1-2. Ino aby raha mety hampitomoan̈y atsika?

 ATSIKA io samy mitomoan̈y ndraikindraiky. Izikoa misy raha mamparavoravo atsika mare, mety latsaka aby ranomasontsika. Misy koa atsika mitomoan̈y izikoa fa misy raha miavaka mandalo amy fiain̈anantsika, ohatra izikoa fa misy tsaiky vo teraka na koa lera atsika mahatsiaro raha efa ela, aviô izikoa atsika fa mahita olo araiky ten̈a tiantsika kanefa efa tsy hitantsika tan̈atin’ny taon̈o taon̈o.

² Kanefa matetiky, mitomoan̈y atsika, izikoa fa malahelo mare na lera misy raha mampijaly atsika mare. Ohatra, mitomoan̈y atsika izikoa fa misy olo atokisantsika mare, kanefa nivadiky tamintsika. Mety mitomoan̈y koa atsika izikoa fa mijaly fôtony marary na malahelo mare havantsika naty. Amy fotoan̈an’izen̈y, mety mira alahelon’i Jeremia tamy Jerosalema niravan̈in’ny Babylonianin̈y in̈y alahelontsika. Karaha ty ho Jeremia: ‘Ranomasonaka tsy vôly mijaveky karaha rano mandeha in̈y, sady tsy mahay vita.’​—Fitom. 3:48, 49.

3. Akôry ataon’i Jehovah izikoa izy fa mahita mpanomponany mijaly? (Isaia 63:9)

³ Hain’i Jehovah impiry atsika mitomoan̈y amy fiain̈anantsika jiaby, izikoa fa misy raha sarotro mandalo amy fiain̈anantsika. Baiboly mivolan̈a amintsika fa hain’i Jehovah tsiaraikiaraiky jaly mahazo atsika, aviô ren̈iny koa atsika izikoa fa mitomoan̈y mangataka fan̈ampian̈a aminany. (Sal. 34:15) Fa Jehovah tsy vitan’ny mahita ndreky maharen̈y atsika fo. Izy mira baba araiky tia zanaka in̈y. Ke izikoa Jehovah fa mahita atsika mitomoan̈y, ten̈a malahelo mare izy, aviô izy efa man̈ampy atsika edy.​—Vakia Isaia 63:9.

4. Ohatran-jôvy aby amy Baiboly ao ma hidinihintsika, aviô mampianatra atsika ino momba Jehovah raha zen̈y?

 ⁴ Amy Baiboly ao Jehovah man̈ambara, karakôry ataony izikoa fa misy mpanomponany mitomoan̈y nohon’ny raha mahazo irô, aviô karakôry ataon’i Jehovah man̈ampy irô. Hitantsika raha zen̈y izikoa atsika fa mandiniky ohatran’i Hana, Davida, ndreky Mpanjaka Hezekia. Ino ma raha nampitomoan̈y irô io? Akôry nataon’i Jehovah nan̈ampy irô? Aviô nan̈ino ma ohatrandrô io mankahery atsika izikoa atsika mitomoan̈y fôtony malahelo, nisy olo namadiky, na diso fan̈antinan̈a?

TOMOAN̈Y FÔTONY NATY HAVAN̈A

5. Ino ma raha nampitomoan̈y Hana?

⁵ Naro problemo natrefin’i Hana, ke raha zen̈y nampitomoan̈y izy. Araiky amy raha sarotro natrefiny zen̈y, vadiny nanambady aroe. Penina an̈aran’ny vadiny araiky. Tsy basin’izen̈y koa fa Hana io tsy manan-janaka, kanefa Penina io nanan-janaka maro oe. (1 Sam. 1:1, 2) Penina tsy vôly nikotran̈a Hana nohon’izy tsy nanan-janaka. Akôry eky nataonao izikoa anao tatran’ny raha karaha zen̈y? Nalahelo mare Hana ke “nitomoan̈y ndreky tsy nahinan-kanin̈y”, aviô lôso “nalahelo mare” fônany.​—1 Sam. 1:6, 7, 10.

