Zaho teraka tamin’ny 1955. Telo mirahalahy zahay, ke zaho faralahy. Zaho tombo tamy faritry atsimon’i Failandy tan̈y. Vantaa an̈aran’ny tanàna io amy ziôty.

Taon̈o vitsivitsy talohan’ny zaho teraka, mamanay natao batisa. Fa babanay ndraiky tsy tia fahamarin̈ana foeky. Mamanay tsy nimboany nampianatra Baiboly zahay ndreky nitondra zahay nandeha nivory. Fa zahay nampianarin’ny mamanay fahamarin̈ana fôtotro tamy Baiboly fo, papanay koa fa sendra tsy tiô.

Rango zaho mbala hely, zaho efa nilan̈y tamy Jehovah edy. Ohatra tandraraiky, tamy zaho fito taon̈o, mpampianatranay neloko mare taminaka zaho koa fa tsy nan̈eky nihina verilättyjä (izio karazan̈a mokary namboarin̈y tamy lio, ta Failandy). Ke tan̈anany araiky nan̈abian̈a vavanaka, fa tan̈anany araiky ndraiky nitana forsety nisy mokary io, baka hampidiran̈a izio forse tan̈aty vavanaka. Nikon̈oko forsety io ke nantsipy tan̈y.

Zaho amy zay koa fa 12 taon̈o, naty papanay. Ke afaka nandeha nivory zaho. Tsara fan̈ahy taminaka mare irô rahalahy aby tan̈y, ke raha zen̈y nandrisiky zaho handroso. Zaho nanomboko namaky Baiboly isan’andra, aviô nazoto nianatra irô boky ndreky gazety aby io. Ke fahazarako nianatra zen̈y nandrisiky zaho nan̈ano batisa tamin’ny 8 Aoty 1969, tamy zaho 14 taon̈o.

 Aviô, tsy elan’ny nivitan’ny fianaran̈anaka, zaho efa nanomboko nan̈ano mpisava lalan̈a maharitry edy. Herin̈iandra vitsivitsy tafaran’izen̈y, zaho nandeha nan̈itatra ta Pielavesi, tsy lavitry kapitalin’i Failandy.

Ta Pielavesi tan̈y zahay ndreky Sirkka fanôjy. Raha ten̈a nahasariky zaho taminany, izy nanetry ten̈a ndreky tia Jehovah. Izy koa tsy olo poerapoera, aviô tsy tia vola. Zahay roe samy tihan̈ano erakan’ny vitanay tamy fanompoan̈a Jehovah. Zahay samy vôn̈ono han̈ano zay raha hampan̈anaovin̈y zahay. Tamy 23 Marsy 1974 zahay nan̈ano mariazy. Zahay tsy nan̈ano voyage de noces fa direkty nandeha ta Karttula. Tan̈y baka mbala nilan̈a mpitory maro.

Rango tamy somilan’ny vadian̈anay, efa naboakan’i Jehovah edy fa izy hikarakara raha nilainay izikoa zahay nan̈ano voalohan-toeran̈a Fanjakan̈anany. (Mat. 6:33) Ohatra, ta Karttula, zahay tsisy tomabily foeky. Bisikilety fo antsendriky nampiasainay. Fa izikoa fa andra ririn̈iny, manintsy mare an̈y, kanefa faritanin’ny fiangonan̈a maventy mare. Ke izikoa tsisy tomabily, tsy vita faritany jiaby zen̈y. Fa zahay tamy zen̈y ndraiky tsisy vola hivangan̈a tomabily.

Tandraraiky, tsy nampoizinay foeky fa navy namangy zahay zokiko narehako. Namezany zahay tomabilinany, aviô efa nifainy koa assurance jiaby. Lesansy fo nila nividinay. Ke zahay nahazo tomabily nilainay tsarabe.

Naboakan’i Jehovah taminay fa izy ten̈a nikarakara raha nilainay. Fa raha nila nataonay, nan̈ano Fanjakan̈anany tamy toeran̈a voanalohany.

