• “Vadiko karaha raha tsy voly nandiadia zaho in̈y.”

• “Zaho nahatsiaro voabaraka, tsy tiany vadiko avio tsisy dikany.”

• “Tsy sakiko nikoran̈a izio taminolo ke zaho nahatsiaro latsatokana.”

• “Tsapako karaha efa tsy mijery zaho in̈y Jehovah.”

Hitantsika amy volan̈a an̈abo aby io fa viavy araiky mety hijaly mare izikoa vadiny mizaha raha vetaveta. Avio izikoa efa fanjava maromaro na antaon̈ony vadiny nisitrisitriky nan̈ano zen̈y, man̈angy io mety efa tsy ten̈a hatoky vadiny io eky. Nisy viavy araiky nivolan̈a: “Zaho loso diniky: ‘Azovy marin̈y ma lelahy ty? Mbala misy raha hafa koa ma asitriny zaho?’ ”

Lahatsoratra ty natao han̈ampian̈a man̈angy manan̈a vady zatra mizaha raha vetaveta. a Izity hikoran̈a toro lalan̈a Baiboly afaka hankahery man̈angy io ndreky han̈ampy izy hatoky fa Jehovah ten̈a tia izy sady man̈iry han̈ampy izy. Toro lalan̈a aby ato koa han̈ampy izy hilamintsain̈y ndreky hifandray marikitry amy Jehovah. b

Anao ndray tsy afaka mifehy raha jiaby ataony vadinao, misy raha ndraiky afaka ataonao baka hampakirikiry alahelonao ndreky hahavy anao hilamintsain̈y. Ty sasany amy zen̈y.

Aza man̈ameloten̈a. Man̈angy araiky mety hihevitry fa matoa vadiny mizaha raha vetaveta, mety mba misy hadisovan̈a baka aminany fo nahavy zen̈y. Alice c nieritreritry fa izy tsy tsara sora karaha viavy hafa, ke izy loso eritreritry: ‘Nan̈ino ma vadiko mizaha viavy hafa ndraiky fa tsy zaho fo?’ Viavy sasany ndraiky man̈ameloten̈a fotony iro mieritreritry fa raha ataondro koa mbala mahaimanosoko problemo. Karaha ty ho Danielle: “Karaha ratsy jery oe fahitako zaho, fotony tsapako fa karaha noho zaho mora meloko fo mandrobaka vadian̈anay.”

Izikoa anao mahatsapa karaha zen̈y, aleva onon̈o fa Jehovah tsy man̈ano anao ho tompinandraikitry amy raha ataony vadinao. Karaha ty  volan̈iny Jakoba 1:14: “Raha irinolo tsiaraikiaraiky fo mitsapa jerinany, ke zen̈y mamandriky izy.” (Rom. 14:12; Fil. 2:12.) Jehovah tsy man̈amia tsin̈y anao, fa izy ten̈a mankasitraka anao nohony anao tsy mivadiky aminany.​—2 Tan. 16:9.

Mety han̈ampy koa mahay fa ndray lelahy araiky mizaha raha vetaveta, zen̈y tsy midika fa vadiny tsy tsara sora. Manampahaizan̈a mivolan̈a fa olo araiky zatra mizaha raha vetaveta loso manan̈a fan̈irian̈a tsy mety afapo amy firaisan̈a, ke tsisy man̈angy afaka man̈amia fahafahampo fan̈irian̈anany zen̈y.

Aza miasaloha be loatra. Catherine nivolan̈a fa tsy afaka an̈aty jerinany foeky vadiny mizaha raha vetaveta. Frances ndraiky nivolan̈a: “Zaho vaky asaloha koa fa tsy haiko tany himboany vadiko. Tsy milamin̈y foeky jerinaka firaka andra tsofotro.” Misy man̈angy hafa koa mivolan̈a fa iro mahatsiaro men̈atra mare izikoa fa miaraka amy piaramanompo mety mahay problemony vadindro. Sasany koa mivolan̈a fa iro mahatsiaro latsatokana fotony iro mieritreritry fa tsisy olo mahatsapa raha mahazo iro.

