1. Ino itiavanao olo manampaharetan̈a?

 ATSIKA jiaby tia olo manampaharetan̈a. Tiantsika miaraka aminolo tsy mora mahinihiny fa mahay miambin̈y. Ravoravo koa atsika lera olo manampaharetan̈a amintsika izikoa atsika tafan̈ano raha tsy mety. Atsika koa ten̈a mankasitraka olo nampianatra Baiboly atsika fotony izy nanan̈a faharetan̈a fo ndray sahisahiran̈a atsika nianatra, nan̈eky, na nan̈araka raha nianarantsika. Fa ny ten̈a maventy, atsika mankasitraka mare Jehovah Zan̈aharintsika fotony izy manampaharetan̈a amintsika fo.​—Rom. 2:4.

2. Lera karakory mety ho hitantsika sarotro hanampaharetan̈a?

² Marin̈y fa tiantsika mahita olo manampaharetan̈a, fa ndray zen̈y, mety ho sarotro amintsika ndraikindraiky hanan̈a toetry io. Ohatra, mety efa kalikaly tsy ho tafipetraka foeky atsika izikoa maro olo milahatra alohantsika, kanefa mbala misy fotoan̈a hafa trapaintsika. Mety ho meloko mare koa atsika lera misy olo man̈ano raha mampahinihiny atsika. Misy fotoan̈a koa, mety hitantsika sarotro miambin̈y donia vaovao ampan̈antinainy Jehovah. Ke tianao ma izikoa anao manampaharetan̈a tsarabe? Hidinihintsika amy lahatsoratra ty karakory ma olo manampaharetan̈a zen̈y avio nan̈ino ten̈a ilain̈y toetry io. Hikoran̈intsika ato koa ino raha han̈ampy atsika hanampaharetan̈a tsarabe.

3. Akory ataonolo manampaharetan̈a lera misy olo man̈ano raha mampameloko izy?

³ Atsika handiniky fomba efatra mety an̈aboahan̈a fa atsika manampaharetan̈a. Voanalohany, olo manampaharetan̈a zen̈y tsy mora meloko. Ndray misy olo man̈ano raha mampahinihiny izy, izy kalma fo sady tsy mamaly faty. Baka io izy tsy masiasiaka olo, ndray misy raha mampiasaloha izy. Voanalohany ahitan̈a volan̈a “tsy mora meloko” io amy Baiboly ao, tamy  Jehovah nivolan̈a fa izy “Zan̈ahary mamindra fô, mahay mahinakinaka, tsy mora meloko, ten̈a be fitiavan̈a ndreky tsy mivadiky, sady ten̈a tia fahamarin̈ana.”​—Eks. 34:6.

4. Akory ataonolo manampaharetan̈a lera izy mila miambin̈y?

⁴ Faharoe, olo manampaharetan̈a zen̈y kalma fo lera miambin̈y raha. Mifen̈y tsy hahinihiny, ohatra, izy izikoa raha araiky mahadin̈y ela tsy arakany niritriretan̈a izy. (Mat. 18:26, 27) Maro raha ilavantsika faharetan̈a. Ohatra, mila mahadin̈y mitandren̈y atsika lera misy olo mivolan̈a, fa tsy manapaka koran̈a. (Joba 36:2) Mety mila manampaharetan̈a koa atsika lera man̈ampy pianatra hahazo tsarabe raha ampianariny Baiboly na hiala amy raha ratsy nahazatra izy.

5. Akory koa han̈aboahantsika fa atsika manampaharetan̈a?

⁵ Fahatelo, olo manampaharetan̈a zen̈y tsy mekimeky han̈ano raha. Marin̈y fa misy fotoan̈a atsika mila man̈ano raha malaky. Fa akory ndraiky lera misy asa maventy mila atao? Olo araiky manampaharetan̈a tsy mekimeky hamita izio, na man̈ano izio zara fa vita fo. Fa izy mangala fotoan̈a ampy tsarabe antsendriky handaminany raha handeha hataony io. Baka io, asa io ankifainy tsarabe an̈atiny fotoan̈a tôkony han̈anaovan̈a izy.

