Karaha ty raha nivolan̈in’ny apostoly Paoly tamindrô Kristianin̈y ta Tesalonika: “Izikoa misy olo tsy man̈araka raha volan̈inay amy taratasy ty ato, aleva onon̈o olo zen̈y.” (2 Tes. 3:14) Taloha, atsika nivolan̈a fa toromariky zen̈y mandeha amy anti-pan̈ahy. Ke izikoa fa nisy olo araiky efa impirimpiry namian̈a torohevitry kanefa mbala tsy man̈araka fitsikipin’ny Baiboly fo, anti-pan̈ahy mety han̈ano kabaro hampitandreman̈a fiangonan̈a, amy zen̈y mpitory tsiaraikiaraiky tsy hiaraka be amin’olo io.

Nahitsy fazahoantsika andininy io. Torohevitrin’i Paoly io mikoran̈a raha tôkony hataon’ny Kristianin̈y tsiaraikiaraiky man̈oloan̈a raha sasany. Ke anti-pan̈ahy efa tsy mila man̈ano kabaro fampitandreman̈a eky. Fa nan̈ino? Diniha baka ino raha nivolan̈in’i Paoly tamin’izy nan̈amia torohevitry io.

Paoly nivolan̈a fa nisy olo sasany tan̈atin’ny fiangonan̈a tao “tsy man̈eky anatra.” Irô tsy nan̈eky torohevitry baka amy Volan̈a Zan̈ahary. Tamy fitsidihan̈a nataony taloha, izy nan̈amia torohevitry ty: “Lan̈iany tsy mety miasa tsy tôkony hihinan̈a.” Kanefa mbala nisy olo sasany fo tsy nety niasa hamiloman-ten̈a, ndray irô afaka nan̈ano zen̈y. Irô koa tia nidiniditry tamin’ny aferan’olo. Akôry fomba tôkony nitondrasan’ny Kristianin̈y olo tsy man̈eky anarin̈y karaha zen̈y?​—2 Tes. 3:6, 10-12.

“Aleva onon̈o olo zen̈y”, ho Paoly. Volan̈a griky io man̈iraka man̈isy fan̈amarihan̈a manokana olo io. Olo jiaby tamy fiangonan̈a namezan’i Paoly toromariky io, fa tsy anti-pan̈ahy fo. (2 Tes. 1:1; 3:6) Ke izikoa nisy mpiara-manompo tsy mijery torohevitry baka amy Volan̈a Zan̈ahary, zay Kristianin̈y mety nahavoamariky zen̈y hifidy ‘tsy hifanerasera’ amin’olo tsy man̈eky anarin̈y io.

Zen̈y ma midika fa olo io indesin̈y karaha olo araiky nadoso tsy ho an̈isan’ny fiangonan̈a in̈y? Ehe, Paoly koa nivolan̈a karaha ty: “Anara karaha rahalahy fo izy.” Ke Kristianin̈y tsiaraikiaraiky mbala mifanerasera aminany fo amy fivorian̈a ndreky amy fanompoan̈a, fa irô ndraiky tsy hiaraka aminany lera fiarahan̈a mikoran̈a na fangalan̈a diandian̈a. Nan̈ino? “Baka izy ho men̈atra”, ho Paoly. Vokatran’izen̈y, Kristianin̈y tsy man̈eky anarin̈y io mety ho men̈atra amy fitondran-ten̈anany io, ke izy mety hiova.​—2 Tes. 3:14, 15.

Akôry mety han̈arehan’ny Kristianin̈y amy ziôty torohevitry zen̈y? Karaha raha nikoran̈in’i Paoly in̈y. Voanalohany antsendriky, mila azontsika antoko tsara fa ten̈a fitondran-ten̈an’olo ‘tsy man̈eky anarin̈y’ ankitin̈y izio. Paoly tsy nikoran̈a momba olo tsy mitovy raha iken’ny eritreritry na safidy manokan̈a amintsika. Izio koa tsy momba irô olo nan̈ano raha nampameloko atsika. Fa raha tian’i Paoly koran̈iny io, irô olo kinia tsy nan̈araka torohevitry mazava baka amy Volan̈a Zan̈ahary.

Amy ziôty, izikoa atsika mahita mpiara-manompo manan̈a toe-tsain̈y tsy man̈araka volan̈a karaha zen̈y, a atsika fo hanapa-kevitry tsy hiaraka aminany lera fiarahan̈a mikoran̈a na fangalan̈a diandian̈a. Fanapahan-kevitrintsika manokana raha zen̈y, ke tsy tôkony hikoran̈intsika amin’olo hafa, ankoatran’ny fianakavian̈antsika tran̈o araiky ao. Fa atsika ndraiky mbala mifanerasera amin’olo io fo lera mivory ndreky manompo. Lera izy miova, atsika efa mimpody mifanerasera mare aminany karaha taloha koa.