1. Karakôry nandaminan̈a vahoakan’i Jehovah tamy taonjato voanalohany?

 IZIKOA fa misy raha irahin’i Jehovah hataon’ny vahoakanany, tiany izio atao amy fomba milamin̈y tsara. (1 Kor. 14:33) Ohatra, sitrapôn’ny Zan̈ahary hitorian̈a vaovao tsara eran-tany. (Mat. 24:14) Jehovah nan̈iraka Jesosy hitariky asa io. Ke nataon’i Jesosy azo antoko tsara fa nilamin̈y tsarabe fomba an̈anaovan̈a izio. Tamy taonjato voanalohany, izikoa fa nifôron̈o fiangonan̈a maromaro tamy tany maromaro, nisy anti-pan̈ahy voatendry nan̈amia tari-dalan̈a ndreky nitariky fiangonan̈a. (Asa. 14:23) Ta Jerosalema fo foiben’ny fivavahan̈a kristianin̈y tamy zen̈y. Tan̈y nisy anti-pan̈ahy maromaro, an̈isan’izen̈y irô apostoly ndreky lelahy maromaro, nangala fanapahan-kevitry nila narehan’ny fiangonan̈a jiaby. (Asa. 15:2; 16:4) Irô nan̈araka tari-dalan̈a namian̈a irô, ke vokany, “nahainatanjaka fo finoan̈andrô fiangonan̈a aby io, baka iô nahainaro fo irô.”​—Asa. 16:5.

2. Rango tamin’ny 1919, karakôry nataon’i Jehovah nan̈amia hanin̈y ara-pan̈ahy ndreky tari-dalan̈a vahoakanany?

² Mbala ataon’i Jehovah voalamin̈y tsara fo vahoakanany, firaka amy ziôty. Rango tamin’ny 1919, Jesosy nampiasa lelahy vitsivitsy voahosotro, handamin̈y asa fitorian̈a ndreky han̈amia hanin̈y ara-pan̈ahy irô mpan̈ara-dia izy aby io. a (Lioka 12:42) Azo antoko fa Jehovah nitahy asa nataondrô io.​—Isaia 60:22; 65:13, 14.

3-4. a) Hazavà amin’ny ohatra nan̈ino mahatsara atsika voalamin̈y tsara io. b) Ino raha hidinihintsika amy lahatsoratra ty?

³ Izikoa atsika tsy voalamin̈y tsara, tsy ho vitantsika han̈ano asa nan̈irahan’i Jesosy atsika. (Mat. 28:19, 20) Diniha hely baka. Mety efa matetiky iasan̈a faritany sasany, baka iô mety  ho hisy mpitory maro mimpodimpody hiasa aminany iô. Fa faritany sasany ndraiky mety tsiary hitorian̈a foeky. Fa asa mbala misy raha hafa koa hitanao, mahatsara atsika voalamin̈y tsarabe io?

⁴ Tamy Jesosy tambony tany teto, nataony voalamin̈y tsara mpan̈ara-dia izy. Firaka iziôty koa, mbala ataony voalamin̈y tsara koa vahoakan’ny Zan̈ahary. Amy lahatsoratra ty, atsika handiniky ohatra nambelan’i Jesosy, ndreky karakôry han̈arahan’ny fandaminan̈antsika zen̈y amy ziôty. Hidinihintsika koa, akôry han̈aboahantsika fa atsika matoky fandaminan̈an’i Jehovah.

FANDAMINAN̈ANTSIKA MAN̈ARAKA MÔDELY NAMBELAN’I JESOSY

5. Ino fomba araiky han̈arahantsika môdelin’i Jesosy? (Jaona 8:28)

⁵ Nianaran’i Jesosy baka tamy Babany an-dan̈itry an̈y, ino raha tôkony hatao ndreky hivolan̈iny. Fandaminan̈an’i Jehovah koa man̈araka môdely nambelan’i Jesosy, ke mampiasa Volan̈a Zan̈ahary baka han̈ampian̈a atsika hahay han̈avaka ny tsara ndreky ratsy, baka iô han̈amezan̈a tari-dalan̈a harehantsika amy fiain̈ana. (Vakia Jaona 8:28; 2 Tim. 3:16, 17) Matetiky koa atsika ampatsiarôvin̈y, hamaky ndreky han̈araka Volan̈a Zan̈ahary. Nan̈ino mahatsara atsika man̈araka torohevitry zen̈y?

6. Ino fomba araiky maventy hahafahantsika mahazo hatsaran̈a izikoa fa mianatra Baiboly?

⁶ Maro koa hatsaran̈a azontsika, izikoa atsika mampiasa boky ndreky gazetintsika aby io, izikoa fa mianatra Baiboly. Ohatra, mety hampiran̈intsika amy raha koran̈in’ny Baiboly tari-dalan̈a azontsika baka amy fandaminan̈a. Mahaimatoky fandaminan̈an’i Jehovah fo atsika, izikoa fa hitantsika fa mifan̈araka tsarabe amy Soratra Masin̈y tari-dalan̈a azontsika.​—Rom. 12:2.