6. Akory ataonolo manampaharetan̈a lera miatriky raha sarotro?

⁶ Fahefatra, olo manampaharetan̈a zen̈y tsy be tarain̈y fa miaritry fo lera miatriky raha sarotro. Faharetan̈a io mifampiankin̈y mare amy fiaretan̈a. Zen̈y ndraiky tsy mivolan̈a fa diso atsika izikoa mitantara raha tsapantsika amy namantsika marikitry, lera misy raha sarotro. Fa ndray zen̈y, olo manampaharetan̈a mifen̈y fo mizaha lafintsarandraha ke mifen̈y miaritry erakany vitany. (Kol. 1:11) Amy maha Kristianin̈y atsika, atsika mila man̈aboaka faharetan̈a io amy lafiny jiaby voakoran̈a tio in̈y. Nan̈ino? Alo zahavantsika antony vitsivitsy.

7. Izikoa zahan̈a Jakoba 5:7, 8, nan̈ino ten̈a ilain̈y manan̈a faharetan̈a? (Zahava koa sary.)

⁷ Mila manampaharetan̈a atsika izikoa tiho avotro. Karaha iro olo aby tsy nivadiky taloha tan̈y, atsika mila mahadin̈y miambin̈y fotoan̈a han̈atantirahany Zan̈ahary fampan̈antinan̈anany. (Heb. 6:11, 12) Baiboly mampiran̈a atsika amy pamboly. (Vakia Jakoba 5:7, 8.) Olo pamboly miasa mare mamboly ndreky mandrozy tsabonany nata tsy ten̈a hainy ombian̈a izio maniry. Izy manampaharetan̈a ke miambin̈y fo sady matoky fa izio tsy maintsy hamokatra fo. Mira zen̈y koa, atsika mifen̈y fo ho be atao amy fanompoan̈a, nata ‘tsy haintsika andra haviany Tompontsika.’ (Mat. 24:42) Atsika mahadin̈y miambin̈y sady matoky fa tsy maintsy hitantirahiny Jehovah amy fotoan̈a mety raha jiaby nampan̈antinainy. Fa izikoa ndraiky atsika tsy manampaharetan̈a, atsika mety ho kajo ke voly hiambin̈y avio hiala tsihelihely amy Jehovah. Atsika koa mety hanomboko hitsakaraka raha mamparavoravo atsika amy zioty fo. Kanefa izikoa atsika manampaharetan̈a, ho vitantsika hiaritry firaka amy farany ke atsika ho avotro.​—Mika 7:7; Mat. 24:13.

8. Nan̈ino ma faharetan̈a io han̈ampy atsika hahay hifandray aminolo? (Kolosianina 3:12, 13)

⁸ Faharetan̈a io han̈ampy atsika hahay hifandray aminolo. Izio han̈ampy atsika hitandren̈y tsara lera misy olo mivolan̈a. (Jak. 1:19) Toetry io koa man̈ampy atsika hihavan̈a aminolo. Izio koa miaro atsika tsy han̈ano raha fahatany na han̈aboaka volan̈a tsy voadiniky lera misy raha mampiasaloha atsika. Baka io, izikoa atsika manampaharetan̈a atsika tsy ho mora meloko lera misy olo man̈ano raha mamparary fontsika. Atsika tsy mamaly faty fa ‘mifandefitry fo, baka io mifan̈ambela hadisovan̈a amy fô jiaby.’​—Vakia Kolosianina 3:12, 13.

9. Nan̈ino faharetan̈a io han̈ampy atsika hahay hanapakevitry? (Ohabolana 21:5)

⁹ Faharetan̈a io koa afaka man̈ampy atsika hahay han̈ano fanapahankevitry tsara. Atsika loso tsy mekimeky manapakevitry fa mangala fotoan̈a tsara antsendriky man̈ano fikarohan̈a ndreky mandiniky safidy anan̈antsika. (Vakia Ohabolana 21:5.) Akory, ohatra, izikoa anao sahiran̈a mitsakaraka asa? Anao mety tihan̈ekin̈eky fo amy zay asa voanalohany hitanao, nata mety hanakantsakan̈a fanompoan̈anao. Fa izikoa ndraiky anao manampaharetan̈a, anao hangala fotoan̈a ampy tsarabe handinihan̈a momba raha aby ty: Aia tany misy asa io, firy lera ho lany amizio, avio ino vokanizio amy fifandraisanao amy fianakavian̈anao ndreky amy Jehovah. Faharetan̈a io hisakan̈a atsika tsy han̈ano fanapahankevitry ratsy.

