HAY be fa ravoravo anao namezany Jehovah kado maro tsara. Ravoravo koa anao fotony nambelany hanapakevitry amy fomba ankafizanao raha aby zen̈y. Baiboly mivolan̈a fa divain io kado baka amy Zan̈ahary. Ndray izio aby mivolan̈a: ‘Hanin̈y natao hamparavoravo avio tsara mare fiain̈ana izikoa fa migiaka divain.’ (Mpito. 10:19; Sal. 104:15) Fa anao fo mety efa nahita olo sasany nanjary tsy nahafehy ten̈a amy figiahan̈a toaka, salakady samy hafa hevitrinolo momba figiahan̈a toaka io erantany. Ke ino han̈ampy Kristianin̈y hahay hanapakevitry momba figiahan̈a toaka?

Na aia na aia misy atsika, avio na ino na ino kolontsain̈y nitarimian̈a atsika, hahazo hatsaran̈a fo atsika sady ho sambatra, izikoa ambelantsika hevitry Zan̈ahary hibeko jerintsika ndreky fanapahankevitry ataontsika.

Anao mety efa nahita fa maro olo amy donia ty tia migiaka toaka be sady matetiky koa. Sasany amindro migiaka toaka fotony izio mahavy iro loso mahatsiaro sambasambatra oe. Fa sasany ndraiky migiaka amy zen̈y iro man̈adin̈a asalohandro. Amy toeran̈a sasany, olo mieritreritry fa izikoa olo araiky mahalany toaka be, izy ten̈a jaolahy.

Fa Kristianin̈y ndraiky mahazo taridalan̈a feno fahendrena baka amy Pamoron̈o be fitiavan̈a. Efa nambarany atsika, ohatra, ino vokany izikoa atsika migiaka toaka be. Ohabolana 23:29-35 ao man̈ambara karakory ataonolo koa fa mamo avio ino vokadratsiny zen̈y. a Mbala tsaroany Daniel, antipan̈ahy araiky an Eropy an̈y, akory nataony talohany nahaizany raha momba Jehovah ndreky nan̈arahany torohevitrinany. Karaha ty ho izy: “Zaho farandraha tia nigiaka toaka eky ke nanjary nan̈ano fanapahankevitry ratsy. Vokatra zen̈y, naro problemo tojy zaho. Kivikivy zaho koa fa mahatsiaro raha aby zen̈y.”

Ino han̈ampy atsika han̈ano fanapahankevitry tsara momba figiahan̈a toaka baka tsy ho tatrany problemo aby pavoa olo tia migiaka toaka be? Hevitriny Zan̈ahary mila ambelantsika mitariky fanapahankevitrintsika ndreky raha ataontsika.

Alo zahavantsika ino raha volan̈iny Baiboly momba toaka ndreky nan̈ino olo sasany migiaka toaka.

Volan̈a Zan̈ahary tsy mandrova atsika tsy higiaka toaka izikoa tsy be loatra. Ndray Baiboly aby mivolan̈a fa figiahan̈a divain io mamparavoravo. Karaha ty volan̈iny Baiboly: “Miravoravoa mihina hanin̈inao ndreky divainao igiaha amy fô ravoravo.” (Mpito. 9:7) Navy nisy fotoan̈a Jesosy nigiaka divain. Karaha zen̈y koa olo hafa nanompo Jehovah.​—Mat. 26:27-29; Lioka 7:34; 1 Tim. 5:23.

Baiboly tsy mivolan̈a fa tsy mahazo migiaka toaka, fa izy ndraiky mivolan̈a fa tsy mahazo man̈ano mamo. Volan̈iny Baiboly mazava tsara fa “tsy mila mamony divain.” (Efes. 5:18) Mivolan̈a koa izy ao fa olo “mamolava ... tsy handova Fanjakan̈any Zan̈ahary.” (1 Kor. 6:10) Dikanizen̈y, tsy tiany Jehovah foeky olo migiaka toaka be ndreky mamo. Ke atsika tsy hangala tahaka raha fataonolo man̈odidin̈y atsika fa han̈ano raha mamparavoravo Zan̈ahary fo.

Misy olo sasany mieritreritry fa iro tsy mamo ndray migiaka toaka be karakory. Kanefa ten̈a ratsy raha zen̈y. Soratra Masin̈y mivolan̈a mazava tsara fa izikoa lelahy araiky (na man̈angy araiky) handivoziny figiahan̈a divain be, izy mety han̈ano fahotan̈a maventy ke ho robaka fifandraisany amy Jehovah. (Tit. 2:3; Ohab. 20:1) Jesosy koa nampitandrin̈y fa olo ‘migiaka toaka be loatra’ mety tsy ho tafiditry  amy donia vaovao ampan̈antinainy Zan̈ahary. (Lioka 21:34-36) Ke ino mety han̈ampy Kristianin̈y araiky tsy ho tatrany problemo azo baka amy figiahan̈a toaka be loatra?

