1. Tian’i Jehovah han̈ano karakôry ma olo jiaby?

 JEHOVAH koa fa namôron̈o olombelon̈o, irô nataony nahavita misafidy. Isaka anao mangala fanapahan-kevitry, anao mampiasa safidy anan̈anao zen̈y fo. Ke safidy ten̈a maventy ataon’olo, manokan-ten̈a amy Jehovah ndreky manjary an̈isan’ny fianakavian̈an’i Jehovah. Tian’i Jehovah olo jiaby han̈ano karaha zen̈y. Nan̈ino? Fôtony izy tia olombelon̈o ndreky tihan̈ano raha ten̈a mampatsara irô. Tiany irô ho ravoravo mikamarady aminany, ndreky hiain̈y mandrakizay.​—Deot. 30:19, 20; Gal. 6:7, 8.

2. Karakôry fahitan’i Jehovah olo mpanota kanefa tsy mibebaka? (1 Jaona 2:1)

² Fa ndray zen̈y, Jehovah tsy manery atsika hanompo izy. Ambelany olo tsiaraikiaraiky hanapa-kevitry amy raha tiandrô hatao. Akôry izikoa nisy Kristianin̈y araiky vita batisa, kanefa nandika lalàn̈an’ny Zan̈ahary ke nan̈ano fahotan̈a maventy? Izikoa izy tsy mibebaka, izy tsy maintsy hadoso tsy ho an̈isan’ny fiangonan̈a. (1 Kor. 5:13) Fa ndray zen̈y, Jehovah mbala man̈anten̈a mare fa olo nan̈ano raha ratsy io himpody aminany ndraiky. Sady zen̈y baka antony araiky maventy nahavy izy nan̈amia vidim-pan̈avotan̈a. (Vakia 1 Jaona 2:1) Baka amizio mahavy izy mahavita man̈ambela hadisovan̈an’olo mpanota kanefa mibebaka.​—Zak. 1:3; Rom. 2:4; Jak. 4:8.

3. Ino raha hidinihintsika amy lahatsoratra ty?

³ Tian’i Jehovah atsika hangala tahaka fomba fiheverany fahotan̈a ndreky olo nan̈ano fahotan̈a maventy. Amy lahatsoratra  ty atsika handiniky fomba hahavitantsika man̈ano zen̈y. Ke izikoa anao fa mamaky izy ty, zahava 1) karakôry fomba nandaminan̈a fahotan̈a maventy tamy fiangonan̈a ta Korinto, tamy taonjato voanalohany, 2) ino tari-dalan̈a namezan’ny apostoly Paoly, izikoa fa nisy olo nan̈ano fahotan̈a maventy kanefa nibebaka, aviô 3) ino raha ianarantsika baka amy tantara amy Baiboly zen̈y momba fiheveran’i Jehovah Kristianin̈y nan̈ano fahotan̈a maventy?

FOMBA NANDAMINAN̈A FAHOTAN̈A MAVENTY TAMY TAONJATO VOANALOHANY

4. Nisy nino ma tamy fiangonan̈a ta Korinto? (1 Korintianina 5:1, 2)

⁴ Vakia 1 Korintianina 5:1, 2. Tamy dia misionera fahatelo nataon’i Paoly, izy naharen̈y vaovao ratsy tamy fiangonan̈a vo nifôron̈o ta Korinto. Nisy rahalahy araiky tamy fiangonan̈a io nan̈ano firaisan̈a tamy vadin’ny babany. Nangala baraka mare fitondran-ten̈anany zen̈y, baka iô “tsy fohita foeky nata tamy firenena hafa”! Fiangonan̈a io tsy vitan’ny nilefitry tamy fitondran-ten̈anany io fo, fa mbala nirehareha koa nan̈ambela izy ho an̈isan’ny fiangonan̈a. Mbala nisy sasany tamindrô aby nieritreritry fa mbala famindram-pôn’ny Zan̈ahary amin’olombelon̈o tsy lavorary fo zen̈y nahavy irô nan̈ano zen̈y. Mety nisy olo sasany koa nieritreritry fa nohon’irô mamindra fô karaha Zan̈ahary nahavy irô mbala nan̈ambela izy tao. Kanefa, san̈atria Jehovah foeky hilefitry amy fahotan̈a hanjaka amy vahoakanany zen̈y. Nohon’ny fitondran-ten̈a ratsinany, lelahy io nandrobaka laza tsaran’ny fiangonan̈a. Izy koa nety nandrisiky Kristianin̈y sasany nifanerasera taminany han̈ano karaha nataony io. Ke ino raha nirahin’ny apostoly Paoly nataon’ny fiangonan̈a io?

