1. Ino raha mila ataony rahalahy araiky baka izy hahomby?

 KARAHA ty nivolan̈iny Panjaka Davida tamy Solomona: ‘Manàn̈a korazy avio man̈anaova lelahy tsarabe.’ (1 Mpanj. 2:1-3) Mila man̈araka torohevitry zen̈y lan̈iany lelahy tihangala tahaka Jesosy. Iro mila man̈araka lalàn̈any Zan̈ahary ndreky man̈araka toro lalan̈any Baiboly amy fiain̈anandro jiaby izikoa iro tihahomby. (Lioka 2:52) Nan̈ino ma rahalahy tanora araiky mila mifen̈y mare hanjary lelahy matotro?

2-3. Nan̈ino rahalahy tanora araiky mila mifen̈y mare hanjary Kristianin̈y matotro?

² Lelahy kristianin̈y manan̈a andraikitry maro maventy amy fianakavian̈a ndreky an̈ivony fiangonan̈a. Azo antoko fa anaro rahalahy tanora efa nieritreritry andraikitry miambin̈y anaro aminy amaray. Anaro mety man̈iry ho loso panompo manontolo andra, hanjary pikarakara fiangonan̈a na antipan̈ahy foeky. Anaro koa mety man̈iry hanambady ndreky hiteraka. (Efes. 6:4; 1 Tim. 3:1) Hahavita hanakatra tanjon̈o aby zen̈y anaro sady hahomby izikoa mifen̈y hanjary Kristianin̈y matotro. b

³ Ino raha han̈ampy anao hanjary Kristianin̈y matotro? Misy raha maromaro mila hianaranao ndreky mila hifen̈anao mare. Ke ino raha mila ataonao amy zioty baka hioman̈anao aminy andraikitry mety hiambin̈y anao aminy amaray, amy zen̈y anao hahomby?

4. Aia mety ahitanao modely tsara? (Zahava koa sary.)

⁴ Aleva tahaka olo man̈amia modely tsara. Amy Baiboly ao feno ohatrany lelahy nan̈amia modely tsara ke mety alainy rahalahy tanora tahaka. Iro lelahy aby io olo tia Zan̈ahary ndreky nan̈ano andraikitry isankarazany baka hikarakaran̈a vahoakanany.  Mety mahita lelahy kristianin̈y matotro man̈eva alain̈a tahaka koa anao amy fianakavian̈anao ndreky amy fiangonan̈anaro ao. (Heb. 13:7) Jesosy Kristy koa modely ten̈a tsara mety alainao tahaka. (1 Pet. 2:21) Lera anao mandiniky ohatranolo aby io, iritrireta ino toetry tianao alain̈y tahaka amindro. (Heb. 12:1, 2) Baka io, diniha akory fomba hahafahanao mangala tahaka iro.

5. Ino han̈ampy anao hahay hisain̈y, avio nan̈ino zen̈y ten̈a raha maventy? (Salamo 119:9)

⁵ Mifen̈a hanan̈a “fahaizan̈a misain̈y” avio “arova” izio. (Ohab. 3:21) Lelahy mahay misain̈y zen̈y mandiniky tsara alohany han̈ano raha. Ke mifen̈a baka anao hahay han̈ano zen̈y ndreky hahavita han̈ano zen̈y fo. Nan̈ino? Fotony ankamarozany tanora amy donia ty man̈ano fanapahankevitry erakany raha an̈aty jerindro fo na erakany raha tiandro fo. (Ohab. 7:7; 29:11) Baka io, mety hisy vokany aminy eritreritrinao ndreky raha ataonao koa tele, filma, Internet ndreky tranonkala fifaneraseran̈a. Fa ino han̈ampy anao hahay hisain̈y? Anao mila mianatra toro lalan̈a amy Baiboly, avio diniha nan̈ino toro lalan̈a aby io mahatsara anao. Baka io amy zay, raha nianaranao aby io ampiasà baka hahaizanao han̈ano fanapahankevitry mamparavoravo Jehovah. (Vakia Salamo 119:9.) Izikoa anao mifen̈y man̈ano karaha zen̈y fo, anao hanjary lelahy kristianin̈y matotro. (Ohab. 2:11, 12; Heb. 5:14) Alo hidinihintsika nan̈ino fahaizan̈a misain̈y han̈ampy anao amy raha aroe ty: 1) izikoa fa mifandray amy ranabavy, avio 2) lera hanapakevitry momba sanjy atao.

