1. Ino aby problemony Davida?

 VAKY filifasan̈a i Davida tandraraiky, fotony tihamono izy i Saoly, panjaka mahery taminy Israely. Tan̈atiny izy nilefa io, nisy fotoan̈a izy lany vatsy, ke nandalo ta Noba izy nangataka môfo dimy taminy Ahimeleka. (1 Sam. 21:1, 3) Tafara tatỳ koa, lôso izy ndreky olonany nandeha nilefa tan̈atiny lavabato. (1 Sam. 22:1) Akory ma nahavy Davida nazondraha karaha zen̈y?

2. Nan̈ino ma atsika mivolan̈a fa nanalisaly fahin̈ana i Saoly? (1 Samoela 23:16, 17)

² Be fô Davida mare i Saoly, fotony Davida nanjary tiatianolo tozay izy. Maro koa olo nidera Davida, fotony izy nandresy matetiky izikoa fa nandeha niady. Hainy Saoly tsarabe fa baka taminizy tsy nan̈araka volan̈any Jehovah nahavy Jehovah tsy nankasitraka izy eky, ndreky nifidy Davida hanjary panjakany Israely. (Vakia 1 Samoela 23:16, 17.) Saoly taminio mbala panjaka; izy nanan̈a maramila maro, ary maro koa olo nan̈araka izy. Zen̈y nahavy Davida tsy maintsy nilefa han̈avotany ain̈inany. Nihevitry ma Saoly fa ho vitany hanohitry fikasan̈any Jehovah han̈ano Davida ho panjaka? (Isaia 55:11) Tsy koran̈iny Baiboly raha zen̈y, fa ny raha azontsika antoko: Nanalisaly fahin̈ana i Saoly. Fotony nan̈ino? Tsisy olo mahatohitry Jehovah!

3. Ino raha tsapany Davida ndray tiô raha tsy maintsy niaretany?

³ Davida nanetry ten̈a. Izy tsy nanendry ten̈a hanjary panjakany Israely, fa Jehovah lastio nifidy izy. (1 Sam. 16:1, 12, 13) Halany Saoly angovo jiaby i Davida, ke efa tihivoneny fo. Ndray zen̈y, Davida tsy nan̈amia tsin̈y Jehovah foeky tamy raha jiaby niaretany. Tsy nitretre koa izy ndray taminizy tsy ampy hanin̈y,  ndray taminizy nisitriky tan̈atiny lavabato. Nifanohitry tamy zen̈y aby raha nataony. Namôron̈o hira fideran̈a tsara mare izy, ary tapany amizio ioren̈any andininteny niny taon̈o 2022, mivolan̈a karaha ty: ‘Hahazo hatsaran̈a fo lan̈iany olo mitady Jehovah.’​—Sal. 34:10.

4. Ino aby fan̈ontanian̈a hidinihintsika, avio nan̈ino ilaintsika mahay valinizen̈y?

⁴ Maro panompony Jehovah amy zioty tsy ampy hanin̈y na tsisy raha ten̈a ilain̈a amy fiain̈ana. * Zen̈y iziô raha mahazo panompony Jehovah maro tan̈atiny fotoan̈any valan̈aretin̈y COVID-19. Efa ampoizintsika fa arakarakany han̈ataon̈any “fahorian̈a be”, hahaiho sarotro fo fiain̈ana. (Mat. 24:21) Ke alô hizahavantsika valiny fan̈ontanian̈a efatra aby ty: Nan̈ino ma Davida nivolan̈a fa ‘nahazo hatsaran̈a maro’ izy? Nan̈ino atsika mila mahay afapô amy raha anan̈antsika? Nan̈ino atsika matoky fa hikarakara atsika fo Jehovah? Ino aby raha mety hataontsika hiomanan̈a amy raha mbala ho avy?

5-6. Izikoa Salamo 23:1-6 zahan̈a, nan̈ino Davida nivolan̈a fa ‘hahazo hatsaran̈a fo’ panompony Jehovah?

