1. Ino ma paradisa ara-pan̈ahy zen̈y, aviô tôkony ho tapa-kevitry han̈ino ma atsika?

 EFA misy paradisa feno olo varian̈a man̈ano raha tsara ambony tany eto amy ziôty. An-tapitrisany olo ao sady ten̈a mihavan̈a. Lan̈iany olo efa an̈aty ao tapa-kevitry tsy hiala ao eky. Irô koa man̈iry hitaon̈o olo maro tsarabe hiaraka amindrô an̈atin’ny toeran̈a miavaka io. Ino ma izio? Paradisa ara-pan̈ahy! a

2. Ino ma raha mahagaga momba paradisa ara-pan̈ahy io?

² Ten̈a mahagaga mahay fa Jehovah namôron̈o paradisa karaha zen̈y, amy donian’i Satana feno olo tsy mifankatia, ratsy jery sady mampavozo be ty. (1 Jaona 5:19; Apok. 12:12) Hitan’ny Zan̈aharintsika be fitiavan̈a io raha ratsy mandalo amy donia ty, ke Izy man̈ano raha hahavy atsika ho voaro, baka atsika ho ravoravo manompo Izy. Baiboly man̈azava fa paradisa ara-pan̈ahy io mira toeran̈a araiky “fialofan̈a” voaro ndreky ‘zaridain̈y azon-drano tsara.’ (Isaia 4:6; 58:11) Jehovah mitahy, ke lan̈iany olo an̈atin’ny paradisa io maharen̈y sambatra ndreky voaro, ndray amin’ny andra farany sady sarotro be ty.​—Isaia 54:14; 2 Tim. 3:1.

3. Karakôry nahatantirahan’ny faminanian̈a amin’ny Isaia 65 io tamin’ny andra taloha tan̈y?

³ Jehovah nampiasa mpaminan̈y Isaia, nan̈ambara fiain̈ana amy paradisa ara-pan̈ahy io. Amin’ny Isaia toko faha-​65 ao misy izio. Tamy taon̈o 537 T.K. izio tanteraka voanalohany, tamin’irô Jiosy aby io nafaka baka tamy sesitany ta Babylony ke nody tamy tanindrazan̈andrô. Jehovah nitahy vahoakanany nibebaka aby io, aviô nan̈ampy irô nan̈ôrin̈y ndraiky tanànan’i Jerosalema baka iô nan̈amboatra ndraiky tempoly, foiben’ny fivavahan̈a marin̈y tan Israely.​—Isaia 51:11; Zak. 8:3.

4. Karakôry ahatantirahan’ny Isaia 65 io amin’ny andra iziôty?

 ⁴ Tanteraka fan̈indroeny faminanian̈an’i Isaia io nanomboko tamin’ny 1919, Jehovah koa fa nan̈adoso vahoakanany baka tamy Babylony be. Tafaran’izen̈y, lôso nahainihitatra tsihelihely paradisa ara-pan̈ahy io tambony tany teto. Nazoto nitory irô mpitory hafatra momba Fanjakan̈a io, ke nisy fiangonan̈a maro nifôron̈o. Aviô nan̈aboaka toetry kristianin̈y koa irô. Lan̈iany lelahy ndreky man̈angy kafiry ndreky ratsy fitondran-ten̈a mira biby, nanjary ‘nisikiny toetry vaovao niforôn̈iny mifan̈araka amy sitrapôn’ny Zan̈ahary.’ (Efes. 4:24) Irô fitahian̈a jiaby nikoran̈in’Isaia io, amy donia vaovao amin’ny amaray an̈y vo ten̈a tanteraka. Fa rango iziôty, atsika efa afaka mandray hatsaran̈a maro baka amy paradisa ara-pan̈ahy io. Ino aby ma zen̈y, aviô nan̈ino atsika tsy tôkony hiala ao?

KARAKÔRY OLO AN̈ATIN’NY PARADISA ARA-PAN̈AHY IO?

