1. Ino raha tsapan’olo sasany, izikoa irô fa mandeha mitory? (Zahava koa sary.)

 ATSIKA io vahoakan’i Jehovah, ke atsika mitory amin’olo, fôtony atsika tia Babantsika an-dan̈itry an̈y io ndreky tihan̈ampy olo hahay izy. Maro mpitory ten̈a mahita haravoan̈a izikoa fa mandeha mitory. Fa amin’olo sasany ndraiky, mety sarotro amindrô mahita haravoan̈a amizio. Sasany amindrô io baka mety ho men̈atra ndreky tsy matoky ten̈a. Sasany ndraiky mety mahatsiaro tsy mahazo ain̈y izikoa mandeha an-tran̈on’olo kanefa tsy nikahian’ny tompin-tran̈o. Misy koa mavozo tsao tôjy olo manohitry. Fa sasany ndraiky mavozo mitory isaka tran̈o, fôtony mavozo tsao hampameloko olo. Ke irô rahalahy ndreky ranabavy aby io ndray ten̈a tia Jehovah, hitandrô sarotro mikoran̈a vaovao tsara io amin’olo tsy haindrô. Fa kanefa ndraiky, haindrô fa raha ten̈a maventy asa fitorian̈a ke irô mbala tsy vôly mitory fo. Ten̈a mamparavoravo Jehovah raha ataondrô zen̈y!

2. Izikoa sarotro aminao mahita haravoan̈a amy fanompoan̈a, nan̈ino anao tsy tôkony ho kivy?

² Asa anao mba mahatsiaro koa fa sarotro mahita haravoan̈a izikoa anao fa mandeha mitory, karaha nataondrô mpitory sasany tiô in̈y? Izikoa ia valiny, aza kivy. Matoa anao tsy matoky ten̈a, zen̈y mivolan̈a fa anao manetry ten̈a. Ke anao tsy mifantoko amin’ny ain̈inao tômpiny, aviô tsy tianao koa himalo amin’olo. Aviô tsisy olo tihan̈ano raha hampameloko olo, intsaka eky izikoa fa mikoran̈a raha tsara amin’olo. Babanao an-dan̈itry an̈y mahay tsarabe raha mahazo anao zen̈y, aviô izy ten̈a tihan̈ampy anao. (Isaia 41:13) Ke amy lahatsoratra ty, atsika handiniky sôso-kevitry dimy mety han̈ampy atsika amy raha jiaby mety hampasarotro atsika hahita haravoan̈a amy fanompoan̈a  ndreky han̈ampy atsika ho ravoravo izikoa fa manompo.

MANGALÀ ANGÔVO BAKA AMY VOLAN̈A ZAN̈AHARY

3. Akôry nataon’i Jeremia, baka izy nahavita nitory tamin’olo?

³ Letrizay hafatra an̈atin’ny volan̈a Zan̈ahary io, efa nankahery mpanomponany izikoa fa misy asa sarotro nampan̈anaovin’i Jehovah irô. Zahava fo baka ohatra, mpaminan̈y Jeremia. Nisalasala izy tamy Jehovah nan̈amia andraikitry izy hitory. Jeremia nivolan̈a: “Zaho olo tsy mahay mivolan̈a, fôtony zaho mbala tsaiky.” (Jer. 1:6) Fa karakôry nataony izikoa izy fa tsy natoky ten̈a karaha zen̈y? Izy nangala angôvo baka tamy Volan̈a Zan̈ahary. Karaha ty nivolan̈iny tafaran’izin̈y: “Volan̈a Zan̈ahary io miran̈a môtro nafody an̈aty taholan̈anaka. Kajo zaho mitana izio.” (Jer. 20:8, 9) Jeremia ndray nahazo faritany sarotro nitorian̈a, hafatra nikoran̈iny tamin’olo io nan̈amia izy angôvo nilainy nahavitany asa io.

