1. Tian’i Jehovah han̈ano karakôry ma atsika jiaby?

 RAVORAVO mare raimandreny, izikoa mahazo zanaka. Fa kanefa, irô ndray tia zanakandrô io, tsy tiandrô hidôko tsaiky fo izio fa tiandrô hitombo tsara, ke hanjary olobe. Safe izikoa tsaiky io tsy mitombo foeky, miasaloha mare irô. Tsisy ny hafa amy zen̈y koa ataon’i Jehovah. Ravoravo izy izikoa atsika mifen̈y man̈ano dingana baka hanjary mpianatran’i Jesosy. (1 Kor. 3:1) Fa kanefa, tsy tiany izikoa atsika hidôko amy zen̈y fo. Zen̈y mahavy izy man̈iraka atsika hifen̈y ‘hanjary karaha olobe’, dikan’izen̈y hanjary Kristianin̈y matotro.​—1 Kor. 14:20.

2. Ino aby fan̈ontanian̈a hidinihintsika amy lahatsoratra ty?

² Ino ma dikan’ny Kristianin̈y matotro zen̈y? Karakôry tôkony hataontsika baka atsika hanjary Kristianin̈y matotro? Nan̈ino ma atsika mila man̈ano fianaran̈a lalin̈y momba fahamarin̈ana amy Baiboly aby io, baka ho fatatra tsarabe fifandraisantsika amy Jehovah? Aviô, nan̈ino ma atsika tsy tôkony hatoky ten̈a dila loatra? Handiniky valin’ny fan̈ontanian̈a aby zen̈y atsika amy lahatsoratra ty.

INO MA DIKAN’NY KRISTIANIN̈Y MATOTRO ZEN̈Y?

3. Ino ma dikan’ny matotro zen̈y?

³ Dikan’ny volan̈a griky “matotro” zen̈y amy Baiboly, “lavorary” na “feno.” a (1 Kor. 2:6) Ke karaha ataon’ny tsaiky araiky mitombo tsara firaka izy manjary olobe in̈y, atsika koa tôkony hankafatatra fifandraisantsika amy Jehovah fo. Hanjary olo matotro atsika izikoa man̈ano karaha zen̈y. Fa ndray atsika efa mahatatra tanjon̈o zen̈y, atsika mbala mila man̈ano fandrosoan̈a ara-pan̈ahy fo. (1 Tim. 4:15) Afaka ho matotro fo atsika jiaby, na matoe na tanora. Karakôry ma ahaizan̈a fa matotro Kristianin̈y araiky?

4. Karakôry ma hahaizan̈a fa matotro Kristianin̈y araiky?

 ⁴ Matotro Kristianin̈y araiky, izikoa man̈ano raha jiaby irahin’i Jehovah ataony, fa tsy zay tiatiany hatao fo. Ndray izy man̈ano zen̈y, izy mbala tsy lavorary ke mety ho mbala tafan̈ano raha tsy mety fo. Fa kanefa, aboakany amy fiain̈ananany isan’andra fa mifan̈araka amy sitrapôn’i Jehovah eritreritrinany ndreky raha ataony. Misikiny toetry vaovao izy, aviô mbala tsy vôly mangala tahaka toetrin’i Jehovah. (Efes. 4:22-24) Mampiofan̈a eritreritrinany koa izy, baka hahaizany mangala fanapahan-kevitry tsara, mifan̈araka amy lalàn̈an’i Jehovah ndreky torolalan̈anany. Ke tsy mila listin’ny lalàn̈a maro izy, zay vo hahay raha tôkony hataony. Aviô izy koa mangala fanapahan-kevitry, mifen̈y mare izy han̈atanteraka izio.​—1 Kor. 9:26, 27.

5. Ino raha mety hahazo Kristianin̈y araiky izikoa izy tsy matotro? (Efesianina 4:14, 15)

⁵ Tsy karaha zen̈y ndraiky Kristianin̈y tsy matotro. Izy mora ‘fitahin̈y’ ndreky ‘fitsifitsen̈a’ sady mora mino tsaho na koa raha volan̈in’ny mpivadi-pinoan̈a. b (Vakia Efesianina 4:14, 15.) Mora mialon̈o koa izy, tia ady, aviô mora resin’ny fakam-pan̈ahy.​—1 Kor. 3:3.

