LAHATSORATRA FIANARAN̈A 4
Nan̈ino Atsika Man̈aton̈o Fahatsiarovan̈a?
“Ataova fo ty hahatsiarovanaro zaho.”—LIOKA 22:19.
HIRA 20 Nomenao Anay Ilay Zanaka Malalanao
HO HITA ATO *
1-2. a) Lera karakory ma atsika ten̈a mahatsiaro havantsika efa naty? b) Ino raha nan̈irahany Jesosy pan̈aradia izy, alin̈y talohany nifatesany?
NDRAY vo tsy ela nifatesany havantsika na efa ela, tsisy andra an̈adin̈asantsika iro. Izikoa fa mierin̈y daty nifatesandro, atsika mbala malahelo fo.
2 Isaka taon̈o, mandeha antapitrisany atsika erantany mivory mahatsiaro andra nifatesany olo araiky ten̈a marikitry fôntsika, tsy azovy zen̈y fa Jesosy Kristy. (1 Pet. 1:8) Mankalaza andra nifatesany io atsika fotony izy nahatindry ain̈inany han̈avotan̈a atsika amy fahotan̈a ndreky fahafatesan̈a. (Mat. 20:28) Jesosy lastio nan̈iraka pan̈aradia izy hahatsiaro andra nifatesany. Taminy alin̈y talohany nifatesany, izy nanomboko fankalazan̈a miavaka io sady nivolan̈a karaha ty: “Ataova fo ty hahatsiarovanaro zaho.”—Lioka 22:19.
3. Ino raha hidinihintsika amy lahatsoratra ty ato?
3 Aminolo jiaby man̈aton̈o Fahatsiarovan̈a nifatesany Kristy, vitsy fo ny man̈anten̈a handeha andan̈itry. Ankamaraozany man̈anten̈a hiain̈y ambony tany aby. Hidinihintsika ato, antony mahavy antokonolo aroe io mankalaza Fahatsiarovan̈a fo isaka taon̈o. Hikoran̈intsika koa fomba mety hazahoantsika hatsaran̈a baka amizio. Han̈ampaonantsika izy, alô antsendriky dinihintsika antony mahavy iro voahosotro aby io man̈aton̈o Fahatsiarovan̈a.
ANTONY MAHAVY VOAHOSOTRO MAN̈ATON̈O FAHATSIAROVAN̈A
4. Nan̈ino ma iro voahosotro aby io mihinan̈a môfo ndreky migiaka divainy Fahatsiarovan̈a?
4 Isaka taon̈o, iro voahosotro aby io koa fa man̈aton̈o fankalazan̈a io, iro mihinan̈a môfo ndreky migiaka divainy Fahatsiarovan̈a. Nan̈ino? Amaliantsika zen̈y, alô atsika handiniky raha nandalo taminy alin̈y farany niain̈y Jesosy tambony tany teto. Hariva taminio, Jesosy ndreky apostolinany koa fa baka nihinan̈a hanin̈y tamy Pasky, Jesosy nanomboko fankalazan̈a araiky. Sakafo Harivany Tômpo an̈aranizio. Nalainy Jesosy môfo ndreky divain, baka io nirasirasainy taminy apostolinany 11 tsy nivadiky. Iro baka io nirahiny nihinan̈a môfo ndreky nigiaka divain io. Nisy fifan̈ikian̈a na fifan̈arahan̈a aroe nataony Jesosy tamindro baka tiô. Tsy ino zen̈y fa fifan̈ikian̈a vaovao ndreky fifan̈ikian̈a momba Fanjakan̈a. * (Lioka 22:19, 20, 28-30) Baka tamy fifan̈ikian̈a aby io nahavy iro apostoly aby io ndreky olo sasany manjary panjaka ndreky pisôron̈o andan̈itry an̈y. (Apok. 5:10; 14:1) Ke lan̈iany voahosotro mbala ambony tany eto fo mety mihinan̈a môfo ndreky migiaka divainy Fahatsiarovan̈a io, fotony iro an̈isany olo nan̈anaovany Jesosy fifan̈ikian̈a aby io.