4. Ino vokany izikoa atsika mamaky volan̈a Zan̈ahary ndreky misaintsain̈y izio? (Kolosianina 1:9, 10)

⁴ Kristianin̈y amy ziôty koa mahazo angôvo ilaindrô baka amy Volan̈a Zan̈ahary amy Baiboly ao. Apostoly Paoly koa fa nanoratra tamy Kristianin̈y ta Kolosia tan̈y, izy nivolan̈a fa fahaizan̈a ny marin̈y nandrisiky irô rahalahiny aby io “handeha mendriky Jehovah”, irô koa mbala “mamokatra fo amin’ny asa tsara jiaby.” (Vakia Kolosianina 1:9, 10.) An̈isan’ny asa tsara zen̈y, fitorian̈a vaovao tsara. Ke izikoa atsika mamaky Baiboly ndreky misaintsain̈y raha koran̈in’izio, hahaifatatra fo finoan̈antsika. Hahaihatoky Jehovah fo koa atsika, aviô hanjary raha ten̈a maventy amintsika koa fan̈ambaran̈a Fanjakan̈an’ny Zan̈ahary io amin’olo.

5. Karakôry hazahoantsika hatsaran̈a faran’ny maro izikoa mamaky ndreky mianatra Baiboly?

⁵ Baka atsika hahazo hatsaran̈a faran’ny maro baka amy Volan̈a Zan̈ahary io, atsika tsy tôkony ho mekimeky izikoa fa mamaky, mianatra aviô mangala onon̈o raha koran̈in’izio. Mangalà fotoan̈a ampy tsarabe. Aviô izikoa anao mahita andininy araiky hitanao karaha sarotro azo dikany, aza ialan̈a karaha io fo. Mampiasà Fanondroana Bokin’ny Vavolombelon’i Jehovah na Fitaovana Fikarohana ho An’ny Vavolombelon’i Jehovah baka hahitanao fan̈azavan̈a momba andininy io. Izikoa ampy tsarabe fotoan̈a an̈anaovanao fianaran̈a, hahaihatoky anao fa  marin̈y ankitin̈y Volan̈a Zan̈ahary. (1 Tes. 5:21) Ke izikoa anao resy lahatra fa izio ten̈a marin̈y, hahaiho tianao fo hikoran̈a amin’olo raha nianaranao tao.

MAN̈OMÀN̈A TSARABE KOA FA HANOMPO

6. Nan̈ino ma atsika tôkony han̈oman̈a tsarabe izikoa fa hanompo?

⁶ Izikoa anao man̈oman̈a tsarabe koa fa hanompo, anao hahazo ain̈y tsarabe izikoa fa mikoran̈a amin’olo. Jesosy nan̈ampy mpianatranany nan̈oman̈a alohan’izy nandefa irô nanompo. (Lioka 10:1-11) Raha nampianarin’i Jesosy irô narehandrô tsarabe. Irô nahavita raha maro, ke ten̈a namparavoravo irô raha zen̈y.​—Lioka 10:17.

7. Ino raha mety hataontsika izikoa atsika fa man̈oman̈a handeha hanompo? (Zahava koa sary.)

⁷ Akôry mety hataontsika izikoa fa man̈oman̈a fanompoan̈a? Mila dinihintsika tsialohaloha ino raha hikoran̈intsika, aviô ataontsika amy fivolan̈anantsika izio. Aviô man̈ampy mare koa mandiniky tsialohaloha raha aroe na telo mety hivolan̈in’olo amy faritany an̈y, aviô efa mieritreritry akôry fomba mety hamaliantsika izio. Ke izikoa atsika fa man̈aton̈o olo hikoran̈a amindrô, atsika mifen̈y tsy havozovozo, mitokitokiky, aviô tsy mihafahafa.

8. Ino ivolan̈ana fa Kristianin̈y jiaby karaha sajoa tanimanga nivolan̈in’ny apostoly Paoly tamy fan̈oharan̈a nataony in̈y?

