1-3. Ino aby raha mety hampitomoan̈y atsika?

 OMBIAN̈A ma anao farany latsaka ranomaso? Misy lerany atsika koa fa ravoravo loatra, latsaka ranomasontsika. Kanefa ny ten̈a matetiky, tafitomoan̈y atsika izikoa fa misy raha mamparary fôntsika. Ohatra, lera misy havantsika na kamaradintsika maty. Karaha ty raha nisoratiny Ranabavy Lorilei, mipetraka an Etazonỳ: “Misy fotoan̈a malahelo mare zaho koa fa mahatsiaro nifatesany zanako man̈angy. Tsisy raha hitako mampahery zaho foeky, ke karaha tsy ho vitako foeky hiaritry zen̈y.” *

² Ino koa antony hafa mety hampalatsaka ranomaso? Karaha ty nikoran̈iny Hiromi, pisava lalan̈a a Japon: “Ndraikindraiky zaho malahelo mare fotony olo itoriako aby io tsy tihitandren̈y raha koran̈iny Baiboly. Misy lera, miran̈aran̈a ranomasonaka mivavaka amy Jehovah baka izy han̈ampy zaho hahita olo ten̈a mitady fahamarin̈ana.”

³ Asa anao ndraikindraiky mba karaha zen̈y koa? Ankamaraozantsika karaha zen̈y. (1 Pet. 5:9) Tiany Jehovah ho ravoravo amy fanompoan̈a atsika, kanefa mitomoan̈y fo atsika izikoa fa misy havantsika na kamaradintsika maty. Mety ho latsaka ranomaso koa atsika izikoa fa kivy, na mandalo raha sarotro mitsapa tsy fivadihan̈antsika. (Sal. 6:6; 100:2) Ino raha tokony hataontsika izikoa fa malahelo be karaha zen̈y?

4. Ino raha hianarantsika amy lahatsoratra ty ato?

⁴ Nisy fotoan̈a, nalahelo mare Jesosy ke ‘latsaka ranomasonany.’ (Jaona 11:35; Lioka 19:41; 22:44; Heb. 5:7) Alô hizahavantsika raha nandalo tamy fotoan̈anizen̈y. Avio hidinihintsika  ino raha ianarantsika momba Jesosy ndreky Jehovah baka amy zen̈y. Hizahavantsika koa raha mety ataontsika izikoa atsika tatrany raha mampitomoan̈y.

5. Ino raha ianarantsika baka amy raha nandalo tantarainy Jaona 11:32-36?

⁵ Tamy taon̈o 32, ririn̈iny tamy zen̈y, naty i Lazarosy kamaradiny Jesosy. (Jaona 11:3, 14) Farandraha tiany Jesosy eky izy ndreky iry anabaviny, Maria ndreky Marta. Nangôtsoko mare iro roe vavy io tamy nifatesany anadahindro. Koa fa ren̈iny Jesosy fa naty i Lazarosy, rôso izy nandeha ta Betania, taminiry Maria ndreky Marta tan̈y. Marta koa fa naharen̈y fa Jesosy navy ao, nilomoay nalaky izy nandeha nitsena Jesosy. Diniha hely alahelonany taminizy nivolan̈a tamy Jesosy karaha ty: ‘Tômpo, anao koa tiô, anadahiko tsy naty.’ (Jaona 11:21) Jesosy baka tiô koa fa nahita i Maria ndreky olo hafa nitomoan̈y, ‘latsaka koa ranomasonany.’​—Vakia Jaona 11:32-36.

6. Ino aby antony nampitomoan̈y Jesosy tamy Lazarosy naty?

⁶ Nan̈ino ma Jesosy taminio nitomoan̈y? Karaha ty koran̈iny boky Fandalinana ny Soratra Masina: “Nalahelo mare izy koa fa naharen̈y Lazarosy naty ndreky nahita alahelondro anabaviny Lazarosy aby io, ke ‘latsaka ranomasonany.’ ” * Mety nidinihiny Jesosy donko jaliny kamaradiny tiany be io taminizy narary. Karaha efa hitany aby Lazarosy nijaly niala fahin̈ana. Nampitomoan̈y Jesosy koa nahita i Maria ndreky Marta nangôtsoko mare tamy nifatesany anadahindro. Hay be fa tsisy mihafa amy zen̈y koa raha tsapanao, izikoa anao efa naty havan̈a na naty naman̈a marikitry. Ino raha telo mety ianaranao baka tamy raha nandalo io?

7. a) Nan̈ino Jesosy nitomoan̈y? b) Ino raha ianarantsika momba Jehovah baka amy zen̈y?

