1. Karakôry fiheveran’olo fiain̈ana tsisy farany zen̈y?

 MARO olo mifen̈y mihinan̈a hanin̈y mahasalama ndreky man̈ano spaoro baka ho salama vatan̈a fo ndreky ho ela velon̈o. Fa kanefa, irô tsy man̈anten̈a hiain̈y tsisy farany zen̈y foeky. Irô mieritreritry fa tsy ho hisy foeky fiain̈ana tsisy farany zen̈y, fôtony irô mbala mahaimatoe. Fa Jesosy nivolan̈a amy Jaona 3:16 ndreky 5:24 fa “fiain̈ana tsisy farany” zen̈y raha mety ho azon’olombelon̈o amin’ny ankitin̈y.

2. Ino raha volan̈in’ny Jaona toko faha-​6 momba fiain̈ana tsisy farany? (Jaona 6:39, 40)

² Tandraraiky Jesosy nan̈ano fahagagan̈a ke nan̈amia môfo ndreky laoko olo nandeha andrivony aby. a Mahagaga raha zen̈y! Fa kanefa mbala nisy raha nampalany fan̈ahy mare koa nivolan̈iny amarain’izin̈y. Vahoaka aby io koa fa nan̈araka izy ta Kapernaomy, narikitry sisin’ny ranomasin̈in’i Galilia tan̈y, Jesosy nivolan̈a tamindrô fa mbala ho hisy familaoman̈a olo maty, ke irô hiain̈y tsisy farany. (Vakia Jaona 6:39, 40.) Diniha baka raha koran̈iny zen̈y. Anao hahita kamaradinao ndreky irô havanao efa naty aby in̈y. Volan̈an’i Jesosy zen̈y koa ahitan̈a fa maro olo naty mbala hivilômin̈y, ke anarô amy zen̈y samy ho ravoravo hankafy fiain̈ana tsisy farany. Fa kanefa ndraiky misy volan̈a nambaran’i Jesosy tafaran’izen̈y, amy Jaona toko faha-​6 ao, ke sarotro amin’olo maro hahatakatra izio. Alô hikoran̈intsika tsarabe raha zen̈y.

3. Ino ma raha nivolan̈in’i Jesosy amy Jaona 6:51 momba izy?

³ Tafaran’i Jesosy nan̈ano fahagagan̈a nahavoky irô vahoaka aby in̈y, irô vahoaka aby io nieritreritry momba mana namezan’i Jehovah irô Israelita aby io tamy tany paiky tan̈y. Haindrô olo nikoran̈an’i Jesosy aby io fa Soratra Masin̈y mivolan̈a  momba mana, “môfo baka an-dan̈itry.” (Sal. 105:40; Jaona 6:31) Tamy diany araiky ty, Jesosy nikoran̈a raha sasany haindrô vahoaka aby io momba mana, hampianaran̈a irô raha araiky ten̈a maventy. Jesosy nan̈azava fa ten̈a tsy mitovy izy ndreky mana io. Ndray mana io kadô baka tamy Jehovah, lan̈iany olo nihina izio mbala naty fo. (Jaona 6:49) Fa Jesosy nivolan̈a fa izy “ten̈a môfo baka an-dan̈itry”, izy “môfon’ny Zan̈ahary”, aviô izy “môfon’ny fiain̈ana.” (Jaona 6:32, 33, 35) Jesosy nivolan̈a karaha ty koa momba izy: “Zaho môfo velon̈o nijotso baka an-dan̈itry. Izikoa misy olo mihina môfo ty, izy ho velon̈o mandrakizay.” (Vakia Jaona 6:51.) Neloko irô Jiosy aby io naharen̈y zen̈y. Tsy nazava tamindrô baka antony nahavy Jesosy nivolan̈a fa izy môfo nijotso baka tan-dan̈itry tan̈y, aviô “môfo” amezany io mbala tsara mandilatra mana namezan’ny Zan̈ahary razambendrô. Jesosy amy zay nivolan̈a tamindrô: “Ain̈inaka izy môfo handeha hamezako io.” Mety ho ino raha tiany koran̈iny tamy zen̈y? Tsara hahaizantsika raha zen̈y, fôtony valin’izio ahitantsika fa ten̈a ho afaka hiain̈y tsisy farany ankitin̈y atsika ndreky irô olo tiantsika aby io. Fa alô zahavantsika ino raha tian’i Jesosy koran̈iny.