5. Eraka raha koran̈in’ny Isaia 65:13, ino ma raha mamparavoravo atsika an̈atin’ny paradisa ara-pan̈ahy ao?

⁵ Salama ndreky velombelon̈o. Aboakan’ny faminanian̈an’Isaia io fa ten̈a tsy miran̈a olo an̈atin’ny paradisa ara-pan̈ahy ndreky ambelan̈an’izio. (Vakia Isaia 65:13.) Jehovah man̈amia raha jiaby ilain’ny mpanomponany, baka irô hifandray marikitry aminany. Atsika amiany fan̈ahy masin̈inany, Baiboly, ndreky hanin̈y ara-pan̈ahy treka. Ke atsika afaka ‘mihinan̈a, migiaka, aviô miravoravo.’ (Ampiràn̈a amin’ny Apokalypsy 22:17.) Fa tsy karaha zen̈y ndraiky irô olo ambelan̈an’izio. Irô ‘mosary, sakara, aviô men̈atra.’ Irô tsy mifandray amy Zan̈ahary zen̈y foeky.​—Amosa 8:11.

6. Karakôry ivolan̈an’ny Joela 2:21-24 hanin̈y ara-pan̈ahy azontsika baka amy Jehovah, aviô akôry hazahoantsika hatsaran̈a baka amindrô io?

⁶ Amy faminanian̈an’i Joela ao, izy nampiasa irô raha ilain̈a amy fiain̈ana andavanandra karaha ataon’ny varimbazaha, divain, menaka olivy, baka han̈aboahan̈a fa Jehovah ten̈a han̈amia raha ilain’ny vahoakanany, an̈isan’izen̈y hanin̈y ara-pan̈ahy. (Joela 2:21-24) Ohatra, izy man̈amia atsika Baiboly, boky ndreky gazety, fivorian̈a ndreky fivoriambe, aviô tranonkalantsika. Mahazo hatsaran̈a baka amy raha aby io atsika isan’andra. Vokany, atsika mahaisalama, ndreky velombelon̈o fo.

7. Ino ma raha mahavy atsika manan̈a “fô ravoravo”? (Isaia 65:14)

⁷ Sambatra ndreky afa-pô. Vahoakan’ny Zan̈ahary “ravoravo mare” fôtony irô ten̈a mankasitraka Jehovah. (Vakia Isaia 65:14.) Ten̈a mankahery baka fahamarin̈ana ianarantsika, aviô koa atsika mahazo fankahirezan̈a baka amy Volan̈a Zan̈ahary. Manan̈a fan̈antinan̈a miôrin̈y amy vidim-pan̈avotan̈a nataon’i Kristy koa atsika. Ke raha jiaby zen̈y hahavy atsika hanan̈a fô ravoravo. Mampasambatra atsika mare mikoran̈a irô raha aby io amindrô rahalahy ndreky ranabavintsika!​—Sal. 34:8; 133:1-3.

8. Ino raha aroe maventy mampiavaka paradisa ara-pan̈ahy io?

⁸ Fitiavan̈a ndreky firaisan-tsain̈y misy amy vahoakan’i Jehovah an̈isan’ny raha aroe maventy mampiavaka paradisa ara-pan̈ahy io. “Tady mampifandray” atsika io han̈ampy atsika hahazo sary an-tsain̈y karakôry fiain̈ana amy donia vaovao. Amy zen̈y baka mpanompon’i Jehovah hahaihifankatia ndreky hiray sain̈y fo, lombolombon’ny amy ziôty. (Kol. 3:14) Karaha ty raha nivolan̈in’ny ranabavy araiky tamin’izy voanalohany fanôjy vahoakan’i Jehovah: “Tsiary haiko foeky karakôry miravoravo zen̈y tamy fiain̈ananaka. Fa voanalohan’ny nahitako karakôry ma ten̈a fitiavan̈a zen̈y, tamy zaho voanalohany fanôjy Vavolombelon̈on’i Jehovah.” Fa zay olo tihiain̈y amin’ny hasambaran̈a ndreky haravoan̈a karaha zen̈y, mila miditry  amy paradisa ara-pan̈ahy io. Manan̈a laza tsara fo mpanompon’i Jehovah eran-tany na ino na ino raha iritriretin’olo amy donia ty momba irô.​—Isaia 65:15.