6. Ino raha nankahery Hana?

⁶ Ke ino raha nankahery i Hana? An̈isan’ny raha araiky nan̈ampy izy, fandihanan̈a tamy tran̈olay masin̈y, tany fan̈anaovan̈a fanompoan̈a Jehovah. Mety narikitry fidiran̈a tamy lakoron’ny tran̈olay masin̈y io “izy nanomboko nivavaka tamy Jehovah ndreky nitomoan̈y mare.” Karaha ty fangatahan̈anany: “Mba zahava jalin’ny mpanomponao ke mba tsarova zaho.” (1 Sam. 1:10b, 11) Nambaran’i Hana i Jehovah tamy vavaka raha jiaby tan̈aty jerinany ndreky tan̈aty fônany. Ke Jehovah koa fa nahita Hana nitomoan̈y mare in̈y, nahinakinaka mare izy. Tiany mare baka i Hana io, ke tiany hankahery izy.

7. Hana koa fa baka nivavaka momba problemonany in̈y, nan̈ano karakôry izy?

⁷ Hana koa fa baka nan̈ambara Jehovah raha jiaby tan̈aty fônany, Ely Mpisôron̈obe nan̈amia toky izy fa Jehovah hamaly vavakanany. Akôry eky ho Hana? Karaha ty koran̈in’ny Baiboly: “Hana baka tiô nody tamy tany nisy izy sady nahalany hanin̈y. Hita tamy soranany koa fa izy tsy niasaloha eky.” (1 Sam. 1:17, 18) Nahatsiaro nahivankivan̈a i Hana, nata mbala tsy nazony raha nangatahiny. Efa napetrany tamy Jehovah baka raha jiaby nampalahelo izy. Nan̈ano raha ankitin̈y i Jehovah. Hain’i Jehovah raha nahazo izy aviô nitandrin̈esany vavakanany, baka iô Jehovah nan̈amia izy zanaka.​—1 Sam. 1:19, 20; 2:21.

8-9. Mifan̈araka amy raha volan̈in’ny Hebreo 10:24, 25, nan̈ino atsika tôkony hifen̈y handeha hivory fo ndray atsika mbala malahelo? (Zahava koa sary.)

⁸ Ino raha ianarantsika? Asa anao iziôty miatriky  raha sarotro ke mahavy anao mitomoan̈y mare? Mety naty havan̈a na kamarady anao. Izikoa amy fotoan̈a karaha zen̈y, tsy diso izikoa anao tihitokatokan̈a. Fa aza adin̈a ohatran’i Hana in̈y. Izy nandeha tamy tran̈olay masin̈y tan̈y, ke tan̈y Jehovah nankahery izy. Karaha zen̈y koa anao. Jehovah hankahery anao, izikoa anao mandeha mivory fo ndray anao mbala mahatsiaro reraka ndreky malahelo. (Vakia Hebreo 10:24, 25.) Izikoa atsika maharen̈y fan̈azavan̈a andininy mankahery baka amy Baiboly an̈y, Jehovah man̈ampy atsika tsy hieritreritry be raha mampalahelo atsika in̈y eky. Ke nata mbala tsy afaka alahelontsika jiaby, atsika efa hahatsiaro hahivankivan̈a edy.

⁹ Amy fivorian̈a an̈y koa misy rahalahy ndreky ranabavy maro hankahery atsika ndreky han̈aboaka fa atsika ten̈a tiandrô. Ke hahatsiaro hahivankivan̈a atsika izikoa miaraka amindrô an̈y. (1 Tes. 5:11, 14) Diniha baka ohatran’ny rahalahy araiky mpisava lalan̈a manokan̈a naty vady ty. Ho izy: “Tomoan̈y mare zaho. Ndraikindraiky aby zaho nangala koain̈y mipetraka mitomoan̈y fo. Kanefa zaho koa fa nandeha nivory, nahazo fankahirezan̈a nilaiko mare zaho. Irô rahalahy ndreky ranabavy aby io nivolan̈a raha ten̈a nankahery zaho sady ten̈a tsara fan̈ahy taminaka. Aviô koa valin-ten̈y nataondrô tamy fivorian̈a tan̈y ten̈a nankahery zaho. Ke zaho na malahelo be karakôry alohan’ny avy amy fivorian̈a, zaho koa fa avy an̈y tsy maintsy mahatsiaro mahazo angôvo fo.” Ke izikoa atsika mandeha mivory fo, Jehovah hampiasa irô rahalahy ndreky ranabavintsika aby io han̈ampy atsika.

