1. Izikoa atsika fa mieritreritry finoan̈any Abrahama, ino fan̈ontanian̈a mety avy an̈aty jerintsika?

 MARO olo efa naharen̈y raha momba Abrahama, fa ankamarozandro ndraiky tsy ten̈a mahay raha momba izy. Anao ndraiky tsy karaha zen̈y, maro raha hainao momba izy. Hainao, ohatra, fa Baiboly mivolan̈a fa Abrahama ‘babanolo jiaby manan̈a finoan̈a.’ (Rom. 4:11) Fa ndray zen̈y, anao mety hieritreritry: ‘Ho vitako ma han̈araka diany Abrahama ke hanan̈a finoan̈a mira nanan̈any?’ Azo antoko fa ho vitanao raha zen̈y.

2. Nan̈ino ten̈a raha maventy mandiniky ohatrany Abrahama? (Jakoba 2:22, 23)

² Hanan̈a finoan̈a karaha niny Abrahama atsika izikoa atsika mianatra ohatranany. Abrahama nan̈ano fo zay raha nan̈irahany Zan̈ahary izy. Nandeha nifindra tantany lavitry izy, tan̈atiny taon̈otaon̈o nipetraka tamy tran̈olay, avio von̈ono han̈ano soron̈o Isaka, zanany ten̈a tiany. Ke hita fa ten̈a fatatra finoan̈anany. Nohony finoan̈any Abrahama ndreky raha nataony nahavy Zan̈ahary nankasitraka izy, ke izy loso kamaradinany. (Vakia Jakoba 2:22, 23.) Tiany Jehovah atsika jiaby hahazo fitahian̈a ambaka zen̈y koa, an̈isanizen̈y anao. Zen̈y iziô antony nahavy Zan̈ahary nan̈iraka Paoly ndreky Jakoba nikoran̈a momba ohatrany Abrahama amy Baiboly ao. Alo atsika handiniky raha volan̈iny Romanina toko faha-4 ndreky Jakoba toko faha-2 momba Abrahama. Iro toko aroe io samy mikoran̈a raha maventy momba izy.

3. Ino andininteny amy Baiboly samy nikoran̈iny Paoly ndreky Jakoba?

³ Paoly ndreky Jakoba samy nampiasa raha koran̈iny Genesisy 15:6. Karaha ty koran̈inizio: ‘[Abrahama] nan̈aboaka fa izy nino Jehovah, ke nikeny ho olo marin̈y.’ Olo marin̈y na tsy manantsin̈y fahitany Zan̈ahary olo araiky izikoa olo io ankasitrahiny. Ke tsy mahagaga anao ma mahay fa ndray olo tsy lavorary  ndreky panota mbala afaka kahiany Zan̈ahary olo tsy manantsin̈y? Misaora tianao izikoa anao kahiany Zan̈ahary karaha zen̈y! Ary raha zen̈y ten̈a posibla. Alo hidinihintsika nan̈ino Zan̈ahary nikaiky Abrahama ho olo marin̈y, avio ino raha mila ataontsika baka atsika ho kahiany karaha zen̈y koa.

4. Nan̈ino tsisy olo afaka ho olo marin̈y?

⁴ Tamy taratasy nalefany tamy Romanin̈y aby io, Paoly nivolan̈a fa olo jiaby panota aby. (Rom. 3:23) Ke amy fomba akory ahafahantsika mivolan̈a fa Zan̈ahary afaka ho ravoravo amintsika ke ikaiky atsika olo marin̈y? Baka han̈ampian̈a Kristianin̈y jiaby hahay hamaly zen̈y, Paoly nikoran̈a momba Abrahama.

5. Ino ma nahavy Jehovah nivolan̈a fa Abrahama olo marin̈y? (Romanina 4:2-4)

⁵ Abrahama efa nikahiany Jehovah olo marin̈y edy taminizy nipetraka ta Kanana. Nan̈ino ma Jehovah nivolan̈a fa Abrahama olo marin̈y? Izio ma Abrahama nitandrin̈y mare Lalàn̈any Mosesy? Ehe, tsy baka amy zen̈y aby. (Rom. 4:13) Iro Israelita aby io nahazo Lalàn̈any Mosesy io efa mandilatra 400 taon̈o, tafarany Zan̈ahary nivolan̈a fa Abrahama olo marin̈y. Ke ino fo basy nahavy Zan̈ahary nivolan̈a fa Abrahama olo marin̈y? Jehovah nan̈aboaka hatsarampan̈ahy miavaka taminy Abrahama, ke Jehovah nikaiky izy olo marin̈y nohony finoan̈anany.​—Vakia Romanina 4:2-4.

