1-2. Akôry tôkony hataon’ny raimandreny izikoa zanany man̈ontany izy momba raha inoantsika amy Baiboly?

 MARO olo man̈eky fa tsy vôntro mora fitarimian̈a tsaiky zen̈y. Izikoa anao manan-janaka, midera anao mare zahay, fôtony anao mifen̈y mare man̈ampy zanakanao, hanan̈a finoan̈a. (Deot. 6:6, 7) Izikoa tsaiky efa mahaibe, mety han̈apetraka fan̈ontanian̈a maro matomboko momba raha inoantsika an̈atin’ny Baiboly izy, an̈isan’izen̈y fitsipikin’i Jehovah momba fitondran-ten̈a.

² Amy voanalohany, anao mety hiasaloha amy fan̈ontanian̈a apetrakan’ny zanakanao io. Anao mety hieritreritry fa nohon’izy tsy mino Zan̈ahary ndreky raha koran̈in’ny Baiboly mahavy izy man̈ontany karaha zen̈y. Kanefa tsaiky izikoa fa mahaibe, izy mila man̈apetraka fan̈ontanian̈a, baka hahavy izy ho resy lahatra amy raha inoany. (1 Kor. 13:11) Ke tsy tôkony hampavozo anao foeky irô fan̈ontanian̈a apetrany aby io. Ke izikoa irô man̈ontany raha anao, araraota fotoan̈a zen̈y han̈ampian̈a irô hahay handiniky tsarabe ndreky hankafatatra finoandrô Zan̈ahary ndreky fatokisandrô Baiboly.

3. Ino raha hidinihintsika amy lahatsoratra ty?

³ Amy lahatsoratra ty, atsika handiniky karakôry han̈ampian’ny raimandreny zanakandrô 1) ho resy lahatra amy raha inoandrô, 2) hankasitraka fitsipikin’ny Baiboly momba fitondran-ten̈a, ndreky 3) hahavita hiaro finoan̈andrô. Atsika koa handiniky nan̈ino mahatsara irô tsaiky aby io man̈ontany, baka iô ino raha mety hataonao miaraka amy zanakanao, han̈ampy anao hikoran̈a tsara aminany momba raha inoantsika.

AMPIA ZANAKANAO HO RESY LAHATRA

4. Ino raha mety han̈ontanian’ny tsaiky aby io, aviô nan̈ino?

⁴ Anao ndray manan̈a finoan̈a, zanakanao tsy handova finoan̈a anan̈anao zen̈y. Baka iô koa tsy niaraka anao teraka efa nino  Jehovah edy. Karaha zen̈y koa zanakanao. Koa fa bebe irô, irô mety han̈apetraka fan̈ontanian̈a karaha ty: ‘Ino ma porofo fa Zan̈ahary ten̈a misy ankitin̈y? Ten̈a marin̈y ankitin̈y ma raha volan̈in’ny Baiboly?’ Sady Baiboly lastiô koa mandrisiky atsika “hampiasa tsara sain̈intsika”, baka iô “hangala antoko raha jiaby.” (Rom. 12:1; 1 Tes. 5:21) Ke akôry mety han̈ampianao zanakanao hankafatatra finoan̈anany?

5. Ino raha mety hataon’ny raimandreny han̈ampian̈a zanakandrô hahaihatoky raha volan̈in’ny Baiboly? (Romanina 12:2)

⁵ Ampirisiha zanakanao hitady porofo fa marin̈y raha volan̈in’ny Baiboly. (Vakia Romanina 12:2.) Izikoa zanakanao fa man̈apetraka fan̈ontanian̈a, araraota zen̈y han̈ampian̈a izy hitady valin’izio amindrô fitaovan̈a fikarohan̈a, karaha ataon’ny Fanondroana Bokin’ny Vavolombelon’i Jehovah ndreky Fitaovana Fikarohana ho an’ny Vavolombelon’i Jehovah. Iraha zahavany amy Fitaovana Fikarohana io “Baiboly”, baka iô “Avy Amin’Andriamanitra”, baka hahitany porofo fa Baiboly io tsy zisty boky nisoratin’olombelon̈o fo fa izio “volan̈an’ny Zan̈ahary.” (1 Tes. 2:13) Ohatra, izy mety man̈ano fikarohan̈a momba tanànan’i Ninive taloha tan̈y. Misy manam-pahaizan̈a momba Baiboly sasany baka taloha tan̈y nivolan̈a fa tsiary nisy zen̈y tanànan’i Ninive io. Kanefa, kadiriny tamy taon̈o 1850 tan̈y, hitandrô mpikaroko raha ambanin’ny tany aby io tany nisy tanànan’i Ninive io. Raha zen̈y man̈aboaka tsarabe fa marin̈y raha volan̈in’ny Baiboly. (Zef. 2:13-15) Baka hahitan̈a tsarabe fomba nampatanteraka faminanian̈an’ny Baiboly momba fandravanan̈a tanànan’i Ninive, izy mety mizaha lahatsoratra “Asa mba Hainao?” amy Tilikambo Fiambesan̈a Novambra 2021. Aviô tsara koa izikoa izy mampiran̈a raha koran̈in’ny bokintsika aby io amy raha koran̈in’ny boky hafa mety atokisan̈a. Raha zen̈y han̈ampy zanakanao hankafatatra finoan̈anany, ke hahita tsarabe fa marin̈y raha volan̈in’ny Baiboly.