⁵ Ino ma raha tiany Davida havian̈a taminizy nivolan̈a fa ‘hahazo hatsaran̈a fo’ olo manompo Jehovah? Mitovitovy aminio volan̈a nampiasainy Davida, taminizy nanoratra Salamo 23. (Vakia Salamo 23:1-6.) Ty raha voanalohany nisoratiny amizio ao: “Jehovah Piambin̈y zaho. Tsisy raha hanahiran̈a zaho.” Misy raha matomboko nikoran̈iny Davida aminy andininy hafa amy Salamo io. An̈isanizen̈y raha tsara namezany Jehovah izy, fotony Jehovah nataony Piambin̈y izy fo. Jehovah nitariky izy ‘tamy lalan̈any fahamarin̈ana.’ Jehovah Zan̈ahary tsy mivadiky, ke nampiany fo Davida, na tamy mora na tamy sarotro. Ndray izy man̈ano zen̈y, hainy Davida fa ndray iô Jehovah mikarakara izy, tsy maintsy mbala handalo raha sarotro fo izy. Nisy fotoan̈a izy mba kivy. Nivolan̈a izy fa mira ‘namakivaky vavasaha mahiziky mare’ izy, avio ho maro koa fahavalonany. Kanefa ‘tsisy raha tokony hampavozo izy’,  fotony Jehovah Piambin̈y izy io niaraka taminany fo.

⁶ Ino nahavy Davida nivolan̈a fa ‘tsisy raha hanarihan̈a’ izy, kanefa isankarazany problemonany? Ty valiny: Nanan̈any aby raha jiaby hahavy izy ho tsara fihavanan̈a tamy Jehovah. Ke nahatsiaro sambatra fo izy, ndray tsy nanandraha. Nahafapô izy aby zay raha namezany Jehovah izy. Ny raha ten̈a maventy tamy Davida: Fitahian̈a ndreky fiarovan̈a baka amy Jehovah.

7. Eraka raha koran̈iny Lioka 21:20-24, ino raha sarotro nidiaviny Kristianin̈y ta Jodia?

⁷ Hitantsika baka amy raha nambarany Davida io fa tsy tokony ho fanan̈ana ny raha ten̈a maventy amintsika. Marin̈y fa mety ho ravoravo atsika amy raha anan̈antsika, kanefa tsy tokony hihodikodin̈y amy famorian̈a fanan̈ana fo fiain̈anantsika. Ten̈a marin̈y raha zen̈y izikoa dinihin̈y raha niain̈andro Kristianin̈y ta Jodia, tamy taonjato voanalohany tan̈y. (Vakia Lioka 21:20-24.) Jesosy efa nampitandrin̈y iro fa ho avy fotoan̈a, ‘hisy maramila hitoby man̈odidin̈y’ Jerosalema. Izikoa fa niboaka raha zen̈y, iro nila ‘nilefa tamy bongo.’ Tsy maintsy nilefa iro izikoa tiho avotro, kanefa nisy raha tsy maintsy nafoendro. Taon̈o maro lôso zay, nisy Tilikambo Fiambesan̈a nivolan̈a karaha ty: “Tsy maintsy nialandro tsabondro ndreky tran̈ondro; iro tsy nafaka nangala entan̈a tantran̈ondro foeky. Natoky iro fa hiaro iro fo Jehovah sady han̈ampy iro, ke fanompoan̈a raha nataondro tamy toeran̈a voanalohany, alohany raha hafa jiaby, ndray zahan̈a karaha maventy iro raha aby io.”

8. Ino raha matomboko ianarantsika baka tamy raha nandalo tamy Kristianin̈y ta Jodia?

⁸ Misy leson maventy sady mampandiniky ianarantsika baka tamy raha nandalo tamy Kristianin̈y ta Jodia tamy taonjato voanalohany. Karaha ty koa raha nivolan̈iny Tilikambo Fiambesan̈a tiô in̈y: “Mety hitsapa tsy fivadihan̈antsika aminy amaray an̈y fomba fiheverantsika fanan̈ana. Amy leranizen̈y, ho hita tsarabe ino raha ten̈a maventy amintsika: Fanan̈ana sa fan̈avotan̈a ain̈intsika? Koa fa avy farany donia ty, mety hiatriky problemo farany mare atsika, ke ho maro raha tsy maintsy hafoentsika. Ke sakavy efa mila von̈ono hahafoe raha sandra atsika, karaha nataondro Kristianin̈y tsy maintsy nilefa, niala ta Jodia in̈y.” *