6. Nan̈ino olo araiky panota afaka kahiany Jehovah olo marin̈y?

⁶ Paoly koa nivolan̈a fa izikoa olo araiky mino Zan̈ahary, izy ‘iken̈y olo marin̈y fotony manampinoan̈a.’ (Rom. 4:5) Ho Paoly koa: ‘Eraka raha nivolan̈iny Davida koa, sambatra olo ikeny Zan̈ahary olo marin̈y nata tsy baka amy raha ataony: “Sambatra lan̈iany olo nahazo familankeloko, avio voasaron̈o fahotan̈anany. Sambatra lan̈iany olo tsy konteny Jehovah foeky fahotan̈anany.”’ (Rom. 4:6-8; Sal. 32:1, 2) Zan̈ahary man̈ambela na mandrakotro fahotan̈any lan̈iany olo mino izy. Ambelany tanteraka fahotan̈andro avio efa tsy konteny eky. Amy Zan̈arahy olo karaha zen̈y tsy manantsin̈y ndreky olo marin̈y, fotony iro manampinoan̈a.

7. Nan̈ino atsika mivolan̈a fa olo marin̈y iro panompony Zan̈ahary taloha tan̈y?

⁷ Ndray Abrahama, Davida ndreky olo hafa nikahiany Zan̈ahary olo marin̈y, iro mbala panota fo ndreky tsy lavorary. Fa baka tamy finoan̈andro nahavy Zan̈ahary nihevitry iro ho olo tsy manantsin̈y, intsaka eky izikoa nampitovisin̈y aminolo tsy nanompo izy. (Efes. 2:12) Nazavainy Paoly tamy taratasinany tamy Romanin̈y aby io fa atsika mila manan̈a finoan̈a izikoa tihanjary kamaradiny Zan̈ahary. Abrahama ndreky Davida iziô nanjary kamaradiny Zan̈ahary fotony iro nino izy. Atsika koa afaka ho kamaradiny Zan̈ahary ambaka zen̈y baka amy finoan̈antsika.

8-9. Ino hevitry diso anan̈anolo sasany momba raha nisoratiny Paoly ndreky Jakoba, avio nan̈ino?

⁸ Tan̈atiny taonjato maro iro pitondra fivavahan̈a aby io niady hevitry momba ino ifandraisany finoan̈a ndreky raha atao. Sasany amindro mampianatra fa baka anao ho voavonjy anao mila mino Jesosy Kristy Tompo fo. Anao mety efa naharen̈y iro nivolan̈a karaha ty: “Minoa Jesosy fa anao ho voavonjy edy.” Sasany amindro aby mety han̈ampody raha nivolan̈iny Paoly ty: ‘Olo ikeny Zan̈ahary olo marin̈y nata tsy baka amy raha ataony.’ (Rom. 4:6) Fa pitondra fivavahan̈a sasany ndraiky mivolan̈a fa “anao ho voavonjy” izikoa mazoto mandeha amy toeran̈a masin̈y  ndreky man̈ano adidy hafa volan̈iny leglizy. Ankamarin̈ana raha volan̈indro zen̈y iro mety hampiasa Jakoba 2:24 ty: ‘Baka amy raha ataony han̈ambaran̈a olo araiky marin̈y fa tsy baka amy finoan̈anany fo.’

⁹ Tsy mitovy foeky hevitry aby zen̈y. Ke misy manampahaizan̈a momba Baiboly mieritreritry fa mifanohitry raha volan̈iny Paoly ndreky Jakoba momba raha tôkony hatao baka hahazahoan̈a sitraka amy Zan̈ahary. Pitondra fivavahan̈a sasany mivolan̈a fa Paoly nieritreritry fa mila manan̈a finoan̈a fo olo araiky efa ankasitrahiny Zan̈ahary edy, fa Jakoba ndraiky nieritreritry fa mila man̈ano raha olo araiky amy zen̈y izy vo hahazo sitraka amy Zan̈ahary. Misy papianatra araiky momba fivavahan̈a nivolan̈a karaha ty: “Tsy ten̈a hainy Jakoba antony nahavy Paoly nivolan̈a fa baka amy finoan̈a fo ahafahan̈a man̈ambara olo araiky ho marin̈y fa tsy baka amy raha atao.” Kanefa Paoly ndreky Jakoba samy nahazo fan̈ahy masin̈y baka tamy Jehovah, koa fa nanoratra raha nivolan̈indro io. (2 Tim. 3:16) Ke tsy maintsy misy fomba tsotra ahazahoan̈a raha tiandro volan̈iny io. Tsy ino zen̈y fa mila dinihintsika raha sasany nisoratindro tamy taratasindro.

