1. Karakory ma fianakavian̈any Jakoba?

 TOMBO tan̈atiny fianakavian̈a tsy nivadiky tamy Jehovah i Jakoba, rahalahiny Jesosy. * Tia Jehovah mare i Josefa ndreky Maria, olobendro. Niezaka iro nanompo Izy tamy fô jiaby. Nisy tombontsoa hafa koa nanan̈any Jakoba, fotony zokilahiny niaraka tombo taminany io Mesia Nampan̈antinain̈y. Sambatra Jakoba niain̈y tan̈atiny fianakavian̈a karaha zen̈y!

2. Ino aby raha namparikian̈a Jakoba, izy koa fa nandiniky zokibeny?

² Misaora maro raha namparikian̈a Jakoba, izy koa fa nandiniky zokilahiny io. (Mat. 13:55) Ohatra, mbala vo 12 taon̈o fo Jesosy efa nahay Soratra Masin̈y mare. Ndray iro papianatra aby ta Jerosalema tao mba niafatra nahita fahaizan̈any Jesosy. (Lioka 2:46, 47) Mety niaraka nandrafitry koa iro roe mirahalahy. Izikoa zen̈y edy, mety nahainahay Jesosy fo izy izikoa fa niaraka niasa taminany. Matetiky Nathan Knorr nivolan̈a karaha ty: “Mahaihainao fo olo araiky izikoa anao miaraka miasa aminany.” * Hitany Jakoba tsarabe Jesosy ‘nahaibe ndreky nahainisy jery, baka io nahaitianolo sady nahaitiany Zan̈ahary fo.’ (Lioka 2:52) Ke izikoa nisy olo voanalohany tokony nanjary pan̈aradia Jesosy, efa Jakoba edy ho anten̈a mandiniky. Kanefa tsy zen̈y raha nandalo.

3. Nan̈ano akory Jakoba tamy Jesosy kômansy nan̈ano fanompoan̈anany?

³ Mbala tsendriky nan̈aradia Jesosy i Jakoba, tamy Jesosy nan̈ano fanompoan̈anany tambony tany teto. (Jaona 7:3-5)  Ndray izy aby mety mba an̈isany havany Jesosy nivolan̈a fa Jesosy lefaka in̈y. (Mar. 3:21) Tamy Jesosy nivonen̈a taminy hazofijalian̈a, Maria narikitry izy tiô. Fa Baiboly tsy mivolan̈a fa Jakoba koa mba tiô.​—Jaona 19:25-27.

4. Ino aby ma leson hidinihintsika ato?

⁴ Tafara, Jakoba nanjary nino Jesosy, baka io izy nanjary antipan̈ahy najain̈a tamy fiangonan̈a. Handiniky raha aroe mety ianarantsika baka amy Jakoba atsika ato: 1) Nan̈ino atsika mila manetry ten̈a fo, avio 2) akory hahavy atsika hahay hampianatra.

5. Nan̈ano akory i Jakoba, Jesosy koa fa niboaka taminany?

⁵ Ombian̈a ma Jakoba nanjary pan̈aradia Jesosy? Tafarany Jesosy natsangana tamy maty. ‘Niboaka taminany antsendriky Jesosy, baka io taminy apostoly jiaby.’ (1 Kor. 15:7) Io fotoan̈a ten̈a niavaka tamy fiain̈anany Jakoba. Jesosy nampan̈anten̈a handatsaka fan̈ahy masin̈y tamindro apostolinany aby io. Ke mba tiô i Jakoba taminiro niambin̈y izio hilatsaka tamindro. Iro taminio nivory tamy sambra araiky tamy tran̈o etazy ta Jerosalema. (Asa. 1:13, 14) Nanjary an̈isany filankevipitantan̈ana izy tafara tatỳ. Ravoravo izy nan̈ano fanompoan̈anany. (Asa. 15:6, 13-22; Gal. 2:9) Baka io taloha heliny taon̈o 62, niasàny fan̈ahy masin̈y izy ke nanoratra taratasy handeha amy Kristianin̈y voahosotro. Mahatsara atsika ziska iziô taratasy nisoratiny io, na voahosotro atsika na an̈isany ondrikondriky hafa. (Jak. 1:1) Josèphe, Jiosy pahay tantara nanoratra fa i Ananiasy, zanakany Anasy, nan̈amia beko namonoan̈a i Jakoba. Tsy nivadiky tamy Jehovah foeky Jakoba firaka izy nahavita fanompan̈anany tambony tany teto.

