LAHATSORATRA FIANARAN̈A 31
HIRA 12 Jehovah Tompo, Ilay Avo Indrindra
Ino Raha Nataon’i Jehovah Han̈avaotan̈a Olombelon̈o Mpanota?
“Be ankitin̈y fitiavan’ny Zan̈ahary donia ty, ke namezany zanakanany lahitaokan̈a.”—JAONA 3:16.
HEVITRY HIDINIHIN̈Y
Hizahavantsika akôry ataon’i Jehovah man̈ampy atsika hiady amy fahotan̈a, ke hahavita hanompo izy. Hizahavantsika koa karakôry nataony, baka atsika ho afaka hiain̈y tsisy farany ndreky ho afaka amy fahotan̈a.
1-2. a) Ino ma fahotan̈a zen̈y, aviô karakôry hahafahantsika handresy izio? (Zahava koa “Fan̈azavan̈a.”) b) Ino raha hidinihintsika amy lahatsoratra ty, ndreky irô lahatsoratra hafa amy Tilikambo Fiambesan̈a ty? Zahava koa “Koran̈a Handeha amy Mpamaky” amy gazety ty.
TIANAO ho hay ma karakôry habezan’ny fitiavan’i Jehovah Zan̈ahary anao? Ty fomba ten̈a tsara hahaizanao raha zen̈y: Ianara raha nataony, baka han̈avaotany anao amy fahotan̈a ndreky fahafatesan̈a. Fahotan̈a a io ten̈a fahavalo ratsy, baka iô izikoa anao tômpiny fo tsy mahavita miady amizio. Isan’andra atsika manota fo. Aviô, baka amy fahotan̈a koa mahavy atsika maty. (Rom. 5:12) Fa ndray zen̈y, ty misy vaovao tsara: Nohon’ny fan̈ampian’i Jehovah, atsika mahavita mandresy fahotan̈a io. Sady Jehovah koa man̈amia toky fa izy hankafaka atsika amy fahotan̈a ndreky fahafatesan̈a!
2 Efa 6 000 taon̈o zay, Jehovah nan̈ampy olombelon̈o hiady amy fahotan̈a. Nan̈ino? Fôtony izy tia atsika. Rango tamboanalohany tan̈y izy efa tia olombelon̈o edy, ke izy nan̈ano raha maventy han̈ampian̈a irô amin’ny ady io. Hain’ny Zan̈ahary fa fahotan̈a io mahavy fahafatesan̈a, ke atsika tsy tiany hofoaty. Tiany atsika hiain̈y tsisy farany. (Rom. 6:23) Zen̈y raha tiany ho azonao. Amy lahatsoratra ty atsika handiniky fan̈ontanian̈a telo: 1) Karakôry nan̈amezan’i Jehovah fan̈antinan̈a olombelon̈o mpanota? 2) Karakôry nahavy olombelon̈o mpanota, tamy fotoan̈a nanoratan̈a Baiboly tan̈y, lôso nankasitrahin’i Jehovah? 3) Ino raha nataon’i Jesosy nan̈avaotan̈a olombelon̈o mpanota?
AKÔRY NAN̈AMEZAN’I JEHOVAH FAN̈ANTINAN̈A OLOMBELON̈O MPANOTA?