MÔFO VELON̈O NDREKY NOFOTRONANY

4. Nan̈ino ma olo sasany neloko tamy raha nivolan̈in’i Jesosy?

⁴ Neloko olo sasany nitandren̈y Jesosy, izy koa fa nivolan̈a fa “ain̈inany môfo handeha hamezany, amy zen̈y donia ty hahazo fiain̈ana.” Irô ma nieritreritry fa Jesosy handeha han̈amia nôfotronany hoanindrô, ke irô hihina olo? (Jaona 6:52) Ho Jesosy: “Anarô koa tsy mihina nôfotron’ny Zanak’olo ndreky migiaka lionany, anarô tsy hahazo fiainan̈a.”​—Jaona 6:53.

5. Nan̈ino ma atsika matoky fa Jesosy tsy nan̈iraka olo higiaka lionany?

⁵ Rango tamy faha Noa, Zan̈ahary efa tsy nan̈omba olo hihina lio. (Gen. 9:3, 4) Nampodiny koa raha zen̈y tamy Lalàn̈a namezany Israely. Lan̈iany olo mihina lio “tsy maintsy hivonen̈a.” (Lev. 7:27) Jesosy koa nampianatra Jiosy aby io han̈araka lalàn̈a jiabin’ny Zan̈ahary namiany irô. (Mat. 5:17-19) Ke tsy mety Jesosy koa han̈iraka Jiosy aby io hihina nôfotronany ndreky higiaka lionany. Raha tiany havian̈a tamin’izy nivolan̈a raha tsy mahazatra olo io, izy tihampianatra olo aby io akôry hazahoan̈a “fiain̈ana tsisy farany.”​—Jaona 6:54.

6. Nan̈ino atsika mivolan̈a fa fihinanan̈a nôfotron’i Jesosy ndreky figiahan̈a lionany io sarin-teny fo?

⁶ Mazava baka amy zen̈y fa Jesosy nampiasa sarin-teny izikoa fa nikoran̈a tamy vahoaka aby io. Nampiasa sarin-teny koa izy tamin’izy nivolan̈a tamy man̈angy samaritanin̈y in̈y karaha ty: “Lan̈iany olo migiaka rano hamiako izy tsy ho sakara eky, fa rano amiako izy io hanjary loharano miboiboiky an̈atinany ao ke han̈amia izy fiain̈ana tsisy farany.” (Jaona 4:7, 14) b Jesosy iô tsy nivolan̈a tamy man̈angy samaritanin̈y io fa izikoa izy fa migiaka rano baka amy vôvo io, efa hahazo fiain̈ana tsisy farany edy. Karaha zen̈y koa, Jesosy tsy nivolan̈a tamy vahoaka ta Kapernaomy aby in̈y fa, hiain̈y tsisy farany irô izikoa mihinan̈a nôfotronany ndreky migiaka lionany.

FOTOAN̈A HAFA NIVOLAN̈AN’I JESOSY SARIN-TENY KARAHA IN̈Y KOA

7. Ino ma raha volan̈in’olo sasany momba volan̈an’i Jesosy amy Jaona 6:53?

⁷ Olo sasany mivolan̈a fa amy Jaona 6:53 io, Jesosy nan̈azava raha mila atao amy Sakafo  Harivan’ny Tompo, fôtony mira fo volan̈a nampiasainy. (Mat. 26:26-28) Irô mivolan̈a fa lan̈iany olo man̈aton̈o izio mila mihina môfo ndreky divain ampandalôvin̈y amin’olo jiaby io. Marin̈y ma zen̈y? Tsara atsika mahay valin’izen̈y, fôtony an-tapitrisany amin’olo ambony tany eto mivory man̈ano Sakafo Harivan’ny Tompo io. Ho hitantsika fa raha koran̈in’i Jesosy amy Jaona 6:53 ao ten̈a tsy mira amy raha nikoran̈iny tamy Sakafo Harivan’ny Tompo in̈y.