Tamin’ny zahay nan̈ano Sekolin’ny Mpisava Lalan̈a tamin’ny 1978, Raimo Kuokkanen, a an̈isan’ny mpampianatra tamy zen̈y, nandrisiky zahay hameno fangatahan̈a han̈ano Sekolin’i Gileada. Ke zahay nianatra teny angiley, baka zahay ho afaka han̈ano sekoly io. Fa tamin’ny 1980, nata zahay mbala tsy nafaka nameno fangatahan̈a io, zahay efa navoakaiky hanompo tamy birôn’ny sampan̈a ta Failandy. Fa tamin’ny fotoan̈a zen̈y Betelita tsy nahazo nan̈ano Sekolin’i Gileada. Raha ten̈a tianay, hanompo amy zay tany hitan’i Jehovah fa faran’ny tsara, fa tsy amy zay tiatianay fo. Ke zahay nan̈eky nanompo tamy birôn’ny  sampan̈a. Fa zahay mbala nifen̈y fo nianatra teny angiley, tsao fo andra araiky an̈y, zahay mbala ho afaka han̈ano Sekolin’i Gileada fo.

Taon̈o vitsivitsy tafaran’izin̈y, Filan-kevi-pitantan̈ana nivolan̈a fa Betelita koa mba mahazo man̈ano Sekolin’i Gileada. Ke zahay direkty nameno fangatahan̈a han̈ano sekoly io. Fa zen̈y ma mivolan̈a fa zahay tsy ravoravo nanompo tamy Betela? Tsy zen̈y foeky! Mba tianay baka hanompo amy tany mbala mila fan̈ampian̈a mare, zahay koa mahavita sekoly io. Nivaly fangatahan̈anay, ke zahay nahazo diplaomy tamy Sekolin’i Gileada, Kilasy faha-79, tamy Septambra 1985. Zahay tamin’io voatendry hanompo ta Colombie.

Zahay antsendriky nirahin̈y nanompo tamy birôn’ny sampan̈a ta Colombie. Zaho nifen̈y nan̈ano erakany vitako tamy fanendrena namian̈a zaho. Izikoa fa taon̈o araiky nanompoako tamy birôn’ny sampan̈a, tsapako fa nisy raha nila nivoanay. Tamy zen̈y voanalohany sady farany tamy fiain̈ananaka zaho nangataka fan̈ovoan̈a fanendrena. Ke zahay baka tiô navoatendry han̈ano misionera tamy tanànan’i Neiva, tamy faritrin’i Huila.

Faran-draha tiako eky nandeha nitory. Tamy zaho mbala tsy nanambady, sady mpisava lalan̈a ta Failandy tan̈y, natetiky zaho nandeha nitory rango bonera firaka andra alin̈y be. Baka iô zaho koa fa nanambady, zahay ndreky Sirkka nandeha nitory, rango maraindrain̈y nanôfotro andra. Zahay koa fa nandeha tamy faritany lavitry mare, ndraikindraiky tan̈atin’ny tomabilinay fo zahay nandry alin̈y. Safe zahay tsy lany lera nivezivezy, sady afaka nitory bonera be koa amarain’izin̈y.

Tamy zahay misionera tamy saha, tsapanay fa zahay lôso nimpody nafana fô tamy fanompoan̈a, karaha taloha. Nahainitombo fiangonan̈anay, sady rahalahy ndreky ranabavy ta Colombie aby io ten̈a nan̈aja olo, tia olo aviô nahay nankasitraka.

Tsy lavitry faritaninay ta Neiva tan̈y, nisy tanàna maromaro tsisy Vavolombelon̈on’i Jehovah. Zaho niasaloha akôry hahavy vaovao tsara io ho avy firaka tamindrô tanàna aby io. Fa tanàna io feno olo nanafinafiky. Natahoran̈a tsao hivonen’olo zay vahiny nandalo tan̈y. Ke zaho nivavaka baka ho hisy olo baka tamy tanàna aby io hanjary Vavolombelon̈on’i Jehovah. Zaho nieritreritry fa olo zen̈y tsy maintsy mipetraka a Neiva antsendriky, baka izy hahavita hianatra fahamarin̈ana. Baka iô koa, zaho nivavaka lera izy vita batisa, izy hanjary rahalahy matotro, ke himpody an-tanànanany, baka hitory amin’olo an̈y. Fa zaho ndraiky natoky fa Jehovah mbala mahita vahaolan̈a tsaratsaran’izen̈y.

Tsy ela tafaran’izen̈y, zaho nampianatra Baiboly manafolahy araiky, Fernando González. Izy nipetraka ta Algeciras. Izio an̈isan’ny araiky amindrô tanàna tsisy Vavolombelon̈on’i Jehovah. Fernandro tsy maintsy nan̈ano dia 50 kilometara nandeha niasa ta Neiva. Isaka fianaran̈a, izy nan̈oman̈a tsarabe. Izy koa direkty nan̈aton̈o fivorian̈a jiaby. Rango tamin’ny herin̈iandra voanalohany nianarany Baiboly, efa navorin’i Fernando edy olo tanàna araiky taminany ke nampianariny raha nianarany tamy Baiboly.