6. Akôry mety han̈ampian’ny raimandreny zanakandrô hahita porofo fa marin̈y raha koran̈in’ny Baiboly? Man̈ameza ohatra. (Zahava koa sary.)

⁶ Ampia zanakanao hahita fa marin̈y raha koran̈in’ny Baiboly. Mitadiava fomba hikoran̈ana amy zanakanao momba Baiboly na momba finoan̈a Zan̈ahary. Anarô mety man̈ano zen̈y, lera anao mitsidiky musée na parky na fampirantian̈a amy birôn’ny sampan̈an’ny Vavolombelon̈on’i Jehovah. Ohatra lera anarô mitsidiky musée, na mivantan̈a na amin’ny Internet, anao mety man̈ano raha hahavy zanakanao io handiniky tantaran-draha nandalo taloha tan̈y na asa tan̈ana, han̈ampy izy ho resy lahatra fa marin̈y ankitin̈y Baiboly. Anao koa mety mampianatra zanakanao momba Vato Moabita. Efa 3 000 taon̈o zay nisian’ny vato io, baka iô amizio misy an̈aran̈an’i Jehovah. Amy Musée  du Louvre a Paris, a France an̈y misy izio. Ahitan̈a vato namboarin̈y mira Vato Moabita io koa amy fampirantian̈a “Baiboly Ndreky An̈aran̈an’ny Zan̈ahary” amy Foiben’ny Vavolombelon̈on’i Jehovah a Warwick, a New York an̈y. Hita amy Vato Moabita io fa Mesa mpanjakan’i Moaba, nanohitry irô Israelita aby io. Raha zen̈y mifan̈araka tsara amy raha volan̈in’ny Baiboly. (2 Mpanj. 3:4, 5) Ke izikoa zanakanao foeky mahita fa marin̈y raha volan̈in’ny Baiboly, raha zen̈y hahavy finoan̈anany hahay ho fatatra fo.​—Ampiràn̈a amy 2 Tantara 9:6.

7-8. a) Ino raha ianarantsika momba irô forman-draha maro tsara hita amy zavaboary aby io? Man̈ameza ohatra. (Zahava koa sary.) b) Ino aby fan̈ontanian̈a mety han̈ampy zanakanao hatoky tsarabe fa ten̈a misy Mpamôron̈o?

⁷ Ampirisiha zanakanao handiniky zavaboary. Lera anarô mitsangatsangana ambanivolo na mikarakara zaridain̈y, ampia izy hieritreritry forman-draha maro maharikian̈a mimpodimpody amy zavaboary aby io. Nan̈ino? Fôtony izio ahitan̈a fa ten̈a mahay ankitin̈y mpamôron̈o irô io. Maro raha manan̈a forma miolonkolon̈o. Irô manam-pahaizan̈a momba siansy aby io iziôty efa an-taon̈ony maro nandiniky momba zen̈y. Nisy mpahay siansy araiky Nicola Fameli man̈azava fa izikoa anao mikonty raha miolonkolon̈o aby io, ho hitanao fa misy filaharan’isa mimpodimpody fo. Ke ikahian̈a izio, suite Fibonacci. Maro raha mety ahitan̈a forma miolonkolon̈o io, karaha ataony forman’ny vahindan̈itry aby io, kôkiazy, ravin-draha ndreky folera masoandra. a