5. Ino raha nirahin’i Paoly nataon’ny fiangonan̈a, baka iô ino raha tiany havian̈a? (1 Korintianina 5:13) (Zahava koa sary.)

⁵ Vakia 1 Korintianina 5:13. Fan̈ahy masin̈in’ny Zan̈ahary nandrisiky apostoly Paoly nanoratra taratasy mivolan̈a fa mila adoso amy fiangonan̈a olo mpanota kanefa tsy mibebaka. Karakôry tôkony hitondrasan’ny Kristianin̈y tsy nivadiky aby io lelahy io? Paoly nan̈iraka irô ‘tsy hifanerasera aminany eky.’ Ino ma dikan’izen̈y? Paoly nan̈azava fa tafiditry an̈atin’ny didy zen̈y, ‘tsy mihina miaraka aminany foeky.’ (1 Kor. 5:11) Izikoa baka atsika miaraka mihina amin’olo araiky, matetiky raha zen̈y koa mahavy atsika mahaiminaman̈a aminany fo. Hita mazava tsara baka tamy raha nivolan̈in’i Paoly io fa, fiangonan̈a  tsy tôkony hifanerasera amy lelahy io foeky. Raha zen̈y hahavy fiangonan̈a tsy han̈araka fitondran-ten̈a ratsinany. (1 Kor. 5:5-7) Fan̈ampin’izen̈y koa, irô tsy mifandray mare aminany io, mety hahavy izy ho tontohitry fa ratsy mare raha nataony io. Raha zen̈y koa mety hahavy izy hanen̈iny, ke handrisiky izy hibebaka.

6. Ino vokatran’ny taratasin’i Paoly tamy fiangonan̈a ndreky tamin’olo nan̈ano fahotan̈a maventy io?

⁶ Paoly koa fa baka nandefa taratasy io tamindrô Kristianin̈y ta Korinto, izy efa nieritreritry edy karakôry ataondrô izikoa mahazo taratasy io. Tafaran’izin̈y, Titosy nitondra vaovao namparavoravo Paoly mare. Fiangonan̈a nan̈araka tsara raha navoakoran̈a tamy taratasy nalefan’i Paoly io. (2 Kor. 7:6, 7) Narehandrô torohevitry namezany tao. Tsy ela tafaran’i Paoly nandefa taratasinany voanalohany io koa, efa nibebaka edy lelahy io! Nialany fitondran-ten̈a ratsinany io, aviô nivoany toe-tsain̈inany, baka iô izy nan̈araka fitsipikin’ i Jehovah. (2 Kor. 7:8-11) Ke ino raha nirahin’i Paoly nataon’ny fiangonan̈a io baka tiô?

FOMBA NITONDRASAN’NY FIANGONAN̈A OLO MPANOTA NIBEBAKA

7. Ino ma vokatra tsaran’ny fan̈adosoan̈a olo nan̈ano fahotan̈a maventy io tsy ho an̈isan’ny fiangonan̈a? (2 Korintianina 2:5-8)

⁷ Vakia 2 Korintianina 2:5-8. Paoly nivolan̈a fa ampy olo in̈y ‘fan̈anaran̈a mare nataon’ny ankamarozandrô.’ Izikoa atao amy volan̈a hafa, fan̈anaran̈a natao tamy lelahy io navy tamy tanjon̈o nikindren̈a izy. Ino ma tanjon̈on’izio? Hahavy izy hibebaka.​—Heb. 12:11.

8. Ino koa raha nirahin’i Paoly nataon’ny fiangonan̈a io baka tiô?

⁸ Paoly baka tiô nivolan̈a karaha ty tamy fiangonan̈a: “Anarô tôkony ho vôn̈ono han̈ambela heloko ndreky ho tsara fan̈ahy amy rahalahy nan̈ano hadisovan̈a io, baka iô han̈amia toky fa anarô tia izy.” Aleva onon̈o fa tian’i Paoly fiangonan̈a han̈ampody lelahy io ho an̈isan’ny fiangonan̈an’i Jehovah, fa irô mbala tiany han̈ano raha beben’izen̈y. Tiany koa irô han̈amia toky lelahy nibebaka io, baka tamy raha nivolan̈indrô ndreky tamy raha nataondrô fa irô ten̈a nan̈ambela helokonany ndreky ten̈a tia izy. Ke aboakandrô mazava baka amy zen̈y fa irô ten̈a ravoravo fa izy nimpody ho an̈isan’ny fiangonan̈a.

