1. Nan̈ino Abrahama afaka nan̈anten̈a fa izy mbala hiteraka fo?

 JEHOVAH nampan̈anten̈a Abrahama kamaradinany fa firenena jiaby ambony tany hahazo fitahian̈a baka amy taranakanany. (Gen. 15:5; 22:18) Abrahama ten̈a nino Zan̈ahary, ke izy natoky fa tsy maintsy ho tanteraka fampan̈antinan̈anany. Kanefa nata Abrahama efa feno 100 taon̈o avio vadiny efa 90 taon̈o, olo fivadiany tsy nivadiky io mbala tsendriky niteraka. (Gen. 21:1-7) Fa Baiboly mivolan̈a: ‘Abrahama mbala nan̈anten̈a fo, ke nino fa izy mety ho loso Babany firenena maro, eraka raha efa nambara.’ (Rom. 4:18) Hainao fa ten̈a tanteraka raha nantinainy Abrahama io. Ke izy niteraka Isaka eraka raha nantinainy in̈y. Ino ma nahavy Abrahama natoky fa Jehovah tsy maintsy han̈atanteraka fampan̈antinan̈anany?

2. Nan̈ino Abrahama natoky fa tsy maintsy ho tanteraka fampan̈antinan̈any Jehovah?

² Abrahama ten̈a nifandray marikitry tamy Jehovah, ke zen̈y nahavy izy ‘natoky tanteraka fa vitany Zan̈ahary man̈atanteraka zay raha efa nampan̈antinainy.’ (Rom. 4:21) Jehovah nankasitraka Abrahama ndreky nivolan̈a fa izy olo marin̈y nohony finoan̈anany. (Jak. 2:23) Eraka raha volan̈iny Romanina 4:18, Abrahama sady nanan̈a finoan̈a ndreky fan̈antinan̈a. Alo atsika zioty handiniky, ino raha volan̈iny apostoly Paoly momba fan̈antinan̈a eraka raha koran̈iny Romanina toko faha-5.

3. Ino raha hazavainy Paoly momba fan̈antinan̈a?

³ Paoly nan̈azava nan̈ino atsika afaka matoky, fa ‘fan̈antinan̈antsika io tsy mandiso fan̈antinan̈a atsika.’ (Rom. 5:5) Nampiany koa atsika hahatakatra akory hahavy fan̈antinan̈antsika io hahaihitombo fo. Izikoa atsika fa mandiniky Romanina 5:1-5, iritrireta raha niain̈anao. Ho hitanao fa arakarakany andihanany fotoan̈a, loso mahaifatatra fo fan̈antinan̈anao.  Ho hitantsika ato koa, ino raha mety hatanao baka hahavy fan̈antinan̈anao hahaiho fatatra fo lombolombony amy zioty. Alo antsendriky atsika handiniky fan̈antinan̈a tsara nivolan̈iny Paoly tsy handiso fan̈antinan̈a atsika.

4. Ino raha koran̈iny Romanina 5:1, 2?

⁴ Vakia Romanina 5:1, 2. Paoly nanoratra volan̈a aby io tamy fiangonan̈a ta Roma. Iro rahalahy ndreky ranabavy tan̈y nianatra raha momba Jehovah avio Jesosy. Iro loso nanan̈a finoan̈a baka io nanjary Kristianin̈y. Ke Zan̈ahary ‘nikaiky [iro] olo marin̈y nohony finoan̈andro’, baka io iro loso voahosotro. Ke iro nanjary nanan̈a fan̈antinan̈a tsara sady azo antoko.

5. Ino fan̈antinan̈andro voahosotro aby io?

⁵ Tafara tatỳ Paoly nanoratra tamy Kristianin̈y voahosotro ta Efesosy momba fan̈antinan̈a namezany Zan̈ahary iro. An̈isany zen̈y iziô iro hahazo ‘lova ninolo masin̈y.’ (Efes. 1:18) Avio nazavainy Paoly tamindro Kolosianin̈y aby io koa aia iro hahazo fan̈antinan̈andro io. Karaha ty nikahiany izio ‘fan̈antinan̈a nakajin̈a ninaro andan̈itry an̈y.’ (Kol. 1:4, 5) Dikanizen̈y, ino fan̈antinan̈a anan̈andro voahosotro aby io? Iro hatsangana hiain̈y mandrakizay andan̈itry an̈y, ke hiaraka hanjaka amy Kristy.​—1 Tes. 4:13-17; Apok. 20:6.