⁸ Izikoa zanakanao a lekoly an̈y efa mianatra siansy, ho hitany fa misy lalàn̈a mifehy forman’ny raha maro. Ohatra, misy itovisany ankamarozan’ny forma kakazo: Vatabeny in̈y mizara ho sampany, aviô sampany io mizara ho rantsany, aviô rantsany io misy zan̈azan̈any. “Fractale” ivolan̈ana forma zen̈y. Ahitan̈a forma karaha zen̈y koa amy zavaboary hafa. Fa azôvy nan̈ano lalàn̈a nan̈aboaka forma tsarabe zen̈y? Azôvy namôron̈o raha milamin̈y be karaha zen̈y? Hahaihatoky fo zanakanao fa Zan̈ahary niasa raha jiaby io, izikoa izy fa mandiniky tsarabe irô fan̈ontanian̈a aby zen̈y. (Heb. 3:4) Fa izikoa izy fa mahaibe, anao mety man̈ontany izy karaha ty koa: “Izikoa Zan̈ahary namôron̈o atsika, dikan’izen̈y ma tsy tôkony hisy lalàn̈a momba fitondran-ten̈a koa namezany baka atsika ho sambatra?” Anao baka iô amizay afaka mikoran̈a aminany irô tari-dalan̈a maro valera momba fitondran-ten̈a zen̈y, hita an̈atin’ny Baiboly ao.

AMPIA ZANAKANAO HO TIA FITSIPIKIN’NY BAIBOLY MOMBA FITONDRAN-TEN̈A

9. Ino mety hahavy tsaiky araiky han̈ontany raha sasany momba fitsipikin’ny Baiboly mikasiky fitondran-ten̈a?

⁹ Izikoa zanakanao man̈ontany raha sasany  momba fitsipikin’ny Baiboly momba fitondran-ten̈a, mifen̈a hahay ino antony mahavy izy man̈ano karaha zen̈y. Izy ma ten̈a tsy man̈eky fitsipikin’ny Baiboly momba fitondran-ten̈a sa tsy mahay man̈azava amin’olo raha inoany? Na karakôry na karakôry, anao mety mampianatra izy amy boky Mankafiza Fiain̈ana Tsisy Farany! amy zen̈y anao mety hahavita han̈ampy zanakanao io ho tia fitsipikin’ny Baiboly momba fitondran-ten̈a. b

10. Akôry mety han̈ampianao zanakanao hieritreritry momba fifandraisan̈anany amy Jehovah?

¹⁰ Ampia zanakanao han̈iry hikamarady mare amy Jehovah. Izikoa anao fa mianatra Baiboly miaraka amy zanakanao, mifen̈a hahay raha an̈aty fônany. Ke mampiasà fan̈ontanian̈a hahaizan̈a hevitrinany, baka iô fan̈oharan̈a amy boky Mankafiza Fiain̈ana Tsisy Farany! (Ohab. 20:5) Ohatra, leson 8 mampiran̈a Jehovah amy kamarady araiky ten̈a tia naman̈a, ke man̈amia torohevitry miaro atsika ndreky mahatsara atsika. Izikoa anarô fa baka nikoran̈a 1 Jaona 5:3, an̈ontania izy karaha ty: “Jehovah ten̈a naman̈a mitady raha mahatsara atsika, ke tôkony karakôry fahitantsika raha irahiny ataontsika?” Mety fan̈ontanian̈a tsotra raha zen̈y, kanefa zen̈y han̈ampy zanakanao hahita fa fitiavan̈a mahavy Zan̈ahary man̈amia atsika lalàn̈a.​—Isaia 48:17, 18.

11. Akôry mety han̈ampianao zanakanao hahita fa mahatsara atsika man̈araka torohevitrin’ny Baiboly? (Ohabolana 2:10, 11)

¹¹ Diniha miaraka aminany nan̈ino mahatsara atsika man̈araka torolalan̈an’ny Baiboly. Izikoa anarô fa miaraka mamaky Baiboly na miaraka man̈ano teny vakina isan’andra, koràn̈a nan̈ino torolalan̈an’ny Baiboly io mahatsara fianakavian̈anarô. Ohatra, zanakanao ma mahita fa ten̈a mahatsara mazoto miasa ndreky man̈ano ny marin̈y? (Heb. 13:18) Anao koa mety mikoran̈a aminany amy karakôry torolalan̈an’ny Baiboly io miaro ain̈intsika ndreky man̈ampy atsika ho sambatra. (Ohab. 14:29, 30) Anarô koa mikoran̈a torolalan̈an’ny Baiboly zen̈y, zen̈y han̈ampy zanakanao hahaiho tia fo torohevitrin’ny Baiboly.​—Vakia Ohabolana 2:10, 11.