3. Karakôry nahavy raimandrenintsika taloha tan̈y nanjary mpanota?
3 Jehovah koa fa niasa lelahy ndreky man̈angy voanalohany, irô tiany ho sambatra. Ke irô namezany tany tsara hipitrahandrô, irô nataony fivadiany, aviô irô namezany asa tsara handeha hataondrô. Irô koa nambelany hanan̈a taranaka hameno tany, baka iô han̈ova tany jiaby hanjary paradisa, karaha zaridain̈in’i Edena in̈y. Fa misy raha araiky sady tsotra tsy nimboany nataondrô. Izy nampitandrin̈y irô fa izikoa irô kinia tsy man̈araka volan̈anany, irô hofoaty. Fa haintsika ino raha nandalo. Nisy anjely araiky tsy tia Zan̈ahary sady tsy tia irô nitsapa jery irô, ke nitariky irô hanota. Adama ndreky Eva nan̈eky ho voatarikin’ny anjely ratsy io, fa irô tsy natoky Babandrô be fitiavan̈a io, ke irô nanota. Tanteraka ankitin̈y raha nivolan̈in’i Jehovah. Ke nanomboko tamy zen̈y, irô tsy maintsy nibaby voka-dratsin’ny raha nataondrô. Irô lôso natoe, aviô naty.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Nan̈ino Jehovah tsy tia fahotan̈a ndreky man̈ampy atsika hiady amizio? (Romanina 8:20, 21)
4 Nambelan’i Jehovah nisoratin̈y amy Baiboly tantara mampalahelo zen̈y, baka hampatsara atsika. Izio man̈ampy atsika hahay nan̈ino halan’i Jehovah ankitin̈y fahotan̈a io. Fahotan̈a io mampisaraka atsika amy Babantsika io, ndreky mahavy fahafatesan̈a. (Isaia 59:2) Satana ten̈a tsy tia Jehovah ndreky olombelon̈o. Zen̈y nahavy izy nitsapa jery Adama ndreky Eva, baka irô hanota. Izy mbala tsy vôly mitsapa jery olo firaka iziôty. Ke Adama ndreky Eva koa fa voatarikin’i Satana hanota, Satana mety nieritreritry fa izy nandresy ta Edena in̈y, fa tsy hainy fo fa, Jehovah ten̈a be fitiavan̈a. Jehovah tsy nan̈ova fikasan̈anany momba taranakan’i Adama ndreky Eva foeky. Izy tia olombelon̈o, ke izy direkty nan̈ano raha hampisy fan̈antinan̈a irô. (Vakia Romanina 8:20, 21.) Hain’i Jehovah fa ho hisy amy taranak’olombelon̈o fo ho tia izy ndreky hitady fan̈ampian̈a aminany, hiadivan̈a amy fahotan̈a. Izy Babandrô be fitiavan̈a ndreky Mpamôron̈o irô. Ke izy han̈ano raha hankafaka irô amy fahotan̈a ndreky hifandray marikitry aminany. Ino raha nataon’i Jehovah baka hampamety raha zen̈y?
5. Ombian̈a Jehovah nanomboko nan̈amia fan̈antinan̈a olombelon̈o mpanota? Hazavà. (Genesisy 3:15)
5 Vakia Genesisy 3:15. Nanomboko nisy fan̈antinan̈a io, Jehovah koa fa nivolan̈a tamy Satana ino raha hahazo izy. Zan̈ahary nivolan̈a tsialohaloha fa hisy “taranaka” handeha hamonjy olombelon̈o. Taranaka io hanôrotôro Satana, baka iô han̈afoan̈a problemo jiaby. (1 Jaona 3:8) Fa ndray zen̈y, tsy maintsy hijaly antsendriky taranaka io. Izy hivangoen’i Satana, amy zen̈y izy maty. Ke hampalahelo Jehovah mare raha zen̈y. Fa Jehovah vôn̈ono hiaritry marary, ndreky han̈ambela taranaka io hijaly, baka hankafaka olombelon̈o amy fahotan̈a ndreky fahafatesan̈a.
AKÔRY NAHAVY OLO MPANOTA TAMIN’NY ANDRAN’NY BAIBOLY NANKASITRAHIN’I JEHOVAH?
