1. Lera karakory aby atsika mety koran̈iny miaraka amy Jehovah?

 ATSIKA tia miaraka amy naman̈a. Ravoravo iziô olo fivadiany man̈ano raha miaraka. Tanora koa tia miaraka amy kamarady. Ravoravo koa atsika miaraka amy piaramanompo. Fa mbala bebenizen̈y haravoan̈antsika, izikoa atsika manokan̈a fotoan̈a miaraka amy Zan̈ahary. Akory han̈anaovan̈a zen̈y? Manokan̈a fotoan̈a iarahan̈a amy Zan̈ahary atsika, izikoa fa mivavaka, mamaky Baiboly, avio lera atsika mangala onon̈o raha ampan̈antin̈ainy ndreky toetrinany maro tsara. Tsisy raha atakalontsika fotoan̈a han̈anaovantsika raha miaraka amy Jehovah io.​—Sal. 139:17.

2. Ino raha manahiran̈a atsika?

² Marin̈y ndraiky fa farandraha tiantsika eky man̈ano raha miaraka amy Jehovah, kanefa tsy mora man̈ano zen̈y ndraikindraiky. Efa lomolomoay fo baka fiain̈anantsika, ke mety ho sarotro amintsika mahita fotoan̈a han̈anaovan̈a raha arapan̈ahy. Fotony mety hangala fotoan̈antsika aby, na asantsika zen̈y na fikarakaran̈a fianakavian̈antsika, na raha hafa. Ke mety sahiran̈a atsika hahita fotoan̈a hivavahan̈a, hianaran̈a manokan̈a, ndreky hisaintsain̈ana raha ianarantsika.

3. Ino raha mety handany fotoan̈antsika?

³ Misy raha hafa koa mety hangala fotoan̈antsika. Misy raha sasany tsy ratsy, fa izikoa atsika tsy mitandrin̈y, iro io mety handany fotoan̈antsika. Ke mety tsy hahita fotoan̈a hankatsaran̈a fihavanan̈antsika amy Jehovah atsika. Ohatra araiky amy zen̈y  iziô fangalan̈a diandian̈a. Tsisy maharatsy atsika mangala diandian̈a. Kanefa, ndray efa fidiantsika tsarabe fangalan̈a diandian̈a ataontsika, izikoa be loatra fotoan̈a lanintsika an̈anaovan̈a izio, hihen̈y fotoan̈a han̈anaovantsika fanompoan̈a. Aza adin̈a fa tsy fangalan̈a diandian̈a ny raha ten̈a maventy amy fiain̈ana!​—Ohab. 25:27; 1 Tim. 4:8.

4. Ino aby raha hidinihintsika ato?

⁴ Ino ma raha ten̈a maventy amy fiain̈ana? Nan̈ino atsika mila mahay mampiasa fotoan̈antsika tsarabe? Ino hatsaran̈a ho azontsika izikoa atsika mahay mampiasa fotoan̈antsika? Zen̈y raha hidinihintsika amy lahatsoratra ty ato.

5. Izikoa dinihin̈y Efesianina 5:15-17, ino raha han̈ampy tanora hifidy fomba fiain̈ana ten̈a tsara?

⁵ Mifidiàna fomba fiain̈ana ten̈a tsara. Tanora ny ten̈a avoakasiky amy zen̈y, fotony iro mila mandiniky raha hataondro amy fiain̈ana. Amy lafiny araiky baka, papianatra na fianakavian̈a tsy Vavolombelon̈o, mety hampirisiky tanora araiky han̈ano fianaran̈a ambony, amy zen̈y izy ho iro hahita asa tsara ke hanjary pan̈arivo. Kanefa mitaky fotoan̈a lavabe fan̈anaovan̈a fianaran̈a ambony zen̈y. Amy lafiny hafa ndraiky, raimandreny na naman̈a an̈ivony fiangonan̈a mety hampirisiky tanora han̈ano voalohantoeran̈a fanompoan̈a Jehovah. Ino raha han̈ampy tanora araiky tia Jehovah han̈ano fanapahankevitry tsara? Tsara aminany izy mamaky Efesianina 5:15-17 ndreky mangala onon̈o raha koran̈inizio. (Vakia.) Izy koa fa baka mamaky andininy aby io, ty raha tsara dinihiny: ‘Ino ma “sitrapôny Jehovah”? Fanapahankevitry karakory ma mamparavoravo izy? Fanapahankevitry karakory ma han̈ampy zaho hahay hampiasa fotoan̈anaka?’ Tsaraova fa ‘ratsy andra misy atsika izioty’, sady doniany Satana ty lastio efa tsy ela ho ravan̈a. Ke misy jery atsika izikoa raha mamparavoravo Jehovah fo ampiasantsika fotoan̈antsika.