8. Ino ma tsy mampiran̈a raha nivolan̈in’i Jesosy tamy fotoan̈a aroe io? (Zahava koa sary.)

⁸ Alô baka hizahavantsika raha tsy mampitovy raha koran̈in’i Jesosy io. Voanalohany, ombian̈a ndreky taia ma Jesosy nikoran̈a raha amy Jaona 6:53-56? Nivolan̈a izio izy tamindrô Jiosy ta Galilia, tamy taon̈o 32. Izio kadiriny taon̈o araiky talohan’ny nan̈anaovany Sakafo Harivan’ny Tompo voanalohany ta Jerosalema. Faharoe, azôvy ma nivolan̈any izio? Izy nivolan̈a tamin’olo aby tihahazo hanin̈y taminany fa tsy nijery momba Jehovah ndreky Fanjakan̈an’ny Zan̈ahary. (Jaona 6:26) Ke irô koa fa naharen̈y raha hitandrô fa sarotro tamindrô nahazo dikany, irô fa tsy nino izy edy. Ndray sasany tamy mpianatranany aby io vôly nan̈araka izy. (Jaona 6:14, 36, 42, 60, 64, 66) Fa tsy karaha zen̈y ndraiky irô apostolin’i Jesosy tsy nivadiky taminany 11, nikoran̈any taon̈o araiky tafaran’izin̈y, tamin’izy nan̈ano Sakafo Harivan’ny Tompo voanalohany tamy taon̈o 33. Tamin’io, irô apostolinany  11 tsy nivadiky taminany aby io niaraka taminany fo ndray tsy nazava tamindrô raha jiaby nampianariny. Aviô tsy nira ankamarozan’olo ta Galilia in̈y irô, fôtony irô apostoly tsy nivadiky aby io nan̈eky marin̈y fa Jesosy io Zanakan’ny Zan̈ahary, nijotso baka tan-dan̈itry tan̈y. (Mat. 16:16) Izy nivolan̈a tamindrô: “Anarô tsy niala zaho foeky tamy fitsapan̈a jiaby nahazo zaho.” (Lioka 22:28) Irô tsy fitovisan̈a aby io ahitan̈a fa amy Jaona 6:53 io Jesosy tsy nan̈azava raha handalo amy Sakafo Harivan’ny Tompo. Alô baka atsika hizaha porofo hafa koa.

NAN̈INO MAHAKASIKY ANAO VOLAN̈AN’I JESOSY?

9. Mihatra aminjôvy ma volan̈an’i Jesosy tamin’izy nan̈ano Sakafo Harivan’ny Tompo in̈y?

⁹ Tamy Sakafo Harivan’ny Tompo in̈y, Jesosy nan̈amia môfo tsisy levira irô apostolinany aby io, aviô nivolan̈a tamindrô fa izio man̈ambara vatan̈anany. Aviô izy nampandalo kôpy misy divain handeha higiahandrô ndreky nivolan̈a fa izio man̈ambara “lion’ny fifan̈ikian̈a.” (Mar. 14:22-25; Lioka 22:20; 1 Kor. 11:24) Ten̈a raha maventy raha nivolan̈iny momba fifan̈ikian̈a io. Izy nivolan̈a fa izio “fifan̈ikian̈a vaovao”, fifan̈ikian̈a nifan̈anaovan’i Jehovah tamy “firenenan’Israely”, dikan’izen̈y lan̈iany olo hiaraka hanjaka amy Jesosy amy Fanjakan̈anany fo. (Heb. 8:6, 10; 9:15) Tsy ten̈a nazava tamindrô apostoly aby io raha io tamy zen̈y. Kanefa tsy elan’izio irô ho voahosotron’ny fan̈ahy masin̈y, ke ho tafiditry an̈atin’ny fifan̈ikian̈a vaovao io, ke an̈isan’ny hahazo toeran̈a miaraka amy Jesosy an-dan̈itry an̈y.​—Jaona 14:2, 3.