 Fernando natao batisa tamy Zanvie 1990, tsiota fanjava tafaran’ny nianarany Baiboly. Izy baka tiô nan̈ano mpisava lalan̈a maharitry. Efa nisy olo araiky nanjary Vavolombelon̈on’i Jehovah ta Algeciras, ke nandifasan’ny sampan̈a mpisava lalan̈a manokan̈a tan̈y. Tamy Fevrie 1992, nisy fiangonan̈a nifôron̈o tan̈y.

Ke tamy tanànanany io fo ma Fernando nitory? Ehe! Izy koa fa nanambady, irô fivadiany nifindra ta San Vicente del Caguán. Tsisy Vavolombelon̈on’i Jehovah koa tan̈y, fa nanjary nisy fiangonan̈a nifôron̈o nohon’ny fan̈ampiandrô. Tamy 2002 amy zay, Fernando voatendry mpiandraikitrin’ny faritry. Izy ndreky Olga vadiny man̈ano asan’ny faritry, firaka iziôty.

Hitako baka tamizin̈y fa ten̈a raha maventy man̈ano vavaka voafaritry tsarabe amy Jehovah momba fanendrena azontsika. Jehovah mahavita man̈ano raha tsy vitantsika. Sady izy tômpin’ny vokatra fa tsy atsika.​—Mat. 9:38.

Tamin’ny 1990, zahay voatendry nan̈ano asan’ny faritry. Tany voanalohany nan̈anaovanay asan’ny faritry, tamy kapitaly ta Bogotá. Zahay navozo tsao tsy ho vitanay han̈ano izio. Zahay fivadiany baka olo tsotra fo, sady tsy ten̈a nanan̈a talenta. Zahay koa tsy zatra nipetraka tamy tanabe. Fa Jehovah nan̈atanteraka fampan̈antinan̈anany amy Filipianina 2:13 ty: ‘Zan̈ahary miasa an̈atinarô, fôtony zen̈y raha maharavoravo izy, baka anarô tsy vitan’ny man̈iry fo fa man̈ana angôvo han̈anovan̈a raha koa.’

Tafaran’izin̈y koa, zahay voatendry nan̈ano asan’ny faritry ta Medellín, tanàna nikoran̈iko tamy voanalohany tarỳ in̈y. Olo amy tany io efa zatra nahita olo miadiady amy lalan̈a. Ohatra tandraraiky, tan̈atin’ny zaho mampianatra Baiboly in̈y, nisy olo nitifitry tambelan̈a tran̈on’olo nampianariko io. Zaho tamin’io efa nila hantoraka tamy rapaka, fa olo nampianariko Baiboly io tsy taitry foeky. Nitohizany fo vaky fehintsoratra. Izikoa fa vita vakiteninany, izy nan̈ano azafady aviô niboaka. Teteky amy zay, izy nimpody niaraka tamy zanany hely aroe zay. Tsy taitry foeky izy nivolan̈a: “Azafady fa zaho nila nangala irô zanako aby ty.”

Nisy fotoan̈a koa zahay efa tseky naty. Nitory isaka tran̈o zahay tamy zen̈y. Vadiko nilomoay nan̈aton̈o zaho. Nirehi-mena izy tamy zen̈y. Nivolan̈a izy fa nisy olo zen̈y nitifitry izy. Navozo mare zaho. Kanefa tafaran’izin̈y, hainay fa kaiky tsy Sirkka nitifirin’ny lelahy io fa lelahy nandalo tankilanany tiô.

Koa fa ela ny ela, efa tsy nampavozo zahay mare eky niatriky raha karaha zen̈y. Nankahery zahay mare fiaretan̈andrô rahalahy ndreky ranabavy aby tamy tanàna io, niatriky raha karaha zen̈y ndreky raha mbala ratsiratsin’izen̈y. Ke tan̈atin’ny jerinay, matoa Jehovah nan̈ampy irô, izy tsy maintsy han̈ampy zahay koa. Zahay nan̈araka torohevitrin’ny anti-pan̈ahy tan-toeran̈a, sady nitandritandrin̈y fo koa. Aviô Jehovah nambelanay nan̈ano ny ambiny.

