LAHATSORATRA FIANARAN̈A 32
HIRA 44 Vavaky ny Torotoro Fo
Tian’i Jehovah Hibebaka Olo Jiaby
“Tsisy olo tian’i [Jehovah] ho ripaka fa tiany hibebaka aby olo jiaby.”—2 PET. 3:9.
HEVITRY HIDINIHIN̈Y
Hidinihin̈y ato ino dikan’ny mibebaka zen̈y, nan̈ino raha zen̈y ten̈a ilain̈a, baka iô karakôry han̈ampian’i Jehovah olo jiaby hibebaka.
1. Ino ma dikan’ny mibebaka zen̈y?
IZIKOA atsika man̈ano raha tsy mety, atsika ten̈a mila mibebaka. Amy Baiboly, olo araiky mibebaka zen̈y manen̈iny amy raha ratsy nataony ndreky vôly man̈ano zen̈y, baka iô tapa-kevitry tsy han̈ampody zen̈y eky.—Zahava Fan̈azavan̈a Teny amy Baiboly, “Fibebahana.”
2. Nan̈ino atsika jiaby mila mianatra momba fibebahan̈a io? (Nehemia 8:9-11)
2 Olo jiaby mila mianatra momba fibebahan̈a io. Nan̈ino? Fôtony isan’andra atsika manota fo. Atsika baka taranakan’i Adama ndreky Eva, ke atsika tsiaraikiaraiky nandova fahotan̈a ndreky fahafatesan̈a. (Rom. 3:23; 5:12) Tsisy olo afaka miala amy zen̈y. Ndray irô lelahy nanam-pinoan̈a aby karaha nataon’ny apostoly Paoly, mbala nila niady tamy fahotan̈a fo. (Rom. 7:21-24) Zen̈y ma mivolan̈a fa atsika tôkony ho kivy fo nohon’ny fahotan̈antsika? Ehe. Jehovah mamindra fô, ke tiany atsika ho sambatra. Iritrireta baka irô Jiosy tamy faha Nehemia. (Vakia Nehemia 8:9-11.) Tsy tian’i Jehovah irô ho kivy mare nohon’ny fahotan̈a nataondrô taloha, fa irô tiany ho ravoravo. Hain’i Jehovah fa izikoa atsika mibebaka, zen̈y han̈ampy atsika ho sambatra. Ke atsika ampianariny momba zen̈y. Izikoa atsika mibebaka amy fahotan̈antsika, atsika matoky fa Babantsika mamindra fô io han̈ambela helokontsika.
3. Ino raha hidinihintsika amy lahatsoratra ty?
3 Alô hidinihintsika tsarabe raha momba fibebahan̈a io. Amy lahatsoratra ty, atsika handiniky raha telo momba izio. Voanalohany, hianarantsika ino raha nampianarin’i Jehovah irô Israelita aby io momba fibebahan̈a, baka iô karakôry nataon’i Jehovah nan̈ampy olo mpanota hibebaka. Aviô farany, hizahavantsika koa ino raha nampianarin’i Jesosy irô mpianatranany aby io momba fibebahan̈a.
INO RAHA NAMPIANARIN’I JEHOVAH IRÔ ISRAELITA ABY IO MOMBA FIBEBAHAN̈A?
4. Ino ma raha nampianarin’i Jehovah firenenan’Israely momba fibebahan̈a?
4 Jehovah koa fa nanangana firenenan’Israely, izy nan̈ano fifan̈ikian̈a tamindrô. Ke izikoa irô nan̈araka lalàn̈anany, izy niaro irô ndreky nitahy irô. Karaha ty ho izy momba lalàn̈anany io: “Raha handidiako anao niany zen̈y tsy ho sarotro loatra aminao sady tsy lavitry loatra.” (Deot. 30:11, 16) Fa izikoa ndraiky irô tsy nan̈araka volan̈anany, na koa nifidy nanompo Zan̈ahary hafa, izy tsy nitahy irô, baka iô irô nijaly. Fa ndray zen̈y, Jehovah tsy ten̈a nan̈ary irô. Irô mbala afaka ‘nimpody tamy Jehovah Zan̈aharindrô ndreky nitandren̈y feonany.’ (Deot. 30:1-3, 17-20) Izikoa atao amy volan̈a hafa, irô mbala afaka nibebaka. Izikoa zen̈y ankitin̈y raha nataondrô, Jehovah nifandray marikitry tamindrô, sady nan̈amia fitahian̈a maro irô ndraiky koa.
