1. Izikoa zahan̈a Hebreo 12:1, ino raha mila ataontsika baka atsika hahavita lomoay hazahoan̈a fiain̈ana io firaka amy farany?

 AMPIRAN̈INY Baiboly amy lomoay fiain̈anantsika Kristianin̈y. Lan̈iany olo mahavita man̈ano izio firaka amy farany hahazo fiain̈ana mandrakizay. (2 Tim. 4:7, 8) Atsika mila mifen̈y manohy milomoay, fotony efa ten̈a hely tavela tsy aviantsika amy tsipiky farany. Apostoly Paoly efa nahavita lomoainany, ke nambarany amintsika ino raha han̈ampy atsika handresy amy lomoay io koa. Izy nan̈iraka atsika ‘han̈adoso raha jiaby man̈avesatra atsika ndreky ... hanohy lomoay irahin̈y ataontsika io ke haharitry amy zen̈y.’​—Vakia Hebreo 12:1.

2. Ino ma dikany ‘man̈adoso raha jiaby man̈avesatra’ zen̈y?

² Paoly koa fa nivolan̈a fa atsika tsy maintsy ‘man̈adoso raha jiaby man̈avesatra’, zen̈y ma midika fa Kristianin̈y tsisy entan̈a tôkony hindesin̈y? Ehe, tsy zen̈y raha tiany volan̈iny. Fa misy raha sasany man̈avesatra atsika, kanefa tsy ilain̈y aby. Ke zen̈y raha irahiny adosontsika io. Raha mavesatra karaha zen̈y mety tsy hahavitantsika milomoay tsara ndreky mety hampakajo atsika. Ke baka ho vitantsika hanohy fo, mila zahavantsika ndreky adosontsika malaky raha tsy ilain̈y kanefa mety han̈avesatra atsika. Fa misy raha tôkony hindesintsika koa tsy mila ambelantsika. Izikoa tsy zen̈y, atsika mety tsy ho afaka hanohy lomoay io. (2 Tim. 2:5) Ino aby ma entan̈a tsy maintsy indesintsika io?

3. a) Izikoa zahan̈a Galatianina 6:5, ino tsy maintsy indesintsika? b) Ino raha handeha hidinihintsika ato, avio nan̈ino?

 ³ Vakia Galatianina 6:5. Paoly nikoran̈a raha tsy maintsy indesintsika. Izy nivolan̈a fa “samy hitondra entan̈anany aby olo tsiaraikiaraiky.” Entan̈a tiany Paoly koran̈iny iô adidintsika man̈oloan̈a Zan̈ahary, tsy ino zen̈y fa raha tsy maintsy atsika fo mitondra izy. Amy lahatsoratra ty, atsika handiniky ino ma an̈isany ‘entan̈antsika’ io ndreky akory itondrasantsika izio. Hizahavantsika koa ino aby raha mavesatra indesintsika kanefa tsy ilain̈y aby avio akory an̈adosoantsika iro io. Ho vitantsika firaka amy farany lomoay hazahoan̈a fiain̈ana io, izikoa atsika mitondra entan̈antsika baka io man̈adoso raha tsy ilain̈y kanefa man̈avesatra atsika.

4. Nan̈ino tsy entan̈a mavesatra voady nataontsika taminy atsika nanokanten̈a in̈y? (Zahava koa sary.)

⁴ Voady nataontsika taminy atsika nanokanten̈a. Taminy atsika nanokanten̈a tamy Jehovah, atsika nivoady hanompo izy ndreky han̈ano sitraponany. Mila tanantsika voady  nataontsika zen̈y. Ten̈a andraikitry maventy miain̈y mifan̈araka amy fanokan̈anten̈antsika io, kanefa zen̈y tsy mavesatra. Sady atsika lastio niforon̈iny Jehovah han̈ano sitraponany. (Apok. 4:11) Atsika niforon̈iny han̈iry hahay izy ndreky hanompo izy, baka io nataony mitovy sora aminany. Zen̈y mahavy atsika afaka mifandray marikitry aminany ndreky ravoravo man̈ano sitraponany. (Sal. 40:8) Tsy zen̈y fo fa, “velombelon̈o” atsika izikoa fa man̈ano sitrapony Zan̈ahary ndreky man̈aradia Zanany.​—Mat. 11:28-30.