9. Izikoa Isaia 65:16, 17 zahan̈a, hatao karakôry raha mahavy atsika malahelo ndreky mijaly amin’ny andra iziôty?

⁹ Milamin-tsain̈y aviô kalma. Volan̈in’ny Isaia 65:14 fa olo mifidy hidôko ambelan̈an’ny paradisa ara-pan̈ahy ‘hitretre, fôtony malahelo fôndrô, aviô hiafatrafatra, fôtony irô rivan̈a.’ Fa karakôry fo basy irô raha mampijaly ndreky mamparivan̈a vahoakan’ny Zan̈ahary? Teteky iô, irô io efa ‘tsy ho azo onon̈o, aviô hasitriky tsy ho hitan’ny mason’ny Zan̈ahary.’ (Vakia Isaia 65:16, 17.) Hadoson’i Jehovah prôblemontsika jiaby, aviô tsy ho azo onon̈o foeky hirifirin’ny jalintsika baka tamindrô io.

10. Nan̈ino atsika mivolan̈a fa tombontsoa tsisy ambaka izy mifandray amindrô rahalahy ndreky ranabavintsika aby io? (Zahava koa sary.)

¹⁰ Fa nata iziôty, atsika efa mahatsiaro milamin-tsain̈y izikoa fa mandeha mivory. Mahazo ain̈y tsara atsika an̈y ndreky tsy mifantoko amy raha mampiasaloha amy donia ty. Han̈ampy irô rahalahy ndreky ranabavintsika aby io ho kalma fo koa atsika izikoa mifen̈y man̈aboaka toetry vokatran’ny fan̈ahy. An̈atin’izen̈y fitiavan̈a, haravoan̈a, fiadan̈ana, hatsaram-pan̈ahy aviô fahalimian-toetry. (Gal. 5:22, 23) Ravoravo mare atsika fôtony an̈isan’ny tafiditry amy fandaminan̈an’ny Zan̈ahary io! Lan̈iany olo tsy miala amy paradisa ara-pan̈ahy io hahita karakôry hahatantirahan’ny fampan̈antinan̈an’ny Zan̈ahary momba “lan̈itry vaovao ndreky tany vaovao.”

11. Koran̈in’ny Isaia 65:18, 19 fa Jehovah namôron̈o paradisa ara-pan̈ahy. Ino tôkony ho vokan’izen̈y amintsika?

¹¹ Mahay mankasitraka ndreky ravoravo. Azavain’i Isaia ao ino aby irô antony mahavy atsika ‘ravoravo mare’ amy paradisa ara-pan̈ahy ao. Jehovah namôron̈o izio. (Vakia Isaia 65:18, 19.) Tsy mahagaga atsika foeky izikoa Jehovah mampiasa atsika, hitaon̈o olo hiala amy fikambanan̈a amy donia ratsy ty, ke hiditry amy paradisa ara-pan̈ahy tsarabe io! Maharavoravo atsika irô hatsaran̈a maro azontsika, fôtony atsika man̈araka fahamarin̈ana, ke mandrisiky atsika hikoran̈a zen̈y amin’olo.​—Jer. 31:12.

12. Izikoa anao mamaky fampan̈antinan̈a koran̈in’ny Isaia 65:20-24, ino raha tsapanao aviô nan̈ino?

¹² An̈isan’ny raha maharavoravo atsika ndreky ten̈a efa tsy din̈intsika koa, fan̈antinan̈a anan̈antsika nohon’ny atsika mifandray tsara amy Jehovah. Diniha hely raha ho hitantsika ndreky hataontsika lera amy donia vaovao! Karaha ty fampan̈antinan̈an’ny Baiboly: ‘Tsy ho hisy amy tany io foeky zaza velon̈o amin’ny  andra vitsivitsy fo zen̈y ... Aviô tsy hisy olo matoe eky amy zen̈y ke tsy hahatapitry andra iain̈any.’ Atsika amy zen̈y “han̈amboatra tran̈o ndreky hipetraka ao, aviô hamboly rezain ke hihinan̈a vokatra avy amy zen̈y.” Tsy hiasa bôriny eky atsika, fôtony “Jehovah hitahy atsika.” Jehovah mampan̈anten̈a atsika fiain̈ana mahafa-pô, azo antoko, aviô ten̈a misy dikany. “Ndray irô mbala tsendriky mikaiky”, efa hainy raha ilaindrô tsiaraikiaraiky. Aviô “raha jiaby manam-pahin̈ana ho afa-pô amy raha irindrô.”​—Isaia 65:20-24; Sal. 145:16.