10. Momba ino ma ‘raha atao’ koran̈iny Paoly io? (Romanina 3:21, 28) (Zahava koa sary.)

¹⁰ Ino ma ‘raha atao’ koran̈iny Paoly amy Romanina toko faha-3 ndreky faha-4? Mikasiky ‘fan̈arehan̈a Lalàn̈any Mosesy’ raha ten̈a nikoran̈iny Paoly. Izio Lalàn̈a namian̈a iro Israelita aby io. (Vakia Romanina 3:21, 28.) Taminy andrany Paoly mety mbala nisy Kristianin̈y jiosy sasany nino fa iro mbala nila nan̈araka Lalàn̈any Mosesy. Ke zen̈y antony nahavy Paoly nikoran̈a momba Abrahama baka han̈aboahan̈a tamindro fa olo efa tsy mila man̈ano ‘raha mifan̈araka amy Lalàn̈any  Mosesy’ eky izikoa tihahazo sitraka amy Zan̈ahary. Fa finoan̈a ny raha ten̈a ilain̈y. Ten̈a mankahery raha zen̈y fotony mampianatra atsika fa izikoa atsika mino Zan̈ahary ndreky Kristy, atsika afaka hahazo sitraka amy Zan̈ahary.

11. Ino ma ‘raha atao’ koran̈iny Jakoba io?

¹¹ ‘Raha atao’ koran̈iny Jakoba toko faha-2 ndraiky tsy momba ‘fan̈arehan̈a Lalàn̈any Mosesy’ foeky. Fa izio momba raha ataony Kristianin̈y andavanandra. Raha ataondro zen̈y ahitan̈a asa iro ten̈a mino Zan̈ahary ankitin̈y. Atsika handiniky ohatra aroe nikoran̈iny Jakoba.

12. Akory nan̈azavany Jakoba fa finoan̈a ndreky raha atao io mifandray? (Zahava koa sary.)

¹² Aminy ohatra voanalohany, Jakoba nivolan̈a fa Kristianin̈y tsy mila man̈avakavaka. Baka han̈azavan̈a raha zen̈y izy nampiasa ohatrany lelahy araiky tsara fan̈ahy taminolo pan̈arivo kanefa tsy nijery olo masikiny. Jakoba nivolan̈a fa ndray lelahy io nitoron̈o fa izy manan̈a finoan̈a, fa raha zen̈y tsy hita amy raha nataony. (Jak. 2:1-5, 9) Aminy ohatra faharoe ndraiky, Jakoba nikoran̈a momba olo araiky nahita ‘rahalahy na ranabavy tsisy lamba sikinin̈y na raha hoanin̈y.’ Fa izy tsisy raha nataony nan̈ampian̈a izy. Ke ndray olo zen̈y nivolan̈a fa izy manan̈a finoan̈a, raha ataony ndraiky nan̈aboaka fa izy tsy manan̈a finoan̈a foeky. Eraka volan̈a Jakoba, “finoan̈a io, izikoa tsy aboaka amy raha atao, maty edy.”​—Jak. 2:14-17.

13. Ohatranjovy nindesiny Jakoba nan̈azava fa mila aboakantsika amy raha ataontsika fa atsika manan̈a finoan̈a? (Jakoba 2:25, 26)

¹³ Jakoba nikoran̈a momba Rahaba fotony izy nan̈aboaka tamy raha nataony fa izy ten̈a nanan̈a finoan̈a. (Vakia Jakoba 2:25, 26.) Rahaba naharen̈y raha momba Jehovah  ndreky hainy fa izy nanohan̈a iro Israelita aby io. (Jos. 2:9-11) Ke naboakany tamy raha nataony fa izy nanan̈a finoan̈a. Izy niaro pitsikilondro Israelita aby io izikoa efa nisy olo nitady hamono iro. Vokany, man̈angy tsy lavorary sady tsy Israelita io nikahiny Jehovah olo marin̈y, karaha nataony taminy Abrahama in̈y. Hitantsika baka amy modeliny Rahaba io fa ten̈a raha maventy man̈aboaka amy raha ataontsika fa atsika manan̈a finoan̈a.

