1. Ino raha mila ataony Kristianin̈y araiky izikoa izy tiho matotro?

 MAHARIKIAN̈A mahita tsaiky betibetiky fo efa loso olobe. Karaha raha aviavy hoazy fo raha zen̈y. Kristianin̈y ndraiky izikoa tiho matotro tsy maintsy man̈ano raha, fotony zen̈y tsy aviavy hoazy. b (1 Kor. 13:11; Heb. 6:1) Ke ino raha han̈ampy anao ho matotro? Anao mila mifandray marikitry amy Jehovah ndreky mila fan̈ahy masin̈y baka aminany, fotony zen̈y han̈ampy anao hanan̈a toetry tiany, hanan̈a fahaizan̈a ilainao amy fiain̈ana andavanandra, baka io ho von̈ono aminy andraikitry miambin̈y anao aminy amaray.​—Ohab. 1:5.

2. Ino raha ianarantsika baka amy Genesisy 1:27, avio ino raha hidinihintsika amy lahatsoratra ty?

² Jehovah koa fa niasa olombelon̈o, nataony nisy lelahy ndreky viavy. (Vakia Genesisy 1:27.) Fa vatan̈any lelahy ndreky viavy fo tsy mitovy, avio mbala misy raha hafa koa tsy mampitovy iro. Jehovah, ohatra, izikoa fa niasa lelahy ndreky viavy, iro samby namezany andraikitrindro. (Gen. 2:18) Ke misy toetry ndreky fahaizan̈a tsy maintsy hanan̈andro baka ho vitandro andraikitry namian̈a iro zen̈y. Hidinihintsika amy lahatsoratra ty ino raha mila ataony ranabavy tanora baka izy hanjary viavy matotro. Baka io amy lahatsoratra man̈araka ty, atsika handiniky ino raha mila ataony rahalahy tanora.

3-4. Aia aby mety ahitany ranabavy tanora modely tsara afaka alaindro tahaka? (Zahava koa sary.)

³ Amy Baiboly ao misy man̈angy maro ten̈a niavaka, tia Jehovah avio nanompo izy. (Zahava amy jw.org lahatsoratra “Inona no Ianarantsika avy Amin’ireo Vehivavy Voatantara ao Amin’ ny Baiboly?”) Iro man̈angy aby io ‘nahay nandanjalanja amy raha atao’ avio ‘mafatoky tamy raha jiaby’, eraka raha koran̈iny andininteny fototro amy fianaran̈a ty. Fa amy fiangonan̈a koa misy ranabavy matotro afaka alainy ranabavy tanora tahaka.

⁴ Ranabavy tanora ma anao? Azovy aby ranabavy matotro hitanao man̈eva alain̈y tahaka? Diniha ino toetry tsarandro. Baka io, iritrireta akory fomba mety han̈aboahanao toetry aby zen̈y amy raha ataonao. Amy fehintsoratra man̈araka aby ty, atsika handiniky toetry telo mila hanan̈any man̈angy matotro.

5. Nan̈ino man̈angy mila manetry ten̈a izikoa tiho matotro?

⁵ Manetry ten̈a. Ten̈a ilainy Kristianin̈y matotro toetry io. Izikoa man̈angy araiky manetry ten̈a, izy hifandray tsarabe amy Jehovah ndreky aminolo hafa. (Jak. 4:6) Ohatra, izikoa izy tia Jehovah, izy hanetry ten̈a ke han̈eky toro lalan̈a namiany Babany andan̈itry an̈y. Tsy ino zen̈y fa “lelahy lohany man̈angy.” (1 Kor. 11:3) Samy mety ampiharin̈y tsarabe an̈ivony fiangonan̈a ndreky amy fianakavian̈a toro lalan̈a io. c

6. Ino raha mety ianarany ranabavy tanora baka amy fanetrenten̈any Rebeka?

⁶ Diniha baka ohatrany Rebeka. Izy viavy nahay raha sady tsy navozovozo nanapakevitry. Hainy tsara koa ombian̈a izy tôkony han̈ano raha ndreky amy fomba karakory. (Gen. 24:58; 27:5-17) Fa izy koa nan̈aja olo avio nan̈eky fahifan̈a. (Gen. 24:17, 18, 65) Izikoa anao manetry ten̈a karaha Rebeka ke manohan̈a lan̈iany olo namezany Jehovah fahifan̈a, anao hanjary ohatra tsara amy fianakavian̈anao ndreky amy fiangonan̈a.