5. Ino aby raha haindro voahosotro aby io momba fan̈antinan̈a namezany Jehovah iro?
5 Ty koa misy antony hafa mahavy iro voahosotro aby io man̈aton̈o Fahatsiarovan̈a: Amy fotoan̈a io iro afaka misaintsain̈y tsarabe momba fan̈antinan̈andro. Miavaka mare fan̈antinan̈andro io, fotony iro tsy hofoaty eky sady hahazo vatan̈a tsy mety lo. Tsy zen̈y fo, hiaraka hanjaka amy Jesosy ndreky namandro sasany an̈isany 144 000 koa iro. Fa mbala an̈abon̈abonizen̈y, lera iro avy an̈y, iro hahita Jehovah! (1 Kor. 15:51-53; 1 Jaona 3:2) Efa haindro voahosotro aby io fa hamezany Jehovah tombontsoa aby io iro koa avy andan̈itry an̈y. Fa izy fo, misy raha tsy maintsy ataondro. Iro mila tsy mivadiky firaka iro maty. (2 Tim. 4:7, 8) Ravoravo mare iro voahosotro aby io koa fa mieritreritry fan̈antinan̈andro handeha andan̈itry zen̈y. (Tit. 2:13) Ke akory fo iro “ondrikondriky hafa” aby io? (Jaona 10:16) Nan̈ino iro man̈aton̈o Fahatsiarovan̈a?
ANTONY MAHAVY ONDRIKONDRIKY HAFA MAN̈ATON̈O FAHATSIAROVAN̈A
6. Ino mahavy ondrikondriky hafa man̈aton̈o Fahatsiarovan̈a fo isaka taon̈o?
6 Man̈aton̈o fankalazan̈a io ondrikondriky hafa, fa iro fo tsy mihina môfo ndreky tsy migiaka divainy Fahatsiarovan̈a. Ombian̈a ondrikondriky hafa na iro man̈anten̈a hiain̈y mandrakizay ambony tany nikahian̈a voanalohany han̈aton̈o Fahatsiarovan̈a? Taminy 1938. Karaha ty koran̈iny Tilikambo Fiambesan̈a tamy 1 Marsy 1938: “Rariny avio aradalàn̈a tsarabe izikoa iro [ondrikondriky hafa] aby io man̈aton̈o fivorian̈a io ndreky man̈araka raha atao ao. ... Fotoan̈a mamparavoravo izio, ke tokony hamparavoravo iro koa.” Ravoravo olo koa fa kahian̈a han̈aton̈o mariazy. Marin̈y fa miran̈a pitazan̈a fo iro ondrikondriky hafa aby io koa fa man̈aton̈o Fahatsiarovan̈a, fa iro ten̈a ravoravo man̈aton̈o izio.
7. Ino raha azony ondrikondriky hafa sary antsain̈y iro koa fa mitandren̈y kabarony Fahatsiarovan̈a?
7 Ondrikondriky hafa koa mba misaintsain̈y tsarabe momba fan̈antinan̈andro. Mifantoko mare ondrikondriky hafa izikoa fa mandeha kabarony Fahatsiarovan̈a. Kabaro io baka man̈azava tsara raha handeha hataony Kristy ndreky iro 144 000 aby io aminolombelon̈o tsy mivadiky, an̈atiny Fanjakan̈a Arivo Taon̈o. Iro olo voahosotro hanjary panjaka andan̈itry aby io hiaraka amy Panjakandro Jesosy Kristy, han̈aova tany jiaby ty hanjary paradisa ndreky han̈ampy olo tsy mivadiky hanjary lavorary. Antapitrisany olo man̈aton̈o Fahatsiarovan̈a io, ary efa tsy din̈indro aby fotoan̈a hampatanteraka iro faminanian̈a aminy Isaia 35:5, 6; 65:21-23; ndreky Apokalypsy 21:3, 4. Efa azondro sary antsain̈y aby iro miaraka aminy havandro amy donia vaovao. Iro koa fa man̈ano zen̈y, mahaimitombo fo fatokisandro fan̈antinan̈andro avio iro mahaitapakevitry hanompo Jehovah fo.—Mat. 24:13; Gal. 6:9.
8. Ino koa antony hafa mahavy ondrikondriky hafa man̈aton̈o Fahatsiarovan̈a?
8 Ty koa antony hafa mahavy ondrikondriky hafa man̈aton̈o Fahatsiarovan̈a: Tiandro haboaka fa tiandro mare iro voahosotro aby io ke ampiandro fo iro. Volan̈a Zan̈ahary efa nan̈ambara fa hiaraka hiasa marikitry voahosotro ndreky ondrikondriky hafa. Amy fomba akory? Alô atsika handiniky ohatra vitsivitsy ahitantsika zen̈y.
