1. Nan̈ino ma paminan̈y Daniela ten̈a nahavarian̈a iro Babylonianin̈y aby io?

 MBALA tsaiky lelahy paminan̈y Daniela taminizy loso babo ta Babylony, toeran̈a lavitry Jerosalema tanànanany. Rikian̈a mare taminany iro manamboninahitry Babylonianin̈y aby io. ‘Raha hitany maso’ fo baka nizahavandro, karaha ataony izy ‘tsisy antsa, tsara sora ndreky tsara vatan̈a’ sady baka amy fianakavian̈a manan̈a plasy an̈abo. (1 Sam. 16:7) Ke zen̈y nahavy iro Babylonianin̈y aby io nampiofan̈a izy hiasa amy lapany panjaka.​—Dan. 1:3, 4, 6.

2. Karakory tsapany Jehovah momba Daniela? (Ezekiela 14:14)

² Jehovah tia Daniela, tsy nohony bikabikanany na plasy nanan̈any tamy lapany panjaka tao fa noho izy nifidy tsy hivadiky amy Jehovah. Kadiriny 20 taon̈o fo Daniela, tamy Jehovah nivolan̈a fa izy olo marin̈y karaha Noa ndreky Joba. Kanefa efa antaon̈ony maro iry Noa ndreky Joba nanompo Jehovah sady tsy nivadiky taminany. (Gen. 5:32; 6:9, 10; Joba 42:16, 17; vakia Ezekiela 14:14.) Tiany Jehovah fo i Daniela taminy andra jiaby niain̈any. Izy ela velon̈o ndreky naro raha niavaka tamy fiain̈ananany.​—Dan. 10:11, 19.

3. Ino aby raha hidinihintsika ato?

³ Amy lahatsoratra ty, atsika handiniky toetry aroe nanan̈any Daniela, ke nahavy izy ten̈a tiany Jehovah. Voanalohany, hizahavantsika tsiaraikiaraiky iro toetry aby io avio lera karakory nan̈aboahany izio. Faharoe, hizahavantsika koa ino nan̈ampy izy hanan̈a toetry aby io. Farany, hikoran̈intsika akory fomba angalantsika tahaka izy. Marin̈y ndraiky fa natao han̈ampian̈a tanora lahatsoratra ty, fa ndray zen̈y, atsika jiaby samby afaka mangala fianaran̈a baka aminy ohatrany Daniela.

4. Akory nan̈aboahany Daniela fa izy nanan̈a korazy? Man̈ameza ohatra.

⁴ Olo araiky ndray misy korazy mety havozo, fa zen̈y fo tsy ambelany hisakana izy tsy han̈ano raha tsara. Ten̈a tsaiky lelahy nisy korazy Daniela. Alo atsika handiniky fotoan̈a aroe nan̈aboahany zen̈y. Araiky voanalohany, kadiriny taon̈o aroe tafarany Babylonianin̈y nandravan̈a Jerosalema. Nan̈inofy sarivongana maventy be baka Nebokadnezara panjakany Babylony, ke nampavozo izy mare nofinany io. Izy nivolan̈a fa hivoneny iro olonkendrinany aby io, an̈isanizen̈y koa Daniela, izikoa tsy mahavita man̈azava raha tamy nofinany io ndreky dikanizio. (Dan. 2:3-5) Nila nan̈ano raha malaky Daniela izikoa tsy zen̈y maro olo hofoaty. Izy ‘nandeha tamy panjaka tan̈y nangataka taminany han̈amia fotoan̈a izy han̈azavany dikany nofy io.’ (Dan. 2:16) Raha zen̈y ten̈a nitaky korazy ndreky finoan̈a. Baiboly baka tsiary nitantara fa Daniela efa navy nahavita nan̈azava dikany nofy, talohanizen̈y. Izy nan̈iraka iro namany aby io, tsy azovy fa Sadraka, Mesaka ndreky Abednego, b ‘hivavaka tamy Zan̈ahariny lan̈itry ke hangataka famindrampo taminany, baka hambarany iro raha sekire io.’ (Dan. 2:18) Nivaliany Jehovah vavakandro. Daniela nampiany Jehovah ke nahavita nan̈ambara dikany nofiny Nebokadnezara. Ke avotro Daniela ndreky iro namany aby io.