6. Ino raha nataon’olo nanam-pinoan̈a karaha ataon’i Abela ndreky Noa, hifandraisan̈a marikitry tamy Jehovah?
6 Tan̈atin’ny taonjato maromaro fan̈araka, Jehovah nan̈ambara tsihelihely karakôry hahavy olombelon̈o mpanota hifandray marikitry aminany. Abela, faharoen’ny zanakan’i Adama ndreky Eva, olo voanalohany lôso nino Jehovah, tafaran’ny problemo be ta Edena in̈y. Abela tia Jehovah ndreky nan̈ano raha namparavoravo izy, baka iô nifandray marikitry taminany. Ke izy nan̈ano fan̈atitry namian̈a Jehovah. Abela io mpiambin̈y ôndrikôndriky, ke izy nangala zanakan’ny ôndrikôndrikinany sasany, baka iô nivoneny irô io ke nataony fan̈atitry tamy Jehovah. Ke karakôry nataon’i Jehovah? “Nankasitrahan’i Jehovah i Abela ndreky fan̈atitrinany.” (Gen. 4:4) Jehovah koa ravoravo tamy fan̈atitry nataon’olo sasany, karaha ataon’i Noa, fôtony irô tia izy ndreky natoky izy. (Gen. 8:20, 21) Niken’i Jehovah fan̈atitry nataondrô io, ke zen̈y nan̈aboahany fa olombelon̈o mpanota mety mbala hahazo sitraka aminany fo ndreky hifandray marikitry aminany. b
7. Ino raha ianarantsika baka tamy fahavon̈osan’i Abrahama han̈ano sôron̈o Isaka zanany?
7 Jehovah nan̈iraka i Abrahama, lelahy araiky ten̈a nanan̈a finoan̈a, han̈ano raha sarotro mare amin’olombelon̈o. Izy nirahiny nan̈ano sôron̈o Isaka zanany lelahy. Nety nampalemy trôko Abrahama mare handeha han̈ano raha zen̈y. Fa ndray zen̈y ndraiky, izy vôn̈ono fo han̈ano zen̈y. Fa izikoa izy efa handeha hamono Isaka in̈y, izy nisakanan’ny Zan̈ahary. Fa raha nataon’i Abrahama io mampianatra atsika fa misy raha matomboko hataon’i Jehovah afaran’izen̈y. Jehovah vôn̈ono han̈amia Zanany ten̈a tiany hatao sôron̈o, baka iô Jehovah ten̈a tia olombelon̈o.—Gen. 22:1-18.
8. Mifan̈itsy amin’ino ma sôron̈o maro nitakin’ny Lalàn̈an’i Mosesy in̈y? (Levitikosy 4:27-29; 17:11)
8 Taonjato maro tafara, Lalàn̈a namian̈a irô Israelita aby io nan̈iraka nan̈ano sôron̈o isan-karazany, baka handrakofan̈a fahotan̈an’ny vahoakan’ny Zan̈ahary. (Vakia Levitikosy 4:27-29; 17:11.) Irô sôron̈o aby zen̈y nifan̈itsy tamy sôron̈o araiky maventy, ten̈a mahavita mankafaka olombelon̈o amy fahotan̈a. Zan̈ahary nan̈iraka irô mpaminan̈y aby io hanoratra raha mikasiky taranaka nampan̈antinain̈y, hanjary Zanakan’ny Zan̈ahary. Izy ho irô tsy maintsy hijaly, baka iô hivonen̈a. Izy hatao karaha ôndrikôndriky natao sôron̈o in̈y. (Isaia 53:1-12) Miniminia hely baka! Jehovah han̈amia Zanany ten̈a tiany io hamonjian̈a olombelon̈o, an̈isan’izen̈y anao, ho afaka amy fahotan̈a ndreky fahafatesan̈a!
KARAKÔRY NATAON’I JESOSY NAN̈AVOTRO?
9. Ino raha nivolan̈in’i Jaona Mpan̈ano Batisa momba Jesosy? (Hebreo 9:22; 10:1-4, 12)
9 Tamy taonjato voanalohany, Jaona mpan̈ano batisa, mpanompon’ny Zan̈ahary, nanôndro Jesosy baka a Nazareta ke nivolan̈a: “Indriô Zanakan’ny Ôndrikôndrikin’ny Zan̈ahary, araiky man̈adoso fahotan̈an’ny donia ty!” (Jaona 1:29) Irô volan̈a aby io man̈aboaka fa Jesosy taranaka nampan̈antinain̈y in̈y. Izy nan̈amia ain̈inany natao sôron̈o. Ela ny ela, navy taranaka nampan̈antinain’i Jehovah rango efa ela in̈y, han̈ano sôron̈o, han̈avotro olombelon̈o amy fahotan̈a.—Vakia Hebreo 9:22; 10:1-4, 12.