5. Karakôry nan̈aboahan’i Jehovah fa izy tsy rivan̈a tamy vahoakanany? (2 Mpanjaka 17:13, 14)
5 Irô vahoaka nifidin’i Jehovah aby io impirimpiry tsy nan̈araka volan̈anany. Irô tsy vitan’ny nanompo sampy fo fa maro koa raha ratsy nataondrô. Ke vokany, irô nijaly. Fa Jehovah ndraiky tsy ten̈a nan̈ary vahoakanany. Impirimpiry izy nan̈iraka mpaminan̈y handrisiky irô hibebaka ndreky himpody aminany.—Vakia 2 Mpanjaka 17:13, 14.
6. Karakôry nampiasan’i Jehovah mpaminan̈y aby io hampianatra vahoakanany fa ten̈a raha maventy mibebaka? (Zahava koa sary.)
6 Natetiky Jehovah nampiasa mpaminan̈inany hampitandrin̈y vahoakanany aby io ndreky han̈itsy irô. Ohatra, Zan̈ahary nan̈iraka Jeremia hivolan̈a karaha ty: “Mimpodiana, anarô Israely maditry aby ty … Zaho tsy hahinihiny tsisy farany aminarô, fôtony zaho tsy mivadiky. Zaho tsy ho meloko aminarô mandrakizay. Anarô man̈ikia diso, fôtony anarô tsy nan̈araka volan̈an’i Jehovah.” (Jer. 3:12, 13) Jehovah koa nan̈iraka Joela hivolan̈a karaha ty: “Mimpodiana aminaka amy fônarô jiaby.” (Joela 2:12, 13) Isaia ndraiky nirahiny nivolan̈a: “Sasà ain̈inarô ke ataova madio. Adosoa manoloan̈a masonaka raha ratsy jiaby ataonarô, baka iô mivoleza man̈ano raha ratsy.” (Isaia 1:16-19) Ezekiela koa nirahin’i Jehovah nivolan̈a: ‘Izio ma tiako hahafatesan’ny ratsy fan̈ahy? Tsy sitrako aby ma irô miala amy raha ratsy fataondrô, baka irô ho velon̈o? Tsy tiako foeky hisy olo hofoaty, na azôvy izy na azôvy, ke aza man̈ano raha ratsy eky baka anarô ho velon̈o.’ (Ezek. 18:23, 32) Mamparavoravo Jehovah mahita olo mibebaka, fôtony irô tiany ho velon̈o mandrakizay! Ke Jehovah tsy miambin̈y irô olo mpanota aby io efa miova, zay izy vo han̈ampy irô. Atsika hizaha ohatra sasany momba zen̈y.
Jehovah natetiky nampiasa irô mpaminan̈inany aby io nandrisiky vahoakanany tsy nan̈araka volan̈anany aby io hibebaka (Zahava fehintsoratra 6-7)
7. Izikoa tantaran’ny mpaminan̈y Hosea ndreky vadiny io zahan̈a, ino raha nampianarin’i Jehovah vahoakanany?
7 Aleva onon̈o baka fomba nampianaran’i Jehovah vahoakanany aby io, baka tamy tantara ten̈a nisy. Izio raha nataon’i Gomera, vadin’i Hosea mpaminan̈y. Gomera koa fa baka nijangajanga, izy niala Hosea vadiny, ke izy nan̈araka lelahy hafa. Ke izy ma efa tsy afaka nibebaka eky? Jehovah mahay raha an̈aty fôn’olo, ke ho izy tamin’i Hosea: ‘Indao tiava ndraiky koa man̈angy in̈y, ndray izy mbala miaraka amy lelahy hafa sady mandiadia vady. Tiava fo izy, karaha ataon’i Jehovah tia zanakan’Israely, ndray irô manompo Zan̈ahary hafa.’ (Hosea 3:1; Ohab. 16:2) Aleva onon̈o fa vadin’i Hosea tamin’io mbala tsy vôly tamy fahotan̈a maventy nataony io. Fa Jehovah ndraiky nan̈iraka Hosea han̈aton̈o izy, ke han̈ambela hadisovan̈anany, baka iô hihavan̈a aminany. a Karaha zen̈y koa, Jehovah tsy ten̈a nan̈ary irô vahoakanany tsy nijery izy aby io. Ndray irô mbala nan̈ano fahotan̈a mare, irô mbala tiany fo, ke izy nan̈ano raha han̈ampian̈a irô hibebaka ndreky han̈ova fiain̈anandrô. Ohatra zen̈y ma man̈aboaka fa Jehovah “mpandiniky fô” io, mifen̈y man̈ano raha han̈ampian̈a olo araiky mbala man̈ano fahotan̈a maventy hibebaka? (Ohab. 17:3) Alô zahavantsika.