5. Ombian̈a koa Daniela nila nanan̈a korazy?

⁵ Mbala nila korazy koa Daniela tafaranizy nan̈azava nofy momba sarivongana in̈y. Nebokadnezara baka nimpody nan̈inofy raha mampavozo mare ndraiky. Izy nahita kakazo maventy sady lava be. Nisy korazy mare Daniela nan̈azava dikany nofy io tamy panjaka. Vitany koa nivolan̈a fa hanjary adala panjaka io avio hadoso aminany fanjakan̈a an̈atiny fotoan̈a vitsivitsy. (Dan. 4:25) Raha zen̈y mety hahavy panjaka io hihevitry izy ho fahavalonany ke mety hahafaty Daniela. Fa Daniela nisy korazy fo nan̈azava dikany nofy io.

6. Ino raha mety nan̈ampy Daniela hanan̈a korazy?

⁶ Mety ino raha nan̈ampy Daniela hisy korazy tamy fiain̈ananany? Hay tsarabe fa Daniela  nangala tahaka ohatra tsarany raimandreniny, taminizy mbala tanora. Azo antoko baka fa raimandreninany nan̈araka toromariky namiany Jehovah iro raimandreny Israelita aby io, ke nampianatra zanakandro Lalàn̈any Zan̈ahary. (Deot. 6:6-9) Tsy vitany nahay Didy Folo fo Daniela, fa hainy koa tsipiriany raha maro momba Lalàn̈a. Ohatra, hainy ino raha mety hahanindro Israelita aby io ndreky raha tsy mety hahanindro. c (Lev. 11:4-8; Dan. 1:8, 11-13) Nianatra tantarany vahoakany Zan̈ahary koa Daniela, ke hainy ino vokany iro koa fa tsy nan̈araka volan̈a Jehovah. (Dan. 9:10, 11) Raha niain̈any Daniela nahavy izy natoky fa na ino na ino raha hiboaka, Jehovah ndreky iro anjelinany mahery aby io han̈ampy izy fo.​—Dan. 2:19-24; 10:12, 18, 19.

7. Ino koa raha hafa nan̈ampy Daniela hanan̈a korazy? (Zahava koa sary.)

⁷ Daniela nianatra raha nisoratiny paminan̈iny Zan̈ahary, an̈isanizen̈y faminanian̈any Jeremia. Zen̈y nahaizany fa efa tsy ho ela tapitry fotoan̈a lava nampasesitany iro Jiosy aby io ta Babylony. (Dan. 9:2) Nahainatoky Jehovah fo Daniela koa fa nahita fahatantirahany faminanian̈any Baiboly. Ke afaka hanan̈a korazy mare koa lan̈iany olo matoky Zan̈ahary ankitin̈y. (Ampiràn̈a amy Romanina 8:31, 32, 37-39.) Fa ny ten̈a maventy, Daniela nivavaka matetiky tamy Babany andan̈itry an̈y. (Dan. 6:10) Daniela nan̈ambara hadisovan̈anany ndreky nikoran̈a raha tan̈aty fonany tamy Jehovah. Nangataka fan̈ampian̈a tamy Jehovah koa izy. (Dan. 9:4, 5, 19) Olombelon̈o karaha atsika fo Daniela, ke tsy niaraka izy teraka efa nisy korazy edy. Fa fianaran̈a, vavaka avio fatokisan̈a Jehovah nan̈ampy izy hanan̈a korazy.

8. Akory hahavy atsika hanan̈a korazy?

⁸ Ino raha mila ataontsika baka hanan̈a korazy? Mety handrisiky atsika hanan̈a korazy raimandrenintsika. Kanefa toetry io tsy karaha lova ke direkty mifindra. Izio mira mianatra raha vaovao fo. Izikoa anao tihahay tsarabe raha araiky, anao mila mizaha tsara raha ataony papianatra ndreky mangala tahaka modelinany. Tsisy ny hafa amy zen̈y koa, hanjary ho hisy korazy atsika izikoa mangala onon̈o tsarabe fomba nan̈aboahanolo toetry io avio mangala tahaka modelindro. Ke ino raha nianarantsika baka tamy Daniela? Karaha nataony, atsika mila mahay Volan̈a Zan̈ahary tsarabe. Mila mifandray marikitry amy Jehovah koa atsika, ke mikoran̈a aminany matetiky ndreky man̈ambara izy raha jiaby an̈aty fontsika. Mila matoky Jehovah koa atsika, ke resy lahatra fa izy manohan̈a atsika fo. Amy zen̈y, ndray misy raha mitsapa finoan̈antsika, atsika hanan̈a korazy fo.