5. Ino raha han̈ampy anao hahavita hiain̈y mifan̈araka amy fanokan̈anten̈anao? (1 Jaona 5:3)

⁵ Ino raha han̈ampy anao hitondra entan̈a io? Misy raha aroe ty. Voanalohany, mifen̈a fo ampitombo fitiavanao Jehovah. Ho vitanao han̈ano zen̈y izikoa anao misaintsain̈y raha tsara jiaby nataony taminao ndreky hatsaran̈a mbala hamiany anao. Arakaraka itombosany fitiavanao Zan̈ahary, hahaiho mora aminao fo han̈araka volan̈anany. (Vakia 1 Jaona 5:3.) Faharoe, aleva tahaka Jesosy. Izy nahavita nan̈ano sitrapony Zan̈ahary, fotony izy nivavaka nangataka fan̈ampian̈a tamy Jehovah ndreky nifantoko taminy hatsaran̈a ho azony. (Heb. 5:7; 12:2) Karaha Jesosy, mivavaha amy Jehovah baka izy han̈amia angovo anao, avio mifantoha fo amy fan̈antinan̈a fiain̈ana mandrakizay. Arakaraka itiavanao Zan̈ahary ndreky angalanao tahaka Zanany, hahavy anao hahavita han̈atanteraka voady nataonao tamy Jehovah.

6. Nan̈ino atsika mila man̈ano adidintsika amy fianakavian̈a? (Zahava koa sary.)

⁶ Adidintsika amy fianakavian̈a. Atsika mila tia Jehovah ndreky Jesosy mandilatra fitiavantsika havantsika izikoa fa man̈ano lomoay hazahoan̈a fiain̈ana io. (Mat. 10:37) Zen̈y ndraiky tsy mivolan̈a fa atsika afaka miala aminy adidintsika amy fianakavian̈a. Ndray izy aby, hamparavoravo Zan̈ahary ndreky Kristy atsika izikoa man̈ano andraikitrintsika amy fianakavian̈a. (1 Tim. 5:4, 8) Sady ho ravoravo koa atsika, izikoa man̈ano zen̈y. Hainy Jehovah fa ho sambatra fianakavian̈a izikoa mifankatia ndreky mifan̈aja olo fivadiany, raimandreny tia ndreky man̈anatra zanakandro, avio tsaiky man̈araka volan̈any olobendro.​—Efes. 5:33; 6:1, 4.

7. Akory hahavitanao andraikitrinao amy fianakavian̈a?

⁷ Ino raha han̈ampy anao hitondra entan̈a io? An̈atiny tokantran̈o ao, na lelahy anao na man̈angy na tsaiky, mifen̈a fo hatoky torohevitry feno fahendrena amy Baiboly fa aza mitavandra raha iritriretinao fa mety fo, na man̈araka fombantany na hevitriny manampahaizan̈a fo. (Ohab. 24:3, 4) Ampiasà tsara raha volan̈iny boky ndreky gazetintsika aby io. Misy toro lalan̈a Baiboly amindro io ndreky man̈azava fomba mety han̈arehan̈a zen̈y. Ohatra, aminy andiandahatsoratra “Raha Mahatsara Fianakavian̈a” misy fan̈azavan̈a tsara momba raha sarotro atrefinolo fivadiany, raimandreny avio tanora amy zioty. b Mifen̈a fo ho tapakevitry han̈araka raha volan̈iny Baiboly, ndray tsy man̈ano karaha zen̈y olo sasany amy fianakavian̈a. Izikoa anao man̈ano zen̈y, hahazo hatsaran̈a fianakavian̈anao, baka io anao hahazo fitahian̈a baka amy Jehovah.​—1 Pet. 3:1, 2.