10. Ino raha han̈ampy Kristianin̈y araiky hifen̈y hanampaharetan̈a fo?

¹⁰ Mivavaha baka hanampaharetan̈a tsarabe. Faharetan̈a io mbala an̈isany araiky amy vokatrany fan̈ahy. (Gal. 5:22, 23) Ke atsika afaka mangataka fan̈ahy masin̈y ndreky fan̈ampian̈a baka amy Jehovah, baka ho vitantsika hanan̈a vokatrany fan̈ahy io. Koa fa sarotro amintsika manampaharetan̈a, atsika mila ‘tsy voly mangataka’ fan̈ahy masin̈y baka han̈ampy atsika han̈ana toetry io. (Lioka 11:9, 13) Atsika koa afaka mangataka amy Jehovah han̈ampy atsika hitovy fomba fihevitry aminany lera misy raha manahiran̈a. Atsika koa fa baka mivavaka, atsika mila mifen̈y fo hanampaharetan̈a isanandra. Izikoa atsika tsy voly mangataka faharetan̈a io amy vavaka sady mifen̈y han̈aboaka  izio, Jehovah han̈ampy atsika hahaihanampaharetan̈a fo ndray tsy karaha zen̈y atsika taloha.

11-12. Akory nan̈aboahany Jehovah fa izy manampaharetan̈a?

¹¹ Saintsain̈a ohatranolo amy Baiboly ao. Misy tantaranolo maro nanampaharetan̈a amy Baiboly ao. Izikoa atsika misaintsain̈y iro io, atsika hahita fomba maro afaka han̈aboahantsika faharetan̈a. Alohany handinihantsika sasany amy tantaranolo aby io, alo atsika handiniky modely araiky ten̈a tsara amy faharetan̈a, tsy azovy fa Jehovah.

¹² Tamy zaridainy Edena tan̈y, Satana nangala baraka an̈arany Jehovah ndreky nan̈ano raha hahavy Eva hieritreritry fa Jehovah io Pitondra tsy man̈ano ny rariny sady ratsy fan̈ahy. Fa Jehovah nanampaharetan̈a salakady nifehy ten̈a fo. Satana tsy direkty nivoneny. Hainy baka fa mila fotoan̈a lavalava han̈aporofoan̈a fa Izy zaraiky fo ten̈a mahay mitondra. Ke tan̈atiny izy niambin̈y zen̈y, Jehovah niaritry raha jiaby nangalan̈a baraka an̈aranany. Tsy zen̈y fo fa, mbala manampaharetan̈a koa Jehovah baka maro olo afaka hiain̈y tsisy farany. (2 Pet. 3:9, 15) Ke ino vokany zen̈y? Antapitrisany olo loso mahay izy. Faharetany Jehovah io mitondra hatsaran̈a maro. Ke izikoa atsika mifantoko aminy hatsaran̈a aby io, ho moramora amintsika hiambin̈y fotoan̈a handeha hamaran̈any Jehovah donia ratsy ty.

13. Akory ahitan̈a fa Jesosy nanampaharetan̈a karaha Babany? (Zahava koa sary.)

¹³ Jesosy ten̈a nangala tahaka faharetan̈any Babany. Naboakany raha zen̈y taminizy tambony tany teto. Tsy nora tamy Jesosy fo nanan̈a faharetan̈a, intsaka eky tamindro panoratra lalàn̈a ndreky Fariseo pihatsaravelatsihy aby io. (Jaona 8:25-27) Fa karaha Babany koa, Jesosy tsy nora neloko. Izy tsy  namaly faty izikoa fa nisy olo nanihitihy na nan̈ano raha nampaneloko izy. (1 Pet. 2:23) Jesosy koa tsy be tarain̈y koa fa niaritry fitsapan̈a. Ke tsy mahagaga atsika izikoa Baiboly mandrisiky atsika ‘handiniky tsarabe araiky niaritry volan̈a feno fankaratsian̈a nataony panota’! (Heb. 12:2, 3) Ho vitantsika koa hiaritry zay fitsapan̈a mavoa atsika fotony Jehovah man̈ampy atsika.