9. Ino hatsaran̈a ho azontsika izikoa atsika misy korazy?

⁹ Hahazo hatsaran̈a maro atsika izikoa misy korazy. Zahava baka tantarany Ben. Nianatra tamy lekoly araiky tan Allemagne izy. Olo jiaby tao nino evolision aby sady nihevitry fa angano fo tantarany famoron̈ana an̈aty Baiboly ao. Tandraraiky, Ben nirahin̈y nan̈azava nan̈oloan̈a piaramianatra taminany nan̈ino izy mino fisiany Pamoron̈o. Tsy navozovozo izy nan̈azava raha inoany. Ino vokany? Hoizy: “Nitandren̈y tsarabe papianatranay, nataony photocopie lahatsoratra nangalako fan̈azavan̈a io, avio pianatra jiaby tao namiany tsiaraikiaraiky.” Nan̈ano akory fihetsikindro pianatra aby io? Ho Ben: “Maro tamindro nitandren̈y raha nivolan̈iko. Iro nivolan̈a fa iro mba tiandro ho mira zaho.” Aboakany tantarany Ben  io fa, matetiky, hajainolo olo misy korazy. Olo karaha zen̈y koa mahavita man̈ampy olo manan̈a fô tsara hahay Jehovah. Ke tsy matiantoko atsika izikoa mifen̈y hanan̈a korazy.

10. Karakory ma tsy mivadiky zen̈y?

¹⁰ Amy Baiboly ao, volan̈a hebreo “tsy mivadiky” na “tia ndreky tsy mivadiky” io midika ten̈a tia ndreky mifandray ampo, avio izio matetiky ivolan̈ana fitiavan̈a aboakany Zan̈ahary amy panomponany. Izio koa ivolan̈ana fitiavan̈a aboakany vahoakany Zan̈ahary amindro samby iro. (2 Sam. 9:6, 7) Arakarakany andihanany fotoan̈a, atsika mety hahaiho tapakevitry tsy hivadiky fo. Alo zahavantsika akory nahavy Daniela nahavita tsy nivadiky.

11. Akory nan̈aboahany Daniela fa izy tsy nivadiky, taminizy efa matoe? (Zahava sary amy fon̈ony gazety ty.)

¹¹ Maro raha nitsapa tsy fivadihan̈any Daniela. Fa araiky ten̈a sarotro, raha natrefiny taminizy efa mandilatrany 90 taon̈o tio. Tamy fotoan̈a zen̈y, Babylony resiny Medianin̈y ndreky Persianin̈y, ke Panjaka Dariosy nitondra tao. Iro manampahifan̈a sasany tao tsy tia Daniela ndreky tsy nan̈aja Zan̈aharinany. Ke iro namoron̈o tetiky hamonoan̈a Daniela. Panjaka nirahindro nan̈ano sin̈atira lalàn̈a handeha hitsapan̈a Daniela, ke izy nila nan̈aboaka na izy tsy hivadiky amy Zan̈aharinany na amy panjaka. Izikoa Daniela tsy tihivadiky tamy panjaka ndreky tsy tiho voasazy, izy nila voly nivavaka tamy Jehovah tan̈atiny 30 andra. Fa Daniela tsy nan̈eky hivadiky tamy Jehovah. Ke izy natsipy tan̈aty lavaka lion. Fa Jehovah namaly hatsaran̈a tsy fivadihany Daniela, ke izy tsy nambelany hoaniny lion. (Dan. 6:12-15, 20-22) Akory hahavitantsika tsy hivadiky amy Jehovah karaha nataony Daniela?