9. Koa zahavan̈a Zakaria 8:23, akory an̈aboahany ondrikondriky hafa fa tiandro iro voahosotro aby io?
9 Vakia Zakaria 8:23. Faminanian̈a io man̈ampy atsika hahay tsarabe karakory fitiavany ondrikondriky hafa iro rahalahy ndreky ranabavy voahosotro aby io. Araiky fo raha tiany andininy io koran̈iny amy ‘Jiosy araiky’, ‘aminaro’ ndreky ‘anaro’ io, tsy azovy zen̈y fa iro voahosotro aby io. (Rom. 2:28, 29) ‘Olo folo lahy baka amy fivolan̈ana amy tany jiaby’ ndraiky manôndro ondrikondriky hafa. Mivolan̈a koa Baiboly fa ‘tanàndro mare lambany Jiosy’ io. Ino ma dikanizen̈y? Iro ondrikondriky hafa aby io tsy mivadiky sady mifandray marikitry amindro voahosotro aby io, avio miaraka amindro amy fanompoampivavahan̈a madio tantirahindro. Ke aboakandro ondrikondriky hafa aby io tsarabe aminy alin̈y Fahatsiarovan̈a, fa iro tsy mivadiky amy voahosotro. Amy fomba akory? Mba iô koa iro miaraka amindro voahosotro aby io man̈ano fankalazan̈a io.
10. Ino raha nataony Jehovah baka ho tanteraka faminanian̈a amy Ezekiela 37:15-19, 24, 25?
10 Vakia Ezekiela 37:15-19, 24, 25. Han̈atanteraka faminanian̈a io Jehovah ke ataony raha hahavy voahosotro ndreky ondrikondriky hafa hiaraka hiasa marikitry. Faminanian̈a io mikoran̈a momba tapaka kakazo aroe: Tapaka kakazo araiky ‘niny Joda’, avio tapaka kakazo araiky hafa ‘niny Efraima.’ Nampitovisin̈y tamy ‘tapaka kakazony Joda’ iro olo man̈anten̈a handeha andan̈itry aby io, fotony baka tamy fokony Joda nifidianan̈a panjaka taminy Israely. Lan̈iany olo man̈anten̈a hiain̈y ambony tany ndraiky miran̈a ‘tapaka kakazony Efraima.’ * Hatraotrony Jehovah antokonolo aroe io, ke hanjary ‘araiky’ fo. Dikanizen̈y, hiaraka hanompo Jehovah iro io, ke araiky fo Panjakandro, Kristy Jesosy. Zen̈y mahavy iro koa fa man̈aton̈o Fahatsiarovan̈a isaka taon̈o, iro tsy antokonolo aroe samby isany fa “andiany araiky” fo, fotony “araiky fo piambin̈y iro.”—Jaona 10:16.
11. Akory an̈aboahany ondrikondriky hafa fa iro tsy mivadiky amy rahalahiny Kristy? (Matio 25:31-36, 40)
11 Vakia Matio 25:31-36, 40. Olo marin̈y miain̈y amy fotoan̈any farany izy tiany Jesosy koran̈iny aminy “ondrikondriky” io; iro io man̈anten̈a hiain̈y amy Paradisa ambony tany. Ondrikondriky hafa koa mety ikahian̈a iro. Tsy mivadiky amy voahosotro mbala ambony tany eto iro, ke miezaka fo iro man̈ampy iro rahalahiny Kristy aby io han̈ano andraikitry maventy nankin̈iny Jesosy tamindro; tsy ino zen̈y fa asa fitorian̈a ndreky fampianaran̈a Baiboly atao erantany.—Mat. 24:14; 28:19, 20.
12-13. Akory aby mety han̈aboahany ondrikondriky hafa fa von̈ono hitahitahy iro voahosotro aby io iro?
12 Akory han̈aboahany ondrikondriky hafa fa von̈ono iro hitahitahy voahosotro aby io? Isaka taon̈o, herin̈andra vitsivitsy alohany Fahatsiarovan̈a, mifen̈y mare iro mandrasa invitasion aminolo farany maro erantany, ikahian̈a olo han̈aton̈o fankalazan̈a io. (Zahava “ Efa Mioman̈a amy Vanimpotoan̈any Fahatsiarovan̈a ma Anao?”) Karakaraindro tsarabe raha jiaby mifandray amy Fahatsiarovan̈a io ndray tsisy voahosotro amy fiangonan̈a misy iro, amy zen̈y izikoa fa avy lera han̈anaovan̈a fankalazan̈a io, efa pare aby raha jiaby. Ravoravo mare iro man̈ampy iro voahosotro aby io karaha zen̈y. Hainy ondrikondriky hafa baka fa amy Jesosy, miran̈a man̈ano raha aminany fo iro izikoa fa man̈ano raha amindro voahosotro aby io.—Mat. 25:37-40.