7. Ino ma hafatra nikoran̈in’i Jesosy tamin’izy nitory, aviô karakôry han̈arehan’ny fandaminan̈an’i Jehovah môdelinany zen̈y?

⁷ Jesosy “nitory vaovao tsara momba Fanjakan̈an’ny Zan̈ahary.” (Lioka 4:43, 44) Jesosy koa nan̈iraka mpianatranany han̈ambara raha momba Fanjakan̈a io. (Lioka 9:1, 2; 10:8, 9) Amy ziôty, olo jiaby an̈isan’ny fandaminan̈an’i Jehovah samy mitory hafatra momba Fanjakan̈a io aby, na aia na aia tany misy irô, aviô na ino na ino andraikitrindrô an̈atin’ny fandaminan̈a.

8. Ino voninahitry namian̈a atsika?

⁸ Ten̈a voninahitry amintsika man̈ambara amin’olo fahamarin̈ana momba Fanjakan̈an’ny Zan̈ahary io! Tsy olo jiaby baka manan̈a tombontsoa han̈ano izio. Ohatra, tamy Jesosy tambony tany teto, irô demony aby io tsy nimboany nan̈ambara raha momba izy tamin’olo. (Lioka 4:41) Amy ziôty koa, alohan’ny olo araiky mahazo mitory miaraka amy vahoakan’i Jehovah, izy tsy maintsy manan̈a fiain̈ana mamparavoravo Jehovah antsendriky. Izikoa atsika mifen̈y fo mitory amin’olo isaka atsika afaka man̈ano zen̈y ndreky na aia na aia, zen̈y an̈aboahantsika fa ten̈a raha maventy amintsika asa io. Tiantsika han̈ano karaha Jesosy, ke atsika man̈ano erakan’ny vitantsika mitory ndreky mampianatra olo fahamarin̈ana.​—Mat. 13:3, 23; 1 Kor. 3:6.

9. Akôry nataon’ny fandaminan̈a baka an̈aran̈an’ny Zan̈ahary ho hain’olo?

⁹ Jesosy nan̈ambara an̈aran̈an’ny Zan̈ahary. Tamy vavaka nataony tamy Babany tan-dan̈itry tan̈y, karaha ty nivolan̈in’i Jesosy: “An̈aranao efa nampianariko irô.” (Jaona 17:26) Karaha nataon’i Jesosy zen̈y, fandaminan̈an’i Jehovah man̈ano erakan’ny vitany han̈ambaran̈a amin’olo an̈aran̈an’ny Zan̈ahary. Ten̈a nahafahan̈a nan̈ano zen̈y iziôty, Ny Soratra Masina​—Fandikan-tenin’ny Tontolo Vaovao, fôtony  an̈aran̈an’ny Zan̈ahary io nampody amy toeran̈a tôkony hisy izy tamy voanalohany tan̈y. Fandikan-teny araiky io, na izy feno na tapany aminany io, efa misy amy volan̈a mandilatra 270. Amy Fanazavana Fanampiny A4 ndreky A5 amy fandikan-teny io, misy fan̈azavan̈a mahampy tsarabe momba fan̈ampodianan̈a an̈aran̈an’ny Zan̈ahary amy tany tôkony hisy izy, amy Baiboly ao. Misy Fan̈azavan̈a Fan̈ampiny C koa amy Baiboly Fianaran̈a (fransay). Izio man̈amia porofo mahampy tsara fa an̈aran̈an’ny Zan̈ahary tôkony himpody in-237 amy Soratra Griky Kristianin̈y ao.

10. Ino raha ianaranao baka amy tantaran’ny man̈angy araiky mipetraka a Myanmar?

¹⁰ Karaha Jesosy, tiantsika koa han̈ampy olo maro baka hahay an̈aran̈an’ny Zan̈ahary io. Misy man̈angy araiky 67 taon̈o mipetraka a Myanmar an̈y tafitomoan̈y, izikoa fa nianatra momba an̈aran̈an’ny Zan̈ahary io. Karaha ty ho izy: “Rango niain̈ako, sambako tamy ty naharen̈y an̈aran’ny Zan̈ahary Jehovah zen̈y. ... Ten̈a raha maventy raha nampianarinarô zaho ty.” Hitantsika baka amy zen̈y fa man̈ova mare fiain̈anan’olo fahaizandrô an̈aran̈an’ny Zan̈ahary io.