Olo jiaby mety hahatsapa ambaka zen̈y aby. Fa izikoa ndraiky jerinao tsy afaka amy zen̈y anao hahaihiasaloha fo. Sitrany mifen̈a mifantoko amy fifandraisanao amy Jehovah. Zen̈y han̈ampy anao hahavita hiaritry.​—Sal. 62:2; Efes. 6:10.

Amy Baiboly ao misy tantarany man̈angy niasaloha mare kanefa nahazo fankahirezan̈a izikoa fa nivavaka tamy Jehovah. Mety han̈ampy anao mamaky ndreky misaintsain̈y iro tantara aby zen̈y. Tsy zay problemo nahazo iro zay nadosony Jehovah fo. Fa izy ndraiky nan̈ampy iro hilamintsain̈y. Ohatra iziô, Hana ‘nalahelo mare’ tamy raha navoa izy. Fa izikoa izy efa baka ‘nivavaka ela man̈oloan̈a Jehovah’, izy nanjary nilamintsain̈y, ndray mbala tsy hainy ino raha hiboaka aminy amaray.​—1 Sam. 1:10, 12, 18; 2 Kor. 1:3, 4.

Mangataha fan̈ampian̈a aminy antipan̈ahy. Iro io miran̈a ‘toeran̈a fisitrihan̈a lera misy tsiko ndreky tany fialofan̈a amy mahalen̈imbaratra.’ (Isaia 32:2) Ndray iro aby mety afaka han̈ambara aminao azovy ranabavy mety ikoran̈anao sekirenao io ke ho afaka hankahery anao.​—Ohab. 17:17.

Mety ho vitanao ma han̈ampy vadinao hiala amy fahazaran̈a mizaha raha vetaveta io? Posibla. Baiboly mivolan̈a fa “tsara aroe tozay araiky” izikoa atsika tihamaha problemo na hiady amy fahavalo  araiky mahery oe. (Mpito. 4:9-12) Hitany manampahaizan̈a fa izikoa olo fivadiany miaraka miasa tsara, matetiky vitany araiky io fo miady amy fizahavan̈a raha vetaveta, ke mimpody matoky izy ndraiky vadiny.

Fa izy fo, vadinao ten̈a mila von̈ono ndreky man̈iry hiala amy fahazaran̈a tia mizaha raha vetaveta. Izy ma mangataka angovo baka amy Jehovah ndreky fan̈ampian̈a baka aminy antipan̈ahy? (2 Kor. 4:7; Jak. 5:14, 15) Izy ma efa man̈ano raha hahavy izy tsy hizaha raha vetaveta? Ohatra, mba asiany erany ma fampiasany fitaovan̈a elektroniky, avio izy ma mba mifen̈y miala amy raha mety hahavy izy ho latsaka an̈atiny fakampan̈ahy? (Ohab. 27:12) Izy ma von̈ono han̈eky fan̈ampian̈anao ndreky tsy han̈asitriky raha aminao foeky? Izikoa zen̈y, anao mety ho afaka han̈ampy izy.

Amy fomba akory? Diniha baka ohatrany Ethan ndreky Felicia. Ethan efa nandivoziny fizahan̈a raha vetaveta edy rango izy mbala tsaiky. Nataony Felicia raha hahavy izy tsy havozo hikoran̈a aminany lera izy man̈iry tihizaha raha vetaveta. Ho Ethan: “Tsy asitrisitriko vadiko raha zen̈y. Tsara fan̈ahy mare izy man̈ampy zaho hiary fakampan̈ahy. Ke matetiky izy man̈ontany zaho akory naniko. Zaho koa ampiany han̈isy erany fampiasan̈a Internet.” Hay be fa malahelo Felicia fotony vadiny manan̈a fahazaran̈a mizaha raha vetaveta. Fa ho Felicia: “Helokonaka ndreky alahelonaka tsy han̈ampy izy hiala amy fahazaran̈a ratsy be io. Zahay koa fa baka nandiniky problemonazy io, izy von̈ono hiaraka hiasa aminaka baka hampakirikiry alahelonaka.”

Koran̈a karaha zen̈y tsy vitany han̈ampy araiky lelahy io hiala amy fizahavan̈a raha vetaveta fo fa han̈ampy vadiny himpody hatoky izy ndraiky koa. Sady lelahy araiky koa von̈ono hikoran̈a amy vadiny momba fahalimian̈anany, aia tany imboany ndreky zay raha ataony, ho moramora amy vadiny matoky izy fotony efa tsisy raha misitrisitriky eky.