7. Akory angalany ranabavy tanora tahaka Estera ke han̈eky fa misy erany raha mety ho vitandro?

⁷ Man̈eky fa misy erany fo raha mety ho vitanao. Toetry ilainy Kristianin̈y matotro jiaby koa io. Baiboly mivolan̈a fa ‘hendry lan̈iany man̈eky fa misy erany fo raha vitany.’  (Ohab. 11:2, l.p.a.) Estera viavy nanan̈a toetry zen̈y sady navozo Zan̈ahary. Izy tsy nitoron̈o izy panjakavavy fa nanetry ten̈a fo ke nitandrin̈esany ndreky narehany sosokevitry baka tamy Mordekay, zanaka rahalahiny babany. (Est. 2:10, 20, 22) Akory an̈aboahanao fa anao man̈eky fa misy erany fo raha mety ho vitanao? Mangataha torohevitry aminolo hafa, avio areha raha zen̈y.​—Tit. 2:3-5.

8. Eraka 1 Timoty 2:9, 10, akory hahaizany ranabavy han̈ano safidy tsara koa fa hifidy lamba ndreky sanjy atao?

⁸ Nisy fomba hafa koa nan̈aboahany Estera fa izy nanan̈a toetry zen̈y sady nanetry ten̈a. Izy farandraha ‘tsara sora ndreky tsara vatan̈a’ eky, fa izy fo tsy nan̈ano raha hahavy masonolo tsy hiala aminany. (Est. 2:7, 15) Akory fomba azahoany ranabavy hatsaran̈a baka aminy ohatrany Estera? Mikoran̈a fomba araiky amy zen̈y amy 1 Timoty 2:9, 10. (Vakia) Apostoly Paoly nivolan̈a fa man̈angy kristianin̈y tôkony han̈ano lamba maotin̈y ndreky tôkony hisain̈y tsara. Volan̈a griky nampiasainy Paoly io man̈ambara fa man̈angy kristianin̈y tôkony han̈ano lamba mendriky na milamin̈y tsara sady man̈aboaka fa izy man̈aja eritreritrinolo ndreky fihetsehampondro. Ten̈a mirehareha zahay manan̈a anaro ranabavy, fotony anaro man̈araka torohevitriny Paoly zen̈y!

9. Ino raha mety ianarantsika baka aminy ohatrany Abigaila?

⁹ Mahay man̈avaka. Mila mifen̈y hanan̈a toetry io ranabavy kristianin̈y izikoa tiho matotro. Karakory ma olo mahay man̈avaka zen̈y? Izio olo mahay ino raha tsara ino raha ratsy, ke izy mifidy han̈ano ny tsara. Karaha zen̈y iziô Abigaila. Vadiny nan̈ano fanapahankevitry ratsy nety hampiditry lagin̈y tamy fianakavian̈andro jiaby. Fa Abigaila nan̈ano raha malaky. Izy nahay nan̈avaka ke nahavita nan̈avotro fahin̈ananolo maro. (1 Sam. 25:14-23, 32-35) Fahaizan̈a man̈avaka io koa man̈ampy atsika hahay ombian̈a atsika tôkony hivolan̈a ndreky ombian̈a tôkony hangin̈y. Izio koa han̈ampy atsika hahay handanjalanja ke tsy han̈ano raha hampamen̈atra olo izikoa fa man̈ontany akory nanindro.​—1 Tes. 4:11.

10-11. Izikoa anao mahay manoratra ndreky mamaky teny tsara, ino hatsaran̈a ho azonao ndreky ho azonolo hafa? (Zahava koa sary.)

¹⁰ Man̈angy kristianin̈y mila mianatra raha han̈ampy izy amy fiain̈ana andavanandra. Misy raha sasany ianarany tsaiky man̈angy rango mbala hely mety han̈ampy izy fo firaka izy be. Alo zahavantsika sasany amy zen̈y.

¹¹ Mianara manoratra ndreky mamaky teny tsara. Amy kolontsain̈y sasany, man̈angy tsy voatery mianatra mamaky teny ndreky manoratra. Kanefa raha aby zen̈y ten̈a ilainy Kristianin̈y  jiaby. d (1 Tim. 4:13) Ke aza ambela hisy raha foeky hisakana anao tsy hianatra hamaky teny ndreky hanoratra. Ino ma mahatsara mahay mamaky ndreky manoratra? Hanjary ho moramora aminao hahita asa ndreky hahadin̈y ela aminy asa araiky. Ho vitanao koa hianatra Baiboly ndreky hampianatra olo. Fa ny ten̈a maventy, anao hifandray tsarabe amy Jehovah izikoa fa mamaky Volan̈anany ndreky misaintsain̈y izio.​—Jos. 1:8; 1 Tim. 4:15.