6. Ino raha tsy nampiran̈a Jakoba tamindro pitondra fivavahan̈a tamy fotoan̈a zen̈y?

⁶ Nanetry ten̈a Jakoba. Ino aviantsika mivolan̈a zen̈y? Tsy nitovy foeky fihetsikiny Jakoba ndreky iro pitondra fivavahan̈a jiosy aby io, iro koa fa nahay azovy marin̈y Jesosy. Jakoba koa nahita porofo tsy mety famaran̈a fa Zanaka Zan̈ahary ankitin̈y i Jesosy, izy efa nanetry ten̈a edy ke ninoany raha zen̈y. Fa iro sefony pisoron̈o ta Jerosalema tao ndraiky tsy karaha zen̈y. Haindro tsarabe fa Jesosy namelon̈o Lazarosy. Kanefa, tsy nikendro foeky fa Jesosy iraka Zan̈ahary. Ndray iro tihamono Jesosy ndreky Lazarosy! (Jaona 11:53; 12:9-11) Nataondro koa raha tsy hahaizanolo  fa nivilôminy Zan̈ahary i Jesosy. (Mat. 28:11-15) Nan̈ambony ten̈a loatra iro pitondra fivavahan̈a aby io ke zen̈y nahavy iro tsy nan̈eky Mesia foeky.

7. Nan̈ino atsika tsy tokony han̈ambony ten̈a foeky?

⁷ Leson: Aza man̈ambony ten̈a, avio ambilà Jehovah hampianatra anao. Fan̈ambonianten̈a io mety ampiran̈iny aminy aretin̈y mahavy lalandio enjan̈a, ke manjary tsy miasa tsara fô. Karaha zen̈y koa, ho sarotro aminolo man̈ambony ten̈a han̈araka taridalan̈any Jehovah. Nan̈ambony ten̈a iro Fariseo aby io, ke tsy ninoandro foeky fa Jesosy Zanaka Zan̈ahary avio niasa taminany fan̈ahy masin̈iny Zan̈ahary. (Jaona 12:37-40) Ten̈a ratsy toetsain̈indro zen̈y, fotony izio nisakana iro tsy hahazo fiainan̈a mandrakizay. (Mat. 23:13, 33) Akory fo atsika? Mila ambelantsika han̈ova toetrintsika, toetsain̈intsika avio fanapahankevitrintsika Volan̈a Zan̈ahary ndreky fan̈ahy masin̈inany. (Jak. 3:17) Nanetry ten̈a Jakoba, ke zen̈y nahavy izy nan̈eky nampianariny Jehovah. Ary ho hitantsika fa baka taminizy nanetry ten̈a fo koa nahavy izy nanjary papianatra mahay.

8. Ino raha han̈ampy atsika hanjary papianatra mahay?

⁸ Jakoba tsy olo nahita fianaran̈a. Azo antoko fa miran̈a raha navoa apostoly Petera ndreky Jaona koa raha navoa izy. Iro pitondra fivavahan̈a tamy zen̈y baka nivolan̈a fa iro io ‘olo tsy nahita fianaran̈a.’ (Asa. 4:13) Kanefa hita fa Jakoba ten̈a nahay nampianatra, izikoa zahavan̈a boky nisoratiny amy Baiboly ao. Mety tsy dia nahita fianaran̈a karaha Jakoba koa atsika. Ndray izy man̈ano zen̈y, ho vitantsika fo hanjary papianatra mahay, fotony Jehovah man̈ampy atsika. Amezany atsika fan̈ahinany, avio mampiasa fandaminan̈anany koa izy mampiofan̈a atsika. Atsika iziô handiniky fomba fampianarany Jakoba, avio fomba mety hangalantsika tahaka modelinany.