AKÔRY NAN̈AMPIAN’I JEHOVAH OLO MPANOTA HIBEBAKA?
8. Ino raha nataon’i Jehovah han̈ampian̈a Kaina hibebaka? (Genesisy 4:3-7) (Zahava koa sary.)
8 Kaina talan̈olon’i Adama ndreky Eva. Izy nandova fahotan̈a baka tamy raimandreninany io. Karaha ty koa koran̈in’ny Baiboly momba izy: “Ratsy raha nataony.” (1 Jaona 3:12) Mety zen̈y nahavy Jehovah “tsy nankasitraka Kaina ndreky fan̈atitrinany” tamin’izy nan̈ano sôron̈o namian̈a Jehovah in̈y. Kaina tsy vôn̈ono hiova, fa ‘izy neloko ndreky kivy mare.’ Ke ino raha nataon’i Jehovah baka tiô? Izy nikoran̈a tamy Kaina. (Vakia Genesisy 4:3-7.) Aleva onon̈o fa Jehovah tsara fan̈ahy nampisaintsain̈y Kaina, baka izy hahavita hiova. Nampitandrin̈y izy koa Jehovah fa mety hahavy izy hanota helokonany io. Raha nampalahelo fo, Kaina tsy nan̈eky hitandren̈y Jehovah. Tsy nambelany foeky Jehovah han̈ampy izy hibebaka. Ndray tiô raha nataon’i Kaina io, zen̈y ma nahavy Jehovah ho vôly han̈ampy olo mpanota hibebaka? Tsy zen̈y foeky!
Jehovah nifen̈y nan̈ampy Kaina hibebaka, ndreky nivolan̈a taminany fa izy hitahy Kaina, aviô nampitandrin̈y izy fa ten̈a ratsy manota (Zahava fehintsoratra 8)
9. Karakôry nan̈ampian’i Jehovah i Davida hibebaka?
9 Tian’i Jehovah mare Mpanjaka Davida. Ndray izy aby nivolan̈a fa izy “lelahy sitrakan’ny fônany.” (Asa. 13:22) Fa Davida ndraiky nan̈ano fahotan̈a maventy, an̈atin’izen̈y nijangajanga ndreky namono olo. Izikoa erakan’ny Lalàn̈an’i Mosesy, Davida tôkony nivonen̈a. (Lev. 20:10; Nom. 35:31) Fa Jehovah tsara fan̈ahy nan̈ano raha nan̈ampian̈a izy. b Izy nan̈iraka mpaminan̈y Natana namangy mpanjaka io. Davida tamy zen̈y mbala tsy honohono hibebaka zen̈y foeky. Natana nampiasa fan̈oharan̈a indesiny hanohin̈y fôn’i Davida. Tontohitry Davida fa izy ten̈a nan̈ano raha nampalahelo Jehovah, ke izy nibebaka. (2 Sam. 12:1-14) Izy nanoratra Salamo araiky nahitan̈a fa izy ten̈a nibebaka ankitin̈y. (Sal. 51, volan̈a fampidiran̈a) Ke Salamo nisoratiny io mbala nan̈ampy olo maro mpanota koa ndreky nandrisiky irô hibebaka. Ke tsy ravoravo ma atsika fa Jehovah be fitiavan̈a ke nan̈ampy Davida mpanomponany ten̈a tiany io nibebaka?
10. Jehovah mahari-draha amintsika ndreky man̈ambela hadisovan̈antsika. Ino raha tsapanao baka amy zen̈y?
10 Tsisy fahotan̈a tian’i Jehovah zen̈y foeky. Fa ndray zen̈y, hainy fa atsika jiaby io mpanota. (Sal. 5:4, 5) Nohon’ny fitiavany atsika, izy nifidy han̈ampy atsika hiady amy fahotan̈a. Izy man̈ano raha fo han̈ampian̈a nata olo mpanota mare, baka hibebaka ndreky hifandray marikitry aminany. Ten̈a mankahery mahay raha zen̈y. Izikoa atsika mangala onon̈o fa Jehovah mahari-daraha amintsika, ndreky man̈ambela hadisovan̈antsika zen̈y, atsika ho tapa-kevitry tsy hivadiky aminany ndreky hibebaka malaky izikoa tafanota. Fa atsika iziôty ndraiky handiniky ino raha nampianarin’i Jesosy momba fibebahan̈a zen̈y.