6. Nan̈ino ma fitombosan’ny tsaiky araiky mety ampitovisin̈y amy fifen̈ana baka hanjary matotro? (Zahava koa sary.)

⁶ Karaha nikoran̈intsika taloha tiô in̈y, ampitovisin’ny Soratra Masin̈y amy fitombosan’ny tsaiky, fandrosoan̈a baka hanjary Kristianin̈y matotro io. Maro baka raha mbala tsy hain’ny tsaiky hely, ke izy mila olobenany miaro izy ndreky mitariky lalan̈anany ziska izy be. Miniminia hely baka maman’ny tsaiky araiky mitana tan̈an’ny zanany irô koa fa hitsaka lalabe. Fa tsaiky io koa efa bebe, mamany io mety han̈ambela izy mandeha manokana, fa ampatsiarôvin’ny mamany izy fo fa izy mila mizaha an̈ilan̈ila zay vo mitsaka. Fa tsaiky io koa fa be amy zay, efa izy tômpiny fo mahay fa izy mila mitodiky an̈ilan̈ila vo mitsaka lalan̈a. Karaha ataon’ny tanora mila olobe mamalavala izy in̈y, Kristianin̈y araiky tsy matotro koa mila fan̈ampian̈a baka amy Kristianin̈y matotro, baka tsy ho robaka fihavan̈any amy Jehovah, aviô izy koa hahay hangala fanapahan-kevitry tsara. Fa Kristianin̈y araiky matotro ndraiky, izikoa fa misy fanapahan-kevitry mila ataony, izy  mizaha tsarabe torolalan̈an’ny Baiboly, baka hahaizany fomba fihevitrin’i Jehovah momba raha io, aviô man̈araka torolalan̈an’ny Baiboly io izy izikoa fa manapa-kevitry.

7. Kristianin̈y araiky matotro ma mbala mila fan̈ampian̈a baka amin’olo?

⁷ Ke dikan’izen̈y ma Kristianin̈y araiky koa fa matotro, efa tsy mila olo eky han̈ampy izy? Aha, mbala mila hampian̈a fo izy. Nata olo efa matotro koa, mbala mila mangataka fan̈ampian̈a amin’olo fo koa ndraikindraiky. Fa matetiky olo araiky koa tsy matotro, izy man̈ontany olo han̈ambara izy raha tôkony hataony, aviô man̈iraka olo hangala fanapahan-kevitry amy plasinany. Fa Kristianin̈y matotro ndraiky mitady fahendrena ndreky mangala fianaran̈a baka amin’olo. Kanefa hainy koa fa amy Jehovah, samy “hitondra entan̈anany aby olo tsiaraikiaraiky.”​—Gal. 6:5.

8. Nata olo samy matotro, ino aby raha tsy mampiran̈a irô?

⁸ Karaha ataon’ny olobe jiaby tsy mira sora na bikabika in̈y fo, karaha zen̈y koa Kristianin̈y matotro jiaby tsy voatery hitovy toetry. Tsy mitovy, ohatra, fahendrenandrô, korazindrô. Misy koa tsy matity, fa sasany ndraiky tia mahinakinaka olo. Nata Kristianin̈y aroe samy matotro, mety tsy mira fanapahan-kevitrindrô momba raha araiky, kanefa samy tsy mandika fitsipikin’ny Baiboly. Karaha zen̈y iziô, izikoa fa fanapahan-kevitry miankin̈y amin’ny eritreritry. Ke zen̈y mahavy irô tsy mifampitsaratsara, fa man̈ano raha hampiray sain̈y fo.​—Rom. 14:10; 1 Kor. 1:10.

INO RAHA TÔKONY HATAO BAKA LÔSO KRISTIANIN̈Y MATOTRO?