Ndraikindraiky aby tsy ten̈a nampavozo arakany niritriretanay izy raha sasany. Tandraraiky, zaho karaha naharen̈y feon’ny man̈angy aroe nifanihitihy tambelan̈a tran̈on’ny fitsidihan̈anaka.  Zaho tsy tia nizaha olo mimalo. Fa tômpin-tran̈o io nikaiky zaho handeha tamy lavarangananany. Kaiky izio tsy olo “nimalo” aby, fa koera aroe nangala tahaka feon’ny jiranindrô tambadiky tao.

Tamin’ny 1997, zaho navoatendry han̈ano mpampianatra tamin’ny Sekolin’ny Fampiofanana ho an’ny Fanompoana. b Faran-draha tiako eky nan̈ano sekoly nalamin̈in’ny fandaminan̈a, fa zaho mbala tsiary nieritreritry fa zaho hampianatra. Ke ten̈a tombontsoa zen̈y!

Tafaran’izin̈y koa, zaho lôso mpiandraikitrin’ny vondrom-paritry. Fa izikoa fa tsisy eky izio, zaho nampody ndraiky mpiandraikitrin’ny faritry. Zaho sady mpampianatra ndreky mpiandraikitry mpitety faritany tan̈atin’ny 30 taon̈o mahery. Maro hatsaran̈a nazoko tamy zen̈y. Fa ndray zen̈y, tsy vôntro mora aby raha jiaby. Alô baka hazavaiko aminarô.

Zaho olo nafana fô ndreky natoky ten̈a, ke raha zen̈y nan̈ampy zaho hiatriky raha sarotro. Fa zaho nafana fô loatra izikoa fa nan̈itsy prôblemo tamy fiangonan̈a. Ohatra, tandraraiky nahery loatra volan̈anaka koa fa nandrisiky olo sasany mba ho be fitiavan̈a ndreky hahay handanjalanja izikoa fa mifandray amin’olo. Kanefa, zaho ndraiky tamy zen̈y tsy nanan̈a irô toetry aby io.​—Rom. 7:21-23.

Nohon’ny hadisovan̈anaka, ndraikindraiky zaho nahatsiaro kivy mare. (Rom. 7:24) Nisy fotoan̈a aby zaho nivavaka tamy Jehovah, sitrany zaho vôly man̈ano misionera, fa mandeha mody a Failandy. Fa tamin’ny alin̈y io, zaho nandeha nivory niaraka tamy fiangonan̈a. Fa raha ren̈iko tamy fivorian̈a tan̈y nahavy zaho resy lahatra fa zaho tôkony hanohy fo han̈ano fanendrena nazoko ndreky hifen̈y han̈itsy toetry ratsinaka. Tsapako tsara iziôty karakôry nataon’i Jehovah namaly vavakanaka in̈y. Baka iô koa zaho ten̈a mankasitraka izy, fôtony izy tsara fan̈ahy nan̈ampy zaho handresy fahalimian̈anaka.

Zahay roen’i Sirkka ten̈a man̈ano mersy Jehovah nan̈ambela zahay hanan̈a tombontsoa hanompo izy manontolo andra tamy fiain̈ananay jiaby. Ten̈a man̈ano mersy izy koa zaho, nohon’izy nan̈amia zaho vady be fitiavan̈a ndreky tsy mivadiky tan̈atin’ny taon̈o maro.

Efa tsy ho ela ho feno 70 taon̈o zaho, ke efa tsy ho mpampianatra amy saha ndreky han̈ano asan’ny faritry eky. Fa raha zen̈y tsy ataoko raha mahakivy. Nan̈ino? Fôtony zaho matoky fa raha ten̈a man̈amia voninahitry Jehovah, manetry ten̈a izikoa manompo izy ndreky midera izy amy fô feno fitiavan̈a ndreky fankasitrahan̈a. (Mika 6:8; Mar. 12:32-34) Tsy voatery manan̈a andraikitry miavaka atsika, vo afaka han̈amia voninahitry Jehovah.

Zaho koa fa mimpody mandiniky irô fanendrena jiaby nazoko in̈y, tsy hoe ke zaho tsara mandilatra olo hafa na mahay mandrilatra irô, fa baka amin’ny hatsaram-pan̈ahin’i Jehovah miavaka nahavy izy nan̈amia zaho irô in̈y. Zaho nambelany hanan̈a tombontsoa aby in̈y ndray tiô fahalimian̈anaka. Baka iô nohon’ny fan̈ampian’i Jehovah fo nahavitako nan̈ano irô in̈y. Ke fahalimian̈anaka, nan̈aboaka angôvon’ny Zan̈ahary.​—2 Kor. 12:9.