⁷ Tsapany Jehovah tsara raha tsapanao. Nitomoan̈y Jesosy tamy Lazarosy naty. Haintsika fa ‘tsisy ny hafa amy toetriny Babany’  toetrinany. (Heb. 1:3) Malahelo karaha zen̈y koa Jehovah izikoa fa misy olo marikitry atsika maty. (Jaona 14:9) Izikoa misy olo marikitry fônao maty, matokisa anao fa hitany Jehovah alahelonao, avio malahelo mare karaha anao koa izy. Tihampahivan̈a fônao Jehovah.​—Sal. 34:18; 147:3.

8. Nan̈ino atsika matoky fa mbala hamelon̈o iro havantsika tsy foentsika aby in̈y i Jesosy?

⁸ Efa tsy din̈iny Jesosy hanangana iro havantsika tsy foentsika aby in̈y. Tafara heliny Jesosy nitomoan̈y, nan̈amia toky i Marta karaha ty izy: “Ho velon̈o anadahinao.” Marta nino Jesosy. (Jaona 11:23-27) Panompony Jehovah tsy nivadiky i Marta, ke hay be fa tsy vaovao taminany tantarany paminan̈y Elia ndreky Elisa nanangana olo maty. (1 Mpanj. 17:17-24; 2 Mpanj. 4:32-37) Mety efa ren̈iny koa donko fa Jesosy efa nanangana olo maty. (Lioka 7:11-15; 8:41, 42, 49-56) Matokisa koa anao fa mbala ho hitanao iry havanao tsy foenao aby in̈y. Hita tamy fomba nankahirezany Jesosy olo naty havan̈a, fa ten̈a tihamelon̈o olo maty izy.

9. Akory hangalantsika tahaka Jesosy lera atsika mampahery olo an̈atiny alahelo? Man̈ameza ohatra.

⁹ Ampia zay olo an̈atiny alahelo. Jesosy tsy vitany niaraka nitomoan̈y tamy Marta ndreky Maria fo fa, nitandrin̈esany tsarabe koa raha nivolan̈indro, baka io nifen̈y izy nampahery iro. Zen̈y koa raha tokony hataontsika izikoa fa mampahery olo malahelo. Karaha ty ho Dan, antipan̈ahy an Australie an̈y: “Tafarany nifatesany vadiko, zaho ten̈a nila fan̈ampian̈a. Nisy piaramanompo fivadiany maromaro nan̈ampy zaho fo isaka zaho nila fan̈ampian̈a, na matsan̈a na alin̈y. Nambelandro zaho han̈aboaka alahelonaka, avio tsy nampan̈ino iro foeky nahita zaho nitomoan̈y. Maro koa raha nan̈ampiandro zaho. Ohatra, nanasa tomôbilinaka, nan̈ano bazarinaka, avio nandoky hanin̈inaka tamy lerany zaho tsisy angovo nan̈anaovan̈a raha aby zen̈y. Matetiky koa iro nivavaka niaraka taminaka. Nataondro tsapako tsarabe fa iro ten̈a naman̈a sady rahalahy von̈ono ‘han̈ampy amy fotoan̈a mampiôry.’ ”​—Ohab. 17:17.

10. Tantarà raha nandalo koran̈iny Lioka 19:36-40.

¹⁰ Nandeha ta Jerosalema i Jesosy tamy 9 Nisana, taon̈o 33. Izy koa fa nahainarikitry tanàna io, nisy vahoaka marobe nivory; maro koa olo namelatra lambandro tamy lalan̈a nandalaovany, fotony tiandro haboaka fa nikendro ho Panjakandro izy. Misaora namparavoravo mare raha nandalo tamy zen̈y. (Vakia Lioka 19:36-40.) Mety tsy nampoiziny pianatrany Jesosy aby io foeky donko raha nandalo tafara helinizen̈y. ‘Jesosy koa fa nahainarikitry Jerosalema, nizahavany tanàna io, baka io izy nitomoan̈y.’ Nitomoan̈y Jesosy nivolan̈a fa ho hisy raha ratsy hahazo olo ta Jerosalema.​—Lioka 19:41-44.

11. Nan̈ino ma Jesosy nitomoan̈y izikoa fa nandiniky raha hahazo olo ta Jerosalema?

¹¹ Nalahelo mare Jesosy, fotony hainy fa ankamaraozany Jiosy tao tsy vôn̈ono hitandren̈y hafatra momba Fanjakan̈any Zan̈ahary. Nivolan̈a izy fa ho ravan̈a Jerosalema avio hanjary andevo lan̈iany Jiosy tsy naty. (Lioka 21:20-24) Nampalahelo fa tsy nino izy marin̈y ankamaraozanolo tao. Akory ndraiky olo amy faritaninaro izikoa fa maharen̈y hafatra momba Fanjakan̈a io? Vitsy fo ma olo mitandren̈y hafatra torianao, kanefa anao efa mifen̈y man̈ampy iro hahay ny marin̈y? Ino raha ianaranao baka amy Jesosy taminizy nitomoan̈y nandiniky raha hahazo olo ta Jerosalema in̈y? Alô atsika handiniky raha telo hafa mety ianarantsika.