6. Ino safidy nataony Maria, avio nan̈ino tsara safidy nataony zen̈y?

⁶ Raha ten̈a maventy ataova voanalohany. Karakory ma zen̈y? Mety nisy fotoan̈a donko atsika tihan̈ano raha aroe samby isany, ary raha aby io tsisy ratsy. Mampiasa fotoan̈antsika amy fomba tsara atsika amy fotoan̈anizen̈y, izikoa haintsika man̈avaka aia amindro io ny ten̈a matomboko ke tokony hatao voanalohany. Karaha zen̈y iziô raha nandalo, tamy Jesosy namangy iry Maria ndreky Marta in̈y. Endrakendraka sady ravoravo mare i Marta, Jesosy koa fa navy tamindro tao, ke nikarakara hanin̈y isankarazany izy. Fa Maria rahavaviny ndraiky nipetraka tankilany vitany Jesosy, sady nitandren̈y raha nampianariny. Tsisy naharatsy raha nataony Marta, fa Jesosy nivolan̈a: ‘Maria nifidy lay ten̈a tsara.’ (Lioka 10:38-42) Mety tsy ela, efa nadin̈any Maria edy ino hanin̈y nihoanindro taminandra io; fa ny raha azo antoko, tsy nadin̈any foeky raha nampianariny Jesosy izy. Tan̈atiny fotoan̈a hely fo raha zen̈y, kanefa ten̈a nankafiziny Maria. Ho ravoravo koa atsika izikoa manokan̈a fotoan̈a han̈anaovan̈a raha miaraka amy Jehovah. Akory ahaizantsika hampiasa fotoan̈antsika amy fomba tsara?

7. Nan̈ino ma atsika mila manokan̈a fotoan̈a hivavahan̈a, hianaran̈a, ndreky hisaintsain̈ana?

⁷ Mila mazava aminao fa an̈isany fanompoan̈antsika vavaka, fianaran̈a, avio fisaintsain̈ana. Lera atsika mivavaka, atsika mikoran̈a amy Babantsika be fitiavan̈a andan̈itry an̈y. (Sal. 5:7) Lera atsika mianatra Baiboly, atsika mianatra raha momba Jehovah, Loharanony fahendrena jiaby. (Ohab. 2:1-5) Atsika  koa fa misaintsain̈y raha ianarantsika, atsika mandiniky toetriny Jehovah ndreky raha tsara handeha hataony amintsika ndreky aminolo jiaby. Zen̈y an̈aboahantsika fa mahay mampiasa fotoan̈a atsika. Ino raha han̈ampy atsika hahay hampiasa tsara fotoan̈a hely anan̈antsika?

8. Ino raha ianarantsika baka tamy raha nataony Jesosy?

⁸ Izikoa pôsibla, mifidiana tany mangin̈y. Miniminia hely baka raha nataony Jesosy. Talohanizy nanomboko fanompoan̈anany tambony tany teto, izy nidôko 40 andra tamy tany paiky. (Lioka 4:1, 2) Tsisy raha nideranzy izy foeky tan̈y, ke izy afaka nivavaka ndreky nisaintsain̈y raha handeha hampan̈anôviny Babany izy. Ten̈a nan̈ampy Jesosy raha zen̈y, fotony Satana koa fa navy hitsapa jery izy, izy efa vôn̈ono. Mahatsara atsika mandiniky modely nambelany Jesosy io. Olo maro antran̈o ma anaro? Mety tsy ho mora mahita tany mangin̈y zen̈y. Ke nan̈ino izikoa mitady tany hafa kalma ankoatrany antran̈onaro, hivavahan̈a ndreky hisaintsain̈ana? Zen̈y tsarabe raha nataony Julie, izy koa fa tihanaokan̈a fotoan̈a lavalava hivavahan̈a amy Jehovah. Mipetraka a France iro, sambra araiky fo tran̈ondro fivadiany. Ke tsy maintsy nisy raha fo manabataba izy. Ino raha nataony? Ho Julie: “Isanandra zaho mandeha amy zaridain̈impanjakan̈a. Zaho zaraiky fo an̈y, ke mifantoko tsara zaho koa fa mikoran̈a amy Jehovah.”