9. Akory nataony Jakoba koa fa nampianatra?

⁹ Jakoba tsy nampiasa volan̈a sarotro azo koa fa man̈azava raha. Ke nora taminolo nitandren̈y izy nahay raha tokony nataondro ndreky fomba han̈anaovan̈a raha zen̈y. Nan̈ino ma atsika mivolan̈a fa tsotra fomba fampianaran̈any Jakoba? Nisy fotoan̈a izy nampianatra fa  mila vôn̈ono hiaritry raha tsy rariny atsika Kristianin̈y, fa tsy hitana heloko ampô. Ho izy: “Efa ren̈inaro fiaretan̈any Joba, baka io efa hainaro hatsaran̈a namiany Jehovah izy. Jehovah ten̈a be fitiavan̈a sady mamindra fô.” (Jak. 5:11) Aleva onon̈o fa nampiasa Soratra Masin̈y i Jakoba koa fa nampianatra. Ke nanjary hainolo nitandren̈y izy fa hahazo hatsaran̈a baka amy Jehovah lan̈iany olo tsy mivadiky, karaha nataony Joba in̈y. Hitantsika baka amy zen̈y fa tsotra sady milamin̈y tsara fan̈azavan̈anany. Izy tsy nampifantoko jerinolo taminany fa tamy Jehovah.

10. Atsika koa fa mampianatra Baiboly, ino fomba araiky hangalantsika tahaka Jakoba?

¹⁰ Leson: Ataova tsotra ndreky miôrin̈y amy Soratra Masin̈y raha ampianarinao. Izio ma tanjon̈ontsika koa fa mampianatra, handeha han̈aboaka aminolo ampianarintsika raha jiaby haintsika momba Jehovah? Aha, tsy zen̈y. Mila aboakantsika amy pianatrantsika fa Jehovah mahay raha mahatsara iro sady vôn̈ono hikarakara iro. (Rom. 11:33) Ho vitantsika raha zen̈y izikoa ataontsika miôrin̈y amy Soratra Masin̈y fo raha volan̈intsika. Amy fomba akory? Atsika koa fa man̈azava raha amy pianatra Baiboly, atsika tsy tokony hivolan̈a amindro: ‘Izikoa zaho tamy plasinao, ...’ Tokony hampiantsika iro handiniky raha ampianariny Baiboly, beky hazava amindro tsarabe fomba fisain̈anany Jehovah ndreky fihetsehampônany. Ino mahatsara atsika man̈ano zen̈y? Manjary tsy baka aminten̈a han̈anaovandro raha fa baka amy fitiavandro Jehovah.

11. a) Ino aby toetry ratsy niadivany Kristianin̈y sasany taminandrany Jakoba? b) Ino torohevitry namezany Jakoba iro? (Jakoba 5:13-15)

¹¹ Jakoba nandiniky toetry niadivany piaramanompo. Hita tsarabe tamy taratasy nisoratiny Jakoba, fa hainy toetry ratsy mbala niadivanolo finoan̈a araiky taminany. Ke moramora taminany nan̈amia torohevitry iro. Kristianin̈y sasany iziô elaela vo nan̈araka torohevitry. (Jak. 1:22) Sasany mbala nan̈avakavaka, fotony olo pan̈arivo fo ten̈a niraesindro tsara. (Jak. 2:1-3) Sarotro tamy sasany ndraiky nifehy lelandro. (Jak. 3:8-10) Samby amy toetry ratsy nila nialandro iro Kristianin̈y aby tamy zen̈y, fa Jakoba tsy rivan̈a nan̈ampy iro. Izy koa fa nan̈anatra iro, nifen̈y izy ho tsara fan̈ahy kanefa mentitry. Nampirisihiny hangataka fan̈ampian̈a taminy antipan̈ahy koa lan̈iany Kristianin̈y malemy arapan̈ahy.​—Vakia Jakoba 5:13-15.