MIFEN̈A FO MAN̈ABOAKA FA ANAO MATOKY FANDAMINAN̈ANTSIKA

11. Akôry an̈aboahandrô anti-pan̈ahy aby io fa irô matoky fandaminan̈an’i Jehovah? (Zahava koa sary.)

¹¹ Ino ohatra, fomba araiky han̈aboahandrô anti-pan̈ahy aby io fa irô matoky fandaminan̈an’ny Zan̈ahary? Lera irô mahazo tari-dalan̈a baka amy fandaminan̈a, irô mila mamaky tsarabe ndreky man̈ano erakan’ny vitandrô han̈arahan̈a izio. Tsy tari-dalan̈a momba fan̈anaovan̈a asa fitorian̈a ndreky vavaka fo azondrô fa irô koa mahazo tari-dalan̈a momba fikarakaran̈a ôndrikôndrikin’i Kristy. Ke izikoa anti-pan̈ahy man̈araka tsarabe tari-dalan̈a jiaby azondrô baka amy fandaminan̈a, ho tsapandrô rahalahy ndreky ranabavy aby io fa Jehovah tia irô ndreky mikarakara irô.

12. a) Nan̈ino atsika tôkony hiaraka hiasa amindrô rahalahy mitariky atsika aby io? (Hebreo 13:7, 17) b) Nan̈ino atsika tôkony hifantoko amy toetry tsarandrô rahalahintsika aby io?

¹² Fa karakôry ndraiky tôkony hataontsika izikoa atsika fa mahazo tari-dalan̈a baka amin’ny anti-pan̈ahy? Atsika tôkony ho vôn̈ono han̈araka zen̈y. Izikoa atsika man̈ano karaha zen̈y, ho moramora amindrô rahalahy mitariky atsika aby io han̈ano asandrô. Sady Baiboly lastiô man̈iraka atsika han̈araka volan̈a ndreky han̈eky irô rahalahy mitariky atsika aby io. (Vakia Hebreo 13:7, 17.) Fa ndraikindraiky raha zen̈y mety tsy ho mora. Nan̈ino? Fôtony irô olombelon̈o tsy lavorary. Fa izikoa hadisovan̈andrô fo zahavantsika fa tsy toetry tsarandrô, hanjary hitahitahy irô fahavalontsika aby io atsika. Amy fomba akôry? Atsika hanjary tsy ten̈a hatoky fandaminan̈an’ny Zan̈ahary. Kanefa zen̈y edy raha tiandrô mpanohitry aby io havian̈a. Ino raha tôkony hataontsika baka atsika hahay ndreky tsy han̈eky vandy ataondrô mpanohitry aby io?

AZA AMBELA OLO HAMPIHEN̈Y FATOKISANAO FANDAMINAN̈A

13. Akôry ataondrô fahavalon’ny vahoakan’ny Zan̈ahary aby io mankaratsy fandaminan̈an’ny Zan̈ahary?

¹³ Tiandrô fahavalon’ny Zan̈ahary aby io han̈ano raha hahavy atsika hieritreritry raha tsara amy fandaminan̈a karaha raha ratsy in̈y. Ohatra, nianarantsika tamy Soratra Masin̈y fa tian’i Jehovah mpanomponany hadio vatan̈a, fitondran-ten̈a, baka io amy lafiny fivavahan̈a. Zan̈ahary koa mivolan̈a fa tôkony hiroasin̈y tsy ho an̈isan’ny fiangonan̈a, lan̈iany man̈ano fahotan̈a maventy kanefa tsy mety mibebaka. (1 Kor. 5:11-13; 6:9, 10) Fa nohon’ ny atsika man̈araka raha koran̈in’ny Soratra Masin̈y zen̈y, irô mpanohitry aby io mivolan̈a fa atsika zen̈y tsy tia olo, mitsaratsara olo, baka iô zen̈y tsy mandefitry amin’olo.

14. Azôvy ma ten̈a tompin’ny famoron̈ana vandy momba fandaminan̈a io?

¹⁴ Aleva onon̈o azôvy ten̈a mankaratsy atsika io. Satana Devoly fo mamôrompôron̈o raha tsy marin̈y jiaby momba fandaminan̈a io. Izy baka “baban’ny vandy.” (Jaona 8:44; Gen. 3:1-5) Ke atsika tsy gaga izikoa izy mampiasa irô mpanohan̈a izy aby io hamôron̈o vandy momba fandaminan̈an’i Jehovah. Zen̈y iziô raha nahazo Jesosy ndreky irô Kristianin̈y tamy taonjato voanalohany tan̈y.