10. Karakôry nan̈aboahan’i Jesosy fa izy “navy hikaiky” olo mpanota?
10 Jesosy nifantoko mare tamindrô olo nijaly baka tamy fahotan̈a nataondrô, ke nikaiky irô han̈ara-dia izy. Hainy fa baka amy fahotan̈a io raha ten̈a mahavy olombelon̈o mijaly, ke izy nan̈ampy mare lelahy ndreky man̈angy nijaly baka tamy fahotan̈a nataondrô. Izy nan̈ano fan̈oharan̈a, ke nivolan̈a karaha ty: “Tsy olo salama mila dokotera fa olo marary.” Baka iô koa ho izy: “Tsy handeha hikaiky olo marin̈y antony naviako, fa handeha hikaiky mpanota.” (Mat. 9:12, 13) Zen̈y ankitin̈y raha nataon’i Jesosy. Tsara fan̈ahy izy nan̈ambela helokon’ny man̈angy araiky mpanota, nanasa vitinany tamy ranomasonany. (Lioka 7:37-50) Izy koa nampianatra fahamarin̈ana maventy, man̈angy araiky samaritanin̈y tamy vôvo, ndray efa hainy fa man̈angy io ratsy fitondran-ten̈a. (Jaona 4:7, 17-19, 25, 26) Zan̈ahary koa nan̈amia angôvo Jesosy nandrisian̈a fahafatesan̈a. Tamy fomba akôry? Jesosy namelon̈o olo: Lelahy, man̈angy, tsaiky, aviô olobe.—Mat. 11:5.
11. Nan̈ino olo mpanota nan̈aton̈o Jesosy?
11 Ke tsy mahagaga izikoa nisy olo maro efa tafiditry lalin̈y tamy fahotan̈a, mbala nan̈aton̈o Jesosy fo. Tsapany jalindrô, ke izy nahinakinaka irô. Irô tsy navozovozo nan̈aton̈o izy. (Lioka 15:1, 2) Jesosy nidera ndreky nitahy olo karaha zen̈y, fôtony irô nan̈aboaka fa nino izy. (Lioka 19:1-10) Jesosy namindra fô karaha Babany. (Jaona 14:9) Naboakany tamy raha nivolan̈iny ndreky nataony fa Jehovah io ten̈a mahinakinaka olo, Baba mamindra fô ndreky tia olo, baka iô tihan̈ampy olo tsiaraikiaraiky handresy amin’ny ady amy fahotan̈a io. Jesosy nan̈ampy olo mpanota baka irô han̈iry han̈ova fitondran-ten̈andrô, ke han̈ara-dia izy.—Lioka 5:27, 28.
12. Ino raha nampianarin’i Jesosy momba fifatesany?
12 Hain’i Jesosy fa izy mbala han̈ano sôron̈o ain̈inany. Natetiky izy nivolan̈a tamy mpan̈ara-dia izy fa hisy olo hamadiky izy, baka iô izy hivonen̈a amin’ny hazofijalian̈a. (Mat. 17:22; 20:18, 19) Hainy fa sôron̈o handeha hataony io han̈adoso fahotan̈an’ny donia ty, eraka raha efa nivolan̈in’i Jaona ndreky irô mpaminan̈y aby io. Jesosy koa nampianatra fa izy koa fa baka man̈amia ain̈inany olo jiaby, izy “hitaon̈o karazan’olo jiaby han̈aton̈o izy.” (Jaona 12:32) Olo mpanota hahavita hamparavoravo Jehovah izikoa irô man̈eky Jesosy hanjary Tômpondrô, baka iô man̈ara-dia izy. Izikoa irô man̈ano zen̈y, amy farany irô ho “afaka amy fahotan̈a.” (Rom. 6:14, 18, 22; Jaona 8:32) Ke Jesosy nisy korazy, aviô vôn̈ono hijaly ndreky hofoaty hamonjian̈a atsika.—Jaona 10:17, 18.