⁸ Tamin’ny apostoly Paoly nikoran̈a tamindrô mpiara-manompo aby io momba andraikitrintsika amin’ny asa fitorian̈a io, izy nivolan̈a: ‘Manan̈a harian̈a an̈atin’ny vilan̈y tany atsika.’ (2 Kor. 4:7) Ino ma harian̈a io? Izio hafatra mamonjy fahin̈anan’olo, tsy ino zen̈y fa asa fitorian̈a Fanjakan̈an’ny Zan̈ahary. (2 Kor. 4:1) Ino amy zay ma vilan̈y tany io? Izio man̈ambara mpanompon’ny Zan̈ahary mitory vaovao tsara io amin’olo. Tamy faha Paoly tan̈y, irô mpiravotro aby io nampiasa sajoa vita tamy tanimanga hitondrasan̈a raha maro valera, karaha ataon’ny hanin̈y, divain ndreky vola. Mira zen̈y koa ataon’i Jehovah. Izy nan̈apetraka fatokisan̈a tamintsika amy raha araiky ten̈a valera, tsy ino zen̈y fa vaovao tsara. Ke nohon’i Jehovah man̈ampy, atsika afaka hahazo angôvo ilaintsika han̈ambaran̈a vaovao tsara io amin’olo ndreky tsy hivadihan̈a amy Jehovah. Atsika hahazo angôvo baka hahavitantsika hanohy hitory fo.

 MIVAVAHA BAKA HANAN̈A KORAZY

9. Ino raha han̈ampy atsika handresy fahavozoan̈a olo? (Zahava koa sary.)

⁹ Ndraikindraiky atsika mavozo tsao fo olo hanohitry atsika na tsao tsisy olo hitandren̈y atsika. Ino han̈ampy atsika handresy tahotro karaha zen̈y? Diniha baka vavaka nataondrô apostoly aby io, irô koa fa tsy nimboan̈a nitory. Irô tsy nan̈eky resin’ny tahotro, fa irô niangavy Jehovah baka izy han̈ampy irô ‘hasaky mare hitory volan̈anany fo.’ Direkty nivalin’i Jehovah vavakandrô zen̈y. (Asa. 4:18, 29, 31) Ke izikoa atsika ndraikindraiky mavozo mandeha mitory nohon’ny fahavozoan̈a olo, atsika koa tôkony hivavaka amy Jehovah, baka izy han̈ampy atsika. Angataha Jehovah han̈ampy anao hahaiho tia olo fo, baka anao tsy havozo hikoran̈a amindrô vaovao tsara.

10. Akôry han̈ampian’i Jehovah atsika baka atsika hahavita hikoran̈a raha momba izy amin’olo? (Isaia 43:10-12)

¹⁰ Jehovah nanendry atsika ho Vavolombelon̈onany, aviô koa izy nampan̈anten̈a fa han̈ampy atsika baka atsika hanan̈a korazy. (Vakia Isaia 43:10-12.) Diniha baka irô fomba efatra an̈anaovany raha zen̈y. Voanalohany, Jesosy miaraka amintsika isaka atsika mitory vaovao tsara io amin’olo. (Mat. 28:18-20) Faharoe, Jehovah nan̈iraka anjely han̈ampy atsika. (Apok. 14:6) Fahatelo, Jehovah man̈amia atsika fan̈ahy masin̈inany han̈ampy atsika hahazo onon̈o raha nianarantsika. (Jaona 14:25, 26) Fahefatra, Jehovah nan̈amia irô rahalahy ndreky ranabavintsika aby io hiaraka hiasa amintsika. Ke nohon’ny fan̈ampian’i Jehovah ndreky irô rahalahintsika be fitiavan̈a aby io, anan̈antsika raha jiaby hahafahantsika hanan̈a korazy ndreky hahavita hanohy hitory fo.