9. Kristianin̈y araiky ma direkty matotro ho azy? Hazavà.

⁹ Mandeha hoazy fitombosan’ny tsaiky araiky arakaraka fandihanan’ny fotoan̈a. Fa fandrosoan̈a ara-pan̈ahy ndraiky tsy karaha zen̈y. (Asa. 18:8-11) Ohatra, irô rahalahy ndreky ranabavy ta Korinto tan̈y nan̈eky vaovao tsara, natao batisa, nahazo fan̈ahy masin̈y, aviô nahazo hatsaran̈a maro baka tamy fampianaran̈a nataon’ny apostoly Paoly. Fa kanefa, sasany ndray efa taon̈o maro tafaran’ny batisandrô, irô mbala tsendriky natotro fo. (1 Kor. 3:2) Akôry tôkony hataontsika, baka atsika tsy ho takan’ny raha karaha zen̈y?

10. Ino raha tsy maintsy ataontsika, baka atsika ho matotro? (Joda 20)

¹⁰ Atsika antsendriky tôkony han̈iry ho matotro, zay atsika vo hanjary Kristianin̈y matotro. Lan̈iany olo ‘mbala tihan̈ano hadalan̈a’ fo midôko ho zaza ara-pan̈ahy, ke tsy han̈ano fandrosoan̈a. (Ohab. 1:22) Tsy tiantsika hanjary karaha olo sasany ke ho be fo, fa tsy mety mahaleo ten̈a. Fa tiantsika atsika izikoa manjary olobe mahavita mandray andraikitry, ke atsika tihifen̈y handroso ara-pan̈ahy fo. (Vakia Joda 20.) Ke izikoa anao iziôty mbala mifen̈y baka ho matotro, mivavaha amy Jehovah baka izy han̈amia anao ‘fan̈irian̈a ndreky angôvo han̈anaovan̈a raha.’​—Fil. 2:13.

11. Ino aby fomba han̈ampian’i Jehovah atsika, baka atsika handroso ke hanjary Kristianin̈y matotro? (Efesianina 4:11-13)

¹¹ Efa hain’i Jehovah fa tsy ho matotro atsika, izikoa baka amin’ny angôvontsika manokan̈a fo. Izy man̈amia atsika mpiambin̈y ndreky mpampianatra an̈atin’ny fiangonan̈a, han̈ampy atsika hanjary ‘olobe’ ara-pan̈ahy ndreky ‘ho matotro tsarabe karaha Kristy.’ (Vakia Efesianina 4:11-13.) Jehovah koa man̈amia fan̈ahy masin̈inany han̈ampy atsika, baka atsika hanan̈a “sain̈in’i Kristy.” (1 Kor. 2:14-16) Aviô izy koa nan̈amia atsika Filazantsara efatra amy Baiboly ao, man̈aboaka fomba fihevitrin’i Jesosy, raha nivolan̈iny, ndreky raha nataony, tamy fanompoan̈anany tambony tany teto. Ke izikoa anao mangala tahaka fomba fisain̈an’i Jesosy ndreky fan̈anaovany  raha, ho tatranao tanjon̈onao hanjary Kristianin̈y matotro.

TEN̈A ILAIN̈Y HANIN̈Y MAHERY ARA-PAN̈AHY

12. Ino ma “fampianaran̈a fôtotro momba Kristy” zen̈y?

¹² Baka atsika hahavita handroso ke hanjary Kristianin̈y matotro, atsika ‘tsy tôkony hidôko amy fampianaran̈a fôtotro momba Kristy fo.’ Ohatra amy zen̈y ziôty, fampianaran̈a momba fibebahan̈a, finoan̈a, batisa, ndreky familoman̈a olo maty. (Heb. 6:1, 2) Irô io an̈isan’ny fampianaran̈a fôtotro inoan’ny Kristianin̈y. Zen̈y nahavy apostoly Petera nikoran̈a momba raha aby io, tamin’izy nitory tamin’olo tamy Pantekoty. (Asa. 2:32-35, 38) Mila ikentsika irô fampianaran̈a fôtotro aby io, baka atsika hanjary mpianatran’i Kristy. Ohatra, Paoly nampitandrin̈y fa tsy ten̈a Kristianin̈y olo araiky, izikoa tsy mino fampianaran̈a momba familoman̈a olo maty. (1 Kor. 15:12-14) Fa ndray izy man̈ano zen̈y, atsika mila mampitombo fahaizantsika Soratra Masin̈y, baka hanjary Kristianin̈y matotro, fa tsy tôkony ho afa-pô amy fampianaran̈a fôtotro fo.