13. Akôry han̈ambaran’ny Isaia 65:25 fiovoan̈a ataon’olo izikoa irô manompo Jehovah?

¹³ Mihavan̈a tsarabe ndreky voaro. Maro olo nanan̈a toetry karaha nin’ny biby fa nanjary niova mare, fôtony nampian’ny fan̈ahy masin̈in’ny Zan̈ahary. (Vakia Isaia 65:25.) Nifen̈y mare irô niala tamy toetry ratsindrô. (Rom. 12:2; Efes. 4:22-24) Ndray izy man̈ano zen̈y, vahoakan’ny Zan̈ahary mbala tsy lavorary, ke zen̈y mahavy atsika io mbala mety han̈ano hadisovan̈a fo. Fa kanefa, nataon’i Jehovah mifankatia mare ndreky mihavan̈a tsara “karazan̈an’olo jiaby” ke miray sain̈y irô. (Tit. 2:11) Zan̈ahary faran’ny mahery io zaraiky fo mahavita fahagagan̈a be karaha zen̈y!

14. Izikoa tantaran’ny rahalahy araiky io zahan̈a, akôry ahitan̈a fa marin̈y raha koran̈in’ny Isaia 65:25?

¹⁴ Izio ma olo ten̈a mahavita man̈ova toetry ankitin̈y? Diniha baka tantara araiky ty. Misy tsaiky lelahy araiky efa natetiky nigadra, tamin’izy 20 taon̈o. Izy baka ten̈a ratsy fitondran-ten̈a ndreky kafiry mare. An̈isan’ny raha nampigadra izy, halatra, vaky tran̈o, aviô izy nan̈ano dahalo foeky. Izy tamy zen̈y nitady ady tamin’olo fo. Fa tamy voanalohan’ny izy naharen̈y fahamarin̈ana baka tamy Baiboly, aviô nanomboko niaraka nivory tamy Vavolombelon̈on’i Jehovah, resy lahatra izy fa ten̈a tafiditry an̈atin’ny paradisa ara-pan̈ahy. Lôso tsapany nisy dikany fiain̈ananany. Tafaran’izy vita batisa, natetiky izy nieritreritry fa ten̈a tanteraka taminany raha koran̈in’ny Isaia 65:25. Niova mare baka izy. Olo kafiry be karaha lion in̈y nanjary mora karaha zanakan’ny ôndrikôndriky ndreky ten̈a tia fihavan̈ana.

15. Nan̈ino atsika tihan̈ampy olo faran’ny maro hiditry amy paradisa ara-pan̈ahy io, aviô karakôry han̈anaovantsika zen̈y?

¹⁵ Ty raha voanalohany koran̈in’ny Isaia 65:13: “Ke karaha ty raha nivolan̈in’i Jehovah Tompo Faran’ny An̈abo.” Fa amin’ny andininy faha-25 ndraiky, karaha ty raha volan̈iny farany ao: “Ho Jehovah.” Raha volan̈in’i Jehovah tsy maintsy tanteraka fo. (Isaia 55:10, 11) Ten̈a efa misy paradisa ara-pan̈ahy iziôty. Jehovah namôron̈o fianakavian’ny mpirahalahy ten̈a miavaka. Amy vahoakan’i Jehovah, atsika mahita olo tia fihavan̈ana ndreky ten̈a tia olo, ndray mbala amy donia feno olo kafiry ty. (Sal. 72:7) Zen̈y mahavy atsika tihan̈ampy olo faran’ny maro, hiditry amy paradisa ara-pan̈ahy. Man̈ano zen̈y atsika, izikoa mifantoko amy fan̈anaovan̈a mpianatra.​—Mat. 28:19, 20.

AKÔRY HITAHOMANTSIKA OLO HIDITRY AMY PARADISA ARA-PAN̈AHY?

