Asa nivakianao tsarabe Tilikambo Fiambesan̈a tamy taon̈o ty? Izikoa zen̈y, zahava asa hainao valiny fan̈ontanian̈a aby ty:

Ino ma tafiditry amy ‘man̈avao sain̈inao’ zen̈y? (Rom. 12:2)

Tsy ampy izikoa anao man̈ano raha tsara vitsivitsy fo. Mila mandiniky ten̈a toetrintsika koa atsika, ke man̈ano fan̈ovan̈a ilain̈y baka han̈arehan̈a fitsipiky Zan̈ahary eraka angovontsika.​—w23.01, p. 8-9.

Akory ahitan̈a fa atsika mahay mandanjalanja izikoa fa mandiniky raha mandalo erantany?

Tiantsika ho hay amy karakory raha mandalo tato ho ato man̈atanteraka faminanian̈a. Fa atsika tsy maminavina fotony mety hahavy atsika tsy hiray sain̈y. Tsara izikoa fan̈azavan̈a koran̈intsika miorin̈y amy raha naboakany fandaminan̈any Jehovah. (1 Kor. 1:10)​—w23.02, p. 16.

Ino tsy mampiran̈a batisany Jesosy ndreky niny pan̈aradia izy?

Jesosy efa tsy nila nanokanten̈a tamy Jehovah, fotony izy efa teraka tamy firenena efa voatokan̈a tamy Zan̈ahary. Izy efa tsy nila nibebaka fotony izy lavorary, na tsisy ota.​—w23.03, p. 5.

Akory an̈ampiantsika olo hafa hamaly teny koa fa mivory?

Ataontsika fohiky valintenintsika baka olo hafa afaka hamaly. Tsy hikoran̈a hevitry maro loatra koa atsika, baka hisy valinteny ninolo hafa.​—w23.04, p. 23.

Ino ma “Lalan̈any Fahamasin̈ana” aminy Isaia 35:8?

Lalabe an̈ohatra io lalan̈andro Jiosy aby baka ta Babylony nody ta Jerosalema. Ke ino izio amy zioty? Anjatony taon̈o talohany 1919, efa nisy fan̈oman̈ana izio. An̈isanizen̈y fandikan̈a ndreky fan̈anaovan̈a pirinty Baiboly. Mandeha amy “Lalan̈any Fahamasin̈ana” io vahoakany Zan̈ahary ke mamakivaky Paradisa arapan̈ahy, firaka iro mahazo fitahian̈a hindesiny Fanjakan̈any Zan̈ahary.​—w23.05, p. 15-19.

Azovy ma iro man̈angy aroe an̈ohatra aminy Ohabolana toko faha-9?

Mikoran̈a momba ‘man̈angy tsisy jery’ izio, ke lan̈iany olo man̈eky kaikinany amy ‘fasan̈a’ hiafarany. Oharin̈y amy man̈angy araiky hafa ndraiky ‘ten̈a fahendrena’, ke hahazo ‘fahiratantsain̈y’ ndreky fiain̈ana lan̈iany man̈eky kaikinany. (Ohab. 9:1, 6, 13, 18)​—w23.06, p. 22-24.

Ino porofo fa Zan̈ahary nanetry ten̈a ndreky nahay nandanjalanja tamy Lota?

Jehovah nan̈iraka Lota niala Sodoma ke hilefa amy faritry be bongo. Fa Lota koa fa niangavy fa izy hilefa a Zoara, Zan̈ahary nan̈eky fangatahan̈anany.​—w23.07, p. 21.

Ino raha mety hataony man̈angy izikoa vadiny mizaha raha vetaveta?

Mila alainy viavy io onon̈o fa tsy izy ny diso. Izy mila mifantoko amy fifandraisany amy Zan̈ahary, avio misaintsain̈y tantarandro man̈angy niasaloha mare amy Baiboly ao kanefa nankahireziny Zan̈ahary. Afaka ampiany koa vadiny tsy han̈eky han̈ano raha mety hahavy izy ho resiny fakampan̈ahy.​—w23.08, p. 14-17.

Ino han̈ampy atsika ho lalintsain̈y ke halemy toetry lera misy olo man̈aratsy raha inoantsika?

Fan̈ontanian̈a na fankaratsian̈a ataonolo io afaka ahaizantsika raha an̈aty jerinany na raha maventy aminany. Izikoa atsika mandiniky zen̈y, ho vitantsika halemy fan̈ahy tsarabe.​—w23.09, p. 17.

Akory azahoantsika angovo izikoa zahan̈a ohatrany Maria?

Izikoa fa hainy Maria fa izy ho loso reniny Mesia, izy nahazo angovo baka taminolo hafa. Elizabeta ndreky anjely Gabriela samy nampiasa Soratra Masin̈y hankahirezan̈a izy. Afaka mankahery atsika koa piaramanompo.​—w23.10, p. 15.

Akory mety hamaliany Jehovah vavakantsika?

Izy mampan̈anten̈a fa hitandren̈y atsika sady handiniky ino ifandraisany fangatahan̈antsika amy fikasan̈anany. (Jer. 29:12) Ndray vavaka mitovy, mety ho samy hafa fomba hamaliany izio. Ndray zen̈y, izy hanohan̈a atsika fo.​—w23.11, p. 21-22.

Romanina 5:2 efa mikoran̈a momba “fan̈antinan̈a”, nan̈ino fo aminy andininy faha-4 mbala mikoran̈a izio?

Olo araiky koa fa maharen̈y vaovao tsara, izy mety han̈anten̈a hiain̈y amy Paradisa ambony tany eto. Kanefa lera izy tojy raha sarotro ndreky miaritry zen̈y avio mahatsapa fa izy ankasitrahiny Zan̈ahary, hahaihitombo fo fan̈antinan̈anany sady hahaiho tiany mare.​—w23.12, p. 12-13.