12. Ino raha ianarantsika momba Jehovah baka tamy Jesosy nitomoan̈y nandiniky raha hahazo olo ta Jerosalema?

 ¹² Jehovah tia olo sady mijery olo. Ahaizantsika zen̈y tamy Jesosy nitomoan̈y izikoa fa nandiniky raha hahazo olo ta Jerosalema in̈y. ‘Tiany Jehovah hibebaka aby olo jiaby, fotony tsisy olo tiany ho ripaka.’ (2 Pet. 3:9) Ary atsika ke? Akory han̈aboahantsika fa atsika tia olo? Mifen̈y fo atsika mitady fomba han̈ampian̈a olo farany maro hahay vaovao tsara momba Fanjakan̈any Zan̈ahary.​—Mat. 22:39. *

13-14. a) Akory nan̈aboahany Jesosy fa izy tia olo? b) Akory koa han̈aboahantsika fa atsika tia olo?

¹³ Nazoto nanompo mare i Jesosy. Tia olo Jesosy ke nitory vaovao tsara fo izy, isaka izy afaka nan̈ano zen̈y. (Lioka 19:47, 48) Nahinakinaka iro baka izy. Tandraraiky, ‘tsy tafihinan̈a’ foeky izy ndreky pianatranany, fotony naro loatra olo navy hitandren̈y raha nampianariny. (Mar. 3:20) Io ndray alin̈y, izikoa fa zen̈y fotoan̈a nety taminolo nitoriany, izy efa pare edy! (Jaona 3:1, 2) Tsy nanjary pan̈aradia izy aby ankamaraozanolo nitandren̈y izy. Fa sabo fo iro efa naharen̈y, ke afaka nitsangana ho vavolombelon̈o. Mitady hevitry fo koa atsika mitory vaovao tsarany Fanjakan̈any Zan̈ahary aminolo farany maro. (Asa. 10:42) Ke mety mila man̈itsy fomba fitoriantsika atsika izikoa tihahavita zen̈y.

¹⁴ Mila vôn̈ono atsika han̈ovaova fotoan̈a fitoriantsika. Izikoa tsy ivoavoantsika foeky fotoan̈a fitoriantsika, mety tsy hifanôjy olo sasany tihaharen̈y vaovao tsara edy atsika. Karaha ty ho Matilda, pisava lalan̈a araiky zay: “Miezaka zahay fivadiany man̈ovaova lera fandihananay mitory. Koa fa maraindrain̈y, zahay mitory amy tany fivarotan̈a. Lera matsan̈a, zahay man̈ano fampirantian̈a. Koa fa harivariva ndraiky, mandeha mitory isaka tran̈o zahay, fotony antran̈o aby ankamaraozanolo.” Hitantsika baka amy zen̈y fa tsy tokony amy fotoan̈a mety amintsika fo atsika mandeha mitory. Mila amboarintsika programontsika baka atsika hifanôjy olo farany maro. Izikoa zen̈y raha ataontsika, ho ravoravo amintsika mare Jehovah.

15. Koa Lioka 22:39-44 zahavan̈a, ino raha nisy taminy alin̈y talohany namonoan̈a Jesosy?

¹⁵ Nandeha tamy zaridain̈iny Getsemane i Jesosy taminy alin̈iny 14 Nisana, taon̈o 33. Tan̈y izy nivavaka, ke nikoran̈iny tamy Jehovah aby raha jiaby tan̈atiny fônany. (Vakia Lioka 22:39-44.) Tamy fotoan̈a ten̈a sarotro taminany io, Jesosy “nilafidafiky ... avio nitarain̈y mare ndreky nitomoan̈y.” (Heb. 5:7) Nivavaka Jesosy taminy alin̈y talohany namonoan̈a izy, baka hahazo angovo han̈anaovan̈a sitrapôny Jehovah ndreky tsy hivadiky aminany. Nitandrin̈esany Jehovah fiangavian̈a nataony Zanany zen̈y, ke nandefa anjely izy hankahery Jesosy.

16. Ino ma raha nampiasaloha Jesosy, ke nahavy izy nivavaka taminizy tamy zaridain̈iny Getsemane?

¹⁶ Nitomoan̈y koa Jesosy taminizy nivavaka tan̈atiny zaridain̈iny Getsemane in̈y. Nalahelo baka izy fotony maro olo nivolan̈a izy tsy nan̈aja an̈aran̈a Zan̈ahary. Ten̈a raha maventy taminany baka tsy mivadiky amy Jehovah, ndreky mankamarin̈y an̈aran̈any Babany io. Izikoa misy raha sarotro mitsapa tsy fivadihan̈anao amy Jehovah, ino raha ianaranao baka amy zen̈y? Alô zahavantsika leson telo hafa ianarantsika baka amizin̈y.