INO RAHA NAMPIANARIN’I JESOSY MOMBA FIBEBAHAN̈A?
11-12. Ino ohatra nampiasain’i Jesosy hampianaran̈a atsika fa Jehovah io ten̈a vôn̈ono han̈ambela hadisovan̈a? (Zahava amy fôn̈ony.)
11 Tamy taonjato voanalohany, Mesia navy tambony tany teto. Eraka nivolan̈intsika tamy lahatsoratra talohan’ity in̈y, Jehovah nampiasa Jaona Mpan̈ano Batisa ndreky Jesosy Kristy, hampianatra olo fa ten̈a raha maventy mibebaka zen̈y.—Mat. 3:1, 2; 4:17.
12 Tamy fanompoan̈an’i Jesosy, izy nampianatra olo nitandren̈y izy aby io fa Babany ten̈a vôn̈ono hamela heloko. Ten̈a mahavarian̈a fomba nampianarany raha zen̈y. Ke izy nan̈ano fan̈oharan̈a momba zanaka adala. Manafolahy io nifidy hiala tantran̈on’olobeny, baka iô nan̈ano raha maro ratsy. Fa ndray zen̈y, “tontohitry” izy baka tiô, ke nody tamindrô tan̈y. Ke karakôry nataon’ny babany? “Mbala lavidavitry izy efa tazan̈an’ny babany; babany io nahinakinaka, ke lôso izy nilomoay, nitolon̈iny izy, baka iô izy nirôfiny tam-pitiavan̈a.” Zanany io niangavy babany han̈ano izy ampiasanany tantran̈ondrô tao, fa babany io ndraiky nikaiky izy “zanako.” Baka iô nimpody niraisiny tamy fianakavian̈anany tao ndraiky izy. Babany io nivolan̈a: “Izy efa very kanefa hita.” (Lioka 15:11-32) Tamy Jesosy niain̈y tan-dan̈itry tan̈y, talohan’ny naviany tambony tany teto, azo antoko fa efa hitany Babany nahinakinaka olo mpanota maro kanefa nibebaka. Ten̈a mankahery ankitin̈y tantara nikoran̈in’i Jesosy io ndreky ahitan̈a fa Jehovah Babantsika io faran-draha mamindra fô eky!
Baba amy fan̈oharan̈a momba zanaka adala nataon’i Jesosy in̈y, milomoay mandeha mitolon̈o zanany io, tamy zanany io nody tamindrô tao (Zahava fehintsoratra 11-12)
13-14. Ino raha nianaran’ny apostoly Petera momba fibebahan̈a, aviô ino raha nampianariny olo hafa momba raha zen̈y? (Zahava koa sary.)
13 Apostoly Petera nianatra leson maventy momba fibebahan̈a ndreky familan-keloko io baka tamy Jesosy. Petera baka natetiky nan̈ano hadisovan̈a, fa Jesosy ndraiky vôn̈ono fo han̈ambela hadisovan̈anany. Ohatra, lôso kivy mare Petera izy koa fa nan̈ano sary tsy nahay Jesosy Tômponany intelo aby. (Mat. 26:34, 35, 69-75) Fa Jesosy ndraiky koa fa baka natsangana tamy maty, izy niboaka tamy Petera, mety ho irô roe fo tiô tamy zen̈y. (Lioka 24:33, 34; 1 Kor. 15:3-5) Ke azo antoko fa tamy fotoan̈a zen̈y, Jesosy nan̈ambela helokon’ny Petera tam-pitiavan̈a, baka iô nan̈amia toky apostolinany nibebaka io.—Mar. 16:7.
