1. Ino ivolan̈ana fa olo iziô efa tsy tia fianakavian̈anany?

BAIBOLY efa nan̈ambara fa olo aminandra farany tsy ho tia olo tran̈o araiky aminany. (2 Tim. 3:1, 3) Efa tanteraka aminandrantsika iziô raha zen̈y. Ohatra iziô, maro olo fivadiany misaraka. Manjary tsy fankatia mare iro, ke vokany, manjary mahatsiaro tsy tian̈a foeky zanakandro. Raha misy koa, manjary karaha olo tsy fankahay in̈y olo tran̈o araiky, fotony mahalan̈a iro mifampikoran̈a. Karaha ty raha nivolan̈iny panolotsain̈y araiky: “Fianakavian̈a avahizo efa tsy mifampikoran̈a foeky, na babanolo zen̈y, na mamanolo, na zanakandro. Iro samby amy raha maharikian̈a iro: Ordinatera a, tablety e, telefaony e, jeux vidéo ô. An̈arany fo iro tran̈o araiky, fa iro efa kalikaly tsy fankahay!”

2-3. a) Izikoa Romanina 12:10 zahan̈a, azovy ma olo tokony hitiavintsika? b) Ino aby raha hidinihintsika ato?

² Olo amy donia ty tsisy fitiavan̈a, ke atsika tsy tihangala tahaka iro foeky. (Rom. 12:2) Mifanohitry amy zen̈y, tokony hifen̈y atsika hampisy fifankatiavan̈a, an̈ivony fianakavian̈a ndreky fiangonan̈a. (Vakia Romanina 12:10.) Karazan̈a fitiavan̈a karakory ma izy koran̈iny iô io? Izio fitiavan̈a misy aminolo tran̈o araiky mifankatia mare sady tsy mifankafoe. Tokony ho karaha zen̈y koa fifankatiavan̈a misy amy rahalahy ndreky ranabavy an̈ivony fiangonan̈a. Izikoa atsika mifen̈y han̈aboaka fitiavan̈a amy piaramanompo amintsika, hiray sain̈y fo fiangonan̈a.​—Mika 2:12.

³ Ino raha han̈ampy atsika ho tia iro piaramanompo aby io mare ndreky han̈aboaka zen̈y amindro? Hamalian̈a zen̈y, alô atsika handiniky ohatra amy Baiboly ao.

4. Ino toetriny Jehovah hamafisiny Eksodosy 34:6?

⁴ Misy toetriny Jehovah maro tsara amy Baiboly ao. Karaha ataony 1 Jaona 4:8 iziô mivolan̈a fa “Zan̈ahary io fitiavan̈a.” Manjary tihinaman̈a amy Jehovah mare atsika izikoa fa mahay zen̈y. Koran̈iny ao koa fa Jehovah io “be fitiavan̈a”, ary fitiavan̈anany io tsy miovaova. Izy koa ‘be hatsarampan̈ahy feno fitiavan̈a.’ (Vakia Eksodosy 34:6.) Hita baka amy zen̈y fa tiany Jehovah mare panomponany. Ravoravo fontsika mahay zen̈y!

5. Akory an̈aboahany Jehovah fa mamindra fô amintsika izy? Akory hangalantsika tahaka izy?

⁵ Hita aminy Eksodosy 34:6 io fa, mifandray toetriny Jehovah ‘be fitiavan̈a’ ndreky ‘mamindra fô’ io. (Jak. 5:11) Baka amy zen̈y mahavy atsika ho tia izy mare. Akory han̈aboahany Jehovah fa mamindra fô amintsika izy? Izy von̈ono han̈ambela hadisovan̈a. (Sal. 51:1) Amy Baiboly ao, famindrampô io tsy resaka fan̈ambilan̈a hadisovan̈a fo. Dikanizio koa, miory mare izikoa fa mahita olo mijaly ke von̈ono han̈ampy. Karaha zen̈y tsarabe raha tsapany Jehovah. Nivolan̈a foeky izy amy Baiboly ao fa mbala lombolombony hinakinakany reny amy zanany, hinakinakanany amintsika. (Isaia 49:15) Efa famindrampônany edy mahavy izy man̈ampy atsika, lera atsika mijaly. (Sal. 37:39; 1 Kor. 10:13) Mila mamindra fô amy rahalahy ndreky ranabavintsika aby io koa atsika. Man̈ano zen̈y atsika izikoa man̈ambela hadisovan̈andro ndreky tsy mitana heloko ampô. (Efes. 4:32) Ampiantsika koa iro izikoa fa misy raha mampijaly iro. Zen̈y an̈isany fomba maventy ahitan̈a fa atsika mamindra fô. Jehovah ny ten̈a mahay man̈aboaka fitiavan̈a, ke mangala tahaka izy atsika izikoa tia olo sady mamindra fô.​—Efes. 5:1.