13. Ino ma raha tsy maintsy hataontsika, baka atsika hahazo hatsaran̈a baka amin’ny hanin̈y mahery, koran̈in’ny Hebreo 5:14? (Zahava koa sary.)

¹³ Tsy mitovy amy fampianaran̈a fôtotro hanin̈y mahery ara-pan̈ahy. Tsy lalàn̈a fo baka raha koran̈in’ny hanin̈y mahery ara-pan̈ahy zen̈y fa torolalan̈a koa, fôtony izio han̈ampy atsika hanan̈a fomba fisain̈an’i Jehovah. Ke baka atsika hahay irô torolalan̈a amy Baiboly ao, atsika mila mianatra, misaintsain̈y, ndreky man̈araka tsarabe raha koran̈in’ny Volan̈a Zan̈ahary. Atsika koa man̈ano karaha zen̈y, ho zatra mampiofan̈a eritreritrintsika atsika, baka hangala fanapahan-kevitry mamparavoravo Jehovah. c​—Vakia Hebreo 5:14.

14. Karakôry nataon’i Paoly nan̈ampy irô Korintianin̈y aby io, baka irô nanjary matotro?

¹⁴ Matetiky Kristianin̈y araiky tsy matotro sahiran̈a manapa-kevitry, izikoa tsisy lalàn̈a mazava baka amy Baiboly. Tsy hainy baka ino torolalan̈a mila ampiasain̈a, ndreky karakôry mampihatra izio. Mety hisy koa hieritreritry fa afaka man̈ano zay raha tiany izy, izikoa tsisy lalàn̈a momba zen̈y amy Baiboly. Sasany  mety mbala man̈ontany olo lalàn̈a fo, izikoa tsisy lalàn̈a avoakoran̈a mazava. Ohatra, irô Kristianin̈y ta Korinto tan̈y nan̈ontany Paoly lalàn̈a momba fihinanan̈a hanin̈y aterin̈y amy sampy. Ke Paoly tsy nivolan̈a mety sa tsy mety mihinan̈a izio fa naboakany tamindrô fa irô manan̈a ‘zo hifidy’ raha handeha hataondrô mifan̈araka amin’ny eritreritrindrô, izikoa izio man̈ambela irô han̈ano zen̈y. (1 Kor. 8:4, 7-9) Paoly amy zay nampianatra irô Korintianin̈y aby io hampiasa Soratra Masin̈y izikoa irô fa hangala fanapahan-kevitry fa tsy hiankiny amin’olo na hiambin̈y lalàn̈a fo. Fan̈anaovandrô raha zen̈y nahavy irô nanjary Kristianin̈y matotro.

15. Akôry nataon’i Paoly nan̈ampy irô Kristianin̈y hebreo aby io han̈ano fandrosoan̈a ara-pan̈ahy?

¹⁵ Misy fianaran̈a maventy azontsika baka tamy raha nisoratin’i Paoly handeha tamindrô Kristianin̈y hebreo aby io. Sasany tamindrô io baka efa tsy nandroso eky, ke irô mbala ‘nila nimpody nihina ronono fa tsy hanin̈y mahery [ara-pan̈ahy].’ (Heb. 5:12) Irô tsy nianatra ndreky tsy nan̈eky raha vaovao nampianarin’i Jehovah irô baka tamy fiangonan̈a. (Ohab. 4:18) Ohatra, naro Jiosy nino fa irô mbala nila nan̈araka Lalàn̈an’i Mosesy fo, nata efa 30 taon̈o talohan’izen̈y nan̈afoan̈ana izio, fôtony efa natao sôron̈o Kristy. (Rom. 10:4; Tit. 1:10) Tôkony ho efa ampy irô Kristianin̈y aby io 30 taon̈o zen̈y, hahazahoan̈a tsarabe fa irô efa tsy nila nan̈araka Lalàn̈an’i Mosesy eky! Zay olo namaky taratasin’i Paoly nandeha tamindrô Hebreo aby io afaka nan̈eky tsarabe, fa ten̈a hanin̈y mahery ara-pan̈ahy raha tan̈atin’izio tao. Ary zen̈y lasitiô raha ten̈a nilaindrô Kristianin̈y aby io, baka irô hino tsarabe fa tsara mare fivavahan̈a kristianin̈y. Zen̈y koa nan̈ampy irô hanan̈a korazy nahavitandrô hitory fo, ndray tiô fanoheran̈a nataondrô Jiosy aby io.​—Heb. 10:19-23.