6. Nan̈ino fahaizan̈a misain̈y han̈ampy rahalahy tanora araiky han̈aja ranabavy?

⁶ Izikoa anao mahay misain̈y, han̈ampy anao han̈aja man̈angy zen̈y. Aradalàn̈a izikoa rahalahy tanora araiky mba tihiaraka amy ranabavy araiky, avio tsisy raha maharatsy zen̈y. Kanefa tsaiky lelahy araiky mahay misain̈y zen̈y, tsy hivolan̈a na hanoratra na han̈ano raha hafa man̈aboaka fa izy tavela na tihiaraka amy ranabavy araiky, izikoa izy tsy ten̈a mieritreritry hangala vady ranabavy io. (1 Tim. 5:1, 2) Avio, izikoa iro efa miaraka, izy hiaro lazany ranabavy io, ke iroroe tsy hiaraka  manokana foeky, izikoa tsisy olo matotro miaraka amindro.​—1 Kor. 6:18.

7. Nan̈ino fahaizan̈a misain̈y han̈ampy rahalahy tanora araiky lera izy mifidy lamba ndreky koafy ataony?

⁷ An̈isany fomba hafa an̈aboahany tsaiky lelahy araiky fa izy mahay misain̈y, fahaizany mifidy lamba ndreky koafy ataony. Matetiky olo mamoron̈o ndreky man̈aparitaka lamaody aby io olo tsy mijery fitsipiky Jehovah na maloto fitondranten̈a. Hita amy modeliny lamba ataondro toetsain̈indro. Man̈arabatan̈a mare iro io, na matetiky efa tsy hita eky akory an̈avahan̈a lelahy amy man̈angy. Ke tsaiky lelahy araiky man̈iry tiho Kristianin̈y matotro, izikoa fa mifidy lamba sikinin̈y, mifen̈y man̈araka toro lalan̈a Baiboly ndreky mangala tahaka olo modely an̈ivony fiangonan̈a. Izy afaka man̈ontany ten̈a karaha ty: ‘Hita amy lamba fidiko ty ma fa zaho olo misain̈y tsara ndreky man̈aja olo? Direkty hitanolo amy lamba ataoko ma fa zaho panompony Zan̈ahary?’ (1 Kor. 10:31-33; Tit. 2:6) Ino vokany izikoa tsaiky lelahy araiky mahay misain̈y? Han̈aja izy iro rahalahy ndreky ranabavy aby io, baka io Jehovah Babany andan̈itry an̈y koa.

8. Akory hahavy rahalahy tanora ho azo atokisan̈a?

⁸ Mifen̈a ho azo atokisan̈a. Tsaiky lelahy azo atokisan̈a zen̈y mifen̈y man̈ano andraikitrinany jiaby. (Lioka 16:10) Diniha baka Jesosy. Izy ten̈a modely tsara amy zen̈y. Izy tsiary nan̈ano raha zara fa vita zen̈y. Zay raha nan̈irahany Jehovah izy nataony aby, ndray sarotro taminany. Izy tia olo intsaka eky iro pianatranany aby io, ke izy von̈ono hahafoe ain̈inany han̈avotan̈a iro. (Jaona 13:1) Aleva tahaka Jesosy ke ataova tsara zay raha ampan̈anaovin̈y anao. Izikoa tsy hainao karakory atao man̈ano raha araiky, mifen̈a hanetry ten̈a ke mangataha fan̈ampian̈a amy rahalahy matotro. Aza atao zara fa vita fo raha ataonao fa ankifà tsarabe. (Rom. 12:11) Ataova karaha ‘niny Jehovah in̈y izio fa tsy ninolo.’ (Kol. 3:23) Anao tsy lavorary, ke manetre ten̈a avio ikia hadisovan̈anao.​—Ohab. 11:2.