ATAOVA MIFAN̈ARAKA AMY RAHA ILAIN’OLO AVIÔ MAHAIZA MIZAHA LAFY TSARAN-DRAHA

11. Akôry mety ahitanao olo maro izikoa fa mandeha mitory? (Zahava koa sary.)

¹¹ Kivy ma anao izikoa olo vitsy fo tatranao an-tran̈o lera anao mitory? Anao ohatra mety tafan̈ontany ten̈a: ‘Mandeha aia ma olo amy faritaninaka amy fotoan̈a iziôty?’ (Asa. 16:13) ‘Mandeha miasa ma irô sa mandeha mivanga raha?’ Izikoa karaha zen̈y, tsao fo mba man̈ano fitorian̈a amy lalan̈a ten̈a ahitanao olo? Misy rahalahy araiky, Joshua an̈aranany, nivolan̈a karaha ty: “Zaho nan̈araraotro nitory  tamin’olo fanôjy zaho, izikoa zaho fa nandeha bazary ndreky tamy zaridaim-panjakan̈a.” Izy ndreky Bridget koa nahita olo maro, izikoa fa nandeha nitory arivariva na koa dimansy folakandra.​—Efes. 5:15, 16.

12. Akôry hahaizantsika raha inoan’olo na raha mampiasaloha olo?

¹² Izikoa olo itorianao tsy dia lian̈a amin’ny hafatra koran̈inao, diniha ino raha inoany ndreky raha mampiasaloha izy. Joshua ndreky Bridget nampiasa fan̈ontanian̈a amy fôn̈on’ny trakty nampidirandrô koran̈a. Ohatra, irô nampiasa trakty Ino ma Fahaizanao Baiboly? Karaha ty nivolan̈indrô tamin’olo io: “Misy olo mivolan̈a fa Baiboly io baka amy Zan̈ahary, fa sasany ndreky tsy karaha zen̈y. Akôry hevitrinao?” Raha karaha zen̈y matetiky mandrisiky olo hikoran̈a.

13. Nata olo tsy mitandren̈y lera atsika mitory, nan̈ino atsika mahômby fo? (Ohabolana 27:11)

¹³ Izikoa atsika fa mandeha mitory, efa takatrantsika fo tanjon̈ontsika, nata tsy mitandren̈y atsika olo itoriantsika. Nan̈ino? Fôtony efa vitantsika nan̈ano raha nirahin’i Jehovah ndreky Zanany hataontsika. Atsika baka efa nitory. (Asa. 10:42) Baka iô nata atsika tsy mahita olo tihikoran̈a na olo tsy mijery hafatra koran̈intsika, atsika afaka ho ravoravo fo fôtony haintsika fa ravoravo amintsika Babantsika an-dan̈itry an̈y.​—Vakia Ohabolana 27:11.

14. Nan̈ino atsika afaka ho ravoravo fo izikoa fa misy mpitory namantsika araiky mahita olo lian̈a amy faritany an̈y?

¹⁴ Afaka ho ravoravo koa atsika izikoa mpitory namantsika mahita olo lian̈a. Asa ataontsika io ampran̈in’ny Tilikambo Fiambesan̈a amy fitadiavan̈a tsaiky very. Maro olo mitady tsaiky io ke mandeha mitsakaraka izy amy tany jiaby. Fa tsaiky io koa fa hita, tsy olo nahita izy fo ravoravo fa olo jiaby nitady izy koa. Karaha zen̈y koa, olo jiaby amy fiangonan̈a samy man̈ampy, baka olo araiky hanjary mpianatran’i Jesosy Kristy. Aviô baka hahafahan̈a mankefa faritanin’ny fiangonan̈a, olo jiaby samy ilain̈a aby. Aviô olo jiaby ravoravo izikoa fa misy olo vaovao mandeha mivory.