9. Ndray maro asa i Jesosy, akory nan̈aboahany fa matomboko aminany fifandraisany amy Jehovah?

⁹ Jesosy maro raha natao. Tan̈atiny fotoan̈a jiaby nanompoany tambony tany teto, nisy vahoaka nan̈araka izy tamy zay tany nandihanany, ary iro samby nila fan̈ampian̈a taminany aby. Tandraraiky, ‘nivory tamy varavaran̈any tran̈o nisy izy olo tanàna araiky’ fotony iro tihahita izy. Fa ndray zen̈y, mbala nanokan̈a fotoan̈a hivavahan̈a tamy Jehovah fo Jesosy. Andra mbala mahizikiziky, izy efa lôso nitady ‘tany mangin̈y’, baka tsisy raha hanabataba izy mivavaka amy Babany.​—Mar. 1:32-35.

10-11. Nampirisihiny Jesosy han̈ino iro apostolinany aby io, kanefa ino raha nataondro? (Matio 26:40, 41)

¹⁰ Ino raha nataony Jesosy taminy alin̈y farany talohany namonoan̈a izy? Taminio efa ho tapitry fanompoan̈anany tambony tany teto, fa mbala nitady tany mangin̈y fo izy hivavahan̈a ndreky hisaintsain̈ana. Taia plasy hitany? Tamy zaridain̈iny Getsemane. (Mat. 26:36) Tamy fotoan̈anizen̈y, Jesosy nan̈azava tamy pianatranany raha matomboko momba vavaka.

¹¹ Miniminia hely baka raha nisy. Mety efa alin̈y mare andra tamy Jesosy ndreky apostolinany telo navy tamy zaridain̈iny Getsemane tao. Mety efa mandilatra sasakalin̈y foeky donko! Nirahiny Jesosy ‘niambin̈y’ fo iro, baka io izy lôso nivavaka. (Mat. 26:37-39) Kanefa mbala tan̈atiny izy nivavaka fo, iro apostoly  aby io efa tafandry mare. Iro koa fa hitany Jesosy fa tafandry, nifohaziny iro salakady nampirisihiny ‘hiambin̈y ndreky hivavaka fo.’ (Vakia Matio 26:40, 41.) Tontohitry izy baka tiô fa niasaloha mare pianatranany aby io sady efa lonja. Nahinakinaka iro mare Jesosy, ke ho izy karaha ty: ‘Marin̈y ndraiky fa sain̈y mazoto, fa nofotro malemy.’ Nimpody nivavaka fan̈indroeny ndreky fan̈intelony i Jesosy, fa isaka izy nimpody tamindro tiô, zahavany iro nandry fo fa tsy nivavaka!​—Mat. 26:42-45.

12. Ino raha mety ataontsika izikoa misy lera atsika mahatsiaro lonja mare na miasaloha be ke tsisy angovo hivavaka?

¹² Mahaiza mifidy fotoan̈a. Misy lera ma anao maharen̈y kajo mare na miasaloha be, ke ndray hivavaka tsy vitanao? Izikoa zen̈y, matokisa fa tsy anao zaraiky karaha zen̈y. Misy olo zatra mivavaka lera alin̈y be; kanefa, matetiky efa kajo loatra iro aminin̈y. Ke ino raha nataondro? Nivoandro bônibônera lera ivavahandro. Sasany ndraiky nivolan̈a fa moramora tamindro nifantoko izikoa fa nivoandro pôzisiondro lera mivavaka. Ohatra, iro mety mandongaliky, na mipetraka tsarabe. Akory ndraiky izikoa ren̈inao efa mare loatra raha mahazo anao ke tsisy angovo foeky anao hivavaka? Volàn̈a amy Jehovah raha tsapanao. Matokisa fa hainy tsarabe raha mahazo anao zen̈y. Ary Babantsika io farandraha be famindrampô eky.​—Sal. 139:4.