10. Izikoa anao mbala malahelo mare, akôry hangalanao tahaka ohatran’i Hana in̈y?

¹⁰ Nahatsiaro nahivankivan̈a Hana izikoa fa nivavaka tamy Jehovah ke nan̈ambara raha tan̈aty fônany. Anao koa karaha zen̈y. Ke ‘koràn̈a amy [Jehovah], raha jiaby an̈aty fônao’ ke matokisa fa izy tsy maintsy hitandren̈y anao ndreky han̈ampy anao. (1 Pet. 5:7) Karaha zen̈y ziô ranabavy araiky ty. Nisy mpamaky tran̈o navy tamindrô tao namono vadiny. Karaha ty volan̈in’ny ranabavy io: “Kivy mare zaho, ke zaho tsy nieritreritry zaho mbala ho ravoravo zen̈y foeky. Fa isaka zaho nivavaka tamy Jehovah Babako sady ten̈a tia zaho io, zaho nahatsiaro nahivankivan̈a fo. Fa ndraikindraiky tsy haiko foeky fomba han̈azavako taminany raha tsapako. Isaka zaho malahelo ndreky miasaloha mare in̈y, zaho mangataka Jehovah hampilamin̈y fônaka ndreky sain̈inaka. Ke zaho baka tiô nahatsiaro nilamin-tsain̈y aviô kirikiry alahelonaka.” Ke izikoa anao mangataka vonjy amy Jehovah, ndreky mikoran̈a aminany raha mahavy anao malahelo mare io, Jehovah koa malahelo aviô hainy tsarabe raha mahazo anao io. Ke ndray problemonao mbala tsendriky afaka, Jehovah mahavita mankahery anao ndreky han̈ampy anao ho kalma fo. (Sal. 94:19; Fil. 4:6, 7) Hitany anao mifen̈y tsy mivadiky aminany ke izy hitahy anao.​—Heb. 11:6.

TOMOAN̈Y FÔTONY NIFITAHIN’OLO

11. Nan̈ano karakôry Davida izikoa fa naro olo nivadiky taminany?

¹¹ Davida niatriky raha naro sarotro tamy fiain̈ananany ke raha zen̈y nahavy izy nitomoan̈y. Nata kamaradinany ndreky fianakavian̈anany koa nivadiky taminany aviô nitady hamono izy foeky. (1 Sam. 19:10, 11; 2 Sam. 15:10-14, 30) Karaha ty raha nivolan̈iny tamin’izy niatriky raha faran’ny sarotro tamy fiain̈ananany: “Mitseky mare zaho ke reraka mare; mijaveky fo ranomasonaka ke len̈y fandrian̈anaka jiaby tamin’ny alin̈y; kobaninaka jiaby feno ranomaso.” Nan̈ino ma Davida nalahelo be karaha zen̈y? Karaha ty ho izy: “Fôtony naro olo nampijaly zaho.” (Sal. 6:6, 7) Ke Davida koa fa nampijalin’olo, kivy mare izy ke tsy vôly nitomoan̈y.

12. Izikoa Salamo 56:8 zahan̈a, resy lahatra tamin’ino ma Davida?

 ¹² Nata sarotro mare fiain̈anan’i Davida, izy resy lahatra fa Jehovah tia izy. Karaha ty ho izy: “Ho ren̈in’i Jehovah tomoan̈inaka.” (Sal. 6:8) Tandraraiky koa Davida nikoran̈a raha maro tsara amy Salamo 56:8. (Vakia.) Izikoa atsika fa mamaky irô volan̈a aby io, mazava amintsika fa Jehovah ten̈a tia atsika ndreky mahay raha mahazo atsika. Davida nivolan̈a fa Jehovah niran̈a raha namory ranomason’i Davida tan̈aty tavoangy na koa nanoratra raha momba zen̈y tamy boky araiky. Davida natoky fa hitan’i Jehovah izy aviô tsy adin̈an’i Jehovah raha niaretany. Davida resy lahatra fa Jehovah Babany an-dan̈itry an̈y io tsy vitan’ny mahay problemonany fo fa, mahay raha tsapany koa.