12. Karakôry an̈ampian’ny baban’ny tsaiky araiky zanany hahita fa ten̈a mahatsara man̈araka torohevitrin’ny Baiboly?

¹² Steve mipetraka a France, man̈azava karakôry ataondrô fivadiany man̈ampy Ethan zanakandrô lelahy. Izy ampiandrô hahita fa fitiavan̈a fo mahavy Jehovah man̈amia lalàn̈anany. Ho Steve: “Zahay man̈ontany izy karaha ty: “Nan̈ino ma Jehovah man̈iraka atsika han̈aja torolalan̈anany? Nan̈ino raha zen̈y man̈aboaka fa izy tia atsika? Han̈ano karakôry izikoa anao tsy man̈araka torolalan̈a zen̈y?” Koran̈a karaha zen̈y nan̈ampy Ethan hatoky tsarabe fa marin̈y raha volan̈in’i Jehovah. Karaha ty koa ho Steve: “Tanjon̈onay han̈ampy Ethan hahita fa an̈aty Baiboly ao misy fahendrena tsara mandilatra fahendrenan’olombelon̈o.”

13. Akôry mety hampiofan̈an’ny raimandreny zanakanany han̈araka torolalan̈an’ny Baiboly? Man̈ameza ohatra.

¹³ Ampiofàn̈a zanakanao han̈araka torolalan̈an’ny Baiboly. Fomba araiky ahafahanao man̈ano zen̈y, lera zanakanao mahazo devoara baka a lekoly an̈y. Ohatra, izy mety mahazo devoara mamaky boky. An̈atin’izio mety misy olo man̈ano raha halan’i Jehovah, karaha ataon’ny mijangajanga na kafiry. Ke fomba nanoratan̈a boky io mety hahavy olo io hieritreritry fa mety fo man̈ano raha aby zen̈y. Ke anao mety man̈ontany zanakanao karakôry ataon’i Jehovah olo man̈ano ndreky mivolan̈a raha karaha zen̈y. Zen̈y man̈ampy zanakanao io hahita nan̈ino mahatsara izy man̈araka raha volan̈in’i Jehovah. (Ohab. 22:24, 25; 1 Kor. 15:33; Fil. 4:8) Ke lera mpampianatranany ndreky tsaiky lekoly  araiky aminany man̈ontany izy hevitrinany momba raha koran̈in’ny boky io lera izy man̈ano anjaranany io, izy hahavita hikoran̈a raha inoany amindrô.

AMPIANARA ZANAKANAO KARAKÔRY ATAO MIARO RAHA INOANY

14. Ino raha mety ho sarotro amindrô tanora aby io mikoran̈a izy, aviô nan̈ino?

¹⁴ Irô tanora kristianin̈y aby io ndraikindraiky mety havozo lera misy koran̈a momba evolision a lekoly an̈y. Nan̈ino? Fôtony mpampianatrandrô mety hivolan̈a fa ten̈a marin̈y ankitin̈y evolision io. Ke izikoa anao raimandreny, akôry mety han̈ampianao zanakanao hatoky ten̈a hiaro raha inoany?

15. Ino han̈ampy tanora kristianin̈y araiky ho resy lahatra tsarabe fa marin̈y raha inoany?

¹⁵ Ampia zanakanao baka hatoky tsarabe raha inoany. Tsy tôkony hampamen̈atra zanakanao foeky izy mino fisian’ny Mpamôron̈o zen̈y. (2 Tim. 1:8) Nan̈ino? Fôtony maro koa baka manam-pahaizan̈a momba siansy mahay fa fiain̈ana io tsy navinavy hoazy karaha io fo. Irô mahita fa tsy maintsy misy Mpamôron̈o faran’ny mahay namôron̈o raha manam-pahin̈ana, maro garamidany io. Ke zen̈y mahavy irô tsy man̈eky fampianaran̈a momba evolision ampianarin̈y amy lekoly maro eran-tany io. Fomba araiky mety hahavy zanakanao hahaihatoky tsarabe raha inoany, mandiniky ino antony nahavy irô rahalahy ndreky ranabavy maro resy lahatra fa ten̈a misy Mpamôron̈o. c

16. Akôry mety han̈ampian’ny raimandreny zanany hahavita han̈azava nan̈ino izy mino Mpamôron̈o? (1 Petera 3:15) (Zahava koa sary.)