AZA MATOKY TEN̈A DILA LOATRA

16. Atsika nata efa matotro, ino koa raha tsy maintsy hataontsika?

¹⁶ Atsika tôkony hifen̈y mare baka ho matotro ndreky ho karaha zen̈y fo. Tsy ho vitantsika raha zen̈y, izikoa atsika matoky ten̈a loatra. (1 Kor. 10:12) Dikan’izen̈y atsika mila ‘mandini-ten̈a fo’, misy ahitan̈a asa mbala man̈ano fandrosoan̈a fo atsika io.​—2 Kor. 13:5.

17. Tamy taratasy nalefan’i Paoly tamindrô Kolosianin̈y aby io, akôry nan̈aboahany fa ten̈a ilain̈a mifen̈y baka ho matotro fo?

 ¹⁷ Tamy taratasinany nandeha tamindrô Kolosianin̈y aby io, Paoly nankamafy ndraiky koa fa ilain̈y mifen̈y ho matotro fo. Paoly nampitandrin̈y irô tsao irô voafandrikin’ny toe-tsain̈in’ny donia ty, nata irô efa matotro. (Kol. 2:6-10) Epafra koa nahay tsarabe irô Kristianin̈y tamy fiangonan̈a io tao. Ke izy tsy vôly nivavaka, baka irô ho matotro na ho ‘feno’ fo. (Kol. 4:12, l.p.a.) Ino raha ianarantsika baka amy zen̈y? Paoly ndreky Epafra samy nahay fa baka olo araiky ho matotro fo, izy mila mifen̈y mare, aviô koa izy mila fan̈ampian’i Jehovah. Tian’i Paoly ndreky Epafra baka irô Kristianin̈y aby io ho matotro fo, na ino na ino raha sarotro natrefindrô.

18. Mety han̈ano karakôry Kristianin̈y araiky, ndray izy efa matotro? (Zahava koa sary.)

¹⁸ Paoly nampitandrin̈y irô Kristianin̈y hebreo aby io fa nata Kristianin̈y araiky efa matotro, mbala mety hanjary tsy hankasitrahin’ny Zan̈ahary foeky koa. Izikoa baka Kristianin̈y araiky lôso tsy man̈eky hitandren̈y Zan̈ahary, mety tsy hahavita hibebaka eky izy ke tsy hahazo familan-keloko baka amy Jehovah. Ten̈a derain̈y irô Kristianin̈y hebreo aby io, fôtony irô tsy nan̈ano karaha zen̈y. (Heb. 6:4-9) Karakôry fo basy irô olo efa tsy mitory eky amin’ny andra iziôty, na irô olo voaroaka kanefa nibebaka? Irô manetry ten̈a fa tsy nira irô olo nivolan̈in’i Paoly fa tsy hankasitrahan’i Jehovah, tamy taratasy nisoratiny in̈y. Kanefa irô ndray efa mimpody amy Jehovah, irô mbala mila fan̈ampian̈a baka aminany fo. (Ezek. 34:15, 16) Ke anti-pan̈ahy aby io mety hanendry olo araiky matotro, han̈ampy irô, baka irô hatanjaka ara-pan̈ahy ndraiky.

19. Ino tôkony ho tanjon̈ontsika jiaby?

¹⁹ Ke izikoa anao iziôty mifen̈y hanjary Kristianin̈y matotro, matokisa fa ho tatranao tanjon̈onao zen̈y! Mazotoa fo mianatra irô fahamarin̈ana lalin̈y aby amy Baiboly ao, aviô mifen̈a fo baka hahaihitovy amy nin’i Jehovah fo fomba fihevitrinao. Fa izikoa anao efa matotro, mifen̈a baka ho karaha zen̈y fo rango iziôty ndreky mandrakizay.