12. Ino nahavy Daniela nahavita tsy nivadiky tamy Jehovah foeky?

¹² Hahavita tsy hivadiky amy Jehovah atsika izikoa tia izy mare. Vitany Daniela tsy nivadiky tamy Jehovah fotony izy ten̈a tia Babany andan̈itry an̈y io. Hay be fa noho izy nanokan̈a fotoan̈a niritriretan̈a toetriny Jehovah ndreky fomba nan̈aboahany iro io nahavy izy loso tia Babany io. (Dan. 9:4) Daniela koa nisaintsain̈y ndreky nankasitraka raha tsara jiaby nataony Jehovah taminany ndreky tamy vahoakanany.​—Dan. 2:20-23; 9:15, 16.

13. a) Ino aby raha atrefiny tanora ke mety hahavy iro hivadiky? Man̈ameza ohatra. (Zahava koa sary.) b) Eraka video io, ino mety volan̈inao izikoa misy olo man̈ontany asa Vavolombelon̈o Jehovah manohan̈a firaisan̈any samy lelahy na samy viavy?

 ¹³ Karaha Daniela, iro tanorantsika aby io voakodidin̈inolo tsy man̈aja Jehovah ndreky fitsipikinany. Olo karaha zen̈y mety tsy tia olo tia Zan̈ahary. Sasany amindro aby mety hampijaly iro tanorantsika aby io baka iro hivadiky amy Jehovah. Zahava baka raha nandalo tamy Graeme, tsaiky lelahy mipetraka an Australie. Ten̈a sarotro raha navoa izy tamy lise. Nisy papianatra nan̈ontany tsaiky jiaby akory ataondro izikoa misy namandro mivolan̈a amindro fa izy tia lelahy na viavy karaha izy fo. Papianatra io nivolan̈a fa lan̈iany man̈eky fa mety raha karaha zen̈y mandeha amy sisiny an̈ila, fa lan̈iany tsy man̈eky ndraiky amy sisiny ambadiky. Graeme nivolan̈a: “Nisy tsaiky araiky zay koa Vavolombelon̈o Jehovah. Ankoatranay roe, tsaiky jiaby kilasy araiky taminay nandeha taminy ilany tarỳ fotony iro nan̈eky fa mety zen̈y.” Fa raha niboaka baka tio nahainitsapa tsy fivadihan̈any Graeme fo. Hoizy: “Tsy tsaiky tsy papianatra, samby nikotran̈a zahay firaka zahay ravan̈a. Zaho nifen̈y fo ho kalma ndreky nandanjalanja koa fa niaro finoan̈anaka, fa iro tsy nitandren̈y raha nivolan̈iko foeky.” Ino vokatra raha zen̈y tamy Graeme? Izy nivolan̈a: “Tsy tiako ndraiky zaho voakotran̈a karaha zen̈y, fa zaho ravoravo mare fotony nahavita tsy nivadiky tamy Jehovah ndreky niaro finoan̈anaka.” d

14. Ino fomba araiky han̈ampy atsika hahavita tsy hivadiky amy Jehovah foeky?

¹⁴ Karaha Daniela, arakaraka itiavantsika Jehovah mare hahavy atsika hahaiho tapakevitry fo tsy hivadiky aminany. Hitombo mare fitiavantsika Jehovah izikoa atsika mianatra toetrinany. Ohatra, atsika afaka mianatra raha namboariny. (Rom. 1:20) Izikoa tianao hahaiho tia ndreky han̈aja Jehovah, vakia iro lahatsoratra fohiky aminy andiandahatsoratra “Izio ma Nisy Namoron̈o?”, na koa zahava video. Anao koa mety mamaky bokikely Nisy Namorona ve Izao Rehetra Izao? ndreky Karakory ma Nampisy Atsika? Fan̈ontanian̈a Dimy Mila Dinihin̈y. Aleva onon̈o raha nivolan̈iny Esther momba iro io. Izy ranabavy tanora baka a Danemark. Hoizy: “Tsara oe fan̈azavan̈a an̈aty ao. Iro bokikely aby io tsy mivolan̈a raha tôkony hinoanao fa zisty mivolan̈a ny raha misy fo, ke man̈ambela anao hanapakevitry.” Ben, araiky nikoran̈intsika taloha tarỳ in̈y koa nivolan̈a: “Mankafatatra finoan̈a mare bokikely aby io. Tamindro io nahitako porofo fa Zan̈ahary ankitin̈y nampisy fiain̈ana.” Lera anao baka mianatra bokikely aby io, anao mety han̈eky raha volan̈iny Baiboly ty: ‘Anao Jehovah Zan̈aharinay, man̈eva hahazo voninahitry, fan̈ajan̈a ndreky angovo, fotony anao niasa raha jiaby.’​—Apok. 4:11. e