13. Izikoa misy olo mandiso fan̈antinan̈a atsika, ino raha tsy mila adin̈antsika? (Zahava koa sary.)

¹³ Ino raha ianarantsika? Asa anao ziôty malahelo mare fôtony vadinao nivadiky taminao na koa vôly nanompo Jehovah? Nisy rahalahy araiky, nijangajanga vadiny, aviô niala izy. Karaha ty nivolan̈in’ny rahalahy io: “Karaha tsy nino foeky zaho fa izy nahavita raha karaha in̈y taminaka. Zaho nalahelo, nahinihiny aviô karaha tsisy fôtiny foeky fahitako zaho.” Ke izikoa nisy olo nivadiky taminao na ten̈a nan̈ano raha nandiso fan̈antinan̈a anao, korazy anao fa Jehovah tsy mety hiala anao. Karaha ty volan̈in’ny rahalahy in̈y: “An̈isany raha nankahery zaho nieritreritry fa olo fo mety hivadiky amintsika fa Jehovah Lampimbatontsika. Ke ndray ino ndray ino raha mandalo, izy tsy mety hiala olo tsy mivadiky aminany.” (Sal. 37:28) Aza adin̈a koa fa Jehovah ten̈a tiantsika mandilatra fitiavan’olo atsika. Ke izikoa misy olo tianao namitaka anao, marin̈y ankitin̈y fa raha zen̈y ten̈a mampalahelo. Fa Jehovah tsy miova. Anao mbala tiany fo. Anao ten̈a valera aminany. (Rom. 8:38, 39) Ke ty raha tsy tsara adin̈anao: Ndray karakôry ndray karakôry fitondrasan’olo anao, anao tsy mety harian’i Jehovah Babanao an-dan̈itry an̈y.

14. Ino toky amian’ny Salamo 34:18 atsika?

¹⁴ Izikoa nisy olo namitaka anao, mety ankahery anao volan̈an’i Davida amy Salamo 34:18. (Vakia.) Misy boky araiky mivolan̈a fa olo “tôrotôro fô” zen̈y mety “olo mahatsapa fa irô tsisy fôtiny foeky.” Ke karakôry ataon’i Jehovah man̈ampy olo karaha zen̈y? Jehovah karaha baba be fitiavan̈a mitana tan̈an’ny zanany ndreky mankahery izy lera izy kivy in̈y. “Izy marikitry” atsika. Izy mahinakinaka atsika ndreky vôn̈ono han̈ampy atsika fo, izikoa atsika mijaly fôtony voafitaka ndreky nialan̈a. Izy vôn̈ono fo hankahery atsika izikoa atsika kivy ndreky mahatsapa ten̈a tsisy  dikany. Aviô izy koa man̈amia raha maro baka han̈ampian̈a atsika hiaritry raha sarotro andalovantsika iziôty.​—Isaia 65:17.

TOMOAN̈Y FÔTONY KIVY

15. Ino ma raha nampitomoan̈y Mpanjaka Hezekia?

¹⁵ Tamin’i Hezekia mpanjakan’i Joda 39 taon̈o, izy narary mare. Mpaminan̈y Isaia nivolan̈a hafatra Jehovah taminany fa aretin̈inany io hamono izy. (2 Mpanj. 20:1) Karaha fa tsisy fan̈antinan̈a eky Hezekia tamy zen̈y. Ke izy koa fa naharen̈y vaovao io, nalahelo mare izy aviô nitomoan̈y mare.​—2 Mpanj. 20:2, 3.

16. Nataon’i Jehovah karakôry Hezekia?

¹⁶ Nahinakinaka mare Jehovah izikoa fa naharen̈y fangatahan̈an’i Hezekia ndreky nahita izy nitomoan̈y mare in̈y. Ke Jehovah nivolan̈a taminany: “Ren̈iko vavakanao. Hitako ranomasonao jiaby in̈y. Zaho hampajanga anao.” Nampiasa Isaia Jehovah ke nampan̈anten̈a i Hezekia fa hampitombosiny andra iain̈any, aviô hivonjeny ampelantan̈an’ny Asyrianin̈y aby io Jerosalema.​—2 Mpanj. 20:4-6.