9. Nan̈ino olo sasany nety nisalasala han̈ambela helokon’olo nan̈ano fahotan̈a maventy, fa efa nibebaka io?

⁹ Nisy sasany tamindrô tamy fiangonan̈a tao ma nisalasala handray lelahy nibebaka io ho an̈isan’ny fiangonan̈a ndraiky koa? Tantara io ndray tsy mikoran̈a zen̈y, raha zen̈y ndraiky mety ho nisy. Nan̈ino? Raha nataony io baka ten̈a nampialamboetry fiangonan̈a, sady nety nampamen̈atra irô koa. Olo sasany tamy fiangonan̈a io tao baka nifen̈y mare nan̈araka volan̈an’i Jehovah. Ke irô mety nieritreritry fa tsy rariny izikoa olo nan̈ano fahotan̈a maventy be karaha zen̈y, efa ambela himpody amy fiangonan̈a. (Ampiràn̈a amy Lioka 15:28-30.) Fa nan̈ino ma fiangonan̈a ten̈a nila nan̈aboaka fa ten̈a mbala tiandrô rahalahy nibebaka io?

10-11. Ino raha mety ho hisy, izikoa anti-pan̈ahy aby io tsy man̈eky han̈ambela helokon’olo mpanota araiky efa nibebaka?

¹⁰ Diniha baka ino raha nisy izikoa anti-pan̈ahy aby io tsy nan̈eky foeky han̈ambela olo ten̈a nibebaka io himpody ndraiky an̈atin’ny fiangonan̈a, na izy koa fa nimpody in̈y, fiangonan̈a efa tsy tia izy eky? Izy nety ho ‘nalahelo mare.’ Ke izy mety ho nieritreritry fa izy efa tsy hahavita hanompo Jehovah eky. Aviô, izy mety han̈etraka foeky amy farany, ke efa tsy hifen̈y han̈arin̈y fifandraisany amy Zan̈ahary.

¹¹ Fa ny ten̈a ratsy, izikoa irô rahalahy ndreky ranabavy aby io tsy man̈ambela hadisovan̈an’olo nibebaka, irô foeky koa handrobaka fifandraisandrô amy Jehovah. Nan̈ino? Fôtony irô tsy mangala tahaka Jehovah, mamela helokon’olo mpanota nibebaka. Irô tsy mamindra fô ndreky ratsy fan̈ahy karaha Satana, ke irô han̈eky hampiasain’ny Devoly handrobaka fifandraisan’ny lelahy io amy Jehovah.​—2 Kor. 2:10, 11; Efes. 4:27.

12. Akôry nataon’ny fiangonan̈a ta Korinto nangala tahaka Jehovah?

¹² Akôry basy nataon’ny fiangonan̈a ta Korinto nangala tahaka Jehovah fa tsy Satana? Nangala tahaka Jehovah irô izikoa fa namela helokon’olo nibebaka. Diniha baka raha volan̈in’ny mpanoratra Baiboly aby io momba Jehovah. Davida nivolan̈a fa Jehovah io “tsara toetry sady vôn̈ono han̈ambela hadisovan̈a.” (Sal. 86:5) Karaha ty koa nisoratin’i Mika: “Azôvy ma Zan̈ahary karaha anao,  ke man̈ambela hadisovan̈a ndreky mamela helokon’olo tavela amy lovanao?” (Mika 7:18) Aviô Isaia koa nivolan̈a: “Irarian̈a olo ratsy fan̈ahy hiala amy fomba ratsinany, aviô olo mpan̈ano ratsy tsy hieritreritry raha tsy manjary eky. Irarian̈a izy himpody amy Jehovah, baka izy hamindra fô aminany, ia, himpody amy Zan̈aharintsika, fôtony izy ten̈a mamafa hadisovan̈a ankitin̈y.”​—Isaia 55:7.

13. Nan̈ino nety tsara nan̈ampodianan̈a ndraiky lelahy nibebaka io tan̈atin’ny fiangonan̈a? (Zahava efajoro “ Ombian̈a ma Navoaray Lelahy ta Korinto In̈y?”)