14. Nan̈ino tsy mifanohitry raha nisoratiny Paoly ndreky Jakoba?

¹⁴ Dikanizen̈y fomba aroe samy hafa nan̈azavany Paoly ndreky Jakoba finoan̈a avio raha atao io. Paoly nikoran̈a tamindro Kristianin̈y jiosy aby io fa iro tsy hahazo sitraka amy Zan̈ahary foeky izikoa iro man̈araka Lalàn̈any Mosesy fo. Fa Jakoba ndraiky nankamafy fa Kristianin̈y jiaby mila man̈aboaka fa iro manan̈a finoan̈a ke man̈ano raha tsara aminolo.

15. Ino aby fomba sasany mety an̈aboahantsika amy raha ataontsika fa atsika manan̈a finoan̈a? (Zahava koa sary.)

¹⁵ Jehovah tsy mivolan̈a fa atsika mila man̈ano karaha raha nataony Abrahama in̈y baka atsika ho kahian̈a olo marin̈y. Misy fomba maro mety an̈aboahantsika finoan̈antsika baka amy raha ataontsika. Atsika ohatra afaka mandray tsara olo vaovao avy amy fivorian̈a, man̈ampy rahalahy ndreky ranabavintsika sahiran̈a, avio mikarakara raha ilainy fianakavian̈antsika. Hitahy ndreky hankasitraka atsika Zan̈ahary izikoa atsika man̈ano raha aby zen̈y. (Rom. 15:7; 1 Tim. 5:4, 8; 1 Jaona 3:18) Avio an̈isany fomba araiky ten̈a maventy afaka an̈aboahantsika fa atsika manan̈a finoan̈a, atsika mazoto mitory vaovao tsara aminolo. (1 Tim. 4:16) Atsika jiaby afaka man̈aboaka amy raha ataontsika fa atsika mino fa tsy maintsy ho tanteraka fampan̈antinan̈any  Jehovah, ndreky tsisy tsaratsarany fitsipikinany. Izikoa atsika man̈ano zen̈y, atsika afaka matoky fa atsika ho olo marin̈y amy Zan̈ahary avio ho loso kamaradinany.

16. Ino ifandraisany finoan̈any Abrahama ndreky fan̈antinan̈anany?

¹⁶ Amy Romanina toko faha-4 misy leson hafa maventy koa ianarantsika baka aminy Abrahama: Atsika mila mifantoko fo amy fan̈antinan̈antsika. Jehovah nampan̈anten̈a fa baka aminy Abrahama hahazahoany firenena maro fitahian̈a. Iritrireta hely baka fan̈antinan̈a tsarabe nanan̈any Abrahama zen̈y! (Gen. 12:3; 15:5; 17:4; Rom. 4:17) Kanefa nata Abrahama efa 100 taon̈o avio Saraha efa 90 taon̈o, iro mbala tsendriky nisy zanaka. Izikoa dinihin̈y karaha efa tsy posibla hiteraka foeky Abrahama ndreky Saraha. Ten̈a nitsapa finoan̈any Abrahama raha zen̈y. Fa ‘izy mbala nan̈anten̈a fo ke nino fa izy ho loso babany firenena maro.’ (Rom. 4:18, 19) Tafara tatỳ, tanteraka fo raha nantinainy Abrahama io. Iro niteraka Isaka, ke izy loso baba ankitin̈y, eraka raha nantinainy in̈y.​—Rom. 4:20-22.

17. Akory ahaizantsika fa atsika afaka ho olo marin̈y ke hanjary kamaradiny Zan̈ahary?

¹⁷ Atsika afaka hahazo sitraka amy Zan̈ahary ndreky hanjary olo marin̈y avio ho kamaradinany, karaha Abrahama in̈y. Zen̈y raha nankamasifiny Paoly izikoa izy efa nanarotra karaha ty: ‘Tsy niny [Abrahama] zaraiky fo nanoratan̈a volan̈a ty: “Niken̈a ho olo marin̈y izy”, fa nintsika koa. Natao nintsika koa raha zen̈y, fotony atsika mino Araiky nanangana Jesosy.’ (Rom. 4:23, 24) Karaha Abrahama atsika koa mila manan̈a finoan̈a ndreky man̈ano raha an̈aboahan̈a zen̈y avio mila manan̈a fan̈antinan̈a. Paoly nanohy nikoran̈a momba fan̈antinan̈antsika io amy Romanina toko faha- 5. Handiniky zen̈y atsika amy lahatsoratra man̈araka.