9. Mandrisiky atsika han̈ino ma torohevitry namezany apostoly Paoly iro Hebreo aby io?

⁹ Misaora sarotro tamindro Kristianin̈y aby io niala raha jiaby nanan̈andro zen̈y ndreky nanomboko fiain̈ana vaovao! Iro nila natoky fa Jehovah han̈ampy iro hahazo raha ten̈a ilaindro. Ndray zen̈y, nisy raha hafa koa nila nataondro. Dimy taon̈o talohany maramila romanin̈y nikodidin̈y Jerosalema, apostoly Paoly efa nan̈amia torohevitry iro Kristianin̈y hebreo aby io karaha ty: “Irarian̈a fomba fiain̈ananaro tsy ho hisy fitiavambola; mahaiza afapô amy raha anan̈anaro, fotony izy efa nivolan̈a: ‘Zaho tsy hiala anao foeky. Tsisy andra han̈ariako anao!’ Zen̈y mahavy atsika misy korazy ke mivolan̈a karaha ty: ‘Jehovah han̈ampy zaho, ke tsy havozo foeky zaho. Ino ma raha mety ho vitanolo hatao aminaka?’ ” (Hebreo 13:5, 6) Hay be fa tsy sahiran̈a foeky lan̈iany nan̈araka torohevitry tsara io ke nan̈ano raha hampatsotra fiainan̈andro, sady niain̈y nifan̈araka tamy raha nisy tamy zen̈y. Natoky iro fa Jehovah han̈amia raha ten̈a ilaindro. Man̈amia toky atsika koa raha nivolan̈iny Paoly io fa hamezany Jehovah raha ilaintsika amy fiainan̈a fo atsika.

10. Ino leson nampianariny Paoly atsika?

¹⁰ Nisy torohevitry namiany Paoly i Timoty, ary mbala mandeha amintsika torohevitry io.  Nivolan̈a izy fa ‘atsika koa fa misy hanin̈y ndreky lamba sikinin̈y, efa tokony hataontsika mahampy atsika edy raha zen̈y.’ (1 Tim. 6:8) Zen̈y tsy mivolan̈a fa tsy mety foeky mankafỳ hanin̈y masiro, na mipetraka amy tran̈o tsara, na mivanga lamba vao ndraikindraiky. Ny raha tiany Paoly volan̈iny, na be na hely raha anan̈antsika, atsika mila mahay afapô amizio. (Fil. 4:12) Zen̈y iziô raha tsy maintsy nianarany Paoly. Tokony ho fihavanan̈antsika amy Jehovah fo ny raha ten̈a valera amintsika, mandilatra fanan̈anantsika!​—Hab. 3:17, 18.

11. Nan̈ino ma raha nivolan̈iny Mosesy tamindro Israelita aby io mampianatra atsika ho afapô amy raha anan̈antsika?

¹¹ Misy lera atsika mety hieritreritry fa ten̈a ilaintsika raha araiky, kanefa Jehovah ndraiky mahita fa tsy zen̈y raha ten̈a ilaintsika fa raha hafa. Diniha baka raha nivolan̈iny Mosesy tamindro Israelita aby io, izikoa fa tapitra 40 taon̈o nampirihariha iro tamy tany paiky tan̈y. Ho izy: ‘Jehovah Zan̈aharinaro nitahy anaro tamy raha jiaby nataonaro. Hainy tsarabe raha nandalaovanaro taminy anaro namakivaky tany paiky be ty. Tan̈atiny 40 taon̈o, Jehovah Zan̈aharinaro niaraka taminaro fo, ke tsisy raha nampijaly anaro.’ (Deot. 2:7) Tan̈atiny 40 taon̈o iro Israelita aby io namezany Jehovah hanin̈y fo; tsy ino zen̈y fa mana. Lambandro tsy robaka foeky. Mbala lamba nisikinindro niala ta Ezipty in̈y fo lambandro tan̈atiny fotoan̈a jiaby zen̈y. (Deot. 8:3, 4) Aminolo sasany, karaha nijaly fahitandro iro Israelita aby io. Kanefa, nampatsiaro iro Israelita aby io i Mosesy fa nazondro fo zay raha ten̈a nilaindro. Ho ravoravo koa Jehovah izikoa atsika mahay afapô amy  raha anan̈antsika. Atsika tiany hahay hankasitraka zay raha amezany atsika, ndray raha farany tsotra, ke hihevitry iro io karaha kadô baka amy Jehovah.