12. Ino raha ianaranao baka aminy Ohabolana 31:26?

¹² Mianara hahay hikoran̈a tsara aminolo. Kristianin̈y mila mahay mikoran̈a aminolo. Ty torohevitry mahomby namezany Jakoba pianatra atsika: “Irarian̈a olo jiaby ho von̈ono hitandren̈y, tsy ho mekimeky hivolan̈a.” (Jak. 1:19) Izikoa anao mitandren̈y tsara lera misy olo mivolan̈a, aboakanao baka amy zen̈y fa anao ‘mahay mahinakinaka.’ (1 Pet. 3:8) Izikoa tsy ten̈a mazava aminao raha tianolo araiky volan̈iny na raha tsapany, anao afaka man̈apetraka fan̈ontanian̈a mety tsara. Baka io, mandiniha tsara antsendriky alohany hivolan̈a. (Ohab. 15:28, l.p.a.) Man̈ontania ten̈a karaha ty: ‘Marin̈y salakady mankahery ma raha handeha volan̈iko ty? Tsara fan̈ahy ndreky man̈aja olo ma zaho izikoa mivolan̈a izio?’ Aleva tahaka modely tsarany ranabavy matotro mahay mikoran̈a aminolo. (Vakia Ohabolana 31:26.) Diniha karakory ataondro koa fa mikoran̈a aminolo. Arakaraka ahaizanao zen̈y hahavy anao hifandray tsara aminolo.

13. Akory ahaizanao mikarakara tokantran̈o? (Zahava koa sary.)

¹³ Mianara mikarakara tokantran̈o. Amy tany maro, man̈angy ny ten̈a man̈ano asa antran̈o. Mamanao afaka mampianatra anao han̈ano zen̈y, na koa ranabavy hafa. Karaha ty ho ranabavy kahian̈a Cindy: “An̈isany raha farany tsara nianarako baka tamy mamako ty: ‘Izikoa anao mazoto miasa, anao ho ravoravo.’ Zaho nampianariny nandoky, nan̈adio, nanjaitry, avio nan̈ano bazary. Ke vitako nikarakara raha nilaiko avio zaho nahavita nanompo Jehovah tsarabe. Zaho koa nampianariny mamako ho tia mandray vahiny, ke zaho nanjary nifanojy tamy piaramanompo maro tsara fan̈ahy sady mety nalaiko tahaka.” (Ohab. 31:15, 21, 22) Man̈angy mazoto miasa, tia mandray vahiny avio mahay mikarakara tokantran̈o ten̈a fitahian̈a amy fianakavian̈anany ndreky amy fiangonan̈a.​—Ohab. 31:13, 17, 27; Asa. 16:15.

14. Ino raha ianaranao baka amy tantarany Crystal, avio ino raha mila alainao onon̈o?

¹⁴ Mianara ho afapo amy raha anan̈anao. Kristianin̈y jiaby mila mahay man̈ano zen̈y. (Fil. 4:11) Karaha ty nivolan̈iny Ranabavy Crystal: “Papa ndreky mamako nan̈ampy zaho hifidy fianaran̈a hataoko tamy lise, amy zen̈y zaho mba manan̈a fahaizan̈a ilaiko afarafara  an̈y. Papako nandrisiky zaho han̈ano comptabilité. Raha zen̈y ten̈a nan̈ampy zaho.” Kanefa tsy ampy mianatra raha han̈ampy anao hahita asa fo, fa anao koa mila mianatra man̈ano tetibola, ke tsy tôkony handany vola mihoatrany zen̈y. (Ohab. 31:16, 18) Mifantoha fo amy tanjon̈o arapan̈ahy, ke aza malaky miditry trosa, avio mifen̈a hanan̈a fiain̈ana tsotra.​—1 Tim. 6:8.

15-16. Nan̈ino ten̈a valera iro ranabavy selibatera aby io? (Marka 10:29, 30)

¹⁵ Izikoa anao mifen̈y hanan̈a toetry tiany Jehovah ndreky mianatra raha han̈ampy anao amy fiain̈ana, anao ho von̈ono amy safidy mety mbala hataonao afara an̈y. Alo zahavantsika sasany amy zen̈y.

¹⁶ Anao afaka mifidy hidoko selibatera antsendriky. Karaha nivolan̈iny Jesosy in̈y, mety misy viavy sasany mifidy tsy hanambady nata raha zen̈y karaha hafahafa amy kolontsain̈indro. (Mat. 19:10-12) Fa sasany ndraiky mety hidoko selibatera nohony antony hafa. Matokisa fa Jehovah ndreky Jesosy tsy man̈ilikiliky Kristianin̈y selibatera. Erantany, iro ranabavy tsy manambady aby io ten̈a man̈ambela ohatra tsara amy fiangonan̈a. Iro be fitiavan̈a ndreky tia mikarakara olo, ke manjary efa mira anabavy ndreky reny aminolo maro amy fiangonan̈a.​—Vakia Marka 10:29, 30; 1 Tim. 5:2.