9. Nan̈ino rahalahy tanora mila mianatra raha han̈ampy izy amy fiain̈ana andavanandra?

⁹ Izikoa tianao hanjary lelahy matotro, anao mila mianatra raha han̈ampy anao amy fiain̈ana andavanandra. Raha zen̈y han̈ampy anao hahavita tsara andraikitrinao amy fiangonan̈a, sady han̈ampy anao haharitry aminy asanao, ke hahavitanao hikarakara raha ilainao ndreky hamelon̈o fianakavian̈anao. Hifandray tsara aminolo koa anao izikoa manan̈a fahaizan̈a aby zen̈y. Alo atsika handeha handiniky sasany amy raha mila ianaranao zen̈y.

10-11. Izikoa rahalahy tanora mahay manoratra ndreky mamaky teny tsara, ino hatsaran̈a ho azony ndreky fiangonan̈a? (Salamo 1:1-3) (Zahava koa sary.)

¹⁰ Mianara manoratra ndreky mamaky teny tsara. Baiboly mivolan̈a fa sambatra ndreky mahomby lelahy araiky, izikoa izy mamaky ndreky misaintsain̈y Volan̈a Zan̈ahary isanandra. (Vakia Salamo 1:1-3.) Izy manjary hahay  fomba fihevitry Jehovah, izikoa mamaky Baiboly isanandra. Ke raha zen̈y han̈ampy izy hahay handiniky tsarabe ndreky hahay hanapakevitry. (Ohab. 1:3, 4) Ten̈a ilain̈a amy fiangonan̈a lelahy karaha zen̈y. Nan̈ino?

¹¹ Iro rahalahy ndreky ranabavintsika aby io mila olo mahay mampianatra ndreky mahavita man̈amia iro torohevitry tsara baka amy Baiboly. (Tit. 1:9) Izikoa anao mahay mamaky ndreky manoratra tsarabe, anao hahavita han̈oman̈a kabaro ndreky valinteny azahoanolo hatsaran̈a ndreky mampatanjaka finoan̈a. Ho vitanao koa hangala naoty han̈ampy tsara anao, lera anao man̈ano fianaran̈a manokan̈a ndreky mitandren̈y kabaro amy fivorian̈a ndreky fivoriambe. Iro raha nalainao antsoratra aby zen̈y han̈ampy anao hankafatatra finoan̈anao ndreky hankahery olo hafa koa.

12. Ino raha han̈ampy anao hahay hikoran̈a tsara aminolo?

¹² Mianara hahay hikoran̈a tsara aminolo. Lelahy kristianin̈y mila mianatra mahay mikoran̈a aminolo. Dikanizen̈y, izy mila mitandren̈y ndreky man̈ano raha azahoany tsara eritreritrinolo ndreky fihetsehamponolo. (Ohab. 20:5) Mila hainy ino dikany fihetsikinolo ndreky raha ambarany soranany avio feonany. Kanefa tsy ho vitanao raha zen̈y izikoa anao tsy manokan̈a fotoan̈a hiarahan̈a matetiky aminolo. Izikoa baka amy fitaovan̈a elektroniky fo hikoran̈anao aminolo, karaha ataony e-mail na SMS, anao tsy hahay hikoran̈a aminolo mivantan̈a. Ke mifen̈a mitady fomba ikoran̈ana mivantan̈a aminolo.​—2 Jaona 12.

