6:19, nan̈ino fan̈antinan̈antsika io han̈ampy atsika tsy ho taitaitry izikoa fa misy problemo?

¹⁷ 6) Ataova fatatra fo fan̈antinan̈anao. Ampitovisin̈y amy “vatofantsiky” na andrisa fan̈antinan̈antsika momba Fanjakan̈any Zan̈ahary io amy Baiboly ao. Izio man̈ampy atsika tsy ho taitaitry foeky ndray miaritry raha sarotro na raha mampiasaloha. (Vakia Hebreo 6:19.) Saintsain̈a fo raha nampan̈antin̈ainy Jehovah aminy hoavy. Amy leranizen̈y, tsisy raha hampiasaloha na hampavozo atsika eky. (Isaia 65:17) Miniminia hely baka han̈ano akory anao amy donia vaovao. Fiain̈ana milamin̈y avio tsisy raha ratsy mandalo. (Mika 4:4) Hahaiho fatatra fo fatokisanao raha aby zen̈y izikoa koran̈inao aminolo izio. Mazotoa mitory ndreky mampianatra, ke ataova zay raha vitanao han̈anaovan̈a zen̈y. Izikoa anao man̈ano zen̈y, tsisy andra hampavôsotro fan̈antinan̈anao io, firaka amy farany.​—Heb. 6:11.

18. Ino raha ho hisy arakarakany han̈aton̈any farany donia ty, avio ino raha han̈ampy atsika hahavita hiatriky zen̈y?

¹⁸ Arakarakany han̈aton̈any farany donia ty, hahaiho maro fo raha mampiasaloha atsika. Ke andininteny niny taon̈o 2021 ty han̈ampy atsika hiatriky zen̈y, ndreky han̈ampy atsika tsy ho taitatitry foeky. Izio koa mampatsiaro atsika fa tokony hitavandra Jehovah fo atsika, fa tsy hitôron̈o fahaizan̈antsika na angovontsika. Ke alô aboakantsika amy raha ataontsika amy taon̈o 2021 ty fa atokisantsika fampan̈antinan̈any Jehovah ty: “Anaro matokisa avio aza taitaitry, fa baka amy zen̈y hazahoanaro angovo.”​—Isaia 30:15.