17. Ino raha mety ataony ranabavy tanora rango zioty izikoa tihanjary panompo manontolo andra?

¹⁷ Anao afaka hanjary panompo manontolo andra. Ranabavy ten̈a man̈ano ankamarozany asa fitorian̈a erantany. (Sal. 68:11) Anao zioty ma afaka man̈ano tanjon̈o hanjary panompo manontolo andra? Anao mety man̈ano pisava lalan̈a, piasa antsitrapo man̈ano fan̈oren̈ana, na koa Betelita. Tanjon̈onao zen̈y ataova antombavaka. Man̈ontania olo efa nahatakatra tanjon̈o karaha zen̈y baka ho hainao ino raha mila ataonao izikoa anao tihanjary panompo manontolo andra. Baka io, diniha ino raha mety ataonao baka hahatakaranao tanjon̈o zen̈y. Izikoa anao man̈ano fanompoan̈a manontolo andra, anao ho afaka han̈ano raha maro niny Jehovah.

18. Nan̈ino ranabavy araiky mila mifidy tsara olo hataony vady? (Zahava koa sary.)

¹⁸ Anao mety hifidy hanambady. Iro toetry ndreky fahaizan̈a nikoran̈intsika aby in̈y han̈ampy anao hanjary vady tsara. Izikoa anao mieritreritry hanambady, fidiana tsara olo hataonao  vady. Zen̈y an̈isany fanapahankevitry farany maventy ataonao amy fiain̈ananao. Tsarova fa anao tsy maintsy han̈eky fahifan̈anolo hanjary vadinao. (Rom. 7:2; Efes. 5:23, 33) Ke man̈ontania ten̈a karaha ty: ‘Kristianin̈y matotro ma izy? Raha arapan̈ahy ma raha farany maventy amy fiain̈ananany? Izy ma mahay manapakevitry? Ikeny ma raha tsy mety ataony? Izy ma man̈aja viavy? Ho vitany edy ma han̈ampy zaho hifandray tsara amy Jehovah, hamelon̈o zaho, avio hanjary kamaradiko mare? Ataony tsara ma andraikitrinany? Ohatra, ino andraikitrinany amy fiangonan̈a avio akory han̈anaovany iro io?’ (Lioka 16:10; 1 Tim. 5:8) Kanefa izikoa anao tihahita vady tsara, anao antsendriky mila miezaka ho vady tsara.

19. Nan̈ino tôkony hamparavoravo man̈angy kahian̈a ‘pan̈ampy’ vadiny zen̈y?

¹⁹ Baiboly mivolan̈a fa viavy vady tsara zen̈y ‘pan̈ampy’ vadiny sady ‘famenonany.’ (Gen. 2:18, l.p.a.) Man̈ambany viavy ma volan̈a aby zen̈y? Ehe, tsy zen̈y foeky! Ndray izio aby voninahitry mare. Nata Jehovah koa matetiky kahian̈a ‘pan̈ampy’ amy Baiboly ao. (Sal. 54:4; Heb. 13:6) Ten̈a pan̈ampy vadiny ankitin̈y man̈angy araiky izikoa manohan̈a vadiny ndreky miaraka miasa aminany baka hampahomby fanapahankevitry ataony vadiny io momba fianakavian̈andro. Baka io man̈angy araiky koa tia Jehovah, izy tsy man̈ano raha mety handrobaka lazany vadiny. (Ohab. 31:11, 12; 1 Tim. 3:11) Rango zioty anao efa afaka mioman̈a baka hanjary vady tsara. Amy fomba akory? Ankafatara fitiavanao Jehovah avio mazotoa man̈ampy olo amy fianakavian̈anao ndreky amy fiangonan̈a.

20. Akory hahavy renimpianakavian̈a hitondra hatsaran̈a amy fianakavian̈anany?

²⁰ Anao mety hanjary mama. Anao koa fa manambady, anaro roeny vadinao mety hiteraka. (Sal. 127:3) Ke tsara anao efa mandiniky momba zen̈y tsialohaloha. Toetry ndreky fahaizan̈a aby nidinihintsika tamy lahatsoratra ty han̈ampy anao lera anao manambady ndreky misy zanaka. Izikoa anao be fitiavan̈a, tsara fan̈ahy avio maharidraha, ho sambatra fianakavian̈anao avio zanakanao hahatsiaro tian̈a ndreky voaro.​—Ohab. 24:3.

21. Karakory fahitantsika iro ranabavintsika aby io, avio nan̈ino? (Zahava sary amy fon̈ony gazety ty.)

²¹ Tianay mare anaro ranabavy aby, nohony raha jiaby ataonaro niny Jehovah ndreky niny vahoakanany. (Heb. 6:10) Anaro mifen̈y mare hanan̈a toetry ndreky fahaizan̈a ilainaro amy fiain̈ana ndreky han̈ampian̈a olo man̈odidin̈y anaro. Mifen̈y koa anaro mioman̈a aminy andraikitry mety hiambin̈y anaro aminy amaray. Anaro ten̈a valera amy fandaminan̈any Jehovah!