15. Ino koa fomba hafa han̈ampy atsika hifandray marikitry amy Jehovah?

¹⁵ Ho tia Jehovah mare koa atsika izikoa mianatra fiain̈anany Jesosy. Zen̈y raha nataony Samira, ranabavy tanora mipetraka an Allemagne. Hoizy: “Loso nahay Jehovah tsarabe zaho izikoa fa nianatra momba Zanany.” Taminizy mbala hely, sarotro tamy Samira nahatsapa fa Jehovah tia izy ndreky iro roe mety ho loso kamarady. Fa hainy ndraiky karakory toetriny Jesosy. Izy nivolan̈a: “Tiako Jesosy fotony izy tia olo ndreky tia tsaiky.” Arakaraka nianarany momba Jesosy, nahavy Samira nanjary nahay tsara Jehovah ndreky tia izy.  Nan̈ino? Hoizy: “Nanjary nazava tsihelihely taminaka fa Jesosy nangala tahaka mare Babany. Ten̈a maro raha itovizandro. Hitako fa antony araiky nahavy Jehovah nandefa Jesosy tambony tany tatỳ baka olombelon̈o ho afaka hahay tsarabe Jehovah.” (Jaona 14:9) Ke izikoa tianao hifandray marikitry amy Jehovah, nan̈ino tsy manokan̈a fotoan̈a ianaran̈a raha maro erakany vitanao momba Jesosy? Izikoa anao man̈ano zen̈y, anao hahaiho tia Jehovah ndreky ho tapakevitry fo tsy hivadiky aminany.

16. Nan̈ino atsika tôkony tsy hivadiky? (Salamo 18:25; Mika 6:8)

¹⁶ Izikoa atsika tsy mivadiky amy kamaradintsika, atsika loso mahaimarikitry iro fo avio iro tsy hivadiky amintsika foeky. (Rota 1:14-17) Tsy zen̈y fo, lan̈iany olo tsy mivadiky amy Jehovah koa loso milamintsain̈y ndreky ravoravo. Nan̈ino? Fotony Jehovah mampan̈anten̈a tsy hivadiky aminolo tsy mivadiky aminany. (Vakia Salamo 18:25; Mika 6:8.) Mba diniha hely baka zen̈y! Izy Pamoron̈o farany mahery, kanefa izy mampan̈anten̈a ho tia atsika fo. Ke atsika koa fa mifandray marikitry aminany, tsisy hahavita hampisaraka atsika aminany, na fitsapan̈a, na panohitry, ndray firaka amy fahafatesan̈a. (Dan. 12:13; Lioka 20:37, 38; Rom. 8:38, 39) Ten̈a mahatsara atsika mangala tahaka Daniela ndreky mifen̈y tsy mivadiky amy Jehovah!

17-18. Ino koa raha mety ianarantsika baka amy Daniela?

¹⁷ Mbala toetriny Daniela aroe fo nidinihintsika tamy lahatsoratra ty. Kanefa mbala misy raha maro mety ianarantsika baka aminany. Daniela, ohatra, nahazo fahitan̈a ndreky nofy maromaro baka tamy Jehovah. Izy koa nataony Jehovah nahavita nan̈ambara dikany faminanian̈a. Maro amy faminanian̈a aby zen̈y efa tanteraka. Misy sasany amindro io man̈azava raha mbala hiboaka ambony tany eto ke hisy vokany mare aminolo tsiaraikiaraiky.

¹⁸ Amy lahatsoratra man̈araka, atsika handiniky faminanian̈a aroe nikoran̈iny Daniela. Izikoa iro io mazava amintsika, zen̈y han̈ampy atsika han̈ano fanapahankevitry tsara amy zioty, na tanora atsika na matoe. Faminanian̈a aby io koa han̈ampy atsika ho von̈ono amy raha hiboaka tsy ho ela, fotony iro io han̈ampy atsika hanan̈a korazy ndreky ho tapakevitry tsy hivadiky amy Jehovah.