13 Ino koa antony sasany mahavy atsika man̈aton̈o Fahatsiarovan̈a, na voahosotro atsika na ondrikondriky hafa?
ANTONY MAHAVY ATSIKA MAN̈ATON̈O FAHATSIAROVAN̈A
14. Ino fomba araiky ten̈a miavaka nan̈aboahany Jehovah ndreky Jesosy fitiavandro atsika?
14 Atsika mankasitraka fitiavany Jehovah ndreky Jesosy atsika. Maro fomba nan̈aboahany Jehovah fitiavany atsika, fa araiky ty ny ten̈a miavaka: Nan̈iraka Zanakanany ten̈a tiany izy hijaly ndreky hofoaty, han̈avaotan̈a atsika. (Jaona 3:16) Tiany Jesosy koa atsika ke foeny ain̈inany han̈avaotan̈a atsika. (Jaona 15:13) Atsika tsy mety havoavaly raha nataony Jehovah ndreky Jesosy tamintsika. Ke tokony ho hita amy fomba fiain̈anantsika isanandra fo fa mankasitraka fitiavan̈a naboakandro tamintsika zen̈y atsika. (Kol. 3:15) Miezaka koa atsika man̈aton̈o Fahatsiarovan̈a, fotony atsika tihangala onon̈o fitiavandro atsika sady han̈aboaka amindro koa fa tiantsika iro.
15. Akory han̈aboahany voahosotro ndreky ondrikondriky hafa fa ten̈a valera amindro vidipan̈avotan̈a?
15 Ankasitrahintsika mare vidipan̈avotan̈a, kadô baka amy Zan̈ahary. (Mat. 20:28) Ten̈a valera amy voahosotro vidipan̈avotan̈a io, fotony baka amizio mahavy iro hanan̈a fan̈antinan̈a tsara sady tsisy ambaka izy. Konteny Jehovah ho olo marin̈y iro sady natsangany ho zanany arapan̈ahy, fotony iro mino sôron̈o nataony Kristy. (Rom. 5:1; 8:15-17, 23) Ondrikondriky hafa koa ten̈a mankasitraka vidipan̈avotan̈a io. Ino aby hatsaran̈a azondro nohony iro mino soropan̈avotany Kristy io? Madio eritreritrindro man̈oloan̈a Zan̈ahary, baka io iro afaka man̈ano fanompoan̈a masin̈y ndreky man̈anten̈a ho tafitsaka velon̈o amy “fahorian̈a be tsisy ambaka izy” ho avy io. (Apok. 7:13-15) Ke man̈aton̈o Fahatsiarovan̈a fatao isaka taon̈o io aby, na voahosotro na ondrikondriky hafa, fotony zen̈y an̈isany fomba araiky han̈aboahandro fa mankasitraka vidipan̈avotan̈a iro.
16. Ino koa antony hafa mahavy atsika man̈aton̈o Fahatsiarovan̈a?
16 Ty koa antony hafa mahavy atsika man̈aton̈o Fahatsiarovan̈a: Atsika tihan̈araka bekony Jesosy. Ndray man̈anten̈a handeha andan̈itry atsika na man̈anten̈a hiain̈y ambony tany eto, samby tihan̈araka bekony Jesosy ty aby atsika tsiaraikiaraiky: ‘Ataova fo ty hahatsiarovanaro zaho.’—1 Kor. 11:23, 24.
HATSARAN̈A AZO KOA FA MAN̈ATON̈O FAHATSIAROVAN̈A
17. Nan̈ino Fahatsiarovan̈a io man̈ampy atsika hahaiharikitry Jehovah fo?
17 Mahaimarikitry Jehovah fo atsika. (Jak. 4:8) Efa nianarantsika fa lera Fahatsiarovan̈a, atsika afaka misaintsain̈y tsara raha momba fan̈antinan̈a namezany Jehovah atsika, ndreky mangala onon̈o fitiavan̈a maventy naboakany tamintsika. (Jer. 29:11; 1 Jaona 4:8-10) Atsika koa mandiniky fan̈antin̈ana azo antoko momba ny amaraintsika io ndreky mandiniky fa tsy miovaova fitiavany Jehovah atsika, hitombo fitiavantsika izy sady hahaiho fatatra fo fifandraisan̈antsika aminany.—Rom. 8:38, 39.