13. Karakôry nifatesan’i Jesosy, baka iô ino raha ianarantsika momba Jehovah baka amy zen̈y? (Zahava koa sary.)
13 Nisy olo namitaka Jesosy, baka iô izy nisambôrin̈y, nan̈odian’olo raha tsy nataony, aviô voaheloko hofoaty ndreky nampijalin̈a foeky. Baka iô irô maramila aby io nan̈anton̈o izy tamin’ny hazofijalian̈a, baka hamonoan̈a izy. Jesosy tsy nivadiky, fa niaritry mare jaly jiaby zen̈y. Fa kanefa, mbala lombolombon’izen̈y koa hirifirin’ny raha niaretan’i Jehovah, nahita Zanany io handeha hofoaty. Jehovah nanan̈a angôvo hisakanan̈a raha jiaby zen̈y, fa ndray zen̈y, izy tsy nan̈ano raha. Nan̈ino Baba be fitiavan̈a io nan̈ambela izy ho voa raha karaha zen̈y? Fôtony Jehovah tia atsika. Jesosy nivolan̈a: “Be ankitin̈y fitiavan’ny Zan̈ahary donia ty, ke namezany zanakanany lahitaokan̈a, amy zen̈y zay olo man̈aboaka fa mino izy tsy ho ripaka fa hahazo fiainan̈a tsisy farany.”—Jaona 3:16.
Baka hankafaka atsika amy fahotan̈a ndreky fahafatesan̈a, Jehovah tsy maintsy nan̈ambela Zanany nivonen̈a, ndray raha zen̈y mety nampangôtsoko izy mare (Zahava fehintsoratra 13)
14. Mampianatra anao momba ino sôron̈o nataon’i Jesosy in̈y?
14 Sôron̈o nataon’i Jesosy in̈y man̈aboaka fa Jehovah tia mare taranakan’i Adama ndreky Eva. Zen̈y koa man̈aboaka fa izy ten̈a tia anao. Vitany nan̈ambela Zanany ten̈a tiany ndreky niatriky hirifirin’izen̈y, baka hankafaka anao amy fahotan̈a ndreky fahafatesan̈a. (1 Jaona 4:9, 10) Ke izy tihan̈ampy atsika tsiaraikiaraiky hiady amy fahotan̈a ndreky handresy izio!
15. Ino raha mila ataontsika, amy zen̈y atsika hahazo hatsaran̈a baka amy vidim-pan̈avotan̈a nataon’i Jesosy, kadô baka amy Zan̈ahary io?
15 Sôron̈o nataon’ny Zanany lahitaokana io kadô baka amy Zan̈ahary, ke izio mahavy atsika ho voavela heloko. Kanefa, baka hazahoan̈a familan-kelokon’ny Zan̈ahary zen̈y, misy raha koa mila ataontsika. Ino ma izio? Karaha ty nivolan̈in’i Jaona Mpan̈ano Batisa ndreky Jesosy Kristy koa: “Anarô mibibaha, fôtony efa marikitry Fanjakan̈an’ny lan̈itry.” (Mat. 3:1, 2; 4:17) Ke tsy maintsy mibebaka atsika, izikoa tihifandray marikitry amy Babantsika be fitiavan̈a io ndreky tiho voavela heloko. Fa karakôry ma mibebaka zen̈y? Aviô nan̈ino ma zen̈y han̈ampy atsika han̈ano raha mamparavoravo Jehovah, ndray atsika mbala mpanota? Lahatsoratra man̈araka hamaly zen̈y.
HIRA 18 Ankasitrahantsika ny Vidim-panavotana
a FAN̈AZAVAN̈A: Amy Baiboly, “fahotan̈a” mety ivolan̈ana raha tsy mety atao na tsy fahavitan̈a miain̈y na man̈ano raha mifan̈araka amy fitsipikin’i Jehovah momba fitondran-ten̈a. Fa “fahotan̈a” io koa mety ivolan̈ana tsy fahalavorarian̈a nilovaintsika baka tamin’i Adama. Fahotan̈a nilovaintsika io mahavy olombelon̈o jiaby maty.
b Antony nahavy Zan̈ahary nan̈eky sôron̈o biby nataon’olo talohan’ny faha Kristianin̈y tan̈y, nohon’ny sôron̈o mbala handeha hataon’i Jesosy Kristy tafaran’izin̈y. Ke sôron̈o hataony io ten̈a hahavita hankafaka olombelon̈o amy fahotan̈a ndreky fahafatesan̈a.—Rom. 3:25.