17. Akôry ataon’i Jehovah manohan̈a atsika izikoa atsika marary mare? (Salamo 41:3) (Zahava koa sary.)

¹⁷ Ino raha ianarantsika? Asa anao iziôty marary ke karaha efa tsisy fan̈antinan̈a eky? Mivavaha amy Jehovah, nata anao mitomoan̈y tsy man̈ino. Baiboly man̈amia toky atsika fa “Baban’ny hinakinaka ndreky fankahirezan̈a jiaby” io hankahery atsika amy fitsapan̈a jiaby mahazo atsika. (2 Kor. 1:3, 4) Atsika iziôty tsy man̈anten̈a Jehovah han̈adoso problemontsika jiaby, fa atsika ndraiky mety matoky fa izy hanohan̈a atsika. (Vakia Salamo 41:3.) Mampiasa fan̈ahy masin̈inany izy han̈amezan̈a angôvo atsika, fahendrena, aviô filaminan-tsain̈y. (Ohab. 18:14; Fil. 4:13) Izy koa manohan̈a atsika ke man̈amia fan̈antinan̈a amy Baiboly, mivolan̈a fa amin’ny amaray an̈y, mbala hadosony karazan̈a aretin̈y jiaby.​—Isaia 33:24.

18. Ino andininy hitanao mankahery anao, izikoa anao fa miatriky raha faran’ny sarotro? (Zahava efajoro “ Volan̈a Mankahery Atsika Izikoa Atsika fa Mitomoan̈y.”)

¹⁸ Nankahery Hezekia naharen̈y volan̈an’i Jehovah taminany. Ke izikoa atsika kivy, volan̈an’i Jehovah amy Baiboly ao mety hankahery atsika ndreky han̈ampy atsika ho kalma. (Rom. 15:4) Karaha zen̈y ranabavy araiky. Izy koa fa hainy fa misy kansera, matetiky izy mitomoan̈y fo. Karaha ty nivolan̈iny: “Isaia 26:3 hitako ten̈a nankahery zaho. Ndray zaho tsy mahavita man̈adoso aretin̈inaka io, andininy io mampan̈anten̈a fa Jehovah mahavita man̈ampy atsika ho kalma, ndreky mahavita man̈ampy atsika hiatriky zay fitsapan̈a mandalo.” Ke asa misy andininy araiky mba hitanao fa ten̈a mampakalma anao izikoa anao fa miatriky raha hitanao fa ten̈a sarotro na karaha efa tsisy fan̈antinan̈a foeky?

19. Ino raha tsara miambin̈y atsika amin’ny amaray?

¹⁹ Efa ten̈a marikitry faran’ny donia ty. Ke tsy  gaga atsika izikoa hahaimaro fo raha mampanehotehoko atsika, ndreky hampalahelo atsika ke hahavy atsika hitomoan̈y. Fa karaha hitantsika tamin’ny ohatran’i Hana, Davida ndreky Mpanjaka Hezekia in̈y, hitan’i Jehovah ranomasontsika io, ke izy ten̈a mahinakinaka atsika. Ten̈a valera aminany ranomasontsika io. Ke izikoa atsika fa miatriky raha ten̈a mampakivy, tsara izikoa koran̈intsika aminany amy vavaka raha zen̈y. Irarian̈a atsika tsy hitokantokan̈a fa hiaraka amindrô rahalahy ndreky ranabavy amy fiangonan̈a, ten̈a tiantsika aby io. Irarian̈a koa atsika hamaky Baiboly, baka hahazo fankahirezan̈a baka amy Jehovah. Matoky atsika fa izikoa atsika miaritry ndreky tsy mivadiky fo, Jehovah hitahy atsika. An̈isan’izen̈y fampan̈antinan̈anany fa hamafa ranomasontsika amy raha jiaby mety hampitomoan̈y atsika, karaha ataon’ny fahafatesan’ny havan̈a, alahelo, fitaka, ndreky hakivian̈a. (Apok. 21:4) Ke izikoa atsika hitomoan̈y amy zen̈y, tsy ranomason’ny alahelo eky fa ho ranomason’ny haravoan̈a.