14. Ino raha ianarantsika baka amy faharetan̈any Abrahama? (Hebreo 6:15) (Zahava koa sary.)

¹⁴ Karakory izikoa ela tsy arakany niritriretanao izy faviany farany? Mety efa ela niambesanao izio, ke anao mavozo tsao tsy hahita izio foeky. Ino basy han̈ampy anao hahavita hiambin̈y fo? Diniha ohatrany Abrahama. Mbala tsy niteraka izy taminizy 75 taon̈o, kanefa ho Jehovah taminany: “Hataoko firenena maventy anao.” (Gen. 12:1-4) Hitany Abrahama ma fomba nampatanteraka fampan̈antinan̈a zen̈y? Ia, fa tsy jiaby. Izy tsy maintsy niambin̈y 25 taon̈o antsendriky tafaranizy nitsaka Ten̈aranony Eofrata in̈y, zay vo teraka Isaka zanany. Tsy maintsy niambin̈y 60 taon̈o koa izy, zay vo teraka Esao ndreky Jakoba zafiny. (Vakia Hebreo 6:15.) Fa tsy hitany Abrahama foeky taranakanany nanjary firenena maventy ndreky nandova Tany Nampan̈antinain̈y. Ndray zen̈y, lelahy tsy nivadiky io nifandray marikitry tamy Pamoron̈o izy fo. (Jak. 2:23) Lera Abrahama hatsangana amy maty, ho ravoravo mare izy hahay fa baka tamy finoan̈anany ndreky faharetan̈anany nahavy firenena jiaby ambony tany nahazo fitahian̈a! (Gen. 22:18) Ino raha ianarantsika baka amy zen̈y? Mety tsy direkty hitantsika zioty fahatantirahany fampan̈antinan̈any Jehovah jiaby. Fa izikoa atsika manampaharetan̈a  karaha Abrahama, atsika afaka matoky fa Jehovah hamaly hatsaran̈a atsika rango zioty, avio intsaka eky amy donia vaovao nampan̈antinainy.​—Mar. 10:29, 30.

15. Ino raha mety hataontsika fianaran̈a manokan̈a?

¹⁵ Mbala misy ohatranolo maro manampaharetan̈a amy Baiboly ao. (Jak. 5:10) Nan̈ino izikoa ataonao fianaran̈a manokan̈a tantaranolo aby zen̈y? b Mbala hely, ohatra, Davida efa nitindren̈y ho panjakany Israely, kanefa izy tsy maintsy niambin̈y taon̈o maro tafara zay vo nanjaka. Simeona ndreky Ana koa nanompo Jehovah fo sady niambin̈y faviany Mesia nampan̈antinain̈y. (Lioka 2:25, 36-38) Anao koa fa mianatra tantaranolo aby io, zahava valiny fan̈ontanian̈a aby ty: ‘Ino raha nan̈ampy olo ty hanan̈a faharetan̈a? Ino hatsaran̈a nazony noho izy nanampaharetan̈a? Akory hangalako tahaka izy?’ Mety ho maro koa raha afaka ianaranao baka aminolo tsy nanampaharetan̈a. (1 Sam. 13:8-14) Ke diniha ty: ‘Mety ino nahavy iro tsy nanampaharetan̈a? Ino favoazan̈a nindesinizen̈y tamindro?’

16. Ino hatsaran̈a sasany ho azonolo manampaharetan̈a?

¹⁶ Iritrireta hatsaran̈a azonolo manampaharetan̈a. Izikoa atsika manampaharetan̈a, atsika hahaiho ravoravo ndreky kalma fo. Toetry io koa man̈ampy atsika ho salama fo, na arabatan̈a na aratsain̈y. Hifandray tsara aminolo koa atsika izikoa manampaharetan̈a amindro. Hahaihiray sain̈y fo koa fiangonan̈a. Atsika tsy hahaihampiaho problemo izikoa tsy mora meloko lera misy olo man̈ano raha mampahinihiny atsika. (Sal. 37:8, l.p.a.; Ohab. 14:29) Fa ny ten̈a maventy, izikoa atsika manampaharetan̈a, atsika mangala tahaka Babantsika andan̈itry an̈y sady mahaimarikitry izy fo.

17. Tôkony ho tapakevitry han̈ino atsika?

¹⁷ Faharetan̈a io toetry ten̈a tsara! Sady atsika jiaby mahazo hatsaran̈a amizio. Mety tsy ho mora amintsika fo hanampaharetan̈a. Fa ndray zen̈y, Jehovah afaka man̈ampy atsika ke ho vitantsika fo hanan̈a toetry io. Mandrapiambesantsika faviany donia vaovao, atsika afaka matoky fa “masony Jehovah mitsinjo zay olo mavozo izy, tsy azovy zen̈y fa lan̈iany olo miambin̈y han̈aboahany fitiavan̈a ndreky tsy fivadihan̈a.” (Sal. 33:18) Ke irarian̈a atsika jiaby ho tapakevitry fo hisikin̈y faharetan̈a.