Anao ma mino fa vitanao koa han̈ampy vadinao ambaka zen̈y? Koa zen̈y, nan̈ino izikoa anaro roe miaraka mamaky ndreky mandiniky lahatsoratra ty? Tanjon̈onany tôkony hiala amy fizahavan̈a raha vetaveta ndreky han̈ano raha hahavy anao hatoky izy. Izy tsy tôkony ho meloko izikoa anao tihikoran̈a raha tsapanao momba problemo io, fa izy tôkony hifen̈y hahay ino vokanizio aminao. Tanjon̈onao hanohan̈a izy aminy ezakanany ndreky han̈ambela izy han̈ano raha hahavy anao hatoky izy ndraiky. Anaro roe samy mila mianatra ino mahavy olo tihizaha raha vetaveta ndreky karakory ialan̈a amizio. d

 Izikoa anao mavozo tsao koran̈anaro io mety hivadiky malo, anaro mety miangavy antipan̈ahy araiky azonaro tsara, hiaraka aminaro iô amy fotoan̈any anaro mikoran̈a izio. Aza adin̈a fa na efa afaka tamy fahazaran̈a mizaha raha vetaveta vadinao, mety ho elaela anao vo himpody hatoky izy ndraiky. Kanefa aza kivy. Mifen̈a hifantoko amy raha madinidiniky efa nihatsara amy fifandraisanaro. Matokisa fa arakaraka fandehany fotoan̈a ndreky faharetan̈anaro, hahavy vadian̈anaro himpody ho tsara ndraiky.​—Mpito. 7:8; 1 Kor. 13:4.

Akory izikoa vadinao tafimpody mizaha raha vetaveta ndraiky? Zen̈y ma midika fa izy tsy ten̈a nibebaka na efa tsisy andrany eky izy ho tafiala amizio? Tsy voatery. Izikoa efa ela vadinao nandivoziny fahazarandratsy io, mety an̈atiny andra jiaby iain̈any izy mbala mila miady amizio fo. Ke ndray efa taon̈o maro izy efa tsy nizaha izio, izy mety mbala ho tafimpody fo. Ke baka tsy aviany zen̈y, izy mbala mila man̈ano raha mare hiarivan̈a amizio. Avio ndray karaha efa nafaka izio, izy mbala mila man̈ano raha mentitry fo. (Ohab. 28:14; Mat. 5:29; 1 Kor. 10:12) Mbala ilainy fo koa man̈avao ‘angovo mibeko sain̈inany’ ndreky mianatra ‘tsy ho tia raha ratsy.’ An̈isanizen̈y raha vetaveta ndreky fahazaran̈a ratsy hafa, karaha ataony misoma raha maha lelahy na maha man̈angy. (Efes. 4:23; Sal. 97:10; Rom. 12:9) Ten̈a von̈ono han̈ano ezaka aby zen̈y ma izy? Izikoa zen̈y, mety mbala ho vitany fo hiala tanteraka amizio. e

Akory ndraiky izikoa vadinao tsy von̈ono foeky hiala amizio? Hay be fa anao mety ho kivy, ho meloko, avio hahatsiaro voafitaka. Ambilà amy Jehovah raha mampiasaloha anao io. Zen̈y han̈ampy anao hilamintsain̈y. (1 Pet. 5:7) Mifen̈a fo koa hifandray marikitry amy Jehovah ke aza voly mianatra, mivavaka avio misaintsain̈y. Anao koa man̈ano zen̈y, matokisa fa izy hifandray marikitry aminao koa. Isaia 57:15 mivolan̈a fa izy mipetraka miaraka aminolo ‘torotoro fô ndreky manetry ten̈a’, avio von̈ono han̈ampy iro hahita haravoan̈a ndraiky. Mifen̈a fo han̈aboaka toetry kristianin̈y erakany vitanao. Mitadiava fan̈ampian̈a baka aminy antipan̈ahy. Avio manàn̈a fan̈antinan̈a fa mety mbala hiova fo vadinao io, aminy hoavy.​—Rom. 2:4; 2 Pet. 3:9.