8. Mety ino vokany fanapahankevitry ataontsika?

⁸ Vokatrany fanapahankevitrintsika. Atsika nataony Jehovah afaka misafidy malalaka ndreky tiany ho ravoravo amy fanapahankevitry tsara ataontsika. Fa atsika ndraiky  koa man̈ano fanapahankevitry ratsy, ambelany atsika hibaby vokatranizen̈y. (Gal. 6:7, 8) Ke atsika tsy maintsy miaritry vokatrany safidy ratsintsika, na raha tsy mety nivolan̈intsika ndreky nataontsika. Arakaraka raha ataontsika, mety han̈enjiky atsika eritreritrintsika. Fa fahaizantsika fa atsika tsy maintsy mibaby vokatrany fanapahankevitrintsika, mandrisiky atsika hiaiky fahotan̈antsika, ndreky han̈itsy hadisovan̈antsika avio tsy han̈ampody izin̈y eky. Fan̈anaovantsika raha aby zen̈y man̈ampy atsika hanohy lomoay hazahoan̈a fiain̈ana.

9. Ino raha mety ataonao izikoa anao nan̈ano fanapahankevitry ratsy? (Zahava koa sary.)

⁹ Ino raha han̈ampy anao hitondra entan̈a io? Izikoa anao nan̈ano fanapahankevitry ratsy, ino raha mety ataonao? Aleva onon̈o fa anao efa tsy afaka man̈ova raha efa vita. Ke aza mandany lera mankamarinten̈a, na mandany angovo han̈amezan̈a tsin̈y olo tamy fanapahankevitry ratsy nataonao. Fa ikia hadisovan̈anao, avio mifen̈a man̈ano ny tsara erakany vitanao amy zioty. Koa anao man̈ameloten̈a taminy hadisovan̈a vitanao, mifen̈a hanetry ten̈a ke mivavaha amy Jehovah, avio ikia raha tsy mety nataonao, baka io angataha izy han̈ambela hadisovan̈anao. (Sal. 25:11; 51:3, 4) Man̈anaova azafady aminolo nalahelo vokatrany raha nataonao. Avio izikoa ilain̈y, mangataha fan̈ampian̈a aminy antipan̈ahy. (Jak. 5:14, 15) Mangalà fianaran̈a baka aminy hadisovan̈anao, ndreky mifen̈a tsy han̈ampody eky. Izikoa anao man̈ano zen̈y, matokisa fa Jehovah hamindra fô aminao, ndreky han̈amia fan̈ampian̈a ilainao.​—Sal. 103:8-13.

10. Nan̈ino man̈avesatra atsika man̈anten̈a raha tsy ho hisy? (Galatianina 6:4)

¹⁰ Man̈anten̈a raha tsisy. Mampitondra entan̈a mavesatra ain̈intsika atsika izikoa mampiran̈a ain̈intsika aminolo hafa. (Vakia Galatianina 6:4.) Izikoa atsika matetiky mampiran̈a ain̈intsika aminolo, mety hafana fô olo ndreky ho tia mifan̈oesa atsika. (Gal. 5:26) Atsika koa miasa mifan̈oesa aminolo fo, atsika mety hiforse han̈ano raha tsy haintsika na tsy mifan̈araka amy raha iain̈antsika. Volan̈iny Baiboly fa ‘raha antinain̈y koa ela be vo tanteraka, mamparary fô’, intsaka eky izikoa raha tsy ho hisy foeky antinaintsika. Raha zen̈y baka hahaimparary fontsika fo! (Ohab. 13:12) Izikoa zen̈y, atsika ho kajo avio tsy ho vitantsika hanohy lomoay hazahoan̈a fiain̈ana.​—Ohab. 24:10.