12. Nan̈ino atsika mila mizaha lafy tsarandraha fo koa fa man̈ampy pianatra Baiboly?

¹² Leson: Diniha ino raha iadivany pianatranao, baka io mifantoha amy raha tsara vitany. Mety tsy mora aminolo ampianarintsika Baiboly han̈araka raha ianarandro. (Jak. 4:1-4) Mety ho elaela iro vo tafiala amy toetry ratsy ke hanolo zen̈y amy toetry tiany Jehovah. Karaha nataony Jakoba, mila misy korazy atsika hivolan̈a amindro raha mbala mila hankatsaraindro. Mila mizaha lafy tsarandraha fo koa atsika. Mila matoky atsika fa Jehovah mitaon̈o olo manetry ten̈a han̈aton̈o izy. Amezany angovo koa iro baka ho vitandro hankatsara fomba fiain̈anandro.​—Jak. 4:10.

13. Karakory fiheverany Jakoba ain̈inany? (Jakoba 3:2)

¹³ Jakoba tsy nihevitry izy ho raha mandilatra olo hafa. Rahalahiny Jesosy izy. Kanefa ndray tiô raha zen̈y ndreky andraikitry maventy nanan̈any tan̈ivony fiangonan̈a, Jakoba tsy nieritreritry izy an̈abo mandilatra Kristianin̈y hafa. Hainao karakory fikahiany iro? ‘Rahalahiko’, ho izy. (Jak. 1:16, 19; 2:5) Izy tsy nan̈ano raha mety hahavy olo hieritreritry fa izy lavorary. Ndray izy aby nivolan̈a: ‘Atsika jiaby io samby man̈ano hadisovan̈a aby, ary matetiky koa.’​—Vakia Jakoba 3:2.

14. Nan̈ino ma atsika tokony hitsotra aminolo ampianarintsika fa ndray atsika koa mba mahay diso?

 ¹⁴ Leson: Aza adin̈a fa panota aby atsika jiaby. Atsika tsy tokony hieritreritry fa atsika an̈abon̈abo tozay olo ampianarintsika. Ny raha misy, mavozo iro pianatrantsika aby io tsao tsy ho vitandro han̈ano raha mamparavoravo Zan̈ahary. Volàn̈a aminany fa ndray anao koa mba mety ho diso. Ambarà izy fa tsy mora aminao ndraikindraiky man̈araka toro lalan̈a amy Baiboly. Avio koràn̈a aminany koa fomba nan̈ampiany Jehovah anao, amy zen̈y izy hatoky fa ho vitany fo hanompo Jehovah.

15. Fan̈oharan̈a karakory nampiasainy Jakoba? (Jakoba 3:2-6, 10-12)

¹⁵ Jakoba nampiasa fan̈oharan̈a mora azo. Marin̈y fa tiô fan̈ahy masin̈y nan̈ampy izy, fa mety nan̈ampy izy mare koa nianatra fan̈oharan̈a nampiasainy Jesosy. Zen̈y nahavy Jakoba nampiasa fan̈oharan̈a tsotra amy boky nisoratiny ao, ke nazava tsarabe leson tiany hambara.​—Vakia Jakoba 3:2-6, 10-12.

16. Nan̈ino ma atsika tokony hifidy tsara fan̈oharan̈a hampiasaintsika?

¹⁶ Leson: Fidiana tsara fan̈oharan̈a ampiasainao. Izikoa fan̈oharan̈a ampiasainao tsotra, ho moramora aminolo ikoran̈anao hangala sary antsain̈y raha ampianarinao. Ho azony onon̈o koa fahamarin̈ana maventy koran̈iny Baiboly. Jesosy ten̈a nahay nampiasa fan̈oharan̈a, ary Jakoba rahalahiny nangala tahaka modelinany. Alô atsika handiniky fan̈oharan̈a nampiasainy Jakoba, baka io hidinihintsika nan̈ino iro io ten̈a mahômby.