10. Ino koa raha tsy mampiran̈a raha nivolan̈in’i Jesosy tamin’ny Sakafo Harivan’ny Tompo in̈y ndreky tamy vahoaka ta Galilia? (Zahava koa sary.)

¹⁰ Raha nataon’i Jesosy tamy Sakafo Harivan’ny Tompo in̈y mihatra amin’ny “ôndrikôndriky vitsy.” Irô apostolinany tsy mivadiky aby io voanalohany an̈isan’izio, irô niaraka taminany tan̈atin’ny tran̈o tao tamin’io. (Lioka 12:32) Irô ndreky olo hafa ho an̈isan’ny ôndrikôndriky vitsy io fo tôkony mihina môfo ndreky migiaka divain. Irô fo hahazo toeran̈a an-dan̈itry an̈y miaraka amy Jesosy. Raha nivolan̈iny tamin’ny apostolinany aby io tsy nira tamy raha nivolan̈iny tamy vahoaka ta Galilia in̈y, fôtony raha nivolan̈iny tamy Sakafo Harivan’ny Tompo io mandeha amin’olo vitsivitsy fo. Fa raha nivolan̈iny ta Galilia in̈y ndraiky amin’olo maro.

11. Ino tamy raha nivolan̈in’i Jesosy ta Galilia in̈y man̈ambara fa tsy handeha amin’olo vitsivitsy fo raha nivolan̈iny io?

¹¹ Tamy Jesosy ta Galilia tamy taon̈o 32 in̈y, môfo fo raha nitadiavin’ny ankamarozan’olo nikoran̈any. Fa kanefa izy nan̈ampy irô hahazo tsarabe fa mbala misy raha maventy mandilatra môfo io tôkony hifantohandrô. Izio baka afaka hahazahoandrô fiain̈ana tsisy farany. Jesosy baka iô nivolan̈a fa lan̈iany olo maty, mbala hivilômin̈y amin’ny andra farany an̈y, aviô irô io hiain̈y tsisy farany. Izy tamin’io tsy nivolan̈a tamin’olo vitsivitsy fo, karaha nataony tamy Sakafo Harivan’ny Tompo tafaran’izin̈y. Fa izy ta Galilia io nifantoko tamin’ny hatsaran̈a azon’olo jiaby. Izy nivolan̈a: “Izikoa misy olo mihina môfo ty, izy ho velon̈o mandrakizay. Aviô, ain̈inaka izy môfo handeha hamezako io, amy zen̈y donia ty hahazo fiain̈ana.”​—Jaona 6:51. c

12. Ino raha mila ataon’olo baka hazahoan̈a hatsaran̈a nivolan̈in’i Jesosy in̈y?

¹² Jesosy ma nivolan̈a fa olo tsiaraikiaraiky niain̈y tambony tany teto hahazo fiain̈ana  tsisy farany aby? Ehe, fa ‘lan̈iany olo mihina môfo’ io fo. Dikan’izen̈y lan̈iany olo man̈aboaka fa mino Jesosy. Maro olo miaboko Kristianin̈y mivolan̈a fa ho voavonjy zen̈y irô izikoa mino Jesosy fo. Aviô irô mivolan̈a fa Jesosy mpamonjy. (Jaona 6:29) Fa misy raha beben’izen̈y mbala mila hatao. Karaha irô ta Galilia in̈y, sasany tamindrô nino Jesosy, fa kanefa irô baka tiô vôly nan̈araka izy. Nan̈ino?