6. Ino raha nivolan̈iny rahalahy araiky voahosotro momba fan̈antinan̈anany?

⁶ Tiandro Kristianin̈y voahosotro aby io mare fan̈antinan̈andro zen̈y. An̈isany voahosotro iziô Rahalahy Frederick Franz. Karaha ty raha nivolan̈iny momba fan̈antinan̈anany: “Ten̈a azo antoko fan̈antinan̈anay io avio izio tsy maintsy ho tanteraka aminy ondrikondriky vitsy jiaby an̈isany 144 000. Ke izio raha ten̈a tsara anan̈anay.” Izikoa fa baka nanompo ndreky tsy nivadiky tamy Zan̈ahary tan̈atiny taon̈o maro Rahalahy Franz, karaha ty raha nivolan̈iny taminy 1991: “Mbala valera mare [aminay] fan̈antinan̈anay io. ... Arakaraka iambesanay izio mahavy izio mahaitianay fo. Man̈eva hiambesan̈a fo izio,  nata mbala mahadin̈y araiky tapitrisa taon̈o. Mahaitiako fo fan̈antinan̈anay io lombolombony taloha.”

7-8. Ino fan̈antinan̈any ankamarozantsika? (Romanina 8:20, 21)

⁷ Hafa fan̈antinan̈any ankamarozany panompony Jehovah amy zioty. Fan̈antinan̈andro mira araiky nanan̈any Abrahama in̈y fo: Hiain̈y mandrakizay ambony tany eto ambany fahifan̈any Fanjakan̈any Zan̈ahary. (Heb. 11:8-10, 13) Paoly nanoratra raha momba fan̈antinan̈a tsarabe zen̈y. (Vakia Romanina 8:20, 21.) Taminy anao voanalohany nianatra momba raha ampan̈antinainy Baiboly, ino ma raha ten̈a tianao tamizio? Andra araiky an̈y anao ho lavorary ndreky tsy ho panota eky? Sa anao ravoravo nahay fa mbala hivilomin̈y ndraiky iro havanao naty aby in̈y amy Paradisa an̈y? Ke nohony fampan̈antinan̈any Zan̈ahary loso misy raha maro tsara afaka antinainao.

⁸ Ndray atsika man̈anten̈a hiain̈y mandrakizay andan̈itry an̈y na ambony tany eto, atsika manan̈a fan̈antinan̈a tsara mahavy atsika ravoravo. Afaka hahaihitombo fo koa fan̈antinan̈antsika. Paoly nan̈azava karakory hahavy raha zen̈y. Alo hidinintsika raha nisoratiny momba fan̈antinan̈antsika. Raha nivolan̈iny han̈ampy atsika hahaihatoky fo fa raha antinaintsika io tsy maintsy ho tanteraka.

9-10. Izikoa raha niain̈any Paoly zahan̈a, ino ma raha efa ampoiziny Kristianin̈y? (Romanina 5:3) (Zahava koa sary.)

⁹ Vakia Romanina 5:3. Paoly nivolan̈a fa izikoa atsika mandalo raha sarotro loso mahaifatatra fo fan̈antinan̈antsika. Mety ho hafahafa amintsika ndraiky zen̈y. Kanefa lan̈iany olo pan̈aradia Kristy mila man̈ampo fa tsy maintsy handalo raha sarotro. Diniha baka raha niain̈any Paoly. Karaha ty ho izy tamindro Tesalonianin̈y aby io: ‘Tamy zahay taminaro tiô, matetiky zahay nivolan̈a taminaro tsialohaloha fa atsika tsy maintsy miaritry fahorian̈a. Ke zen̈y marin̈y raha nandalo.’  (1 Tes. 3:4) Karaha ty koa raha nisoratiny tamindro Korintianin̈y aby io: “Tianay ho hainaro, rahalahy aby, raha sarotro nahazo zahay ... Zahay tsy nan̈ampo zahay mbala ho velon̈o zen̈y foeky.”​—2 Kor. 1:8; 11:23-27.

¹⁰ Kristianin̈y amy zioty koa man̈ampo hiatriky raha sarotro isankarazany. (2 Tim. 3:12) Anao ke? Nisy olo ma nan̈enjiky anao izikoa anao efa nino Jesosy ndreky nan̈aradia izy? Nisy namanao na havanao ma nankalefaka anao? Sa anao mety nampijalindro foeky? Loso halany sefonao ndreky olo fiasan̈a araiky aminao ma anao nohony anao mifen̈y man̈ano ny marin̈y ampiasan̈a an̈y? (Heb. 13:18) Loso manohitry anao ma fanjakan̈a nohony anao mikoran̈a aminolo raha antinainao? Kanefa, ndray ino ndray ino raha sarotro mety tojy atsika, Paoly nivolan̈a fa atsika tôkony ho ravoravo fo. Nan̈ino?