¹⁶ Ampianara zanakanao hahay han̈azava nan̈ino izy mino fa misy Mpamôron̈o. (Vakia 1 Petera 3:15.) Mety hitanao han̈ampy tsarabe mimpody mandiniky ndraiky miaraka amy zanakanao, lahatsoratra amy jw.org, karaha ataon’ny “Manontany ny Tanora​—Nisy ho azy ve ny Fiainana sa Noforonina?” Ke zanakanao amy zay aviô mety hifidy fan̈azavan̈a hitany mety tsarabe han̈ampian̈a olo baka hahay fa ten̈a misy Mpamôron̈o. Iaraha midiniky aminany amy zay izio baka iô. Ampatsiarova izy fa izy tsy mila mimalo amy tsaiky lekoly araiky aminany. Ampirisiha koa izy han̈ano fan̈azavan̈a tsotra fo ndreky pare tsarabe, izikoa fa misy olo vôn̈ono hikoran̈a aminany. Ohatra, mety hisy tsaiky lekoly araiky aminany hivolan̈a: “Raha hitako fo inoako, kanefa zaho tsiary nahita Zan̈ahary.”  Tanora kristianin̈y araiky mety hamaly zen̈y karaha ty: “Diniha baka anao iziôty mandeha an̈atiala be an̈y, iô fo anao mahita vôvo voamboatra tsara mare. Akôry ho anao? Matoa vôvo io nisy tiô, tsy maintsy nisy olo fo nan̈amboatra izio. Ke intsaka eky tanintsika ty ndreky raha jiaby!”

17. Akôry mety hampirisihan’ny raimandreny zanakandrô hitady fomba hikoran̈ana amin’olo fahamarin̈ana amy Baiboly? Hazavà amin’ny ohatra.

¹⁷ Ampirisiha zanakanao hitady fomba hikoran̈ana fahamarin̈ana amy Baiboly. (Rom. 10:10) Izy mila mifen̈y mikoran̈a raha inoany io mety hampiran̈inao amin’ny ezaka mila ataon’olo araiky mianatra gitara. Amy voanalohany, mety hira tsotra antsendriky ianarany. Fa izikoa fa mandeha fotoan̈a, ho lôso mahaimahay fo izy. Karaha zen̈y koa, amy voanalohany, tanora kristianin̈y araiky mety hikoran̈a raha tsotsotra fo izikoa fa mikoran̈a amin’olo raha inoany. Ohatra, izy mety man̈ontany tsaiky lekoly araiky aminany karaha ty: “Asa mba hainao fa irô manam-pahaizan̈a aby io matetiky mangala tahaka raha niasain’ny Zan̈ahary? Alô baka haboakako anao video tsarabe ty.” Ke izy koa fa baka man̈aboaka amin’olo video Izio ma Nisy Namôron̈o? izy mety hivolan̈a karaha ty: “Irô manam-pahaizan̈a aby io mangala tahaka raha niasain’ny Zan̈ahary, ke mampalaza irô raha zen̈y. Fa azôvy ny ten̈a tôkony hamian̈a voninahitry? Irô mangala tahaka raha efa nisy io, sa lay namôron̈o raha nalaindrô tahaka io?” Koran̈a tsotra karaha zen̈y mety efa handrisiky irô tsaiky lekoly araiky aminany aby io hitandren̈y izy, ke han̈iry hahay raha maro momba Jehovah.

MIFEN̈A FO HAN̈AMPY ZANAKANAO HANKAFATATRA FINOAN̈ANANY

18. Akôry mety han̈ampian’ny raimandreny zanany hankafatatra fo finoandrô Zan̈ahary?

¹⁸ Atsika miain̈y amy donia feno olo tsy mino Jehovah. (2 Pet. 3:3) Ke anarô raimandreny koa fa mianatra Baiboly miaraka amy zanakanarô, ampirisiha izy handiniky raha han̈ampy izy hahaihan̈aja volan̈an’ny Zan̈ahary fo ndreky fitsipikinany momba fitondran-ten̈a. Ampia izy hahay handiniky tsarabe, ndreky hahavy izy hahaihino Jehovah fo. Ke koràn̈a miaraka aminany raha niforôn̈in’i Jehovah. Ampia izy hahatakatra irô faminanian̈an’ny Baiboly maro mahagaga, efa tanteraka aby io. Fa ny raha ten̈a maventy, mivavaha miaraka amy zanakanao, aviô mivavaha ninany. Izikoa anao man̈ano zen̈y, anao mety matoky fa Jehovah hitahy ezaka ataonao han̈ampian̈a zanakanao hankafatatra finoan̈anany.​—2 Tan. 15:7.