MIFANTOHA AMY FITAVANAO JEHOVAH NDREKY FITIAVANAO OLO

15. Nan̈ino han̈ampy atsika ho ravoravo amy fanompoan̈a fan̈arahan̈a raha koran̈in’ny Matio 22:37-39? (Zahava koa sary amy )

¹⁵ Hahaihitombo fo hafanam-pôntsika amin’ny asa fitorian̈a izikoa atsika mifantoko amy fitiavantsika  Jehovah ndreky amy fitiavantsika olo. (Vakia Matio 22:37-39.) Iritrireta hely baka karakôry haravoan̈an’i Jehovah izikoa izy mahita atsika man̈ano asa io, aviô karakôry haravoan̈an’olo izikoa irô fa manomboko mianatra Baiboly! Iritrireta koa hatsaran̈a ho azon’olo man̈eky hafatra torintsika, ke manapa-kevitry hanompo Jehovah. Irô hiain̈y mandrakizay.​—Jaona 6:40; 1 Tim. 4:16.

16. Akôry hahavy atsika ho ravoravo fo amy fanompoan̈a, atsika koa fa tsy afaka miboaka tran̈o? Man̈ameza ohatra.

¹⁶ Misy raha ma misakana anao tsy afaka hiboaka tran̈o? Izikoa zen̈y, mifantoha amy raha han̈ampy anao han̈aboaka fitiavanao Jehovah ndreky fitiavanao olo. Tamy valan̈aretin̈y tamy COVID-19, Samuel ndreky Dania vadiny, tsy afaka niboaka tran̈o. Tan̈atin’ny fotoan̈a sarotro in̈y, irô matetiky nitory tamy telefony, nitory tamy taratasy aviô nampianatra Baiboly baka tamy Zoom. Samuel koa natetiky nitory tamin’olo fanôjy izy ta lôpitaly, fôtony izy tsy maintsy nan̈araka fitahan̈a nohon’ny kansera navoa izy. Ho izy: “Atsika koa fa miatriky raha sarotro, atsika mety hiasaloha mare, mety ho kajo, aviô mety hihen̈y koa finoan̈antsika. Ke atsika mila mitady haravoan̈a baka amy fanompoan̈a Jehovah.” Tan̈atin’ny valan̈aretin̈y be in̈y Dania tsy afaka nihetsiky tan̈abo fandrian̈a tan̈atin’ny telo fanjava. Baka iô izy nila nandeha tamy sezy misy laroa tan̈atin’ny tsiota fanjava. Ho izy: “Nifen̈y zaho nan̈ano zay raha mbala mety ho vitako. Zaho nahavita nitory tamy man̈angy mpiasan’ny fahasalaman̈a nitsidiky zaho, aviô zaho koa nikoran̈a tamy zay olo nan̈atriky raha tan-tran̈o tatỳ. Zaho koa afaka nikoran̈a tsara tamy telefony, tamy man̈angy araiky niasa tamy tany mpandafo aody.” Samuel ndreky Dania ndray tsy nahavita raha maro karaha fataondrô taloha, irô nan̈ano zay raha mbala mety ho vitandrô, ke namparavoravo irô raha zen̈y.

17. Akôry hahavy atsika hahazo hatsaran̈a tsarabe baka amindrô sôso-kevitry tamy lahatsoratra ty?

¹⁷ Mifen̈a han̈araka irô sôso-kevitry jiaby dimy tamy lahatsoratra ty. Irô io mira raha tsiaraikiaraiky atao amin’ny hanin̈y mampasiro izy, lera mandoky in̈y. Fa kanefa, lera raha aby io miaraka aharo an̈aty ao, hasiro tsarabe hanin̈y aloky io. Karaha zen̈y koa, izikoa arehantsika irô sôso-kevitry jiaby nikoraniny tato in̈y, ho vitantsika handresy raha mampakivy atsika. Hahaihahita haravoan̈a fo koa atsika izikoa fa manompo.