13. Ino koa raha mila ianarany tsaiky lelahy? (1 Timoty 5:8) (Zahava koa sary.)

¹³ Mianara mamelonten̈a. Lelahy kristianin̈y matotro mila mahavita mamelonten̈a ndreky mamelon̈o fianakavian̈anany. (Vakia 1 Timoty 5:8.) Amy tany sasany, rahalahy tanora mety hianatra asa amy babany na aminy havany. Fa amy tany sasany ndraiky, tanora efa afaka mianatra asa amy lise. Fa ndray ino ndray ino raha misy aminaro an̈y, tsara izikoa anao mianatra raha ahafahanao mahita asa. (Asa. 18:2, 3; 20:34; Efes. 4:28) Ataova tsara asanao avio ankifà fiaraka amy farany, amy zen̈y ho hainolo jiaby fa anao olo mazoto miasa. Izikoa anao man̈ano karaha zen̈y, ho mora aminao hahita asa ndreky hahatana asa. Ten̈a ilainy lelahy kristianin̈y koa iro toetry ndreky fahaizan̈a nidinihintsika tato, fotony iro io han̈ampy izy aminy andraikitrinany afara an̈y. Alo baka hidinihintsika sasany aminy andraikitry aby zen̈y.

14. Ino raha mila ataony rahalahy tanora araiky baka izy hanjary panompo manontolo andra?

¹⁴ Panompo manontolo andra. Maro rahalahy matotro manomboko man̈ano fanompoan̈a manontolo andra rango iro mbala tanora. Loso mahay miaraka miasa aminolo isankarazany rahalahy tanora araiky, izikoa man̈ano pisava lalan̈a. Zen̈y koa man̈ampy izy hahay han̈ano tetibola ndreky hahay hitsitsy vola. (Fil. 4:11-13) Ino raha mety ataonao izikoa anao tihanompo manontolo andra? Man̈anaova pisava lalan̈a pan̈ampy antsendriky. Maro olo man̈ano zen̈y matetitetiky antsendriky, fotony man̈ampy iro han̈ano pisava lalan̈a maharitry. Izikoa anao man̈ano pisava lalan̈a anao mety ho afaka han̈ano karazan̈a fanompoan̈a manontolo andra hafa, karaha ataony pan̈ano fan̈oren̈ana na Betelita.

15-16. Ino han̈ampy rahalahy tanora hanjary pikarakara fiangonan̈a na antipan̈ahy?

¹⁵ Pikarakara fiangonan̈a na antipan̈ahy. Rahalahy jiaby tôkony hifen̈y hahafeno raha takin̈y aminy antipan̈ahy, ke hanompo rahalahy ndreky ranabavy an̈ivony fiangonan̈a. Volan̈iny Baiboly fa lan̈iany rahalahy man̈iry tihahazo andraikitry io “man̈iry asa tsara.” (1 Tim. 3:1) Alohany rahalahy araiky hanjary antipan̈ahy, izy tsy maintsy pikarakara fiangonan̈a antsendriky. Pikarakara fiangonan̈a aby io mitahitahy antipan̈ahy baka ho vitandro ikarakara tsara iro rahalahy ndreky ranabavy amy fiangonan̈a. Na antipan̈ahy na pikarakara fiangonan̈a, samy manetry ten̈a ke mikarakara iro rahalahy ndreky ranabavy aby io, avio ten̈a mazoto koa amy fitorian̈a. Ndray mbala latsaka heliny 20 taon̈o rahalahy tanora araiky, izy efa afaka hanjary pikarakara fiangonan̈a. Efa mety tindren̈a antipan̈ahy koa pikarakara fiangonan̈a mahay, ndray 20 taon̈o na mahery hely.