11. Nan̈ino ma atsika mila tapakevitry hiaritry raha sarotro?

¹¹ Tôkony ho ravoravo atsika ndray miatriky raha sarotro, fotony izio man̈ampy atsika hanan̈a toetry tsara. Romanina 5:3 mivolan̈a: ‘Raha sarotro mahavy fiaretan̈a.’ Ho tojy raha sarotro aby Kristianin̈y jiaby, ke atsika mila miaritry aby. Atsika mila tapakevitry hiaritry zay fitsapan̈a tojy atsika. Baka amy zen̈y fo hahafahantsika hahita raha antinaintsika lera izio tanteraka. Atsika tsy tiantsika hitovy amindro olo nampiran̈iny Jesosy tamy voendraha latsaka tamy toeran̈a feno vatovato in̈y. Iro koa fa naharen̈y vaovao tsara tamy voanalohany, iro ravoravo mare. Fa izikoa efa nisy ‘raha sarotro na fan̈injehan̈a’, iro efa nimpody afara edy. (Mat. 13:5, 6, 20, 21) Tsy mora avio tsy mamparavoravo ndraiky miatriky fanoheran̈a na fitsapan̈a zen̈y, fa izikoa atsika miaritry fo atsika hahazo hatsaran̈a. Amy fomba akory?

12. Ino hatsaran̈a ho azontsika izikoa atsika miaritry fitsapan̈a?

¹² Jakoba pianatra nikoran̈a momba hatsaran̈a azo baka amy fiaretan̈a fitsapan̈a io. Karaha ty nisoratiny: “Ambilà fiaretan̈a io hankefa asanany, baka anaro ho lavorary sady tsy hisy tsin̈y amy lafiny jiaby, ke tsy hisy raha tsy ampy aminaro.” (Jak. 1:2-4) Ke volan̈iny Jakoba fa misy asany fiaretan̈a io. Izio misy tanjon̈onany. Han̈ampy anao izio hanan̈a tsarabe toetry aby ty: faharetan̈a, finoan̈a, avio hitavandra mare Zan̈ahary. Fa mbala misy raha maventy hafa koa ho azontsika izikoa atsika miaritry fo.

13-14. Ino vokany izikoa atsika miaritry, avio ino ifandraisany zen̈y amy fan̈antinan̈a? (Romanina 5:4)

¹³ Vakia Romanina 5:4. Paoly mivolan̈a fa fiaretan̈a io mahavy atsika ‘hankasitrahiny Zan̈ahary.’ Ke izikoa anao miaritry Jehovah hankasitraka anao. Zen̈y ndraiky tsy mivolan̈a fa Jehovah ravoravo mahita anao tojy raha sarotro na problemo. Fa ino fo mahavy izy ravoravo? Anao tsy mivadiky fa miaritry fo. Ke ten̈a mankahery mahay fa izikoa atsika miaritry ravoravo fony Jehovah!​—Sal. 5:12.

¹⁴ Aleva onon̈o fa maro raha sarotro tojy Abrahama, fa ndray zen̈y izy tsy nivadiky fa niaritry fo. Ke Jehovah ravoravo taminany. Loso kamaradiny izy avio nikeny ho olo marin̈y. (Gen. 15:6; Rom. 4:13, 22) Atsika koa afaka ho karaha zen̈y. Tsy miankiny aminy hamarozany raha ataontsika amy fanompoan̈a ndreky aminy andraikitry anan̈antsika hahavy Jehovah ho ravoravo amintsika. Fa izy ho ravoravo amintsika izikoa atsika miaritry fo ke tsy mivadiky. Avio ndray firy taon̈o atsika na ino raha iain̈antsika na karakory fahaizan̈antsika, atsika jiaby samy mahavita miaritry aby. Misy fitsapan̈a ma atrefinao amy zioty kanefa anao mbala tsy mivadiky amy Jehovah fo? Izikoa zen̈y, aleva onon̈o  fa Jehovah ravoravo aminao. Fahaizantsika raha zen̈y ten̈a misy vokany mare amintsika. Mety hahavy fan̈antinan̈antsika hahaifatatra fo zen̈y.

15. Ino koa raha nikoran̈iny Paoly amy Romanina 5:4, 5, avio ino fan̈ontanin̈a mety hiboaka baka amy zen̈y?

¹⁵ Nazavainy Paoly fa Jehovah ho ravoravo amintsika izikoa atsika tsy mivadiky aminany fa miaritry fo. Aleva onon̈o koa raha nivolan̈iny baka tio: ‘Fankasitrahany Zan̈ahary ndraiky mahavy atsika hanan̈a fan̈antinan̈a, avio fan̈atinan̈a tsy mandiso fan̈antinan̈a.’ (Rom. 5:4, 5) Raha zen̈y mety hampalany fan̈ahy olo sasany. Nan̈ino? Fotony amy Romanina 5:2 Paoly nivolan̈a fa iro Kristianin̈y ta Roma tan̈y efa nanan̈a fan̈antinan̈a. Izio “fan̈antinan̈a voninahitry Zan̈ahary.” Ke mety hisy olo han̈ontany: ‘Izikoa iro Kristianin̈y aby io efa nanan̈a fan̈antinan̈a, nan̈ino mbala nitanisainy Paoly faramparany amy raha nikoran̈iny koa fan̈antinan̈a?’