6. Nan̈ano akory fifandraisan̈any Jonatana ndreky Davida?

⁶ Maro olo tsy lavorary koran̈iny Baiboly fa nanjary kamarady tsy nifankafoe. An̈isanizen̈y Jonatana ndreky Davida. Tantarainy  1 Samoela 18:1 fa ‘nanjary kamarady mare i Jonatana ndreky Davida.’ Jehovah nifidy Davida hanjary panjaka hisoatra i Saoly. Nanjary halany Saoly mare izy tafaranizen̈y, ke efa tihivoneny fo. Jonatana zanakany Saoly ndraiky tsy karaha zen̈y foeky! Izy tsy nilan̈y tamy babany io. Nifanta foeky iro roeny Davida fa iro hifan̈ampy fo na ino na ino raha mandalo, sady ho kamarady fo koa.​—1 Sam. 20:42.

7. Ino raha mety ho nanamban̈a i Jonatana ndreky Davida tsy hanjary kamarady?

⁷ Nanjary tsy nifankafoe ndreky nifankatia karaha pirahalahy in̈y Jonatana ndreky Davida, ndray naro raha mety ho nanamban̈a iro roe mirahalahy tsy hanjary kamarady. Mahagaga! Zokiny Davida kadiriny 30 taon̈o tio i Jonatana. Ke izy afaka nieritreritry karaha ty: ‘Aia koa ma zaho handeha hikamarady aminolo vo teraka nomoaly io, sady izy amy zen̈y tsisy raha hainy momba fiain̈ana!’ Kanefa Jonatana tsy nieritreritry karaha zen̈y, sady izy tsy nan̈ohatra nan̈ambany Davida foeky.

8. Araka dinikinao, ten̈a naman̈a tsara ankitin̈y ma i Jonatana?

⁸ Haintsika fa Jonatana io zanakany Panjaka Saoly. Izy afaka nan̈izingizin̈y fa izy manan̈a zò hanjary panjaka hisoatra babany. (1 Sam. 20:31) Tsy ho gaga foeky olo izikoa Jonatana be fô i Davida. Karaha zen̈y ankitin̈y ma i Jonatana? Tsy honohono ho izy foeky ho be fô Davida! Nanetry ten̈a izy sady tsy nivadiky tamy Jehovah. Ke Jehovah koa fa nifidy Davida hatao panjaka hisoatra i Saoly, nikeny tamy fô jiaby raha zen̈y. Tsy nivadiky tamy Davida foeky koa izy, nata nampaneloko Saoly mare raha zen̈y.​—1 Sam. 20:32-34.

9. Akory ahaizan̈a fa Jonatana tsy be fô i Davida foeky?

⁹ Tiany Jonatana mare tamy fô jiaby i Davida. Tsy fahavalo foeky fiheverany izy. Jonatana farandraha nisy korazy sady zatra ady eky, ary izy nahay nandefa zanapaly. Iro roeny babany koa nalaza ‘mavitriky mandilatra voromahery’ ndreky ‘mahery mandilatra lion.’ (2 Sam. 1:22, 23) Azony Jonatana natao tsarabe nitôron̈o raha niavaka mare vitany aby zen̈y. Kanefa izy tsy nifan̈oesa tamy Davida sady tsy be fô izy foeky. Mifanohitry tamy zen̈y aby ny raha nisy. Nikeny tsarabe fa Davida io olo ten̈a nisy korazy sady natoky Jehovah. Hitany raha zen̈y tamy Davida namono Goliata. Ke nanomboko tamy zen̈y, nanjary tiany mare i Davida. Ary atsika ke? Akory han̈aboahantsika fa tiantsika mare amy fô jiaby iro piaramanompo amintsika aby io?