¹⁶ Ino han̈ampy anao baka hahafeno raha takin̈y aminy andraikitry aby io? Amy Baiboly ao ahitanao iro toetry vitsivitsy mila anan̈anao. Kanefa aza adin̈a fa fitiavanao Jehovah avio fianakavian̈anao ndreky fiangonan̈a hahavy anao hifen̈y hanan̈a iro io. (1 Tim. 3:1-13; Tit. 1:6-9; 1 Pet. 5:2, 3) Diniha tsara iro raha takin̈y tsiaraikiaraiky. Mivavaha amy Jehovah baka izy han̈ampy anao hahafeno iro io. c

17. Ino han̈ampy rahalahy tanora ho von̈ono aminy andraikitrinany lera izy manambady? (Zahava koa sary.)

¹⁷ Vady ndreky lohany fianakavian̈a. Jesosy nivolan̈a fa misy lelahy kristianin̈y matotro sasany von̈ono tsy hanambady. (Mat. 19:12)  Fa izikoa ndraiky anao mifidy hanambady, hisosoko andraikitrinao fotony anao hanjary vady ndreky lohany fianakavian̈a. (1 Kor. 11:3) Jehovah man̈iraka lelahy manambady ho tia vadiny ndreky han̈amia raha ilainy, hanjary kamaradiny marikitry avio han̈ampy izy hifandray marikitry amy Jehovah. (Efes. 5:28, 29) Iro toetry ndreky fahaizan̈a nidinihintsika tamy lahatsoratra ty, karaha ataony fahaizan̈a misain̈y, fan̈ajan̈a man̈angy ndreky azo atokisan̈a, samby han̈ampy anao ho vady tsara. Ke lera anao manambady ndreky loso lohany fianakavian̈a, ho vitanao tsarabe andraikitrinao.

18. Ino han̈ampy rahalahy tanora ho von̈ono hanjary baba?

¹⁸ Baba. Izikoa anao fa manambady, anao mety ho loso babanolo. Jehovah Baba farany tsara ke maro raha mety ianaranao baka aminany. (Efes. 6:4) Jehovah tsy nihafahafa foeky nivolan̈a tamy Jesosy Zanany fa izy tiany ndreky nankasitrahiny. (Mat. 3:17) Lera anao loso baba, koràn̈a matetitetiky amy zanakanao fa anao tia iro. Mahaiza midera iro koa fa misy raha tsara vitandro. Izikoa anao mangala tahaka Jehovah, anao han̈ampy zanakanao hanjary lelahy ndreky man̈angy matotro. Rango zioty anao efa afaka mioman̈a aminy andraikitry zen̈y. Amy fomba karakory? Tiava ndreky karakaray tsara olo amy fianakavian̈anao ndreky amy fiangonan̈a, avio mizara mivolan̈a amindro fa iro tianao ndreky ten̈a valera aminao. (Jaona 15:9) Raha zen̈y han̈ampy anao hanjary baba ndreky vady tsara afara an̈y. Fa parapavianizen̈y, anao ho valera mare amy Jehovah ndreky fianakavian̈anao avio fiangonan̈a.

19-20. Ino han̈ampy rahalahy tanora hanjary lelahy kristianin̈y matotro? (Zahava sary amy fon̈ony gazety ty.)

¹⁹ Aza adin̈anaro rahalahy tanora fa mila mifen̈y mare anaro vo hanjary lelahy kristianin̈y matotro. Anaro mila mifidy olo tsara atao modely, mifen̈y hanan̈a fahaizan̈a misain̈y, ho azo atokisan̈a, mianatra raha han̈ampy anaro amy fiain̈ana andavanandra, avio mioman̈a aminy andraikitry miambin̈y anaro.

²⁰ Tsy ndraiky maro loatra edy zen̈y va? Ndraikindraiky anao mety hieritreritry karaha zen̈y. Fa izio ho vitanao fo. Tsarova fa Jehovah man̈iry mare han̈ampy anao. (Isaia 41:10, 13) Iro rahalahy ndreky ranabavinao amy fiangonan̈a aby io koa han̈ampy anao. Lera anao loso lelahy kristianin̈y matotro tsarabe, anao ho ravoravo ndreky ho afapo amy fiain̈ananao. Tianay mare anaro rahalahy tanora! Irarian̈a Jehovah hitahy ezaka ataonaro zioty baka hanjary Kristianin̈y matotro.​—Ohab. 22:4.