14 Hain’i Petera tsarabe karakôry mibebaka ndreky avoavela heloko zen̈y. Ke izy nahavita nampianatra olo hafa momba raha aby zen̈y. Nisy fotoan̈a, tafaran’ny fetin’ny Pantekoty, Petera nan̈ano kabaro tamy Jiosy maro be tsy nino Jesosy. Izy nivolan̈a tamindrô fa irô namono Mesia. Aviô, tam-pitiavan̈a, izy nandrisiky irô karaha ty: “Anarô mibibaha baka iô anarô mimpodiana, amy zen̈y ho voafafa fahotan̈anarô. Ke hisy fotoan̈a mamelombelon̈o baka amy Jehovah.” (Asa. 3:14, 15, 17, 19) Petera nampianatra fa mibebaka mpanota araiky izikoa izy mimpody, dikan’izen̈y izy man̈ova eritreritry ratsinany, vôly man̈ano raha ratsy, aviô mifen̈y manan̈a fiain̈ana mamparavoravo Zan̈ahary. Naboakan’ny apostoly io koa fa Jehovah hamafa fahotan̈andrô, ke han̈ano zen̈y tsy ho hita foeky. Baka iô am-polony taon̈o tafaran’izin̈y, apostoly Petera nan̈amia toky irô Kristianin̈y aby io karaha ty: “Jehovah ... maharidraha aminarô, fôtony tsisy olo tiany ho ripaka fa tiany olo jiaby hibebaka.” (2 Pet. 3:9) Ke ten̈a nankahery Kristianin̈y nanota nahay raha zen̈y, intsaka eky izikoa irô tafan̈ano fahotan̈a maventy!
Jesosy tsara fan̈ahy namela heloko ndreky nan̈amia toky apostolinany nibebaka (Zahava fehintsoratra 13-14)
15-16. a) Karakôry nianaran’ny apostoly Paoly momba familan-keloko? (1 Timoty 1:12-15) b) Ino raha hianarantsika amy lahatsoratra man̈araka?
15 Vitsy fo olo nila nibebaka ndreky nambela hadisovan̈a mandilatra Saoly baka a Tarsosy. Izy baka tsy navavivavy foeky nan̈enjiky irô mpan̈ara-dia Kristy aby io. Ke ankamarozandrô Kristianin̈y aby io nieritreritry fa efa tsisy andra hampiova izy eky. Fa Jesosy ndraiky nahay fa Saoly mbala afaka miova ndreky mibebaka fo. Izy ndreky Babany nahita toetry tsara tamy Saoly tao. Jesosy nivolan̈a: “Lelahy zen̈y efa fitaovan̈a nifidiko.” (Asa. 9:15) Jesosy aby nan̈ano fahagagan̈a nan̈ampian̈a Saoly hibebaka. (Asa. 7:58–8:3; 9:1-9, 17-20) Saoly koa fa lôso kristianin̈y in̈y, apostoly Paoly nikahian̈a izy. Natetiky izy nan̈aboaka fankasitrahan̈a hatsaram-pan̈ahy ndreky famindram-pô natao taminany io. (Vakia 1 Timoty 1:12-15.) Ke karaha ty ho Paoly: “Tian’ny Zan̈ahary hibebaka anao, matoa izy tsara fan̈ahy aminao.”—Rom. 2:4.
16 Tandraraiky Paoly naharen̈y fa irô Kristianin̈y ta Korinto nan̈ambela lelahy araiky ratsy fitondran-ten̈a, nidôko tamy fiangonan̈a tao fo. Karakôry nataony nandamin̈y raha zen̈y? Fomba nandaminany izio mampianatra atsika fa Jehovah ten̈a man̈aboaka fitiavan̈a izikoa fa mamalavala mpanomponany. Baka iô koa, zen̈y man̈aboaka fa ten̈a raha maventy mamindra fô amin’olo mibebaka. Hidinihintsika tsarabe tantara zen̈y amy lahatsoratra fan̈araka ty.
HIRA 33 Apetraho Amin’i Jehovah Izay Manavesatra Anao
a Tamin’io fo raha zen̈y. Amy ziôty, Jehovah tsy manery vady tsy manan-tsin̈y hidôko amy vadiny nandiadia izy. Na Jehovah aby nan̈iraka Zanany han̈azava fa lelahy na man̈angy manambady mety hifidy hisaraka izikoa vadiny nijangajanga, aviô izikoa zen̈y safidinany.—Mat. 5:32; 19:9.
b Zahava lahatsoratra “Mahasoa Anao ny Famelan-kelok’i Jehovah” amy Tilikambo Fiambesan̈a 15 Novambra 2012, p. 21-23, feh. 3-10.