17. Ino raha ianarantsika momba Jehovah, izikoa dinihin̈y fomba namaliany vavakany Jesosy?

¹⁷ Tandrin̈esany Jehovah fiangavian̈anao. Nivavaka tamy fô jiaby i Jesosy, fotony izy tsy tihivadiky ndreky tihankamarin̈y an̈aran̈any Babany. Nitandrin̈esany Jehovah vavakanany. Izikoa atsika man̈iry tsy hivadiky amy Jehovah ndreky man̈iry han̈amarin̈y an̈aran̈anany, hamaly vavakantsika koa Izy.​—Sal. 145:18, 19.

18. Nan̈ino atsika mivolan̈a fa Jesosy ten̈a naman̈a tsara fan̈ahy sady mahatsapa raha mahazo atsika?

¹⁸ Tsapany Jesosy raha tsapanao. Misy fotoan̈a atsika miasaloha mare. Izikoa amy leranizen̈y misy naman̈a mahatsapa raha tsapantsika, ho ravoravo mare atsika, intsaka eky izikoa namantsika io nandalo raha sarotro miran̈a amy nintsika. Jesosy naman̈a koran̈intsika io. Ndraikindraiky anao mety mahatsapa tsisy angovo ke mila fan̈ampian̈a. Hainy tsarabe raha zen̈y. Tsapany raha mahazo anao, ke ‘amy fotoan̈a mety tsarabe’ izy han̈ampy anao. (Heb. 4:15, 16) Karaha nataony Jesosy tamy zaridain̈iny Getsemane nan̈eky nampiany  anjely in̈y, tokony ho von̈ono koa atsika han̈eky fan̈ampian̈a jiaby amezany Jehovah, na baka amy boky ndreky gazety zen̈y, na amy video, na amy kabaro. Tsy zen̈y fo. Iô koa piaramanompo matotro, na koa antipan̈ahy avy mamangy ndreky mampahery atsika.

19. Izikoa fa misy raha mitsapa tsy fivadihan̈anao, akory mety azahoanao angovo indesin̈y miatriky zen̈y? Man̈ameza ohatra.

¹⁹ Amezany Jehovah ‘fiadanan̈any Zan̈ahary’ anao. Karakory ataony Jehovah man̈amia angovo atsika? Lera atsika mivavaka, atsika hahazo ‘fiadanan̈any Zan̈ahary, izio bebeny eritreritry jiaby.’ (Fil. 4:6, 7) Fiadanan̈a amezany Jehovah atsika io hampilamin̈y fôntsika ndreky eritreritrintsika. Nahita fahamarin̈any zen̈y tsarabe i Ranabavy Luz. Ho izy: “Matetiky zaho mahatsiaro latsatokan̈a. Ke misy lera aby zaho tafieritreritry fa zaho tsy tiany Jehovah. Fa lerany zaho andalaovany eritreritry karaha zen̈y, direkty koran̈iko amy Jehovah raha io. Ren̈iko milamin̈y tsara fônaka ndreky jerinaka zaho koa fa baka mivavaka.” Hitantsika baka amy raha niain̈any ranabavy io fa, hilamin̈y fôntsika ndreky jerintsika izikoa atsika mivavaka.

20. Ino aby leson nazontsika atsika koa fa nianatra antony nahavy Jesosy latsaka ranomaso?

²⁰ Nahazo leson mankahery sady mora arehan̈a atsika, izikoa fa nianatra antony nahavy Jesosy latsaka ranomaso! Raha zen̈y nampatsiaro atsika fa mila man̈ampy piaramanompo an̈atiny alahelo atsika. Mila matoky koa atsika fa Jehovah ndreky Jesosy han̈ampy atsika lera misy havantsika na kamaradintsika maty. Miezaka atsika ho tsara fan̈ahy aminolo lera atsika mitory ndreky mampianatra, fotony ndray Jehovah Zan̈ahary ndreky Jesosy Kristy koa mba mahinakinaka olo sady tsara fan̈ahy. Mankahery atsika mahay fa hainy Jehovah ndreky Zanany io tsarabe raha mampiasaloha atsika ndreky raha hiadivantsika, ke vôn̈ono iro han̈ampy atsika hiaritry. Irarian̈a atsika hampihatra raha nianarantsika fo, firaka Jehovah man̈atanteraka fampan̈antinan̈anany mankahery be ty: “Izy hamafa ranomaso jiaby amy mason[tsika].”​—Apok. 21:4.