16. Ino raha mety han̈ampy olo han̈iry hiditry amy paradisa ara-pan̈ahy?

¹⁶ Atsika tsiaraikiaraiky samy afaka man̈ampy olo hiditry amy paradisa ara-pan̈ahy io miaraka amintsika. Hahavita zen̈y atsika izikoa mangala tahaka Jehovah. Izy tsy manery olo hiditry amy fandaminan̈anany. Fa izy ten̈a tsara fan̈ahy “mitaon̈o” olo hiditry ao. (Jaona 6:44; Jer. 31:3) Lan̈iany olo tsara fô ke mianatra raha momba fitiavan’i Jehovah olo, ndreky irô toetrin’i Jehovah maro tsara aby io, manjary voasariky han̈aton̈o izy. Fa karakôry han̈aboahantsika fa atsika manan̈a toetry tsara  ndreky tsara fitondran-ten̈a, baka olo ho voataon̈o amy paradisa ara-pan̈ahy?

17. Akôry hataontsika baka olo ho voasariky hiditry amy paradisa ara-pan̈ahy?

¹⁷ An̈isan’ny fomba araiky hahavitantsika misariky olo hiditry amy paradisa ara-pan̈ahy io, fitiavansika irô rahalahy ndreky ranabavy aby io ndreky hatsaram-pan̈ahy aboakantsika amindrô. Izikoa fa misy olo avy man̈aton̈o fivorian̈a, tiantsika irô hivolan̈a karaha nataondrô olo tsy mpino navy nan̈aton̈o fivorian̈a kristianin̈y ta Korinto taloha tan̈y ty. Irô nivolan̈a: “Aminarô ato ankitin̈y Zan̈ahary.” (1 Kor. 14:24, 25; Zak. 8:23) Ke atsika tsy maintsy mifen̈y ‘mihavan̈a tsarabe amintsika samy atsika.’​—1 Tes. 5:13.

18. Ino raha mety hahasariky olo hiditry amy fandaminan̈antsika?

¹⁸ Tôkony hifen̈y fo atsika baka ho mira amy nin’i Jehovah fomba fahitantsika irô rahalahy ndreky irô ranabavy aby io. Man̈ano zen̈y atsika izikoa mizaha toetry tsarandrô fo, ke tsy mijery toetry ratsindrô. Fôtony nan̈ino? Fôtony toetry ratsindrô io efa hiala tsy ho ela. Koa misy tsy fan̈arahan̈a amintsika samy atsika, atsika mila mifen̈y fo “ho tsara fan̈ahy amy namantsika, hahinakinaka, ndreky ten̈a han̈ambela hadisovan̈a.” (Efes. 4:32) Ho voasariky hiditry amy paradisa ara-pan̈ahy io koa lan̈iany olo man̈iry han̈aboahan̈a fitiavan̈a karaha zen̈y. b

MIDOKOA AN̈ATIN’NY PARADISA ARA-PAN̈AHY

19. a) Izikoa efajoro “ Irô Niala fa Baka tiô Irô Nimpody” zahavan̈a, ino raha nivolan̈in’olo sasany irô koa fa tafimpody tamy paradisa ara-pan̈ahy? b) Tôkony tapa-kevitry han̈ino atsika? (Zahava koa sary.)

¹⁹ Ten̈a mankasitraka paradisa ara-pan̈ahy io atsika! Izio mbala tsara mandilatran’ny  taloha, aviô mahaimaro fo olo midera Jehovah an̈atin’izio ao. Ke irarian̈a atsika tsy vôly hankasitraka paradisa ara-pan̈ahy niforôn̈in’i Jehovah io! Lan̈iany olo tiho velombelon̈o, tihanan̈a fiain̈ana mahafa-pô, tiho kalma ndreky tiho voaro, tsy maintsy miditry amy paradisa ara-pan̈ahy io ndreky tsy mila miala ao foeky. Fa mila mitandrin̈y mare atsika, fôtony Satana man̈ano erakan’ny efany hampialan̈a atsika amy paradisa ara-pan̈ahy io ao. Tsy tôkony hambelantsika handresy foeky izy. (1 Pet. 5:8; Apok. 12:9) Ke irarian̈a atsika hifen̈y mare fo hiaro hatsaran̈a, fahadiovan̈a, ndreky fiadan̈ana misy an̈atin’ny paradisa ara-pan̈ahy io.