12. Akory nan̈aboahany Davida fa izy natoky Jehovah?

¹² Hainy Davida fa Jehovah io tsy mivadiky sady ten̈a mikarakara lan̈iany olo tia Izy. Efa tseky naty Davida taminizy nanoratra Salamo faha-​34 in̈y. Kanefa natanjaka mare finoan̈anany, ke natoky izy fa nisy “anjeliny Jehovah” nitoby “man̈odidin̈y” izy. (Sal. 34:7) Mety nampiran̈iny Davida tamy maramila mitoby amy plasy araiky donko anjeliny Jehovah. Tihivolan̈a izy fa von̈ono fo iro io hiady, izikoa misy fahavalo manafiky. Maramila mahay miady sady tsy navozovozo i Davida. Jehovah lastio efa nampan̈anten̈a fa izy hanjary panjaka. Fa ndray tiô raha aby zen̈y, Davida tsy nitôron̈o fahaizany mandefa pilotro na fahaizany mampiasa sabatra koa fa niady tamy fahavalo. (1 Sam. 16:13; 24:12) Natoky Zan̈ahary fo izy, ke azony antoko fa anjeliny Jehovah ‘hamonjy lan̈iany olo mavozo Izy.’ Marin̈y ndraiky fa, tsy man̈anten̈a fiarovan̈a mahagaga atsika avahizo. Kanefa, matoky atsika fa hahazo fiainan̈a mandrakizay aby lan̈iany olo matoky Jehovah, ndray san̈atria iro maty.

13. a) Lera Goga baka Magoga hanafiky, nan̈ino ma atsika zahan̈a karaha mora tafihin̈y? b) Nan̈ino atsika tsy tokony havozo? (Zahava sary amy fon̈ony gazety ty.)

¹³ Hiatriky fitsapan̈a atsika tsy ho ela, ke ho hita tsarabe amy zen̈y izikoa atsika matoky ankitin̈y fa Jehovah mahavita miaro atsika. Handeha hanafiky vahoakany Jehovah i Goga baka Magoga, tsy azovy zen̈y fa firenena maromaro miaraka. Mety havozo mare atsika tsao iro hamono atsika. Amy fotoan̈a zen̈y, mila matoky angovo jiaby atsika fa Jehovah tsy raha mahavita man̈avotro atsika fo fa, ten̈a han̈ano raha izy baka atsika tsy hofoaty. Mety hieritreritry iro firenena aby io fa mora tafihin̈y karaha ondrikondriky tsisy piaro in̈y atsika. (Ezek. 38:10-12) Fotony atsika salakady tsisy fitaovan̈a findesin̈y miady, baka io tsiary nampianarin̈y niady koa. Ke mihevitry iro firenena aby io fa, tsisy dikany amindro foeky handresy atsika. Ho hitantsika baka amy masony finoan̈a fa efa von̈ono hiaro atsika iro anjeliny Jehovah aby io. Tsy haindro firenena aby io foeky raha zen̈y, fotony iro tsy mino Zan̈ahary. Ho gaga mare iro lera tafikiny Jehovah andan̈itry an̈y han̈avotro atsika!​—Apok. 19:11, 14, 15.