13. Ino raha mety hanabataba atsika lera mivavaka, mianatra, na mivory? Nan̈ino?

¹³ Anao koa fa mianatra, adosoa raha mety hanabataba anao. Tsy vavaka zaraiky fo fomba hankafantarantsika fihavanan̈antsika amy Jehovah, fa ilaintsika koa mianatra Volan̈a Zan̈ahary ndreky man̈aton̈o fivorian̈a. Ke akory ahaizantsika hampiasa tsara fotoan̈antsika lera mianatra manokan̈a na lera mivory? Ty raha tsara dinihinao: ‘Ino ma raha man̈elingelin̈y zaho koa fa mivory na mianatra manokan̈a?’ Telefaony, sa mesazy, sa hafatra aminy e-mail? Amy zioty, mandeha andrivony tapitrisa olo mampiasa fitaovana elektroniky. Misy pikaroko mivolan̈a fa izikoa atsika tihavita hifantoko, tokony hataontsika lavitry atsika iro fitaovan̈a aby io. Nivolan̈a koa manampahaizan̈a araiky fa ‘tsy ho vitanao foeky hifantoko aminy asanao, izikoa misy telefaony ankilanao. Ho lôso antany hafa fo jerinao.’ Alohany fivorian̈a ndreky fivoriambe manomboko, matetiky atsika ampirisihin̈y  hamono na tsy han̈isy feony fitaovan̈a elektroniky ampiasaintsika, baka tsy hanabataba olo hafa. Ke tsao mba mety man̈ano karaha zen̈y koa anao izikoa fa mianatra manokan̈a, amy zen̈y tsisy raha hanabatabata anao foeky amy fotoan̈a efa natokananao niny Jehovah io!

14. Izikoa zahan̈a Filipianina 4:6, 7, ino raha han̈ampy atsika hifantoko?

¹⁴ Mivavaha baka Jehovah han̈ampy anao hifantoko. Izikoa anao tontohitry fa efa manomboko mandeha antany hafa jerinao lera anao mianatra manokan̈a na lera anao mivory, mivavaha baka Jehovah han̈ampy anao. Izikoa misy raha mampiasaloha anao mare, mety ho sarotro aminao han̈adoso raha zen̈y amy jerinao. Kanefa ten̈a mila man̈ano zen̈y anao, izikoa anao tihifantoko amy raha arapan̈ahy. Mivavaha baka “fiadanan̈any Zan̈ahary” hiambin̈y fônao ndreky ‘jerinao.’​—Vakia Filipianina 4:6, 7.

15. Ino antony araiky mahatsara atsika manokan̈a fotoan̈a hiarahan̈a amy Jehovah?

¹⁵ Maro hatsaran̈a ho azonao izikoa anao manokan̈a fotoan̈a ikoran̈ana amy Jehovah, itandrin̈esan̈a izy, ndreky handinihan̈a raha momba izy. Voanalohany, han̈ano fanapahankevitry tsara anao. Man̈amia toky atsika Baiboly fa ‘ho hisy jery lan̈iany olo miaraka aminolo misy jery.’ (Ohab. 13:20) Jehovah baka Loharanony fahendrena, ke izikoa anao manokan̈a fotoan̈a hiarahan̈a aminany, anao hanjary misy jery edy. Hahaiho hainao fo raha mamparavoravo izy ndreky raha halany.

16. Nan̈ino atsika mivolan̈a fa hitombo fahaizantsika mampianatra izikoa atsika man̈ano raha miaraka amy Jehovah?

¹⁶ Faharoe, hitombo fahaizanao mampianatra. Tanjon̈ontsika voanalohany izikoa fa mampianatra Baiboly, han̈ampy olo ampianarintsika io hanjary kamaradiny Jehovah. Arakarakany mampazoto atsika mivavaka ndreky mianatra momba Jehovah, hitombo fitiavantsika izy, avio hahavita han̈ampy olo ho tia izy koa atsika. Aleva onon̈o baka Jesosy. Nafana fô mare izy koa fa nikoran̈a raha momba Jehovah tamy pianatranany, avio nataony tsapandro fa Jehovah ten̈a be fitiavan̈a. Ke nanjary tia Jehovah koa iro pianatranany aby io.​—Jaona 17:25, 26.