Izikoa atsika fa manapakevitry momba figiahan̈a toaka, tsy tsara izikoa raha fataonolo amy tany misy atsika fo dinihintsika. Kristianin̈y mila man̈ano raha mamparavoravo Jehovah amy raha momba hanin̈y ndreky raha igiahan̈a. Baiboly mampatsiaro atsika ambaka ty: “Anaro na mihinan̈a na migiaka, na ino na ino raha ataonaro, ataova han̈amezan̈a voninahitry Zan̈ahary raha jiaby.” (1 Kor. 10:31) Ke ty misy fan̈ontanian̈a ndreky toro lalan̈a sasany mila alaintsika onon̈o:

Mahavy zaho migiaka toaka io ma amy zen̈y zaho ho tianolo? Eksodosy 23:2 mivolan̈a: ‘Kaza man̈araka ny maro.’ Aminy andininy io, Jehovah nampitandrin̈y iro Israelita aby io tsy han̈aradrorony raha fataonolo aby tsy tia izy aby io. Firaka atsika amy zioty koa tôkony han̈araka fampitandreman̈a zen̈y. Izikoa olo ambelantsika hitariky eritreritrintsika ndreky fanapahankevitrintsika momba toaka, atsika manjary tsy han̈araka fitsipiky Jehovah eky ke ho robaka fifandraisantsika aminany.​—Rom. 12:2.

Mahavy zaho migiaka toaka io ma amy zen̈y hitanolo fa zaho mafy? Amy kolontsain̈y sasany tsisy maharatsy migiaka toaka be ndreky matetiky. (1 Pet. 4:3) Kanefa aleva onon̈o raha asainy 1 Korintianina 16:13 ataontsika ty: ‘Miambesa fo, aza miala amy finoan̈a, avio mifen̈a hanan̈a korazy ndreky hatanjaka.’ Toaka io ma mampatanjaka olo? Ehe, mifanohitry amy zen̈y toaka io malaky mampadonto jerinolo ke mahavy izy tsy hahay hanapakevitry tsara. Dikanizen̈y tsy tanjaka aby raha azo baka amy figiahan̈a toaka be io, fa mahavy olo loso malemy. Mivolan̈a Isaia 28:7 fa diso lalan̈a lan̈iany migiaka toaka, ke mivemben̈y ndreky tsy mahay manapakevitry tsara eky.

Baka amy Jehovah azahoantsika angovo hahavitantsika man̈ano ny tsara. Hahazo angovo io atsika izikoa miambin̈y fo avio tsy miala amy finoan̈a. (Sal. 18:32) Akory han̈anaovantsika zen̈y? Atsika mila mitandrin̈y fo amy raha ataontsika baka tsy ho voany problemo avio mila man̈ano fanapahankevitry tsy mandrobaka fihavan̈antsika amy Jehovah. Jesosy ten̈a nifandray marikitry tamy Jehovah ke maro olo  nan̈aja izy fotony izy nasaky ndreky tapakevitry nan̈ano ny tsara.

Mahavy zaho migiaka toaka ma amy zen̈y adin̈adin̈ako asalohanaka? Karaha ty raha nisoratiny panoratra salamo: “Izikoa fa nahainaro raha nampiasaloha zaho, anao [Jehovah] nankahery zaho ndreky nampilamin̈y fonaka.” (Sal. 94:19) Izikoa fa misy raha mampiasaloha anao, mitadiava fan̈ampian̈a amy Jehovah fa tsy amy toaka. Ho kirikiry asalohanao izikoa anao mivavaka matetiky amy Jehovah. Maro koa olo nahita fa an̈isany ten̈a nan̈ampy iro, mangataka sosokevitry amy naman̈a matotro amy fiangonan̈a. Izikoa figiahan̈a toaka edy indesinolo araiky hiadivan̈a amy problemonany, izy mety tsy ho ten̈a tapakevitry han̈ano ny tsara. (Hosea 4:11) Karaha ty nivolan̈iny Daniel, araiky nikoran̈intsika tio in̈y: “Zaho niasaloha sady ninjehiny eritreritry ke zaho nigiaka baka han̈adin̈adin̈asako raha aby zen̈y. Kanefa ny raha nisy, nahainitombo fo problemonaka. Zaho nialany namako, avio zaho nahatsiaro ten̈a tsisy dikany.” Ke ino raha nan̈ampy Daniel? Karaha ty ho izy: “Tontohitry zaho fa zaho tôkony nangataka fan̈ampian̈a tamy Jehovah fa tsy nitavandra toaka. Ke vitako fo tamy farany nandresy problemonaka.” Jehovah von̈ono fo han̈ampy atsika nata efa karaha tsisy raha antinain̈y in̈y amintsika.​—Fil. 4:6, 7; 1 Pet. 5:7.