11. Ino han̈ampy anao tsy han̈anten̈a raha tsisy?

¹¹ Ino han̈ampy anao han̈adoso entan̈a zen̈y? Aza mitaky raha dila loatra aminy ain̈inao, mandilatra raha takiny Jehovah aminao. Izy tsy mangataka aminao raha tsy ho vitanao. (2 Kor. 8:12) Matokisa fa Jehovah tsy mampiran̈a raha vitanao aminolo. (Mat. 25:20-23) Tiany mare anao izikoa fa manompo izy amy fô jiaby, tsy mivadiky aminany, avio miaritry. Mifen̈a hanetry ten̈a, ke ikia fa taon̈onao ndreky fahasalaman̈anao avio raha iain̈anao mety hahavy anao tsy hahavita raha maro tianao hatao amy zioty. Karaha Barzilay, izikoa baka amy fahasalaman̈anao na taon̈onao tsy hahavitanao fanendrena hampan̈anaovin̈y anao, aza mihafahafa mivolan̈a fa anao tsy afaka han̈eky fanendrena io. (2 Sam. 19:35, 36) Karaha Mosesy, ikia fan̈ampian̈a baka aminolo, avio mahaiza mizara andraikitry izikoa mety. (Eks. 18:21, 22) Izikoa anao manetry ten̈a, anao tsy han̈anten̈a raha be loatra aminy ain̈inao, ke hahavy anao tsy hahavita lomoay hazahoan̈a fiain̈ana.

12. Atsika ma tompinandraikitry amy fanapahankevitry ratsy ataonolo? Hazavà.

¹² Mahatsapa ten̈a ho tompinandraikitry amy fanapahankevitry ratsy nataonolo. Atsika tsy afaka mangala fanapahankevitry amy  plasinolo, na hiaro iro amy vokatrany safidy ratsy ataondro. Ohatra, misy tsaiky araiky mety hanapakevitry ho voly hanompo Jehovah. Hampalahelo mare raimandreniny fanapahankevitrinany zen̈y. Fa ndray zen̈y, iro koa man̈ameloten̈a baka amy fanapahankevitry ratsy nataony zanakandro io, iro mira mibaby entan̈a mavesatra be. Fa Jehovah tsy mitaky iro hibaby entan̈a mavesatra karaha zen̈y.​—Rom. 14:12.

13. Ino raha mety ataony raimandreny izikoa zanakandro nan̈ano fanapahankevitry ratsy?

¹³ Ino han̈ampy anao han̈adoso entan̈a zen̈y? Aleva onon̈o fa atsika jiaby samy nataony Jehovah afaka misafidy. Ke kila olo afaka mifidy raha tiany hatao. Ohatra, hanompo Jehovah sa tsy hanompo izy. Hainy Jehovah koa fa anao raimandreny tsy lavorary, ke zay farany tsara vitanao fo takiny aminao. Zanakanao tompinandraikitry amy safidinany fa tsy anao. (Ohab. 20:11) Fa anao ndraiky mety mbala hiasaloha tsao fo mba misy hadisovan̈anao amizio. Izikoa zen̈y, koràn̈a amy Jehovah raha tsapanao ndreky angataha izy hamela helokonao. Izy mahay fa anao efa tsy afaka mimpody afara ndreky man̈ova raha efa loso. Kanefa, tsy tiany koa anao hiaro zanakanao tsy hijinja raha nafafiny. Aleva onon̈o fa, izikoa zanakanao mifen̈y mimpody amy Jehovah ndraiky, Izy mbala von̈ono koa handray izy.​—Lioka 15:18-20.