17. Nan̈ino vavaka ndreky fianaran̈a manokan̈a man̈ampy atsika ho fatatra finoan̈a?

¹⁷ Fahatelo, hahaiho fatatra fo finoan̈anao. Miniminia hely baka ino vokany izikoa anao mivavaka baka Zan̈ahary hitaridalan̈a, hankahery, na han̈ampy anao. Isaka Jehovah mamaly vavakanao, hitombo finoan̈anao. (1 Jaona 5:15) Ino koa raha hafa hankafatatra finoan̈anao? Fianaran̈a manokan̈a. Tsaraova fa “finoan̈a io baka amy raha ren̈y.” (Rom. 10:17) Ke  ilain̈a mianatra, fa zen̈y tsy ampy. Ino koa raha mila ataontsika?

18. Hazavà nan̈ino atsika mila misaintsain̈y.

¹⁸ Atsika mila misaintsain̈y raha ianarantsika. Diniha baka raha niain̈any panoratra Salamo 77. Nalahelo mare izy fotony hainy fa nanjary tsy nankasitrahiny Jehovah izy ndreky Israelita namany aby io. Mare loatra asalohanany ke tsy tafandry foeky izy alin̈y. (Andininy 2-8) Ino raha nataony? Ho izy tamy Jehovah: “Zaho hisaintsain̈y asanao jiaby, avio hidinihiko tsarabe raha nataonao.” (Andininy 12) Efa nan̈ampy vahoakanany i Jehovah letrizay, ary hainy panoratra salamo io raha zen̈y. Kanefa mbala niasaloha fo izy tsao ‘nadin̈any Jehovah iro, na mbala meloko amindro izy ke efa tsy hamindra fô amindro eky.’ (Andininy 9) Nisaintsain̈y raha nataony Jehovah izy baka tiô, ke nazony onon̈o fa Jehovah io Zan̈ahary mamindra fô. (Andininy 11) Ino vokany? Nanjary natoky panoratra salamo io fa Jehovah tsy hiala Vahoakanany zen̈y foeky. (Andininy 15) Karaha zen̈y koa, atsika koa misaintsain̈y raha efa nataony Jehovah han̈ampian̈a vahoakanany ndreky raha efa nataony tamintsika tsiaraikiaraiky, hahaiho fatatra fo finoan̈antsika.

19. Ino mahatsara atsika manokan̈a fotoan̈a han̈anaovan̈a raha miaraka amy Jehovah?

¹⁹ Fahefatra, sady ten̈a maventy, hitombo fitiavanao Jehovah. Ilain̈a manan̈a toetry tsara hafa. Kanefa, baka amy fitiavan̈a mahavy atsika ho vôn̈ono han̈araka volan̈any Jehovah, hafoe ten̈a ndreky hafoe raha han̈anaovan̈a raha mamparavoravo izy, avio vôn̈ono hiaritry fitsapan̈a. (Mat. 22:37-39; 1 Kor. 13:4, 7; 1 Jaona 5:3) Tsisy raha valera mandilatra tsara fihavanan̈a amy Jehovah.​—Sal. 63:1-8.

20. Tapakevitry han̈ino anao beky ho hisy fotoan̈a fo anao hivavahan̈a, hianaran̈a, avio hisaintsain̈ana?

²⁰ Aleva onon̈o fa an̈isany fanompoan̈antsika vavaka, ndreky fianaran̈a, avio fisaintsain̈ana. Karaha nataony Jesosy, mitadiava tany kalma, tsisy raha manabataba, han̈anaovan̈a raha miaraka amy Jehovah. Adosoa zay raha mety hanabataba anao. Lera anao man̈ano raha arapan̈ahy, mivavaha baka Jehovah han̈ampy anao hifantoko. Izikoa hainao mampiasa tsara fotoan̈anao rango iziô, Jehovah hitahy anao ke anao hiain̈y mandrakizay amy donia vaovaony Zan̈ahary.​—Marka 4:24.