10. Karakory ma ‘mifankatia mare amy fô jiaby’ zen̈y?

¹⁰ Koran̈iny Baiboly fa atsika mila ‘mifankatia mare amy fô jiaby.’ (1 Pet. 1:22) Jehovah modelintsika amy zen̈y. Be ankitin̈y fitiavany atsika, ke tsisy raha mahavita man̈ova zen̈y foeky izikoa atsika tsy mivadiky aminany. (Rom. 8:38, 39) Amy teny griky, dikany “mare” zen̈y man̈itatra na man̈enjan̈a. Raha zen̈y tsy mandeha ho azy fa mila ezaka. Karaha zen̈y koa fitiavan̈a piaramanompo. Izio tsy mandeha ho azy fa mila ezaka. Karaha ty baka! Akory izikoa man̈ano raha mampameloko atsika iro piaramanompo aby io? Tsy maintsy mifen̈y atsika ‘hifandefitry, ke han̈ano raha mampisy firaisantsain̈y amintsika samby atsika fotony atsika efa nampiraisainy fan̈ahy masin̈y.’ (Efes. 4:1-3) Izikoa atsika mifen̈y fo man̈ano raha isiany fihavanan̈a, atsika tsy hifantoko be loatra aminy hadisovan̈andro. Tokony hifen̈y koa atsika baka hitovy amy niny Jehovah fomba fahitantsika iro.​—1 Sam. 16:7; Sal. 130:3.

11. Nan̈ino tsy mora amintsika ndraikindraiky man̈aboaka fitiavan̈a?

 ¹¹ Ndrainkindraiky tsy mora amintsika man̈aboaka fitiavan̈a amindro rahalahy ndreky ranabavy aby io, intsaka eky izikoa haintsika toetry ratsindro. Mety zen̈y koa donko raha navoa Kristianin̈y sasany tamy taonjato voanalohany, karaha ataony Eodia ndreky Syntyke. Niaraka niasa taminy apostoly Paoly iro roe mirahavavy io ‘tamy fitorian̈a vaovao tsara.’ Kanefa, tsy hay ino antony, fa nanjary tsy fankahazo iro roe vavy io. Ke iro nampirisihiny Paoly hiray sain̈y.​—Fil. 4:2, 3.

12. Ino raha han̈ampy atsika ho tia iro piaramanompo amintsika aby io?

¹² Ino raha han̈ampy atsika ho tia iro rahalahy ndreky ranabavintsika aby io avahizo? Mila haintsika antsendriky iro. Arakarakany ahaizantsika iro, ho haintsika antony mahavy iro han̈ano raha araiky, ke hitombo koa fitiavantsika iro. Tsy tokony hataontsika sakana foeky taon̈o ndreky raha niain̈ana. Alaiva onon̈o Jonatana. Zokiny Davida kadiriny 30 taon̈o izy, kanefa iro kamarady mare. Anao ke? Olo mitovy taon̈o aminao fo ma ataonao naman̈a, sa anao mba minaman̈a aminolo isankarazany? Izikoa anao man̈ano zen̈y, ho hita fa ten̈a ‘tia iro rahalahy jiaby amy finoan̈a’ anao.​—1 Pet. 2:17.

13. Ino mahavy atsika mifankahazo mare aminolo sasany an̈ivony fiangonan̈a?

¹³ Marin̈y fa atsika tia iro rahalahy ndreky ranabavy amintsika aby io. Fa zen̈y ma mivolan̈a fa tsy maintsy mitovy fifandraisan̈antsika amindro tsiaraikiaraiky? Tsy zen̈y; ary raha zen̈y tsy ho posibla foeky. Normaly izikoa atsika mifankahazo mare aminolo sasany fotony mety mitovy raha tian̈a. Diniha hely Jesosy. Tiany aby iro apostolinany aby io, fotony “kamarady” fikahiany iro io. Kanefa i Jaona koran̈iny Baiboly fa ten̈a marikitry izy. (Jaona 13:23; 15:15; 20:2) Ndray izy man̈ano zen̈y, Jesosy tsy nan̈avakavaka. Ino mahavy atsika mivolan̈a zen̈y? Jaona ndreky Jakoba rahalahiny koa fa nangataka plasy an̈abo amy Fanjakan̈any Zan̈ahary, ho Jesosy: ‘Tsy zaho mifidy olo hapetraka ankavanan̈a na ankavianaka.’ (Mar. 10:35-40) Mangala tahaka Jesosy koa atsika,  ke tsy tokony han̈avakavaka na oe namantsika marikitry fo amezantsika raha tsaratsara. (Jak. 2:3, 4) Tsy tokony ho hisy raha karaha zen̈y foeky an̈ivony fiangonan̈a, fotony raha zen̈y tsy mampiray sain̈y.​—Joda 17-19.