13. Ino ma ten̈a dikan’ny mino Jesosy zen̈y?

¹³ Nohon’i Jesosy nan̈amia raha tiandrô fo nahavy ankamarozan’olo ta Galilia in̈y nan̈araka Jesosy. Aviô tiandrô mare Jesosy nan̈ano fahagagan̈a, nan̈amia hanin̈y bôjo, aviô nampianatra raha tiatiandrô fo. Fa kanefa, naboakan’i Jesosy irô fa mbala misy raha beben’izen̈y takin̈a amindrô, baka irô hanjary ten̈a mpianatranany. Nataon’i Jesosy nazava tamindrô fa tsy handeha han̈amia raha tiandrô fo dian’i Jesosy tatỳ. Fa izy navy hampianatra irô raha mila hataondrô, baka irô hanjary ten̈a mpan̈ara-dia izy. Irô mila “man̈aton̈o” izy, dikan’izen̈y mitandren̈y izy ndreky man̈araka raha jiaby nampianariny.​—Jaona 5:40; 6:44.

14. Ino raha tsy maintsy hataontsika baka atsika hahazo hatsaran̈a baka amy vatan̈a ndreky lion’i Jesosy?

¹⁴ Jesosy nampianatra irô fa izy han̈ano sôron̈o ain̈inany ndreky lionany io hahavy irô ho afaka hiain̈y tsisy farany. Mila mino fahamarin̈ana zen̈y irô. Ten̈a nilaindrô Jiosy aby io raha zen̈y, aviô ten̈a mbala ilaintsika amin’ny andra iziôty koa. (Jaona 6:40) Baka atsika hahazo hatsaran̈a baka amy vatan̈an’i Jesosy ndreky lionany koran̈in’ny Jaona 6:53 io, atsika mila man̈aboaka fa atsika mino vidim-pan̈avaotan̈a. Olo maro mety hahazo hatsaran̈a baka amizio.​—Efes. 1:7.

15-16. Ino aby raha maventy nianarantsika baka tamy Jaona toko faha-​6?

 ¹⁵ Jaona toko faha-​6 in̈y ten̈a nianarantsika raha maro maventy sady ten̈a mankahery atsika jiaby koa. Nianarantsika fa Jesosy ten̈a mikarakara olo. Tamin’izy ta Galilia tan̈y, izy nampajanga olo marary, nampianatra momba Fanjakan̈an’ny Zan̈ahary. Nataony azo antoko koa fa irô nahazo hanin̈y nilaindrô. (Lioka 9:11; Jaona 6:2, 11, 12) Fa ny raha ten̈a maventy, izy nampianatra fa “izy môfon’ny fiain̈ana.”​—Jaona 6:35, 48.

¹⁶ Marin̈y ndraiky fa lan̈iany olo nikahin’i Jesosy fa “ôndrikôndriky hafa” tsy tôkony hihina môfo aviô tsy tôkony higiaka divain amy leran’ny Sakafo Harivan’ny Tompo. (Jaona 10:16) Fa kanefa, irô mahazo hatsaran̈a baka amy vatan̈a ndreky lion’i Jesosy Kristy. Fa baka hazahoandrô hatsaran̈a aby zen̈y, irô mila mino fa sôron̈o nataon’i Jesosy in̈y ten̈a mahavita man̈avotro irô. (Jaona 6:53) Fa irô mihina môfo ndreky migiaka divain in̈y ndraiky man̈aboaka fa irô an̈isan’ny an̈atin’ny fifan̈ikian̈a vaovao ndreky manan̈a fan̈antinan̈a hitondra amy Fanjakan̈an’ny Zan̈ahary. Fa na atsika an̈isan’ny voahosotro, na ôndrikôndriky hafa, ten̈a raha maventy hahaizantsika tantara amy Jaona toko faha-​6 io. Aboakan’izio baka fa mila man̈aboaka finoan̈a atsika, hazahoan̈a fiain̈ana tsisy farany.