17. Nan̈ino ma atsika mivolan̈a fa mety tsara fan̈oharan̈a amy Jakoba 1:22-25?

¹⁷ Vakia Jakoba 1:22-25. Ten̈a tsara fan̈oharan̈a nampiasainy Jakoba momba fitaratra in̈y, ary maro antony mahavy atsika mivolan̈a zen̈y. Voafaritry tsarabe raha nampianariny. Hita baka amizio koa fa ho maro hatsaran̈a ho azontsika, izikoa atsika mazoto mamaky Volan̈a Zan̈ahary ndreky mampihatra raha vakiantsika ao. Jakoba nifidy fan̈oharan̈a mora hainolo nitandren̈y izy. Ohatra iziô, izy nikoran̈a momba olo araiky mitaratra. Karakory izikoa hitany olo io tsarabe raha tsy paripare aminany, kanefa tsy amboariny? Tsy hadalan̈a zen̈y? Karaha zen̈y koa olo araiky mamaky Volan̈a Zan̈ahary. Tsy misain̈y izy izikoa mahita raha tokony hivoàny amy toetsain̈any na amy toetrinany na amy raha fataony, kanefa tsy ahoany.

18. Ino raha telo mila ataontsika izikoa fa hampiasa fan̈oharan̈a?

 ¹⁸ Misy raha telo mety hataonao izikoa tianao hahay hampiasa fan̈oharan̈a karaha nataony Jakoba: 1) Ataova azo antoko fa mifan̈araka amy raha ampianarinao fan̈oharan̈a ampiasainao. 2) Mampiasà fan̈oharan̈a hainolo ampianarinao. 3) Ataova mazava tsara fomba mety hampiharan̈a izio. Izikoa anao sahiran̈a mitady fan̈oharan̈a mety tsarabe, zahava Fanondroana Bokin’ny Vavolombelon’i Jehovah, baka io zahava titra “Fanoharana.” Hahita fan̈oharan̈a maromaro mety ampiasain̈a anao ao. Aleva onon̈o fa fan̈oharan̈a zen̈y miran̈a mikrô. Mamparesaka feo baka mikrô. Karaha zen̈y koa, fan̈oharan̈a io man̈amafy raha ampianarinao. Ke anao koa fa mampiasa fan̈oharan̈a, aboaha tsara hevitry maventy tianao hampitain̈a. Miezaka atsika mankatsara fahaizantsika mampianatra, ke fidintsika tsara fan̈oharan̈a ampiasaintsika. Antony maventy mahavy atsika man̈ano zen̈y, han̈ampy olo farany maro hanjary fianakavian̈any Jehovah fa tsy raha han̈antsory olo aminy ain̈intsika.

19. Akory an̈aboahantsika fa ten̈a tiantsika iro rahalahy ndreky ranabavintsika aby io?

¹⁹ Nanan̈a tombontsoa maventy i Jakoba fotony izy niaraka niain̈y tamy zokilahiny lavorary, fa atsika tsy karaha zen̈y. Ndray izy man̈ano zen̈y, nahazo voninahitry atsika fotony atsika miaraka manompo Jehovah amindro rahalahy ndreky ranabavy maro erantany. Efa lafamỳ baka atsika jiaby io! Akory han̈aboahantsika fa ten̈a tiantsika iro? Miezaka atsika miaraka matetiky amindro, mangala tahaka modely tsarandro, avio mitory ndreky mampianatra miaraka amindro sady tsy mivadiky. Han̈amia voninahitry Jehovah atsika, izikoa atsika mifen̈y mangala tahaka toetsain̈iny Jakoba, ndreky fitondranten̈a, avio fomba fampianarany. Tsy zen̈y fo fa, ho maro koa olo manan̈a fô tsara han̈aton̈o Babantsika be fitiavan̈a andan̈itry an̈y.