14. Ino aby raha mety hataontsika rango iziô, beky atsika ho von̈ono hiatriky ny hoavy?

¹⁴ Akory hahavy atsika ho von̈ono hiatriky ny hoavy? Voanalohany, atsika tsy tokony han̈ôrin̈y fô amy vola ndreky fanan̈ana. Fotony tsy iniany tsy amaray, tsy maintsy mbala hialantsika fo iro io. Faharoe, na hely na be raha anan̈antsika, atsika mila mahay afapô; avio tokony ho ravoravo atsika fotony tsara fihavanan̈a amy Jehovah. Arakarakany ahaizantsika Jehovah Zan̈aharintsika io, hahavy atsika hahaihatoky fo fa vitany hiaro atsika, lera Goga baka Magoga manafiky atsika.

15. Nan̈ino ma Davida natoky fa Jehovah tsy handiso fan̈antinan̈a izy foeky?

¹⁵ Alô atsika handiniky raha hafa nan̈ampy Davida, fotony han̈ampy atsika ho von̈ono hiatriky fitsapan̈a koa raha zen̈y. Ho Davida: “Andramàna baka io zahava fa Jehovah io tsara; sambatra lan̈iany olo mitady fialaofan̈a aminany.” (Sal. 34:8) Hitantsika baka tamy raha nivolan̈iny io antony nahavy izy natoky fa Jehovah han̈ampy izy. Matetiky Davida nitavandra Jehovah, ary Zan̈aharinany io tsiary nandiso fan̈antinan̈a izy foeky. Taminizy mbala tanora, izy niady tamy Goliata, maramila filistiny habo sady fatatra mare. Ho izy tamy Goliata: ‘Niany andra han̈amezany Jehovah anao  ampelatan̈ananaka.’ (1 Sam. 17:46) Tafara, Davida koa fa nanjary panompony Saoly, impirimpiry i Saoly nitady hamono izy fa Davida tafilefa fo, fotony ‘Jehovah niaraka taminany.’ (1 Sam. 18:12) Jehovah tsiary ndraiky tsy nan̈ampy Davida taloha, ke zen̈y nahavy Davida natoky fa tsy maintsy han̈ampy izy fo koa Jehovah amy raha sarotro iaretany.

16. Lera karakory aby ma atsika afaka ‘man̈andran̈a’ fa tsara Jehovah?

¹⁶ Izikoa rango iziô atsika efa mianatra mitavandra Jehovah ndreky mitady taridalan̈anany, hahaiho resy lahatra fo atsika fa mahavita man̈ampy atsika izy, sady han̈ano zen̈y ankitin̈y izy aminy amaray. Atsika mila mino Jehovah ndreky vôn̈ono hatoky izy fo. Nan̈ino ma? Misy lera baka anao mety mila mangataka andra tsy iasan̈a amy patron handeha han̈ataon̈ana fivoriambe, na hangataka amy patron baka amboariny fotoan̈a fiasanao, beky anao afaka man̈aton̈o fivorian̈a jiaby ndreky manan̈a fotoan̈a hanompoan̈a. Fa akory ndraiky izikoa patron io tsy man̈eky, ke anao afaka asa? Matoky ma anao fa tsy han̈ary anao foeky Jehovah, ke mbala han̈amia raha ten̈a ilainaro andavanandra fo izy? (Heb. 13:5) Maro panompo manontolo andra niain̈y raha karaha zen̈y. Tsapandro fa nan̈ampy iro fo Jehovah, intsaka eky tamy fotoan̈a nilandro izy mare. Jehovah tsy mivadiky foeky!

17. Ino andininteny niny taon̈o 2022, baka io nan̈ino izio ten̈a avy amy fotoan̈any?

¹⁷ Jehovah miaraka amintsika, ke ndray ino ndray ino raha mbala hiboaka aminy amaray an̈y, tsisy raha tokony hampavozo atsika foeky! Tsisy andra han̈ariany Zan̈aharintsika io atsika, izikoa Fanjakan̈anany fo raha ataontsika voalohany amy fiainan̈antsika. Ndray izy man̈ano zen̈y, rango iziô atsika efa sakavy mila vôn̈ono hiatriky problemo mbala ho avy, ke hatoky fa Jehovah tsy hiala atsika foeky. Zen̈y nahavy Filankevipitantan̈ana nifidy Salamo 34:10 hatao andininteny niny taon̈o 2022: ‘Hahazo hatsaran̈a fo lan̈iany olo mitady Jehovah.’