18. Manjary tihan̈ino atsika izikoa fa mimenimeny soron̈o nataony Jesosy?
18 Manjary tihangala tahaka Jesosy atsika. (1 Pet. 2:21) Andra vitsivitsy alohany Fahatsiarovan̈a, ty raha ten̈a hifantohantsika koa fa mamaky Baiboly: Raha nandalo herin̈iandra vitsivitsy talohany nifatesany Jesosy ndreky fomba nifatesany, baka io izy nitsangana tamy maty. Lera Fahatsiarovan̈a amy zay, atsika mitandren̈y kabaro araiky mampatsiaro atsika fitiavany Jesosy atsika. (Efes. 5:2; 1 Jaona 3:16) Ke atsika koa fa mamaky mikasiky fahavon̈aosany Jesosy nan̈ano soron̈o ain̈inany in̈y ndreky mandiniky tsara izin̈y, manjary ‘tihangala tahaka fomba fiainan̈anany fo atsika.’—1 Jaona 2:6.
19. Ino raha mila ataontsika baka atsika tsy hiala amy fitiavan̈any Zan̈ahary?
19 Mahaitsy tihiala amy fitiavan̈any Zan̈ahary fo atsika. (Joda 20, 21) Tsy miala amy fitiavan̈any Jehovah atsika izikoa man̈araka volan̈anany, mankamasin̈y an̈aran̈anany, ndreky man̈ano raha mamparavoravo fônany. (Ohab. 27:11; Mat. 6:9; 1 Jaona 5:3) Man̈aton̈o Fahatsiarovan̈a atsika, fotony izio mahavy atsika ho tapakevitry tsy hivadiky amy Jehovah. Namandraha tihivolan̈a amy Jehovah karaha ty fo atsika isanandra: ‘Zaho tsy hiala anao mandrakizay, fotony haiko anao tia zaho.’
20. Nan̈ino ma atsika mila man̈aton̈o Fahatsiarovan̈a?
20 Na man̈anten̈a hiain̈y mandrakizay andan̈itry atsika na man̈anten̈a hiain̈y ambony tany eto, mila man̈aton̈o Fahatsiarovan̈a fo atsika. Isaka taon̈o, atsika koa fa miaraka mivory aminandra io, atsika mahatsiaro nifatesanolo araiky ten̈a marikitry fôntsika, tsy azovy zen̈y fa Jesosy Kristy. Fa an̈abony raha jiaby zen̈y, aminio atsika mahatsiaro fitiavan̈a maventy naboakany Jehovah tamintsika, taminizy nan̈amia Zanany hatao vidipan̈avotan̈a. Fahatsiarovan̈a amy taon̈o ty hatao amy Joma 15 Avrily 2022 hariva. Tiantsika mare Jehovah ndreky Zanany. Ke izikoa fa avy fankalazan̈a nifatesany Jesosy, tsisy raha tokony hataontsika tamban̈a tsy han̈ataon̈ana Fahatsiarovan̈a.
HIRA 16 Derao i Jehovah fa Lasa Mpanjaka Ilay Zanany
^ Na man̈anten̈a hiain̈y andan̈itry atsika na man̈anten̈a hiain̈y amy Paradisa ambony tany eto, efa tsy din̈intsika mare fotoan̈a haviany Fahatsiarovan̈a, isaka taon̈o. Lahatsoratra ty hikoran̈a antony miôrin̈y amy Soratra Masin̈y mahavy atsika man̈aton̈o Fahatsiarovan̈a. Hikoran̈intsika ato koa hatsaran̈a ho azontsika izikoa atsika man̈aton̈o izio.
^ Anao koa tihahazo sôsoko fan̈azavan̈a momba fifan̈ikian̈a vaovao ndreky fifan̈ikian̈a momba Fanjakan̈a io, zahava lahatsoratra “ ‘Ho Fanjaka-mpisorona’ Ianareo” amy Ny Tilikambo Fiambenana 15 Oktobra 2014, p. 15-17.
^ Anao koa tihahita fan̈ampiny fan̈azavan̈a momba tapaka kakazo aroe koran̈iny Ezekiela toko 37, zahava “Fanontanian’ny Mpamaky” amy Ny Tilikambo Fiambenana Zie 2016, p. 31.