Izikoa anao migiaka toaka ndraikindraiky, ty misy fan̈ontanian̈a mila dinihinao baka hahaizanao ino raha mbala mila ahitsinao: ‘Efa nisy havako na namako ma nivolan̈a fa mampiasaloha izy figiako toaka io?’ Izikoa zen̈y, zen̈y man̈ambara fa efa misy fahazaran̈a na raha tsy paripare ao kanefa tsy azonao onon̈o aby. ‘Maromarony toaka laniko taloha ma toaka figiako zioty?’ Olo karaha zen̈y mety efa manomboko andivoziny toaka nata izy tsy nieritreritry zen̈y aby. ‘Efa tsy tafipetraka ma zaho izikoa tsy mahazo toaka an̈atiny andra vitsivitsy na maromaro?’ Izikoa zen̈y, figiahan̈a toaka io efa nanjary fahazaran̈anao mare na anao efa loso andevonizio. Ke dikanizen̈y anao mety mila man̈aton̈o dokotera baka azahoanao fan̈ampian̈a handrisen̈a problemonao io.

Baka tsy ho azony problemo azo baka amy figiahan̈a toaka, misy Kristianin̈y sasany manapakevitry tsy higiaka toaka foeky. Sasany ndraiky mifidy  tsy higiaka fotony tsy tiandro tsironizio. Izikoa misy namanao mifidy tsy higiaka, tsara fan̈ahy aminany anao izikoa man̈aja fanapahankevitrinany zen̈y fa tsy mitsaratsara izy.

Na anao koa mety nanapakevitry fa sitrany asian̈a erany hamarozany toaka higiahanao. Na koa efa nasianao erany isaka ino aby anao migiaka; asa indraiky isaka herin̈iandra sa migiaka hely lera mihina. Fa misy Kristianin̈y sasany ndraiky efa mifidy karazan̈a toaka karakory igiahandro, karaha ataony migiaka divain na labiera helihely fo fa tsy migiaka toaka mahery ndray izio afangaro raha hafa (cocktail). Izikoa efa fidin̈a tsialohaloha isaka ino migiaka, ino raha igiahan̈a, avio akory hamarozanizio, ke asian̈a erany karaha zen̈y, ho moramora han̈araka raha zen̈y. Kristianin̈y matotro araiky tsy tôkony hiasaloha eky amy raha iritriretinolo momba izy mikasiky safidinany zen̈y ndreky noho izy tapakevitry han̈araka izio.

Lera atsika manapakevitry momba figiahan̈a toaka koa atsika mila mieritreritry ny hafa. Romanina 14:21 mivolan̈a: “Sitrany tsy mihina hena na migiaka divain na man̈ano raha hafa mety hanafintohin̈y rahalahinao.” Akory mety han̈arehanao torohevitry zen̈y? Mifen̈a ho be fitiavan̈a. Izikoa tsapanao fa mety hanafintohin̈y olo anao izikoa migiaka toaka, fitiavan̈a io handrisiky anao tsy higiaka amy fotoan̈a zen̈y. Izikoa anao man̈ano zen̈y, aboakanao fa anao man̈aja olo sady tia olo, avio mitady raha mahatsara iro fa tsy ninao tompiny fo.​—1 Kor. 10:24.

Kristianin̈y koa tôkony han̈araka lalàn̈a apetrakany fanjakan̈a momba toaka. Mety efa ambarany lalàn̈a, ohatra, firy taon̈o olo araiky vo mahazo migiaka toaka, na koa tsy mahazo migiaka toaka olo araiky izikoa mitondra tomabily na mampiasa lamasìny sasany.​—Rom. 13:1-5.

Atsika namezany Jehovah kado maro tsara, an̈isanizen̈y atsika nambelany hifidy karakory ataontsika hampiasa kado aby io. Nambelany atsika hifidy ino raha hoanintsika ndreky higiahantsika. Ke irarian̈a atsika hifidy han̈ano raha mamparavoravo Babantsika andan̈itry an̈y fo. Zen̈y han̈aboahantsika fa ten̈a ankasitrahantsika fahafahan̈a namezany atsika io.