16. Akory hahavy fan̈antinan̈anolo araiky loso mahaimitombo? (Zahava koa sary.)

¹⁶ Hazava amintsika raha tiany Paoly koran̈iny zen̈y, izikoa alaintsika onon̈o fa fan̈antinan̈a io raha mety mitombo. Diniha baka ty: Mbala azonao onon̈o ma taminy anao voanalohany naharen̈y fampan̈antinan̈a tsara baka amy Volan̈a Zan̈ahary? Anao tamy zen̈y mety nieritreritry fa tsara mare hiain̈y mandrakizay amy Paradisa ambony tany zen̈y. Anao fo tsy ten̈a nahatoky fa raha zen̈y ho tanteraka marin̈y. Fa izikoa anao efa nanjary nahay raha maro momba Jehovah ndreky fampan̈antinan̈a koran̈iny Baiboly, anao loso nahainatoky fo fa ten̈a ho hisy ankitin̈y raha zen̈y.

17. Akory hahavy fan̈antinan̈anao hahaihitombo fo ndray anao efa nanokanten̈a ndreky vita batisa?

¹⁷ Avio ndray efa afarany batisanao, mbala mahaimitombo fo koa fan̈antinan̈anao. Nan̈ino? Fotony anao nanjary nahay tsarabe Jehovah ndreky nahaitia izy fo. (Heb. 5:13–6:1) Mety efa niain̈anao foeky koa raha volan̈iny Romanina 5:2-4. Fa ndray anao tojy raha  sarotro maro, anao niaritry fo ke Jehovah ravoravo taminao. Loso hitanao fa Zan̈ahary mankasitraka anao, ke anao zioty mahaimatoky fo fa anao tsy maintsy hahazo raha nampan̈antinainy. Nahainitombo fo fan̈antinan̈anao, ke efa tsy mira izy taminy anao vo nahay raha momba Zan̈ahary in̈y. Anao nahairesy lahatra fo fa ten̈a ho hisy izio sady tianao mare. Loso misy vokany mare aminao. Misy vokany amy fiain̈ananao jiaby foeky izio, avio man̈ova fomba itondrasanao fianakavian̈anao ndreky fomba angalanao fanapahankevitry avio firaka amy fomba ampiasainao fotoan̈anao.

18. Ino toky amiany Jehovah?

¹⁸ Apostoly Paoly koa mikoran̈a raha hafa matomboko momba fan̈antinan̈a anan̈anao, tafarany anao loso nankasitrahiny Zan̈ahary io. Izy man̈amia toky anao fa tsy maintsy ho tanteraka fan̈antinan̈anao io. Nan̈ino anao afaka matoky zen̈y? Fotony Zan̈ahary man̈amia toky Kristianin̈y karaha ty, eraka raha volan̈iny Paoly ty: ‘Fan̈antinan̈a io tsy mandiso fan̈antinan̈a fotony efa natao an̈atiny fontsika fitiavan̈any Zan̈ahary, baka tamy fan̈ahy masin̈y namian̈a atsika.’ (Rom. 5:5) Ke anao afaka matoky tsarabe fan̈antinan̈a namezany Jehovah anao io.

19. Ino raha azonao antoko momba fan̈antinan̈anao?

¹⁹ Saintsain̈a raha nampan̈antinainy Jehovah i Abrahama ndreky nan̈ino Zan̈ahary nankasitraka izy, avio nan̈eky izy hanjary kamaradinany. Tanteraka raha nantinainy Abrahama. Baiboly mivolan̈a: “Lera Abrahama efa nan̈aboaka fa izy nahadin̈y niambin̈y, tio izy vo nahazo fampan̈antinan̈a zen̈y.” (Heb. 6:15; 11:9, 18; Rom. 4:20-22) Izy tsy diso fan̈antinan̈a. Afaka matoky koa anao fa izikoa anao tsy mivadiky ho azonao koa raha antinainao. Mamparavoravo mahay fa fan̈antinan̈anao io raha ten̈a ho hisy. Anao tsy ho diso fan̈antinan̈a foeky! (Rom. 12:12) Paoly nivolan̈a: ‘Irarian̈a Zan̈ahary man̈amia fan̈antinan̈a hameno fonaro aminy haravoan̈a ndreky fiadan̈ana, fotony anaro matoky izy! Amy zen̈y fan̈antinan̈anaro hahaiho azo antoko fo baka aminy angovony fan̈ahy masin̈y.’​—Rom. 15:13.