¹³ Tsy maintsy nandray tsara lelahy nibebaka io fiangonan̈a ta Korinto, ndreky nan̈amia toky izy fa irô tia izy. Fan̈anaovandrô raha zen̈y nahitan̈a fa irô nangala tahaka Jehovah. Fiangonan̈a nan̈araka tsara tari-dalan̈a baka tamy Paoly handray tsarabe ndraiky olo mpanota nibebaka io. Zen̈y nan̈aboahandrô fa irô ‘man̈araka volan̈a amy raha jiaby.’ (2 Kor. 2:9) Marin̈y ndraiky fa, fanjava vitsivitsy fo lelahy io nadoso tsy ho an̈isan’ny fiangonan̈a. Fa ndray zen̈y, fan̈anaran̈a namian̈a izy io nahavy izy nibebaka. Ke tsisy antony eky nila niambesan̈a, tsy han̈ampodianan̈a olo io ho an̈isan’ny fiangonan̈a.

AKÔRY HANGALANTSIKA TAHAKA FAN̈ANAOVAN’I JEHOVAH NY RARINY NDREKY FAMINDRAM-PÔNANY?

14-15. Ino raha ianarantsika baka tamy fomba nandaminan̈a raha ta Korinto in̈y? (2 Petera 3:9) (Zahava koa sary.)

¹⁴ Nisoratin̈y amy Baiboly ao fomba nandaminan̈a raha ta Korinto in̈y, “baka hampianaran̈a  atsika.” (Rom. 15:4) Baka amy tantara io hahaizantsika fa Jehovah tsy man̈ambela olo nan̈ano fahotan̈a maventy kanefa tsy mibebaka, hidôko ho an̈isan’ny fiangonan̈a. Tsy karaha zen̈y fomba an̈aboahan’i Jehovah ‘famindram-pônany.’ Jehovah tsy mamindra fô amin’olo nan̈ano fahotan̈a maventy kanefa tsy mibebaka. Ke olo zen̈y tsy ambelany hifanerasera amy mpanomponany tsy mivadiky. Marin̈y ndraiky fa Jehovah ten̈a mamindra fô, fa izy tsy milefitry amy karazan̈a fitondran-ten̈a jiaby zay. Izy koa tsy mampandefitry fitsipikinany. (Joda 4) Sady Jehovah izikoa man̈ambela olo tsy mibebaka ho an̈isan’ny fiangonan̈a fo, mety handrobaka olo sasany an̈atin’ny fiangonan̈a koa raha zen̈y. Ke tsy ten̈a famindram-pô fan̈anaovan̈a zen̈y.​—Ohab. 13:20; 1 Kor. 15:33.

¹⁵ Fa ndray zen̈y, atsika nianatra fa tsisy olo tian’i Jehovah ho ripaka. Izy mizaha hevitry fo hamonjian̈a olo. Izy mamindra fô amin’olo man̈ova toe-tsain̈y ndreky man̈ova fitondran-ten̈a, ke man̈iry hifandray tsarabe aminany ndraiky koa. (Ezek. 33:11; vakia 2 Petera 3:9.) Ke lelahy ta Korinto in̈y koa fa nibebaka ndreky niala tamy fitondran-ten̈a ratsinany, Jehovah nan̈iraka Paoly han̈azava tamy fiangonan̈a fa irô tôkony han̈ambela helokonany ndreky handray izy tsarabe.

16. Ino raha tsapanao tamy fomba nandaminan̈a problemo ta Korinto in̈y?

¹⁶ Fomba nandaminan̈a problemo ta Korinto in̈y man̈ampy atsika hahita fa Jehovah ten̈a be fitiavan̈a, man̈ano ny marin̈y, baka iô man̈ano ny rariny. (Sal. 33:5) Tsy mandrisiky anao hidera Zan̈aharintsika io ma raha zen̈y? Atsika jiaby baka mpanota aby, ke atsika ten̈a mila familan-kelokonany. Atsika tsiaraikiaraiky ten̈a tôkony hankasitraka Jehovah nohon’izy nan̈amia atsika vidim-pan̈avotan̈a. Baka amizio hahavitany man̈ambela helokontsika. Ke mankahery mahay fa Jehovah ten̈a tia vahoakanany, baka iô mitady raha ten̈a mahatsara irô!

17. Ino raha hidinihintsika amindrô lahatsoratra fan̈araka ty?

¹⁷ Ke karakôry fomba handaminan̈a problemo momba fahotan̈a maventy amy ziôty? Akôry hangalan’ny anti-pan̈ahy tahaka fan̈irian̈an’i Jehovah han̈ampy olo nan̈ano fahotan̈a maventy ke nibebaka? Akôry tôkony hataon’ny fiangonan̈a izikoa irô anti-pan̈ahy aby io manapa-kevitry han̈adoso na handray ndraiky olo araiky? Irô fan̈ontanian̈a aby zen̈y hidinihintsika amindrô lahatsoratra fan̈araka ty.