14. Izikoa Filipianina 2:3 zahan̈a, ino raha han̈ampy atsika tsy hifan̈oesa amindro piaramanompo amintsika aby io?

¹⁴ Izikoa atsika man̈ano raha isiany fitiavan̈a, atsika tsy hifan̈oesa amy piaramanompo na han̈ano raha hahavy iro hifan̈oesa amintsika. Alaiva onon̈o i Jonatana. Izy tsiary ndraiky be fô i Davida foeky, na niady kasà taminazy ke oe tihanjary panjaka. Zen̈y koa tokony hataontsika. Izikoa iro piaramanompo amintsika aby io mahavita raha tsara, atsika tsy tokony ho be fô iro. Tokony hifen̈y fo atsika ‘hanetry ten̈a ke hihevitry iro an̈abo mandilatra atsika.’ (Vakia Filipianina 2:3.) Aza adin̈a fa misy raha ilàn̈a atsika aby atsika tsiaraikiaraiky an̈ivony fiangonan̈a io. Izikoa atsika manetry ten̈a fo, ho hitantsika toetry tsarandro rahalahy ndreky ranabavy aby io, avio ho vitantsika koa hangala tahaka modely tsarandro.

15. Ino raha ianarantsika baka amy raha navoa i Tanya ndreky fianakavian̈anany?

¹⁵ Izikoa fa misy raha sarotro mandalo amy fiain̈anantsika, Jehovah mampahery atsika fo. Ataony raha hahavy atsika hahatsapa fa izy tia atsika sady von̈ono han̈ampy atsika. Akory han̈anaovany zen̈y? Mampiasa iro rahalahy ndreky ranabavy aby io izy. Diniha baka raha nahazo fianakavian̈a araiky mananjanaka telo ty. Nisy fivoriambe iraisampirenena natao ta Etazonỳ tamy taon̈o 2019. Titranany io: “Fitiavan̈a io Tsy ho Ravan̈a Foeky.” Iro koa fa baka nan̈aton̈o fivoriambe io, sabotsy, nisy raha nandalo.  Ho Tanya, mamandro tsaiky aby io: “Zahay koa fa tamy lalan̈a hody taminy hotely nandrianay, nisy tomobily araiky tsy hainay tany faviany, nantreky tamy tomobilinay. Tsisy olo naratra ndraiky tamy zen̈y, fa zahay fo taitry mare. Zahay baka tio niboaka baka tan̈aty tomobily ke nidôko tamy lalan̈a tio. Nisy olo amy zay hitanay nan̈elakelaka tankilandalan̈a, ke zahay nirahiny nan̈oton̈o tamy tomobilinany tarỳ. Kaiky izio ranadahy baka nan̈aton̈o fivoriambe io! Nisy piaramanompo dimy baka a Suède koa nijanon̈o. Nitolon̈indro rahavavy aby io mare zahay, ke nahatsiaro nahivankivan̈a oe zahay. ‘Efa tsy man̈ino eky zahay ho zaho tamindro, ke efa mety mandeha anaro’, fa iro tsy nandeha foeky ndray efa navy dokotera. Nikarakaraindro tsarabe zahay. Tsapako baka tamy raha nandalo in̈y, fa ten̈a tiany Jehovah mare zahay. Ke nahainitombo fo fitiavanay iro piaramanompo aby io ndreky fitiavanay Jehovah. Mahaimankasitraka Jehovah fo koa zahay.” Asa anao mba mahazo onon̈o, ombian̈a anao natsiaro setry mare ke nisy piaramanompo nan̈ampy anao?

16. Nan̈ino tokony haboakantsika fa tiantsika mare iro piaramanompo aby io?

¹⁶ Miniminia hely baka hatsaran̈a mety ho azontsika izikoa haboakantsika fa tiantsika mare iro piaramanompo aby io, intsaka eky lera iro mandalo raha sarotro! Atsika tsy vitany hankahery iro fa hampiray sain̈y vahoakany Jehovah. Ho hita koa fa atsika ten̈a pan̈aradia Jesosy, ke ho maro olo voantsory hanompo Jehovah. Fa ny raha ten̈a maventy, atsika han̈amia voninahitry Jehovah, “Babany hinakinaka ndreky Zan̈ahariny fankahirezan̈a jiaby.” (2 Kor. 1:3) Ke irarian̈a atsika jiaby samby han̈ano raha hisiany fitiavan̈a io amintsika fo ndreky tsy ho voly han̈aboaka izio!