15. Ino ma raha nataondrô mpitariky fivavahan̈a aby io tamy Jesosy ndreky tamindrô mpan̈ara-dia izy aby io?

¹⁵ Tamy taonjato voanalohany, tsisy vandy tsy niforôn̈indrô olon’i Satana aby io momba Jesosy, nata izy Zanaka Zan̈ahary ndreky nahavita fahagagan̈a maro. Ohatra, irô mpitariky fivavahan̈a aby io nivolan̈a tamin’olo fa baka tamy “sefon’ny demony aby io” zen̈y nahavitan’i Jesosy nan̈adoso demony. (Mar. 3:22) Baka iô Jesosy koa fa nitsarain̈a, irô mpitariky fivavahan̈a aby io nivolan̈a fa izy zen̈y nanihitihy Zan̈ahary. Ndray irô aby nandresy lahatra vahoaka, baka Jesosy hivonen̈a. (Mat. 27:20) Tafaran’izin̈y koa, irô mpan̈ara-dia Jesosy aby io koa fa nitory vaovao tsara, irô mpanohitry aby io ‘nandrisiky ndreky nitaon̈o olo’ hanohitry irô Kristianin̈y aby io. (Asa. 14:2, 19) Momba raha koran̈in’ny Asan’ny Apostoly 14:2, karaha ty raha volan̈in’ny Tilikambo Fiambesan̈a 1 Desambra 1998: “Irô Jiosy mpanohitry aby io tsy vitany tsy nan̈eky hafatra nitorindrô Kristianin̈y aby io fo fa irô koa nan̈aparitaka tsaho nankaratsy irô Kristianin̈y aby io, baka irô hafa firenena aby io tsy hitandren̈y irô.”

16. Ino raha tsy mila hadin̈antsika, izikoa atsika maharen̈y tantara tsy marin̈y?

 ¹⁶ Tsy tamy taonjato voanalohany fo Satana namôron̈o vandy karaha zen̈y. Iziôty, izy mbala “mamitaka tany jiaby misy olo” koa. (Apok. 12:9) Ke izikoa anao maharen̈y vandy momba fandaminan̈a ndreky irô rahalahintsika mitariky aby io, aleva onon̈o raha nataon’ny fahavalon’ny Zan̈ahary tamy Jesosy ndreky tamy mpan̈ara-dia izy tamy taonjato voanalohany. Vahoakan’ny Zan̈ahary amy ziôty injehin̈y ndreky amorôn̈ana vandy, erakan’ny raha efa nambaran’ny Baiboly. (Mat. 5:11, 12) Atsika tsy ho voatariky handeha hino vandy zen̈y, izikoa haintsika baka amin-jôvy marin̈y izio, baka iô izikoa atsika man̈ano raha malaky hiarovan̈a ain̈intsika. Ke ino raha tôkony hataontsika?

17. Ino raha tôkony hataontsika baka atsika tsy ho voafandrikin’ny tantara tsy marin̈y? (2 Timoty 1:13) (Zahava koa efajoro “ Akôry Tôkony Hatao Izikoa Sendra Tantara Tsy Marin̈y?”)

¹⁷ Aza mitandren̈y tantara tsy marin̈y. Apostoly Paoly nan̈azava ino raha tôkony hataontsika izikoa atsika sendra maharen̈y tantara tsy marin̈y. Izy nan̈iraka Timoty handrova olo sasany ‘tsy hitandren̈y tantara tsy marin̈y’, baka iô ‘tsy hitandren̈y tantara tsy marin̈y tsy man̈amia voninahitry Zan̈ahary.’ (1 Tim. 1:3, 4; 4:7) Tsaiky iziôty, zay raha hitany mipetrapetraka amy tany ampidiriny am-bava aby jiaby, fa olobe ndraiky tsy mety han̈ano karaha zen̈y. Hainy baka fa mety hankarary izy raha zen̈y. Atsika koa tsy mitandren̈y tantara tsy marin̈y, fôtony haintsika baka amin-jôvy izio. Fa fahamarin̈ana fo raha tandrin̈esantsika, fôtony izio “volan̈a mahatsara atsika.”​—Vakia 2 Timoty 1:13.

18. Akôry han̈aboahantsika fa atsika matoky fandaminan̈an’i Jehovah?

¹⁸ Mbala telo amy fomba maro hangalan’ny fandaminan̈a tahaka Jesosy fo nidinihintsika tiô in̈y. Ke izikoa anao fa mianatra Baiboly, aleva onon̈o fomba hafa hangalan’ny fandaminan̈a tahaka modely nambelan’i Jesosy. Ampia olo amy fiangonan̈anao hatoky tsarabe fandaminan̈a. Baka iô aza vôly man̈aboaka fa anao matoky fandaminan̈a ke mifen̈a fo manompo Jehovah, aviô tsy hiala foeky amy fandaminan̈a ampiasainy han̈atantirahan̈a sitrapônany. (Sal. 37:28) Irarian̈a atsika hankasitraka fo tombontsoantsika miaraka amy vahoakan’i Jehovah be fitiavan̈a, ndreky tsy mivadiky aby io.