14. Nan̈ino mira mitondra entan̈a mavesatra atsika izikoa man̈ameloten̈a dila loatra?

¹⁴ Man̈ameloten̈a dila loatra. Mety han̈ameloten̈a atsika izikoa sendra manota. Kanefa atsika tsy tiany Jehovah han̈ameloten̈a dila loatra. Entan̈a mavesatra mila adosontsika raha zen̈y. Ino ahaizan̈a fa atsika efa man̈ameloten̈a dila loatra? Izikoa atsika efa niaiky fahotan̈antsika ndreky nibebaka avio mifen̈y angovo jiaby tsy han̈ampody zen̈y, afaka matoky atsika fa Jehovah efa nan̈ambela helokontsika. (Asa. 3:19) Efa tsy tiany Jehovah han̈ameloten̈a eky atsika, izikoa efa baka nan̈ano raha jiaby zen̈y. Hainy fa izikoa atsika mbala man̈ameloten̈a fo, handrobaka atsika raha  zen̈y. (Sal. 31:10) Izikoa atsika man̈eky resiny hakivian̈a, atsika mety tsy hanohy lomoay hazahoan̈a fiain̈ana eky.​—2 Kor. 2:7.

15. Ino raha han̈ampy anao izikoa anao man̈ameloten̈a dila loatra? (1 Jaona 3:19, 20) (Zahava koa sary.)

¹⁵ Ino han̈ampy anao han̈adoso entan̈a zen̈y? Izikoa anao man̈ameloten̈a dila loatra, aleva onon̈o fa Jehovah afaka man̈amia “ten̈a familankeloko.” (Sal. 130:4) Izikoa olo araiky ten̈a mibebaka, Jehovah mampan̈anten̈a karaha ty: ‘Tsy ho tsarovako eky fahotan̈anany.’ (Jer. 31:34) Zen̈y midika fa tsy ampiasainy han̈asazian̈a anao eky hadisovan̈a efa nambelany. Ke ndray anao mbala mibaby vokatrany fahotan̈a nataonao, aza mieritreritry fa izy tsy nan̈ambela hadisovan̈anao. Avio izikoa anao nadoso taminy andraikitrinao sasany, aza meloko aminy ain̈inao. Jehovah efa tsy mieritreritry momba fahotan̈anao in̈y eky, ke anao koa mba tôkony han̈ano karaha zen̈y.​—Vakia 1 Jaona 3:19, 20.

16. Ino raha mila haintsika amy lomoay ataontsika io?

¹⁶ Amy lomoay ataontsika io, atsika mila ‘milomoay baka hahazo loka.’ (1 Kor. 9:24) Ho vitantsika raha zen̈y, izikoa atsika mahay man̈avaka ino entan̈a tsy maintsy indesintsika ndreky raha mavesatra mila ambelantsika. Hitantsika tamy lahatsoratra ty sasany amy raha mila indesintsika ndreky mila ambelantsika. Fa mbala misy raha hafa ankoatranizen̈y ndraiky. Jesosy nivolan̈a fa mety han̈avesatra atsika “fihinanan̈a dila loatra ndreky figiantoaka be loatra ndreky raha maro mampiasaloha amy fiain̈ana.” (Lioka 21:34) Andininteny karaha iro io afaka man̈ampy anao hahita raha mbala mila hahitsinao amy lomoay ataonao hazahoan̈a fiain̈ana.

17. Nan̈ino atsika matoky fa ho vitantsika handresy amy lomoay hazahoan̈a fiain̈ana io?

¹⁷ Ho vitantsika handresy amy lomoay hazahoan̈a fiain̈ana io. Afaka matoky zen̈y atsika fotony Jehovah han̈amia angovo ilaintsika. (Isaia 40:29-31) Ke aza mijanon̈o fa tohiza fo lomoay! Aleva tahaka apostoly Paoly, fotony izy nilomoay mare baka hahazo loka natao talohanany. (Fil. 3:13, 14) Marin̈y fa tsisy olo afaka misolo anao amy lomoay ataonao io, kanefa nohony fan̈ampiany Jehovah ho vitanao fo han̈ano izio. Jehovah afaka mitahitahy anao hitondra entan̈anao ndreky han̈adoso raha mavesatra tsy ilain̈y. (Sal. 68:19) Koa Jehovah man̈ampy anao, ho vitanao hiaritry han̈ano lomoay io ke hahazo loka!